នាយករដ្ឋមន្ត្រីឆែក

នាយករដ្ឋមន្ត្រីឆែក៖ ប្រេងរបស់កាហ្សាក់ស្ថាន អាចជួយប្រទេសខ្លួន កាត់ផ្តាច់ពីរុស្ស៊ី

ឧកញ៉ាសាមញ្ញ — Mon, 24 Apr 2023 23:55:00 +0000

នាយករដ្ឋមន្ត្រីសាធារណ:រដ្ឋឆែក លោក Petr Fiala បាននិយាយ ក្នុងដំណើរទស្សនកិច្ចទៅកាន់ប្រទេសកាហ្សាក់ស្ថាន ក្នុងពេលថ្មីៗនេះថា ប្រេងឆៅរបស់ពួកគេ អាចជួយធានាសន្តិសុខថាមពលរបស់ឆែកបាន បន្ទាប់ពីខ្លួនបានបញ្ឈប់ការនាំចូលប្រេងឆៅពីប្រទេសរុស្ស៊ី ។ នេះបើតាមការចុះផ្សាយពីសារព័ត៌មាន CNA ។

លោក Petr បាននិយាយប្រាប់ទៅកាន់សន្និសីទសារព័ត៌មានមួយ បន្ទាប់ពីបានជួបជាមួយប្រធានាធិបតីកាហ្សាក់ស្ថាន លោក Kassym-Jomart Tokaev កាលពីថ្ងៃចន្ទថា ៖ ” យើងត្រូវការជំរុញសន្តិសុខថាមពលផ្ទាល់ខ្លួនរបស់យើងបន្ថែមទៀត ហើយប្រេងរបស់កាហ្សាក់ស្ថាន បានក្លាយជាកត្តាដ៏សំខាន់ នៅក្នុងរឿងនេះ ” ។

នាយករដ្ឋមន្ត្រីរូបនេះ បានបន្ថែមទៀតថា ៖ ” ការហ្សាក់ស្ថាន គឺជាអ្នកផ្គត់ផ្គង់ប្រេងដ៏សំខាន់បំផុត ដល់សាធារណ:រដ្ឋឆែក ហើយយើងជឿជាក់ថា នឹងមានវិសាលភាពដ៏ធំធេងសម្រាប់កិច្ចសហប្រតិបត្តិការរវាងប្រទេសយើងទាំងពីរ ខណ:ពេលដែលយើងកំពុងងាកចេញឆ្ងាយពីប្រេងរបស់រុស្ស៊ី ” ។

ជម្រាបជូនផងដែរថា កាហ្សាក់ស្ថាន ដែលជាប្រទេសជិតខាងរបស់រុស្ស៊ី បានក្លាយជាអ្នកដឹកជញ្ជូនប្រេងឆៅដ៏សកម្មមួយទៅកាន់តំបន់អឺរ៉ុប តាមរយ:បំពង់បង្ហូរប្រេង ដែលភាគច្រើនឆ្លងកាត់ប្រទេសរុស្ស៊ី ខណ:ប្រទេសនៅក្នុងតំបន់អាស៊ីកណ្តាលមួយនេះ ក៏បានជំរុញការនាំចេញប្រេងឆៅរបស់ខ្លួនយ៉ាងច្រើន តាមរយ:បំពង់បង្ហូរប្រេងជំនួស Baku-Tbilisi-Ceyhan ផងដែរ ៕

The post នាយករដ្ឋមន្ត្រីឆែក៖ ប្រេងរបស់កាហ្សាក់ស្ថាន អាចជួយប្រទេសខ្លួន កាត់ផ្តាច់ពីរុស្ស៊ី appeared first on .

សាធារណៈរដ្ឋឆែក ចាត់ទុកវៀតណាមជាដៃគូសហការសំខាន់បំផុតនៅអាស៊ាន

ឧកញ៉ាសំពៅ — Mon, 24 Apr 2023 09:52:00 +0000

វៀតណាមគឺជាដៃគូសហការសំខាន់បំផុត របស់សាធារណរដ្ឋឆែក ប្រចាំតំបន់អាស៊ីអាគ្នេយ៍។ នេះបើតាមសម្ដីរបស់នាយករដ្ឋមន្ត្រីឆែក Petr Fiala អំឡុងពេលធ្វើទស្សនកិច្ចនៅប្រទេសជិតខាងកម្ពុជា។

យោងតាមការចុះផ្សាយពី VNExpress បានបង្ហាញថា អំឡុងពេលកិច្ចប្រជុំជាមួយភាគីឆែក នាយករដ្ឋមន្ត្រីវៀតណាម Pham Minh Chinh បាននិយាយថា វៀតណាមតែងព្យាយាមលើកកម្ពស់ទំនាក់ទំនងជាមួយ “មិត្តប្រពៃណី” និងចាត់ទុកឆែកថាជា “ដៃគូអាទិភាព”។

ថ្នាក់ដឹកនាំទាំង ២ ក៏បានកោតសរសើរពីកំណើននៃទំហំពាណិជ្ជកម្មយ៉ាងឆាប់រហ័សប៉ុន្មានឆ្នាំចុងក្រោយ ជាពិសេសបន្ទាប់ពីរយៈពេលពីរឆ្នាំ នៃការអនុវត្តកិច្ចព្រមព្រៀងពាណិជ្ជកម្មសេរីវៀតណាម-សហភាពអឺរ៉ុប (EVFTA) ហើយពាណិជ្ជកម្មទ្វេភាគីឈានដល់ ៨៤៨លានដុល្លារក្នុងឆ្នាំ២០២២ កើនឡើង ១៥% ពីមួយឆ្នាំទៅមួយឆ្នាំ។

ប្រទេសទាំង ២ ក៏បានយល់ព្រមកំណត់គោលដៅនៃការធ្វើពាណិជ្ជកម្មឲ្យដល់ ១ពាន់លានដុល្លារ ក្នុងរយៈពេល ១-២ឆ្នាំខាងមុខ តាមរយៈកិច្ចព្រមព្រៀង EVFTA ផងដែរ។

មេដឹកនាំទាំងពីរបានលើកទឹកចិត្តសហគ្រាសឆែក ជំរុញការវិនិយោគនៅវៀតណាម ជាពិសេសលើវិស័យផលិតរថយន្ត ការផ្លាស់ប្តូរឌីជីថល ថាមពលកកើតឡើងវិញ ការការពារបរិស្ថាន និងហេដ្ឋារចនាសម្ព័ន្ធ។

សូមជម្រាបដែរថា លោក Petr គឺជាថ្នាក់ដឹកនាំរដ្ឋាភិបាលឆែកតំបូង ដែលបំពេញទស្សនកិច្ចផ្លូវការទៅកាន់ប្រទេសវៀតណាម ក្នុងរយៈពេល ១៥ឆ្នាំចុងក្រោយ៕

The post សាធារណៈរដ្ឋឆែក ចាត់ទុកវៀតណាមជាដៃគូសហការសំខាន់បំផុតនៅអាស៊ាន appeared first on .

មហាសេដ្ឋីឆេកឡើងតុលាការ តវ៉ាក្ដីក្ដាំជាថ្មីជាមួយ EU មុនការប្រកួតប្រជែងកៅអីប្រធានាធិបតី

ឧកញ៉ាសំពៅ — Thu, 05 Jan 2023 06:51:00 +0000

កាលពីពេលថ្មីៗនេះ មហាសេដ្ឋីឆែក Andrej Babis បានវិលត្រឡប់ទៅកាន់តុលាការជាថ្មី ដើម្បីបន្តប្រឆាំងជាមួយនឹងពាក្យបណ្ដឹងចោទលោកថា កិបកេងលុងជាង ២ លានអឺរ៉ុប អំឡុងពេលលោកកាន់តំណែងជាអតីតនាយករដ្ឋមន្ត្រីប្រចាំប្រទេស។

យោងតាមការចុះផ្សាយពី Reuters បានបង្ហើបថា បច្ចុប្បន្នលោក Babis កំពុងទទួលបានសម្លេងគាំទ្រខ្លាំង ដូច្នេះដើម្បីត្រួសត្រាយផ្លូវទៅកាន់តំណែងជាប្រធានាធិបតី លោកចាំបាច់ត្រូវដោះស្រាយបញ្ហាក្ដីក្ដាំនេះជាមុនសិន ជៀសវាងបញ្ហានៅថ្ងៃខាងមុខ។

គួររំលឹកដែរថា កន្លងមក EU ធ្លាប់ដាក់ពាក្យបណ្ដឹងចោទមហាសេដ្ឋីរូបនេះថា បានលួចកិបកេងថវិកាប្រមាណជាង ២ លានអឺរ៉ូ ប៉ុន្តែបុរសម្នាក់នេះប្រកែកដាច់អហង្ការ និងបានអះអាងថា នេះគឺជាល្បិចលើឆាកនយោបាយ ដែលគូប្រជែងរបស់លោកព្យាយាមទម្លាក់លោកពីអំណាចតែប៉ុណ្ណោះ។

សូមជម្រាបបន្ថែមថា លោក Babis គឺជាបុគ្គលមានទ្រព្យសម្បត្តិច្រើនបំផុតទី ៥ ប្រចាំសាធារណរដ្ឋឆេក ហើយក៏ជាបេក្ខភាពកំពុងទទួលបានការគាំទ្រច្រើន សម្រាប់ការប្រជែងកៅអីប្រធានាធិបតីផងដែរ។

ការបោះឆ្នោតជ្រើសរើសប្រធានាធិបតីនៃសាធារណរដ្ឋឆេកជុំទីមួយ នឹងធ្វើឡើងនៅថ្ងៃទី ១៣-១៤ មករា ខណៈជុំទី ២ ដែលនឹងជម្រុះសល់តែ ២ រូប ធ្វើឡើងនៅថ្ងៃទី ២៧-២៨ មករា៕

The post មហាសេដ្ឋីឆេកឡើងតុលាការ តវ៉ាក្ដីក្ដាំជាថ្មីជាមួយ EU មុនការប្រកួតប្រជែងកៅអីប្រធានាធិបតី appeared first on .

មហាសេដ្ឋីឆែក ប្រកាសឈរឈ្មោះជាបេក្ខភាពប្រធានាធិបតី សម្រាប់ការបោះឆ្នោតឆ្នាំក្រោយ

ឧកញ៉ាសំពៅ — Mon, 31 Oct 2022 04:31:00 +0000

កាលពីពេលថ្មីៗនេះ អតីតនាយករដ្ឋមន្ត្រីសាធារណរដ្ឋឆែក Andrej Babis បានប្រកាសថា លោកនឹងឈរឈ្មោះជាបេក្ខភាពប្រធានាធិបតី សម្រាប់ការបោះឆ្នោតដែលនឹងធ្វើឡើងនៅខែមករាឆ្នាំក្រោយ។ នេះបើតាមការចុះផ្សាយពី BNN Bloomberg។

ការប្រកាសរបស់មហាសេដ្ឋីដែលរកស៊ីលើវិស័យគីមីសាស្ត្រ កសិកម្ម និងប្រព័ន្ធផ្សព្វផ្សាយ គឺធ្វើឡើងនៅលើកម្មវិធីទូរទស្សន៍មួយកាលពីថ្ងៃអាទិត្យ តែបើទោះជាគណបក្សរបស់លោកគឺកំពុងមានប្រជាប្រិយភាពខ្លាំង ប៉ុន្តែមហាសេដ្ឋីម្នាក់នេះទំនងមិនអាចឡើងដល់វគ្គផ្ដាច់ព្រ័ត្រឡើយ។

យោងតាមការស្ទង់មតិបានបង្ហាញថា លោក Babis ប្រហែលអាចឆ្លងផុតវគ្គជម្រុះជុំទី ២ ប៉ុន្តែអាចនឹងពិបាកសម្រាប់វគ្គបន្ទាប់ ស្របពេលបេក្ខភាពដែលមានសង្ឃឹមក្លាយជាប្រធានាធិបតីថ្មីគឺ មន្ត្រីយោធា NATO ដែលបានចូលនិវត្តន៍ និងឈរឈ្មោះជាបេក្ខភាពឯករាជ Petr Pavel។

សូមជម្រាបដែរថា មហាសេដ្ឋីឆែកម្នាក់នេះ កំពុងតវ៉ាក្ដីក្ដាំជាមួយនឹងសហភាពអឺរ៉ុប ជុំវិញការចោទប្រកាន់លោកពីករណីកិបកេងលុយកាក់ អំឡុងពេលលោកកាន់តំណែងជានាយករដ្ឋមន្ត្រី៕

The post មហាសេដ្ឋីឆែក ប្រកាសឈរឈ្មោះជាបេក្ខភាពប្រធានាធិបតី សម្រាប់ការបោះឆ្នោតឆ្នាំក្រោយ appeared first on .

អតីតនាយករដ្ឋមន្ត្រីឆែក ឡើងតុលាការតវ៉ាក្ដីក្ដាំកិបកេងលុយ EU ២ លានដុល្លារ

ឧកញ៉ាសំពៅ — Tue, 13 Sep 2022 07:16:11 +0000

កាលពីថ្ងៃច័ន្ទកន្លងទៅ អតីតនាយករដ្ឋមន្ត្រីសាធារណរដ្ឋឆែក Andrej Babis ត្រូវបានកោះហៅឡើងតុលាការ ជុំវិញពាក្យបណ្ដឹងចោទលោកថា បានកិបកេងលុយជំនួយពីសហភាពអឺរ៉ុបប្រមាណ ២ លានដុល្លារ។

យោងតាមការចុះផ្សាយពី Reuters បានឲ្យដឹងថា ព្រះរាជអាជ្ញាបានចោទប្រកាន់មហាសេដ្ឋីខាងលើដែលជាម្ចាស់សហគ្រាសធំៗលើវិស័យជាច្រើន ជុំវិញការកិបកេងលុយជំនួយពី EU មុនពេលបង្កើតគណបក្សប្រឆាំង ANO នៅក្នុងឆ្នាំ ២០១១។

យ៉ាងណា លោក Babis បានប្រកែកដាច់អហង្ការថា ពាក្យចោទប្រកាន់ទាំងអម្បាលម៉ានគឺសុទ្ធសឹងតែមិនពិត ហើយបញ្ហានេះគឺទាក់ទងនឹងរឿងនយោបាយ។

សូមជម្រាបដែរថា លោក Babis ធ្លាប់បានកាន់តំណែងជានាយករដ្ឋមន្ត្រីនៃសាធារណរដ្ឋឆែកពីឆ្នាំ ២០១៧ ដល់ ២០២១ ហើយថ្មីៗនេះលោកហាក់ទទួលបានប្រជាប្រិយភាពកាន់តែខ្លាំង រហូតដល់អ្នកវិភាគជាច្រើនសន្និដ្ឋានថា បុរសវ័យ ៦៨ ឆ្នាំទំនងអាចទទួលបានតំណែងមួយនេះម្ដងទៀតសម្រាប់អាណត្តិក្រោយ។

គួររំលឹកដែរថា ទ្រព្យសម្បត្តិសរុបរបស់អ្នកនយោបាយចាស់វស្សាម្នាក់នេះមានប្រមាណជិត ៤ ពាន់លានដុល្លារអាមេរិក បើយោងតាមទិន្នន័យផ្ដល់ឲ្យដោយ Forbes៕

The post អតីតនាយករដ្ឋមន្ត្រីឆែក ឡើងតុលាការតវ៉ាក្ដីក្ដាំកិបកេងលុយ EU ២ លានដុល្លារ appeared first on .