ថ្ងៃនេះឧកញ៉ាញូស៍សូមបើកបង្ហាញពីប្រាក់ចំណូល​អ្នក​របរលក់ចេកអាំងចល័តក្នុងរាជធានីភ្នំពេញ។

លោក ហេង សៀម ដែល​ប្រកបរបរលក់ចេកអាំងអស់រយៈពេល ១០ ឆ្នាំ​បានប្រាប់ឧកញ៉ាញូស៍ថា មួយថ្ងៃលោក​អាចរកចំណូលបាន​ពី ៣០ ទៅ ៤០ម៉ឺនពីមុខ​របរ​លក់​ចេក​អាំង​តាម​ផ្លូវ​។ បើកាត់​កង​ការ​ចំណាយ បុរស​រូប​នេះ​បង្ហើប​មិន​លាក់​លៀម​ អាច​សល់ជាង​​ ១០ ម៉ឺន​ដែរ​។

ចេកអាំង​ចល័ត​ដែល​បុរ​សរូ​បនេះប្រកប​ជាង ១០ ឆ្នាំ​​ គឺ​ចាប់បើកលក់​​ពីម៉ោង ៩ ព្រឹករហូតដល់ម៉ោង ៦ ល្ងាច។ ចំពោះទីតាំងលក់គឺចាប់ពីស្ពានក្បាលថ្នល់រហូតដល់ផ្សារបឹងត្របែក។​

លោក ហេង សៀម បាន​បង្ហើប​ថា ចេក​អាំង​របស់​លោក​ទទួលការ​គាំទ្រខ្លាំងពីបងប្អូនតាមដងផ្លូវ ដោយសារ​រសជាតិ គុណភាពបូកផ្សំនឹងតម្លៃផងដែរ។

បុរស​វ័យ ៣៧ ឆ្នាំរូបនេះបន្តថា ក្នុងមួយថ្ងៃគាត់ត្រូវចំណាយថវិកាទិញចេកម្ដង ៤០ ស្និត ដំឡូង ស្ករ និងអង្ករដើម្បីធ្វើនំ។ ទោះបី​ត្រូវ​ហាលក្តៅហាល​ភ្លៀងជួប​ការ​លំបាក និង​ហត់​បន្តិច​ លោក ហេង សៀម ប្រាប់​ដោយ​មិនស្ទាក់ស្ទើរ​ថា លោក​សុខ​ចិត្ត​តស៊ូ​ជាមួយ​មុខរបរ​នេះ​ដែល​ជាការងារសុចរិត មាន​ឯករាជ្យលើខ្លួនឯង មិន​រស់នៅក្រោមសម្ពាធរបស់នរណាម្នាក់។

តាមរយៈឧកញ៉ាញូស៍ លោក ហេង សៀប ក៏​ផ្ដាំផ្ញើផងថា ការងារណាក៏ល្អដែរ ឱ្យតែសុចរិតមិនកេងប្រវ័ញ្ចអ្នកដទៃព្រោះតែប្រយោជន៍សួនតួនោះ៕

The post ទម្លាយចំណូល​អ្នក​លក់​ចេកអាំងចល័ត​តាមផ្លូវ មួយ​ថ្ងៃ​រក​បាន​ប៉ុន្មាន​​​? appeared first on .

សហគ្រិនខ្មែរ បានបង្ហាញ ៥ចំណុចដែលជាគំនិតសំខាន់ៗជួយក្នុងការបើកអាជីវកម្មមួយឲ្យបានជោគជ័យរួមមាន៖

ត្រូវមានចក្ខុវិស័យច្បាស់លាស់មួយ៖ មុនចាប់ផ្ដើមអាជីវកម្មមួយ អ្នកអាចសួរខ្លួនឯងថាហេតុអ្វីបានជាចង់បើកអាជីវកម្មប្រភេទហ្នឹង? តើអនាគតទៅអាជីវកម្មនេះ អាចនឹងដើរដល់ចំណុចណា? មានឧបសគ្គអ្វីខ្លះ? ហើយអ្នកអាចដោះស្រាយវាបានតាមវិធីណាខ្លះ? ក្រៅពីនេះ អ្នកត្រូវកំណត់គោលដៅឲ្យជាក់លាក់​ទាក់ទងនឹងប្រាក់ចំណូល និងអតិថិជនគោលដៅក្នុងរយៈពេលណាមួយ។ ឧទាហរណ៍ ការទទួលបានអតិថិជន ១០០ នាក់ក្នុងមួយខែ និងរកចំណូលបានយ៉ាងហោចណាស់ ​៧០០​ដុល្លារក្នុងមួយខែ។

សិក្សាពីប្រភេទអតិថិជន៖ ក្នុងន័យនេះ គឺសំដៅដល់ តើនរណាដែលជាអតិថិជនគោលដៅរបស់អ្នក? អាច​ជា​កូនក្មេង យុវវ័យ ឬមនុស្សចាស់​ និងទីតាំងដែលពួកគាត់រស់នៅជាដើម​ ដើម្បីងាយស្រួលកំណត់គុណតម្លៃផលិតផលឲ្យសមស្របនឹងអតិថិជន ទាំងតម្លៃ និងគុណភាព​។ ជាពិសេស អ្នកអាចធ្វើឲ្យផលិផលនោះកាន់តែទាក់ទាញជាមួយនឹងគំនិតច្នៃប្រតិដ្ឋឲ្យត្រូវនឹងបញ្ហារបស់អតិថិជនផងដែរ។

សាកល្បងផលិតផល ឬសេវាកម្មរបស់អ្នក៖ ដើម្បីដឹងថាផលិតផល ឬសេវាកម្មរបស់អ្នកអាចលក់ចេញបានច្រើនឬអត់ ក្រៅពីការកំណត់គុណតម្លៃឲ្យសមស្របនឹងអតិថិជនដែលជាគោលដៅសម្រាប់អាជីវកម្មរបស់អ្នកហើយនោះគឺការសាកល្បងផលិតផល ឬសេវាកម្មនៃអាជីវកម្ម ថាតើអតិថិជននឹងពេញចិត្តកម្រិតណាលើផលិតផលដែលអ្នកចង់លក់ចេញទៅឲ្យពួកគាត់ អ្នកអាចធ្វើជាផលិតផលបែបគំរូ (sample) ដែលមានទំហំតូច និងបរិមាណតិច ហើយឲ្យពួកគាត់សាកល្បងប្រើជាមុនសិន មុននឹងបញ្ចេញលក់ជាផ្លូវការ ដើម្បីវិភាគមើលថាមានមនុស្សច្រើនឬអត់ដែលចូលចិត្តប្រើផលិតផលទាំងនោះ។

កំណត់តម្លៃ៖ ការកំណត់តម្លៃគឺត្រូវប្រាកដថា អ្នកចេះថ្លឹងថ្លែងតម្លៃនោះដោយផ្អែកលើគុណភាពផលិតផលឲ្យសមស្របទៅនឹងការចំណាយជាមធ្យមរបស់អតិថិជនគោលដៅ។ មួយវិញទៀត អ្នកត្រូវគិតគូរអំពីការប្រកួតប្រជែងតម្លៃជាមួយដៃគូប្រកួតប្រជែងផងដែរ ដើម្បីធ្វើយ៉ាងណាឲ្យទទួលបានប្រាក់ចំណេញ និងអាចទាញយកអតិថិជនពីដៃគូប្រជែងរបស់អ្នកបាន។ លើសពីនេះ បើអ្នកចង់ដំឡើងតម្លៃក្នុងកាលៈទេសៈណាមួយ អ្នកត្រូវចេះវិភាគថាបើអ្នកដំឡើងថ្លៃ តើអតិថិជននឹងថយចុះឬយ៉ាងណា និងប្រសិនបើបញ្ចុះតម្លៃវិញ តើអតិថិជនអាចនឹងកើនបានប៉ុនណា។

បើកចិត្តទទួលការរិះគន់បែបស្ថាបនា៖ ក្រៅពីខ្លួនអ្នកផ្ទាល់ មនុស្សដែលនៅជុំវិញខ្លួនអ្នកដូចជា មិត្តភក្តិ គ្រួសារ សាច់ញាតិ គឺសុទ្ធតែអាចផ្តល់ជាយោបល់ដល់អ្នកបាន ពិគ្រោះជាមួយពួកគេពេលជួបបញ្ហា ព្រោះពេលខ្លះអ្នកទាំងនោះអាចមានបទពិសោធន៍ទាក់ទងនឹងការរកស៊ីច្រើនជាងអ្នក។ ម្យ៉ាងវិញទៀត មតិរបស់អតិថិជនក៏ជាផ្នែកសំខាន់មួយសម្រាប់អ្នកយកទៅស្ថាបនាអាជីវកម្មរបស់អ្នកដែរ។ ត្រូវចាំថា មតិរបស់អតិថិជនអាចចេញមកវិជ្ជមាន និងអវិជ្ជមាន ដូច្នេះហើយអ្នកត្រូវទទួលយកវាទៅគិតពិចារណា ហើយឆ្លើយតបទៅពួកគេវិញឲ្យបានសមស្រប ទើបការរកស៊ីអាចដើរទៅមុខបានយ៉ាងរលូន។

បើតាមសហគ្រិនខ្មែរ គំនិតនៃការបើកអាជីវកម្មអាចមានច្រើន និងមានលក្ខណ:ខុសៗគ្នា អាស្រ័យលើទំហំ និងប្រភេទអាជីវកម្មដែលអ្នកចង់បើកដំណើរការ។ ការរៀបរាប់ខាងលើគឺជាចំណុចទូទៅដែលសហគ្រិន និងអាជីករ ភាគច្រើនឧស្សាហ៍យកមកអនុវត្តមុនសម្រេចចិត្តបង្កើតអាជីវកម្មរបស់ពួកគាត់ អាស្រ័យហេតុនេះហើយ ប្រសិន​បើអ្នក​កំពុង​មាន​គំនិតចង់​បើក​អាជីវកម្មណាមួយ​ អ្នកអាចពិចារណាលើចំណុចទាំងនេះបាន ហើយយើងសង្ឃឹមថា វា​នឹងជួយជាគំនិតដល់អ្នកបានមួយភាគដែរ៕

The post មុនចង់ចេញរកសុី មកអានគំនិតសំខាន់ៗទាំង ៥នេះ appeared first on .