សភាថៃនឹងប្រជុំបោះឆ្នោតគាំទ្រ អានុទីន ឲ្យក្លាយជានាយករដ្ឋមន្ត្រីពេញសិទ្ធក្នុងអាណត្តិថ្មីនៅថ្ងៃនេះ

Kun Tey — Thu, 19 Mar 2026 04:14:30 +0000

បើគ្មានអ្វីប្រែប្រួលទេ សភាប្រទេសថៃនឹងប្រជុំបោះឆ្នោតជ្រើសរើសលោក អនុទីន ជានាយករដ្ឋមន្ត្រីថៃសម្រាប់អាណត្តិថ្មីនៅថ្ងៃទី១៩ខែមីនានេះ បន្ទាប់ពីវិបត្តិនយោបាយរបស់ប្រទេសមួយនេះកាលពីអាណត្តិមុន បានបង្កជម្លោះជាមួយកម្ពុជា រហូតដល់ផ្ទុះអាវុធទ្រង់ទ្រាយធំមិនធ្លាប់មាន។

លោក អានុទីន ឆានវីរៈគុល ជាមេដឹកនាំគណបក្សភូមិចៃថៃ បានឈ្នះការបោះឆ្នោតកាលពីខែកុម្ភៈ និងបានកៀរគរគណបក្សផ្សេងៗចូលរួមក្នុងរដ្ឋាភិបាលចម្រុះដែលមានអាសនៈសភាសរុប២៩០ ហើយទទួលបានការគំាទ្រពីសមាជិកសភាថៃ ឲ្យដឹកនាំរដ្ឋាភិបាលថៃសម្រាប់អាណត្តិថ្មី។

តាមការសន្និដ្ឋាន ការទទួលបានសន្លឹកឆ្នោតគាំទ្រពីប្រជាពលរដ្ឋថៃបែបនេះ ព្រោះលោក អានុទីន បានបំផុសគំនិតជាតិនិយមបង្កជម្លោះព្រំដែនជាមួយកម្ពុជា រហូតវាយបានតំបន់មួយចំនួនពីកម្ពុជា ដែលខ្លួនអះអាងថាជាទឹកដីរបស់ខ្លួន ស្របពេលកម្ពុជាបានប្រកាសប្រាប់ពិភពលោកថាយោធាថៃបានរំលោភបំពានចូលជ្រៅក្នុងដែនអធិបតេយ្យភាព និងគ្រប់គ្រងទឹកដីកម្ពុជាដោយខុសច្បាប់ដោយសាងសង់សំណង់រឹងមាំ ដាក់បន្លាលួស និងទូរកង់តឺន័រ។

តាមសេចក្តីរាយការណ៍របស់រ៉យទ័រ លោក អានុទីន នឹងស្វែងរកការបោះឆ្នោតជ្រើសរើសលោកឱ្យឡើងកាន់អំណាចពេញលេញជាថ្មីនៅថ្ងៃទី១៩ ខែមីនានេះ ក្នុងការបោះឆ្នោតសភាជ្រើសរើសនាយករដ្ឋមន្ត្រី ដែលអាចនាំមកនូវស្ថិរភាពដ៏កម្រមួយសម្រាប់ប្រទេសដែលរងទុក្ខវេទនាជាយូរមកហើយដោយវិបត្តិនិងភាពចលាចលនយោបាយ៕

The post សភាថៃនឹងប្រជុំបោះឆ្នោតគាំទ្រ អានុទីន ឲ្យក្លាយជានាយករដ្ឋមន្ត្រីពេញសិទ្ធក្នុងអាណត្តិថ្មីនៅថ្ងៃនេះ appeared first on .

​​​​ប្រទេសថៃ

ប្រទេសថៃ