នាយករដ្ឋមន្ត្រីវៀតណាម គ្រោងជួលជនបរទេសមកគ្រប់គ្រងក្រុមហ៊ុនរបស់រដ្ឋ

ឧកញ៉ាសំពៅ — Mon, 17 Jun 2024 06:02:00 +0000

នាយករដ្ឋវៀតណាម លោក Pham Minh Chinh បានអំពាវនាវឲ្យក្រុមហ៊ុនរបស់រដ្ឋទាំងអស់ ពិចារណាលើការជួលជនបរទេស ដែលមានសមត្ថភាព ដើម្បីមកគ្រប់គ្រងក្រុមហ៊ុន និងបង្កើនការអភិវឌ្ឍធនធានមនុស្សបន្ថែមទៀត។

យោងតាមការចុះផ្សាយពីសារព័ត៌មាន VNExpress បានបង្ហាញថា អំឡុងពេលជួបប្រជុំជាមួយប្រធានក្រុមហ៊ុនរបស់រដ្ឋ ចំនួន ១៥០រូប មេដឹកនាំវៀតណាមបាននិយាយថា ការអភិវឌ្ឍធនធានមនុស្ស គឺជាកូនសោសំខាន់បំផុត ក្នុងគម្រោងការអភិវឌ្ឍនៃប្រទេសវៀតណាម។

ទន្ទឹមនឹងនោះ លោក Pham Minh Chinh ក៏បានជំរុញឱ្យសហគ្រាសរដ្ឋ កែសម្រួលប្រាក់បៀវត្សរ៍ និងគោលនយោបាយប្រាក់បៀវត្សរ៍ ដើម្បីទាក់ទាញធនធានមនុស្សប្រកបដោយគុណភាពខ្ពស់ ខណៈដែលអាជីវកម្មភាគច្រើនដែលគ្រប់គ្រងក្នុងស្រុកបង្ហាញពីសមត្ថភាពមានកម្រិត និងប្រសិទ្ធភាពអាជីវកម្មទាប។

សូមជម្រាបដែរថា សហគ្រាសរដ្ឋ គឺបានជួយដល់ការអភិវឌ្ឍនៃប្រទេសវៀតណាមជាខ្លាំង ពោលកាលពីឆ្នាំទៅ ប្រាក់ចំណូលបានមកពីសហគ្រាសរដ្ឋទាំងអស់ គឺសម្រេចបានរហូតដល់ ៦៧ពាន់លានដុល្លារឯណោះ៕

The post នាយករដ្ឋមន្ត្រីវៀតណាម គ្រោងជួលជនបរទេសមកគ្រប់គ្រងក្រុមហ៊ុនរបស់រដ្ឋ appeared first on .

ក្រុមហ៊ុនឯកជនល្បីៗចំនួន ២ នាយករដ្ឋមន្រ្តីវៀតណាម ទៅទស្សនកិច្ចនាព្រឹកនេះ

ឧកញ៉ាកោះក្របី — Wed, 09 Nov 2022 04:45:04 +0000

នាយករដ្ឋមន្រ្តីវៀតណាម លោក ផាម មិញជិញ បានដឹកនាំគណៈប្រតិភូជាន់ខ្ពស់មកបំពេញទស្សនកិច្ចផ្លូវការនៅកម្ពុជារយៈពេល ២ថ្ងៃ ចាប់ពីថ្ងៃទី៨-ទី៩ ខែវិច្ឆិកា ឆ្នាំ២០២២ តបតាមការអញ្ជើញពីប្រមុខដឹកនាំសម្តេចតេជោ ហ៊ុន សែន នាយករដ្ឋមន្ត្រីកម្ពុជា។

បន្ទាប់ពីចូលក្រាបបង្គំគាល់ សម្តេចព្រះ បរមនាថ នរោត្តម សីហមុនី ព្រះមហាក្សត្រ នៅក្នុងព្រះបរមរាជវាំង ជួបសម្តែងការគួរសមដាច់ដោយឡែកពីគ្នា ចំពោះសម្តេចវិបុលសេនាភក្តី សាយ ឈុំ ប្រធានព្រឹទ្ធសភា និងសម្តេចអគ្គមហាពញាចក្រី ហេង សំរិន ប្រធានរដ្ឋសភា និងមានជំនួបពិភាក្សាទ្វេភាគីនៅវិមានសន្តិភាព ដោយផ្តោតការពិភាក្សាលើការពង្រឹង និងពង្រីកកិច្ចសហប្រតិបត្តិការទ្វេភាគី ក៏ដូចជាបញ្ហាតំបន់ និងអន្តរជាតិមួយចំនួន ដែលជាកង្វល់រួម ជាមួយនឹងសម្តេចតេជោ ហ៊ុន សែន នៅថ្ងៃទី៨ម្សិលមិញ។

នៅព្រឹកថ្ងៃពុធ ទី៩វិច្ឆិកានេះ នាយករដ្ឋមន្រ្តី លោក ផាម មិញជិញ បានអញ្ជើញទៅទស្សនាក្រុមហ៊ុនឯកជនល្បីៗចំនួន ២នៅកម្ពុជាដែលវិនិយោគដោយវិនិយោគិនវៀតណាម គឺមន្ទីរពេទ្យជោរីភ្នំពេញ ស្ថិតក្នុងខណ្ឌច្បារអំពៅ រាជធានីភ្នំពេញ និងក្រុមហ៊ុន Metfone ស្ថិតនៅមហាវិថីម៉ៅសេទុង សង្កាត់ទួលស្វាយព្រៃ២ ខណ្ឌបឹងកេងកង រាជធានីភ្នំពេញ។

សូមជម្រាបជូនថា គិតត្រឹមខែកក្កដា ឆ្នាំ២០២២ ទំហំពាណិជ្ជកម្មរវាងកម្ពុជា និងវៀតណាម សម្រេចបានទឹក ប្រាក់ប្រមាណជាង ៣,៧៦ពាន់លានដុល្លារ ដែលទំហំនេះ មានការកើនឡើង ២២.២ ភាគរយ បើធៀបនឹងរយៈពេលដូចគ្នាក្នុងឆ្នាំ ២០២១។

ទំហំពាណិជ្ជកម្មទ្វេភាគីសរុបរវាងកម្ពុជា និងវៀតណាម គិតចាប់ពីខែមករា ដល់ខែកក្កដា ឆ្នាំ២០២២ ធៀបនឹងរយៈពេលដូចគ្នាក្នុងឆ្នាំកន្លងទៅ មានកំណើនប្រមាណជាង ៣៤% ក្នុងវិស័យវិនិយោគ មានការកើនឡើងប្រមាណ ១,៣% ប៉ុន្តែពុំឃើញមានវត្តមានគម្រោងវិនិយោគថ្មីរបស់វៀតណាមនៅកម្ពុជាក្នុងឆ្នាំនេះ និងឆ្នាំ២០២១កន្លងទៅឡើយ៕

The post ក្រុមហ៊ុនឯកជនល្បីៗចំនួន ២ នាយករដ្ឋមន្រ្តីវៀតណាម ទៅទស្សនកិច្ចនាព្រឹកនេះ appeared first on .