នេសាទ

ឥណ្ឌូនេស៊ី នាំចេញផលិតផលនេសាទតម្លៃជាង ១លានដុល្លារ ទៅចិនជាលើកដំបូង

ឧកញ៉ាសាមញ្ញ — Sun, 12 Nov 2023 08:55:00 +0000

រដ្ឋមន្ត្រីក្រសួងកិច្ចការសមុទ្រ និងនេសាទរបស់ប្រទេសឥណ្ឌូនេស៊ី លោក Sakti Wahyu Trenggono កាលពីថ្ងៃទី៩ ខែវិច្ឆិកាកន្លងទៅ បាននិយាយថា នេះជាលើកដំបូងហើយដែលប្រទេសរបស់ខ្លួន បាននាំចេញផលិតផលនេសាទចំនួន ២៤៣ តោន ក្នុងតម្លៃជាង ១លានដុល្លារ ទៅកាន់ប្រទេសចិន។ នេះបើតាមការចុះផ្សាយពីសារព័ត៌មាន VNA។

លោក Sakti និយាយទៀតថា ក្រសួងទើបតែទទួលបានសិទ្ធិក្នុងការនាំចេញផលិតផលនេសាទរបស់ក្រុមហ៊ុន PT Menara Bahari Nusantara ជាលើកដំបូង ទៅកាន់ប្រទេសចិន ដែលត្រូវបានចាត់ទុកថាជាទីផ្សារអាហារសមុទ្រធំទីពីររបស់ពិភពលោក។

រដ្ឋមន្ត្រីរូបនេះ បានបន្ថែមទៀតថា ទំនិញដែលបាននាំចេញទៅកាន់ប្រទេសចិន រួមមាន មឹក ចំនួន ១៨៩ តោន ត្រីធូណា ២៧ តោន និងត្រីប្រភេទផ្សេងទៀតចំនួន ២៧ តោន ដែលមានតម្លៃសរុប ១៨,៧ពាន់លានរូពី (១,២លានដុល្លារ)។

ជម្រាបជូនផងដែរថា ចិនគឺជាទីផ្សារដ៏មានសក្តានុពលខ្លាំងបំផុត សម្រាប់ផលិតផលនេសាទ ខណ:ការនាំចេញជាលើកដំបូងរបស់ឥណ្ឌូនេស៊ី គឺជាការចាប់ផ្តើមអនាគតនៃកិច្ចសហប្រតិបត្តិការកាន់តែខ្លាំង រវាងប្រទេសទាំងពីរ ក្នុងវិស័យនេសាទ៕

The post ឥណ្ឌូនេស៊ី នាំចេញផលិតផលនេសាទតម្លៃជាង ១លានដុល្លារ ទៅចិនជាលើកដំបូង appeared first on .

មហាសេដ្ឋី Jack Ma ចាប់ផ្ដើមបោះទុន លើវិស័យនេសាទ និងកសិកម្ម

ឧកញ៉ាសំពៅ — Wed, 02 Aug 2023 04:42:11 +0000

យោងតាមការចុះផ្សាយពីសារព័ត៌មាន LT បានបង្ហាញឲ្យដឹងថា មហាសេដ្ឋីចិន Jack Ma បានចាប់ផ្ដើមបណ្ដាក់ទុន ជាមួយក្រុមហ៊ុនបង្កើតថ្មី ដែលរកស៊ីនៅលើវិស័យនេសាទ និងកសិកម្មនៅប្រទេសចិន។

ក្រុមហ៊ុនបង្កើតថ្មី ដែលទទួលបានការវិនិយោគពីសហស្ថាបនិកក្រុមហ៊ុន Alibaba គឺមានឈ្មោះថា 1.8 Meters Marine Technology (Zhejiang) Co ដែលមានទីតាំងនៅទីក្រុង Hangzhou ខេត្ត Zhejiang ជាមួយនឹងទំហំទឹកប្រាក់វិនិយោគសរុប ១១០លានយ៉ន់ ឬប្រមាណ ១៥លានដុល្លារ។

ក្រុមហ៊ុនមួយនេះនឹងចាប់ផ្ដើមដំណើរការ ដោយការលក់ផលិតផលកសិកម្ម ទាំងការបោះដុំ និងលក់រាយ ក៏ដូចជាអភិវឌ្ឍន៍ប្រព័ន្ធថាមពលខ្យល់តាមឆ្នេរសមុទ្រផងដែរ។

ជម្រាបបន្ថែមថា Jack Ma បានចាប់អារម្មណ៍ជាមួយនឹងគម្រោងនៃក្រុមហ៊ុនបង្កើតថ្មីនេះ ដោយសារមួយរយៈកាលចុងក្រោយ មហាសេដ្ឋីចិនរូបនេះបានបង្ហាញចំណាប់អារម្មណ៍ខ្លាំង ជាមួយនឹងវិស័យកសិកម្ម និងចំណីអាហារ ពោលអំឡុងពេលលោករស់នៅប្រទេសជប៉ុន Jack Ma បានរៀនសូត្រពីការនេសាទ និងការចិញ្ចឹមត្រីធូណា ខណៈពេលបំពេញទស្សនកិច្ចនៅប្រទេសថៃ លោកក៏បានទៅទស្សនាកសិដ្ឋានចិញ្ចឹមបង្គាថែមទៀត៕

The post មហាសេដ្ឋី Jack Ma ចាប់ផ្ដើមបោះទុន លើវិស័យនេសាទ និងកសិកម្ម appeared first on .

ត្រឹមតែ៥ថ្ងៃសោះ៖ មានប្រជាពលរដ្ឋរហូត ៨ពាន់នាក់ បានទៅធ្វើប្រហុក នៅទីតាំងទាំង២នេះ

រ៉េត សុកធា — Wed, 04 Jan 2023 02:54:21 +0000

ក្រសួងកសិកម្ម រុក្ខាប្រមាញ់ និងនេសាទ បានប្រកាសឱ្យដឹងថា ផលនេសាទត្រី នៅដាយត្រី នៅរាជធានីភ្នំពេញ និងខេត្តកណ្តាល នៅក្នុងឆ្នាំ២០២២-២០២៣ គិតចាប់ពីថ្ងៃទី២៩ធ្នូ ដល់ថ្ងៃទី២ ខែមករា សម្រេចបានបរិមាណ ១៤៨១តោន។ ចំណែកប្រជាពលរដ្ឋ ដែលអញ្ជើញមកធ្វើប្រហុក ផ្អក ត្រីឆ្អើរ និងទឹកត្រី សម្រាប់ប្រើប្រាស់ក្នុងគ្រួសារ និងលក់បន្តនៅទីតាំងដាយត្រីទាំង២នេះ ប្រមាណ ៨០០០នាក់ផងដែរ។

ក្រសួងកសិកម្ម ប្រកាសថា បរិមាណ១៤៨១តោននេះ គឺកើនឡើងប្រមាណ ៤០ភាគរយ បើធៀបទៅនឹងផលនេសាទដាយត្រី នារដូវនេសាទ ឆ្នាំ២០២១-២០២២ ដែលទទួលបាន ចំនួន ៨៩០តោន។

ក្នុងនោះ ប្រភេទត្រី ដែលនេសាទបានពីដាយត្រី ក្នុងរដូវនេសាទនេះ រួមមាន៖ ត្រីរៀល ៤៥% ស្លឹកឫស្សី ៣០% ខ្នងវែង ៥% ត្រីកញ្ជ្រូក ៣% ត្រីច្រកែង ២% ត្រីឈ្វាត ៥% និងត្រីចម្រុះ ១០%។ ចំណែកប្រជាពលរដ្ឋ ដែលអញ្ជើញមកធ្វើប្រហុក ផ្អក ត្រីឆ្អើរ និងទឹកត្រី សម្រាប់ប្រើប្រាស់ក្នុងគ្រួសារ និងលក់បន្ត មានចំនួនប្រមាណ ៨០០០នាក់ ក្នុងនោះ មានប្រជាពលរដ្ឋប្រមាណ ៩០% មកពីបណ្តាខេត្តផ្សេងៗ។

ក្រសួងកសិកម្ម រុក្ខាប្រមាញ់ និងនេសាទ បានប្រកាសថា កំណើនត្រី ដែលចាប់បាននៅក្នុងគន្លងដាយនេះ ឆ្លុះបញ្ចាំងឱ្យឃើញថា បរិមាណត្រីទឹកសាប នៅក្នុងធម្មជាតិមានការកើនឡើងជាងមុន ដែលជាលទ្ធផលនៃការទប់ស្កាត់ប្រកបដោយប្រសិទ្ធភាពនូវបទល្មើសក្នុងបឹងទន្លេសាប ពីសំណាក់មន្ត្រីជលផល និងកងកម្លាំងមានសមត្ថកិច្ចចម្រុះទាំងអស់ កាលពីរដូវត្រីពងក្នុងអំឡុងឆ្នាំ២០២២ កន្លងទៅ។

ក្រសួងកសិកម្ម រុក្ខាប្រមាញ់ និងនេសាទ ប្រកាសថា នឹងបន្តរកតុល្យភាពរវាងអភិរក្ស និងអភិវឌ្ឍ មិនត្រឹមតែនៅបឹងទន្លេសាបប៉ុណ្ណោះទេ ប៉ុន្តែនៅទន្លេមេគង្គលើផងដែរ។ ទន្លេសាប ជាកន្លែងត្រីធំធាត់ រីឯទន្លេមេគង្គលើ ជាកន្លែងត្រីបន្តពូជ និងជាកន្លែងសត្វផ្សោតរស់នៅ។ ការរក្សាតំបន់ទាំងពីរនេះ កុំឱ្យមានការនេសាទហួសកម្រិត នឹងនាំមកនូវភោគផលត្រីពោរពេញផ្ទៃប្រទេស៕

អត្ថបទ៖ រង្សី

The post ត្រឹមតែ៥ថ្ងៃសោះ៖ មានប្រជាពលរដ្ឋរហូត ៨ពាន់នាក់ បានទៅធ្វើប្រហុក នៅទីតាំងទាំង២នេះ appeared first on .