ដោយដកស្រង់ចេញពីប្រភពដែលជិតស្និទ្ធនឹងលោក ត្រាំ កាសែត New York Post បានរាយការណ៍ថា ប្រធានាធិបតីអាមេរិករូបនេះ ជឿជាក់ថា លោក Infantino ត្រូវបានទទួលការគោរពដោយមនុស្សគ្រប់គ្នានៅជុំវិញពិភពលោក ហើយទទួលស្គាល់ទៀតថាលោកពិតជាមានសមត្ថភាពពិសេសក្នុងការនាំមនុស្សឲ្យមកជួបជុំនិយាយពិភាក្សាគ្នា។

គួរឲ្យដឹងថា លោក Infantino បានបង្កើតទំនាក់ទំនងយ៉ាងជិតស្និទ្ធជាមួយលោក ត្រាំ ក្នុងអំឡុងពេលព្រឹត្តិការណ៍បាល់ទាត់ពិភពលោក World Cup នៅឆ្នាំនេះ ដោយប្រធាន FIFA ដែលមានសញ្ជាតិស្វីសរូបនេះ បានខិតខំប្រឹងប្រែងម្តងហើយម្តងទៀតដើម្បីទាក់ទាញមេដឹកនាំអាមេរិក រួមទាំងការប្រគល់រង្វាន់សន្តិភាពដំបូងរបស់ FIFA ដល់លោកផងដែរ កាលពីខែធ្នូឆ្នាំមុន។

យ៉ាងណាក៏ដោយ យោងតាមមាត្រា ៩៧ នៃច្បាប់ធម្មនុញ្ញអង្គការសហប្រជាជាតិ អគ្គលេខាធិការត្រូវបានតែងតាំងដោយមហាសន្និបាតតាមអនុសាសន៍របស់ក្រុមប្រឹក្សាសន្តិសុខ។ ហើយដើម្បីទទួលបានតំណែងនេះ លោក Infantino នឹងត្រូវការការគាំទ្រពីក្រុមប្រឹក្សាសន្តិសុខដែលមានសមាជិក ១៥ រូបជាមុនសិន ដែលសមាជិកអចិន្ត្រៃយ៍ណាម្នាក់ក្នុងចំណោមសមាជិកអចិន្ត្រៃយ៍ទាំងប្រាំអាចប្រើសិទ្ធិវេតូ មុនពេលទទួលបានការយល់ព្រមពីមហាសន្និបាត។

គួរជម្រាបជូនថា លោក ត្រាំ បានរិះគន់ម្តងហើយម្តងទៀតចំពោះអ្វីដែលលោកយល់ថាជាការបរាជ័យរបស់អង្គការសហប្រជាជាតិក្នុងការដើរតួនាទីយ៉ាងសកម្មក្នុងការដោះស្រាយជម្លោះធំៗជាសកល។ កាលពីឆ្នាំមុន លោកក៏បានបង្កើតក្រុមប្រឹក្សាសន្តិភាពដែលដឹកនាំដោយសហរដ្ឋអាមេរិក និងជាជម្រើសថ្មីមួយដើម្បីជំនួសអង្គការសហប្រជាជាតិ ខណៈពេលដែលរដ្ឋបាលរបស់លោក ត្រាំ បានបន្តធ្វើកិច្ចព្រមព្រៀងសន្តិភាព រួមទាំងរវាងអ៊ីស្រាអែល និងក្រុមហាម៉ាសប៉ាឡេស្ទីន៕​

The post លោក ត្រាំ ចង់ឲ្យប្រធាន FIFA ឡើងទៅកាន់តំណែងជាអគ្គលេខាធិការអង្គការសហប្រជាជាតិ UN វិញ appeared first on .