ជំទាវ ស៊ីន សុផលដានីតា

លោកជំទាវ ស៊ីន សុផលដានីតា ត្រូវបានតែងតាំងជា នាយិការងនៃវិទ្យាស្ថានខ្មែរជំនាន់ថ្មី

ឧកញ៉ាដែនដី — Fri, 14 Aug 2026 02:18:11 +0000

បណ្ឌិត ណុប នរិន្ទ នាយកវិទ្យាស្ថានខ្មែរជំនាន់ថ្មី នៅថ្ងៃទី៤ ខែសីហា ឆ្នាំ២០២៦ បានចេញសេចក្តីសម្រេចតែងតាំង លោកជំទាវ ស៊ីន សុផលដានីតា ជានាយិការងនៃវិទ្យាស្ថានខ្មែរជំនាន់ថ្មី ទទួលបន្ទុកផ្នែកផ្សព្វផ្សាយអាហារូបករណ៍ ទំនាក់ទំនងការងារនិស្សិត និងស្វែងរកជំនួយឧបត្ថម្ភគាំទ្រនិស្សិតអាហារូបករណ៍ក្រីក្រ។

បន្ទាប់ពីទទួលបានការតែងតាំងនេះ លោកជំទាវ ស៊ីន សុផលដានីតា បានបង្ហោះសារថ្លែងអំណរគុណបែបនេះថា៖ “នាងខ្ញុំ ស៊ីន សុផលដានីតា សូមថ្លែងអំណរគុណយ៉ាងជ្រាលជ្រៅ ចំពោះ ឯកឧត្តមនាយក ថ្នាក់ដឹកនាំ សហការី ដែលបានផ្តល់សេចក្តីទុកចិត្ត និងកិត្តិយស តែងតាំងរូបខ្ញុំជានាយិការង នៃ (វិទ្យាស្ថានខ្មែរជំនាន់ថ្មី)។ នាងខ្ញុំនឹងខិតខំបំពេញតួនាទី និងភារកិច្ចដោយស្មារតីទទួលខុសត្រូវ ស្មោះត្រង់ និងអស់ពីសមត្ថភាព ដើម្បីរួមចំណែកអភិវឌ្ឍស្ថាប័ន និងយុវជនសិស្សនិស្សិត ឱ្យកាន់តែរីកចម្រើន។ សូមគោរព និងអរគុណយ៉ាងជ្រាលជ្រៅចំពោះ ការជឿទុកចិត្តមកលើនាងខ្ញុំ ដោយក្តីគោរពអំពីនាងខ្ញុំ”។

លោកជំទាវ ស៊ីន សុផលដានីតា ជាម្ចាស់ហាងសេវាកម្មរៀបចំកម្មវិធី អិន អេន អិន (N&N) និងជាសហគ្រិនវ័យក្មេងឆ្នើមមួយរូបនៅខេត្តកំពង់ស្ពឺ។ លោកជំទាវវ័យក្មេងរូបនេះ ក៏បានបញ្ចប់ថ្នាក់បរិញ្ញាបត្រលើជំនាញច្បាប់ នៅវិទ្យាស្ថានខ្មែរជំនាន់ថ្មី និងទទួលសញ្ញាបត្រ ក្រោមអធិបតីភាពសម្តេចតេជោ ហ៊ុន សែន អតីតនាយករដ្ឋមន្ត្រីកម្ពុជា កាលពីថ្ងៃទី៦ ខែមីនា ឆ្នាំ២០២៣។

សូមជម្រាបថា វិទ្យាស្ថានខ្មែរជំនាន់ថ្មី គឺជាគ្រឹះស្ថានអប់រំបណ្តុះបណ្តាលបច្ចេកទេស និងវិជ្ជាជីវៈឯកជនមួយ ដែលត្រូវបានទទួលស្គាល់ពីរាជរដ្ឋាភិបាលតាមអនុក្រឹត្យចុះថ្ងៃទី២៨ ខែធ្នូ ឆ្នាំ២០១១។ វិទ្យាស្ថាននេះស្ថិតនៅក្រោមឱវាទក្រសួងការងារ និងបណ្តុះបណ្តាលវិជ្ជាជីវៈ។ វិទ្យាស្ថានខ្មែរជំនាន់ថ្មី ធ្វើការបណ្តុះបណ្តាលសិក្ខាកាម សិស្ស និស្សិតចាប់ពីកម្រិតវិញ្ញាបនបត្រវិជ្ជាជីវៈ រហូតដល់កម្រិតបរិញ្ញាបត្រជាន់ខ្ពស់។ ជាពិសេស វិទ្យាស្ថាននេះបានជួយបណ្តុះបណ្តាលនិស្សិតក្រីក្រជាច្រើន តាមរយៈអាហារូបករណ៍ សសយក.រាជធានីភ្នំពេញ និងអាហារូបករណ៍របស់ថ្នាក់ដឹកនាំផ្សេងៗផងដែរ៕

The post លោកជំទាវ ស៊ីន សុផលដានីតា ត្រូវបានតែងតាំងជា នាយិការងនៃវិទ្យាស្ថានខ្មែរជំនាន់ថ្មី appeared first on .

តើជំទាវវ័យក្មេង CEO សេវាកម្មរៀបចំកម្មវិធី អិន អេន អិន ជានរណា?

ឧកញ៉ាដែនដី — Fri, 31 Mar 2023 12:23:12 +0000

លោកជំទាវ ស៊ីន សុផលដានីតា នាយិកាសេវាកម្មរៀបចំកម្មវិធី អិន អេន អិន (N&N) ជាសហគ្រិនវ័យក្មេងឆ្នើមមួយរូបនៅខេត្តកំពង់ស្ពឺ។

កញ្ញា ជាម្ចាស់ហាង អិន អេន អិន ដែលមានសេវាកម្មទទួលរៀបចំពិធីក្រុងពាលី ចម្រើនព្រះបរិត្ត រៀបចំជំនូន (ជើងពាន និង តោកមាស) និងមានលក់កន្រ្កកកាដូគ្រប់ប្រភេទ ដែលមានទីតាំងនៅ បុរីឈុនទីន ក្រុងច្បារមន ខេត្តកំពង់ស្ពឺ។ ក្រៅពីម្ចាស់ហាងដ៏ធំ កញ្ញា សុផលដានីតា ក៏ជាមន្ត្រីផ្នែកហិរញ្ញវត្ថុ នៅរដ្ឋបាលខណ្ឌមានជ័យ និងធ្លាប់ជាជំនួយការផ្ទាល់ លោក ពេជ្រ កែវមុនី អតីតអភិបាល នៃគណៈអភិបាលខណ្ឌមានជ័យ ហើយកញ្ញាក៏ជាសមាជិកក្រុមការងារចុះជួយសង្កាត់ស្ទឹងមានជ័យ២ ផងដែរ។

លោកជំទាវវ័យក្មេងរូបនេះ ទើបបញ្ចប់ថ្នាក់បរិញ្ញាបត្រលើជំនាញច្បាប់ នៅវិទ្យាស្ថានខ្មែរជំនាន់ថ្មី និងទើបទទួលសញ្ញាបត្រ ក្រោមអធិបតីភាពសម្តេចតេជោ ហ៊ុន សែន នាយករដ្ឋមន្ត្រីកម្ពុជា កាលពីថ្ងៃទី៦ ខែមីនា ឆ្នាំ២០២៣នេះ។ លោកជំទាវជាកូនស្រីរបស់ឧត្ដមសេនីយ៍ត្រី ផែន សុផល ទីប្រឹក្សាក្រសួងមហាផ្ទៃ ដែលមានឋានៈស្មើ «អគ្គនាយក» និងលោកជំទាវ ទឹម ចិន្តា។

កាលពីថ្ងៃទី២៩ ខែមីនា ឆ្នាំ២០២៣ លោកជំទាវ សុផលដានីតា ទើបប្រារព្វពិធីឡើងគេហដ្ឋានថ្មីចំនួនពីរ ហាងថ្មី នៅ បុរី ឈុនទីន ក្រុងច្បារមន និងរថយន្តទំនើបថ្មី ដែលទើបទិញផងដែរ។ គេសង្កេតឃើញថា សហគ្រិនវ័យក្មេងរូបនេះ ជាបុគ្គលដែលស្រឡាញ់រថយន្តទំនើបៗ និងតែងតែផ្លាស់ប្តូររថយន្តទំនើបៗ ថ្លៃៗជាញឹកញាប់។

សូមជម្រាបថា ក្រៅពីការងារជាមន្ត្រីរាជការ និងការប្រកបមុខជំនួញ លោកជំទាវ សុផលដានីតា តែងតែចំណាយថវិកាផ្ទាល់ខ្លួនជួយដល់សង្គម និងរដ្ឋបាលខេត្តកំពង់ស្ពឺ ជាហូហែរ។ ជាក់ស្តែង កាលពីថ្ងៃទី៤ ខែវិច្ឆិកា ឆ្នាំ២០២២ កញ្ញាបានឧបត្ថម្ភថវិកា ២លានរៀល ជូនរដ្ឋបាលខេត្តកំពង់ស្ពឺ ក្នុងពិធីប្រណាំងទូក។ តាមរយៈការបរិច្ចាគថវិកាជួយសង្គមជាច្រើន ទាំងការជួយកសាងវត្តអារាម ជួយក្មេងកំព្រា និងជួយជនរងគ្រោះផ្សេងៗទាំងនេះ បានធ្វើឱ្យកញ្ញា ទទួលបានគ្រឿងឥស្សរិយយស ព្រះរាជាណាចក្រកម្ពុជា ថ្នាក់ មហាសេរីវឌ្ឍន៍ និងត្រូវបានបំពាក់ដោយឯកឧត្តមបណ្ឌិត ហ៊ុន ម៉ាណែត អគ្គមេបញ្ជាការរងនៃកងយោធពលខេមរភូមិន្ទ និងជាមេបញ្ជាការកងទ័ពជើងគោក កាលពីថ្ងៃទី៤ ខែកក្កដា ឆ្នាំ២០២២៕

The post តើជំទាវវ័យក្មេង CEO សេវាកម្មរៀបចំកម្មវិធី អិន អេន អិន ជានរណា? appeared first on .