លោក ស្រ៊ុន ពៅ ប្រធានសមាគមអ្នកចិញ្ចឹមសត្វកម្ពុជា បានឱ្យដឹងថាបញ្ហានេះក្រសួង អគ្គនាយកដ្ឋានបានជូនដំណឹងមកខាងសមាគមគឺបានអនុញ្ញាតឱ្យឆ្លងកាត់ពីថៃទៅវៀតណាម។តែបុគ្គលដែលនាំចូលជ្រូករស់មកកម្ពុជានេះយើងកំពុងតែធ្វើការតាមដាន។

លោកបញ្ជាក់ថា «បើតាមសមាគមដឹងនៅប្រទេសវៀតណាម នាយករដ្ឋមន្ត្រីគេប្រកាសបិទច្រកទំាងអស់មិនឱ្យនាំជ្រូកចូលទៅប្រទេសគេទេ ព្រោះវៀតណាមបានគិតគូរទៅដល់ប្រជាកសិករក៏ដូចជាប្រជាជនរបស់គេយ៉ាងពេញទំហឹង។ឥឡូវនេះខ្ញុំកំពុងបារម្ភថា បើសិនជាវៀតណាមបិទជ្រូកទំាងនោះវានឹងអាចលក់នៅកម្ពុជា ខណៈវិស័យចិញ្ចឹមសត្វរបស់កម្ពុជាកំពុងរងផលលំបាកលក់ជ្រូកខាតបង់ ដោយតម្លៃមិនទាន់បានដល់ថ្លៃដើមផលិតជ្រូក ហើយបើសិនជាថៃនាំជ្រូកមកចាក់នៅកម្ពុជាថែមទៀតនោះវានឹងធ្វើឱ្យប៉ះពាល់កាន់តែធ្ងន់ធ្ងរដល់កម្ពុជាយើង ព្រោះវៀតណាមកាលណាប្រកាសបិទច្រកហើយគឺមានប្រសិទ្ធភាពណាស់»។

ទន្ទឹមនឹងការយល់ឃើញថាវៀតណាមបិទមិនឱ្យនាំជ្រូករស់ចូល លោកស្រ៊ុន ពៅ យល់ថាក្រសួងក៏ដូចជាអគ្គនាយកដ្ឋានមិនមែនមិនដឹងទេ គឺដឹង។ដូចនេះត្រូវតែមានវិធានការបិទមិនឱ្យនាំជ្រូកពីថៃចូលមកកម្ពុជា បើបណ្តោយឱ្យនាំចូលមកទៀត នោះវិស័យចិញ្ចឹមរបស់ប្រទេសកម្ពុជារលំរលាយហើយ ដោយសារតម្លៃជ្រូករស់របស់ថៃមានតម្លៃថោក។

លោកស្រ៊ុន ពៅ លើកឡើងថា តម្លៃជ្រូករស់នៅប្រទេសថៃថោក វាមិនមែនដោយសារថ្លៃដើមផលិតវាទាបនោះទេ គឺដោយសារតែជ្រូកកកស្ទះច្រើន និងមិនអាចនាំចេញទៅប្រទេសទី៣មិនរួច គេមិនទទួលទិញ ម្លោះហើយវាធ្វើឱ្យជ្រូករស់កកស្ទះច្រើននៅក្នុងប្រទេសថៃ។

លោកបន្តថា «បញ្ហាប្រឈមនាពេលសព្វថ្ងៃនៅពេលដែលមិនទាន់មានការនាំចូលជ្រូករស់ពីប្រទេសថៃចូលមកកម្ពុជាគឺប្រឈមជាមួយសាច់បង្កក បើសិនជាត្រូវប្រឈមជាមួយនិងការនាំចូលជ្រូករស់ពីថៃមកទៀតមិនដឹងថាត្រូវធ្វើយ៉ាងណា។តែទោះជាយ៉ាងណា ខ្ញុំនៅតែជឿជាក់លើក្រសួងនិងរាជរដ្ឋាភិបាលថាគិតគូរដើម្បីសេដ្ឋកិច្ចជាតិ ក៏ដូចជាគិតគូរទៅដល់វិស័យចិញ្ចឹមសត្វនៅក្នុងស្រុក»៕

អត្ថបទ៖សារេត

The post ការនាំជ្រូករស់ពីថៃទៅវៀតណាម កំពុងបង្កក្តីព្រួយបារម្ភដល់អ្នកចិញ្ចឹមជ្រូកក្នុងស្រុក appeared first on .

លោក អាន ឬទ្ធី កសិករចិញ្ចឹមជ្រូកមួយកន្លែងនៅខាងខេត្តសៀមរាប បានចោទជាសំនួរថា អ្នកដែលនាំចូលសាច់បង្កកមកកម្ពុជា វាមានគុណភាពបានប៉ុន្មាន ជាពិសេសខ្ញុំចង់សួរទៅខាងក្រសួងមានសមត្ថកិច្ចថាតើយើងបានពិនិត្យទៅលើគុណភាពសាច់បង្កកបានកម្រិតប៉ុន្មានដែរ?

លោកលើកឡើងថា បើយើងពង្រឹងនិងលើកកម្ពស់ទៅដល់កសិករនៅក្នុងស្រុក ឱ្យគាត់ចិញ្ចឹមហើយយើងលក់នៅក្នុងស្រុក ខ្ញុំគិតថាវាប្រហែលជាវាបានល្អប្រសើរជាង ដែលយើងនាំចូលពីក្រៅ ហើយមកជាន់ពន្លិចតម្លៃនៅក្នុងស្រុក។

លោកសង្កត់ធ្ងន់ថា«ក្នុងន័យនេះខ្ញុំចង់បានន័យថា ឱ្យតែសាច់បង្កកនោះនាំចូលមកតំាងពីព្រទេសប្រេស៊ីល ឥណ្ឌាក៏ដូចជានាំចូលមកពីបណ្តាប្រទេសផ្សេងទៀត បើសិនសាច់បង្កកទំាងនោះវាមានគុណភាពពិតប្រាកដ ខ្ញុំជឿថាមិនអាចលក់នៅក្នុងតម្លៃក្រោមទីផ្សារហើយមកប្រកួតប្រជែងជាមួយផលិតផលនៅក្នុងស្រុកបាននោះទេ»។

ទាក់ទងនិងសាច់បង្កកឬសាច់កកនេះដែរ បើយោងតាមសមាគមអ្នកចិញ្ចឹមសត្វកម្ពុជា បានបង្ហាញថា អ្នកបរិភោគក្នុងស្រុកគួស្វែងយល់ខ្លះៗអំពីសាច់កក និងគុណវិបត្តិរបស់វា សាច់កកជ្រូកមាន់ ទា អាចនាំចូលពីប្រទេសប្រេស៊ីល និងសាច់គោ និងក្របីមកពីប្រទេសឥណ្ឌាត្រូវបានដឹកតាមកប៉ាល់តាមប្រទេសវៀតណាម។ គុណវិបត្តិរបស់សាច់កក ពេលវាទន់ហើយមិនអាចយកទៅបង្កកឡើងវិញទេដោយវាបាត់គុណភាព សម្រាប់សាច់កកអាចរក្សាទុកបានប្រហែល១ ឆ្នាំ និង៦ខែ ដោយគេដាក់សាធាតុមួយចំនួនដើម្បីរក្សាគុណភាព និងពណ៌របស់សាច់ នៅពេលសាច់កកជិតផុតថ្ងៃកំណត់ត្រូវបានគេលក់ធូៗថ្លៃមកប្រទេសក្រីក្រ។

សមាគមអ្នកចិញ្ចឹមសត្វកម្ពុជាគូសបញ្ជាក់ថា«ស្ថានភាពសាច់កកលើទីផ្សារប្រទេសកម្ពុជា បច្ចុប្បន្ននេះមានការនាំចូលខុសច្បាប់ច្រើនតាមប្រទេសវៀតណាមហើយបានចែកចាយលើទីផ្សារគ្រប់រូបភាព អ្នកលក់សាច់ និងអ្នកចែកចាយសាច់បានយកសាច់មកបន្ទន់ រួចដាក់លាយជាមួយសាច់ក្នុងស្រុកដើម្បីបន្លំភែ្នកអ្នកទិញពេលនោះអ្នកទិញមិនដឹងថាសាច់នោះជាសាច់កកទេ ពេលមកដល់ផ្ទះពួកគាត់ចាប់ផ្តើមលាងទឹក នឹងដាក់ចូលទូកកឡើងវិញ ពេលនោះសាច់ខូចគុណភាពភាគច្រើន ប៉ុន្តែអ្នកទទួលទានមិនសូវបានដឹងរឿងនេះទេ។ តាមពិតប្រជាជនយើងមិនចូលចិត្តសាច់កកទេ ប៉ុន្តែមិនមានព័ត៌មានគ្រប់គ្រាន់ សព្វថ្ងៃអ្នករស់នៅទីក្រុងភ្នំពេញទទួលទានសាច់កកច្រើនជាងគេ ប្រសិនបើបងប្អូនប្រើសាច់កក គួរកុំយកវាទៅកកឡើងវិញ»។

បើតាមលោក អាន ឬទ្ធី កសិករចិញ្ចឹមជ្រូកនៅខេត្តសៀមរាបថា«ទីផ្សាររបស់ប្រទេសប្រេស៊ីលគេលក់ទៅទីផ្សារមួយណា?ខ្ញុំមិនជឿថាស្តង់ដារបស់អឺរ៉ុបវាថោកជាងស្តង់ដានៅស្រុកខ្មែរយើងនោះទេ អីចឹងស្តង់ដានៅអឺរ៉ុប ខ្ញុំក៏ធ្លាប់ធ្វើដំណើរទៅប្រទេសមួយចំនួននៅលើពិភពលោករួមទាំងនៅអឺរ៉ុប អីចឹងខ្ញុំអាចនិយាយបានថាស្តង់ដារស់នៅរបស់ប្រជាពលរដ្ឋគេគឺខ្ពស់ជាងស្តង់ដារបស់ខ្មែរយើង។ដូចនេះបើសិនជាសាច់បង្កកវាមានគុណភាពអាចទទួលទានបានខ្ញុំគិតថាគេមិននាំចូលមកស្រុកខ្មែរទេ បើទោះបីប្រទេសខ្មែរយើងកំពុងមានការអភិវឌ្ឍយ៉ាងណាក៏ដោយ»។

លោកបញ្ជាក់ថា«ខ្ញុំធ្លាប់បានឃើញដោយផ្ទាល់ភ្នែក នៅសាច់បង្កកនាំចូលមកពីប្រទេសប្រេស៊ីលគឺផលិតតាំងពីថ្ងៃទី១១ខែ៩ឆ្នំា២០២១ ហើយបើគិតមកដល់ម៉ោងនេះក្នុងឆ្នាំ២០២៣ វាមានរយៈពេលជិត២ឆ្នាំ។ តើគុណភាពសាច់អ្វីដែលអាចរក្សាទុកបានជិត២ឆ្នំាបែបហ្នឹង វាមិនអាចទេ ទាល់តែវាប្រើសមាសធាតុគីមីណាមួយដើម្បីរក្សាគុណភាពសាច់ឱ្យវានៅរូបរាងជាសាច់ ប៉ុន្តែគុណភាពសាច់ដែលយើងយកមកទទួលទាន យើងមិនដឹងគុណភាពថាវាជាគុណភាពសាច់ឬវាលែងជាសាច់។នេះជាចម្ងល់ដែលយើងត្រូវចោទសួរ»។

លោកបន្តថា ខ្ញុំមិនដឹងថាខាងណាទេដែលអនុញ្ញាតឱ្យមានការនាំចូលសាច់បង្កកប៉ុន្តែយើងត្រូវចោទសួរថាយើងអនុញ្ញាតឱ្យមានការនាំចូលសាច់បង្កកពីខាងក្រៅ តើយើងមានប្រព័ន្ធគ្រប់គ្រងគុណភាពហើយឬនៅ ហើយបើសិនយើងមិនទាន់មានប្រព័ន្ធគ្រប់គ្រងគុណភាពសាច់បង្កកនោះទេ ខ្ញុំគិតថាយើងមិនគួរគម្បីឱ្យមានការនាំចូលមកកម្ពុជាទេ៕ អត្ថបទ៖សារេត

The post ការនាំចូលសាច់បង្កកកំពុងក្លាយជាចម្ងល់ដែលពិបាកក្នុងការស្វែងរកចម្លើយមកអះអាងបញ្ជាក់ពីគុណភាពសាច់ appeared first on .

តាមរយៈលិខិតចំនួន ៤ទំព័ររបស់លោក អូន ព័ន្ធមុនីរ័ត្ន ផ្ញើទៅកាន់លោក វេង សាខុន កាលពីថ្ងៃទី០៨ ខែកុម្ភៈ បានបញ្ជាក់ថា ការរៀបចំយន្តការដេញថ្លៃនាំចូលជ្រូករស់ផ្គត់ផ្គង់មកកម្ពុជា គឺជាឧបករណ៍មួយចាំបាច់សម្រាប់រាជរដ្ឋាភិបាល ដើម្បីរួមចំណែកដោះស្រាយបញ្ហាក្នុងវិស័យជ្រូកជារួម និងមួយផ្នែកទៀត ធានានិរន្តរភាពនៃការចិញ្ចឹមជ្រូករបស់កសិករ និងក្រុមហ៊ុនក្នុងស្រុក ដើម្បីធានាស្ថិរភាពថ្លៃសាច់ជ្រូកក្នុងទីផ្សារ ក្នុងការរស់នៅជាមួយនឹងជំងឺកូវីដ១៩។

លោក អូន ព័ន្ធមុនីរ័ត្ន បន្តថា ការផ្តួចផ្តើមរៀបចំយន្តការដេញថ្លៃនាំចូលជ្រូករស់នេះ មិនមែនផ្អែកលើសំណើរបស់ក្រុមហ៊ុននាំចូលជ្រូកចំនួន០៤ ដូចដែលបានលើកឡើងក្នុងលិខិតរបស់ក្រសួងកសិកម្មនោះទេ។ ផ្ទុយទៅវិញ ការគិតគូររៀបចំយន្តការដេញថ្លៃនេះ គឺផ្អែកលើការសិក្សាស៊ីជម្រៅរបស់ក្រុមការងារនៃអគ្គលេខាធិការដ្ឋាននៃគោលនយោបាយសេដ្ឋកិច្ច និងហិរញ្ញវត្ថុ រួមនឹងការប្រឹក្សាយោបល់ជាមួយក្រុមហ៊ុនឯកជនដែលប្រកបរបរនាំចូលជ្រូករស់។

លោកពន្យល់យ៉ាងដូច្នេះថា សន្តិទានកម្មដែលតម្រូវ ឱ្យមានការរៀបចំយន្តការដេញថ្លៃនាំចូលជ្រូករស់ ថ្លៃសាច់ជ្រូកនៅលើទីផ្សារកម្ពុជា មានការកើនឡើងគួរឱ្យកត់សម្គាល់ពី ១៦,៥០០ រៀលមួយគីឡូ ទៅ ១៧,០០០ រៀលក្នុងមួយគីឡូជាមធ្យម ក្នុងអំឡុងឆ្នាំ២០១៩ និង២០២០ រហូតដល់ ២៥,០០០រៀលក្នុងមួយគីឡូ ទៅ ២៦,០០០រៀលក្នុងមួយគីឡូជាមធ្យម ក្នុងអំឡុងឆ្នាំ២០២១។ លោកថា នេះបានធ្វើឱ្យប៉ះពាល់ធ្ងន់ធ្ងរលើជីវភាពរស់នៅប្រចាំថ្ងៃរបស់ប្រជាជន ជាពិសេសក្នុងបរិបទនៃប្រក្រតីភាពថ្មី ក្នុងការរស់នៅជាមួយនឹងជំងឺកូវីដ-១៩។

លោកសង្កត់ធ្ងន់ថា ការកើនឡើងថ្លៃជ្រូករស់មួយផ្នែក បង្កឡើងដោយកង្វះយន្តការប្រកួតប្រជែងប្រកបដោយតម្លាភាព រវាងក្រុមហ៊ុននាំចូលជ្រូករស់សម្រាប់ផ្គត់ផ្គង់មកប្រទេសកម្ពុជា។ លោកឧបនាយករដ្ឋមន្រ្តីបានអះអាងថា ក្រុមហ៊ុនមួយចំនួនតូច ដែលទទួលបានគោលការណ៍នាំចូលជ្រូករស់ បានលក់ជ្រូករស់ក្នុងថ្លៃមួយខ្ពស់ ពោលគឺពី ១១,០០០ រៀលក្នុងមួយគីឡូជាមធ្យមក្នុងឆ្នាំ២០១៩ និង២០២០ រហូតដល់ ១៤,០០០រៀលក្នុងមួយគីឡូ ជាមធ្យមក្នុងអំឡុងឆ្នាំ២០២១។ ខណៈកន្លងមកក្រុមហ៊ុនបានបញ្ជាទិញពីកសិដ្ឋាននៅប្រទេសថៃ ស្ថិតនៅក្នុងចន្លោះ ៦,៥០០ រៀលក្នុងមួយគីឡូ ទៅ ៧,០០០ រៀលក្នុងមួយគីឡូជាមធ្យម។

លោកបញ្ជាក់បន្ថែមថា ជារួមការរៀបចំយន្តការនៃការដេញថ្លៃនាំចូលជ្រូករស់ គឺដើម្បីធានាឱ្យបាននូវការផ្គត់ផ្គង់ជ្រូករស់ពីការនាំចូល ក្នុងថ្លៃមួយប្រកបដោយ ភាពប្រកួតប្រជែង ដើម្បីរក្សាស្ថិរភាពថ្លៃជ្រូករស់ និងថ្លៃលក់សាច់ជ្រូកនៅលើទីផ្សារក្នុងកម្រិតមួយសមរម្យ។

យ៉ាងណា បើតាមឧបនាយករដ្ឋមន្ត្រី អូន ព័ន្ធមុនីរ័ត្ន ក្រសួងសេដ្ឋកិច្ច បានបញ្ចប់សេចក្តីព្រាងបឋមនៃយន្តការដេញថ្លៃនាំចូលជ្រូករស់ផ្គត់ផ្គង់មកកម្ពុជា កម្រិតបច្ចេកទេសរួចហើយ ដោយមានការចូលរួមពីអគ្គនាយកដ្ឋានពាក់ព័ន្ធចំណុះក្រសួងសេដ្ឋកិច្ច និងការផ្តល់ធាតុចូលពីក្រសួងពាណិជ្ជកម្ម ក្នុងកិច្ចប្រជុំអន្តរក្រសួង។ ប៉ុន្តែក្រសួងកសិកម្ម មិនបានចាត់តំណាងចូលរួមតាមការអហៅរបស់លោកអូនព័ន្ធមុនីរ័ត្ន នាពេលកន្លងមកឡើយ។

ទោះជាបែបនេះក្តី លោក អូន ព័ន្ធមុនីរ័ត្ន បានស្នើឲ្យរដ្ឋមន្ត្រីក្រសួងកសិកម្ម ពិនិត្យលទ្ធភាពឯកភាពលើពីរចំណុចសំខាន់ៗ ទីមួយ ឯកភាពលើការផ្តួចផ្តើម ការរៀបចំយន្តការដេញថ្លៃនាំចូលជ្រូករស់ផ្គត់ផ្គង់ មកប្រទេសកម្ពុជា ដោយយន្តការនេះនឹងជួយលើកកម្ពស់ការប្រកួតប្រជែង ប្រកបដោយតម្លាភាពក្នុងអាជីវកម្មនាំចូលជ្រូករស់ និងទីពីរ ចាត់តំណាងក្រសួងកសិកម្ម ចូលរួមផ្តល់យោបល់ និងធាតុចូលបន្ថែម ដើម្បីកែសម្រួលខ្លឹមសារនៃសេចក្តីព្រាងបឋម នៃយន្តការដេញថ្លៃនាំចូលជ្រូករស់ផ្គត់ផ្គង់មកកម្ពុជា៕

The post រដ្ឋមន្រ្តីក្រសួងសេដ្ឋកិច្ច ស្នើឲ្យមានតម្លាភាពក្នុងការនាំចូលជ្រូក appeared first on .