ប្រាវីត វុងស៊ូវ៉ាន់

អ្នកនយោបាយថៃជាន់ខ្ពស់ម្នាក់ ប្រឈមនឹងការកាត់ទោស ជុំវិញការទះកំភ្លៀងអ្នកសារព័ត៌មាន

ឧកញ៉ាសំពៅ — Thu, 22 Aug 2024 07:52:24 +0000

រដ្ឋសភាថៃបានប្រកាសថា ពួកគេនឹងបើកការស៊ើបអង្កេតលើអ្នកនយោបាយជាន់ខ្ពស់ និងជាអតីតមេទ័ព លោក ប្រាវីត វុងស៊ូវ៉ាន់ ជុំវិញការទះកំភ្លៀងអ្នកសារព័ត៌មានម្នាក់ បន្ទាប់ពីព្យាយាមសួរសំណួរទៅកាន់លោក។

យោងតាមការចុះផ្សាយពីសារព័ត៌មាន CNA បានបង្ហាញថា រដ្ឋមន្ត្រីជាន់ខ្ពស់រូបនេះ បានយកដៃទះកំភ្លៀង ទៅលើអ្នកសារព័ត៌មានពីស្ថាប័ន ThaiPBS កាលពីថ្ងៃទី១៦ ខែសីហា ក្រោយនារីម្នាក់នោះសួរទៅកាន់លោក ប្រាវីត ជុំវិញការតែងតាំងអ្នកនាង ផែថុងថាន ស៊ីណាវ៉ាត់ត្រា ជានាយករដ្ឋមន្ត្រីថៃ។

#Thailand: Women Press Freedom strongly condemns Thai politician Prawit Wongsuwon for slapping @ThaiPBSWorld journalist #DuangthipYiamphop as she approached him with a question. This violent behavior is unacceptable, especially from an elected official. We demand immediate… pic.twitter.com/PetROVWw0V
— #WomenInJournalism (@CFWIJ) August 19, 2024

ទន្ទឹមនឹងនោះ រដ្ឋសភាក៏បានអះអាងថា ពួកគេនឹងបើកការស៊ើបអង្កេតយ៉ាងតឹងរ៉ឹងបំផុត ជុំវិញករណីមួយនេះ បន្ទាប់ពីស្ថាប័នសារព័ត៌មាន ThaiPBS បានដាក់ពាក្យបណ្ដឹងជាផ្លូវការភ្លាមៗ។

សូមជម្រាបដែរថា លោក ប្រាវីត កំពុងប្រឈមមុខជាមួយនឹងការព្យួរឈ្មោះ ពីសមាជិករដ្ឋសភា ឬអាចហាមឃាត់ការធ្វើនយោបាយពេញមួយជីវិត បើសិនជារកឃើញថាបានល្មើសជាមួយនឹងច្បាប់ ខណៈសមាគមអ្នកកាសែតថៃ បានចាត់ទុកទង្វើនេះថា ជាការប្រើអំពើហិង្សា និងគម្រាមកំហែងលើសិទ្ធសេរីភាពអ្នកសារព័ត៌មាន៕

The post អ្នកនយោបាយថៃជាន់ខ្ពស់ម្នាក់ ប្រឈមនឹងការកាត់ទោស ជុំវិញការទះកំភ្លៀងអ្នកសារព័ត៌មាន appeared first on .

ឧបនាយករដ្ឋមន្ត្រីថៃ ប្រាវីត សន្យាលាលែងពីសមាជិកសភា តែនៅកាន់តំណែងប្រធានបក្ស

ឧកញ៉ាសំពៅ — Thu, 31 Aug 2023 07:50:48 +0000

ឧបនាយករដ្ឋមន្ត្រីថៃ លោក ប្រាវីត វុងស៊ូវ៉ាន់ បាននិយាយនាថ្ងៃព្រហស្បតិ៍ ទី៣១ ខែសីហានេះថា លោកនឹងលាលែងចេញពីតំណែងជាសមាជិកសភា ប៉ុន្តែនៅបន្តដើរតួជាមេដឹកនាំគណបក្ស Palang Pracharath ហៅកាត់ PPRP ដដែល។ នេះបើតាមការចុះផ្សាយពីសារព័ត៌មាន Bangkokpost។

លោក ប្រាវីត បាននិយាយទៅកាន់អ្នកសារព័ត៌មានថា៖ សូមកុំសួរខ្ញុំពាក់ព័ន្ធនឹងនយោបាយអី ព្រោះថាឆាប់ៗនេះ ខ្ញុំនឹងដើរតួតែជាមេបក្សប៉ុណ្ណោះ និងលែងសូវបង្ហាញមុខលើឆាកនយោបាយទៀតដែរ។

សូមរំលឹកដែរថា លោក ប្រាវីត មិនបានបញ្ជាក់លំអិតពីកាលបរិច្ឆេទលាលែងពីតំណែងជាសមាជិកសភាឡើយ ប៉ុន្តែលោកបានបញ្ជាក់យ៉ាងច្បាស់ថា តំណែងជាប្រធានបក្ស PPRP គឺលោកនៅបន្តកាន់ដដែល៕

The post ឧបនាយករដ្ឋមន្ត្រីថៃ ប្រាវីត សន្យាលាលែងពីសមាជិកសភា តែនៅកាន់តំណែងប្រធានបក្ស appeared first on .

បើអ្នកនយោបាយវ័យក្មេង Pita មិនជាប់ជានាយករដ្ឋមន្ត្រី តើបេក្ខភាពរូបណាមានសង្ឃឹមដឹកនាំប្រទេសថៃ?

ឧកញ៉ាសំពៅ — Thu, 13 Jul 2023 04:55:00 +0000

សម័យប្រជុំសភា និងព្រឹទ្ធសភាថៃ ក្នុងការសម្រេចជ្រើសរើសនាយករដ្ឋមន្ត្រីថ្មី កំពុងធ្វើឡើង ខណៈលទ្ធផលសម្រេចចុងក្រោយ អាចនឹងប្រកាសនារសៀលនេះ។

បេក្ខភាពដែលកំពុងមានសម្លេងគាំទ្រខ្លាំងគឺ លោក ភីថា លីមចារើនរ៉ាត់ ដែលជាមេបក្សឆ្ពោះទៅមុខ (MFP) ហើយលោកត្រូវការសម្លេងគាំទ្រ ៦៤សម្លេងទៀតប៉ុណ្ណោះ ដើម្បីអាចបង្កើតរដ្ឋាភិបាលថ្មីមួយ ប៉ុន្តែជាមួយគ្នានោះ ភីថា ក៏កំពុងជាប់ខ្លួនជាមួយរឿងក្ដីធំៗ ២ ដែលអាចធ្វើឲ្យលោក របូតសិទ្ធជាបេក្ខភាពនាយករដ្ឋមន្ត្រីបានផងដែរ។

តើមានរឿងអ្វីកើតឡើង បើសិនជាលោក ភីថា មិនអាចទទួលបានសម្លេងគាំទ្រគ្រប់គ្រាន់ ក្នុងការបោះឆ្នោតដោយរដ្ឋសភាលើកទីមួយ?

យោងតាមការចុះផ្សាយពីសារព័ត៌មាន AOL បានបង្ហាញថា ក្នុងករណីលោកភីថា មិនទទួលបានការគាំទ្រគ្រប់គ្រាន់ សម្រាប់ការបោះឆ្នោតនាថ្ងៃទី ១៣ ខែកក្កដានេះ គណបក្សចម្រុះរបស់លោក អាចចាត់លោកជាតំណាងបក្សម្ដងទៀត ដោយមានការគាំទ្រពីគណបក្សភឿថៃ ដែលជាសម្ព័ន្ធមិត្ត។

ប៉ុន្តែបើសិនជា គណបក្សភឿថៃ មានការប្រែប្រួលចិត្ត ដោយងាកមកគាំទ្របេក្ខភាពផ្សេង ក្រៅពីគណបក្សចម្រុះរបស់ខ្លួន ជាមួយនឹងការដោះដូរមុខតំណែងក្នុងក្រសួងសំខាន់ៗវិញ វានឹងក្លាយជារឿងផ្សេងដែលគ្រប់គ្នាស្មានមិនដល់។

ក្នុងករណី គណបក្សភឿថៃពិតជាធ្វើបែបនេះមែន លោក ប្រាវីត វុងស៊ូវ៉ាន់ ដែលជាឧត្តមសេនីយ៍ចូលនិវត្តន៍ ទំនងមានភាគរយខ្ពស់ក្នុងការក្លាយជានាយករដ្ឋមន្ត្រីថ្មី ពោលគឺមានការគាំទ្រខ្លាំងពីកងយោធា ស្របពេលសមាជិកព្រឹទ្ធសភាស្ទើតែទាំងអស់ គឺសុទ្ធតែជ្រើសតាំងដោយកងយោធាស្រាប់ផង។

សូមជម្រាបដែរថា បើសិនជាការបោះឆ្នោតជ្រើសរើសនាយករដ្ឋមន្ត្រីថៃ ដោយរដ្ឋសភា និងព្រឹទ្ធសភា មិនអាចសម្រេចទៅបាន លោក ប្រាយុទ្ធ ចាន់អូចា នឹងបន្តដឹកនាំប្រទេសថៃ ក្នុងនាមជានាយករដ្ឋមន្ត្រីចាំផ្ទះ រហូតដល់រដ្ឋាភិបាលថ្មី ត្រូវបានបង្កើតឡើង៕

The post បើអ្នកនយោបាយវ័យក្មេង Pita មិនជាប់ជានាយករដ្ឋមន្ត្រី តើបេក្ខភាពរូបណាមានសង្ឃឹមដឹកនាំប្រទេសថៃ? appeared first on .

តើនាយករដ្ឋមន្រ្តីស្ដីទីថៃជានរណា ក្រោយរដ្ឋធម្មនុញ្ញផ្អាកតំណែងរបស់លោកប្រាយុទ្ធ?

ឧកញ៉ាសំពៅ — Wed, 24 Aug 2022 08:34:51 +0000

នៅថ្ងៃទី ២៤ សីហា ២០២២ នេះ រដ្ឋធម្មនុញ្ញថៃបានប្រកាសផ្អាកតំណែងនាយករដ្ឋមន្ត្រី ប្រាយុទ្ធ ចាន់អូចា ជាបណ្ដោះអាសន្ន ក្រោយបក្សប្រឆាំងអះអាងថា លោកបានកាន់តំណែងលើសពេលកំណត់ ៨ ឆ្នាំ។

អំឡុងពេលត្រួតពិនិត្យលើបញ្ហាមួយនេះ លោក ប្រាវីត វុងស៊ូវ៉ាន់ ឧបនាយករដ្ឋមន្ត្រីទីមួយ នឹងត្រូវឡើងមកកាន់តំណែងជានាយករដ្ឋមន្ត្រីស្ដីទីបណ្ដោះអាសន្ន រហូតដល់តុលាការរដ្ឋធម្មនុញ្ញដោះស្រាយបញ្ហាខាងលើរួចរាល់។

លោក ប្រាវីត វុងស៊ូវ៉ាន់ ដែលនឹងចូលមកកាន់តំណែងជានាយករដ្ឋមន្ត្រីថៃបណ្ដោះអាសន្នគឺមានបទពិសោធន៍ក្រាស់ក្រែលលើឆាកនយោបាយ ពោលបន្ទាប់ពីបញ្ចប់ការសិក្សានៅសាកលវិទ្យាល័យ Chulachomklao Royal Military Academy ក្នុងឆ្នាំ ១៩៦៩ លោកបានក្លាយជាគាត់បានក្លាយជាមន្រ្តីនៅក្នុងកងវរសេនាធំថ្មើរជើងទី ២១ (ឆ្មាំមហាក្សត្រី) កងពលធំថ្មើរជើងទី ២ ។

នៅឆ្នាំ ១៩៧៨ លោកបានបញ្ចប់វគ្គបញ្ជាការ និងអគ្គសេនាធិការថៃ។ នៅឆ្នាំ ១៩៩២ គាត់ត្រូវបានតែងតាំងជាជំនួយការរបស់រាជវង្ស ហើយនៅឆ្នាំ ១៩៩៦ គាត់ត្រូវបានតំឡើងឋានៈជាមេបញ្ជាការកងពលធំថ្មើរជើងទី ២ ។

បន្ទាប់ពីបញ្ចប់ការសិក្សាពីមហាវិទ្យាល័យការពារជាតិនៃប្រទេសថៃក្នុងឆ្នាំ ១៩៩៧ គាត់បានក្លាយជាមេបញ្ជាការរង ហើយនៅឆ្នាំ ១៩៩៨ មេបញ្ជាការនៃភូមិភាគទី ១ (ទទួលបន្ទុកទីក្រុងបាងកក និងកណ្តាលប្រទេសថៃ)។

ខែធ្នូ ឆ្នាំ ២០០៨ លោកត្រូវបានទទួលតំណែងថ្មីជារដ្ឋមន្ត្រីការពារជាតិសម្រាប់គណរដ្ឋមន្ត្រី Abhisit Vejjajiva ដែលបានបម្រើការដល់ខែសីហា ២០១១ និងក្រោយមកលោកត្រូវបានតែងតាំងតំណែងនេះម្ដងទៀតនៅឆ្នាំ ២០១៤ រហូតដល់ ២០១៩ មុនទទួលតំណែងឧបនាយករដ្ឋមន្ត្រី និងជាអនុប្រធានក្រុមប្រឹក្សាជាតិដើម្បីសន្តិភាព និងសណ្តាប់ធ្នាប់ (NCPO)។

សូមជម្រាបដែរថា លោក ប្រាវីត គឺមិនទាន់មានគ្រួសារនៅឡើយ ហើយលោកតែងតែចំណាយពេលកម្សាន្តតាមរយៈការរត់ហាត់ប្រាណ និងលេងកូនហ្គោល។

យោងតាមទិន្នន័យផ្ដល់ឲ្យដោយ Wikipedia បានឲ្យដឹងថា ទ្រព្យសម្បត្តិរបស់នាយករដ្ឋមន្ត្រីស្ដីទីកាលពីឆ្នាំ ២០០៨ មាន ៥៧ លានបាត ប៉ុន្តែនៅឆ្នាំ ២០១៤ បានកើនឡើងដល់ ៨៧ លានបាត៕

The post តើនាយករដ្ឋមន្រ្តីស្ដីទីថៃជានរណា ក្រោយរដ្ឋធម្មនុញ្ញផ្អាកតំណែងរបស់លោកប្រាយុទ្ធ? appeared first on .