នំស្រួយ លីលី

កូនប្រុសពៅសម្តេច សុខ អាន ចូលស្តីដណ្តឹងកូនស្រីឧកញ៉ាម្នាក់!

ឧកញ៉ាកោះក្របី — Thu, 27 Jul 2023 11:41:00 +0000

លោក សុខ សង្វារ កូនប្រុសពៅរបស់សម្ដេចវិបុលបញ្ញា សុខ អាន អតីតឧបនាយករដ្ឋមន្ត្រី និងរដ្ឋមន្ត្រីទទួលបន្ទុកទីស្ដីការគណៈរដ្ឋមន្ត្រី បានចូលស្តីដណ្តឹងកញ្ញា អ៊ឹង ឈីវលី ហៅថា លីលី ដែលជាកូនស្រីពៅ លោកជំទាវឧកញ៉ា កែវ មុំ ម្ចាស់ក្រុមហ៊៊ុនផលិតនំស្រួយលីលី នៅថ្ងៃទី២៧ ខែកក្កដា ឆ្នាំ២០២៣នេះ។

ពិធីចូលចែចាវស្តីដណ្តឹងរវាងក្រុមឥស្សរសជន និងអ្នកជំនួញល្បីឈ្មោះទាំង២ធ្វើឡើងក្រោមវត្តមានសម្តេចកិត្តិសង្គហបណ្ឌិត ម៉ែន សំអនឧបនាយករដ្ឋមន្រ្តី រដ្ឋមន្រ្តីក្រសួងទំនាក់ទំនងព្រឹទ្ធសភា-រដ្ឋសភា និងអធិការកិច្ច លោកជំទាវ អាន្នី សុខអាន ជាមាតាខាងកូនប្រុស លោកជំទាវឧកញ៉ា កែវ មុំ ជាមាតាខាងកូនស្រី អ្នកឧកញ៉ា សំ អាង អ្នកឧកញ៉ា ឈុន លាង ព្រមទាំងញាតិមិត្តជិតខាងជាច្រើនរូបបានអញ្ជើញផ្តល់កិត្តិយសក្នុងពីធីចែចាវស្តីដណ្តឹងតាមប្រពៃណីខ្មែរនៅពេលនេះ។

លោក សុខ សង្វារ ជាកូនពៅរបស់សម្តេច សុខ អាន ក្នុងចំណោមកូនទាំង៥នាក់ បច្ចុប្បន្នអនុរដ្ឋលេខាធិការក្រសួងទេសចរណ៍ ចំណែក កញ្ញា អ៊ឹង ឈីវលី ជាអគ្គនាយិកា (CEO) របស់ក្រុមហ៊ុនផលិតនំស្រួយ លីលី គឺជាបញ្ញវន្តខ្មែរ ដែលបានបញ្ចប់ការសិក្សាកម្រិតជាន់ខ្ពស់ មកពីក្រៅប្រទេសដូចគ្នា។

លោក សុខ សង្វារ មានវ័យ ៣៦ឆ្នាំ បញ្ចប់ថ្នាក់បរិញ្ញាបត្រផ្នែកបដិសណ្ឋារកិច្ច និងគ្រប់គ្រងទេសចរណ៍ នៅវិទ្យាស្ថានឧត្តមសិក្សា គ្លីយុង (GLION) ទីក្រុងប៊ូឡល ប្រទេសស្វីស នៅឆ្នាំ២០០៨។ នៅឆ្នាំ២០១៣ លោកបន្តការសិក្សាថ្នាក់បរិញ្ញាបត្រជាន់ខ្ពស់ ជំនាញសិល្បៈសេរីនៃបេតិកភណ្ឌវប្បធម៌ និងបរិស្ថាន នៅសាកលវិទ្យាល័យជាតិ ប្រទេសអូស្ត្រាលី។

លោក សុខ សង្វារ បានវិលត្រឡប់មកប្រទេសកម្ពុជាវិញ នៅឆ្នាំ២០០៨ និងត្រូវបានរាជរដ្ឋាភិបាលផ្តល់សេចក្តីទុកចិត្តតែងតែងមុខតំណែងជាបន្តបន្ទាប់ ដូចជា ឆ្នាំ២០០៩-២០១៣ ជាអនុប្រធាននាយកដ្ឋានឧស្សាហកម្មទេសចរណ៍នៃក្រសួងទេសចរណ៍, ឆ្នាំ២០១៣-២០២០ ជាប្រធានក្រុមការងារអនុវត្តន៍ផែនការគ្រប់គ្រងទេសចរណ៍អង្គរ, ឆ្នាំ២០១៥-២០២០ ជាអគ្គនាយករង អាជ្ញាធរជាតិអប្សរា និងនៅឆ្នាំ២០២០ ដល់បច្ចុប្បន្ន ជាអនុរដ្ឋលេខាធិការ នៃក្រសួងទេសចរណ៍ ទទួលបន្ទុកការងារសិក្សាទីផ្សារ និងផ្សព្វផ្សាយទេចរណ៍ក្រៅប្រទេស។

ដោយឡែក កូនស្រីឧកញ៉ា កែវ មុំ គឺ កញ្ញា លីលី បានបញ្ចប់ការសិក្សាថ្នាក់ទី១២ នៅប្រទេសកាណាដា ហើយកញ្ញាបានបន្តសិក្សាចប់បរិញ្ញាបត្រ លើជំនាញអាជីវកម្ម ពីសហរដ្ឋអាមេរិក និងបានបញ្ចប់ថ្នាក់បរិញ្ញាបត្រជាន់ខ្ពស់ លើជំនាញគ្រប់គ្រងអាជីវកម្ម ពីប្រទេសអង់គ្លេស។ កញ្ញា លីលី បានឡើងកាន់តំណែងជាអគ្គនាយិកាក្រុមហ៊ុន ផលិតនំស្រួយ លីលី ចាប់តាំងពីខែឧសភា ឆ្នាំ២០២០ រហូតមកដល់បច្ចុប្បន្ន៕

The post កូនប្រុសពៅសម្តេច សុខ អាន ចូលស្តីដណ្តឹងកូនស្រីឧកញ៉ាម្នាក់! appeared first on .

ឧកញ៉ា កែវ មុំ ផ្តល់ឱកាសដល់ជនពិការ អាចចូលធ្វើការនៅក្រុមហ៊ុនផលិតនំស្រួយ លីលី

ឧកញ៉ាដែនដី — Tue, 09 May 2023 06:29:16 +0000

ឧកញ៉ា កែវ មុំ ស្ថាបនិក និងជាប្រធានក្រុមប្រឹក្សាភិបាល ក្រុមហ៊ុន លីលី ហ្វ៊ូដ អ៊ិនដាសទ្រី ខូអិលធីឌី បានឱ្យដឹងថា ក្រុមហ៊ុនរបស់លោកជំទាវ បានលើកទឹកចិត្ត និងបើកផ្តល់ឱកាសដល់ជនមានពិការភាព និងជនមិនចេះអក្សរ អាចចូលបម្រើការងារនៅក្រុមហ៊ុនផលិតនំស្រួយ លីលី បាន ហើយអាចទទួលបានប្រាក់ខែ ស្មើនឹងបុគ្គលិកទូទៅដែរ។

លោកជំទាវឧកញ៉ា កែវ មុំ ប្រធានសមាគមសហគ្រិនស្ត្រីកម្ពុជា បានបង្ហើបប្រាប់ដល់ ឧកញ៉ា ញូស៍ ក្នុងបទសម្ភាសន៍មួយ កាលពីពេលថ្មីៗកន្លងទៅថា ក្រុមហ៊ុនផលិតនំស្រួយ លីលី តែងតែជួយគាំទ្រ និងផ្តល់ឱកាសការងារដល់បុគ្គលិក ជាពិសេសជនមានពិការភាព ជនមិនចេះអក្សរ ឬអនក្ខរភាព ហើយក្រុមហ៊ុនតែងតែជួយបណ្តុះបណ្តាលជូនពួកគាត់បន្ថែម។

“ម្យ៉ាងទៀត យើងមិនតម្រូវឱ្យពួកគាត់ចេះអក្សរទាំងអស់នោះទេ គ្រាន់តែត្រូវការកម្លាំងរបស់ពួកគាត់ ដើម្បីធ្វើការច្រកនំ ផលិតនំ ដែលជាការងារស្រាលៗសម្រាប់ពួកគាត់។ ចំពោះជនពិការ គឺយើងត្រូវការតែដៃរបស់គាត់ ដើម្បីច្រកនំ និងជាការងារស្រាលបំផុត ដូច្នេះបើគាត់ពិការជើង មិនអាចដើរបាន ក៏យើងផ្តល់ឱកាសការងារឱ្យគាត់ធ្វើបានដែរ ហើយប្រាក់បៀវត្ស យើងផ្តល់ឱ្យពួកគាត់ស្មើនឹងបុគ្គលិកដទៃទៀតដូចគ្នា ដោយសារយើងមានការលើកទឹកចិត្ត និងផ្តល់ឱកាសជូនពួកគាត់”។ ឧកញ៉ា កែវ មុំ បានបន្ថែម។

លោកជំទាវឧកញ៉ា កែវ មុំ បានបញ្ជាក់បន្ថែមថា មកដល់បច្ចុប្បន្ននេះ ក្រុមហ៊ុន លីលី មានបុគ្គលិកពិការចំនួន ៦នាក់ ក្នុងនោះបុគ្គលិកពិការជើង ដើរមិនរួចតែម្តងមានចំនួន ៣នាក់ និងបុគ្គលិកពិការជើងម្ខាងហើយមានជើងសិប្បនិមិត្តម្ខាងអាចដើរបាន មានចំនួន ៣នាក់ទៀត។ លោកជំទាវ បន្តថា សម្រាប់ជនពិការជើងដទៃទៀត ដែលមានបំណងចង់ចូលបម្រើការងារនៅក្រុមហ៊ុន លីលី លោកជំទាវនឹងបន្តស្វាគមន៍ និងផ្តល់ឱកាសជូនជានិច្ច។

គួរបញ្ជាក់ថា ក្រុមហ៊ុនផលិតនំស្រួយ លីលី ដែលមានរោងចក្រ ស្ថិតនៅភូមិក្បាលដំរី សង្កាត់កាកាប ខណ្ឌពោធិ៍សែនជ័យ រាជធានីភ្នំពេញ បានចាប់ផ្តើមដំណើរការ ចាប់ពីខែឧសភា ឆ្នាំ២០១២។ ក្រុមហ៊ុនផលិតនំស្រួយ លីលី មិនត្រឹមជាសហគ្រាសផលិត ដើម្បីផ្គត់ផ្គង់ ក្នុងស្រុកប៉ុណ្ណោះទេ ថែមទាំងក្លាយជាក្រុមហ៊ុនខ្មែរដំបូងគេ ដែលមានសមត្ថភាព លក្ខណៈសម្បត្តិគ្រប់គ្រាន់ ក្នុងការផលិត ជាផលិតផលសម្រេចចំណីអាហារ នាំចេញទៅកាន់ទីផ្សារអន្តរជាតិ ដូចជា សហរដ្ឋអាមេរិក កាណាដា អូស្ត្រាលី អ៊ីតាលី មីយ៉ាន់ម៉ា វៀតណាម ចិន ម៉ាឡេស៊ីកូរ៉េខាងត្បូង និងប្រទេសផ្សេងៗទៀតផងដែរ៕

The post ឧកញ៉ា កែវ មុំ ផ្តល់ឱកាសដល់ជនពិការ អាចចូលធ្វើការនៅក្រុមហ៊ុនផលិតនំស្រួយ លីលី appeared first on .

មកដឹងប្រវត្តិសិក្សារបស់កូនស្រីឧកញ៉ា កែវ មុំ ដែលបច្ចុប្បន្នជា CEO ក្រុមហ៊ុន នំស្រួយលីលី

ឧកញ៉ាដែនដី — Thu, 20 Apr 2023 03:15:00 +0000

កូនស្រីជាទីស្រឡាញ់របស់ឧកញ៉ា កែវ មុំ មានឈ្មោះថា «អ៊ឹង ឈីវលី» ហៅថា «លីលី» ដែលបច្ចុប្បន្នជាអគ្គនាយិកា (CEO) របស់ក្រុមហ៊ុនផលិតនំស្រួយ លីលី មានប្រវត្តិសិក្សាមិនធម្មតានោះឡើយ ដោយបានបញ្ចប់ការសិក្សាថ្នាក់បរិញ្ញាបត្រ មកពីសហរដ្ឋអាមេរិក និងចប់បរិញ្ញាបត្រជាន់ខ្ពស់ មកពីប្រទេសអង់គ្លេស។

ឧកញ៉ា កែវ មុំ ប្រធានសមាគមសហគ្រិនស្ត្រីកម្ពុជា បានបង្ហើបប្រាប់ដល់ ឧកញ៉ា ញូស៍ ក្នុងបទសម្ភាសន៍មួយ កាលពីពេលថ្មីៗកន្លងទៅថា កូនស្រី លីលី របស់លោកស្រី បានបញ្ចប់ការសិក្សាកម្រិតមធ្យមសិក្សាបឋមភូមិ (ឌីប្លូម) នៅប្រទេសកម្ពុជា និងបានបន្តការសិក្សានៅប្រទេសកាណាដា រហូតដល់ចប់ថ្នាក់ទី១២។ លោកស្រី បានបន្តថា លីលី បានបន្តសិក្សាចប់បរិញ្ញាបត្រ លើជំនាញអាជីវកម្ម ពីសហរដ្ឋអាមេរិក និងបានបញ្ចប់ថ្នាក់បរិញ្ញាបត្រជាន់ខ្ពស់ លើជំនាញគ្រប់គ្រងអាជីវកម្ម ពីប្រទេសអង់គ្លេស។

លោកស្រី បានបង្ហើបឱ្យដឹងបន្ថែមថា កញ្ញា លីលី ចេះ៣ភាសា គឺភាសាខ្មែរ ភាសាអង់គ្លេស និងភាសាចិន យ៉ាងស្ទាត់ជំនាញ ព្រមទាំងភាសាមួយចំនួន តិចតួចទៀត។ អ្វីដែលធ្វើឱ្យលោកស្រី មានមោទនភាពលើកូនស្រី លីលី គឺដោយសារ លីលី ជាមនុស្សម្នាក់រៀនឆ្លាត ឆាប់ចាប់បានលឿន និងអាចវិភាគលើអ្វីបានស៊ីជម្រៅខ្លាំង ដូចជាការមើលអត្តចរិកមនុស្សជាដើម។ លោកស្រី បន្ថែមថា កញ្ញា លីលី ក៏ពូកែខាងចិត្តវិទ្យាដែរ ដូច្នេះបុគ្គលិកថ្នាក់ក្រោម តែងតែគោរពស្រឡាញ់កញ្ញា។

គួររំឭកថា ក្នុងឱកាសខួបកំណើតកញ្ញា លីលី កាលពីខែសីហា ឆ្នាំ២០២២ ឧកញ៉ា កែវ មុំ បានឱ្យដឹងថា កូនស្រីទី២ របស់លោកស្រីរូបនេះ បានឡើងកាន់តំណែងជាអគ្គនាយិកាក្រុមហ៊ុន (CEO) រយៈពេល ២ឆ្នាំមកហើយ គិតចាប់តាំងពីខែឧសភា ឆ្នាំ២០២០។ លោកស្រីមានកូន៣នាក់ ក្នុងនោះប្រុស២នាក់ និងស្រី១នាក់ ខណៈដែលកូនប្រុសទាំងពីរ ក៏កំពុងតែមានមុខជំនួញក្នុងដៃរៀងៗខ្លួន។

ឧកញ៉ា កែវ មុំ បានបញ្ជាក់ឱ្យដឹងផងដែរថា មូលហេតុដាក់ឈ្មោះថា ក្រុមហ៊ុន នំស្រួយលីលី គឺដំបូងឡើយលោកស្រីបានរកនឹកថា តើគួរដាក់ឈ្មោះអ្វី ឱ្យមានការទាក់ទាញ និងធ្វើឱ្យគេឆាប់ចាំ ហើយចុងក្រោយលោកស្រី ក៏សម្រេចដាក់ឈ្មោះកូនស្រីតែម្តងគឺឈ្មោះ លីលី ដើម្បីងាយស្រួលហៅ ហើយភាសាចិន ក៏មានអត្ថន័យល្អ ចម្រុងចម្រើន ឬរីកចម្រើនទៀតផង។

គួរបញ្ជាក់ថា ក្រុមហ៊ុនផលិតនំស្រួយ លីលី ដែលមានរោងចក្រ ស្ថិតនៅភូមិក្បាលដំរី សង្កាត់កាកាប ខណ្ឌពោធិ៍សែនជ័យ រាជធានីភ្នំពេញ បានចាប់ផ្តើមដំណើរការ ចាប់ពីខែឧសភា ឆ្នាំ២០១២។ ក្រុមហ៊ុនផលិតនំស្រួយ លីលី មិនត្រឹមជាសហគ្រាសផលិត ដើម្បីផ្គត់ផ្គង់ ក្នុងស្រុកប៉ុណ្ណោះទេ ថែមទាំងក្លាយជាក្រុមហ៊ុនខ្មែរដំបូងគេ ដែលមានសមត្ថភាព លក្ខណៈសម្បត្តិគ្រប់គ្រាន់ ក្នុងការផលិត ជាផលិតផលសម្រេចចំណីអាហារ នាំចេញទៅកាន់ទីផ្សារអន្តរជាតិ ដូចជា សហរដ្ឋអាមេរិក កាណាដា អូស្ត្រាលី អ៊ីតាលី មីយ៉ាន់ម៉ា វៀតណាម ចិន ម៉ាឡេស៊ី និងប្រទេសកូរ៉េខាងត្បូង ផងដែរ៕

The post មកដឹងប្រវត្តិសិក្សារបស់កូនស្រីឧកញ៉ា កែវ មុំ ដែលបច្ចុប្បន្នជា CEO ក្រុមហ៊ុន នំស្រួយលីលី appeared first on .

ក្រុមហ៊ុន លីលី ទទួលបានពានរង្វាន់ឯកក្នុងអាជីវកម្មបរិយាប័ន្នអាស៊ានឆ្នាំ២០២២ ដំណាងកម្ពុជា

ឧកញ៉ាកោះក្របី — Thu, 27 Oct 2022 03:09:53 +0000

អ្នកស្រីឧកញ៉ា កែវ មុំ ទទួលបានពានរង្វាន់ឯកតំណាងឲ្យប្រទេសកម្ពុជា ក្នុងអាជីវកម្មបរិយាប័ន្នអាស៊ានឆ្នាំ២០២២ IB (Inclusive business) ក្នុងចំណោមចំនួន ១០ មកពីបណ្តាប្រទេសអាស៊ាន ក្នុងកិច្ចប្រជុំកំពូលអាជីវកម្មបរិយាប័ន្នអាស៊ានលើកទី៥ ដែលធ្វើឡើងក្រោមវត្តមាន លោក ចម ប្រសិទ្ធ ទេសរដ្ឋមន្រ្តី រដ្ឋមន្រ្តីក្រសួងឧស្សាហកម្ម វិទ្យាសាស្ត្របច្ចេកវិទ្យានិងនវានុវត្តន៏ នៅថ្ងៃទី២៦ ខែតុលា ឆ្នាំ២០២២ នៅខេត្តសៀមរាប។

ការផ្តល់ពានរង្វាន់ឯកដំណាងឲ្យប្រទេសកម្ពុជានាពេលនេះរបស់អ្នកស្រីឧកញ៉ា កែវ មុំ ក្នុងនាមជាពាណិជ្ជករខ្មែរ ជាម្ចាស់ក្រុមហ៊ុន ផលិតនំស្រួយលីលី ដែលអនុវត្តបានល្អនូវការប្រកាន់ខ្ជាប់នូវគោលគំនិតអាជីវកម្មបរិយាប័ន្ននិងកាត់បន្ថយផលប៉ះពាល់សេដ្ឋកិច្ចសង្គមលើក្រុមប្រជាពលរដ្ធ នៅផ្ទៃបាតនៃជើងពីរ៉ាមីត (Base of the Pyramid – BoP)។

សូមជម្រាបជូនថា អាជីវកម្មបរិយាប័ន្ន គឺជាក្រុមហ៊ុនធ្វើអាជីវកម្មឈរលើគោលការណ៍ធុរកិច្ច អាចរកប្រាក់ចំណូល ដែល មាននវានុវត្តន៍ និងដំណោះស្រាយជាប្រព័ន្ធ ដើម្បីឆ្លើយតបទៅនឹងបញ្ហាប្រឈមចាំបាច់របស់ប្រជាជនក្រីក្រ និងប្រជាជនដែលមានចំណូលទាបនៅផ្ទៃបាតនៃជើងពីរ៉ាមីត។

គួរបញ្ជាក់ថា បច្ចុប្បន្នទីផ្សារនំស្រួយលីលី ក្តោបបានចំណែកទីផ្សារ ក្នុងស្រុកប្រមាណ ៣៥ភាគរយ ពោលគឺគិតទាំងការប្រកួតប្រជែងជាមួយនឹងផលិតផលនាំចូល និងក្នុង ស្រុកទាំងមូលផងដែរ ហើយនំស្រួយលីលីក៏បាននិងកំពុងចរាចរ នៅលើទីផ្សារមួយចំនួន នៅក្នុងប្រទេសជាសមាជិកអាស៊ានដូចជាប្រទេសមីយ៉ាន់ម៉ា ម៉ាឡេស៊ី និងវៀតណាមជាដើម ព្រមទាំងនៅទីផ្សារប៉ែកខាងសហរដ្ឋអាមេរិក កាណាដា និងកូរ៉េផងដែរ៕

The post ក្រុមហ៊ុន លីលី ទទួលបានពានរង្វាន់ឯកក្នុងអាជីវកម្មបរិយាប័ន្នអាស៊ានឆ្នាំ២០២២ ដំណាងកម្ពុជា appeared first on .

អ្នកវិនិយោគជប៉ុន ២៦រូប ចុះទស្សនកិច្ច និងភ្លក់រសជាតិនំស្រួយ លីលី ដល់ក្រុមហ៊ុន លោកជំទាវឧកញ៉ា កែវ មុំ

អ្នកឧកញ៉ាវត្តភ្នំ — Thu, 01 Sep 2022 05:48:14 +0000

ក្នុងបេសកកម្មដឹកនាំគណៈប្រតិភូ និងអ្នកវិនិយោគ លោកស្រី Marisa Haruta តំណាងអង្គការពាណិជ្ជកម្មក្រៅប្រទេសជប៉ុន ប្រចាំរាជធានីភ្នំពេញ ហៅកាត់ JETRO បានដឹកនាំគណៈប្រតិភូ អ្នកវិនិយោគពីប្រទេសជប៉ុន ២៦រូប ទស្សនកិច្ច ក្រុមហ៊ុន លីលី ហ៊ូដ អ៊ិនដាសទ្រី ខូអិលធីឌី របស់លោកជំទាវឧកញ៉ា កែវ មុំ ដើម្បីស្វែងរកឱកាសវិនិយោគ និងកិច្ចសហការក្នុងភាពជាដៃគូទៅថ្ងៃមុខ។

នៅចំពោះមុខគណៈប្រតិភូជប៉ុនទាំង ២៦រូប នោះដែរ ស្ថាបនិកក្រុមហ៊ុន លីលី ហ៊ូដ ដែលគេស្គាល់ថា ជាសិប្បកម្មផលិតនំស្រួយលីលី ដ៏ល្បីឈ្មោះ និងឈរជើងយ៉ាងរឹងមាំជាង ២០ឆ្នាំប្លាយនៅប្រទេសកម្ពុជា លោកជំទាវឧកញ៉ា កែវ មុំ ថ្លែងថា៖ “ខ្ញុំពិតជាសប្បាយរីករាយ និងមានមោទនភាព ក្នុងនាមជាអ្នកជំនួញមួយរូបនៅកម្ពុជា ដែលមានឱកាសទទួលស្វាគមន៍អ្នកវិនិយោគជប៉ុនតាមរយៈអង្គការ JETRO ចុះមកទស្សនៈកិច្ចពីសង្វាក់ផលិតកម្មដល់ទីតាំងក្រុមហ៊ុន លីលី ហ្វូត ផ្ទាល់ ហើយខ្ញុំ សង្ឃឹមថា ក្រោមជំនួបនេះរួច ពួកយើងអាចនឹងមានកិច្ចសហការណាមួយជាបន្តបន្ទាប់”។

តំណាងអង្គការពាណិជ្ជកម្មក្រៅប្រទេសជប៉ុន លោកស្រី Marisa Haruta មានប្រសាសន៍ប្រាប់ Oknha News ឱ្យដឹងដែរថា៖ “គោលបំណងនៃគណៈប្រតិភូធុរកិច្ច និងវិនិយោគជប៉ុន មកដល់ទីតាំងក្រុមហ៊ុន LYLY FOOD INDUSTRY Co.,LTD នាពេលនេះ គឺដើម្បីស្វែងយល់ឱ្យកាន់តែច្បាស់ពីវឌ្ឍនភាព និងសង្វាក់ផលិតកម្មនំស្រួយលីលី ដោយផ្ទាល់ ព្រោះកន្លងមក យើងខ្ញុំបានដឹងខ្លះៗពីប្រវត្តិ និងភាពល្បីល្បាញរបស់សិប្បកម្ម រហូតអាចជ្រៀតចូលដល់ទីផ្សារក្រៅប្រទេសទៀតផង”។

គួរបញ្ជាក់ថា ក្រុមហ៊ុន លីលី ហ៊ូដ អ៊ិនដាសទ្រី ខូអិលធីឌី ដែលផ្ដោតលើការផលិតនំស្រួយដ៏មានឱជារសឈ្ងុយឆ្ងាញ់របស់លោកជំទាវឧកញ៉ា កែវ មុំ មានប្រវត្តិចាប់ផ្ដើម និងបន្តឈរជើងនៅកម្ពុជាអស់រយៈពេលជាង ២០ឆ្នាំមកហើយ។ បច្ចុប្បន្ននេះ វត្តមាននំស្រួយ លីលី កំពុងចរាចរណ៍លក់នៅលើទីផ្សារ ទូទាំង ២៥រាជធានីខេត្តក្រុង ក្នុងប្រទេសកម្ពុជា។

បន្ថែមពីនេះ នំស្រួយ លីលី ក៏វាយលុកទីផ្សារដល់ក្រៅប្រទេស រហូតដល់ជាង ១០ប្រទេស ហើយទៅថ្ងៃមុខ ក្រុមហ៊ុន ផលិតនំស្រួយ ដែលបំពាក់ដោយស្វ័យទំនើបកម្មក្នុងសង្វាក់ផលិតកម្ម និងប្រើប្រាស់វត្ថុធាតុដើមពីអង្ករខ្មែរនេះ នឹងបន្តនាំយករសជាតិនំកញ្ចប់ខ្មែរ ផលិតតាមស្តង់ដារអនាម័យ និងគុណភាពខ្ពស់មួយនេះ ទៅកាន់ពិភពលោក បន្តទៀត៕

The post អ្នកវិនិយោគជប៉ុន ២៦រូប ចុះទស្សនកិច្ច និងភ្លក់រសជាតិនំស្រួយ លីលី ដល់ក្រុមហ៊ុន លោកជំទាវឧកញ៉ា កែវ មុំ appeared first on .