ប្រធានាធិបតីអ៊ុយក្រែន

ប្រធានាធិបតីប្រេស៊ីល បដិសេធការសុំជួបរបស់ប្រធានាធិបតីអ៊ុយក្រែន

ឧកញ៉ាសំពៅ — Tue, 12 Dec 2023 04:27:29 +0000

ប្រធានាធិបតីប្រេស៊ីល លោក Luiz Inacio Lula da Silva បានបដិសេធ មិនព្រមជួបជាមួយប្រធានាធិបតីអ៊ុយក្រែន លោក Volodymyr Zelensky បើទោះជាមេដឹកនាំអ៊ុយក្រែន ទទូចសុំជួបបែបណាក៏ដោយ។

យោងតាមការចុះផ្សាយពីសារព័ត៌មាន MSN បានបង្ហាញថា ប្រធានាធិបតីអ៊ុយក្រែន ចង់ជួបជាមួយលោក Lula ជាខ្លាំង អំឡុងពេលលោកស្នាក់នៅប្រទេសប្រេស៊ីល មុនបន្តដំណើរទៅកាន់ប្រទេសអាហ្សង់ទីន ដើម្បីអបអរលោក Javier Milei កាន់តំណែងជាប្រធានាធិបតី។

ប៉ុន្តែមេដឹកនាំប្រេស៊ីល បានច្រានចោលការសុំជួបមួយនោះ ខណៈក្រសួងការបរទេសប្រេស៊ីលអះអាងថា លោក Lula និងមន្ត្រីមួយចំនួនទៀត ជាប់រវល់ក្នុងកិច្ចប្រជុំមួយនៅទីក្រុង Rio មិនអាចឆ្លៀតជួបជាមួយលោក Zelensky បានឡើយ៕

The post ប្រធានាធិបតីប្រេស៊ីល បដិសេធការសុំជួបរបស់ប្រធានាធិបតីអ៊ុយក្រែន appeared first on .

អ៊ុយក្រែន ដកតំណែងរដ្ឋមន្ត្រីការពារជាតិខ្លួនមួយរូប ទាក់ទងនឹងអំពើពុករលួយ

monyokn — Mon, 04 Sep 2023 07:27:40 +0000

ប្រធានាធិបតីអ៊ុយក្រែន លោក Volodymyr Zelenskyy បាននិយាយកាលពីថ្ងៃអាទិត្យម្សិលមិញថា លោកបានសម្រេចចិត្តផ្លាស់ប្តូរតំណែងរដ្ឋមន្ត្រីការពារជាតិរបស់ខ្លួន ចំពេលដែលកំពុងមានសង្គ្រាមរ៉ាំរ៉ៃជាមួយប្រទេសរុស្ស៊ី។ នេះបើតាមការចុះផ្សាយដោយសារព័ត៌មាន Reuters ។

នៅក្នុងវីដេអូថ្លែងសន្ទរកថា លោក Zelenskyy បាននិយាយថា លោកនឹងដកតំណែងរដ្ឋមន្ត្រីការពារជាតិ លោក Oleksii Reznikov ដោយនឹងស្នើសុំសភានៅក្នុងសប្តាហ៍នេះ ដើម្បីជំនួសមកវិញដោយប្រធានមូលនិធិឯកជនភាវូបនីយកម្ម (privatisation fund) លោក Rustem Umierov ។

ក្នុងនោះផងដែរ ការសម្រេចចិត្តនេះ កើតឡើងចំពេលមានការបង្ក្រាបអំពើពុករលួយក្នុងប្រទេសអ៊ុយក្រែន ដែលលោកប្រធានាធិបតីរូបនេះចង់លុបបំបាត់ចោល ដោយសារតែទីក្រុង Kyiv កំពុងដាក់សំណើរចូលរួមជាសមាជិកសហភាពអឺរ៉ុប ខណៈភាពរសើបខ្លាំងរបស់សាធារណៈជនទាក់ទងនឹងអំពើពុករលួយ និងវិវាទសង្គ្រាមរ៉ាំរ៉ៃជាមួយរុស្ស៊ី អាចជាឧបសគ្គរារាំងអ៊ុយក្រែនក្នុងការទទួលបានសមាជិកភាពនៅ EU។

សូមជម្រាបដែរថា តាំងពីខែវិច្ឆិកាឆ្នាំ ២០២១មក រដ្ឋមន្ត្រីការពារជាតិ លោក Reznikov បានជួយធានានូវជំនួយយោធារបស់លោកខាងលិចរាប់ពាន់លានដុល្លារ ដើម្បីជួយដល់កិច្ចខឹតខំប្រឹងប្រែងសង្គ្រាម ប៉ុន្តែត្រូវបានជាប់គាំង ដោយសារការចោទប្រកាន់អំពីភាពពុករលួយជុំវិញក្រសួងរបស់លោក តែយ៉ាងណាលោកបានតបទៅវិញថា វាគឺជាការលាបពណ៌ប៉ុណ្ណោះ៕

The post អ៊ុយក្រែន ដកតំណែងរដ្ឋមន្ត្រីការពារជាតិខ្លួនមួយរូប ទាក់ទងនឹងអំពើពុករលួយ appeared first on .

ប្រធានាធិបតីអ៊ុយក្រែន៖ យ៉ាងហោចណាស់ កុមារ ៥០០នាក់បាត់បង់ជីវិត ដោយសារសង្គ្រាម

ឧកញ៉ាសំពៅ — Mon, 05 Jun 2023 04:17:23 +0000

ធ្មិចបើកៗ សង្គ្រាមនៅអ៊ុយក្រែនបានអូសបន្លាយរហូតដល់ជាង ១ឆ្នាំ ហើយវាក៏បានធ្វើឲ្យមនុស្សរាប់ពាន់ ម៉ឺននាក់ បានស្លាប់បាត់បង់ជីវិត ខណៈសេដ្ឋកិច្ចសកលក៏មានការកកស្ទះ ដោយសារតែបញ្ហាមួយនេះផងដែរ។

សម្រាប់ខែទី ១៦ នៃការផ្ទុះសង្គ្រាមរវាងរុស្ស៊ី និងអ៊ុយក្រែននេះ ប្រធានាធិបតី Volodymyr Zelenskyy ក៏បានបង្ហើបឲ្យដឹងថា យ៉ាងហោចណាស់មានកុមារដែលបាត់បង់ជីវិតនៅក្នុងភ្នក់ភ្លើងសង្គ្រាមនេះ ៥០០នាក់។ នេះបើតាមការចុះផ្សាយពី CNA។

យ៉ាងណា លោក Zelenskyy បញ្ជាក់បន្ថែមថា តួលេខខាងលើនេះគឺត្រឹមតែជាការប៉ាន់ស្មានប៉ុណ្ណោះ ដ្បិតតួលេខជាក់ស្ដែងមិនអាចកំណត់បានច្បាស់លាស់ឡើយ ដោយសារនៅតំបន់រងគ្រោះខ្លះទៀត គឺកំពុងស្ថិតក្រោមការគ្រប់គ្រងរបស់រុស្ស៊ី។

សូមជម្រាបដែរថា ប្រធានាធិបតីអ៊ុយក្រែនបានចេញសេចក្ដីថ្កោលទោសចំពោះកងកម្លាំងរុស្ស៊ីថា អាវុធរបស់រុស្ស៊ី និងភាពសាហាវរបស់ពួកគេ កំពុងបន្តបំផ្លាញជីវិតប្រជាជនអ៊ុយក្រែនទាំងចាស់ ទាំងក្មេងជារៀងរាល់ថ្ងៃ ខណៈក្មេងៗទាំងនោះអាចក្លាយជាសសរទ្រូងប្រទេសជាតិ ប៉ុន្តែរុស្ស៊ីបែរជាធ្វើឲ្យពួកគេបាត់បង់ជីវិតទាំងវ័យក្មេងបែបនេះ៕

The post ប្រធានាធិបតីអ៊ុយក្រែន៖ យ៉ាងហោចណាស់ កុមារ ៥០០នាក់បាត់បង់ជីវិត ដោយសារសង្គ្រាម appeared first on .

ប្រធានាធិបតីអ៊ុយក្រែន គ្រោងធ្វើទស្សនកិច្ចទៅកាន់ប្រទេសប៉ូឡូញនាពេលឆាប់ៗ

ឧកញ៉ាសំពៅ — Mon, 03 Apr 2023 08:53:15 +0000

ប្រធានាធិបតីអ៊ុយក្រែន Volodymyr Zelenskyy នឹងគ្រោងធ្វើទស្សនកិច្ចទៅកាន់ប្រទេសប៉ូឡូញនាថ្ងៃទី ០៥ មេសា។ នេះបើតាមសម្ដីទីប្រឹក្សាកិច្ចការបរទេស របស់ប្រធានាធិបតីប៉ូឡូញ លោក Marcin Przydacz បាននិយាយកាលពីថ្ងៃចន្ទ។

“ដំណើរទស្សនកិច្ចមួយនេះ គឺធ្វើតាមការអញ្ជើញរបស់ប្រធានាធិបតី Andrzej Duda ហើយវានឹងមានរយៈពេលយូរ និងពិភាក្សាលើប្រធានបទមួយចំនួន ហើយមិនមែនត្រឹមតែផ្នែកសន្តិសុខទេ តែក៏ពាក់ព័ន្ធនឹងផ្នែកសេដ្ឋកិច្ច និងនយោបាយ។ វានឹងជាដំណើរទស្សនកិច្ចផ្លូវការ”។ នេះបើតាមសម្ដីប្រធានាធិបតី Przydacz ប្រាប់ទៅកាន់វិទ្យុ RMF។

លោកក៏បានបន្ថែមថា លោក Zelensky នឹងជួបជាមួយជនជាតិប៉ូឡូញ និងអ៊ុយក្រែនដែលបានជម្លៀសខ្លួនទៅកាន់ប្រទេសប៉ូឡូញនៅថ្ងៃពុធ នៅឯ Warsaw Castle។

សូមជម្រាបដែរថា ប៉ូឡូញគឺជាប្រទេសជិតខាងអ៊ុយក្រែន ហើយប្រទេសទាំង ២មានទំនាក់ទំនងប្រវត្តិសាស្ត្រដ៏ស្អិតល្មួត ខណៈប្រជាជនអ៊ុយក្រែនជាច្រើនបានភៀសខ្លួនទៅកាន់ប៉ូឡូញកាលពីឆ្នាំទៅ៕

The post ប្រធានាធិបតីអ៊ុយក្រែន គ្រោងធ្វើទស្សនកិច្ចទៅកាន់ប្រទេសប៉ូឡូញនាពេលឆាប់ៗ appeared first on .

ប្រធានាធិបតីអ៊ុយក្រែន បណ្ដេញមន្ត្រីជាន់ខ្ពស់ ២ រូបចេញពីជួររដ្ឋាភិបាល

ឧកញ៉ាសំពៅ — Mon, 18 Jul 2022 02:56:06 +0000

ប្រធានាធិបតីអ៊ុយក្រែន Volodymyr Zelensky ទើបនឹងបណ្ដេញមន្ត្រីជាន់ខ្ពស់ ២ រូបដែលមានមុខតំណែងសំខាន់ក្នុងជួររដ្ឋាភិបាល បន្ទាប់ពីយល់ឃើញថា ការដឹកនាំរបស់ពួកគេហាក់អសមត្ថភាព ព្រមទាំងចោទប្រកាន់បុគ្គលិកក្រោមឱវាទមានការឃុបឃិតជាមួយរុស្ស៊ី។ នេះបើតាមការចុះផ្សាយពី CNN។

“ថ្ងៃនេះខ្ញុំបានសម្រេចចិត្តដកតំណែង “អគ្គព្រះរាជអាជ្ញា” និង”ប្រធានសេវាសន្តិសុខអ៊ុយក្រែន” ចេញពីជួររដ្ឋាភិបាល”។ នេះបើតាមសម្ដីរបស់លោក Zelensky បាននិយាយនៅក្នុងវីដេអូមួយ។

ដោយឡែក មន្ត្រី ២ រូបដែលត្រូវបានបណ្ដេញចេញនោះគឺលោកស្រី Iryna Venediktova មានតំណែងជាអគ្គព្រះរាជអាជ្ញា និងលោក Ivan Bakanov ប្រធានសេវាសន្តិសុខជាតិដែលបម្រើការជាមួយប្រធានាធិបតីអស់រយៈពេលជាយូរមកហើយ។

លោក Zelensky ក៏បានពន្យល់ពីមូលហេតុបញ្ឈប់មុខតំណែងរបស់មន្ត្រីចាស់វស្សាទាំង ២ រូបនេះផងដែរថា៖ “មានការរកឃើញពីអំពើឧក្រិដ្ឋកម្មដែលប្រឆាំងនឹងមូលដ្ឋានគ្រឹះរបស់សន្តិសុខជាតិ និងការជាប់ពាក់ព័ន្ធរវាងបុគ្គលិកផ្នែកសន្តិសុខជាតិអ៊ុយក្រែន និងកងកម្លាំងពិសេសរបស់រុស្ស៊ី ដែលបានបង្កជាសំណួរជាច្រើនពាក់ព័ន្ធនឹងថ្នាក់គ្រប់គ្រងទាំងអស់”។

“គ្រប់គ្នាដែលជាប់ពាក់ព័ន្ធនឹងអំពើឧក្រិដ្ឋកម្មខាងលើ ដែលបានផ្ដល់ប្រយោជន៍ទៅកាន់រុស្ស៊ី នឹងទទួលខុសត្រូវតាមផ្លូវច្បាប់ ព្រោះនេះគឺជាទោសធ្ងន់ដែលបញ្ជូនព័ត៌មានសំងាត់ ទៅកាន់កងទ័ពសត្រូវ ក៏ដូចជាការឃុបឃិតជាមួយនឹងកងកម្លាំងរុស្ស៊ី”៕

The post ប្រធានាធិបតីអ៊ុយក្រែន បណ្ដេញមន្ត្រីជាន់ខ្ពស់ ២ រូបចេញពីជួររដ្ឋាភិបាល appeared first on .

ប្រធានាធិបតីតំបូងរបស់អ៊ុយក្រែនបានទទួលអនិច្ចកម្មក្នុងវ័យ ៨៨ ឆ្នាំ

ឧកញ៉ាសំពៅ — Wed, 11 May 2022 10:08:40 +0000

បើយោងតាមការឲ្យដឹងពីរបាយការណ៍ផ្លូវការរបស់អ៊ុយក្រែនដែលបានផ្សាយកាលពីថ្ងៃអង្គារ៍កន្លងទៅ អតីតប្រធានាធិបតី Leonid Makarovych Kravchuk ដែលជាប្រធានាធិបតីទី ១ នៃប្រទេសអ៊ុយក្រែនបានទទួលមរណភាពហើយនៅក្នុងវ័យ ៨៨ ឆ្នាំ។

ចំពោះមូលហេតុដែលបណ្ដាលឲ្យកើតមានសោកនាដកម្មមួយនេះ គឺមិនត្រូវបានបង្ហើបឲ្យដឹងឡើយ គ្រាន់តែកន្លងមកសុខភាពរបស់បុគ្គលសំខាន់បំផុតប្រចាំប្រទេសខាងលើគឺមានសភាពខ្សោយ ពោលគឺធ្លាប់វះកាត់បេះដូងម្ដងកាលពីឆ្នាំទៅ។

បញ្ជាក់បន្តិចថា លោក Kravchuk គឺជាបុគ្គលសំខាន់មួយរូបដែលបានចូលរួមចលនាទាមទារឯករាជ្យសម្រាប់ប្រទេសអ៊ុយក្រែន ក្រោយផ្ដាច់ខ្លួនចេញពីសហភាពសូវៀត និងនៅឆ្នាំ ១៩៩១ លោកទទួលបានការគាំទ្រក្លាយជាប្រធានាធិបតីតំបូងបំផុត និងបានកាន់តំណែងដល់ឆ្នាំ ១៩៩៤៕

ប្រភព: MSN

The post ប្រធានាធិបតីតំបូងរបស់អ៊ុយក្រែនបានទទួលអនិច្ចកម្មក្នុងវ័យ ៨៨ ឆ្នាំ appeared first on .

មហាសេដ្ឋីជប៉ុនប្រកាសបរិច្ចាគប្រាក់ជិត ៩ លានដុល្លារទៅប្រទេសអ៊ុយក្រែន ក្រោយបញ្ចេញមតិរិះគន់រុស្ស៊ី

ឧកញ៉ាសំពៅ — Sun, 27 Feb 2022 17:02:01 +0000

កាលពីពេលថ្មីៗនេះ មហាសេដ្ឋីជប៉ុន Hiroshi Mickey Mikitani បាននិយាយថា ការឈ្លានពានរបស់រុស្ស៊ីទៅលើប្រទេសអ៊ុយក្រែន គឺជាការប្រឆាំងនឹងលទ្ធិប្រជាធិបតេយ្យ ហើយលោកនឹងធ្វើការបរិច្ចាគថវិកាប្រមាណ ៨,៧ លានដុល្លារទៅកាន់រដ្ឋាភិបាលអ៊ុយក្រែនទៀតផង។

“ការគិតរបស់ខ្ញុំ នឹងនៅជាមួយអ្នក និងប្រជាជនអ៊ុយក្រែនទាំងអស់។ ខ្ញុំជឿជាក់ថា ការរំលោភបំពានចំពោះស្ថិរភាព និងប្រជាធិបតេយ្យនៅអ៊ុយក្រែន គឺជាការប្រឆាំងជាមួយនឹងលទ្ធិប្រជាធិបតេយ្យ”។ នេះបើតាមសំណេររបស់ស្ថាបនិក Rakuten បានសរសេរទៅកាន់ប្រធានាធិបតី Volodymyr Zelenskyy។

នៅក្នុងសំណេរមួយនោះ មហាសេដ្ឋីជប៉ុនក៏បានបញ្ជាក់ដែរថា៖ “ខ្ញុំពិតជាចង់ឃើញ រុស្ស៊ី និងអ៊ុយក្រែនអាចដោះស្រាយបញ្ហាមួយនេះដោយសន្តិវិធីខ្លាំងបំផុត និងរំពឹងទៀតថា ប្រជាជនអ៊ុយក្រែននឹងអាចរស់នៅជាមួយសន្តិភាពវិញក្នុងពេលឆាប់ៗនេះ”។

បញ្ជាក់ដែរថា គិតត្រឹមល្ងាចថ្ងៃទី ២៧ កុម្ភៈកងទ័ពរបស់រុស្ស៊ីបានវាយចូលដល់ទីក្រុងធំបំផុតទី ២ Kharkivរបស់ប្រទេសអ៊ុយក្រែនដែលមានប្រជាជនរស់នៅប្រមាណ ១,៤ លាននាក់ ក៏ប៉ុន្តែស្ថានភាពគឺនៅគ្រប់គ្រងបានដោយកងទ័ពអ៊ុយក្រែននៅឡើយ៕

ប្រភព: Wionews

The post មហាសេដ្ឋីជប៉ុនប្រកាសបរិច្ចាគប្រាក់ជិត ៩ លានដុល្លារទៅប្រទេសអ៊ុយក្រែន ក្រោយបញ្ចេញមតិរិះគន់រុស្ស៊ី appeared first on .

Zelenskyy ពីអ្នកកំប្លែងតាមប៉ុស្តិ៍ទូរទស្សន៍ ក្លាយជាប្រធានាធិបតីអ៊ុយក្រែន

ឧកញ៉ាសំពៅ — Sat, 26 Feb 2022 07:42:49 +0000

ដូចពាក្យលោកថា វាសនាមនុស្សពិតជាមិនអាចស្មានដឹង ជាក់ស្ដែងប្រធានាធិបតីនៃប្រទេសអ៊ុយក្រែននាពេលបច្ចុប្បន្នធ្លាប់មានអាជីពជាអ្នកកំប្លែងតាមប៉ុស្តិ៍ទូរទស្សន៍កាលពី ៤ ឆ្នាំមុន។

រំលឹកពីប្រវត្តិរបស់ប្រធានាធិបតីទី ៧ នៃប្រទេសអ៊ុយក្រែនបន្តិច លោក Volodymyr Oleksandrovych Zelenskyy មានដើមកំណើតនៅថ្ងៃទី ២៥ មករា ១៩៧៨ ដែលមានឪពុកម្ដាយជាជនជាតិជ្វីហ្វ នៅទីក្រុង Kryvyi Rih នៃប្រទេសអ៊ុយក្រែន ដែលកាលនោះនៅជាផ្នែកមួយនៃសហភាពសូវៀតនៅឡើយ។

ដោយសារមានឈាមជាជនជាតិជ្វីហ្វដែលពិភពលោកតែងអះអាងថា ជាជនជាតិមួយដែលមានប្រាជ្ញាឆ្លាតបំផុត ឪពុករបស់លោកគឺ ជាសាស្ត្រាចារ្យមួយរូបនិងជាប្រធានដេប៉ាតាម៉ង់មួយនៃវិទ្យាស្ថាន Kryvyi Rih Institute of Economics ខណៈម្ដាយរបស់លោកមានអាជីពជាវិស្វករ។

នៅក្នុងវ័យត្រឹម ១៦ ឆ្នាំ លោកបានធ្វើប្រលងជាប់ផ្នែកភាសាបរទេសអង់គ្លេស និងទទួលបានឱកាសទៅសិក្សានៅប្រទេសអ៊ីស្រាអែល ប៉ុន្តែត្រូវបានបដិសេធដោយឪពុករបស់លោក។ ក្រោយមកលោកទទួលបានបញ្ចប់ថ្នាក់សិក្សានៅវិទ្យាស្ថាន Kryvyi Rih Institute of Economics ផ្នែកច្បាប់ តែបែរជាមិនធ្វើការទៅតាមអ្វីដែលបានរៀនទៅវិញ។

អាចនិយាយថា វាជាចំណូលចិត្តពីកំណើតចំពោះវិស័យសិល្បៈ ពោលកាលនៅវ័យ ១៧ ឆ្នាំ Zelenskyy បានចូលរួមក្នុងការប្រកួតប្រជែងកំប្លែងជាមួយក្រុមរបស់លោក និងបានឈ្នះនៅឆ្នាំ ១៩៩៧។

ក្រោយឈ្នះពានរង្វាន់កម្មវិធីកំប្លែងនេះហើយ លោកបានបង្កើតក្រុមជាផ្លូវការនឹងដាក់ឈ្មោះថា Kvartal 95 ហើយចាប់តាំងពីឆ្នាំ ១៩៩៨ ដល់ ២០០៣ ក្រុមកំប្លែងរបស់លោកតែងមានវត្តមាននៅកម្មវិធីធំៗ និងតែងចំណាយពេលសម្ដែងនៅទីក្រុង Moscow និងតំបន់ផ្សេងទៀតនៅសហភាពសូវៀត។

ក្រោយមកនៅឆ្នាំ ២០១៥ Zelenskyy ទទួលបានឱកាសដើរតួជាប្រធានាធិបតីនៃប្រទេសអ៊ុយក្រែននៅក្នុងភាពយន្តភាគមានចំណងជើងថា Servant of the People ដែលសាច់រឿងគឺលោកដើរតួជាគ្រូបង្រៀនអាយុ ៣០ ឆ្នាំបានជាប់ឈ្មោះជាប្រធានាធិបតី ក្រោយបង្ហោះវីដេអូរិះគន់ពីអំពើពុករលួយរបស់អ៊ុយក្រែន។

សាច់រឿងមួយនេះហើយបានជួយឲ្យ Zelenskyy មានកេរ្តិ៍ឈ្មោះកាន់តែល្បី និងក្លាយជាអ្នកកំប្លែងល្បីបំផុតមួយរូបប្រចាំប្រទេស តែរឿងភាគមួយនេះគឺមិនអនុញ្ញាតឲ្យចាក់ផ្សាយនៅប្រទេសអ៊ុយក្រែនឡើយក្នុងឆ្នាំ ២០១៧ ទើបតែអនុញ្ញាតឲ្យបញ្ចាំងជាថ្មីនៅឆ្នាំ ២០១៩ គ្រាដែលបុរសវ័យ ៤៤ ឆ្នាំជាប់ឈ្មោះជាប្រធានាធិបតីនៅក្រៅខ្សែភាពយន្តប៉ុណ្ណោះ។

បោះជំហានដំបូងទៅលើវិស័យនយោបាយនៅក្នុងឆ្នាំ ២០១៨ Zelenskyy បានដាក់ឈ្មោះបក្សរបស់លោកទៅតាមសាច់រឿងគឺ Servant of the People ហើយបើយោងទៅតាមបទសម្ភាសន៍ដែលលោកបានផ្ដល់នៅខែមីនា ២០១៩ គោលបំណងនៃការប្រលូកក្នុងឆាកនយោបាយគឺដើម្បីស្ដារនូវទំនុកចិត្តរបស់ប្រជាពលរដ្ឋមកកាន់រដ្ឋាភិបាលឡើងវិញ។

ដូចទៅនឹងសាច់រឿងដែលលោកបានសម្ដែង Zelenskyy ពិតជាជាប់ឆ្នោតមែន ពោលនៅថ្ងៃទី ២១ មេសា ២០១៩ លោកបានក្លាយជាប្រធានាធិបតីទី ៧ នៃប្រទេសអ៊ុយក្រែន តែលោកបានប្រកាសថា នឹងឈរឈ្មោះតែមួយអាណត្តិ (៥ឆ្នាំ) ប៉ុណ្ណោះ។

ងាកមកមើលស្ថានការណ៍បច្ចុប្បន្នវិញ ឃើញថាអ៊ុយក្រែនកំពុងស្ថិតនៅក្រោមការវាយប្រហារពីប្រទេសជិតខាងរុស្ស៊ី បន្ទាប់ពីប្រធានាធិបតី Vladimir Putin អះអាងថា ការដែលវាយអ៊ុយក្រែន គឺធ្វើឡើងដោយទប់ស្កាត់ការពង្រីកខ្លួនរបស់ NATO មកភាគខាងកើតនៃអឺរ៉ុប៕

ប្រភព: Wikipedia

The post Zelenskyy ពីអ្នកកំប្លែងតាមប៉ុស្តិ៍ទូរទស្សន៍ ក្លាយជាប្រធានាធិបតីអ៊ុយក្រែន appeared first on .