ទីក្រុងឌូបៃ

អាកាសយានដ្ឋាន Al Maktoum របស់ទីក្រុងឌូបៃពង្រីកចំណតអ្នកដំណើរថ្មីតម្លៃជាង ៣៥ពាន់លានដុល្លារ

monyokn — Mon, 29 Apr 2024 03:59:45 +0000

សារព័ត៌មាន Reuters បានចុះផ្សាយថា ក្នុងនាមជានាយករដ្ឋមន្ត្រី និងជាអ្នកគ្រប់គ្រងទីក្រុងឌូបៃព្រះអង្គម្ចាស់ Sheikh Mohammed bin Rashid al-Maktoum បានយល់ព្រមលើការពង្រីកចំណតអ្នកដំណើរថ្មី នៅអាកាសយានដ្ឋានអន្តរជាតិ Al Maktoum តម្លៃ ៣៤,៨៥ពាន់លានដុល្លារ។

ព្រះអង្គម្ចាស់បានលើកឡើងថា អាកាសយានដ្ឋានអន្តរជាតិ Al Maktoum នឹងក្លាយជាអាកាសយានដ្ឋានធំជាងគេបំផុតនៅលើពិភពលោក និងធំជាងអាកាសយានដ្ឋានអន្តរជាតិឌូបៃដល់ទៅ ៥ដង ព្រមទាំងមានសមត្ថភាពអាចផ្ទុកអ្នកដំណើរបានរហូតដល់ទៅចំនួន ២៦០លាននាក់ ។ ម្យ៉ាងវិញទៀត ប្រតិបត្តិការទាំងអស់នៅអាកាសយានដ្ឋានឌូបៃ នឹងត្រូវផ្ទេរទៅអាកាសយានដ្ឋាន Al Maktoum នារយៈពេលប៉ុន្មានឆ្នាំខាងមុខ។

មិនត្រឹមតែប៉ុណ្ណោះ អាកាសយានដ្ឋាន Al Maktoum ក៏នឹងរួមបញ្ចូលច្រកទ្វារស្ថានីយចំនួន ៤០០ច្រក និងផ្លូវរត់ចំនួន ៥ខ្សែ ខណៈអាកាសយានដ្ឋាននេះ ក៏នឹងក្លាយជាផ្ទះថ្មីរបស់ក្រុមហ៊ុនអាកាសចរណ៍ Emirates និងក្រុមហ៊ុនអាកាសចរណ៍ Flydubai ផងដែរ។

ទន្ទឹមនឹងនោះ ការិយាល័យប្រព័ន្ធផ្សព្វផ្សាយទីក្រុងឌូបៃ បានដកស្រង់សម្តីរបស់នាយកប្រតិបត្តិនៃអាកាសយានដ្ឋានឌូបៃលោក Paul Griffiths យ៉ាងដូច្នេះថា ការផ្លាស់ប្តូរព្រលាននឹងពង្រឹងនូវជំហររបស់ទីក្រុងឌូបៃ ជាមជ្ឈមណ្ឌលអាកាសចរណ៍ឈានមុខគេនៅលើឆាកអន្តរជាតិ៕

The post អាកាសយានដ្ឋាន Al Maktoum របស់ទីក្រុងឌូបៃពង្រីកចំណតអ្នកដំណើរថ្មីតម្លៃជាង ៣៥ពាន់លានដុល្លារ appeared first on .

មហាសេដ្ឋីឥណ្ឌា ជះលុយរាប់សិបលានដុល្លារទិញអចលនទ្រព្យថ្លៃបំផុតនៅឌូបៃ

ឧកញ៉ាសំពៅ — Mon, 29 Aug 2022 07:47:42 +0000

កាលពីពេលថ្មីៗនេះ អចលនទ្រព្យថ្លៃបំផុតនៅឌូបៃរកឃើញម្ចាស់ហើយ ខណៈ Bloomberg បានទម្លាយថា ម្ចាស់កម្មសិទ្ធអចលនទ្រព្យតម្លៃរាប់សិបលានដុល្លារមួយនេះ គឺជាក្រុមហ៊ុនមហាសេដ្ឋីឥណ្ឌា Mukesh Ambani។

Bloomberg ក៏បានរាយការណ៍ដែរថា ភូមិគ្រឹះខាងលើមានតម្លៃប្រមាណ ៨០ លានដុល្លារ ហើយការទិញយកមួយនេះគឺជា ការលក់អចលនទ្រព្យថ្លៃបំផុតប្រចាំប្រវត្តិសាស្ត្រទីក្រុងឌូបៃ។

សារព័ត៌មានមានមូលដ្ឋាននៅទីក្រុង New York ថែមទាំងបង្ហើបទៀតថា Ambani ទិញភូមិគ្រឹះនៅតំបន់ Palm Jumeirah ដើម្បីជាកាដូផ្ដល់ឲ្យកូនប្រុសពៅ Anant ដែលជាបេក្ខភាពមួយរូបក្នុងការក្លាយជាអ្នកស្នងមរតករាប់សិបពាន់លានដុល្លារពីឪពុក។

ដោយឡែក ភូមិគ្រឹះមួយនេះគឺ មានបន្ទប់គេង ១០ បន្ទប់ អាងហែលទឹកទាំងក្នុង និងក្រៅ និងមានទីតាំងស្ថិតនៅភាគខាងជើងនៃកោះសិប្បនិមិត្តនៃទីក្រុងឌូបៃ៕

The post មហាសេដ្ឋីឥណ្ឌា ជះលុយរាប់សិបលានដុល្លារទិញអចលនទ្រព្យថ្លៃបំផុតនៅឌូបៃ appeared first on .

ជាង ១០ ឆ្នាំចុងក្រោយ ការលក់អចលនទ្រព្យនៅឌូបៃបំបែកកំណត់ត្រាថ្មី

ឧកញ៉ាសំពៅ — Thu, 07 Jul 2022 08:44:15 +0000

យោងតាមរបាយការណ៍ផ្ដល់ឲ្យដោយ Dubai Land Development ហៅកាត់ DLD បានបង្ហាញថា ការលក់នៅលើទីផ្សារអចលនទ្រព្យនៅឌូបៃមានរហូតដល់ប្រមាណជិត ៧ ពាន់លានដុល្លារកាលពីខែមិថុនា ដែលជាតួលេខខ្ពស់បំផុតក្នុងរយៈពេល ១៣ ឆ្នាំចុងក្រោយ។

ដោយឡែកទិន្នន័យផ្ដល់ឲ្យដោយភ្នាក់ងារលក់ Allsopp & AllSopp ក៏បានបញ្ជាក់ដែរថា ទិន្នន័យដែលលក់បានច្រើនបំផុតប្រចាំខែមិថុនា គឺភាគច្រើនមាននៅ ៣ ទីតាំងគឺ Dubai Marina, Jumeirah Golf Estates និង Downtown Dubai។

ប្រភពខាងលើក៏បានបន្ថែមទៀតថា តម្លៃជាមធ្យមនៃអចលនទ្រព្យនៅតំបន់ Dubai Marina គឺប្រមាណ ៥០ ម៉ឺនដុល្លារ ខណៈនៅ Jumierah Golf Estates ប្រហែល ១.៧ លានដុល្លារ និងនៅ Downtown Dubai ប្រហែលជិត ៤០ ម៉ឺនដុល្លារ។

សូមជម្រាបដែរថា DLD បានបង្ហាញឲ្យឃើញថា ប្រតិបត្តិការទិញអចលនទ្រព្យនៅឌូបៃគឺមានរហូតដល់ ៨ ៨៣៨ ឯណោះនៅខែមិថុនា៕

The post ជាង ១០ ឆ្នាំចុងក្រោយ ការលក់អចលនទ្រព្យនៅឌូបៃបំបែកកំណត់ត្រាថ្មី appeared first on .

មកដឹងតម្លៃអាផាតមិននៅទីក្រុងឌូបៃ ដែលមហាសេដ្ឋីរុស្ស៊ីកំពុងរត់ភៀសខ្លួនទៅទីនោះ

ឧកញ៉ាសំពៅ — Tue, 22 Mar 2022 05:01:41 +0000

ដូចប្រិយមិត្តបានដឹងរួចមកហើយថា បច្ចុប្បន្នប្រទេសជាច្រើនជុំវិញពិភពលោក ជាពិសេសគឺតំបន់អឺរ៉ុប និងប្រទេសលោកខាងលិចកំពុងសម្រុកដាក់ទណ្ឌកម្មសេដ្ឋកិច្ចទៅលើប្រទេសរុស្ស៊ី និងក្រុមមហាសេដ្ឋីរុស្ស៊ីយ៉ាងចាស់ដៃ។

តែស្របពេលដែលប្រទេសជាច្រើនកំពុងនាំគ្នាដាក់គំនាបសេដ្ឋកិច្ចទៅកាន់ប្រជាជនរុស្ស៊ី ក៏នៅមានប្រទេសខ្លះនៅចាំទទួលស្វាគមន៍ពួកគេដូចគ្នា ជាក់ស្ដែងសហព័ន្ធអារ៉ាប់រួមគឺកំពុងឈរនៅចំណុចអព្យាក្រឹត្យ ស្របពេលទីក្រុងឌូបៃគឺជាកន្លែងមួយដែលគេរាយការណ៍មកថា ក្រុមមហាសេដ្ឋីកំពុងនាំគ្នាភៀសខ្លួនទៅទីនោះ ដើម្បីគេចពីទណ្ឌកម្មសេដ្ឋកិច្ចនានា។

ជាការពិត ឌូបៃគឺមានភាពល្បីរន្ទឺដោយសារសំណង់អចលនទ្រព្យដ៏ស្កឹមស្កៃនៅទីនោះ ដូច្នេះបើទោះជាមិនមែនដោយសារការរត់ភៀសខ្លួន ក៏ទីក្រុងអ្នកមានមួយនេះនៅតែអាចអូសទាញអ្នកជំនួញធំៗមកបានយ៉ាងស្រួល។

ខាងក្រោមនេះគឺជាតម្លៃអាផាតមិននៅតំបន់ថ្លៃបំផុតទាំង ៧ នៅទីក្រុងឌូបៃ ដែលលឺល្ហៀងៗមកថា ជាកន្លែងប្រមូលផ្ដុំបុគ្គលលំដាប់អភិជនទាំងក្នុងតំបន់ និងក្រៅតំបន់៖

អគារខ្ពស់បំផុតលើលោក Burj Khalifa មាន ៩០០ អាផាតមិន តម្លៃចាប់ពីជិត ៣ សែនដុល្លារ ដល់ជិត ៧ លានដុល្លារ
តំបន់ Dubai Marina មានអាផាតមិនរាប់ពាន់ តម្លៃចាប់ពី ១,៣ សែនដុល្លារ ដល់ ៥,៤ លានដុល្លារ
តំបន់ Jumeirah Beach Residence មានទីតាំងនៅក្បែរ Marina ខណៈតម្លៃចាប់ពី ២,២៧ សែនដុល្លារ ដល់ ៣,៥ លានដុល្លារ
កោះ Palm Jumeirah ចំណាយថវិកាសាងសង់កោះសិប្បនិមិត្តមួយនេះគឺអស់ ១២ ពាន់លានដុល្លារ ខណៈតម្លៃ អាផាតមិននៅទីនោះមានចាប់ពី ២ សែនដុល្លារ ដល់ ១១ លានដុល្លារ
តំបន់ Emirates Hills ដែលជាទូទៅគេនិយមហៅ Beverly Hills of Dubai ដែលមានវីឡាប្រមាណជាង ៦០០ តម្លៃប្រហែល ១៣,៦ លានដុល្លារ/ខ្នង
តំបន់ Business Bay គឺជាតំបន់អគារពាណិជ្ជកម្មធំមួយប្រចាំទីក្រុង ដែលអាផាតមិននៅតំបន់នេះមានតម្លៃចាប់ពី ១,៨ សែនដុល្លារ ដល់ ១០,៨ លានដុល្លារ
តំបន់អភិវឌ្ឍន៍ Dubai International Financial Center ដែលជាទីផ្សារហិរញ្ញវត្ថុដ៏ធំប្រមូលផ្ដុំអ្នកជំនួញមកពីច្រើនតំបន់ ខណៈតម្លៃខុនដូប្រណីតនៅទីនោះមានចាប់ពី ១,១ លានដុល្លារឡើងទៅ៕

ប្រភព: Yahoo

The post មកដឹងតម្លៃអាផាតមិននៅទីក្រុងឌូបៃ ដែលមហាសេដ្ឋីរុស្ស៊ីកំពុងរត់ភៀសខ្លួនទៅទីនោះ appeared first on .

កម្ពុជារៀបចំពិព័រណ៍ពិភពលោក នៅឌុយបៃ ដើម្បីផ្សាយពីសម្បត្តិវប្បធម៌ខ្មែរ និងស្វែងរកអ្នកវិនិយោគ

ឧកញ៉ាសាមញ្ញ — Tue, 25 Jan 2022 05:54:06 +0000

កម្ពុជាប្រារព្ធ «ទិវាជាតិកម្ពុជា» នៅក្នុងពិព័រណ៍ពិភពលោក ២០២០ ឌុយបៃ សហភាពអារ៉ាប់រួម ដោយមានប្រទេស និងអង្គការអន្តរជាតិធំៗ ប្រមាណជាង ៥០ បានចូលរួមអបអរសាទរ។

កាលពីថ្ងៃទី២៤ ខែមករា ឆ្នាំ២០២២ លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម បានដឹកនាំគណៈប្រតិភូកម្ពុជា ទៅចូលរួមអបអរសាទរពិធីប្រារព្ធ «ទិវាជាតិកម្ពុជា» នៅក្នុងពិព័រណ៍ពិភពលោក ២០២០ នៅទីក្រុងឌុយបៃ សហភាពអារ៉ាប់រួម ក្រោមវត្តមានចូលរួមពីលោកបណ្ឌិត ថានី ប៊ីន អាម៉េដ អាល់ ហ៊្សេរយូឌី រដ្ឋមន្រ្តីក្រសួងពាណិជ្ជកម្មអន្តរជាតិ នៃសហភាពអារ៉ាប់រួម និងតំណាងប្រទេស ព្រមទាំងអង្គការអន្តរជាតិធំៗ ជាង ៥០ បន្ថែមទៀត។

ក្នុងពិធីនេះ ក៏ុមានកម្មវិធីសម្តែងសិល្បៈបង្ហាញវប្បធម៌ខ្មែរ កម្មវិធីបង្ហាញមុខម្ហូបខ្មែរចំនួន ០២ មុខ គឺអាម៉ុកត្រី និងគុយទាវភ្នំពេញដោយចុងភៅកម្ពុជាមកពីវិទ្យាស្ថានម្ហូបអាហារកម្ពុជា វេទិកាជំរុញការវិនិយោគ និងទេសចរណ៍កម្ពុជា និងការសម្តែងសិល្បៈបង្ហាញវប្បធម៌ខ្មែរជូនពិភពលោក ដើម្បីបានស្គាល់។

លើសពីនេះ កម្ពុជាបានសាងសង់ពន្លាជាតិកម្ពុជា ដើម្បីបង្ហាញថា “ព្រះរាជាណាចក្រកម្ពុជា គឺជាដែនដីសុវណ្ណភូមិដ៏ចំណាស់មួយនៅក្នុងតំបន់ឤស៊ីឤគ្នេយ៍ និងធ្លាប់មានកេរ្តិ៍ឈ្មោះល្បីល្បាញជាប្រវត្តិសាស្ត្រតាំងពីបុរាណរហូតមកដល់បច្ចុប្បន្ន។ កម្ពុជាធ្លាប់មានវប្បធម៌ និងអរិយធម៌រុងរឿង ជាយូរលង់ណាស់មកហើយ តាមរយៈភាពល្បីល្បាញនៃប្រាង្គប្រាសាទបុរាណដ៏អស្ចារ្យជាច្រើន ជាពិសេសប្រាសាទអង្គរវត្ត ដែលបានទាក់ទាញ និងជំរុញកំណើនភ្ញៀវទេសចរណ៍ពីទូទាំងពិភពលោកឱ្យទៅទស្សនាកម្ពុជា។ កេរមរតកដែលដូនតាខ្មែរ បានបន្សល់ទុកឱ្យ គួបផ្សំជាមួយនឹងសិល្បៈ និងវប្បធម៌ប្រកបដោយភាពរស់រវើក ព្រមទាំងភាពស្រស់បំព្រងនៃបរិស្ថានធម្មជាតិ ដែលជាសក្តានុពលសម្រាប់ការអភិវឌ្ឍសេដ្ឋកិច្ចប្រកបដោយចីរភាព ទាំងនេះគឺជាចំណុចសំខាន់ៗ ដែលរាជរដ្ឋាភិបាលកម្ពុជា បាននាំយកមកបង្ហាញពិភពលោក ក្នុងព្រឹត្តិការណ៍ដ៏អស្ចារ្យនាពេលនេះ”។

ជាមួយគ្នានេះ លោករដ្ឋមន្ត្រី ប៉ាន សូរស័ក្តិ បានអំពាវនាវ និងសូមស្វាគមន៍យ៉ាងកក់ក្តៅចំពោះធុរជន និងវិនិយោគិននានា ដែលចង់ស្វែងរកឱកាសបណ្តាក់ទុនវិនិយោគនៅកម្ពុជា ព្រមទាំងស្វាគមន៍ទេសចរអន្តរជាតិទាំងទ្បាយ ដែលមានបំណងទៅទស្សនាកម្ពុជា ដើម្បីស្វែងយល់ពីសម្បត្តិវប្បធម៌ អរិយធម៌ និងធនធានធម្មជាតិដ៏សម្បូរបែប ដែលនៅមានឋិតថេរពីបុរាណរហូតមកដល់បច្ចុប្បន្ន។

លោកបានបញ្ជាក់ថា ពន្លាជាតិកម្ពុជា បានសាងសង់យ៉ាងល្អប្រណីតតាមរចនាបថខ្មែរ ដោយច្របាច់បញ្ចូលគ្នានូវសម័យកាលជាប្រវត្តិសាស្រ្តសំខាន់ៗ ចំនួនបួន គឺ៖ សម័យមុនអង្គរ, សម័យអង្គរ, សម័យលង្វែក ឬសម័យឧត្តុង្គ និងសម័យចតុមុខ ឬសម័យភ្នំពេញបច្ចុប្បន្ន ហើយចំណុចសំខាន់ និងធ្វើឱ្យភ្ញៀវអ្នកទស្សនា មានការចាប់អារម្មណ៍ និងកោតសរសើរ គឺកម្ពុជាបាននាំមកនូវរូបសំណាកចម្លងមួយចំនួន ដូចជា ចម្លាក់តោ, ឆ្មាំអង្គរ, ព្រះវិស្ណុ, ព្រះសិវៈ, ព្រះបាទជ័យវរ័្មនទី៧, ព្រហ្មបាយ័ន ជាពិសេស ម៉ាកែត អង្គរវត្ត ធ្វើពីស្ពាន់ មករៀបចំតុបតែងក្នុងពន្លាជាតិជូនភ្ញៀវទស្សនាផងដែរ។

លោកបន្តថា ដោយសារចំណុចពិសេសទាំងនេះ ទើបធ្វើឱ្យពន្លាជាតិកម្ពុជា ត្រូវបានគណៈកម្មការជ្រើសរើសចូលក្នុងបញ្ជីប្រទេសចំនួន ៣០ ក្នុងចំណោម ១៩០ ប្រទេស ដែលបានរៀបចំពន្លាជាតិស្អាតជាងគេ និងមានលក្ខណៈពិសេសស្របតាមប្រធានបទនៃពិព័រណ៍ សម្រាប់បើកទទួលភ្ញៀវសាកល្បងមុនពេលពិព័រណ៍ពិភពលោកបើកសម្ពោធជាផ្លូវការមួយថ្ងៃ។

បើតាមលោក ប៉ាន សូរស័ក្តិ ចាប់តាំងពីពេលបើកដំណើរការ កាលពីថ្ងៃទី០១ ខែតុលា ឆ្នាំ២០២១ រហូតដល់ថ្ងៃទី២៣ ខែមករា ឆ្នាំ២០២២ ពន្លាជាតិកម្ពុជាបានទទួលភ្ញៀវចូលទស្សនាចំនួន ១៧៤, ០១៨ នាក់ ក្នុងនោះគ្រាន់តែក្នុងរយៈពេល ១ ថ្ងៃ នៃបើកសាកល្បងដំបូង ពន្លាជាតិកម្ពុជា បានទទួលភ្ញៀវចូលទស្សនារហូតដល់ ជាង ១,០០០ នាក់។

សូមជម្រាបជូនថា ពិព័រណ៍ពិភពលោក២០២០ ឌុយបៃ គឺជាព្រឹត្តិការណ៍កម្រិតពិភពលោកលើកដំបូង ដែលរៀបចំឡើងនៅតំបន់មជ្ឈឹមបូព៌ាមានរយៈពេល ០៦ ខែ ហើយបើកចាប់ពីថ្ងៃទី០១ ខែតុលា ឆ្នាំ២០២១ រហូតដល់ថ្ងៃទី៣១ ខែមីនា ឆ្នាំ២០២២ ស្មើនឹងចំនួន ១៨២ថ្ងៃ។

ប្រធានបទនៃពិព័រណ៍នេះគឺ ការតភ្ជាប់គំនិត ដើម្បីស្ថាបនាអនាគត (Connecting Minds, Creating the Future) និងមានប្រធានបទរងចំនួន ៣ គឺ៖ កាលានុវត្តភាព, វឌ្ឍនភាព និងនិរន្តភាព។ តាមការរំពឹងទុក បន្ទាប់ពីការចូលរួមពិព័រណ៍ពិភពលោក ២០២០ ឌុយបៃ នាពេលនេះ នឹងធ្វើឱ្យពិភពលោកស្គាល់ និង ចាប់អារម្មណ៍លើកម្ពុជាកាន់តែច្រើនឡើងថែមទៀត ហើយកម្ពុជារំពឹងថា តាមរយៈការរៀបចំវេទិការជំរុញការវិនិយោគ និងទេសចរណ៍នាពេលនេះ នឹងទាក់ទាញវិនិយោគគិន និងទេសចរណ៍អន្តរជាតិបានច្រើនថែមទៀតចូលមកកម្ពុជា៕

The post កម្ពុជារៀបចំពិព័រណ៍ពិភពលោក នៅឌុយបៃ ដើម្បីផ្សាយពីសម្បត្តិវប្បធម៌ខ្មែរ និងស្វែងរកអ្នកវិនិយោគ appeared first on .

ឌូបៃ ដាក់ផែនការទាញភ្ញៀវទេសចរឲ្យបាន ២៥ លាននាក់ មកលេងកម្សាន្ត ក្រោយរួមបញ្ចូលគ្នារវាងនាយកដ្ឋានពីរ

ឧកញ៉ាសាមញ្ញ — Tue, 09 Nov 2021 01:18:46 +0000

ព្រះអង្គម្ចាស់នៃទីក្រុងឌូបៃ Sheikh Hamdan bin Mohamed Bin Rashid Al Maktoum បានឲ្យដឹងនៅលើគណនី Twitter ផ្លូវការរបស់ទ្រង់ថា ទីក្រុងឌូបៃ គ្រោងនឹងរួមបញ្ចូលគ្នា រវាងនាយកដ្ឋានសេដ្ឋកិច្ច និងទេសចរណ៍ ដើម្បីឲ្យក្លាយជាស្ថាប័នតែមួយ ដោយសង្ឃឹមថានឹងអាចទាក់ទាញភ្ញៀវទេសចរ ចំនួន ២៥ លាននាក់ នៅត្រឹមឆ្នាំ ២០២៥ ។

មិនតែប៉ុណ្ណោះ ព្រះអង្គម្ចាស់ Sheikh Hamdan បានបញ្ជាក់បន្ថែមថា លោក Helal Al Marri នឹងត្រូវតែងតាំងជាអគ្គនាយកនៃនាយកដ្ឋានថ្មីមួយនេះ ។

ក្រៅពីនោះ ថា្នក់ដឹកនាំរបស់ទីក្រុងឌូបៃរូបនេះ បាននិយាយថា គោលបំណងសំខាន់ នៃការបង្កើតនាយកដ្ឋានថ្មីនេះ គឺមានដូចជា ចង់បង្កើនតម្លៃបន្ថែមទៀតទៅលើវិស្ស័យឧស្សហកម្ម ក្នុងចំនួន ១៥០% សម្រាប់រយ:ពេល ៥ ខាងមុខ ពង្រីកទីផ្សារនាំចេញក្រៅប្រទេស សម្រាប់ផលិតផលក្នុងស្រុក ឲ្យបានចំនួន ៥០% និង បង្កើនចំនួនភ្ញៀវទេសចរ ឲ្យបាន ៤០% ផងដែរ ។

លោកបានបន្ថែមទៀតថាប្រទេសអារ៉ាប់រួម ក៏ចង់ទាក់ទាញក្រុមហ៊ុនចំនួន ១ សែន ឲ្យចូលមកបណ្តាក់ទុន ក្នុងរយ:ពេល ៣ ឆ្នាំខាងមុខ រួមទាំងបង្កើតព្រឹត្តិការណ៍សេដ្ឋកិច្ចពិភពលោកឲ្យបាន ៤០០ លើកជារៀងរាល់ឆ្នាំ នៅត្រឹមឆ្នាំ ២០២៥ និងលើកទឹកចិត្តដល់ក្រុមហ៊ុនឯកជន និងអាជីវកម្មលក្ខណ:គ្រួសារ ឲ្យចុះបញ្ជីនៅលើទីផ្សារហិរញ្ញវត្ថុ និងផ្សារហ៊ុន ក្នុងទីក្រុងឌូបៃ៕

ប្រភព: Kelo

The post ឌូបៃ ដាក់ផែនការទាញភ្ញៀវទេសចរឲ្យបាន ២៥ លាននាក់ មកលេងកម្សាន្ត ក្រោយរួមបញ្ចូលគ្នារវាងនាយកដ្ឋានពីរ appeared first on .

សណ្ឋាគារ ១០ កន្លែងថ្លៃបំផុតនៅ Dubai សម្រាកមួយយប់អាចទិញឡាន Prius បានមួយគ្រឿង

ឧកញ៉ាសំពៅ — Sat, 28 Aug 2021 01:30:56 +0000

ទីក្រុងឌូបៃ គឺជាទីក្រុងប្រណិតបំផុតមួយនៅលើពិភពលោក ដោយសារមានហេដ្ឋារចនាសម្ព័ន្ធខ្វាត់ខ្វែង បច្ចេកវិទ្យាទំនើប កន្លែងកម្សាន្តប្លែកភ្នែក និងជាពិសេសប្រមូលផ្ដុំទៅដោយសេដ្ឋីៗជាច្រើននាក់ថែមទៀត។

ដោយសារជាទីក្រុងទំនើប ដូច្នេះការចំណាយនៅទីក្រុងមួយនេះ ក៏អស់មិនតិចឡើយ ជាពិសេសគឺសម្រាប់កន្លែងស្នាក់អាស្រ័យដូចជា សណ្ឋាគារជាដើម ព្រោះនៅទីនោះ សណ្ឋាគារនីមួយៗគឺបំពាក់ទៅដោយគ្រឿងបរិក្ខារទំនើបៗ ដូច្នេះហើយតម្លៃនៃការស្នាក់នៅក៏មិនថោកប៉ុន្មានដែរ។

តទៅនេះ គឺជាបញ្ជីឈ្មោះសណ្ឋាគារ ១០ កន្លែងថ្លៃបំផុតនៅទីក្រុងឌូបៃ ដែលមានខ្លះតម្លៃរាប់ម៉ឺនដុល្លារក្នុងមួយយប់៖

១០/ Qasr Al Sarab Desert Resort By Anantara

មានទីតាំងស្ថិតនៅចំកណ្ដាលវាលខ្សាច់ល្វឹងល្វើយតែម្ដងដោយរចនាឡើងតាមបែបប្រាសាទមជ្ឈិមសម័យ ដែលមានអាងហែលទឹកដ៏ធំបែរមុខទៅរកវាលខ្សាច់ល្ហល្ហេវ។ តម្លៃស្នាក់មួយយប់គឺចន្លោះពី ៣២៥ ដុល្លារទៅ ១ ១២៥ ដុល្លារ។

៩/ Al Maha Desert Resort & Spa

សណ្ឋាគារនេះក៏ស្ថិតនៅកណ្ដាលវាលខ្សាច់ដែរ ដោយមានការរចនាបន្ទប់តាមបែបតង់ដាច់ដោយឡែក និងមានអាងហែលទឹកផ្ទាល់ខ្លួន រីឯតម្លៃវិញគឺប្រមាណ ៣ ០០០ ដុល្លារ/យប់។

៨/ The W

សណ្ឋាគារមួយនេះជាមែកធាងនៃក្រុមហ៊ុនលំដាប់ពិភពលោក Marriott International ដែលគ្រប់គ្រងសណ្ឋាគារល្បីៗជាច្រើនកន្លែងជុំវិញពិភពលោក។ The W មានទីតាំងនៅកោះ The Pal ជាប្រជុំទៅដោយសណ្ឋាគារទំនើបៗ ហើយបើតាមសេចក្ដីរាយការណ៍ពី Lux Habitat បានឲ្យដឹងថា បើចង់ចាយពេលនៅទីនោះមួយយប់ អ្នកត្រូវចំណាយប្រមាណ ៧ ៣៥០ ដុល្លារ។

៧/ Armani Hotel Dubai

គ្រាន់តែឃើញឈ្មោះ គឺដឹងបាត់ទៅហើយថា សណ្ឋាគារនេះស្ថិតក្រោមការគ្រប់គ្រងរបស់ក្រុមហ៊ុនល្បីឈ្មោះ The Armani ហើយវាក៏ត្រូវបានរចនាដោយស្ថាបនិកក្រុមហ៊ុន Giorgio Armani ដោយផ្ទាល់ទៀតផង។ ដោយឡែកតម្លៃវិញ គឺប្រមាណ ១២ ២៥០ ដុល្លារ។

៦/ Four Season Jumeirah

មិនខុសគ្នាពី The W ទេ Four Season Jumeirah ក៏មានសាខាជាច្រើនកន្លែងជុំវិញពិភពលោកដែរ ដោយនៅទីក្រុងឌូបៃ តម្លៃនៃការស្នាក់នៅមួយយប់នៅទីនោះគឺប្រមាណ ១២ ៥០០ ដុល្លារ។

៥/ Atlantis The Palm

ដោយសារមានទីតាំងស្ថិតនៅលើកោះ The Palm ដែលជាកោះសិប្បនិមិត្តច្នៃឡើងឲ្យមានរូបរាងដូចដើមត្នោត Atlantis The Palm អាចនិយាយបានថាជាសណ្ឋាគារប្រណីតបំផុតលើលោក រីឯតម្លៃ

វិញក៏មិនថោកប៉ុន្មានដែរ ដោយអ្នកត្រូវចាយប្រមាណ ១៧ ៦៩០ ដុល្លារដើម្បីស្នាក់នៅទីនោះមួយយប់។

៤/ One&Only The Palm

ប្រសិនបើអ្នកគិតថា Atlantis The Palm នៅមិនទាន់ល្អឥតខ្ចោះ អ្នកក៏អាចមកស្នាក់នៅ One&Only The Palm វិញដែលមានទីតាំងនៅលើកោះសិប្បនិមិត្ត The Palm ដូចគ្នា តែមានតម្លៃថ្លៃជាង Atlantis The Palm ដោយវាមានតម្លៃរហូតដល់ ២០ ០០០ ដុល្លារ/យប់ ហើយបន្ទប់នីមួយៗសុទ្ធតែមានអាងទឹកផ្ទាល់ខ្លួន។

៣/ Palazzo Versace Dubai

គ្រាន់តែឃើញឈ្មោះ អ្នកអាចស្មានដឹងបន្តិចៗហើយថា វាស្ថិតក្នុងលំដាប់អភិជនកម្រិតណា ព្រោះ Palazzo Vercace Dubai គឺទទួលបានការបណ្ដាក់ទុនរហូតដល់ ៦៥០ លានដុល្លារក្នុងការសាងសង់។ រីឯតម្លៃវិញ គឺមានចាប់ពី ៦៥០ ដុល្លាររហូតដល់ ២១ ៧៨០ ដុល្លារឯណោះក្នុងមួយយប់។

២/ Burj Al Arab Jumeirah

Burj Al Arab Jumeirah គឺជាប់ឈ្មោះជាសណ្ឋាគារប្រណីតបំផុតក្នុងពិភពលោក ដ៏ដូចជាមានអាហារដ្ឋានល្អដាច់គេថែមទៀត ជាមួយនឹងសេវាកម្មដ៏ល្អឯក ដូចជាមានរថយន្ត Rolls Royce ចាំដឹកអតិថិជន និងមានឆ្នេរឯកជនផងដែរ។

ដូច្នេះហើយវាមិនមែនជារឿងចម្លែកឡើយ ដែលសណ្ឋាគារមួយនេះក្លាយជាសណ្ឋាគារប្រណីតបំផុតក្នុងលោក និងមានតម្លៃថ្លៃរហូតដល់ ២៣ ០០០ ដុល្លារ/យប់នោះ។

១/ Bulgari Resort

លេខ ២ ក្នុងបញ្ជីថ្លៃដល់ ២៣ ០០០ ដុល្លារទៅហើយ ចុះទម្រាំ Bulagri Resort ដែលឈរនៅលើគេវិញ? សណ្ឋាគារលំដាប់ជាន់ខ្ពស់នេះ មិនបានបញ្ចេញតម្លៃជាសាធារណៈឡើយ តែមានប្រភពជាច្រើនបានអះអាងថា តម្លៃមួយយប់ជាង ២៣ ០០០ ដុល្លារ។

គោលបំណងនៃការបង្កើតសណ្ឋាគារមួយនេះ គឺចង់ឲ្យអតិថិជនទទួលបានអារម្មណ៍ដូចនៅឋានសួគ៌ឯកជន ដែលធ្វើឡើងដាច់ដោយឡែកពីគេ គ្មានអគារធំៗជុំវិញឡើយ៕

ប្រភព: therichest

The post សណ្ឋាគារ ១០ កន្លែងថ្លៃបំផុតនៅ Dubai សម្រាកមួយយប់អាចទិញឡាន Prius បានមួយគ្រឿង appeared first on .