របាយការណ៍ធនាគារជាតិនៃកម្ពុជា បានឱ្យដឹងថា ប្រាក់រៀលបន្តមានស្ថិរភាពល្អប្រសើរ ព្រមទាំងមាននិន្នាការឡើងថ្លៃទៀតផង ដោយសារកំណើនតម្រូវការប្រាក់រៀល សម្រាប់ប្រើប្រាស់នៅក្នុងវិស័យកសិកម្ម ការទូទាត់អេឡិចត្រូនិក និងការបង់ពន្ធ។

លើសពីនេះ ការប្រែប្រួលរបស់អត្រាប្តូរប្រាក់ទៅតាមកត្តារដូវកាលក៏មានកម្រិតផងដែរ ដែលកត្តានេះបានរួមចំណែកថែមទៀតលើការបង្កើនទំនុកចិត្តលើប្រាក់រៀល។ ជាក់ស្តែង អត្រាប្តូរប្រាក់នាត្រីមាសទី២ បានប្រែប្រួលត្រឹមតែ -០,៣% ធៀបនឹងត្រីមាសទី១ ឆ្នាំ២០២៥ ដែលជាកម្រិតទាបជាងការប្រែប្រួលមុនវិបត្តិកូវីដ-១៩ (០,៩%)។

បើតាមធនាគារជាតិ ជាមធ្យម អត្រាប្តូរប្រាក់នៅក្នុងឆមាសទី១ នេះមានកម្រិត ៤.០១១ រៀលក្នុងមួយដុល្លារអាម៉េរិក ដែលប្រាក់រៀលបានឡើងថ្លៃ ១,៦% ធៀបនឹងគ្រាដូចគ្នាឆ្នាំ២០២៤ (ប្រមាណ៤.០៧៥ រៀល) និងឡើងថ្លៃ ០,៧% ធៀបនឹងគ្រាដូចគ្នាឆ្នាំ២០១៦-២០១៩ (ប្រមាណ៤.០៣៩ រៀល)។

គួរបញ្ជាក់ថា អត្រាប្តូរប្រាក់ផ្លូវការរបស់ធនាគារជាតិនៃកម្ពុជា ត្រូវបានគណនាចេញពីអត្រាប្តូរប្រាក់ មធ្យមថ្លឹងរបស់ទីផ្សារប្តូរប្រាក់អន្តរធនាគារនៅលើផ្ទាលធនាគារជាតិនៃកម្ពុជា (NBCP)។ ប្រតិបត្តិការប្តូរប្រាក់លើ NBCP មាន ១,៨ ប៊ីលានដុល្លារអាមេរិក (៨៦៧ ប្រតិបត្តិការ) ដែលបានកើន ៤៣,៤% ធៀបនឹងគ្រាដូចគ្នាឆ្នាំមុន (១,២ ប៊ីលានដុល្លារអាមេរិក ស្មើនឹង ៩៤៨ ប្រតិបត្តិការ)។

កំណើននេះបង្ហាញថា អត្រាប្តូរប្រាក់ផ្លូវការរបស់ធនាគារជាតិនៃកម្ពុជាកាន់តែឆ្លុះបញ្ចាំងពីអត្រាប្តូរប្រាក់ នៅលើទីផ្សារ ,ធនាគារជាតិនៃកម្ពុជាបាននិងកំពុងដើរតួនាទីយ៉ាងសំខាន់នៅក្នុងការអភិវឌ្ឍទីផ្សារប្តូរប្រាក់ ជាមួយគ្នានេះ គ្រឹះស្ថានធនាគារកាន់តែមានឥទ្ធិពលនៅក្នុងការកំណត់ថ្លៃនៅលើទីផ្សារប្តូរ ប្រាក់ធៀបនឹងអាជីវករប្តូរប្រាក់៕

The post ឆមាសទី១ ឆ្នាំ២០២៥នេះ អត្រាប្តូរប្រាក់រៀលឡើងថ្លៃ១,៦% ធៀបនឹងឆ្នាំ២០២៤ appeared first on .

គោលបំណងនៃការរៀបចំសិក្ខាសាលានេះ គឺដើម្បីអបអរសាទរខួបលើកទី៤៥ នៃការដាក់ឱ្យចរាចរប្រាក់រៀលឡើងវិញ (២០ មីនា ១៩៨០ -២០ មីនា ២០២៥) និងចែករំលែកចំណេះដឹង អត្ថប្រយោជន៍នៃការប្រើប្រាស់ប្រាក់រៀលសម្រាប់សង្គម និងសេដ្ឋកិច្ចកម្ពុជា ព្រមទាំងតួនាទីរបស់ភាគីពាក់ព័ន្ធក្នុងការជំរុញការប្រើប្រាស់ប្រាក់រៀល។

ការរៀបចំយុទ្ធសាស្រ្តថ្នាក់ជាតិ លើកកម្ពស់ប្រាក់រៀល និងការបង្កើតក្រុមការងារបច្ចេកទេសអន្តរក្រសួងក្នុងការតាមដានវឌ្ឍនភាព និងបញ្ហាប្រឈមនៃគោលនយោបាយលើកកម្ពស់ប្រាក់រៀល គឺជាការងារអាទិភាពមួយ ដើម្បីធានាថាការលើកកម្ពស់ប្រាក់រៀលនឹងប្រព្រឹត្តទៅប្រកបដោយសង្គតិភាពនិងបន្តមានកំណើនប្រកបដោយនិរន្តរភាព។

ថ្លែងក្នុងពិធីបើកសិក្ខាសាលា លោក ជាម យៀប អនុប្រធានទី១ រដ្ឋសភា បានថ្លែងថា៖«សិក្ខាសាលាមានគោលបំណងលើក កម្ពស់ការយល់ដឹង និងការចូលរួមរបស់ក្រសួង-ស្ថាប័នពាក់ព័ន្ធ និងសាធារណជន ជាពិសេសពីស្ថាប័ននីតិប្បញ្ញត្តិរបស់កម្ពុជា ក្នុងការគាំទ្រប្រាក់រៀល ក៏ដូចជាការអបអរសាទរខួបលើកទី៤៥ នៃការដាក់ឲ្យចរាចរប្រាក់រៀលឡើងវិញ (២០ មីនា ឆ្នាំ១៩៨០ – ២០ មីនា ឆ្នាំ២០២៥)»។

លោក បានគូសបញ្ជាក់ថា៖ក្នុងនាមរដ្ឋសភានៃព្រះរាជាណាចក្រកម្ពុជាសូមគាំទ្រទាំងស្រុងដល់ធនាគារជាតិនៃកម្ពុជាក្នុងការពង្រឹងប្រសិទ្ធភាពគោលនយោបាយរូបិយវត្ថុក្របខ័ណ្ឌនយោបាយរូបិយវត្ថុដែលបានធ្វើទំនើបកម្មជាបន្តបន្ទាប់ជាពិសេសក្នុងការឆ្លើយតបទៅនឹងយុគសម័យឌីជីថល ក៏ដូចជាការជំរុញឱ្យមានការប្រើប្រាស់ប្រាក់រៀលទូលំទូលាយ ពីគ្រប់ភាគីពាក់ព័ន្ធទាំងអស់ ដើម្បីរក្សានូវអធិបតេយ្យជាតិធ្វើឱ្យសេរីភាពនៃសេដ្ឋកិច្ចកាន់តែមានភាពប្រសើរឡើងនិងពង្រឹងនូវអត្តសញ្ញាណជាតិ និងភាពធន់។

លោកអនុប្រធានទី១រដ្ឋសភា បានមានប្រសាសន៍លើកឡើងថា« ប្រាក់រៀល បានលើកស្ទួយអត្តសញ្ញាណជាតិ, បានកសាងជំនឿទុកចិត្ត, ជួយជំរុញសាមគ្គីភាព និងបណ្តុះការបង្រួបបង្រួម និងស្មារតីជាតិនិយមនៅក្នុងព្រះរាជាណាចក្រកម្ពុជា។ ដូច្នេះ ការជំរុញការប្រើប្រាស់ប្រាក់រៀលកាន់តែច្រើន កាន់តែជំរុញប្រសិទ្ធភាពគោលនយោបាយរូបិយវត្ថុ ដែលជួយក្នុងការគ្រប់គ្រងគោលនយោបាយម៉ាក្រូសេដ្ឋកិច្ច និងអភិវឌ្ឍសង្គម-សេដ្ឋកិច្ចប្រកបដោយចីរភាព»។

លោកស្រី ជា សិរី ទេសាភិបាលធនាគារជាតិនៃកម្ពុជា បានមានប្រសាសន៍ថា៖កាលពី៤៥ឆ្នាំមុន ប្រាក់រៀលបានត្រូវដាក់ចេញឱ្យចរាចរឡើងវិញដើម្បីរួមចំណែកពង្រឹងអត្តសញ្ញាណជាតិ អធិបតេយ្យភាពជាតិនិង គាំទ្រដំណើរការស្តារសេដ្ឋកិច្ចជាតិចេញពីបាតដៃទទេក្រោយរបបប៉ុលពតដែលបានបំផ្លាញរាល់ខឿនសេដ្ឋកិច្ច និងសង្គមជាតិ។

ដោយសារការអូសបន្លាយសង្គ្រាមស៊ីវិលជាងបីទស្សវត្សរ៍ ជាពិសេសរបបខ្មែរក្រហម បានបំបាត់ប្រាក់រៀលមិនឱ្យចរាចរទៀតនោះទំនុកចិត្តមកលើប្រាក់រៀលបានបាត់បង់ទាំងស្រុង ហើយការស្តារទំនុកចិត្តឡើងវិញ វាជាការលំបាកបំផុត។លើសពីនេះការហូរចូលយ៉ាងសន្ធឹកសន្ធាប់នូវប្រាក់ដុល្លារក្នុងដើមទស្សវត្សរ៍១៩៩០ ធ្វើឱ្យប្រជាពលរដ្ឋកម្ពុជាទទួលយកប្រាក់ដុល្លារអាមេរិកមកប្រើប្រាស់ក្នុងជីវភាពប្រចាំថ្ងៃជំនួសរូបិយវត្ថុជាតិ ។

លោកស្រីទេសាភិបាល បានលើកឡើងថា៖« ទោះជាយ៉ាងណាក៏ដោយ នារយៈពេល២ទស្សវត្សរ៍ចុងក្រោយក្រោមដំបូលសុខសន្តិភាពដែលទទួលបានពីនយោបាយឈ្នះៗរបស់សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា និងជាអតីតនាយករដ្ឋមន្ត្រីនៃព្រះរាជាណាចក្រកម្ពុជា សេដ្ឋកិច្ចមានវឌ្ឍនភាពយ៉ាងឆាប់រហ័សស្ទើរគ្រប់វិស័យ ហើយតម្លៃប្រាក់រៀលក៏មានស្ថិរភាពយ៉ាងល្អប្រសើរ ជាមួយកម្រិតទាបនៃអតិផរណា»៕

The post ធនាគារជាតិនៃកម្ពុជា និងរដ្ឋសភា រួមគ្នាជួយលើកកម្ពស់«ប្រាក់រៀល» appeared first on .

ក្នុងសិក្ខាសាលាស្តីពីការលើកកម្ពស់បរិយាបន្នហិរញ្ញវត្ថុ និងការប្រើប្រាស់ប្រាក់រៀល កាលពីថ្ងៃទី៩ ខែតុលា ឆ្នាំ២០២៤ នៅមណ្ឌលសិក្សាបច្ចេកទេសធនាគារ លោក យឹម លាត ទេសាភិបាលរងធនាគារជាតិនៃកម្ពុជា បានមានប្រសាសន៍ថា ការប្រើប្រាស់ប្រាក់រៀលកាន់តែច្រើន មានសារៈសំខាន់ណាស់ក្នុងការពង្រឹងប្រសិទ្ធភាព ការអនុវត្តនយោបាយម៉ាក្រូសេដ្ឋកិច្ចជាតិ ជាពិសេសក្នុងការរក្សាអត្រាអតិផរណាឱ្យស្ថិតនៅកម្រិតទាប គ្រប់គ្រងបានកម្រិតអត្រាការប្រាក់ កាត់បន្ថយចំណាយប្រតិបត្តិការ ជំរុញការនាំចេញ ជំរុញការវិនិយោគនិងការប្រើប្រាស់ បង្កើនទុនបម្រុងអន្តរជាតិ បង្កើនសុខុមាលភាពសង្គម ទទួលចំណូលពីការបោះពុម្ពក្រដាសប្រាក់ ព្រមទាំងពង្រឹងអត្តសញ្ញាណជាតិ និងអធិបតេយ្យជាតិ។

លោក យឹម លាត បានថ្លែងបន្តថា ថ្មីៗនេះ តាមរយៈរបាយការណ៍វាយតម្លៃស្ថានភាពសេដកិច្ច មូលនិធិរូបិយវត្ថុអន្តរជាតិបានទទួលស្គាល់ថា ការបង្កើនការប្រើប្រាស់ប្រាក់រៀលនឹងជួយបង្កើនភាពធនរបស់សេដ្ឋកិច្ច ទប់ទល់នឹងវិបត្តិសេដ្ឋកិច្ចដែលអាចកើតឡើងជាយថាហេតុ។

លោកទេសាភិបាលរង បានលើកទឹកចិត្តឱ្យក្រុមហ៊ុន-សហគ្រាស ម្ចាស់អាជីវកម្ម គ្រឹះស្ថាន ធនាគារនិងហិរញ្ញវត្ថុ វិស័យឯកជននិងគ្រប់ភាគីពាក់ព័ន្ធទាំងអស់បង្កើនការប្រើប្រាស់ឱ្យបានទូលំទូលាយ ដើម្បីជាប្រយោជន៍ដល់ខ្លួនឯង និងសេដ្ឋកិច្ចជាតិ ជាពិសេស ការបើកប្រាក់បៀរវត្សរ៍ជាប្រាក់រៀលជូនបុគ្គលិក ការប្រើប្រាស់ប្រាក់រៀលនៅក្នុងប្រតិបត្តិការរបស់ខ្លួនកាន់តែច្រើនឡើងតាមរយៈការជំរុញការបិទស្លាកតម្លៃជារៀល និងការទូទាត់ជាប្រាក់រៀល ការកំណត់អត្រាប្តូរដែលអនុគ្រោះដល់អ្នកប្រើប្រាស់ប្រាក់រៀល ការផ្តល់ឥណទាននិងការសន្សំជាប្រាក់រៀលក្នុងលក្ខខណ្ឌប្រសើរជាងប្រាក់ដុល្លារអាមេរិក ។ល។

យោងតាមរបាយការណ៍របសធនាគារជាតិនៃកម្ពុជា ការទូទាត់ជាប្រាក់រៀលតាមប្រព័ន្ធអេឡិចត្រូនិកបានកើនឡើងយ៉ាងឆាប់រហ័ស ដែលក្នុងឆមាសទី១ ឆ្នាំ២០២៤នេះ មានកំណើន ១,៨ដង ធៀបនឹងគ្រាដូចគ្នាឆ្នាំមុន និង ២,៨ដង ធៀបនឹងឆមាសទី១ ឆ្នាំ២០២២៕

The post ធនាគារជាតិនៃកម្ពុជា ជំរុញឱ្យគ្រប់ភាគីជួយបង្កើនការប្រើប្រាស់ប្រាក់រៀលជាប្រយោជន៍ដល់សេដ្ឋកិច្ចជាតិ appeared first on .

របាយការណ៍ធនាគារជាតិប្រចាំឆមាសទី១ ឆ្នាំ២០២៤បានឱ្យដឹងថា អត្រាប្តូរប្រាក់រៀលធៀបនឹងដុល្លារអាមេរិក មានកម្រិតជាមធ្យម ៤.០៧៥ រៀលក្នុងមួយដុល្លារអាមេរិក ដោយប្រាក់រៀលបានកើនថ្លៃ ០,៤% ធៀបនឹងឆមាសទី១ឆ្នាំមុន (៤.០៩៤ រៀល) បើទោះជាសន្ទស្សន៍ប្រាក់ដុល្លារអាមេរិក ជាមធ្យមមានកម្រិត ១០៤ ដោយបានកើនថ្លៃ ១,៤% ធៀបនឹងគ្រា ដូចគ្នាឆ្នាំមុន។

ធនាគារជាតិនៃកម្ពុជាបន្តថា ប្រាក់រៀលបន្តមានស្ថិរភាពខណៈដែលតម្លៃរូបិយប័ណ្ណប្រទេសមួយចំនួន បានប្រែប្រួលគួរឱ្យកត់សម្គាល់ធៀបនឹងដុល្លារអាមេរិក ដូចជា យ៉េនជប៉ុនថយថ្លៃ ១១,៣% ដុងវៀតណាមថយថ្លៃ ៥% បាតថៃថយថ្លៃ ៤,១% ប្រាក់អឺរ៉ូឡើងថ្លៃ ១% ផោនអង់គ្លេសឡើងថ្លៃ ៣,៣% និងយ៉ន់ចិន ឡើងថ្លៃ ៣,២%។

បើតាមធនាគារជាតិ ប្រតិបត្តិការជួញដូរប្រាក់ដុល្លារអាមេរិករវាងគ្រឹះស្ថានធនាគារនិងហិរញ្ញវត្ថុនៅលើផ្លែតហ្វម NBCP មានចំនួន ១,២ ប៊ីលានដុល្លារ ដែលបានកើន ២២,៣% ធៀបនឹងគ្រា ដូចគ្នាឆ្នាំមុន មាននិន្នាការថយចុះ ដែលបានជួយបន្ទាបសម្ពាធអតិផរណាពីការនាំចូល។ចំណែកអត្រាប្តូរប្រាក់ប្រសិទ្ធភាពពិតថ្លឹងតាមការនាំចេញ (EREER) ថយចុះ ២,៥% ដែលបណ្តាលមកពីអត្រាប្តូរប្រាក់ប្រសិទ្ធភាពនាមថ្លឹងតាមការនាំចេញ (ENEER) បានថយចុះ -៥,៨% បើទោះជាអត្រាអតិផរណារបស់កម្ពុជាមានកម្រិតទាបជាងប្រទេសដៃគូនាំចេញ។

ធនាគារជាតិបានគូសបញ្ជាក់ថា អត្រាប្តូរប្រាក់បន្តមានស្ថិរភាពនិងបានឡើងថ្លៃបន្តិចធៀបនឹងឆ្នាំមុន ដោយសារភាពប្រសើរជាងមុននៃសកម្មភាពសេដ្ឋកិច្ចនិងប្រតិបត្តិការសារពើពន្ធ និងការអនុវត្តនយោបាយរូបិយវត្ថុប្រកបដោយ ភាពប្រុងប្រយ័ត្នរបស់ធនាគារជាតិនៃកម្ពុជា ក្នុងការគ្រប់គ្រងស្ថានភាពសន្ទនីយភាព។ជាមួយគ្នានេះ ស្ថិរភាពអត្រាប្តូរប្រាក់បានរួមចំណែករក្សាស្ថិរភាពថ្លៃនិងពង្រឹងជំនឿទុកចិត្តវិនិយោគិនមកលើសេដ្ឋកិច្ចកម្ពុជា។ទន្ទឹមនេះ ទុនបម្រុងអន្តរជាតិមានកម្រិតខ្ពស់គ្រប់គ្រាន់ ដែលបម្រើជាជន្ទូលដំរឹងមាំនៅក្នុងការអនុវត្ត នយោបាយអត្រាប្តូរប្រាក់៕

The post ធនាគារជាតិនៃកម្ពុជា៖ ប្រាក់រៀលបន្តមានស្ថិរភាព ខណៈដែលតម្លៃរូបិយប័ណ្ណប្រទេសមួយចំនួនបានប្រែប្រួលគួរឱ្យកត់សម្គាល់ appeared first on .