យោងតាមប្រធានក្រុមប្រឹក្សាភិបាលនៃសមាគមអ្នកចិញ្ចឹមសត្វកម្ពុជាបានឱ្យដឹងថា បន្ទាប់ពីជួបពិភាក្សាជាមួយគ្នានៅថ្ងៃទី៩ ខែមករា ដល់ថ្ងៃទី២៩នេះ ខាងក្រុមហ៊ុននាំចូលសាច់បង្កកទិញជ្រូកក្នុងស្រុកសម្រាប់កែច្នៃលក់បន្តមិនទាន់មានការកើនឡើងនោះទេ ដោយសារខាងក្រុមហ៊ុនធ្លាប់តែរកស៊ីលក់សាច់បង្កក។ ដូចនេះក្រុមហ៊ុនត្រូវការពេលវេលាដើម្បីស្គាល់ពីទីផ្សារ។

លោក លី ឡាវីល ប្រធានក្រុមប្រឹក្សាភិបាលសមាគមអ្នកចិញ្ចឹមសត្វកម្ពុជា បញ្ជាក់ថា ក្នុងរយៈពេល២០ថ្ងៃកន្លងមកនេះ ក្រុមហ៊ុននាំចូលសាច់បង្កកពីខាងក្រៅ ទិញជ្រូកក្នុងស្រុកតាមរយៈការសម្របសម្រួលពីសមាគមនេះមិនទាន់បាន១០ក្បាលទេនៅក្នុងមួយថ្ងៃ ហើយតម្លៃជ្រូកឃើញថាបានងើបឡើងវិញបានខ្លះក្រោយពីមិនមានចំណាត់ការនាំចូលសាច់បង្កកពីខាងក្រៅបន្ថែម។

លោកបន្តថា «តម្លៃជ្រូករស់បានឡើងថ្លៃពី៦ពាន់រៀលដល់ប្រមាណ៨ពាន់រៀលក្នុងមួយគីឡូក្រាម ហើយបើក្រុមហ៊ុនលក់សាច់បង្កករបស់ខ្លួនអស់ តម្លៃវានឹងឡើងថ្លៃបន្ថែមទៀត ដោយសារពួកគាត់អត់បាននាំចូលបន្ថែម ព្រោះរាជរដ្ឋាភិបាលសម្រេចផ្អាកមិនឱ្យនាំចូលរយៈពេល៦ខែ»។

បើតាមប្រធានក្រុមប្រឹក្សាភិបាលសមាគមអ្នកចិញ្ចឹមសត្វកម្ពុជា ថាតម្លៃជ្រូកទោះបីបានឡើងដល់៨ពាន់រៀលក្នុងមួយគីឡូក្រាមមែន ប៉ុន្តែតម្លៃនេះវាមិនទាន់ជួយឱ្យអ្នកចិញ្ចឹមជ្រូកក្នុងស្រុករួចខ្លួនទេ បានត្រឹមតែធ្វើឱ្យកសិករខាតបង់ប្រាក់ច្រើនដូចពេលមុនៗ។

លោកលើកឡើងថា« នៅក្នុងរយៈពេល២ខែទៀត យើងក៏អត់ទាន់ហ៊ានធ្វើការប៉ាន់ស្មានថាតម្លៃជ្រូករស់អាចឡើងថ្លៃបានប៉ុន្មានដែរ ប៉ុន្តែតម្លៃយើងសង្កេតឃើញថាចាប់ផ្តើមល្អប្រសើរមកវិញ មិនធ្វើឱ្យកសិករខាងបង់ប្រាក់ច្រើនដូចពេលមុនពេកទេ ដោយសារស្តុកសាច់ចាស់របស់គាត់នៅមានចំនួនច្រើន។ តែយើងសង្ឃឹមថាចំណាត់ការរបស់រាជរដ្ឋាភិបាលនឹងជួយ ឱ្យកសិករអាចលក់ជ្រូករបស់ខ្លួនបានដល់ថ្លៃដើមផលិត មិនឱ្យខាតបង់ទៀតទេ»៕ តាកែវ

The post ក្រុមហ៊ុននាំចូលសាច់បង្កក ទទួលទិញសាច់ជ្រូកក្នុងស្រុកនៅមានចំនួនតិចតួចក្នុងមួយថ្ងៃ appeared first on .

ក្នុងដំណើរទស្សនកិច្ចនោះ លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម ដឹកនាំប្រតិភូក្រសួងពាណិជ្ជកម្ម បានជួបពិភាក្សាសន្ទនាជាមួយ លោក ម៉ម ប៊ុននាង ,លោក គង់ សារាជ និងតំណាងក្រុមហ៊ុនស៊ី.ភី. អំពីតួនាទីរបស់ក្រសួងពាណិជ្ជកម្ម ក្នុងការតាមដានជាប្រចាំនូវថ្លៃទំនិញសាច់ជ្រូកលក់នៅលើទីផ្សារ និងរៀបចំរបាយការណ៍ស្តីពីស្តុកសន្និធិស្បៀងត្រៀមបម្រុងយុទ្ធសាស្ត្ររបស់រាជរដ្ឋាភិបាល និងសភាពការណ៍ថ្លៃទំនិញសំខាន់ៗដទៃចាំបាច់ប្រចាំជីវភាពដែលបានប្រមូលពីទីផ្សាររាជធានី-ខេត្ត។

ជាមួយគ្នានេះ ភាគីទាំងពីរ ក៏បានពិភាក្សាពីសក្តានុពលនៃការវិនិយោគលើប្រតិបត្តិការផលិតកម្ម និងអាជីកម្មជ្រូករបស់ក្រុមហ៊ុនស៊ី.ភី ក្នុងការធ្វើឱ្យមានតុល្យភាពនៃសេចក្តីត្រូវការនៃផលិតផលសាច់ជ្រូកក្នុងស្រុកជាមួយផលិតកម្មក្នុងស្រុក ព្រមទាំងពង្រឹងសុវត្ថិភាពចំណីអាហារ និងប្រមូលទិញកសិផលមួយចំនួនសម្រាប់ធ្វើជាចំណីសត្វ ដូចជា ពោតក្រហម ដំឡូងមី កន្ទក់ កញ្ចុងអង្ករ និងស្រូវ ។

ក្នុងឱកាសនោះដែរ លោករដ្ឋមន្រ្តីក្រសួងពាណិជ្ជកម្ម ក៏បានណែនាំដល់ក្រុមហ៊ុន នូវអនុសាសន៍សំខាន់ៗមួយចំនួន រួមមាន៖ បង្កើនវិសាលភាពនៃការប្រមូលទិញជ្រូកពីកសិដ្ឋានក្នុងស្រុក ដោយត្រូវយកចិត្តទុកដាក់ខ្ពស់ទៅលើទំនួលខុសត្រូវសង្គមរបស់សាជីវកម្មថែមទៀត ខណៈក្រុមហ៊ុនក៏ត្រូវបន្តចូលរួមយ៉ាងសកម្មជាមួយក្រសួងពាណិជ្ជកម្ម ក្នុងការបង្កើនវិសាលភាពនៃការប្រមូលទិញធាតុចូលកសិកម្មរបស់កសិករក្នុងស្រុក សម្រាប់ផលិតជាចំណីសត្វផ្សេងៗបង្កើនគុណភាពចំណីសត្វឱ្យស្របតាមស្តង់ដារអន្តរជាតិសម្រាប់ការកែទម្រង់ផលិតកម្មសត្វក្នុងស្រុក ឱ្យមានគុណភាព និងសុវត្ថិភាពសម្រាប់អ្នកបរិភោគ។

គួរបញ្ជាក់ដែរថា ក្រៅពីស្នើឱ្យក្រុមហ៊ុនខាងលើបង្កើនវិសាលភាពនៃការប្រមូលទិញជ្រូកពីកសិដ្ឋានក្នុងស្រុកហើយនោះ លោករដ្ឋមន្រ្តីក្រសួងពាណិជ្ជកម្ម ក៏បានស្នើឱ្យក្រុមហ៊ុននេះ បង្កើនសមត្ថភាពផ្គត់ផ្គង់របស់ផលិតករក្នុងស្រុកនៅពេលពួកគេប្រើប្រាស់ចំណីសត្វដែលមានគុណភាព និងតម្លៃសមរម្យ ដែលអាចពង្រីកលទ្ធភាពនៃការជ្រៀតចូលទីផ្សារក្នុងនិងក្រៅប្រទេស ឱ្យបានកាន់តែទូលំទូលាយ ព្រមទាំងបន្តបង្កើនសហប្រតិបត្តិការឱ្យបានពេញលេញជាមួយមន្ទីរពាណិជ្ជកម្មនៅតាមខេត្តគោលដៅ ដើម្បីរៀបចំផែនការប្រមូលទិញធាតុចូលកសិកម្មសម្រាប់ចំណីសត្វ ព្រមទាំងតាមដាន និងទប់ស្កាត់ការធ្លាក់ថ្លៃតម្លៃនៃផលិតផលកសិកម្មនានា៕

អត្ថបទ៖ ពិសី

The post រដ្ឋមន្រ្តីក្រសួងពាណិជ្ជកម្ម ស្នើក្រុមហ៊ុនស៊ី.ភី បង្កើនបរិមាណ​ប្រមូលទិញជ្រូកពីកសិដ្ឋាន​នៅក្នុងស្រុក appeared first on .