ក្រសួងកសិកម្ម បានបញ្ជាក់ឱ្យដឹងថា បច្ចុប្បន្ន​ ប្រទេសកម្ពុជាមានក្រុមហ៊ុន​ និងសិប្បកម្មខ្នាតមធ្យមជាង១០​ ដែលបាននិងកំពុងផលិតជីសរីរាង្គក្នុងស្រុក​ ក្នុងបរិមាណជាង៤ម៉ឺនតោន​ ក្នុងមួយឆ្នាំ​ ដើម្បីផ្គត់ផ្គង់ដល់ប្រជាកសិករ។

លោក គង់ ច័ន្ទវាសនា មានការសប្បាយចិត្តដែលកូនខ្មែរមានសមត្ថភាពក្នុងការបង្កើតសិប្បកម្ម ឬរោងចក្រផលិតជីសរីរាង្គក្នុងស្រុក ដែលជួយបង្កើតការងារ ដោះស្រាយបញ្ហាបរិស្ថាន កាត់បន្ថយការប្រើប្រាស់ជីគីមីនាំចូលពីបរទេស កាត់បន្ថយថ្លៃដើមផលិត និងជួយបង្កើនប្រាក់ចំណេញសម្រាប់ប្រជាកសិករ។

លោកក៏បានបញ្ជាក់ថា បន្ទាប់ពីទស្សនកិច្ចជុំទី៤នេះ លោកនឹងរៀបចំរបាយការណ៍គោរពជូនថ្នាក់ដឹកនាំសម្រេចថាទៅមុខនេះយើងគួររៀបចំជាគោលនយោបាយបែបណាដើម្បីជួយគាំទ្រ ជួយលើកទឹកចិត្តដល់ការផលិតជីសរីរាង្គក្នុងស្រុក ក៏ដូចជាការប្រើប្រាស់ជីសរីរាង្គក្នុងស្រុកនេះឱ្យបានទូលំទូលាយថែមទៀត ក្នុងគោលដៅកាត់បន្ថយថ្លៃដើមផលិត និងបង្កើនប្រាក់ចំណេញ ដើម្បីលើកកម្ពស់ជីវភាពរបស់ប្រជាកសិករ។

លោក គង់ ច័ន្ទវាសនា ក៏បានលើកទឹកចិត្តឱ្យក្រុមហ៊ុនផលិតជីក្នុងស្រុកទាំងអស់​ឱ្យបន្តផលិតស្របតាម​ស្តង់ដារ​បច្ចេកទេស​ ដើម្បីធានាគុណភាព​ និងចែកចាយក្នុងតម្លៃសមរម្យជូនប្រជាកសិករប្រើប្រាស់កាន់តែទូលំទូលាយថែមទៀត៕

The post បច្ចុប្បន្ន​ កម្ពុជាមានក្រុមហ៊ុន​ និងសិប្បកម្មខ្នាតមធ្យមជាង១០​ កំពុងផលិតជីសរីរាង្គក្នុងស្រុក​ ផលិតបាន ជាង៤ម៉ឺនតោន​ ក្នុងមួយឆ្នាំ​ appeared first on .

នេះបើយោងតាមដំណើរចុះពិនិត្យខ្សែច្រវាក់ផលិតកម្ម និងផ្តល់ការគាំទ្រដល់ក្រុមហ៊ុនផលិតជីក្នុងស្រុក នៅខេត្តសៀមរាប ខេត្តឧត្ដរមានជ័យ និងខេត្តកំពង់ធំ ដែលដឹកនាំដោយលោក គង់ ច័ន្ទវាសនា រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ កាលពីថ្ងៃទី១៤-១៥ ខែធ្នូ ឆ្នាំ២០២៤។

ចុះឱកាសដំណើរចុះពិនិត្យខ្សែច្រវាក់ផលិតកម្មនោះ ក្រសួងកសិកម្ម បានឱ្យដឹងថា ក្រុមហ៊ុន Husk Ventures ដែលជាក្រុមហ៊ុនវិនិយោគបរទេស នៅខេត្តកំពង់ធំ បាននាំចេញដោយជោគជ័យនូវផលិតផលជីសរីរាង្គចំនួន ៣០០តោន ទៅកាន់ប្រទេសវៀតណាម ក្នុងឆ្នាំ២០២៤នេះ និងគ្រោងបង្កើនការនាំចេញដល់ ២០០០តោន នៅឆ្នាំ២០២៥ខាងមុខ។

លើសពីនេះ ក្រុមហ៊ុនក៏មានផែនការពង្រីកទីផ្សារក្នុងស្រុក និងក្រៅស្រុកបន្ថែមទៀតផងដែរ ស្របពេលដែលក្រុមហ៊ុនបានទិញឧបករណ៍ថ្មី និងគ្រោងផលិតជីសរីរាង្គឱ្យបាន ១០ ០០០តោន ក្នុងឆ្នាំ២០២៥។

ជាងនេះទៀត ក្រុមហ៊ុនបានប្រើប្រាស់បច្ចេកវិទ្យាដែលជួយក្រុមហ៊ុនឱ្យលក់កាបោន ដែលកើតចេញពីការផលិតជីសរីរាង្គនេះ នៅលើទីផ្សារអន្តរជាតិបានទៀតផង។

បើតាមក្រសួងកសិកម្ម ជីសរីរាង្គដែលផលិតចេញពីកាកសំណល់ផ្សេងៗក្នុងស្រុក ផ្តល់អត្ថប្រយោជន៍ជាច្រើន ដូចជា ជួយកាត់បន្ថយថ្លៃដើមផលិត និងបង្កើនប្រាក់ចំណេញរបស់កសិករ ដោយសារមានតម្លៃទាបជាងជីគីមីនាំចូល បង្កើតការងារ រក្សាគុណភាពដី ដោះស្រាយបញ្ហាអនាម័យ និងកាត់បន្ថយផលប៉ះពាល់ផ្នែកបរិស្ថាន។

ក្នុងន័យនេះ ក្រសួងក៏បានលើកទឹកចិត្តឱ្យបងប្អូនប្រជាកសិករបង្កើនការប្រើប្រាស់ជីសរីរាង្គ ដោយកាត់បន្ថយការប្រើប្រាស់ និងការពឹងផ្អែកទាំងស្រុងលើជីគីមីនាំចូលពីបរទេស ហើយក្រសួងនឹងផ្តល់ការគាំទ្រចាំបាច់បន្ថែមដល់ក្រុមហ៊ុនផលិតជីសរីរាង្គក្នុងស្រុក ដើម្បីបង្កើនសមត្ថភាពផលិត ស្របតាមតម្រូវការទីផ្សារ និងប្រជាកសិករផងដែរ៕

The post ក្រុមហ៊ុនផលិតផលជីសរីរាង្គមួយនៅខេត្តកំពង់ធំ គ្រោងបង្កើនការនាំចេញជីឱ្យបាន ២០០០តោន ទៅវៀតណាម នៅឆ្នាំ២០២៥ខាងមុខ appeared first on .