ថាមពលអ៊ីដ្រូសែន

ក្រុមហ៊ុនធំៗរបស់កូរ៉េខាងត្បូង ត្រៀមបោះលុយពាន់លានដុល្លារ សាងសង់រោងចក្រថាមពលអ៊ីដ្រូសែន នៅអារ៉ាប់រួម

ឧកញ៉ាសាមញ្ញ — Sat, 04 Jun 2022 06:36:25 +0000

ក្រុមហ៊ុនរបស់កូរ៉េខាងត្បូងចំនួន ៣ បានចុះហត្ថលេខាលើកិច្ចព្រមព្រៀងមួយ ដើម្បីសាងសង់រោងចក្រថាមពលអ៊ីដ្រូសែន និងផលិតអាម៉ូញាក់ តម្លៃ ១ ពាន់លានដុល្លារ នៅក្នុងប្រទេសអារ៉ាប់រួម ។ នេះបើតាមការចុះផ្សាយពីសារព័ត៌មាន CNA ។

ក្រុមហ៊ុន Korea Electric Power Corporation , Samsung C&T Corporation និង Korea Western Power នឹងចាប់ដៃគូជាមួយនឹងក្រុមរបស់អារ៉ាប់រួម Petrolyn Chemie ដើម្បីសាងសង់រោងចក្រមួយ ដែលអាចផលិតអាម៉ូញាក់រហូតដល់ ២ សែនតោន ក្នុងមួយឆ្នាំ ។

គួរឱ្យដឹងថា ថាមពលអ៊ីដ្រសែន ត្រូវបានទទួលស្គាល់យ៉ាងទូលំទូលាយថាជាប្រភពថាមពលដ៏សំខាន់ ដែលជួយកាត់បន្ថយការបំភាយឧស្ម័នពុលទៅក្នុងបរិស្ថាន ខណ:ទាំងអារ៉ាប់រួម និងអារ៉ាប៊ីអាអូឌីត បានដាក់ចេញនូវផែនការ ជាមួយមហិច្ឆតាដ៏ធំ សម្រាប់ផលិតថាមពលនេះ ចំពេលមានការប្រកួតប្រជែងផ្នែកសេដ្ឋកិច្ចកាន់តែខ្លាំង រវាងប្រទេសទាំង ២ ។

បញ្ជាក់ទៀតថា រោងចក្រថ្មីនេះ នឹងត្រូវសាងសង់ជាពីរដំណាក់កាល នៅក្នុងតំបន់ឧស្សាហកម្ម KIZAD ក្បែររដ្ឋធានី Abu Dhabi ដោយដំណាក់កាលទីមួយ អាចផលិតបាន ៣៥ ០០០ តោន មុនពេលដំណាក់កាលពី ២ នឹងដំណើរការពេញលេញ ៕

The post ក្រុមហ៊ុនធំៗរបស់កូរ៉េខាងត្បូង ត្រៀមបោះលុយពាន់លានដុល្លារ សាងសង់រោងចក្រថាមពលអ៊ីដ្រូសែន នៅអារ៉ាប់រួម appeared first on .

វៀតណាម ត្រៀមចាយលុយជាង ៨០០ លានដុល្លារ សាងសង់រោងចក្រថាមពលអ៊ីដ្រូសែនដំបូងបំផុត

ឧកញ៉ាសាមញ្ញ — Fri, 27 May 2022 06:31:57 +0000

រដ្ឋាភិបាលរបស់ប្រទេសវៀតណាម បាននិយាយនៅក្នុងសប្តាហ៍នេះថា ការសាងសង់រោងចក្រថាមពលអ៊ីដ្រូសែន ដំបូងបំផុតនៅក្នុងប្រទេស នឹងត្រូវចាប់ផ្តើមនៅខែក្រោយ ស្របពេលប្រទេសនៅក្នុងតំបន់អាស៊ានមួយនេះ កំពុងស្វែងរកការជំរុញទៅលើការប្រើប្រាស់ថាមពលមិនប៉ះពាល់បរិស្ថាន និងចង់កាត់បន្ថយការពឹងផ្នែកទៅលើធ្យូងថ្មី ក្នុងវិស័យថាមពលរបស់ខ្លួន ។

ជាក់ស្តែង រដ្ឋាភិបាលរបស់ប្រទេសវៀតណាម បាននិយាយនៅក្នុងសេចក្តីថ្លែងការណ៍មួយថា រោងចក្រថាមពលអ៊ីដ្រូសែន TGS Green Hysrogen នឹងត្រូវសាងសង់នៅភាគខាងត្បូងនៃខេត្ត Ben Tre ជាមួយនឹងប្រត្តិបត្តិការសាកល្បង នឹងចាប់ផ្តើមពីត្រីមាសទីមួយ ឆ្នាំក្រោយទៅ ។

គួរឱ្យដឹងថា អ៊ីដ្រូសែន ត្រូវបានគេចាត់បញ្ចូលថាជាថាមពលបៃតងមួយ ដែលមិនប៉ះពាល់ដល់បរិស្ថាន ហើយដើម្បីទទួលបានថាមពលនេះ គឺគេត្រូវយកវាចេញពីទឹក ដោយប្រើអេឡិចត្រូលីស ដែលដំណើរការដោយថាមពលកកើតឡើងវិញ ។ ថាមពលនេះទៀតសោត ត្រូវបានគេមើលឃើញថាមានសារ:សំខាន់ខ្លាំង ដើម្បីជួយដល់បរិស្ថាន បើទោះបីជាបច្ចេកវិទ្យានេះ មានតម្លៃថ្លៃ និងស្ថិតនៅដំណាក់កាលអភិវឌ្ឍក៏ដោយ ។

លើសពីនេះ វៀតណាម បាននិយាយទៀតថា រោងចក្រនេះនឹងមានតម្លៃប្រមាណ ១៩,៥ ទ្រីលានដុង ឬ ៨៤០ លានដុល្លារ ហើយវានឹងមានសមត្ថភាពផលិតថាមពលអ៊ីដ្រូសែនបាន ២៤ ០០០ តោន អាម៉ូញាក់ ១៥០ ០០០ តោន និងអុកស៊ីសែន ១៩៥ ០០០ តោន ក្នុងមួយឆ្នាំ ហើយរោងចក្រនេះ នឹងបង្កើនសមត្ថភាពក្នុងការផលិតបានទ្វេរដង នៅដំណាក់ក្រោយ ។

បញ្ជាក់ផងដែរថា ប្រទេសវៀតណាម ដែលជាមហាអំណាចផលិតកម្មនៅក្នុងតំបន់ កំពុងមានបំណងចង់បង្កើនសមត្ថភាពផលិតថាមពលសរុប ឱ្យកើនឡើងជិត ២ ដង ដល់ចំនួន ១៤៦ ០០០ មេហ្គាវ៉ាត់ នៅឆ្នាំ ២០៣០ ហើយផ្តល់អាទិភាពចម្បងទៅលើការប្រើប្រាស់ថាមពលកកើតឡើងវិញ និងកាត់បន្ថយការពឹងផ្អែកទៅលើធ្យូងថ្ម ៕

ប្រភព: CNA

The post វៀតណាម ត្រៀមចាយលុយជាង ៨០០ លានដុល្លារ សាងសង់រោងចក្រថាមពលអ៊ីដ្រូសែនដំបូងបំផុត appeared first on .

មហាសេដ្ឋីមានបំផុតនៅហុងកុង Li Ka-shing ចាប់ផ្តើមប្រឡូកមុខជំនួញថ្មីសន្លាងមួយទៀត បន្ថែមពីលើមុខរបរដឹកជញ្ជូន ប្លាស្ទិក និងប្រេង

ឧកញ៉ាសំពៅ — Thu, 11 Nov 2021 04:27:39 +0000

លោក Li Ka-shing ដែលគ្រប់គ្នាស្គាល់ថាជាមហាសេដ្ឋីមានបំផុតនៅហុងកុង ពេលនេះបានប្រកាសថា នឹងប្រឡូកទៅក្នុងអាជីវកម្មថ្មីស្រឡាងមួយគឺ វិស័យថាមពលកកើតឡើងវិញ ខណៈកន្លងមកលោកធ្លាប់តែធ្វើអាជីវកម្មលើការដឹកជញ្ជូន ប្លាស្ទិក និងប្រេងប៉ុណ្ណោះ។

ក្រុមហ៊ុន CK Infrastructure Holdings ដែលជាក្រុមហ៊ុនចែកចាយថាមពលអគ្គិសនី និងឧស្ម័ន និងគ្រប់គ្រងដោយកូនប្រុសច្បង Victor បានធ្វើការវិនិយោគទៅកាន់ក្រុមហ៊ុនផលិតថាមពលអ៊ីដ្រូសែន HYCP កាលពីពេលថ្មីៗនេះ។ នេះបើតាមការចុះផ្សាយពី Bloomberg News។

ដោយឡែក កាលពីដើមឆ្នាំនេះផងដែរ ក្រុមហ៊ុនវិនិយោគរបស់លោក Li បានទិញភាគហ៊ុននៅក្នុងក្រុមហ៊ុនដែលមានអាជីវកម្មស្រដៀងគ្នានឹង HYCP គឺក្រុមហ៊ុន Syzygy Plasmonics និង H2Pro ដែលជាក្រុមហ៊ុនផលិតឧស្ម័ន និងផ្គត់ផ្គង់ថាមពលសម្រាប់យន្តហោះ។

បញ្ជាក់ដែរថា ថាមពលអ៊ីដ្រូសែនដែលកើតឡើងពីថាមពលកកើតឡើងវិញ គឺកំពុងទទួលបានការគាំទ្រខ្លាំង សម្រាប់ជម្រើសនៃប្រទេសមហាអំណាច និងក្រុមហ៊ុនធំៗមួយចំនួនដែលមានបំណងចង់កាត់បន្ថយការប្រើប្រាស់ឧស្ម័នពុលកាបូន។

លើសពីនេះ បើតាមការប៉ាន់ស្មានពីអ្នកជំនាញទីផ្សាររបស់ឧស្សាហកម្មប្រភេទនេះ នឹងអាចឈានដល់ចំណុចខ្ពស់មួយ គឺ ១២ ទ្រីលានដុល្លារនៅឆ្នាំ ២០៥០។

លោក Li Ka-shing ដែលប្រជាជនហុងកុងនិយមឲ្យរហស្សនាមថា Superman គឺត្រូវបានគេសរសើរពីភាពជោគជ័យរបស់លោកជាខ្លាំង ជាពិសេសគឺការវិនិយោគរបស់លោកភាគច្រើនសុទ្ធតែទទួលបានផ្លែផ្កាល្អលើសពីការរំពឹងទុក។

បុរសដែលមានទ្រព្យសម្បត្តិប្រមាណ ៣១,៣ ពាន់លានដុល្លាររូបនេះ គឺមានភាគហ៊ុននៅក្រុមហ៊ុនធំៗដូចជា Zoom Video Communication ក្រុមហ៊ុនប្រេង Cenovus Energy ខណៈក្រុមហ៊ុនវិនិយោគ Horizons Ventures របស់លោកគឺជាអ្នកនៅពីក្រោយក្រុមហ៊ុនធំៗដូចជា Spotify Technology SA និង Facebook ដែលទើបនឹងប្ដូរឈ្មោះទៅជា Meta Platforms ជាដើម៕

ប្រភព: CNA

The post មហាសេដ្ឋីមានបំផុតនៅហុងកុង Li Ka-shing ចាប់ផ្តើមប្រឡូកមុខជំនួញថ្មីសន្លាងមួយទៀត បន្ថែមពីលើមុខរបរដឹកជញ្ជូន ប្លាស្ទិក និងប្រេង appeared first on .