ទីប្រឹក្សា

អ្នកឧកញ៉ា គិត ម៉េង ផ្ញើសារលិខិតអបអរសាទរ ឧកញ៉ា ផន វណ្ណិត ក្រោយទទួលបានគោរមងារជាទីប្រឹក្សាផ្ទាល់ សម្តេចព្រះសង្ឃរាជ បួរ គ្រី

ឧកញ៉ាកោះក្របី — Tue, 03 Aug 2021 08:19:02 +0000

អ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជា បានចេញលិខិតអបអរសាទរចំពោះលោកឧកញ៉ា ផន វណ្ណិត ដែលត្រូវបានសម្តេចព្រះអភិសិរីសុគន្ធាមហាសង្ឃរាជាធិបតី កិត្តិឧទ្ទេសបណ្ឌិត បួរ គ្រី ព្រះមហាសង្ឃរាជនៃគណៈធម្មយុត្តិកនិកាយ សព្វព្រះរាជហឬទ័យតែងតាំងបញ្ញត្តិគោរម្យ៍ងារជា “ឯរាវ័ណធម្មយានិកមហាឧបាសិកពុទ្ធសាសនូបត្ថម្ភន៍” កាលពីថ្ងៃទី៣០ ខែកក្កដាកន្លងទៅ។

ក្នុងសារលិខិតមួយទំព័រចុះហត្ថលេខាដោយប្រធានសភាពាណិជ្ជកម្មកម្ពុជា នៅថ្ងៃទី៣ ខែកក្កដានេះ បានថ្លែងកោតសរសើរដោយស្មោះជូនចំពោះលោកឧកញ៉ា ផន វណ្ណិត ដែលខិតខំលះបង់កម្លាំងកាយ កម្លាំស្មារតី ព្រមទាំងថវិកាផ្ទាល់ខ្លួនប្រកបដោយសទ្ធាជ្រះថ្លាដ៏មោះមុត ក្នុងការជួយទ្រទ្រង់ និងបំរើវិស័យព្រះពុទ្ធសាសនាដែលជាសាសនារបស់រដ្ឋឲ្យមានការរីកចម្រើនលូតលាស់បន្ថែមទៀត។

សូមចុច Subscribe Telegram oknha_news នឹងទទួលបានព័ត៌មានពីសកម្មភាពឧកញ៉ា សេដ្ឋកិច្ច ពាណិជ្ជកម្ម និងសហគ្រិនភាព

ក្រោយទទួលបានសារលិខិតដ៏ខ្ពង់ខ្ពស់លោកឧកញ៉ា ឧកញ៉ា ផន វណ្ណិត បានគោរពថ្លែងអំណរអរគុណអ្នកឧកញ៉ា គិត ម៉េង ប្រធានសភាពាណិជ្ជកម្ពុជា ដែលបានផ្ញើលិខិតអបអរសាទរ ជូនពរដល់លោក និងគ្រួសារ។ លោកឧកញ៉ា សូមគោរពជូនពរអ្នកឧកញ៉ា និងលោកជំទាវ ព្រមទាំងដឹកនាំសមាជិកសមាជិកានៃសភាពាណិជ្ជកម្មកម្ពុជ សូមជួបនូវសេចក្ដីសុខ សេចក្ដីចំរេីន មានសុខភាពល្អ ប្រាជ្ញាឈ្លាសវៃ សម្រេចជោគជ័យគ្រប់ភារកិច្ច។

ជាមួយគ្នានេះ មានថ្នាក់ដឹកនាំ មន្រ្តីរាជការ សហគ្រិន វាគ្មិន និងអ្នកគាំទ្រជាច្រើនបានសម្តែងនូវការអបអរសាទរចំពោះលោកឧកញ៉ា ផន វណ្ណិត ក្នុងការទទួលបានជាទីប្រឹក្សាដែលនាមបញ្ញត្តិថា “ឯរាវ័ណធម្មយានិកមហាឧបាសិកពុទ្ធសាសនូបត្ថម្ភន៍” ដើម្បីក្លាយជាពុទ្ធសាសនូបត្ថម្ភន៍ដ៏ឆ្នើមក្នុងព្រះសាសនា និងជាទីប្រឹក្សាផ្ទាល់សម្តេចព្រះសាកលវិទ្យាធិការនៃពុទ្ធិកសាកលវិទ្យាល័យព្រះសីហមុនីរាជា ក្នុងការចូលរួមកសាងធនធានបញ្ញវន្តខ្មែរបន្ត
ទៀត៕

The post អ្នកឧកញ៉ា គិត ម៉េង ផ្ញើសារលិខិតអបអរសាទរ ឧកញ៉ា ផន វណ្ណិត ក្រោយទទួលបានគោរមងារជាទីប្រឹក្សាផ្ទាល់ សម្តេចព្រះសង្ឃរាជ បួរ គ្រី appeared first on .

ឯកឧត្តមឧកញ៉ា ផន វណ្ណិត អតីតព្រះសង្ឃរៀនសូត្រជ្រៅជ្រះត្រូវបានសម្តេចព្រះមហាសង្ឃរាជ បួរ គ្រី ព្រះសាកលវិទ្យាធិការពុទ្ធិកសាកលវិទ្យាល័យព្រះសីហមុនីរាជា “ព្រះរាជទានជាទីប្រឹក្សាផ្ទាល់”

ឧកញ៉ាកោះក្របី — Sun, 01 Aug 2021 11:37:06 +0000

ថ្នាក់ដឹកនាំ មន្រ្តីរាជការ សហគ្រិន វាគ្មិនបណ្តុះបណ្តាលភាពជោគជ័យ និងអ្នកគាំទ្រជាច្រើនបានសម្តែងនូវការអបអរសាទរចំពោះឯកឧត្តមឧកញ៉ា ផន វណ្ណិត ដែលត្រូវបានសម្តេចព្រះអភិសិរីសុគន្ធាមហាសង្ឃរាជាធិបតី កិត្តិឧទ្ទេសបណ្ឌិត បួរ គ្រី ព្រះមហាសង្ឃរាជនៃគណៈធម្មយុត្តិកនិកាយ សព្វព្រះរាជហឬទ័យតែងតាំងបញ្ញត្តិគោរម្យ៍ងារជា “ឯរាវ័ណធម្មយានិកមហាឧបាសិកពុទ្ធសាសនូបត្ថម្ភន៍” ដើម្បីក្លាយជាពុទ្ធសាសនូបត្ថម្ភន៍ដ៏ឆ្នើមក្នុងព្រះសាសនា និងឱ្យឡើងស័ក្តិជាទីប្រឹក្សាផ្ទាល់សម្តេចព្រះសាកលវិទ្យាធិការនៃពុទ្ធិកសាកលវិទ្យាល័យព្រះសីហមុនីរាជា ក្នុងការចូលរួមកសាងធនធានបញ្ញវន្តខ្មែរជាមួយនឹងការលើកទឹកចិត្តជួយឧបត្ថម្ភគាំទ្រផ្នែកបញ្ញាស្មារតីទៅលើវិស័យពុទ្ធចក្រនៅប្រទេសកម្ពុជា។

ព្រះរាជពិធីប្រគល់ធ្វើឡើងក្រោមព្រះរាជាធិបតីដ៏ខ្ពង់ខ្ពស់បំផុតសម្តេចព្រះអភិសិរីសុគន្ធាមហាសង្ឃរាជាធិបតី កិត្តិឧទ្ទេសបណ្ឌិត បួរ គ្រី សម្តេចព្រះមហាសង្ឃរាជនៃគណៈធម្មយុត្តិកនិកាយ ព្រះសាកលវិទ្យាធិការនៃពុទ្ធិកសាកលវិទ្យាល័យព្រះសីហមុនីរាជា ព្រមទាំងមានការនិមន្តយាង និងអញ្ជើញចូលរួមពីសម្តេច ព្រះរាជាគណៈ ព្រះមន្ត្រីសង្ឃ និងមន្រ្តីរាជការ ក្រសួងពាក់ព័ន្ធ ក្នុងវត្តបទុមធម្មយុត្តនៅថ្ងៃទី១ ខែសីហា ឆ្នាំ២០២១នេះ។

ឯកឧត្តមឧកញ៉ា ផន វណ្ណិត អនុប្រធានសមាគមអ្នកអភិវឌ្ឍន៍ដីឡូតិ៍កម្ពុជា មានប្រសាសន៍ថា៖ “ក្នុងនាមខ្ញុំដែលទើបទទួលងារជាទីប្រឹក្សាសម្តេចព្រះសាកលវិទ្យាធិការនៃពុទ្ធិកសាលវិទ្យាល័យព្រះសីហមុនីរាជា នឹងបន្តចូលរួមផ្សព្វផ្សាយទ្រឹស្តីរបស់ព្រះសម្មាសម្ពុទ្ធដែលជាឃ្លាំងឱសថសម្រាប់ព្យាបាលជំងឺសង្គមទៅដល់យុវជនជំនាន់ក្រោយឲ្យដើរលើផ្លូវល្អ ស្របតាមផែនការយុទ្ធសាស្រ្តរបស់ក្រសួងធម្មការ និងសាសនា និងគោលនយោបាយរបស់រាជរដ្ឋាភិបាលកម្ពុជា”។

ឯកឧត្តមឧកញ៉ាបានបញ្ជាក់ថា ខ្ញុំសង្ឃឹមថា តាមរយៈការផ្តល់ងារជាទីប្រឹក្សាគឺពិតជាសញ្ញាវិជ្ជមានមួយសម្រាប់វិស័យព្រះពុទ្ធសាសនានៅប្រទេសកម្ពុជា ដើម្បីធ្វើការ នឹងពិភាក្សាយ៉ាងផុសផុលអំពីបញ្ហាប្រឈម និងដំណោះស្រាយសមស្របដែលនឹងចូលរួមចំណែក ដល់ការកសាងពិភពលោកទាំងមូល រស់នៅក្រោមម្លប់សុខសន្តិភាព និងភាពសុខដុមរមនាជាមួយគ្រប់ជាតិសាសន៍ ដោយពុំមានការបែងចែកវណ្ណៈ និងពណ៌សម្បុររវាងមនុស្សជាតិដូចគ្នា។

សូមជម្រាបជូន ឯកឧត្តមឧកញ៉ា ផន វណ្ណិត គឺជាអ្នកជំនួញវិស័យអចលនទ្រព្យ និងជាអនុប្រធានសមាគមអ្នកអភិវឌ្ឍន៍ដីឡូតិ៍កម្ពុជា បានចាប់កំណើតនៅខេត្តព្រៃវែង ដោយជីវភាពគ្រួសារលំបាករស់នៅជាអ្នកចំណាកស្រុកបានឆ្លងកាត់ការលំបាក តស៊ូរៀនសូត្ររហូតបង្កើតមុខជំនួញគ្រោកៗក្នុងដៃ មិនតែប៉ុណ្ណោះលោកអាចដឹកនាំនិងបណ្តុះបណ្តាលមនុស្សរាប់ពាន់នាក់ផងដែរ។

ឯកឧត្តមឧកញ៉ា ផន វណ្ណិត អតីតទីប្រឹក្សាក្រសួងធម្មការ និងសាសនា ហើយក៏ជាអតីតអ្នកបួសក្នុងសាសនាព្រះពុទ្ធប្រមាណជាង ១៣ឆ្នាំ និងការសិក្សាចប់ថ្នាក់អនុបណ្ឌិតនៅប្រទេសឥណ្ឌា។ ក្រោយមាតុភូមិនិវត្តមកកម្ពុជាវិញលោកបានចូលបង្រៀននៅសាលា Newton Thilay និងសាស្រ្តាចារ្យបង្រៀននៅសាកលវិទ្យាល័យបញ្ញាសាស្ត្រ និងបញ្ញាជាតិ និងជាគ្រូបណ្តុះបណ្តាលភាពជោគជ័យដល់សិស្សនិស្សិតរាប់ពាន់នាក់ផងដែរ។

ជីវិតជាសាស្ត្រាចារ្យ បានធ្វើឱ្យអតីតអ្នកបួសរូបនេះ រៀនសូត្រកាន់តែច្រើនឡើង និងស្វែងយល់ពីសង្គមកម្ពុជាកាន់តែច្បាស់ ខណៈដែលលោកតែងយកបទពិសោធន៍ខ្លួនធ្លាប់ជួបប្រទះមកចែករំលែកដល់សិស្ស និស្សិត ព្រមទាំងបង្រៀនដោយយកចិត្តទុកដាក់ខ្ពស់ ធ្វើឱ្យសិស្សទាំងអស់គោរពស្រលាញ់លោកយ៉ាងខ្លាំង។ លើសពីនេះ លោកតែងដឹកនាំនិស្សិត ចូលរួមការងារសង្គមជាច្រើន ដែលធ្វើឱ្យដឹកនាំគ្រប់ជាន់ថ្នាក់ទទួលស្គាល់គុណតម្លៃរបស់លោក។

ជាមួយនឹងបទពិសោធន៍ជោគជាំ និងចំណេះដឹងខ្ពង់ខ្ពស់ជ្រៅជ្រះផ្នែកព្រះពុទ្ធសាសនាជាបញ្ញវន្តខ្មែររូបដែលនោះ ជាហេតុបណ្តាលឲ្យឯកឧត្តមឧកញ៉ាទទួលបានការតែងតាំងជាទីប្រឹក្សាសម្តេចព្រះសង្ឃរាជគណៈធម្មយុត្តិកនិកាយ និងសម្តេចព្រះសាកលវិទ្យាធិការនៃពុទ្ធិកសាកលវិទ្យាល័យព្រះសីហមុនីរាជា ដើម្បីចូលរួមប្រឹក្សាការអប់រំលើវិស័យព្រះពុទ្ធសាសនា ដែលមានសារៈសំខាន់ សម្រាប់ការអភិវឌ្ឍប្រទេសជាតិ និងសីលធម៌សង្គមនៅប្រទេសកម្ពុជា៕

The post ឯកឧត្តមឧកញ៉ា ផន វណ្ណិត អតីតព្រះសង្ឃរៀនសូត្រជ្រៅជ្រះត្រូវបានសម្តេចព្រះមហាសង្ឃរាជ បួរ គ្រី ព្រះសាកលវិទ្យាធិការពុទ្ធិកសាកលវិទ្យាល័យព្រះសីហមុនីរាជា “ព្រះរាជទានជាទីប្រឹក្សាផ្ទាល់” appeared first on .