ប្រវត្តិ

បណ្ឌិត សុខ ទូច ផ្តួចផ្តើមបង្កើតសាលារៀនថ្នាក់បណ្ឌិត តែក្រោយសាលាទទួលជោគជ័យ លោកក៏ត្រូវបានដេញចេញ

ឧកញ៉ាកោះក្របី — Sun, 16 Jan 2022 03:18:14 +0000

លោកបណ្ឌិត សុខ ទូច ប្រធានរាជបណ្ឌត្យសភាកម្ពុជា និងជាអ្នកស្រាវជ្រាវបញ្ហាការទន្រ្ទាន និងកាន់កាប់ដីព្រៃលិចទឹកជុំវិញបឹងទន្លេសាប ដែលលោកចាត់ថាកំពុងមានភាពធ្ងន់ធ្ងរ ស្ថិតនៅក្នុងភាពប្រកាសអាសន្នដែលតម្រូវឲ្យមានការទប់ស្កាត់ជាបន្ទាន់ ពោលគឺអស់រាប់ម៉ឺនហិកតា ហើយលោកបានរាយការណ៍ទៅកាន់សម្តេចនាយករដ្ឋមន្រ្តីកម្ពុជា។ ភ្លាមៗ សម្តេច ហ៊ុន សែន បានចេញបទបញ្ជាឲ្យបង្កើតក្រុមការងារអន្តរក្រសួងចុះស្រាវជ្រាវ និងដកហូតដីព្រែលិចទឹកពីអ្នកមានអំណាច អ្នកជំនួញ និងប្រជាពលរដ្ឋដែលកាន់កាប់ទន្ទ្រានយកដីរដ្ឋ។ លោកបណ្ឌិត សុខ ទូច បញ្ជាក់ថា ចំណាត់ការរបស់រដ្ឋាភិបាលពីចម្រុះក្រសួងគឺជារឿងត្រឹមត្រូវ ដើម្បីបង្រ្កាបដោយប្រើប្រាស់កណ្តាប់ដៃដែក។

ថ្ងៃនេះសារព័ត៌មានឧកញ៉ាញូស៍ សូមបើកបង្ហាញប្រវត្តិ និងបទពិសោធនការងាររបស់លោក សុខ ទូច ដូចតទៅ៖

លោក សុខ ទូច ចូលកាន់តំណែងជាប្រធានរាជបណ្ឌិត្យសភាកម្ពុជា ថ្ងៃទី១១ ខែសីហា ឆ្នាំ២០១៧។ លោកកើតនៅឆ្នាំ ១៩៦៥ ដែលមានបងប្អូនប្រាំនាក់ ស្រីពីរនាក់ និង ប្រុសបីនាក់ ស្ថិតនៅភូមិតាកយ ឃុំព្រែកដំបូក ស្រុកស្រីសន្ធរ ខេត្តកំពង់ចាម។ លោកបានប្រឡងបញ្ចប់ថ្នាក់បឋម (ថ្នាក់ទីបួន) ក្នុងឆ្នាំ១៩៨៤។ ក្រោយប្រឡងជាប់ថ្នាក់បឋមមកគ្រួសារបានផ្លាស់ប្ដូរទីលំនៅមករស់នៅទីក្រុងភ្នំពេញ។

លោក សុខ ទូច ឡើងមករៀនបន្តថ្នាក់មធ្យមសិក្សាកម្រិតមួយនៅក្រុងភ្នំពេញ គឺនៅសាលាចតុមុខ និងបានបន្តចូលរៀនថ្នាក់វិទ្យាល័យគឺសាលាភ្នំដូនពេញ បច្ចុប្បន្នសាលាស៊ីសុវត្ថិ។ នៅរៀនសាលានេះ លោកបានឆ្លងកាត់ការលំបាកជាច្រើន ពីព្រោះស្ថានភាពគ្រួសារមិនមានលុយគ្រប់គ្រាន់ផ្គត់ផ្គង់ឲ្យលោក រៀន សូម្បីសំលៀកបំពាក់ក៏ខ្វះដែរ។ ពេលខ្លះត្រូវធាក់កង់ឌុបដើម្បីយកលុយផ្គត់ផ្គង់ការរៀនសូត្រ ។ លោកថា “មានអាវសតែមួយគត់រៀនបីឆ្នាំ នៅពេលគក់ម្ដងៗត្រូវអង្គុយយាមទាល់តែស្ងួតព្រោះខ្លាចគេ លួច”។ បើទោះបីឆ្លងកាត់ការលំបាកច្រើនយ៉ាងនេះក៏ដោយ ក៏រូបលោកបានជម្នះឧបសគ្គ ហើយបានប្រឡងបញ្ចប់ថ្នាក់បាក់ឌុបទទួលបានជោគជ័យនៅឆ្នាំ ១៩៨៩។

ក្រោយមក លោក សុខ ទូច ក៏បានសម្រេចចិត្តដាក់អាហារូបករណ៍ទៅបរទេសបន្ត តែដូរពីអាហារូបករណ៍កម្រិតឧត្ដមទៅអាហារូបករណ៍កម្រិតមធ្យមឯកទេស។ អាចចាត់ទុកបានថា ជាសំណាងល្អរបស់លោកដែរ ពីព្រោះបានប្រឡង [ជាប់បម្រុង]។ លោកថ្លែងថា៖ “នៅសល់ត្រឹមតែពីរសប្ដាហ៍ មុនពេលចេញដំណើរទៅរៀននៅក្រៅប្រទេស មានបេក្ខជនកម្រិតមធ្យមឯកទេសម្នាក់ដួលម៉ូតូបាក់ដៃ មិនអាចទៅរៀនបាន លោកក៏ត្រូវបានគេជ្រើសរើសឲ្យទៅរៀនជំនួសគេទៅ”។

លោកចូលរៀនថ្នាក់ឯកទេសដំបូងក្នុងឆ្នាំ១៩៩០ នៅរដ្ឋគីជីស្តង់ (បច្ចុប្បន្នប្រទេសគីជីស្ដង់)។ រៀនទីនោះបានមួយឆ្នាំ ដោយសារលោករៀនពូកែខាងសាលាក៏បានជំរុញលោកឲ្យរៀនថ្នាក់ឧត្ដម ដោយត្រូវទៅបន្តនៅរដ្ឋមួយទៀតក្នុងប្រទេសរុស្សី។ ការទៅសិក្សានៅប្រទេសរុស្ស៊ីជារឿងលំបាកបំផុត ពីព្រោះ រដ្ឋផ្ដល់ប្រាក់អាហារូបករណ៍ត្រឹមតែ៥ដុល្លារ ចំណែកខាងរដ្ឋាភិបាលរុស្ស៊ីឲ្យត្រឹមតែ១០ដុល្លារ សរុបទៅទទួលបានត្រឹមតែ១៥ដុល្លារក្នុងមួយខែ ដែលដូរជាលុយរូប (រូបិយប័ណ្ណរបស់រុស្ស៊ី) វិញបានត្រឹមតែ៤០០រូបប៉ុណ្ណោះ ហើយបើយក៤០០រ៉ូបទៅទិញនំប៉័ងវិញបានត្រឹមតែ៤០០នំប៉័ង ប៉ុណ្ណោះ។

នៅរៀនរដ្ឋរុស្សីបានដល់ឆ្នាំទីពីរ គឺនៅឆ្នាំ១៩៩២ លោកបានបាក់ចិត្តស្រឡាញ់នារីជនជាតិរុស្សីម្នាក់។ នៅសម័យនោះ ពិភពលោកមានការបែងចែកពណ៌សម្បុរ ពោលគឺបែងចែករវាងអ្នកនៅអាស៊ី នៅអឺរ៉ុប និងអ្នកនៅអាហ្វ្រិក។ តែនារីដែលរូបលោកស្រឡាញ់ មិនបានបែងចែកនោះទេ ដោយបានបាក់ចិត្តស្រឡាញ់លោកជា និស្សិតដ៏កម្សត់ គ្មានទ្រព្យធន ថែមទាំងមិនទាន់មានការងារទៀតផងនោះ។ ដោយសារមនោសញ្ចេតនាដ៏ជ្រាលជ្រៅបែបនេះ ទើបរូបលោកសម្រេចចិត្តរៀបការជាមួយគ្នានៅឆ្នាំ១៩៩២។

ជារឿងកម្សត់បំផុត ពេលខ្លះ លោកនិងភរិយា គ្មានអីញ៉ាំទាល់តែសោះ ជាពិសេសនៅរដូវរងា (ខែទឹកកក) លោកត្រូវបេះ[កន្ទិចអាល]ស្រុះជាមួយទឹកយកមកញ៉ាំជាមួយ នំប៉័ង។ នៅពេលព្រឹកគ្មានអីញ៉ាំទេក្រៅពី[ទឹកតែមួយពែង] ហើយជារៀងរាល់ពេលមុនទៅសាលា លោកញ៉ាំតែតែមួយពែងគត់។ លោកបញ្ជាក់ថា “ទៅរៀនមិនហ៊ាន អង្គុយមុខគេទេ… មិនមែនរៀនមិនចេះនោះទេ តែខ្លាចកូរពោះឭដល់មិត្តភ័ក្ដិអង្គុយជិត ពីព្រោះព្រឹកឡើងគ្មានអីញ៉ាំក្រៅពីទឹកតែមួយពែង នោះ…”។

នៅ ឆ្នាំ១៩៩៤ លោកបញ្ចប់ថ្នាក់បរិញ្ញាបត្រ ដោយប្រឡងបញ្ចប់ទទួលបានជោគជ័យ និងទទួលបានពិន្ទុខ្ពស់ទៀតផង។ ក្រោយមក លោកបានបន្តថ្នាក់អនុបណ្ឌិតផ្នែកវិទ្យាសាស្ត្រនយោបាយនៅសាលា ដដែល។ ជីវិតនៅពេលកំពុងរៀនថ្នាក់អនុបណ្ឌិត ក៏មិនខុសអ្វី កាលពីនៅរៀនថ្នាក់បរិញ្ញាបត្រដែរ។ លោកត្រូវទៅធ្វើការស៊ីឈ្នួលគេដូចមុន ហើយត្រូវឆ្លៀតពេលរៀនខ្លួនឯងផង រហូតទទួលបានជោគជ័យថ្នាក់អនុបណ្ឌិត។ លោកថា “ពេលណាក៏ខ្ញុំដាក់សៀវភៅតាមខ្លួនដែរ មិនថាធ្វើការ មិនថាទៅទីណា សូម្បីដាំបាយក៏មើលដែរ ឲ្យតែមានពេលគឺមើលរហូត…”។

នៅឆ្នាំ១៩៩៥ លោក សុខ ទូច បានបញ្ចប់ថ្នាក់អនុបណ្ឌិត ហើយនៅពេលនោះប្រទេសរុស្សី ត្រូវការជ្រើសរើសនិស្សិតចំនួន១២នាក់ ចេញពីនិស្សិត៧០០នាក់មកពីប្រទេសជាង១២០ ដើម្បីឲ្យសិក្សាបន្តថ្នាក់បណ្ឌិត។ នៅពេលនោះ លោកត្រូវត្រឡប់មកស្រុកខ្មែរវិញ ដើម្បីស្រាវជ្រាវប្រវត្តិសាស្ត្រ និងបរិបទនយោបាយនៅកម្ពុជា សម្រាប់ធ្វើជាគម្រោងសរសេរនិក្ខេបបទការពារថ្នាក់អនុបណ្ឌិតដើម្បី ទទួលបានជោគជ័យសិក្សាបន្តថ្នាក់បណ្ឌិត។ ដោយសារតែ និក្ខេបបទរបស់លោកធ្វើបានល្អ និងការពារបានល្អផងនោះ ធ្វើឲ្យគណៈកម្មការវាយតម្លៃនិក្ខេបបទ បានឲ្យពិន្ទុលោកខ្ពស់ និងជាប់បានទៅសិក្សាបន្តថ្នាក់បណ្ឌិតក្នុងចំណោមសិស្សឆ្នើមទាំង ១២នាក់។ នៅពេលដែលលោក សុខ ទូច បន្តថ្នាក់បណ្ឌិត ភរិយារបស់លោកបានប្រសូតបុត្រាមួយទៀតក្នុងឆ្នាំ១៩៩៦ បន្ទាប់ពីនោះ ភរិយារបស់លោកបានឈប់រៀន ហើយលោកបានបញ្ចប់ថ្នាក់បណ្ឌិតទទួលបានជោគជ័យនៅឆ្នាំ១៩៩៩។

នៅពេលដែលលោក សុខ ទូច បន្តថ្នាក់បណ្ឌិត គឺបន្តជំនាញវិទ្យាសាស្ត្រនយោបាយ។ នៅពេលសរសេរនិក្ខេបបទ លោកសរសេរទាក់ទងទៅនឹងនយោបាយ។ តែដោយសារនៅសាលាដែលលោករៀន ពុំមានសាស្ត្រាចារ្យត្រួតពិនិត្យ និងវាយតម្លៃនិក្ខេបបទលើជំនាញនេះ គឺត្រូវទៅការពារនិក្ខេបបទរបស់ខ្លួននៅទីក្រុងមូស្គូ។ ដោយសារ ពុំមានលុយគ្រប់គ្រាន់ទៅការពារនៅទីនោះ លោក សុខ ទូច សុខចិត្តប្ដូរមកការពារផ្នែកប្រវត្តិសាស្ត្រវិញ។ អីចឹងហើយ ទើបលោកបញ្ចប់សញ្ញាបត្របណ្ឌិតផ្នែកប្រវត្តិសាស្ត្រ មិនមែនវិទ្យាសាស្ត្រនយោបាយទេ ខណៈដែលរៀនថ្នាក់បរិញ្ញាបត្រអនុបណ្ឌិត និងបណ្ឌិតជំនាញវិទ្យាសាស្ត្រនយោបាយ។

ក្រោយពីបញ្ចប់ថ្នាក់បណ្ឌិតសព្វគ្រប់ លោកបណ្ឌិត សុខ ទូច បាននាំភរិយា និងកូនទាំងពីរត្រឡប់មកស្រុកខ្មែរវិញ។ នៅពេលនោះ លោកបានដាក់ពាក្យបង្រៀននៅមហាវិទ្យាល័យក្នុងស្រុកខ្មែរមួយចំនួន ទាំងឯកជននិងរដ្ឋ តែសាលាទាំងនោះមិនព្រមទទួលលោកឲ្យបង្រៀនទេ ដោយគិតថាលោកក្មេងពេក និងថារូបលោកមិនបានរៀនអីទេ ដោយចោទថា [ទិញសញ្ញាបត្រ]។ ក្រោយមក លោក ក៏បានដាក់ពាក្យចូលធ្វើការនៅក្រសួងការបរទេស។ ដោយសារតែខ្វះសំលៀកបំពាក់ដើម្បីឲ្យសមមុខសមមាត់ជាមន្ត្រី ការទូត លោកក៏សុំប្ដូរដូរមកទីស្ដីការគណៈរដ្ឋមន្ត្រី តែដោយសារ ចូលចិត្តខាងស្រាវជ្រាវ មិនចូលចិត្តធ្វើការនៅការិយាល័យ ទើបលោកសម្រេចចិត្តទៅធ្វើការនៅរាជបណ្ឌិត្យសភាវិញរហូតដល់ សព្វថ្ងៃនេះ។

នៅរាជបណ្ឌិតសភាកម្ពុជា លោកបានសហការជាមួយដៃគូមួយចំនួនបង្កើតថ្នាក់អនុបណ្ឌិតមុនគេ បំផុតនៅក្នុងស្រុកខ្មែរ នៅក្នុងឆ្នាំ២០០០ ហើយក្រោយមកបង្កើតបានវិទ្យាស្ថានទំនាក់ទំនងអន្តរជាតិមួយទៀត ក្នុងឆ្នាំ២០០៤។

លោកបណ្ឌិត សុខ ទូច ថ្លែងប្រាប់សារព័ត៌មានសប្បាយថា ក្នុងឆ្នាំ២០០០ លោកបានចូលរួមបង្កើតសាលាឯកជនមួយ តែលោកសុំមិនបញ្ចេញឈ្មោះទេ ដែលបណ្ដុះបណ្ដាលលើជំនាញថ្នាក់បណ្ឌិតដំបូងក្នុងប្រទេសកម្ពុជា។ ពាក្យថាថ្នាក់បណ្ឌិតនេះ គឺលោកជាអ្នកផ្ដួចផ្ដើមឲ្យមានមុនគេបំផុត នៅក្នុងស្រុកខ្មែរ តែក្រោយពីសាលានេះទទួលបានជោគជ័យ ក៏បានដេញលោកចេញ។ ក្រោយមកលោក សុខ ទូច បានទៅបង្កើតសាលាឲ្យគេមួយទៀត ដែលលោកមានតួនាទីជាសកលវិទ្យាធិការ ហើយការណោះ ប្រាក់កម្រៃដែលលោកទទួលបានប្រមាណ១៥០០ដុល្លារក្នុងមួយខែ។ ៦០% ដែលលោកទទួលបានពីប្រាក់កម្រៃនេះ លោកយកមកទុកធ្វើជាទុនសម្រាប់បង្កើតសាកលវិទ្យាល័យរបស់ខ្លួន មួយទៀតគឺសាកលវិទ្យាល័យខេមរៈ។

នៅឆ្នាំ២០០៤ លោកបានបង្កើតសាកលវិទ្យាល័យនេះឡើង។ មានម្ចាស់ភាគហ៊ុនជាច្រើនជួយជ្រោមជ្រែងសាលា ដែលគេឲ្យប្រាក់បៀវត្សសកលវិទ្យាធិការរូបនេះត្រឹមតែ១៥០ដុល្លារ ប៉ុណ្ណោះ។ ប្រាក់បៀវត្សទាំងនេះ លោកបានបង្វែរទុកជាអាហារូបករណ៍ដល់សិស្សទាំងអស់។ លោកបានចូលរួមបង្កើតវិទ្យាស្ថានទំនាក់ទំនងអន្តរជាតិ នៃរាជ្យបណ្ឌិតសភាកម្ពុជា ក្រោមចំណុះទីស្ដីការគណៈរដ្ឋមន្ត្រី និងបានបង្កើតថ្នាក់អនុបណ្ឌិតដំបូងបំផុតនៅស្រុកខ្មែរ ហើយក្រោយមកបានក្លាយជាអនុប្រធានវិទ្យាស្ថាននេះ។

ក្រោយពីបានរស់នៅជួបជុំគ្នាជាមួយប្រពន្ធ និងកូនទាំងពីរបានប្រាំពីរឆ្នាំ ភរិយារបស់លោក មិនចេះរស់នៅប្រទេសកម្ពុជា ក៏នាំកូនទាំងពីរទៅប្រទេសរុស្សីវិញ។ លោកថា ប្រពន្ធរបស់លោក ចង់ឲ្យរូបលោកចូលជាសញ្ជាតិរុស្សី និងត្រឡប់ទៅរស់នៅរុស្សីដែរ តែលោកបដិសេធ។ លោកថា “វា ជារឿងឈឺចាប់បំផុត… ធ្លាប់រស់នៅក្នុងស្ថានភាពអន់ឃ្លានមានស៊ី និងតស៊ូជាមួយគ្នាជិតម្ភៃឆ្នាំតែត្រូវបែកគ្នា…ពីរឆ្នាំបន្ទាប់ ពីគាត់ចាកចេញទៅធ្វើឲ្យខ្ញុំវិលវល់មែនទែន!“។

បណ្ឌិត វ័យក្មេងរូបនេះបញ្ជាក់ពីមូលហេតុមិនត្រឡប់ទៅរស់នៅជាមួយ ប្រពន្ធនិងកូនជាទីស្រឡាញ់នៅរុស្សីថា ហេតុផលតែមួយគត់គឺស្រឡាញ់និងចង់ជួយប្រទេសខ្មែរ។ “ខ្ញុំបានទៅធ្វើជាវាគ្មិននៅប្រទេសជាច្រើននៅជុំវិញពិភពលោក …បើទោះបីជានៅស្រុកគេស្អាតប៉ុណ្ណាក៏ដោយ ក៏ខ្ញុំមើលឃើញ និងចង់រស់នៅតែប្រទេសខ្មែរមួយគត់…”។

លោកបណ្ឌិត សុខ ទូច អះអាងថា បើទោះបីលោកបានបញ្ចប់សញ្ញាប័ត្របណ្ឌិត និងមានឯកទេសខាងនយោបាយយ៉ាងណាក៏ដោយ ក៏លោកមិនចូលធ្វើនយោបាយដែរ ពីព្រោះលោកចង់បង្ហាញអ្វីដែលជាការពិតចំពោះការយល់ឃើញរបស់លោកដល់សាធារណជន ឲ្យចេះវិភាគ និងថ្លឹងថ្លែងពីការពិត។ លោកថា ”ខ្ញុំចង់បង្រៀននិងនិយាយពីអ្វីដែលជាការពិត… នៅពេលដែលលោកចូលប្រឡូកក្នុងនយោបាយ លោកនឹងមិនអាចបញ្ចេញអ្វីដែលពិតបានទៀតទេ ពីព្រោះការនិយាយមិនពិតគឺជាយុទ្ធសាស្ត្រយកឈ្នះរបស់អ្នក នយោបាយ…”។

+ស្នាដៃបោះពុម្ភផ្សាយរបស់លោកបណ្ឌិត សុខ ទូច

-ចលនាភូមិមួយផលិតផលមួយ បោះពុម្ពឆ្នាំ២០០២

-តួនាទីអង្គការសហប្រជាជាតិ បោះពុម្ពឆ្នាំ២០០៣

-ទ្រឹស្ដីទំនាក់ទំនងអន្តរជាតិ បោះពុម្ពឆ្នាំ២០០៣

-ទំនាក់ទំនងរវាងកម្ពុជាជាមួយសហរដ្ឋអាមេរិក ចិន និងវៀតណាម បោះពុម្ពឆ្នាំ២០០៧

-វេទិកា បណ្ឌិតសភាលើកទី៣ ស្ដីពីខួបទី១៥ឆ្នាំ នៃកិច្ចព្រមព្រៀងសន្តិភាពក្រុងប៉ារីស ស្ដីពីដំណោះស្រាយនយោបាយរួមនៅកម្ពុជា បោះពុម្ពឆ្នាំ២០០៨

-ទំនាក់ទំនងអន្តរជាតិ កម្ពុជាក្រោមក្រសែភ្នែកមហាអំណាច បោះពុម្ពឆ្នាំ២០០៣

-ទស្សនាវដ្ដីវិទ្យាសាស្ត្ររបស់វិទ្យាស្ថានទំនាក់ទំនងអន្តរជាតិកម្ពុជា លេខ ១ បោះពុម្ពឆ្នាំ២០០៨

-ទស្សនាវដ្ដីវិទ្យាសាស្ត្ររបស់វិទ្យាស្ថានទំនាក់ទំនងអន្តរជាតិកម្ពុជា លេខ ២ បោះពុម្ពឆ្នាំ២០០៩

-ទស្សនាវដ្ដីវិទ្យាសាស្ត្ររបស់វិទ្យាស្ថានទំនាក់ទំនងអន្តរជាតិកម្ពុជា លេខ ៣ បោះពុម្ពឆ្នាំ២០១០

-ទំនាស់ព្រំដែនរវាងប្រទេសថៃនិងប្រទេសជិតខាង បោះពុម្ពឆ្នាំ២០១០

The post បណ្ឌិត សុខ ទូច ផ្តួចផ្តើមបង្កើតសាលារៀនថ្នាក់បណ្ឌិត តែក្រោយសាលាទទួលជោគជ័យ លោកក៏ត្រូវបានដេញចេញ appeared first on .

បង្ហាញប្រវត្តិសម្តេច ទៀ បាញ់ មេទ័ពដ៏ខ្លាំងពូកែ ដឹកនាំទ័ពវាយប្រឆាំងសត្រូវ នៅតំបន់ខេត្តកោះកុង ក្លាយជាអនុប្រធានបក្ស CPP

ឧកញ៉ាកោះក្របី — Fri, 24 Dec 2021 03:41:27 +0000

នាយឧត្ដមសេនីយ៍ ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ ត្រូវបានព្រះមហាក្សត្រកម្ពុជា ព្រះបាទសម្តេចព្រះបរមនាថ នរោត្តម សីហមុនី ព្រះចេញព្រះរាជក្រឹត្យ ប្រោសព្រះរាជទានគោរមងារ “សម្តេចពិជ័យសេនា” កាលពីខែកក្កដា ឆ្នាំ២០១៧។ លោកត្រូវបានអង្គសន្និបាតគណបក្សប្រជាជនកម្ពុជា នៅព្រឹកថ្ងៃសុក្រ ទី២៤ធ្នូនេះ បោះឆ្នោតជ្រើសតាំងជាអនុប្រធានគណបក្សប្រជាជនកម្ពុជា។

សារព័ត៌មានឧកញ៉ាញូស៍ សូមបើកកកាយបង្ហាញនូវប្រវត្តិ និងបទពិសោធន៍ការងារសំខាន់ៗរបស់ សម្តេច ទៀ បាញ់ ដើម្បីប្រិយមិត្តបានស្គាល់កាន់តែច្បាស់ពីឥស្សរជនជាន់ខ្ពស់ដ៏ល្បីក្នុងជួរាជរដ្ឋាភិបាលកម្ពុជា ដូចតទៅ៖

គិតមកត្រឹមខែធ្នូ ឆ្នាំ២០២១នេះ សម្តេចពិជ័យសេនា ទៀ បាញ់ មានអាយុ ៧៦ឆ្នាំ មានបងប្អូនបង្កើត ៥នាក់ កើតនៅភូមិកោះស្រឡៅ ឃុំកាពិ ស្រុកកោះកុង ខេត្តកោះកុង។ លោកមានឈ្មោះកំណើត “ទៀ សង្វាន” ជាកូនកសិករក្រីក្របំផុត។ បើតាមសៀវភៅ “ជនដែលត្រូវគេបាញ់” បានបង្ហាញ ដោយសារតែលោកឪពុក មានជំងឺហើយបានអនិច្ចកម្ម នាំឲ្យយុវជន ទៀ បាញ់ ដែលកាលណោះ មានអាយុទើបតែ ១១ ឆ្នាំ បានក្លាយជាអ្នកស៊ីឈ្នួលឡើងបេះផ្លែស្លាឲ្យអ្នកភូមិ និងរកត្រី ដើម្បីផ្គត់ផ្គង់គ្រួសារ។

នៅឆ្នាំ១៩៥៧ ទៀ សង្វាន ត្រូវបានម្តាយបញ្ជូនឲ្យទៅនៅវត្ត។ រហូតដល់ឆ្នាំ១៩៦០ សង្វាន (ទៀ បាញ់) មានអាយុ ១៥ ឆ្នាំ ពេលត្រឡប់មកផ្ទះឃើញមនុស្ស ៦ ទៅ ៧នាក់ នៅមុខផ្ទះគេ។ ពួកគេទាំងនោះ ជាប៉ូលិស និងជីវពលភូមិ មកសំឡុតគំរាមម្តាយ សង្វាន ឲ្យប្រគល់ប្អូនស្រីរបស់គេ ដែលទើបមានអាយុ ១៣ ឆ្នាំ ដើម្បីយកទៅជូនលោកកុម្មុយ សៀ ប៉ូលិស សម្រាប់សប្បាយខាងផ្លូវតណ្ហា។ សង្វាន ប្រកែកតវ៉ា និងគំរាមពួកទាំងនោះ មិនឲ្យយកប្អូនស្រីគេទៅដាច់ខាត ទោះគេត្រូវប្តូរជីវិតក៏ដោយ ក៏ពុំឲ្យពួកទាំងនោះ ធ្វើបាបប្អូនស្រីគេដែរ។

សៀវភៅដដែល បានបង្ហាញបន្តថា ដោយការជិះជាន់ ទើប ទៀ សង្វាន ចេញធ្វើការតស៊ូ គឺនៅឆ្នាំ១៩៦១ ដោយទាក់ទងជាមួយចលនាតស៊ូក្នុងព្រៃ រហូតដល់ត្រូវអាជ្ញាធរចាប់ធ្វើទារុណកម្ម និងឃុំឃាំង។ នៅថ្ងៃទី១០ ខែកក្កដា ឆ្នាំ១៩៦៥ គេដោះលែង សង្វាន ពីគុកដោយថ្នូរនឹងប្រាក់ ៥ពាន់រៀល ដែលបានពីការលក់ក្របី និងខ្សែកប្អូនស្រី ដែលទៅស៊ីឈ្នួលមើលកូនឲ្យថៅកែឡធ្យូង យកទៅឲ្យអាជ្ញាធរ។

មកដល់ថ្ងៃទី១៧ ខែកក្កដា ឆ្នាំ១៩៦៥ ក្រោយពីរួចខ្លួនបាន ៧ថ្ងៃ ក្រុមជីវពល ៥នាក់ និងប៉ូលិស ២នាក់ បានមកតាមចាប់សង្វាន និងមនុស្សម្នាក់ទៀត ឈ្មោះ តា កៅ។ ពួកគេបានចាប់អ្នកទាំងពីរ ចងដៃ បណ្ដើរយកទៅបាញ់ចោល នៅជើងភ្នំកោះអណ្ដែត។ ក៏ប៉ុន្តែចៃដន្យ យុវជន សង្វាន មិនស្លាប់ ហើយបានរត់ចូលព្រៃ រួចខ្លួន។ ចាប់ពីពេលនោះមក ស្ថានភាពទាំងនោះ បានជំរុញឲ្យយុវជន ទៀ សង្វាន ធ្វើចលនាតស៊ូ ក្នុងព្រៃជាបន្តបន្ទាប់ និងក្លាយជាមេទ័ពដ៏ខ្លាំងពូកែ ដឹកនាំទ័ពវាយប្រឆាំងសត្រូវ នៅតំបន់ខេត្តកោះកុង តាំងពីថ្ងៃទី១៧ ខែកក្កដា ឆ្នាំ១៩៦៥ រហូតចូលរួមសកម្មភាពរំដោះប្រទេស ខែមករា ឆ្នាំ១៩៧៩ ពីរបបប្រល័យពូជសាសន៍ ប៉ុល ពត។ នៅចន្លោះឆ្នាំពីការធ្វើចលនាតស៊ូដ៏ស្វិតស្វាញនោះ មនុស្សជាច្រើនក្នុងភូមិ និងក្រុមអ្នកតស៊ូ បានហៅឈ្មោះលោកពី ទៀ សង្វាន ទៅជាឈ្មោះ ទៀ បាញ់ ដោយលួចលាក់ ហើយឈ្មោះនេះ បានត្រូវប្រើរហូតមកដល់សព្វថ្ងៃ។

ឯកសារបង្ហាញទៀតថា ទៀ សង្វាន បានរៀបការជាមួយភរិយា ឈ្មោះ តៅ តឿន នៅភូមិគិរីវង្ស នាថ្ងៃទី៤ ខែមេសា ឆ្នាំ១៩៧៥ នៅក្នុងព្រៃ ក្រោមការប្រកាសជាផ្លូវការរបស់លោក សាយ ភូថង ដែលត្រូវជាចាស់ទុំ និងឪពុកមារបស់សម្តេច ទៀ បាញ់ ផង។ សម្តេច ទៀ បាញ់ មានកូនពីរនាក់ គឺកូនច្បងទី១ ឈ្មោះ ទៀ ស្យាម និងកូនប្រុសទី២ ឈ្មោះ ទៀ សីហា។

តទៅនេះសារព័ត៌មានឧកញ៉ាញូស៍ បន្តបង្ហាញពីប្រវត្តិការងាររបស់សម្តេចពិជ័យសេនា ទៀ បាញ់៖

នៅឆ្នាំ១៩៧៩៖ ប្រធានយោធាខេត្តកោះកុង
ខែកក្កដា ឆ្នាំ១៩៧៩៖ ប្រធានស្នងការហ្វឹកហ្វឺនអគ្គសេនាធិការក្រសួងការពារជាតិ
ឆ្នាំ១៩៧៩-១៩៨០៖ អនុប្រធានអគ្គសេនាធិការទទួលបន្ទុកវិទ្យុទាក់ទងអាកាសចរ
ឆ្នាំ១៩៨០-១៩៨២៖ អនុរដ្ឋមន្ត្រីក្រសួងការពារប្រទេស ទទួលបន្ទុកវិទ្យុទាក់ទងអាកាសចរ បច្ចេកទេស ហិរញ្ញវត្ថុ និងកិច្ចទាក់ទងអន្តរជាតិយោធា
ឆ្នាំ១៩៨២-១៩៨៤៖ រដ្ឋមន្ត្រីក្រសួងគមនាគមន៍ ដឹកជញ្ជូន និងប្រៃសណីយ៍
ឆ្នាំ១៩៨៤-១៩៨៧៖ អនុរដ្ឋមន្ត្រីក្រុមប្រឹក្សារដ្ឋមន្ត្រី និងជារដ្ឋមន្ត្រីក្រសួងគមនាគមន៍ដឹកជញ្ជូន និងប្រៃសណីយ៍
ឆ្នាំ១៩៨៧-១៩៨៨៖ អនុរដ្ឋមន្ត្រីក្រុមប្រឹក្សារដ្ឋមន្ត្រី និងជារដ្ឋមន្ត្រីក្រសួងការពារជាតិ
ឆ្នាំ១៩៨៨-១៩៩៣៖ សមាជិករដ្ឋសភា អនុរដ្ឋមន្ត្រីក្រសួងការពារជាតិ ក្នុងរដ្ឋាភិបាលបណ្តោះអាសន្ន និងជាសហរដ្ឋមន្ត្រីក្រសួងការពារជាតិ
ឆ្នាំ១៩៩៣-១៩៩៤៖ សហរដ្ឋមន្ត្រីក្រសួងការពារជាតិ
ឆ្នាំ១៩៩៤-១៩៩៥៖ សហអគ្គមេបញ្ជាការរង និងជាសហរដ្ឋមន្ត្រីក្រសួងការពារជាតិ
ឆ្នាំ១៩៩៥-១៩៩៨៖ ទេសរដ្ឋមន្ត្រី និងជាសហរដ្ឋមន្ត្រីក្រសួងការពារជាតិ
ឆ្នាំ១៩៩៨-២០០០៖ នាយឧត្ដមសេនីយ៍ផ្កាយមាស៤ ទេសរដ្ឋមន្ត្រី និងសហរដ្ឋមន្ត្រីក្រសួងការពារជាតិ
ឆ្នាំ២០០០-២០០៤៖ ឧបនាយករដ្ឋមន្ត្រី សហរដ្ឋមន្ត្រីក្រសួងការពារជាតិ
២២មីនា ឆ្នាំ២០០៦ មកដល់បច្ចុប្បន្ន៖ ជាឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ

គួររម្លឹកថា អង្គសន្និបាតគណបក្សប្រជាជនកម្ពុជា នៅព្រឹកថ្ងៃសុក្រ ទី២៤ធ្នូនេះ បោះឆ្នោតជ្រើសតាំងជាអនុប្រធានគណបក្សប្រជាជនកម្ពុជា គឺសម្តេចពិជ័យសេនា ទៀ បាញ់ និងលោកជំទាវ ម៉ែន សំអន ដែលជាសមាជិកអចិន្រ្តៃយ៍ នៃគណបក្សប្រជាជនកម្ពុជា។

ការជ្រើសតាំងឥស្សរជនទាំងពីររូបនេះ បានធ្វើឡើងនៅក្នុងអង្គសន្និបាតគណៈកម្មាធិការកណ្តាល លើកទី៤៣ អាណត្តិទី៥ របស់គណបក្សប្រជាជនកម្ពុជា ក្រោមវត្តមានសម្តេច ហ៊ុន សែន ប្រធានគណបក្សប្រជាជនកម្ពុជា និងសម្តេច ហេង សំរិន ប្រធានកិត្តិយសគណបក្សប្រជាជនកម្ពុជា។

គណបក្សប្រជាជនកម្ពុជា ដែលជាគណបក្សធំជាងគេបំផុតនៅកម្ពុជា ដែលកាន់អំណាច៦អាណត្តិមកនេះ មានសមាជិកគណៈកម្មាធិការកណ្តាលចំនួន ៨៣៧នាក់ ក្នុងនោះមានសមាជិកគណៈកម្មាធិការអចិន្រ្តៃយ៍ ចំនួន៣៧នាក់ផងដែរ៕

The post បង្ហាញប្រវត្តិសម្តេច ទៀ បាញ់ មេទ័ពដ៏ខ្លាំងពូកែ ដឹកនាំទ័ពវាយប្រឆាំងសត្រូវ នៅតំបន់ខេត្តកោះកុង ក្លាយជាអនុប្រធានបក្ស CPP appeared first on .

ប្រវត្តិ

បណ្ឌិត សុខ ទូច ផ្តួចផ្តើមបង្កើតសាលារៀនថ្នាក់បណ្ឌិត តែ​ក្រោយសាលា​​ទទួល​​ជោគ​ជ័យ​ លោកក៏​ត្រូវបាន​ដេញ​ចេញ​

បណ្ឌិត សុខ ទូច ផ្តួចផ្តើមបង្កើតសាលារៀនថ្នាក់បណ្ឌិត តែក្រោយសាលាទទួលជោគជ័យ លោកក៏ត្រូវបានដេញចេញ