វៀតណាម វ៉ាដាច់ឈីលី ក្លាយជាប្រទេសនាំចេញបន្លែ ផ្លែឈើធំបំផុតទីពីរទៅកាន់ចិន

ឧកញ៉ាសាមញ្ញ — Tue, 12 Mar 2024 00:55:00 +0000

វៀតណាម បានវ៉ាដាច់ប្រទេសឈីលី ក្នុងនាមជាប្រទេសនាំចេញបន្លែ ផ្លែឈើធំបំផុតទីពីរ ទៅកាន់ប្រទេសចិន នៅក្នុងឆ្នាំ២០២៣ កន្លងទៅ ដោយសារតែការកើនឡើងខ្លាំងចំពោះការនាំចេញផ្លែទុរេន។ នេះបើតាមការចុះផ្សាយពីសារព័ត៌មាន VN Express។

ការនាំចូលបន្លែ ផ្លែឈើសរុបរបស់ប្រទេសចិន បានកើនឡើងដល់ចំនួនទឹកប្រាក់ ២៤,៤ពាន់លានដុល្លារ កាលពីឆ្នាំមុន ស្របពេលដែលប្រទេសថៃ នៅតែរក្សាការនាំមុខរបស់ខ្លួន សម្រាប់ចំណាត់ថ្នាក់លេខ១ ដោយទទួលបានប្រាក់ចំណូលពីការនាំចេញបន្លែ ផ្លែឈើ ទៅកាន់ប្រទេសចិន ក្នុងចំនួន ៨,៦ពាន់លានដុល្លារ។

ដោយឡែកប្រទេសវៀតណាម ដែលទទួលបានប្រាក់ចំណូលសរុប ៣,៤ពាន់លានដុល្លារ បានមើលឃើញពីចំណែកទីផ្សារនាំចេញរបស់ខ្លួនទៅកាន់ប្រទេសចិន កើនឡើងដល់ ១៤% ក្នុងឆ្នាំ២០២៣ ដែលបានធ្វើឲ្យប្រទេសនេះ វ៉ាដាច់ឈីលី ដែលកាន់កាប់តំណែងលេខ២ អស់រយ:ពេលជាយូរមកហើយនោះ។

យ៉ាងណាមិញ លោក Dang Phuc Nguyen អគ្គលេខាធិការនៃសមាគមន៍ផ្លែឈើ និងបន្លែវៀតណាម បានមានប្រសាសន៍ថា ក្រៅពីការកើនឡើងគួរឲ្យកត់សម្គាល់នៃការនាំចេញផ្លែទុរេនរបស់ប្រទេសចិន ការកើនឡើងនៃការនាំចូលផ្លែឈើ និងបន្លែកែច្នៃពីប្រទេសវៀតណាម ក៏ជាកត្តាចម្បងផងដែរ។

ជម្រាបជូនផងដែរថា ក្នុងអំឡុងដំណើរទស្សនកិច្ចនាពេលថ្មីៗនេះរបស់ប្រធានាធិបតីចិន លោក ស៊ី ជិនពីង ទៅកាន់ប្រទេសវៀតណាម ភាគីចិនបានប្រកាសពីផែនការបើកទីផ្សារកាន់តែទូលំទូលាយសម្រាប់ផលិតផលកសិកម្មរបស់វៀតណាមបន្ថែមទៀត រួមមាន ដូងស្រស់ ផលិតផលផ្លែឈើបង្កក ផ្លែក្រូច ផ្លែបឺរ និងផ្លែប៉ោម ជាដើម៕

បញ្ជាក់បន្ថែមទៀតផងដែរថា ការនាំចេញផ្លែឈើ និងបន្លែសរុបរបស់វៀតណាម ក្នុងឆ្នាំ២០២៣ មានតម្លៃ ៥,៦ពាន់លានដុល្លារ ពោលគឺកើនឡើង ៨០% បើធៀបនឹងឆ្នាំ២០២២ ខណ:ប្រទេសចិនបានបន្តជាទីផ្សារធំបំផុត ដែលរួមចំណែកដល់ទៅ ៦០% នៃតួលេខនោះ៕

The post វៀតណាម វ៉ាដាច់ឈីលី ក្លាយជាប្រទេសនាំចេញបន្លែ ផ្លែឈើធំបំផុតទីពីរទៅកាន់ចិន appeared first on .

ថៃ រំពឹងកើបលុយជាង ៨,៧ពាន់លានដុល្លារ ពីការនាំចេញផ្លែឈើ នៅឆ្នាំនេះ

ឧកញ៉ាសាមញ្ញ — Thu, 04 Jan 2024 10:55:00 +0000

ក្រសួងពាណិជ្ជកម្មរបស់ប្រទេសថៃ បានបង្ហាញក្តីរំពឹងទុកខ្ពស់ថានឹងទទួលបានប្រាក់ចំណូលដល់ទៅ ៣០០ពាន់លានបាត (ជាង ៨,៧ពាន់លានដុល្លារ) ពីការនាំចេញផ្លែឈើស្រស់ និងផ្លៃឈើកែច្នៃរបស់ខ្លួន នៅឆ្នាំ ២០២៤ នេះ បន្ទាប់ពីបានមើលឃើញថាកំពុងមានតម្រូវការដ៏រឹងមាំ។ នេះបើតាមការចុះផ្សាយពីកាសែត Bangkok Post។

លោក Phumtham Wechayachai រដ្ឋមន្ត្រីក្រសួងពាណិជ្ជកម្ម ដែលបានដឹកនាំកិច្ចប្រជុំរួមជាមួយមន្ត្រីក្រសួង និងអ្នកតំណាងទាក់ទងនឹងការនាំចេញផ្លែឈើ ក្នុងពេលថ្មីៗនេះ បានបង្ហាញសុទិដ្ឋិនិយមចំពោះការនាំចេញផ្លែឈើរបស់ខ្លួន ដោយរំពឹងថានឹងកើនឡើង ៤% ទាំងបរិមាណ និងតម្លៃសម្រាប់ការនាំចេញផ្លែឈើស្រស់ និងកែច្នៃ។

គួរឲ្យដឹងថាការនាំចេញផ្លែឈើស្រស់តែមួយ ត្រូវបានរំពឹងថានឹងកើនឡើង ៤% ក្នុងបរិមាណដល់ចំនួន ២,១ លានតោន ជាមួយនឹងតម្លៃដែលរំពឹងទុកថានឹងកើនឡើង ៥% ដល់ ១៧៥ពាន់លានបាត។

ចំពោះទីផ្សារសំខាន់ៗដែលថៃ បាននាំចេញផ្លែឈើរបស់ខ្លួនទៅច្រើនបំផុត គឺប្រទេសចិន ដែលទទួលបាន ៧៥% នៃការនាំចេញសរុប បន្ទាប់មកគឺសហរដ្ឋអាមេរិក ម៉ាឡេស៊ី និងហុងកុង។

យោងតាមទិន្នន័យរបស់ក្រសួង បានបង្ហាញឲ្យដឹងទៀតថាប្រទេសថៃ បាននាំចេញការនាំចេញផ្លែឈើស្រស់ និងកែច្នៃមានតម្លៃសរុប ២៨៤ពាន់លានបាត ក្នុងរយៈពេល ១១ខែដំបូងនៃឆ្នាំ ២០២៣ ជាមួយនឹងផ្លែឈើស្រស់ផ្តល់ប្រាក់ចំណូល ១៧៨ពាន់លានបាត ខណ:ផ្លែឈើកក និងស្ងួតរកបានចំណូល ៥០,១ពាន់លានបាត៕

The post ថៃ រំពឹងកើបលុយជាង ៨,៧ពាន់លានដុល្លារ ពីការនាំចេញផ្លែឈើ នៅឆ្នាំនេះ appeared first on .