តំបន់សេដ្ឋកិច្ចពិសេស រ៉ូយ៉ាល់គ្រុបភ្នំពេញ

ក្រុមហ៊ុនផលិតស្រោមដៃឈានមុខគេមួយក្នុងពិភពលោក តម្លៃ៦០ម៉ឺនដុល្លារ បើកដំណើរការក្នុងតំបន់សេដ្ឋកិច្ចពិសេស រ៉ូយ៉ាល់គ្រុប របស់អ្នកឧកញ៉ា គិត ម៉េង

Kem sinath — Fri, 17 Jan 2025 09:52:14 +0000

ក្រុមហ៊ុន HESTRA (Cambodia) Co., Ltd. ដែលជាក្រុមហ៊ុនផលិតស្រោមដៃឈានមុខគេមួយក្នុងពិភពលោក ដែលលមានតម្លៃ៦០ម៉ឺនដុល្លារ បានបើកដំណើរការជាផ្លូវការ នៅថ្ងៃទី១៧ ខែមករា ឆ្នាំ២០២៥ ក្នុងតំបន់សេដ្ឋកិច្ចពិសេស រ៉ូយ៉ាល់គ្រុប ភ្នំពេញ របស់អ្នកឧកញ៉ា គិត ម៉េង។

នាឱកាសនោះ លោក ជា វុទ្ធី អគ្គលេខាធិការគណៈកម្មាធិការវិនិយោគកម្ពុជា បានសម្តែងនូវសេចក្តីសោមន្សរីករាយ និងអបអរសាទរចំពោះក្រុមហ៊ុន HESTRA (Cambodia) Co., Ltd. ដែលបានសម្រេចចិត្តមកបណ្តាក់ទុននៅក្នុងប្រទេសកម្ពុជា ដែលកន្លងមកក្រុមហ៊ុនធ្លាប់តែមានវត្តមាននៅប្រទេសចិន ហុងគ្រី និងវៀតណាម។

លោកបន្តថា HESTRA គឺជាក្រុមហ៊ុនផលិតស្រោមដៃឈានមុខគេក្នុងពិភពលោក ដែលក្រុមហ៊ុននេះត្រូវបានបង្កើតទ្បើងតាំងពីឆ្នាំ១៩៣៦។ លោកក៏បានវាយតម្លៃខ្ពស់ចំពោះវត្តមានរបស់ក្រុមហ៊ុននៅក្នុងប្រទេសកម្ពុជានាពេលនេះ ដែលនឹងមិនត្រឹមតែចូលរួមចំណែកជំរុញការអភិវឌ្ឍសង្គម-សេដ្ឋកិច្ចកម្ពុជាប៉ុណ្ណោះទេ ថែមទាំងបានផ្តល់ឱកាសការងារជូនបងប្អូនកម្មករនិយោជិតក្នុងស្រុកទៀតផង។

សូមជម្រាបជូនថា ក្រុមហ៊ុន HESTRA គឺជាក្រុមហ៊ុនទី១របស់ប្រទេសស៊ុយអែត ដែលបានមកបណ្តាក់ទុនវិនិយោគក្នុងវិស័យឧស្សាហកម្មផលិតស្រោមដៃនៅកម្ពុជា ហើយតាមរយៈក្រុមហ៊ុននេះ លោក ជា វុទ្ធីមានការជឿជាក់ថានឹងមានក្រុមហ៊ុនរបស់ប្រទេសស៊ុយអែតផ្សេងទៀតមកបណ្តាក់ទុនវិនិយោគនៅកម្ពុជាផងដែរ៕

The post ក្រុមហ៊ុនផលិតស្រោមដៃឈានមុខគេមួយក្នុងពិភពលោក តម្លៃ៦០ម៉ឺនដុល្លារ បើកដំណើរការក្នុងតំបន់សេដ្ឋកិច្ចពិសេស រ៉ូយ៉ាល់គ្រុប របស់អ្នកឧកញ៉ា គិត ម៉េង appeared first on .

តំបន់សេដ្ឋកិច្ចពិសេស រ៉ូយ៉ាល់គ្រុប រួមចំណែកប្រមាណ៧% នៃការនាំចេញទំនិញសរុបទូទាំងប្រទេស ក្នុងតម្លៃជាង២៣ពាន់លានដុល្លារ

រ៉េត សុកធា — Fri, 26 Jan 2024 05:30:16 +0000

រយៈពេលជិត១៨ឆ្នាំ តំបន់សេដ្ឋកិច្ចពិសេស រ៉ូយ៉ាល់គ្រុប ភ្នំពេញ មានក្រុមហ៊ុនផលិតកម្មចំនួន៨៦ មកពី១៤ប្រទេស អាចផ្តល់ការងារដល់ប្រជាជនកម្ពុជាចំនួន ៤៣,៨០០នាក់ និងជនបរទេសប្រមាណ ៧២០នាក់ នៅក្នុងវិស័យឧស្សាហកម្មដែលមានតម្លៃបន្ថែមខ្ពស់របស់ប្រទេសកម្ពុជា។ ក្នុងនោះប្រហែល៧% បានរួមចំណែកក្នុងការនាំចេញទំនិញសរុបទូទាំងប្រទេសដែលមានចំនួនប្រមាណ ២៣,៤៧០លាន ដុល្លារ។

យោងតាមសេចក្ដីប្រកាសព័ត៌មានរបស់ តំបន់សេដ្ឋកិច្ចពិសេស រ៉ូយ៉ាល់គ្រុប ភ្នំពេញ នៅថ្ងៃទី២៦ ខែមករានេះ បានឱ្យដឹងថា ការអភិវឌ្ឍ និងការរីកចម្រើនរបស់តំបន់សេដ្ឋកិច្ចពិសេស រ៉ូយ៉ាល់គ្រុប ភ្នំពេញ បានបង្ហាញឱ្យឃើញផងដែរនៅក្នុងតម្លៃនៃការនាំចេញផលិតផល ពីក្នុងតំបន់សេដ្ឋកិច្ចពិសេស។ ក្នុងនោះតម្លៃនៃការនាំចេញបានកើនឡើងទ្វេដង ក្នុងរយៈពេល៥ឆ្នាំ ពោលគឺពីតម្លៃ ៣១៦លានដុល្លារ ក្នុងឆ្នាំ២០១៦ ដល់ ៦៨៣លានដុល្លារ ក្នុងឆ្នាំ២០២១។ ចំនួននេះបានកើនឡើងទ្វេដងម្ដងទៀតក្នុងរយៈពេលត្រឹមតែមួយឆ្នាំបន្ទាប់ប៉ុណ្ណោះ គឺកើនដល់ទៅ ១,៣៤៦លានដុល្លារ ក្នុងឆ្នាំ២០២២។ ចំណែកនៅឆ្នាំ២០២៣ នេះមានតម្លៃ១,៦២១លាន ដុល្លារ ដែលជាតម្លៃនាំចេញខ្ពស់បំផុតនៅក្នុងប្រវត្តិសាស្ត្រនៃការកកើតតំបន់នេះ។

ជាមួយគ្នានោះ តំបន់សេដ្ឋកិច្ចពិសេស រ៉ូយ៉ាល់គ្រុប ក៏បានរួមចំណែកប្រហែល ៧% ក្នុងតម្លៃនាំចេញសរុបទូទាំងប្រទេសផងដែរ ដែលមានប្រមាណ ២៣,៤៧០លានដុល្លារ។ ការកើនឡើងយ៉ាងខ្លាំងនេះ បានកើតឡើង បើទោះបីជាស្ថិតក្នុងស្ថានភាព កូវីដ-១៩ ក៏ដោយ។

ទាំងអស់នេះគឺ ដោយសារការពង្រីក និងការរីកចម្រើនជាលំដាប់ នៃផលិតកម្មរបស់អ្នកវិនិយោគទាំងអស់ ជាពិសេសនៅក្នុងវិស័យអគ្គិសនី អេឡិចត្រូនិច និងវិស័យគ្រឿងបង្ករថយន្ត។ ក្នុងនោះតម្លៃនៃការនាំចេញពីវិស័យអគ្គិសនី និងអេឡិចត្រូនិក បានកើនឡើង៧១% ពី២៣៤លានដុល្លារ ក្នុងឆ្នាំ២០១៩ ដល់ ៣៩៩លាន ដុល្លារក្នុងឆ្នាំ២០២៣។ ដោយឡែកតម្លៃនៃការនាំចេញពីវិស័យគ្រឿងបង្គុំរថយន្តវិញបានកើនឡើងកាន់តែច្រើន គឺ១៥៦% ពីតម្លៃ ១១៣លានដុល្លារ ក្នុងឆ្នាំ២០១៩ ដល់ ២៨៩លាន ដុល្លារ ក្នុងឆ្នាំ២០២៣៕

The post តំបន់សេដ្ឋកិច្ចពិសេស រ៉ូយ៉ាល់គ្រុប រួមចំណែកប្រមាណ៧% នៃការនាំចេញទំនិញសរុបទូទាំងប្រទេស ក្នុងតម្លៃជាង២៣ពាន់លានដុល្លារ appeared first on .

ក្រុមហ៊ុន DENSO គ្រោងពង្រីកអាជីវកម្មរបស់ខ្លួនបន្ថែម នៅក្នុងតំបន់សេដ្ឋកិច្ចពិសេសរបស់អ្នកឧកញ៉ា គិត ម៉េង

Kem sinath — Tue, 26 Sep 2023 14:28:01 +0000

ក្រុមហ៊ុនផលិតគ្រឿងបន្លាស់រថយន្ត DENSO ដែលមានមូលដ្ឋាននៅប្រទេសជប៉ុន កំពុងដំណើរការផលិតនូវគ្រឿងបន្លាស់រថយន្ត នៅក្នុងតំបន់សេដ្ឋកិច្ចពិសេស រ៉ូយ៉ាល់គ្រុបភ្នំពេញ របស់អ្នកឧកញ៉ា គិត ម៉េង គ្រោងនឹងពង្រីកនូវអាជីវកម្មបន្ថែម និងបង្កើតឱកាសការងារជាច្រើនដល់កម្មករនិយោជិត។នេះបើតាមជំនួបពិភាក្សាការងាររវាងលោក ម៉ាសាអូ ស៊ីអេម៉ាស៊ី អនុប្រធានជាន់ខ្ពស់នៃក្រុមហ៊ុនដេនសូ ជាមួយលោក ជា វុទ្ធី អគ្គលេខាធិការគណៈកម្មាធិការវិនិយោគកម្ពុជានៃក្រុមប្រឹក្សាអភិវឌ្ឍន៍កម្ពុជា កាលពីថ្ងៃទី២៥ ខែកញ្ញា ឆ្នាំ២០២៣។

ក្នុងជំនួបនោះ លោក ម៉ាសាអូ ស៊ីអេម៉ាស៊ី បានឱ្យដឹងថា ចាប់តាំងពីបើករោងចក្រនៅក្នុងតំបន់សេដ្ឋកិច្ចពិសេស រ៉ូយ៉ាល់គ្រុបភ្នំពេញ នៅឆ្នាំ២០១៣ មកដល់បច្ចុប្បន្ន មានកម្មករប្រមាណ៦០០នាក់ បានកំពុងបម្រើការងារនៅរោងចក្រ DENSO ហើយក្រុមហ៊ុននឹងមានគម្រោងបង្កើតឱកាសការងារបន្ថែមទៀត ក្នុងពេលអនាគតដ៏ខ្លីខាងមុខផងដែរ ដែលអាចរំពឹងទុកថានឹងកើនដល់ ១០០០នាក់ ជាមួយផលិតផលរបស់ខ្លួនកំពុងមានដូចជា ម៉ាញ៉េតូ (Maneto), ឧបករណ៍សម្រាប់បន្ថយកម្តៅក្នុងម៉ាស៊ីនឡាន, ឧបករណ៍វាស់កម្រិតទីកនៅក្នុងម៉ាស៊ីនឡានម៉ាស៊ូត, ឧបករណ៍បញ្ចុះកម្តៅប្រេងក្នុងម៉ាស៊ីន, កញ្ច្រែងទឹកក្តៅ (ចាប់ពីឆ្នាំ២០២២)។

លើសពីនេះ លោកថា ក្រោមកម្មវិធីអភិវឌ្ឍន៍ធនធានមនុស្សដែលមានឈ្មោះថា DENSO in Industrial Talent Development ចាប់ពីឆ្នាំ២០១៦ ដល់២០២២ ក្រុមហ៊ុនបានបណ្តុះបណ្តាលធនធានមនុស្សប្រមាណ ២២០នាក់ ហើយក្រុមហ៊ុននឹងមានគម្រោងធ្វើការបណ្តុះបណ្តាលប្រមាណ ៦០នាក់បន្ថែមទៀត ក្នុងឆ្នាំ២០២៣ និង ៧០នាក់ នៅក្នុងឆ្នាំ២០២៤។

គួរឱ្យដឹងផងដែរថា DENSO Cambodia ជាក្រុមហ៊ុនបុត្រសម្ព័ន្ធរបស់ក្រុមហ៊ុន DENSO Corporation មានមូលដ្ឋាននៅជប៉ុន ដែលជាក្រុមហ៊ុនផ្គត់ផ្គង់ប្រព័ន្ធបច្ចេកវិទ្យាទំនើប និងគ្រឿងរថយន្តសកល មានក្រុមហ៊ុនបុត្រសម្ព័ន្ធជាង ២០០ នៅលើពិភពលោក និងមានក្រុមហ៊ុនដៃគូ ៣៥ ប្រទេស។ ក្រុមហ៊ុននេះ បានចុះបញ្ជីវិនិយោគមានតម្លៃ ១០ លានដុល្លារនៅក្នុងប្រទេសកម្ពុជា កាលពីឆ្នាំ២០១៣ មកម្ល៉េះ នៅក្នុងតំបន់សេដ្ឋកិច្ចពិសេសភ្នំពេញ។

សូមជម្រាបជូនថា នៅក្នុងតំបន់សេដ្ឋកិច្ចពិសេស រ៉ូយ៉ាល់ គ្រុប ភ្នំពេញ មានគម្រោងវិនិយោគសរុបចំនួន ១៣៩គម្រោង ដែលមានមុខសញ្ញាវិនិយោគសំខាន់ៗដូចជា៖ ការផលិតសម្ភារៈបរិក្ខារអេឡិចត្រូនិក គ្រឿងបង្គុំរថយន្ត ខ្សែអគ្គិសនី បន្ទះសូឡា បរិក្ខារពេទ្យ កែច្នៃពេជ្រ បរិក្ខារសាងសង់ គ្រឿងសំអាង ចំណីអាហារនិងភេសជ្ជៈ ចំណីសត្វ ផលិតផលស្បែក សម្លៀកបំពាក់ និងស្បែកជើងជាដើម។ បច្ចុប្បន្ន តំបន់សេដ្ឋកិច្ចពិសេស រ៉ូយ៉ាល់ គ្រុប ភ្នំពេញ បានផ្តល់ការងារជូនដល់កម្មករនិយោជិតចំនួនប្រមាណ ៣៨.៥០០កន្លែង៕

The post ក្រុមហ៊ុន DENSO គ្រោងពង្រីកអាជីវកម្មរបស់ខ្លួនបន្ថែម នៅក្នុងតំបន់សេដ្ឋកិច្ចពិសេសរបស់អ្នកឧកញ៉ា គិត ម៉េង appeared first on .