ពិធីចុះហត្ថលេខាលើអនុស្សរណៈនៃការយោគយល់នេះ ត្រូវបានរៀបចំធ្វើឡើងក្រោមអធិបតីភាព ឯកឧត្តម ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ និងអ្នកឧកញ៉ា គិត ម៉េង ប្រធានក្រុមប្រឹក្សាភិបាល ធនាគារ វីង និងជាអគ្គនាយកក្រុមហ៊ុនរ៉ូយ៉ាល់គ្រុប។ 

លោកជំទាវ ពេជ សូរិយា អគ្គនាយក នៃអគ្គនាយកដ្ឋានកិច្ចការទូទៅ នៃក្រសួងឧស្សាហកម្ម វិទ្យាសាស្ត្រ      បច្ចេកវិទ្យា និងនវានុវត្តន៍ បានថ្លែងថា៖ “ដំណោះស្រាយទូទាត់តាមប្រព័ន្ធឌីជីថលពិតជាបានដើរតួនាទីយ៉ាងសំខាន់ក្នុងការជំរុញបរិយាបន្នហិរញ្ញវត្ថុ ក៏ដូចជាលើកកម្ពស់ដល់សហគ្រាស និងអាជីវកម្មនានាឱ្យបានកាន់តែប្រសើរ។”

លោកជំទាវ ពេជ សូរិយា បានបន្ថែមទៀតថា៖ “តាមរយៈភាពជាដៃគូរបស់យើងជាមួយធនាគារ វីង គឺមានគោលបំណងប្រើប្រាស់បច្ចេកវិទ្យាឌីជីថល ដើម្បីបង្កើនភាពងាយស្រួល និងប្រសិទ្ធភាពក្នុងប្រព័ន្ធទូទាត់ ដែលអនុញ្ញាតឱ្យអាជីវកម្មគ្រប់ទំហំអាចរីកចម្រើនក្នុងបរិបទសេដ្ឋកិច្ចឌីជីថលកាន់តែខ្លាំងឡើង”។

ពិធីចុះហត្ថលេខាលើអនុស្សរណៈនៃការយោគយល់នេះ      ​​​​​ មានគោលបំណងលើកកម្ពស់ការទូទាត់តាមឌីជីថលទៅ​ដល់សហគ្រាសធុនតូច និងមធ្យម និងអាជីវកម្មផ្សេងៗទៀតនៅទូទាំងប្រទេសកម្ពុជា។ សេវាហិរញ្ញវត្ថុ រួមទាំងប្រព័ន្ធទូទាត់ KHQR របស់ធនាគារ វីង នឹងជួយសម្រួលដល់ការធ្វើប្រតិបត្តិការបានយ៉ាងរលូន ដែលនឹងជួយលើកកម្ពស់ដំណើរការនៃការបង់ថ្លៃកម្រៃសេវាសាធារណៈ និងសេវាផ្សេងៗទៀតកាន់តែប្រសើរ។ ការអនុវត្តនូវមធ្យោបាយទូទាត់បែបនេះគឺមានភាពងាយស្រួល ចំណេញពេលវេលា ហើយថែមទាំងកាត់បន្ថយការចំណាយសោហ៊ុយយធ្វើដំណើរបានមួយកម្រិតទៀតផង។

លោក ហោ ប៊ុនថែ អគ្គនាយករងធនាគារ វីង បានថ្លែងអំណរគុណចំពោះការផ្តល់ទំនុកចិត្តដល់ធនាគារ វីង ក្នុងការរួមចំណែកកិច្ចការដ៏សំខាន់នេះ។ លោកលើកឡើងថា៖ “យើងខ្ញុំពិតមានកិត្តិយសក្រៃលែងចំពោះការជឿជាក់របស់ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ មកលើធនាគារ វីង ក្នុងការជួយសម្របសម្រួលកិច្ចការដ៏មានសារៈសំខាន់នេះ។ ភាពជាដៃគូនាពេលនេះ គឺគូសបញ្ជាក់ឱ្យឃើញពីការប្តេជ្ញាចិត្តរបស់យើងខ្ញុំក្នុងការជំរុញ​​នវានុវត្តន៍​ ក៏ដូចជាបរិយាបន្នហិរញ្ញវត្ថុឱ្យបានកាន់តែទូលំទូលាយថែមទៀតនៅទូទាំងប្រទេសកម្ពុជា។”

ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ធនាគារ វីង នឹងធ្វើកិច្ចការរួមគ្នាកាន់តែជិតស្និទ្ធថែមទៀតដើម្បីផ្តល់នូវការកសាងសមត្ថភាពអំពី​នវានុវត្តន៍​​​បច្ចេកវិទ្យានានាទៅដល់សហគ្រាសធុនតូច និងមធ្យម ដែលជួយឱ្យអាជីវកម្មកាន់តែរីកលូតលាស់។

បន្ថែមលើនេះ កិច្ចសហប្រតិបត្តិការនេះ គឺស្របតាមគោលនយោបាយជាតិស្តីពី វិទ្យាសាស្រ្ត បច្ចេកវិទ្យា និងនវានុវត្តន៍ឆ្នាំ២០២៣ ដែលមានគោលដៅពង្រឹងសមត្ថភាពបច្ចេកវិទ្យា ក៏ដូចជាលើកកម្ពស់នវានុវត្តន៍របស់កម្ពុជា​ សំដៅសម្រេចឱ្យបាននូវចក្ខុវិស័យប្រែក្លាយសេដ្ឋកិច្ចកម្ពុជា ទៅជាប្រទេសមានចំណូលមធ្យមកម្រិតខ្ពស់នៅឆ្នាំ២០៣០ និងជាប្រទេសមានចំណូលកម្រិតខ្ពស់នៅឆ្នាំ២០៥០។

ធនាគារ វីង និងក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ មានទស្សនៈវិស័យរួមគ្នាមួយ តាមរយៈកិច្ចខិតខំប្រឹងប្រែង​ជំរុញវិស័យសេដ្ឋកិច្ច និងបច្ចេកវិទ្យានៅកម្ពុជា ដោយបង្កើតឱ្យបាននូវសមិទ្ធផលថ្មីៗ និងជំរុញកំណើនដែលផ្អែក​លើ​នវានុវត្តន៍។

ចំណុចស្នូលនៃវិធីសាស្រ្តជំរុញនវានុវត្តន៍របស់ធនាគារ វីង រួមមាន៖ អេប Wing Bank ដែលមានមុខងារជាច្រើន, បណ្តាញភ្នាក់ងារធនាគារ វីង គ្របដណ្តប់ទូទាំងប្រទេសជាង ១១.០០០ កន្លែង, ភ្នាក់ងារ​ វីងម៉ាស្ទ័រ មានជាង ៨០កន្លែង និងសាខាការិយាល័យដ៏ទំនើបរបស់ធនាគារបានពង្រីកទីតាំងជាច្រើនកន្លែងនៅទូទាំងប្រទេសកម្ពុជា។

អស់រយៈពេល​១៦ឆ្នាំនៃការផ្តល់សេវាកម្មហិរញ្ញវត្ថុជូនប្រជាជនកម្ពុជា ការប្តេជ្ញាចិត្តឥតងាករេរបស់ធនាគារ វីង ចំពោះការច្នៃប្រឌិតថ្មីៗត្រូវបានបង្ហាញឱ្យឃើញតាមរយៈសេវាកម្មហិរញ្ញវត្ថុដ៏សម្បូរបែបរបស់ខ្លួន។ ក្នុងនោះមានប្រមាណ ១៦៥.០០០អាជីវកម្ម, ស្ថាប័នរដ្ឋាភិបាលចំនួន ១០ ស្ថាប័ន, សហគ្រាសធុនតូច និងមធ្យមប្រមាណ ៣.០០០សហគ្រាស និងមានក្រុមហ៊ុនសាជីវកម្ម ៦០០ ក្រុមហ៊ុន ដែលទទួលបានផលប្រយោជន៍ពីសេវាកម្មរបស់ធនាគារ វីង។ ធនាគារ វីង បានក្លាយជាដៃគូដ៏ទុកចិត្តពីសំណាក់អាជីវកម្មគ្រប់មជ្ឈដ្ឋានតាមរយៈការផ្តល់សេវាកម្មធនាគារដ៏ទំនើបរបស់ខ្លួន រួមមានទាំងការទូទាត់តាមឌីជីថល និង​សេវា​បើកប្រាក់បៀវត្ស​ជាដើម​៕

The post ធនាគារ វីង ក្លាយជាដៃគូទូទាត់របស់ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ appeared first on .

ខេត្តកំពង់ឆ្នាំង ថ្ងៃទី ១៤ ខែមិថុនា ឆ្នាំ ២០២៤៖  ធនាគារ វីង (ខេមបូឌា) ម.ក បានបោះជំហានទៅមុខដ៏សំខាន់មួយទៀតជាមួយនឹងការបើកសម្ពោធសាខាថ្មីរបស់ខ្លួនស្ថិតនៅចំកណ្តាលក្រុងកំពង់ឆ្នាំងតែម្តង។ យុទ្ធសាស្ត្រនៃការពង្រីកខ្លួននេះ គឺនាំមកនូវសេវាធនាគារដ៏សម្បូរបែប ក៏ដូចជាដំណោះស្រាយហិរញ្ញវត្ថុដែល​មានភាពច្នៃប្រឌិត ដើម្បី​ផ្តល់អំណាច​និង​គាំទ្រ​ទៅដល់សហគមន៍ តាមរយៈ​ការ​រួមចំណែកជំរុញបរិយាបន្នហិរញ្ញវត្ថុកាន់តែប្រសើរបន្ថែមទៀត។

ពិធីនេះប្រព្រឹត្តទៅយ៉ាងអធិកអធម ក្រោមអធិបតីភាព​នៃ ឯកឧត្តម ស៊ុន សុវណ្ណារិទ្ធិ​ អភិបាល នៃគណៈអភិបាលខេត្តកំពង់ឆ្នាំង, លោក  ឈាង តុលា នាយកសាខាធនាគារជាតិ នៃកម្ពុជា ខេត្តកំពង់ឆ្នាំង តំណាងដ៏ខ្ពង់ខ្ពស់របស់លោកជំទាវបណ្ឌិត ជា សិរី​ អគ្គទេសាភិបាល ធនាគារជាតិនៃកម្ពុជា, ព្រមទាំង​ឯកឧត្តមបណ្ឌិត ម៉ី វ៉ាន់​ រដ្ឋលេខាធិការ ក្រសួងសេដ្ឋកិច្ច និងហិរញ្ញវត្ថុ​ និងជាអគ្គលេខាធិការ នៃអគ្គលេខាធិការដ្ឋានអាជ្ញាធរសេវាហិរញ្ញវត្ថុមិនមែនធនាគារ។

ពិធីនេះក៏មានការចូលរួមពីអ្នកឧកញ៉ា គិត ម៉េង ប្រធានក្រុមប្រឹក្សាភិបាល ធនាគារ វីង និងជាអគ្គនាយកក្រុមហ៊ុន រ៉ូយ៉ាល់គ្រុប, លោកជំទាវអ្នកឧកញ៉ា ម៉ៅ ចំណាន នាយិកាប្រតិបត្តិការនៃធនាគារ វីង និងជាអនុប្រធានក្រុមប្រឹក្សាភិបាលក្រុមហ៊ុន រ៉ូយ៉ាល់គ្រុប ព្រមទាំង​ឧកញ៉ា គិត ស៊ូឡា ប្រធានផ្នែកប្រតិបត្តិការនៃក្រុមហ៊ុន រ៉ូយ៉ាល់គ្រុប អន្តរជាតិ ព្រមទាំង​ការអញ្ជើញ​ចូលរួមពីភ្ញៀវកិត្តិយសជាច្រើនទៀតផងដែរ។

ឯកឧត្តម ស៊ុន សុវណ្ណារិទ្ធិ អភិបាល នៃគណៈអភិបាលខេត្តកំពង់ឆ្នាំង បានបង្ហាញការកើតសរសើរចំពោះធនាគារ វីង ដែលទទួលបានការគាំទ្រ និងទំនុកចិត្តពីសាធារណជន និងបានពង្រីកខ្លួនជាបន្តបន្ទាប់។ ឯកឧត្តម ស៊ុន សុវណ្ណារិទ្ធិ បានថ្លែងថា៖ “ខ្ញុំសង្ឃឹមយ៉ាងមុតមាំថា ធនាគារ វីង នឹងដើរតួនាទីយ៉ាងសំខាន់ក្នុងការផ្តល់ជាដំណោះស្រាយ ក៏ដូចជា ឆ្លើយតបនឹងតម្រូវការផ្នែកហិរញ្ញវត្ថុដល់ប្រជាជនកម្ពុជា និងអាជីវកម្មក្នុងខេត្តកំពង់ឆ្នាំង​ទាំងមូលផងដែរ។”

ឆ្លៀតក្នុងឱកាសនោះផងដែរ លោក  ឈាង តុលា នាយកសាខាធនាគារជាតិ នៃកម្ពុជា ខេត្តកំពង់ឆ្នាំង តំណាងដ៏ខ្ពង់ខ្ពស់របស់លោកជំទាវបណ្ឌិត ជា សិរី អគ្គទេសាភិបាល ធនាគារជាតិនៃកម្ពុជា បានវាយតម្លៃខ្ពស់ដល់ការខិតខំប្រឹងប្រែងរបស់ធនាគារ វីង ក្នុងការពង្រីកបណ្តាញប្រតិបត្តិការអាជីវកម្មជាបន្តបន្ទាប់។ លោក  ឈាង តុលា បានថ្លែងថា៖ “សាខាថ្មីរបស់ធនាគារ វីង បានបង្ហាញឱ្យឃើញពីវឌ្ឍនភាព និងភាពរីកចម្រើន ដោយបានបង្កើតផលិតផល និងសេវាហិរញ្ញវត្ថុថ្មីៗ សម្បូរបែបបន្ថែមទៀត និងបានពង្រីកខ្លួនដល់ក្រុងកំពង់ឆ្នាំង សំដៅបង្ខិតសេវាហិរញ្ញវត្ថុជូនដល់សាធារណជន។ ”

ដោយមានទីតាំងចម្ងាយត្រឹមតែ ៥០ម៉ែត្រប៉ុណ្ណោះ ពីរង្វង់មូលវិមានឯករាជ្យនៃ​ក្រុងកំពង់ឆ្នាំង សាខាថ្មីរបស់ធនាគារ វីង ងាយស្រួលរកសម្រាប់អតិថិជនអញ្ជើញទៅទទួលសេវាហិរញ្ញវត្ថុ និង​ផលិតផលធនាគារជាច្រើន។

លោក ហាន ប៉េងក្វាង អគ្គនាយកធនាគារ វីង បានមានប្រសាសន៍ថា៖ “ខ្ញុំពិតជាមានសេចក្តីសោមនស្សក្រៃលែង ដោយសារតែធនាគារ វីង​ នឹងចាប់ផ្តើមរួមចំណែកដ៏សំខាន់ក្នុងការអភិវឌ្ឍខេត្តកំពង់ឆ្នាំង តាមរយៈការដាក់ឱ្យដំណើរការសាខាធនាគារដ៏ទំនើបរបស់យើងនៅទីនេះ។”

ក្រោមការដឹកនាំប្រកបដោយចក្ខុវិស័យរបស់អ្នកឧកញ៉ា គិត ម៉េង ធនាគារ វីង បានបោះជំហានឈាន​មុខគេក្នុងការប្រើប្រាស់ដំណោះស្រាយឌីជីថល ដែលជួយលើកកម្ពស់ជីវភាពរស់នៅរបស់ប្រជាជនកម្ពុជាអស់រយៈពេលជិត១៦ឆ្នាំមកនេះ។​

លោក ហាន ប៉េងក្វាង បានបន្ថែមថា៖ “យើងខ្ញុំបានប្តេជ្ញាចិត្តក្នុងការត្រៀមខ្លួនជាស្រេចដើម្បីផ្តល់សេវាធនាគារយ៉ាងពេញលេញ ដែលផ្តល់សិទ្ធអំណាចដល់សហគមន៍​ ដោយអនុញ្ញាតឱ្យពួកគាត់ងាយស្រួលក្នុងការទទួលបានដំណោះស្រាយហិរញ្ញវត្ថុចាំបាច់នានាសម្រាប់ជីវភាពរស់នៅប្រចាំថ្ងៃ។​ យើងរួមគ្នាដើម្បីកសាងអនាគតមួយដែលពលរដ្ឋគ្រប់រូបអាចរីកចម្រើន និងរុងរឿងបាន​។”

សាខាថ្មីនេះផ្តល់ជូនសេវាកម្មធនាគារសម្បូរ​បែប ដោយ​បើកដំណើរការពីថ្ងៃចន្ទ ដល់ថ្ងៃសុក្រ ចាប់ពីម៉ោង​ ៨ ព្រឹក ដល់ម៉ោង ៤រសៀល ដើម្បីធានាថាអតិថិជនងាយស្រួលក្នុងការទទួលបានដំណោះស្រាយហិរញ្ញវត្ថុនានា។ ​សេវាកម្មទាំងនេះរួមមាន៖ ប្រាក់បញ្ញើ, ប្រាក់កម្ចី, ធានារ៉ាប់រង, ផ្ទេរប្រាក់ក្នុងស្រុកនិងអន្តរជាតិ, ទូទាត់វិក្កយបត្រ, ម៉ាស៊ីនដកប្រាក់ និងដាក់ប្រាក់ ព្រមទាំង​មាន​សេវាកម្មជាច្រើនទៀត។ ខណៈពេលដែលកំពុង​រង់ចាំធ្វើប្រតិបត្តិការហិរញ្ញវត្ថុ​ផ្សេងៗ អតិថិជនអាច រីករាយជាមួយ​កន្លែងរង់ចាំដ៏មានផាសុកភាព និងទំនើបបំផុត ហើយក៏អាចរីករាយទទួល​ទាន​កាហ្វេ និងទឹកផ្លែឈើដ៏ឈ្ងុយឆ្ងាញ់ពី​ហាង​ ​Coffee Hub ដែលមានទីតាំងនៅខាងក្នុងសាខាតែម្តង។

ថ្លែងក្នុងកម្មវិធីសម្ពោធសាខាថ្មីរបស់ធនាគារ វីង​ ឧកញ៉ា គិត ស៊ូឡា បានលើកឡើងថា៖ “ធនាគារ វីង បានបង្ហាញពីការយកចិត្តទុកដាក់របស់ខ្លួនក្នុងការគាំទ្រចក្ខុវិស័យរបស់ក្រុមហ៊ុន រ៉ូយ៉ាល់គ្រុប អន្តរជាតិ ក្នុងការធ្វើពិពិធកម្ម និងលើកកម្ពស់ផលប័ត្រឌីជីថលរបស់ខ្លួន។ ការរួមបញ្ចូលគ្នានៃសេវាកម្មតាមឌីជីថល និងនៅតាមទីតាំងនានារបស់ខ្លួន បានជំរុញឱ្យធនាគារ វីង អាចបង្កើនភាពប្រកួតបប្រជែងរបស់ខ្លួនកាន់តែខ្លាំងជាងមុន ហើយនេះក៏ជាមោទនភាពមួយសម្រាប់រ៉ូយ៉ាល់គ្រុបផងដែរ។”

ឧកញ៉ា គិត ស៊ូឡា បានបន្ថែមថា៖ “រូបខ្ញុំផ្ទាល់ ខ្ញុំពិតជាមានមោទនភាពយ៉ាងខ្លាំងដែលឃើញសមាជិករបស់ក្រុមហ៊ុនរ៉ូយ៉ាល់គ្រុបមានការរីកចម្រើន និងបានប្រើប្រាស់ជំនាញរបស់ខ្លួនដើម្បីគាំទ្រសហគមន៍នានា។ វាជាសក្ខីភាពមួយចំពោះការខិតខំប្រឹងប្រែរបស់ធនាគារ វីង ហើយក៏ជាតម្លៃរួមមួយដែលពួកយើងប្រកាន់ខ្ជាប់ផងដែរ។”

ដោយមានទ្រព្យសកម្មជិត ២ពាន់លានដុល្លារអាមេរិក ភ្នាក់ងារវីង ១១.០០០ទីតាំង ដៃគូ​អាជីវកម្មប្រមាណ ១៦៥.០០០ ព្រមទាំង​មានអតិថិជនប្រើប្រាស់ជាង ១៤,៥លានគណនី ធនាគារ វីង បានក្លាយជាធនាគារឌីជីថលរីកចម្រើនយ៉ាងឆាប់រហ័សមួយនៅក្នុងប្រទេសកម្ពុជា។

កិច្ចសហការជាយុទ្ធសាស្ត្រជាមួយដៃគូធំៗជាច្រើនដូចជា៖​ ក្រុមហ៊ុនធានារ៉ាប់រងអាយុជីវិត Prudential (Cambodia) Life Assurance, ក្រុមហ៊ុន UnionPay, ក្រុមហ៊ុនវីសា, ក្រុមហ៊ុនម៉ាស្ទ័រកាត, ក្រុមហ៊ុន Alipay, ក្រុមហ៊ុន WeChat, ក្រុមហ៊ុន MoneyGram, ក្រុមហ៊ុន Western Union, ក្រុមហ៊ុន Ria និងក្រុមហ៊ុន Oracle ជាដើម បានជួយបង្កើនការប្តេជ្ញាចិត្តរបស់ធនាគារ វីង មួយកម្រិតបន្ថែមទៀតក្នុងការផ្តល់នូវសេវាកម្មហិរញ្ញវត្ថុមួយដែលផ្សាភ្ជាប់គ្នាទៅវិញទៅមកឥតអាក់ខាន។

សាខាថ្មីរបស់ធនាគារ វីង ក្នុងខេត្តកំពង់ឆ្នាំង ត្រៀមខ្លួនជាស្រេចដើម្បីដើរតួជាផ្នែកមួយដ៏សំខាន់ក្នុងការជំរុញភាពរីកចម្រើននៅក្នុងសហគមន៍ ក៏ដូចជាពង្រីកសេវាកម្មហិរញ្ញវត្ថុប្រកប​ដោយ​ភាព​ងាយស្រួលប្រើប្រាស់ ដែលនឹងជួយជំរុញខេត្តនេះឆ្ពោះទៅរកអនាគតដ៏រុងរឿង៕

The post ធនាគារ វីង បើកសម្ពោធសាខាថ្មីក្នុងក្រុងកំពង់ឆ្នាំង appeared first on .