នាយករដ្ឋមន្ត្រីម៉ាឡេស៊ី

អតីតនាយករដ្ឋមន្ត្រីម៉ាឡេស៊ី ត្រូវបានបន្ធូរបន្ថយទោសរយៈពេល ៦ឆ្នាំ

ឧកញ៉ាសំពៅ — Sat, 03 Feb 2024 01:18:00 +0000

កាលពីថ្ងៃទី០២ ខែកុម្ភៈ ក្រុមប្រឹក្សាលើកលែងទោសម៉ាឡេស៊ី បានសម្រេចបន្ធូរបន្ថយទោសជាប់ពន្ធនាគារ របស់អតីតនាយករដ្ឋមន្ត្រី លោក Najib Razak ពីរយៈពេល ១២ឆ្នាំ មកនៅត្រឹម ៦ឆ្នាំវិញ។

យោងតាមការចុះផ្សាយពីសារព័ត៌មាន ThaiPBS បានបង្ហាញថា មិនត្រឹមតែបន្ថយរយៈពេលនៃការអនុវត្តទោសឡើយ សូម្បីតែប្រាក់ពិន័យក៏អតីតនាយករដ្ឋមន្ត្រីម៉ាឡេស៊ី ត្រូវបានកាត់បន្ថយអស់ច្រើនសន្ធឺក ពោលត្រូវបង់ប្រាក់ពិន័យតែ ៥០លានរីងហ្គីត ឬតែជាង ១០លានដុល្លារប៉ុណ្ណោះ ខណៈការកាត់ទោសដំបូងតម្រូវឲ្យលោកបង់ប្រាក់ពិន័យ ២១០លានរីងហ្គីតឯណោះ។

ជាមួយការបន្ធូរបន្ថយទោសនេះ នឹងអនុញ្ញាតឲ្យលោក Najib មានសិទ្ធសេរីភាព ពីការជាប់ពន្ធនាគារវិញនាខែសីហា ឆ្នាំ២០២៨ ខណៈក្រុមប្រឹក្សាលើកលែងទោស មិនបញ្ជាក់ច្បាស់ពីមូលហេតុ ដែលឈានដល់ការសម្រេចចិត្តបែបនេះនោះឡើយ។

គួសបញ្ជាក់ដែរថា អតីតនាយករដ្ឋមន្ត្រីម៉ាឡេស៊ី លោក Najib Razak ត្រូវបានតុលាការកំពូលម៉ាឡេស៊ី កាត់ទោសឲ្យជាប់ពន្ធនាគាររយៈពេល ១២ឆ្នាំ ពីបទប្រព្រឹត្តអំពើពុករលួយ ទាក់ទងនឹងគម្រោងអភិវឌ្ឍន៍ 1MDB ដែលមានតម្លៃប្រមាណ ៤,៥ពាន់លានដុល្លារ។

ក្រោយអនុវត្តទោសក្នុងពន្ធនាគារមិនបានប៉ុន្មានផង លោក Najib ក៏បានស្នើដាក់ញត្តិ សុំការលើកលែងទោសពីព្រះមហាក្សត្រ នាខែសីហា ឆ្នាំ២០២២ ហើយលោកក៏ជាប់ឈ្មោះក្នុងបញ្ជីប្រវត្តិសាស្ត្រផងដែរ នាមជានាយករដ្ឋមន្ត្រីម៉ាឡេស៊ីដំបូង ដែលបានជាប់ពន្ធនាគារ៕

The post អតីតនាយករដ្ឋមន្ត្រីម៉ាឡេស៊ី ត្រូវបានបន្ធូរបន្ថយទោសរយៈពេល ៦ឆ្នាំ appeared first on .

អតីតនាយករដ្ឋមន្ត្រីម៉ាឡេស៊ី ត្រូវបញ្ជូនចេញពីពន្ធនាគារ ទៅកាន់មន្ទីរពេទ្យ ដោយសារជំងឺកូវីដ១៩

ឧកញ៉ាសំពៅ — Thu, 02 Nov 2023 05:59:00 +0000

អតីតនាយករដ្ឋមន្ត្រីម៉ាឡេស៊ី លោក Najib Razak ដែលត្រូវបានកាត់ទោសឲ្យជាប់ពន្ធនាគារ ក្រោយរកឃើញជាប់ពាក់ព័ន្ធករណីពុករលួយកាលពីពេលកន្លងទៅ បច្ចុប្បន្នកំពុងសម្រាកនៅមន្ទីរពេទ្យ បន្ទាប់ពីរកឃើញថាលោកបានឆ្លងជំងឺកូវីដ ១៩។

យោងតាមការចុះផ្សាយពីសារព័ត៌មាន CNA បានរាយការណ៍ថា លោក Najib ដែលមានវ័យ ៧០ឆ្នាំ គឺមានសុខភាពល្អប្រសើរវិញហើយ បន្ទាប់ពីលោកបានប្រាប់ទៅកាន់ឆ្មាំយាមគុកថា លោកក្ដៅខ្លួនខ្លាំងកាលពីថ្ងៃអង្គារ ខណៈបច្ចុប្បន្នអតីតនាយករដ្ឋមន្ត្រីម៉ាឡេស៊ី កំពុងធ្វើចត្តាឡីស័ក និងទទួលការព្យាបាលនៅមន្ទីរពេទ្យ។

គួររំលឹកបន្តិចថា អតីតនាយករដ្ឋមន្ត្រីខាងលើ គឺទទួលបានការកាត់ទោសឲ្យជាប់ពន្ធនាគារ រយៈពេល ១២ឆ្នាំ ក្រោយរកឃើញជាប់ទាក់ទងនឹងករណីពុករលួយ និងកិបកេងមូលនិធិរដ្ឋ 1MDB។

ពាក់ព័ន្ធនឹងករណីខាងលើ ក្រុមស៊ើបអង្កេតរបស់អាមេរិក បានសហការជាមួយរដ្ឋាភិបាលម៉ាឡេស៊ី ដោយសន្និដ្ឋានថា ទឹកប្រាក់ ៤,៥ពាន់លានដុល្លារ ត្រូវបានលួចពីមូលនិធិ 1MDB និងរកឃើញថា ទឹកប្រាក់ច្រើនជាង ១ពាន់លានដុល្លារ បានវេរចូលក្នុងគណនីធនាគាររបស់លោក Najib។

បន្ទាប់ពីមានភស្តុតាងគ្រប់គ្រាន់ លោក Najib ត្រូវបានផ្ដន្ទាទោសឲ្យជាប់ពន្ធនាគារ រយៈពេល ១២ឆ្នាំ និងបានក្លាយជានាយករដ្ឋមន្ត្រីដំបូងបង្អស់ប្រចាំប្រវត្តិសាស្ត្រម៉ាឡេស៊ី ដែលជាប់ពន្ធនាគារ។

ជម្រាបបន្ថែមថា លោក Najib ក៏បានដាក់ញត្តិស្នើសុំការលើកលែងទោសពីព្រះមហាក្សត្រផងដែរ ហើយក្នុងករណីដែលព្រះមហាក្សត្រប្រោសប្រទានទោស លោកនឹងជាប់ពន្ធនាគាររយៈពេលខ្លី៕

The post អតីតនាយករដ្ឋមន្ត្រីម៉ាឡេស៊ី ត្រូវបញ្ជូនចេញពីពន្ធនាគារ ទៅកាន់មន្ទីរពេទ្យ ដោយសារជំងឺកូវីដ១៩ appeared first on .

នាយករដ្ឋមន្ត្រីម៉ាឡេស៊ី បដិសេធមិនប្រើប្រាស់រថយន្តតម្លៃជាង ១,៥ លានដុល្លារ ជារថយន្តផ្លូវការ

ឧកញ៉ាសំពៅ — Mon, 28 Nov 2022 05:57:00 +0000

កាលពីពេលថ្មីៗនេះ លោក Anwar Ibrahim នាយករដ្ឋមន្ត្រីម៉ាឡេស៊ីថ្មី បានប្រកាសថា លោកនឹងមិនប្រើប្រាស់រថយន្ត Mercedes-Benz S600 Limousine ដែលនាយកដ្ឋាននាយករដ្ឋមន្ត្រីបានទិញជូនលោក សម្រាប់ការប្រើប្រាស់ជារថយន្តផ្លូវការឡើយ។

ជំនួសមកវិញ លោកបានទម្លាយថា លោកនឹងប្រើប្រាស់រថយន្តណាដែលមានស្រាប់នៅនាយកដ្ឋានជារថយន្តផ្លូវការ ក្រោមមូលហេតុមិនចង់ឲ្យរដ្ឋាភិបាលចំណាយលើរបស់មិនចាំបាច់ សម្រាប់ការកាន់តំណែងរបស់លោកឡើយ។ នេះបើតាមការចុះផ្សាយពី CNA។

“ខ្ញុំចង់ជម្រាបអ្នកទាំងអស់គ្នាថា កាលពីម្សិលមិញ ខ្ញុំបានបដិសេធមិនប្រើប្រាស់រថយន្ត Mercedes-Benz S600 ដែលបានទិញដោយនាយកដ្ឋាននាយករដ្ឋមន្ត្រី មុនពេលដែលខ្ញុំចូលមកការិយាល័យ។ មូលហេតុគឺដោយសារ ខ្ញុំមិនចង់ឲ្យមានការចំណាយច្រើនសម្រាប់ខ្ញុំឡើយ”។ នេះបើតាមការបង្ហោះសារនៅលើបណ្ដាញសង្គម Facebook ផ្លូវការ របស់លោក។

សូមជម្រាបដែរថា រថយន្ត Mercedes-Benz S600 Limousine គឺមានតម្លៃប្រហែល ១,៥៧ លានដុល្លារ គិតលើទីផ្សារសហរដ្ឋអាមេរិក ហើយជាទូទៅរថយន្តប្រភេទនេះតែងតែត្រូវប្រើប្រាស់ជាមធ្យោបាយធ្វើដំណើររបស់បុគ្គលសំខាន់ៗ៕

The post នាយករដ្ឋមន្ត្រីម៉ាឡេស៊ី បដិសេធមិនប្រើប្រាស់រថយន្តតម្លៃជាង ១,៥ លានដុល្លារ ជារថយន្តផ្លូវការ appeared first on .