ទីក្រុងតូក្យូ

ក្រុងធំពីរនៅអាស៊ី ជាប់ក្នុងបញ្ជីឈ្មោះទីក្រុងទាំង១០ មានចំនួនសេដ្ឋីៗច្រើនជាងគេលើលោក

ឧកញ៉ាសាមញ្ញ — Tue, 18 Nov 2025 06:54:01 +0000

យោងតាមរបាយការណ៍ទទួលបានពី World Ultra Wealth Report 2025 បានបង្ហាញឲ្យដឹងថា ហុងកុង និងតូក្យូ គឺជាទីក្រុងនៅអាស៊ីតែពីរប៉ុណ្ណោះ ដែលជាប់ឈ្មោះនៅក្នុងចំណោមទីក្រុងធំៗទាំង១០ ដែលមានចំនួនសេដ្ឋីៗច្រើនបំផុត នៅទូទាំងពិភពលោក។

ប្រភពដដែលនេះ បានរាយការណ៍ទៀតថា គិតនៅត្រឹមខែមិថុនា ឆ្នាំ២០២៥ ទីក្រុងហុងកុងមានចំនួនសេដ្ឋីដែលមានទ្រព្យសម្បត្តិសរុបលើសពី ៣០លានដុល្លារ រហូតដល់ទៅ ១៧ ២១៥ នាក់ ឯណោះ ដោយកើនឡើង ១១,៥% ធៀបទៅនឹងពេលដូចគ្នាកាលពីឆ្នាំមុន និងកើនឡើង ២២,៩% គិតចាប់តាំងពីដើមឆ្នាំនេះមក។

ផ្ទុយទៅវិញ ទីក្រុងតូក្យបានមើលឃើញចំនួនសេដ្ឋីៗនៅក្នុងប្រទេសរបស់ខ្លួន មានការធ្លាក់ចុះបន្តិច មកនៅត្រឹមចំនួន ៦ ៩៤០ នាក់ ដោយសារតែផលប័ត្រទ្រព្យសកម្មប្រឈមមុខនឹងឧបសគ្គពីអតិផរណាខ្លាំង ភាពមិនប្រាកដប្រជាខាងនយោបាយ សម្ពាធអចលនទ្រព្យ និងការប៉ះពាល់របស់អ្នកនាំចេញចំពោះគោលនយោបាយពាណិជ្ជកម្មរបស់សហរដ្ឋអាមេរិកកាន់តែខ្លាំងឡើង។

ជម្រាបជូនផងដែរថា សម្រាប់ទីក្រុងដែលនៅសល់នៃចំណាត់ថ្នាក់កំពូលទាំង១០ គឺជាទីក្រុងទាំងអស់របស់សហរដ្ឋអាមេរិក ដែលដឹកនាំដោយទីក្រុងញូវយ៉ក ដែលមានចំនួនសេដ្ឋីដល់ទៅ ២១ ៣៨០ នាក់។ ជាមួយគ្នានេះ ទីក្រុងឡូសអាន់ជឺឡេស សាន់ហ្វ្រាន់ស៊ីស្កូ និងឈីកាហ្គោ បានបញ្ចប់នៅចំណាត់ថ្នាក់កំពូលទាំងប្រាំ។

យ៉ាងណាមិញ សហរដ្ឋអាមេរិកមិនត្រឹមតែគ្របដណ្ដប់លើបញ្ជីឈ្មោះទីក្រុងមានចំនួនសេដ្ឋីៗឈានមុខគេប៉ុណ្ណោះទេ ប៉ុន្តែថែមទាំងមានចំនួន ៣៨% នៃចំនួនប្រជាជនដែលមានទ្រព្យសម្បត្តិច្រើនលើសលប់ នៅទូទាំងពិភពលោកផងដែរ៕

The post ក្រុងធំពីរនៅអាស៊ី ជាប់ក្នុងបញ្ជីឈ្មោះទីក្រុងទាំង១០ មានចំនួនសេដ្ឋីៗច្រើនជាងគេលើលោក appeared first on .

សិង្ហបុរីក្លាយជាទីក្រុងមានជាងគេលំដាប់ទី៤ របស់ពិភពលោក

monyokn — Thu, 09 May 2024 03:20:58 +0000

សារព័ត៌មាន VN Express បានចុះផ្សាយថា សិង្ហបុរីហាក់មើលឃើញនូវការកើនឡើងបុគ្គល ដែលមានទ្រព្យលើសពី ១លានដុល្លារកាលពីឆ្នាំមុន ខណៈចំនួននេះបានធ្វើឲ្យសិង្ហបុរីជាប់ឈ្មោះជាទីក្រុង ដែលមានអ្នកមានទ្រព្យសម្បត្តិច្រើនជាងគេលំដាប់ទី៤ របស់ពិភពលោក។

បច្ចុប្បន្នទីក្រុងរបស់សិង្ហបុរីមានសេដ្ឋីប្រាក់លានដុល្លារប្រមាណ ២៤៤ ៨០០នាក់ ហើយសេដ្ឋីដែលមានទ្រព្យសម្បត្តិចាប់ពី ១០០លានដុល្លារឡើងមានចំនួន ៣៣៦នាក់ និងមហាសេដ្ឋីប្រាក់ពាន់លានដុល្លារនោះក៏មានចំនួន ៣០នាក់ផងដែរ។

កំណើនសេដ្ឋីរបស់សិង្ហបុរី ត្រូវបានកើនឡើងដល់ទៅ៦៤% ឯណោះក្នុងរយៈពេល ១០ឆ្នាំកន្លងមកនេះ ពោលចាប់ពីឆ្នាំ២០១៣ ដល់ឆ្នាំ២០២៣ ខណៈឯទីក្រុងតូក្យូដែលឈរនៅលេខរៀងទីបី មានចំនួនសេដ្ឋីប្រមាណ ២៩៨ ៣០០នាក់បែរជាធ្លាក់ចុះ៥% ទៅវិញ។

គួរបញ្ជាក់ថា ទីក្រុងដែលមានអ្នកមានទ្រព្យសម្បត្តិច្រើនដាច់គេនៅលើពិភពលោកនោះ គឺបានទៅលើទីក្រុងញូយ៉ករបស់សហរដ្ឋអាមេរិក ពោលមានសេដ្ឋីប្រាក់ខ្ទង់លានដុល្លារចំនួន ៣៥៩ ៥០០នាក់ ហើយមហាសេដ្ឋីប្រាក់ពាន់លានដុល្លារក៏មានចំនួនដល់ទៅ ៦០នាក់ផងដែរ៕

The post សិង្ហបុរីក្លាយជាទីក្រុងមានជាងគេលំដាប់ទី៤ របស់ពិភពលោក appeared first on .

ចិន និងហុងកុង រឹតបន្តឹងការនាំចូលអាហារពីជប៉ុន ក្រោមហេតុផលមួយ

monyokn — Wed, 23 Aug 2023 09:41:55 +0000

តាមរយៈសារព័ត៌មាន The Japan Times បានចុះផ្សាយថា ទីក្រុងប៉េកាំង និងហុងកុងគ្រោងនឹងរឹតបន្តឹងបន្ថែមទៀត នៃការនាំចូលរបស់ប្រទេសជប៉ុនលើផលិតផលម្ហូបអាហារ បន្ទាប់ពីការសម្រេចចិត្តរបស់ទីក្រុងតូក្យូ ក្នុងការបង្ហូរទឹកវិទ្យុសកម្មដែលជប៉ុនធានាថាបានបន្សុទ្ធរួចនោះ ចូលទៅក្នុងមហាសមុទ្រប៉ាស៊ីហ្វិក។

ក្នុងនោះ ទីក្រុងហុងកុង ដែលជាតំបន់រដ្ឋបាលរបស់ប្រទេសចិននឹងហាមឃាត់ការនាំចូលផលិតផលនេសាទពីទីក្រុង Fukushima ទីក្រុង Tokyo និងខេត្តចំនួនប្រាំបីផ្សេងទៀតចាប់ពីថ្ងៃព្រហស្បតិ៍នេះតទៅផងដែរ។

សូមជម្រាបផងថា កាលពីពេលកន្លងទៅប្រទេសជប៉ុនបាននិយាយថា ខ្លួននឹងបង្ហូរទឹកវិទ្យុសកម្មដែលបានបន្សុទ្ធរួចប្រមាណច្រើនជាង ១លានតោនពីរោងចក្រថាមពលនុយក្លេអ៊ែរ Fukushima ចាប់ពីថ្ងៃព្រហស្បតិ៍ ទី ២៤ខែសីហាខាងមុខ បើទោះបីជាមានការព្រួយបារម្ភក្នុងចំណោមប្រទេសជិតខាង រួមទាំងប្រទេសចិន និងសហគមន៍នេសាទយ៉ាងណាក្តី៕

The post ចិន និងហុងកុង រឹតបន្តឹងការនាំចូលអាហារពីជប៉ុន ក្រោមហេតុផលមួយ appeared first on .

ទីក្រុងញូវយ៉កជាប់ជាទីក្រុងមានបំផុតលើលោក ប្រមូលផ្ដុំដោយសេដ្ឋីរាប់សែននាក់

ឧកញ៉ាសំពៅ — Mon, 19 Sep 2022 04:01:15 +0000

ទីក្រុងញូវយ៉ក នៃសហរដ្ឋអាមេរិកបានជាប់ជាទីក្រុងមានបំផុតលើពិភពលោក បន្ទាប់ពី Henley & Partners បានធ្វើការស្រាវជ្រាវរកមើលទីក្រុងមានបំផុតទាំង ២០ លើពិភពលោក។ នេះបើតាមការចុះផ្សាយពី Dailymail។

ប្រភពដដែលបានបន្ថែមថា បច្ចុប្បន្នមានមហាសេដ្ឋី ៥៩ នាក់ និងសេដ្ឋី ៣៤៥ ៦០០ នាក់ រាប់បញ្ចូលទាំងបុគ្គលមានទ្រព្យច្រើនជាង ១០០ លានដុល្លារប្រមាណ ៧៣៧ នាក់កំពុងសំងំរស់នៅយ៉ាងមានក្ដីសុខនៅទីក្រុងស្កឹមស្កៃមួយនេះ។

ដោយឡែកសម្រាប់តំណែងលេខ ២ គឺបានមកនៅទីក្រុងតូក្យូ ប្រទេសជប៉ុនដែលមានមហាសេដ្ឋីរស់នៅ ១២ នាក់ និងសេដ្ឋីប្រមាណ ៣០៤ ៩០០ នាក់ ស្របពេលលេខ ៣ គឺទីក្រុង San Francisco និងទីក្រុងឡុងដ៍ជាប់លេខ ៤។

នៅក្នុងទិន្នន័យដែលចេញផ្សាយដោយ Dailymail នោះទៀតសោត ក៏មានទីក្រុងមួយនៅអាស៊ីអាគ្នេយ៍យើងផងដែរ ពោលគឺទីក្រុងសាំងហ្គាពួរជាប់លេខ ៥ ជាទីក្រុងមានបំផុតលើលោក ដោយមានសេដ្ឋីរស់នៅ ២៤៩ ៨០០ នាក់ និងមហាសេដ្ឋី ២៦ នាក់៕

The post ទីក្រុងញូវយ៉កជាប់ជាទីក្រុងមានបំផុតលើលោក ប្រមូលផ្ដុំដោយសេដ្ឋីរាប់សែននាក់ appeared first on .