ព្រឹត្តិការណ៍ Gumball 3000 គឺជាព្រឹត្តិការណ៍ដ៏ល្បីល្បាញមួយនៅលើពិភពលោក ដែលមានរថយន្តទំនើបៗ និងមានការចូលរួមសុទ្ធសឹងជា មហាសេដ្ឋី អតីតកីឡាករ កីឡាការិនី តារាហូលីវូដ តារាចម្រៀង តារារ៉េប អ្នកបង្កើតមាតិកាលើបណ្ដាញសង្គម Youtuber ខ្មែរ និងអន្តរជាតិ រួមទាំងបុគ្គលល្បីៗជាច្រើនទៀតជុំវិញពិភពលោក។ ព្រឹត្ដិការណ៍ Gumball 3000 នេះ ក៏នឹងបង្កើតកំណត់ត្រាពិភពលោកហ្គីណេស ”ការចូលរួមចតឡានច្រើនជាងគេនៅមុខប្រាសាទអង្គរវត្ត ថែមទៀតផងដែរ។ ព្រឹត្ដិការណ៍ Gumball 3000 នឹងធ្វើឡើងចាប់ពីថ្ងៃទី១៦- ១៧ ខែកញ្ញា ឆ្នាំ២០២៤។

ព្រឹត្ដិការណ៍ទី២ គឺសមរាត្រី។ ព្រឹត្តិការណ៍សមរាត្រី គឺជាព្រឹត្ដិការណ៍ដ៏អស្ចារ្យមួយនៅលើពិភពលោកដែលយើងអាចមើលឃើញព្រះអាទិត្យរះចំកណ្តាលកំពូលប្រាសាទអង្គរវត្ត ដែលក្នុងមួយឆ្នាំកើតឡើងតែ២ដងប៉ុណ្ណោះ។ ព្រឹត្ដិការណ៍នេះនឹងកើតឡើងនៅថ្ងៃទី២១-២៣ ខែកញ្ញា ឆ្នាំ២០២៤។

ព្រឹត្ដិការណ៍ទី៣ គឺជាព្រឹត្តិការណ៍អបអរសាទរទិវាទេសចរណ៍ពិភពលោកឆ្នាំ២០២៤។ ព្រឹត្ដិការណ៍នេះនឹងកើតឡើងនៅថ្ងៃទី២៧ ខែកញ្ញា ដោយមានការសម្តែងសិល្បៈប្រពៃណី,ការបញ្ចុះតម្លៃលើសេវាកម្មទេសចរណ៍,ការតាំងបង្ហាញឡាន,ម៉ូតូចាស់ៗជាដើម។

តស់! ទៅលេងខេត្ដសៀមរាបទាំងអស់គ្នា ចូលរួមផ្សព្វផ្សាយពីសក្ដានុពលទេសចររបស់ប្រទេសកម្ពុជាយើង។

The post សៀមរាបខែនេះដឹងតែមិនស្ងាត់តែម្ដង! ព្រឹត្ដិការណ៍ធំៗចំនួន៣នឹងកើតឡើងនៅក្នុងទឹកដីខេត្ដសៀមរាបក្នុងខែកញ្ញានេះ appeared first on .

សម្តេចធិបតី កាលព្រឹកថ្ងៃទី២២ ខែកក្កដា ឆ្នាំ២០២៤ បានបង្ហោះសារនៅលើទំព័រហ្វេសប៊ុកផ្លូវការរបស់សម្តេចយ៉ាងដូច្នេះថា៖« ខ្ញុំសូមអរគុណ និងកោតសរសើរចំពោះលោកស្រី ជា សេរី ទេសាភិបាលធនាគារជាតិនៃកម្ពុជា ចំពោះចំណាត់ការដ៏ឆាប់រហ័ស ក្នុងការដាក់ចេញនូវគោលការណ៍ពាក់ព័ន្ធនឹងការសម្រួលលក្ខខ័ណ្ឌសម្រាប់ការចាយក្រដាស់ប្រាក់ដុល្លារអាមេរិក ដែលមានសភាពចាស់ ប្រឡាក់ ឬខូចខាតខ្លះ នៅខេត្តសៀមរាប»។

សម្តេចធិបតី បន្តថា៖ បញ្ហាលំបាកពាក់ព័ន្ធនឹងការចាយវាយក្រដាសប្រាក់ដុល្លារអាមេរិកដែលមានសភាពចាស់ ប្រឡាក់ ឬខូចខាតខ្លះ បានបង្កការលំបាកសម្រាប់ការលក់ដូររបស់ប្រជាពលរដ្ឋនៅក្នុងខេត្ត ដែលបញ្ហានេះ ត្រូវបានបងប្អូនអ្នកលក់ដូរប្រាប់ខ្ញុំផ្ទាល់ ពេលដែលខ្ញុំចុះទៅ Pub Street កាលពីយប់ថ្ងៃទី ១៧ កក្កដា ២០២៤ កន្លងទៅនេះ។

ទន្ទឹមគ្នានេះ សម្តេចធិបតី ហ៊ុន ម៉ាណែត លើកឡើងថា៖« ខ្ញុំសង្ឃឹមថាចំណាត់ការរបស់ធនាគារជាតិនៃកម្ពុជា នឹងលុបបំបាត់បញ្ហាលំបាកពាក់ព័ន្ធនឹងការចាយក្រដាសប្រាក់ដុល្លារអាមេរិក និងជួយសម្រួលដល់ការលក់ដូររបស់បងប្អូនប្រជាពលរដ្ឋ ក៏ដូចជាទេសចរណ៍ដែលទស្សនាខេត្តសៀមរាបផងដែរ»។

ជាថ្មីម្តងទៀត សម្តេចធិបតី ក៏បានសូមឱ្យសាខាធនាគារជាតិនៃកម្ពុជាខេត្តសៀមរាប បណ្ដាធនាគារឯកជនទាំងអស់នៅក្នុងខេត្តសៀមរាប ក៏ដូចជាបណ្ដាអាជីវកម្មឯកជន និងបងប្អូនប្រជាពលរដ្ឋអ្នកលក់ដូរទាំងអស់នៅក្នុងខេត្ត ចូលរួមអនុវត្តនូវគោលការណ៍ថ្មីរបស់ធនាគារជាតិនៃកម្ពុជាឱ្យបានស្រុះគ្នា ដើម្បីកុំឱ្យមានបញ្ហាពាក់ព័ន្ធនឹងការចាយក្រដាសប្រាក់ដុល្លារ ដែលមានសភាពចាស់ ឬប្រឡាក់បន្តទៀត។

សូមបញ្ជាក់ថា ពាក់ព័ន្ធនឹងការលើកឡើងរបស់សម្តេចធិបតីនេះដែរ ធនាគារ​ជាតិ​ដាក់​ចេញ​យន្តការ​បន្ទាប់​សម្រាប់​ខេត្ត​សៀមរាប​ពាក់​ព័ន្ធ​ប្រាក់​ដុល្លារ​អាមេរិក ចាស់ ឬ ប្រឡាក់ ដោយ​តម្រូវ​ឱ្យ​សាខាធនាគារ​ពាណិជ្ជ​ខេត្ត​សៀមរាប​ទទួល​យក​ប្រាក់​ដុល្លារ​អាមេរិក​ចាស់​ឬ ប្រឡាក់​ដោយ​មិន​ទាមទារ​កម្រៃ​សេវា​ពី​អតិថិជន​របស់​ខ្លួន។

ការ​សម្រេច​នេះ​ធ្វើ​ឡើង​នៅ​ក្នុង​កិច្ច​ប្រជុំ​ពិភាក្សា​លើ​ការ​សម្រប​សម្រួល​ចរាចរណ៍​ក្រដាស​ប្រាក់​ ដុល្លារ​អាមេរិក​នៅ​ខេត្ត​សៀមរាប​ ជាមួយ​គ្រឹះស្ថាន​ធនាគារ​និង​ហិរញ្ញវត្ថុ​​កាល​ពី​ថ្ងៃ​អាទិត្យ​ទី២១ ខែកក្កដា ដែលដឹកនាំ​ដោយ​លោកស្រី ជា សិរី អគ្គទេសាភិបាល​ធនាគារ​ជាតិ។ កិច្ច​ប្រជុំ​នេះ​ក៏​ធ្វើ​ឡើង​បន្ទាប់​ពី​សម្តេចធិបតី ហ៊ុន ម៉ាណែត ​នាយករដ្ឋ​មន្ត្រី​បាន​ស្នើ​ឱ្យ​ធនាគារ​ជាតិ​រក​ដំណោះ​ស្រាយ​អំពី​បញ្ហាលុយដុល្លារនេះ ​កាល ពី​ថ្ងៃទី​១៨ ខែកក្កដាកន្លងទៅ៕ អត្ថបទ៖ រង្សី

The post សម្តេចធិបតី សង្ឃឹមថា ចំណាត់ការរបស់ធនាគារជាតិលើករណីលុយដុល្លារចាស់ៗ នឹងជួយវិស័យទេសចរណ៍ខេត្តសៀមរាប appeared first on .