ទស្សនៈឧកញ៉ា

ឧកញ៉ា ឌី ជោត ៖ អ្នកជំនួញនឹងពិបាកឈរជើង ប្រសិនបើគ្មានភាពស្មោះត្រង់

រ៉េត សុកធា — Thu, 02 Nov 2023 01:46:23 +0000

ដើម្បីក្លាយជាអ្នកជំនួញដ៏ពូកែនិងមានសក្ដានុពលម្នាក់ សហគ្រិនទាំងអស់តែងតែមានវិធីសាស្ត្រ ក៏ដូចជាយុទ្ធសាស្ត្រផ្សេងៗ ដោយឡែកៗពីគ្នា។ ជាមួយនឹងភាពជោគជ័យរបស់សហគ្រិននេះ ឧកញ៉ា ឌី ជោត លើកឡើងថា អ្នកជំនួញត្រូវមានភាពស្មោះត្រង់នាំមុខ ដែលជាកត្តាចម្បងនិងចាំបាច់បំផុត ប្រសិនបើគ្មានភាពស្មោះត្រង់ទេ អ្នកជំនួញពិបាកឈរណាស់។

នៅក្នុងបទសម្ភាសន៍មួយកាលពីពេលថ្មីៗនេះ ឧកញ៉ា ឌី ជោត អគ្គនាយកក្រុមហ៊ុន ធារ៉ា លាង ឯ.ក បានលើកឡើងថា លោកជាអ្នកជំនួញម្នាក់ដែលបានងើបឡើងក្នុងគ្រួសារដែលមានជីវភាពក្រីក្រ ឆ្លងកាត់ការលំបាកនិងធ្វើការងារជាច្រើន ដូចជាការងារបម្រើគេជាដើម តែលោកនៅតែខិតខំប្រឹងប្រែងរហូតទទួលបានជោគជ័យគួរជាទីមោទនដូចសព្វថ្ងៃ។

លោកឧកញ៉ាបន្តថា ក្រោយពីឆ្លងកាត់បទពិសោធន៍យ៉ាងច្រើននេះ ក្នុងនាមជាអ្នកជំនួញត្រូវមានកត្តាចម្បងជាគោល គឺភាពស្មោះត្រង់ ប្រសិនបើអ្នកជំនួញមិនមានភាពស្មោះត្រង់ទេ ទោះធ្វើជំនួញអ្វីក៏ពិបាកឈរជើងដែរ។ សព្វថ្ងៃនេះ ដោយសារតែភាពស្មោះត្រង់ ការធ្វើជំនួញផ្សេងៗដូចជា ផលិតផល សេវាកម្ម គឺលោកឱ្យតម្លៃទៅលើ គុណភាព សុវត្ថិភាព និងប្រសិទ្ធិភាពជាគោល។

ជាមួយនឹងភាពស្មោះត្រង់នេះ លោកឧកញ៉ាបានលើកឡើង២រឿង ឬ២ហេតុផលដែលជាកាតាលីករជំរុញឱ្យជំនួញទទួលបានជោគជ័យ។ លោកថា រឿងទី១គឺកាលពីសម័យកូវិដ-១៩ សម្រាប់តំណាងចែកចាយរបស់ក្រុមហ៊ុនលោក ប្រសិនបើលក់មិនដាច់ អាចយកឥវ៉ាន់មកលក់ឱ្យក្រុមហ៊ុនវិញបាន ដោយគ្មានខាតថ្លៃដើមនោះទេ ប្រសិនចាយលុយទិញអស់មួយម៉ឺនដុល្លារពីក្រុមហ៊ុន នោះក្រុមហ៊ុននឹងឱ្យត្រឡប់មកវិញមួយម៉ឺនដុល្លារដូចគ្នា។

កត្តាទី២ គឺក្រៅពីគុណភាពផលិតផល ក្ដីស្រឡាញ់ចំពោះគ្រួសារជាធំ មិនមានផិតក្បត់ប្រពន្ធ កូន ហើយតែងតែយកចិត្តទុកដាក់ គិតសុខទុក្ខប្រពន្ធ បង្កើនក្ដីរីករាយក្នុងគ្រួសារ ទើបលោកឧកញ៉ាបានក្លាយជាបុគ្គលគំរូម្នាក់ដែលមានគេស្រឡាញ់ ចូលចិត្តច្រើន។ កត្តាទាំង២ខាងលើនេះហើយដែលបានស្ដែងពីភាពស្មោះត្រង់ក្នុងការទាក់ទាញអតិថិជន ឱ្យជឿជាក់លើក្រុមហ៊ុនរបស់លោក។ លោកឧកញ៉ាបញ្ជាក់បន្ថែម។

សូមជម្រាបជូនផងដែរថា ឧកញ៉ា ឌី ជោត ត្រូវបាន ព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា ប្រោសព្រះរាជទាន គោរមងារជា «ឧកញ៉ា» កាលពីថ្ងៃទី២៨ ខែមីនា ឆ្នាំ២០២០ ដោយ ព្រះរាជក្រឹត្យលេខ នស/រកត/០៣២០/៤១៧៕

អត្ថបទ៖ សុកធា

The post ឧកញ៉ា ឌី ជោត ៖ អ្នកជំនួញនឹងពិបាកឈរជើង ប្រសិនបើគ្មានភាពស្មោះត្រង់ appeared first on .

ឧកញ៉ា សំ សុខនឿន៖ អ្នកដែលមានភាពអត់ធ្មត់ ម៉ឺងម៉ាត់ ស៊ូទ្រាំក្នុងវិស័យអចលនទ្រព្យ នឹងទទួលបានផលជាទីគាប់ចិត្ត នាពេលអនាគត

ឧកញ៉ាដែនដី — Tue, 10 Oct 2023 00:30:00 +0000

លោកឧកញ៉ា សំ សុខនឿន ប្រធានសមាគមអចលនទ្រព្យសកល និងជាអគ្គនាយកក្រុមហ៊ុន SAM SN REALTY យល់ឃើញថា ជាទូទៅវិស័យអចលនទ្រព្យតែងរីកលូតលាស់ឡើងវិញ បន្ទាប់ពីមានការថមថយ ហើយសម្រាប់អ្នកដែលស៊ូទ្រាំក្នុងវិស័យនេះ នឹងទទួលបានផលចំណេញជាទីគាប់ចិត្តវិញមិនខាន នាពេលអនាគត។

លោកឧកញ៉ា បានលើកឡើងលើទំព័រហ្វេសប៊ុក កាលពីរសៀលថ្ងៃចន្ទម្សិលមិញថា រាល់ពេលវេលាដែលវិស័យអចលនវត្ថុមានភាពថមថយ អ្នកស៊ីអចលនវត្ថុមួយចំនួន តែងរអ៊ូរទាំ ឬបន្ទោសបង្អាប់វិស័យអចលនវត្ថុ ប៉ុន្តែនៅពេលវិស័យអចលនវត្ថុមានសកម្មភាពរីកលូតលាស់ អ្នករកស៊ីអចលនវត្ថុទាំងនោះមានជីវភាពធូរធារមានបាន ដោយសារតែការរីកចម្រើននៃវិស័យនេះ។

អ្នកជំនាញអចលនវត្ថុនៅកម្ពុជា និងជាប្រធានក្រុមប្រឹក្សាភិបាល KW SAM SN បានបន្ថែមថា ជាទូទៅវិស័យអចលនវត្ថុតែងមានការីកលូតលាស់រស់រវើកបន្តទៀត បន្ទាប់ពីមានការថមថយ។ អ្នកដែលមានភាពអត់ធ្មត់ ម៉ឺងម៉ាត់ ស៊ូទ្រាំក្នុងវិស័យនេះ នឹងកាក់គាប់ទទួលបានផលចំណេញជាទីគាប់ចិត្ត នៅពេលដែលវិស័យអចលនវត្ថុនេះមានការរីកលូតលាស់ម្តងទៀត។

សូមជម្រាបថា វិស័យអចលនទ្រព្យកម្ពុជា ត្រូវបានអ្នកជំនាញជាច្រើនយល់ថា មានការថមថយយ៉ាងខ្លាំងនៅប៉ុន្មានឆ្នាំចុងក្រោយនេះ គិតចាប់តាំងពីការផ្ទុះឡើងជំងឺកូវីដ-១៩ នៅចុងឆ្នាំ២០១៩ ហើយរហូតមកដល់ឆ្នាំ២០២៣នេះ ក៏នៅតែមិនទាន់មានសន្ទុះខ្លាំងឡើងវិញនោះដែរ។ លោកឧកញ៉ា គីម ហ៊ាង ប្រធានស្ថាបនិក KW Cambodia បានលើកឡើងថ្មីៗកន្លងទៅនេះថា ជារួមវិស័យអចលនទ្រព្យកម្ពុជា រយៈពេល៨ខែ ឆ្នាំ២០២៣នេះ នៅបន្តស្ងប់ស្ងាត់នៅឡើយ ទាំងដីឡូត៍ បុរី ខុនដូ និងការលក់អចលនទ្រព្យលើកទី២។ ទោះយ៉ាងណា លោកឧកញ៉ា គិតថាបើធៀបនឹងឆ្នាំ២០២០, ២០២១ និង២០២២ នៅឆ្នាំ២០២៣នេះ វិស័យមួយនេះមានលក្ខណៈល្អប្រសើរបណ្តើរៗឡើងវិញហើយ៕

The post ឧកញ៉ា សំ សុខនឿន៖ អ្នកដែលមានភាពអត់ធ្មត់ ម៉ឺងម៉ាត់ ស៊ូទ្រាំក្នុងវិស័យអចលនទ្រព្យ នឹងទទួលបានផលជាទីគាប់ចិត្ត នាពេលអនាគត appeared first on .