វេទិកាសេដ្ឋកិច្ចពិភពលោកលើកទី៥៤ ហៅកាត់ WEF កំពុងធ្វើឡើងនៅក្នុងទីក្រុង Davos ប្រទេសស្វីស ពីថ្ងៃទី១៥ រហូតដល់ថ្ងៃទី១៩ ខែមករា ក្រោមការចូលរួមពីមេដឹកនាំកំពូលមកពីច្រើនជាង ១០០ប្រទេស និងធុរកិច្ចជនជាន់ខ្ពស់ ក៏ដូចជាស្ថាប័នធំៗនានា សរុបច្រើនជាង ២ ៥០០នាក់។

ដោយឡែក សម្រាប់មេដឹកនាំកំពូលអាស៊ាន ដែលកំពុងបង្ហាញវត្តមាននៅក្នុងវេទិកា WEF ប្រចាំឆ្នាំសារនេះ គឺមានដូចជា សម្ដេចធិបតី ហ៊ុន ម៉ាណែត នាយករដ្ឋមន្ត្រីនៃប្រទេសកម្ពុជា លោក Pham Minh Chinh នាយករដ្ឋមន្ត្រីវៀតណាម លោក Srettha Thavisin នាយករដ្ឋមន្ត្រីថៃ និងប្រធានាធិបតីសិង្ហបុរីទើបឡើងកាន់តំណែង លោក Tharman Shanmugaratnam។

រំលឹកបន្តិចថា វេទិកាសេដ្ឋកិច្ចពិភពលោក គឺជាកម្មវិធីដែលតែងប្រារព្ធធ្វើឡើងជារៀងរាល់ឆ្នាំ ហើយគ្រប់បុគ្គលដែលចូលរួមនៅក្នុងកម្មវិធីមួយនេះ គឺត្រូវតែទទួលបានការអញ្ជើញពី WEF។

ការទទួលបានលិខិតអញ្ជើញចូលរួមវេទិកា WEF គឺជាការបង្ហាញឲ្យឃើញថា ប្រទេសកម្ពុជា គឺជាប្រទេសកំពុងមានសេដ្ឋកិច្ចរីកចម្រើន និងការអភិវឌ្ឍន៍ខ្ពស់មួយនៅក្នុងតំបន់អាស៊ាន ហើយថែមទាំងអាចចូលរួមតុជាមួយមហាអំណាចធំៗ ក្នុងការផ្ដល់យោបល់សម្រាប់ដោះស្រាយបញ្ហានានា ដែលកំពុងកើតមានលើពិភពលោក

ជម្រាបដែរថា វេទិកាសេដ្ឋកិច្ចពិភពលោក បង្កើតឡើងដំបូងនៅក្នុងឆ្នាំ១៩៧១ ដោយសេដ្ឋកិច្ចវិទូកូនកាត់ស្វីស និងអាល្លឺម៉ង់ លោក Klaus Schwab ក្នុងគោលបំណងប្រមូលផ្ដុំវិស័យឯកជន និងសាធារណៈ ក៏ដូចជាបុគ្គលមានឥទ្ធិពល និងមហាអំណាចសេដ្ឋកិច្ចធំៗ ស្វែងរកដំណោះស្រាយចំពោះ​បញ្ហាដែលកំពុងកើតមានលើសកលលោក៕

The post មេដឹកនាំកំពូលអាស៊ាន ៤រូបប៉ុណ្ណោះ ទទួលបានការអញ្ជើញចូលរួមវេទិកាសេដ្ឋកិច្ចពិភពលោក ឆ្នាំ២០២៤ appeared first on .

ក្នុងជំនួបសម្តែងការគួរសម និងពិភាក្សាការងារជាមួយសម្តេចធិបតី ហ៊ុន ម៉ាណែត នាយករដ្ឋមន្រ្តី ក្នុងឱកាសចូលរួមវេទិកាសេដ្ឋកិច្ចពិភពលោកឆ្នាំ២០២៤ នៅទីក្រុងដាវ៉ូស ប្រទេសស្វីស នៅថ្ងៃទី១៦ ខែមករា ឆ្នាំ២០២៤ លោកស្រី Jane Sun បានបង្ហាញអំពីដំណើរការអាជីវកម្ម និងសក្តានុពលរបស់ក្រុមហ៊ុន Trip.com ដែលមានប្រតិបត្តិការអាជីវកម្មផ្តោតជាសំខាន់លើវិស័យទេសចរណ៍។

ជាមួយគ្នានេះ លោកស្រីក៏បានបញ្ជាក់ពីគោលបំណងរបស់ក្រុមហ៊ុនក្នុងការបន្តសហការជាមួយក្រុមហ៊ុនដៃគូនៅកម្ពុជា ដើម្បីនាំភ្ញៀវទេសចរឱ្យបានកាន់តែច្រើនមកទស្សនាប្រទេសកម្ពុជា ដែលជាប្រទេសដ៏ស្រស់ស្អាត និងមានគោលដៅទេសចរណ៍ ដែលមានភាពទាក់ទាញខ្លាំង។

ជាការឆ្លើយតបនៃជំនួបនោះ សម្តេចធិបតី បានបង្ហាញនូវការស្វាគមន៍ចំពោះបំណងរបស់ក្រុមហ៊ុនក្នុងការពង្រីកសកម្មភាពវិនិយោគនៅកម្ពុជា ជាពិសេស តាមរយៈកិច្ចសហការជាមួយនឹងបណ្តាក្រុមហ៊ុនដៃគូក្នុងស្រុក ស្របពេលដែលរាជរដ្ឋាភិបាល អាណត្តិទី៧ បាន និងកំពុងដាក់ចេញនូវគោលនយោបាយ និងយន្តការចាំបាច់ សំដៅជំរុញកំណើននៃវិស័យទេសចរណ៍ នៅក្រោយវិបត្តិនៃជំងឺកូវីដ-១៩ ។

សូមបញ្ជាក់ថា Trip.com គឺជាវេបសាយធ្វើដំណើរមួយឈានមុខគេលើពិភពលោក ដោយរួមបញ្ចូលនូវកញ្ចប់ផលិតផល និងសេវាកម្មទេសចរណ៍ដ៏ទូលំទូលាយ សម្រាប់ការធ្វើដំណើរជុំវិញពិភពលោក ។ អ្នកទេសចរទូទាំងពិភពលោក ក៏អាចកក់សេវាកម្មទេសចរណ៍ ដូចជា សំបុត្រយន្តហោះ កន្លែងស្នាក់នៅ និងសំបុត្ររថយន្តជាដើម នៅកម្ពុជា តាមរយៈវេបសាយ Trip.com ហើយកាលពីថ្ងៃទី២៤ ខែឧសភា ឆ្នាំ២០២៣ កន្លងទៅ ក្រុមហ៊ុន Cambodia Angkor Air របស់កម្ពុជា ក៏បានចុះអនុស្សរណៈយោគយល់គ្នាក្នុងភាពជាដៃគូជាមួយនឹង Trip.com ក្នុងការបង្កើតអាកាសយានដ្ឋានឆ្លាតវៃ (smart airport) នៅក្នុងខេត្តសៀមរាបផងដែរ៕

The post ក្រុមហ៊ុនទេសចរណ៍Trip.com មានបំណងបន្តសហការជាមួយក្រុមហ៊ុនដៃគូកម្ពុជា ដើម្បីនាំភ្ញៀវទេសចរមកទស្សនាកាន់តែច្រើន appeared first on .