កញ្ញា ទួន សាវ៉ៃ អាយុ ៣៨ ឆ្នាំ ជាម្ចាស់សិប្បកម្មច្នៃត្រីងៀតមួយកន្លែងនៅក្នុង ភូមិគោកឫស្សីខាងត្បូង ឃុំដានរុន ស្រុកសូទ្រនិគម ខេត្តសៀមរាប។

ម្ចាស់សិប្បកម្មរូបនេះបានប្រាប់​ឧកញ៉ាញូស៍​តាម​ទូរសព្ទ​ថា បានចាប់អាជីពមួយនេះអស់រយៈពេល ៥ ឆ្នាំមកហើយ ដោយការទិញត្រីស្រស់ពីគេយកមកច្នៃជាត្រីងៀតលក់ចេញជូនអតិថិជនសម្រាប់បរិភោគ និងឈ្មួញយកទៅលក់បន្តតាមបណ្ដារាជធានីខេត្តមួយចំនួន។

កញ្ញា ទួន សាវ៉ៃ ប្រាប់​ថា ការលក់ចេញបានច្រើនឬតិចទៅតាមរដូវ ដោយខែប្រាំងលក់បានច្រើន ក្នុងមួយខែអាចលក់ចេញបានពី ១០ទៅ ១២តោន និងក្នុងមួយថ្ងៃច្នៃបានពី ៣០០ ទៅ៤០០គីឡូក្រាម។ ចំណែកខែវស្សា ការលក់គឺធ្លាក់ចុះខ្លាំងមួយខែលក់ចេញបានប្រហែលពី ២ទៅ ៣តោនប៉ុណ្ណោះព្រោះខែវស្សាជាខែដែលសម្បូរត្រី។

សម្រាប់ដំណើរការនៃការកែច្នៃ កញ្ញា​បញ្ជាក់ថា ត្រីដែលទិញបានមកគឺយកទៅលាងជម្រះឲ្យស្អាត រួចត្រាំទឹកកកទុកមួយយប់ ទើបព្រឹកឡើងយកទៅប្រឡាក់ និងហាលត្រឹមតែមួយថ្ងៃអាចលក់ចេញបានហើយ។ តម្លៃនៃការលក់ចេញក្នុង ១ គីឡូក្រាមថ្លៃ ២៨០០០រៀល-៣០០០០រៀក តាមប្រភេទត្រីស្ងួតឬសើម។

កញ្ញា ទួន សាវ៉ៃ បាន​ឲ្យ​ដឹង​បន្ថែម​ថា អាចច្នៃត្រីងៀតបានរហូតដល់ ៣ រសជាតិគឺ ប្រៃ ជូរប្រៃ និងផ្អែម។ រីឯត្រីដែលត្រូវយកមកធ្វើងៀតនោះមានច្រើនប្រភេទដូចជា ​ត្រីរស់ ត្រីអណ្ដែង និងត្រីប្រាជាដើម។

ជុំវិញ​ការ​ចាប់​មុខ​របរ​មួយ​នេះ បើ​តាម​កញ្ញា ទួន សាវ៉ៃ ក៏​ស្ទើរតែបោះបង់ចោលម្ដងៗទៅហើយ ដោយសារតែការ​ហត់​នឿយ ​និងខ្វះដើមទុនសម្រាប់ដំណើរការសិប្បកម្ម។

យ៉ាងណាមិញ សហគ្រិនស្រ្តី​រូប​នេះកំពុងបន្តសិក្សាតាមវគ្គសិក្ខាសាលាបន្ថែម ដើម្បីយកចំណេះដឹងមកជំរុញសិប្បកម្មឲ្យបានប្រសើរឡើង ដើម្បី​ឲ្យ​មានស្ដង់ដារអាច​នាំចេញទៅក្រៅប្រទេស។

សូមបញ្ជាក់ថា សិប្បកម្ម​របស់​កញ្ញា ទួន សាវ៉ៃ ថ្មីៗនេះ​បានទទួល​កញ្ចប់ថាវិកា​ពី​គម្រោង​របស់​អង្គការ UNIDO ក្រោមកម្មវិធីគាំទ្រដល់សហគ្រាស ទាក់ទងបច្ចេកទេសកែច្នៃជលផល ដើម្បី​ធ្វើឱ្យប្រសើរឡើងនូវប្រព័ន្ធសុវត្ថិភាពចំណីអាហារ ដើម្បីឈានទៅប្រកួតប្រជែង និងឆ្លើយតបតាមស្តង់ដាទីផ្សារនាំចេញ៕

The post ម្ចាស់សិប្បកម្ម​នៅ​សៀមរាប ច្នៃត្រីងៀត​ឲ្យមានស្ដង់ដា ដើម្បី​​នាំចេញទៅក្រៅប្រទេស appeared first on .

ត្រីងៀត ក្របីងៀត គោងៀត ត្រីឆ្អើរ និង គ្រឿងផ្អាប់ជាច្រើនទៀត គឺ​អាហារ​ប្រចាំ​តំបន់​ដែលមាន​ការ​ពេញនិយមពីអ្នក​ដំណើរ​ទៅមកពេល​ទៅលេង​ខេត្ត​សៀមរាប តែងតែឈប់ទិញ​មិន​ដែល​ខាន។

ដោយឡែក​មុខរបរលក់ត្រីងៀត ក្របីងៀត គោងៀត ត្រីឆ្អើរ និង គ្រឿងផ្អាប់ជាច្រើនទៀត ក៏ជា​ប្រភព​ចំណូល​សម្រាប់ជួយទ្រទ្រង់ជីវភាពពលរដ្ឋ​ជាច្រើន​គ្រួសារ នៅ​ក្នុងភូមិត្រាច ឃុំកំពង់ចិនជើង ស្រុកស្ទោង ខេត្តកំពង់ធំ។

ក្នុងកិច្ចសម្ភាសន៍ជាមួយ ឧកញ៉ាញូស៍ អ្នកស្រី លាប ផល្លា បានឲ្យដឹងថា អ្នកស្រីប្រកបមុខរបរនេះជាង១​ ​ឆ្នាំមកហើយ ដែលមានលក់ដូចជា ត្រីងៀត ក្របីងៀត គោងៀត ក្រពើងៀត ត្រីឆ្អើរសាច់ក្រក និងគ្រឿងផ្អាប់​ផ្សេងទៀតរួមមាន ផ្អក ប្រហុកជាដើម ដោយទិញត្រី សាច់ពីគេយកមកប្រឡាក់ខ្លួនឯង។

បន្តទាំងទឹកមុខញញឹម ស្រ្តីរូប​នេះ​ប្រាប់​ឧកញ៉ាញូស៍​មិនលាក់លៀម​ថា ក្នុងមួយថ្ងៃអាចរកចំណូលបានជាមធ្យម​ពី​
៥០ ម៉ឺន ទៅ៦០ម៉ឺនរៀល។ តម្លៃមាន​ដូចជា​ ប្រភេទត្រី ឬប្រភេទសាច់ ពោលគឺ ត្រីងៀត មួយគីឡូ ៣០០០០ រៀល​(តម្លៃទូទៅ) ក្របីងៀត តម្លៃ ៧៥០០០រៀល ក្នុងមួយគីឡូក្រាម។

ស្រ្តី​ជាអ្នកលក់​រូប​នេះបាន​បន្ថែម​ថា ដាច់ខ្លាំងនៅពេលមានពិធីបុណ្យជាតិផ្សេងៗដូចជា បុណ្យចូលឆ្នាំ បុណ្យភ្ជុំបិណ្ឌ បុណ្យចូលឆ្នាំចិនដែល​អាចរក​បាន​ ២ ទៅ ៣ លានក្នុងមួយថ្ងៃ។ ហើយ​ភ្ញៀវចូលចិត្តទិញ និង លក់ដាច់ជាងគេគឺ ត្រីងៀត ក្របីងៀត និង គោងៀត។

ស្រ្តីវ័យ ៣៧ឆ្នាំ រូបនេះ បានយល់ឃើញថា ការលក់នេះ ជាការជួយទ្រទ្រង់ជីវភាពមួយផ្នែក ប៉ុន្តែក៏មានបញ្ហា​​ប្រឈមខ្លះ​ដែរ តួយ៉ាងថ្ងៃណាដាច់ក៏ដាច់ ថ្ងៃណាមិនដាច់ រកអ្វីចំណូលមិនបានសោះ។ ទោះបីជា​មានបញ្ហាប្រឈមខ្លះ ឬរក​បានបន្តិចបន្តួចក្តី អ្នកស្រី មិនផ្លាស់ប្តូរមុខរបរមួយនេះទេ។

ចំណែកឯ អ្នកស្រី គី ឡៃហេន បានឲ្យដឹងថា អ្នកស្រីប្រកបមុខរបរលក់ ត្រីងៀតនេះ ជាង២ឆ្នាំមកហើយដោយ​បានចំណូល​មួយថ្ងៃ ក៏មិនខុសពីអ្នកស្រី លាប ផល្លា ដែរ ពោលគឺ ៥០ទៅ៦០ ម៉ឺនក្នុងមួយថ្ងៃ។ ចំណូលរកបានអាចយកទៅផ្គត់ផ្គង់កូនរៀន ហូបចុក ក្នុងជីវភាពរាល់ថ្ងៃមួយកម្រិត។

អ្នកស្រី លាប ផល្លា និង អ្នកស្រី គី ឡៃហេន ក៏បានអំពាវនាវ ក៏ដូចជាចង់សំណូមពរចំពោះ​ភ្ញៀវដែលចូលទិញរបស់តាមចិញ្ចើមផ្លូវ ដូចជាអ្នកស្រីជាដើម កុំសូវឲ្យតម្លៃទាបពេក ព្រោះពេលខ្លះតម្លៃដែលភ្ញៀវឲ្យមិនស្មើតម្លៃដើមផង៕

The post ​​ជិះ​ដល់​​គីឡូម៉ែត្រ ២២២ ក្នុង​ស្រុកស្ទោង​ កុំភ្លេច​ចូលទិញ​​​ងៀត​គោ ងៀតក្របី ល្បី​ឆ្ងាញ់ណាស់ អ្នក​ទៅលេង​សៀមរាប​មិន​ដែលរំលង appeared first on .