យោងតាមCNN រាយការណ៍ទៀតថា មជ្ឈមណ្ឌលប្រេង Cushing នៅរដ្ឋ Oklahoma ដែលត្រូវបានគេឲ្យឈ្មោះថា “ផ្លូវបំបែកនៃបំពង់បង្ហូរប្រេងរបស់ពិភពលោក” មានប្រេងឆៅបម្រុងចំនួន ៤០ លានបារ៉ែលក្រោមលក្ខខណ្ឌប្រតិបត្តិការធម្មតា។

នៅពេលដែលជម្លោះនៅមជ្ឈិមបូព៌ា បានឈានចូលដល់ថ្ងៃទី១០៥ ហើយនោះ​រដ្ឋបាលព័ត៌មានថាមពលសហរដ្ឋអាមេរិក (EIA) បានប្រកាសថា ស្តុកប្រេងរបស់ Cushing មានចំនួន ២១,៦ លានបារ៉ែល ដែលខិតជិតដល់កម្រិត “អប្បបរមាប្រតិបត្តិការ” ពោលគឺជាកម្រិតមួយដែលនឹងគំរាមកំហែងដល់ការផ្គត់ផ្គង់ប្រេង សម្រាប់អតិថិជនទាំងអស់។

យ៉ាងណាមិញ​ បើតាមលោកស្រី Natasha Kaneva ប្រធានផ្នែកយុទ្ធសាស្ត្រទំនិញនៅ JPMorgan បានប្រៀបធៀបប្រព័ន្ធបំពង់បង្ហូរប្រេងទៅនឹងចរន្តឈាមនៅក្នុងខ្លួនមនុស្ស។ យោងតាមលោកស្រី បញ្ហាមិនមែនជាកង្វះខាតប្រេងនៅទូទាំងពិភពលោកទេ ប៉ុន្តែជាប្រេងមិនគ្រប់គ្រាន់ក្នុងការចរាចរដើម្បីរក្សាលំហូរមានស្ថេរភាពនៅទូទាំងប្រព័ន្ធទាំងមូល។

គួរជម្រាបជូនថា តម្រូវការប្រេងរបស់សហរដ្ឋអាមេរិក បានកើនឡើងដល់កម្រិតកំណត់ត្រាក្នុងអំឡុងពេលជម្លោះអ៊ីរ៉ង់។ ការផ្គត់ផ្គង់ប្រេងឆៅពី Cushing កំពុងលើសពីអត្រាដែលក្រុមហ៊ុនខួងប្រេងរបស់សហរដ្ឋអាមេរិកអាចបំពេញវាបាន៕​

The post មជ្ឈមណ្ឌលស្តុកទុកប្រេងរបស់សហរដ្ឋអាមេរិក កំពុងថយចុះបរិមាណយ៉ាងខ្លាំង appeared first on .

លោក ត្រាំ បាននិយាយនៅក្នុងសារមួយនៅលើប្រព័ន្ធផ្សព្វផ្សាយសង្គម Truth Social នៅថ្ងៃទី១១ មិថុនាថា ៖”យោធាសហរដ្ឋអាមេរិក នឹងវាយប្រហារអ៊ីរ៉ង់យ៉ាងខ្លាំងក្លានៅពេលដ៏ខ្លីនេះ។ ហើយនៅចំណុចណាមួយនាពេលអនាគតដ៏ខ្លីខាងមុខនេះ សហរដ្ឋអាមេរិក ក៏នឹងរឹបអូសយកកោះ Kharg និងហេដ្ឋារចនាសម្ព័ន្ធប្រេងរបស់អ៊ីរ៉ង់ ដោយគ្រប់គ្រងទីផ្សារប្រេងរបស់ពួកគេទាំងស្រុង ដូចអ្វីដែលយើងបានធ្វើជាមួយប្រទេសវេណេស៊ុយអេឡាអ៊ីចឹងដែរ”។

ប៉ុន្តែទោះជាយ៉ាងណាក៏ដោយ មេដឹកនាំសេតវិមានរូបនេះ មិនបានបញ្ជាក់លម្អិតអំពីរបៀបដែលសហរដ្ឋអាមេរិក នឹងគ្រប់គ្រងលើកំពង់ផែនាំចេញប្រេងរបស់អ៊ីរ៉ង់នោះទេ។ លោកបានបន្ថែមទៀតថា កងទ័ពជើងទឹក កងទ័ពអាកាស ប្រព័ន្ធការពារដែនអាកាស និងទម្រង់ការពារផ្សេងទៀត ក៏ដូចជាសមត្ថភាពវាយលុកភាគច្រើនរបស់អ៊ីរ៉ង់ ត្រូវបានបំផ្លាញ។

យ៉ាងណាមិញ នៅក្នុងបទសម្ភាសជាមួយ Fox News នៅថ្ងៃដដែលនោះ ប្រធានាធិបតី លោក ត្រាំ បានននិយាយថា អាទិភាពរបស់លោក គឺតែងតែចង់ដណ្តើមយកកោះ Kharg មកគ្រប់គ្រងឲ្យបាន។

កោះ Kharg មានទីតាំងស្ថិតនៅក្នុងឈូងសមុទ្រពែរ្ស ចម្ងាយប្រហែល ២៥ គីឡូម៉ែត្រពីឆ្នេរសមុទ្រអ៊ីរ៉ង់ និងជាង ៤៨០ គីឡូម៉ែត្រពីច្រកសមុទ្រ Hormuz។ វាមានប្រវែងត្រឹមតែ ៦ គីឡូម៉ែត្រប៉ុណ្ណោះ និងគ្របដណ្តប់លើផ្ទៃដី ២០ គីឡូម៉ែត្រការ៉េ។ រោងចក្រនៅលើកោះ Kharg មានសមត្ថភាពកែច្នៃប្រេងចំនួន ៧ លានបារ៉ែលក្នុងមួយថ្ងៃ ហើយប្រហែល ៩០% នៃការនាំចេញប្រេងឆៅរបស់អ៊ីរ៉ង់ គឺត្រូវឆ្លងកាត់កោះនេះ ដែលភាគច្រើនត្រូវបានលក់ទៅឱ្យអាស៊ី ជាពិសេសប្រទេសចិន។

ជម្រាបជូនថា ដោយសារតែសេដ្ឋកិច្ចរបស់អ៊ីរ៉ង់ ត្រូវបានពឹងផ្អែកយ៉ាងខ្លាំងលើការនាំចេញថាមពលចេញពីកោះនេះ​ Kharg ត្រូវបានចាត់ទុកថាជា “ខ្សែជីវិតប្រេង” និងជាតំណភ្ជាប់ដ៏សំខាន់មួយនៅក្នុងខ្សែសង្វាក់ផ្គត់ផ្គង់ថាមពលរបស់អ៊ីរ៉ង់៕​

The post លោក ត្រាំ និយាយថា​អាមេរិក នឹងរឹបអូសយកកោះ Kharg ដែលជាខ្សែជីវិតប្រេងរបស់អ៊ីរ៉ង់ appeared first on .

នេះគឺជាលើកទីបួនជាប់ៗគ្នាដែលអង្គការនេះ បានបង្កើនការផលិត ទោះបីជាជម្លោះនៅមជ្ឈិមបូព៌ា បានរារាំងការផលិតនៅក្នុងប្រទេសជាសមាជិកជាច្រើនក៏ដោយ។ សរុបមក ក្នុងអំឡុងពេលខែមេសា-មិថុនា OPEC+ បានបង្កើនការផលិតប្រេងសរុបជិត ៦០០ ០០០ បារ៉ែលក្នុងមួយថ្ងៃ។

តែទោះជាយ៉ាងណាក៏ដោយ ទិន្នន័យរបស់ពួកគេក៏បង្ហាញផងដែរថា ការនាំចេញពីប្រទេសឈូងសមុទ្រ មានមធ្យមភាគត្រឹមតែ ៣៣,១៩ លានបារ៉ែលក្នុងមួយថ្ងៃ នៅក្នុងខែមេសា ដែលជាការថយចុះយ៉ាងខ្លាំងពីចំនួន ៤២,៧ លានបារ៉ែលនៅក្នុងខែកុម្ភៈ ពោលគឺមុនពេលជម្លោះចាប់ផ្តើម។

គួរឲ្យដឹងថា តម្លៃប្រេងឆៅពិភពលោកបានកើនឡើងបន្ថែមទៀត គិតនៅត្រឹមព្រឹកថ្ងៃទី៨ ខែមិថុនា បន្ទាប់ពីការវាយប្រហារដោយមីស៊ីលរបស់អ៊ីរ៉ង់ទៅលើអ៊ីស្រាអែល ដើម្បីសងសឹកចំពោះការវាយប្រហារលើរដ្ឋធានីលីបង់។ ប្រេងឆៅប្រភេទ Brent បច្ចុប្បន្នកើនឡើង ៣,៦% ដល់ ៩៦,៥០ដុល្លារ ក្នុងមួយបារ៉ែល។ មុនពេលមានជម្លោះ តម្លៃប្រេងដ៏សំខាន់នេះ គឺប្រហែល ៧២ដុល្លារ។

ជម្រាបជូនថា OPEC+ មានសមាជិកសរុុបចំនួន ២១ ប្រទេស។ តែទោះជាយ៉ាងណាក៏ដោយ ក្នុងពេលប៉ុន្មានឆ្នាំថ្មីៗនេះ មានតែប្រទេសសំខាន់ៗប៉ុណ្ណោះ ដូចជាអារ៉ាប៊ីសាអូឌីត អ៊ីរ៉ាក់ គុយវ៉ែត អាល់ហ្សេរី កាហ្សាក់ស្ថាន រុស្ស៊ី អូម៉ង់ និងអារ៉ាប់រួម ដែលបានចូលរួមក្នុងការកំណត់គោលនយោបាយផលិតកម្ម។ អារ៉ាប់រួម ដែលជាសមាជិកសំខាន់បំផុតមួយ បានប្រកាសចាកចេញពីអង្គការនេះ នៅក្នុងខែឧសភាកន្លងទៅ៕​

The post OPEC+ បន្តបង្កើនការផលិតប្រេងរបស់ខ្លួនជាលើកទី៤ ជាប់ៗគ្នា ចំពេលជម្លោះអ៊ីរ៉ង់មិនទាន់ស្ងប់ appeared first on .

ប្រេងឆៅ Brent បានកើនឡើង ៣,២០ដុល្លារ ឬ ៣,៣៩% ដល់ ៩៦,២៤ដុល្លារក្នុងមួយបារ៉ែល ខណៈពេលដែលប្រេងឆៅ WTI របស់សហរដ្ឋអាមេរិក បានកើនឡើង ២,៨៧ដុល្លារ ឬ ៣,១៧% ដល់ ៩៣,៤១ដុល្លារក្នុងមួយបារ៉ែល។

យោងតាមប្រព័ន្ធផ្សព្វផ្សាយក្នុងស្រុក នៅថ្ងៃចន្ទនេះ បានរាយការណ៍ថា មានសម្លេងផ្ទុះនៅក្នុងទីក្រុងសំខាន់ៗជាច្រើន ក្នុងតំបន់មជ្ឈិមបូព៌ា ដែលធ្វើឲ្យបាត់បង់ក្តីសង្ឃឹមសម្រាប់ការបញ្ចប់សង្គ្រាមកាន់តែទូលំទូលាយ និងការចាប់ផ្តើមលំហូរប្រេងឆៅឡើងវិញតាមរយៈច្រកសមុទ្រ Hormuz ដ៏សំខាន់។

គួរជម្រាបជូនផងដែរថា អ៊ីស្រាអែល បានឈ្លានពានលីបង់ នៅក្នុងខែមីនា បន្ទាប់ពីក្រុមហេសបូឡាដែលគាំទ្រដោយអ៊ីរ៉ង់ បានបាញ់រ៉ុក្កែត និងយន្តហោះគ្មានមនុស្សបើកឆ្លងកាត់ព្រំដែន។ លីបង់ និងអ៊ីស្រាអែល បាននិយាយនៅថ្ងៃទី៣ ខែមិថុនាថា ពួកគេបានយល់ព្រមលើបទឈប់បាញ់ដ៏ផុយស្រួយមួយ បន្ទាប់ពីមានការចរចានៅទីក្រុងវ៉ាស៊ីនតោន៕​

The post តម្លៃប្រេងអន្តរជាតិ បន្តហក់ឡើងជាង ៣% បន្ថែមទៀត បន្ទាប់ពីអ៊ីស្រាអែល បើកការវាយប្រហារជាថ្មីលើលីបង់ appeared first on .

នៅក្នុងសន្និសីទមួយនៅទីក្រុងញូវយ៉ក លោក Neil Chapman អនុប្រធានជាន់ខ្ពស់របស់ក្រុមហ៊ុន Exxon Mobil បាននិយាយថា ស្តុកប្រេងសកលកំពុងខិតជិតដល់កម្រិតទាបបំផុតមិនធ្លាប់មានពីមុនមក។

លោកបានមានប្រសាសន៍ថា ៖”ក្នុងរយៈពេលពីរទៅបីសប្តាហ៍ខាងមុខ ស្តុកប្រេងអាចធ្លាក់ចុះដល់កម្រិតទាបបំផុត។ នៅពេលនោះ តម្លៃប្រេងនឹងកើនឡើងយ៉ាងខ្លាំង។ តម្លៃប្រេងឆៅប្រភេទ Brent ដែលមាន ៦០% នៃប្រេងឆៅដែលត្រូវបានជួញដូរទូទាំងពិភពលោក កើនអាចឡើងដល់ ១៥០-១៦០ដុល្លារក្នុងមួយបារ៉ែល”។

គួរឲ្យដឹងថា ស្តុកប្រេង និងការបញ្ចេញពីទុនបម្រុងយុទ្ធសាស្ត្របានជួយកាត់បន្ថយតម្លៃប្រេងក្នុងរយៈពេលបីខែកន្លងមកនេះ ដោយសារជម្លោះនៅមជ្ឈិមបូព៌ាបានរារាំងការផ្គត់ផ្គង់ដល់តំបន់ជាច្រើននៃពិភពលោក។ នេះជាមូលហេតុដែលប្រេងឆៅនាពេលអនាគត ដូចជាប្រភេទ Brent និង WTI របស់សហរដ្ឋអាមេរិក នៅតែមានតម្លៃទាបជាង ១០០ដុល្លារក្នុងមួយបារ៉ែល ទោះបីជាច្រកសមុទ្រ Hormuz នៅតែត្រូវបានរារាំងក៏ដោយ។

ថ្មីៗនេះ ប្រធានាធិបតីអាមេរិក ដូណាល់ ត្រាំ បាននិយាយម្តងហើយម្តងទៀតថា ទាំងសហរដ្ឋអាមេរិក និងអ៊ីរ៉ង់ កាន់តែខិតជិតឈានដល់កិច្ចព្រមព្រៀងមួយដើម្បីបើកច្រកសមុទ្រ Hormuz ឡើងវិញ។ តែទោះជាយ៉ាងណាក៏ដោយ រឿងនេះមិនទាន់កើតឡើងនៅឡើយទេ។ អាជីវកម្មប្រេង និងអ្នកជំនាញកំពុងចេញការព្រមាកាន់តែខ្លាំងឡើង ពាក់ពន្ធទៅនឹងកង្វះខាតប្រេងឥន្ធនៈនាពេលដ៏ខ្លីខាងមុខ។

ជម្រាបជូនទៀតថា កាលពីថ្ងៃទី២ ខែមិថុនា លោក Toril Bosoni នាយកនៃនាយកដ្ឋានប្រេង និងទីផ្សារនៅទីភ្នាក់ងារថាមពលអន្តរជាតិ (IEA) បានថ្លែងថា ប្រសិនបើស្តុកប្រេងបន្តធ្លាក់ចុះក្នុងអត្រាបច្ចុប្បន្ន នោះទុនបម្រុងប្រេងសកលអាចធ្លាក់ចុះដល់កម្រិតទាបបំផុត ខណៈតម្រូវការប្រេងឥន្ធនៈរដូវក្តៅ នឹងកើនឡើងដល់កម្រិតកំពូល៕

The post តម្លៃប្រេងអន្តរជាតិ ទំនងហក់ឡើងដល់ ១៥០-១៦០ដុល្លារ/បារ៉ែល ខណៈទុនបម្រុងសកលកំពុងថយចុះខ្លាំង appeared first on .

នៅថ្ងៃទី៤ មិថុនា យោងតាមទិន្នន័យពី Vortexa បានរាយការណ៍ថា ការនាំចេញប្រេងឆៅ និងប្រេងចម្រាញ់របស់អ៊ីរ៉ង់ ក្នុងខែឧសភាមានចំនួនសរុបប្រហែល ២០៩ ០០០ បារ៉ែលក្នុងមួយថ្ងៃ។ តួលេខនេះ គឺបានធ្លាក់ចុះយ៉ាងខ្លាំងពីចំនួន ១,៣៤ លានបារ៉ែល នៅក្នុងខែមេសា ១,៩ លានបារ៉ែល នៅក្នុងខែមីនា។

មិនតែប៉ុណ្ណោះ ចំនួននេះក៏ជាកម្រិតដ៏ទាប់បំផុតផងដែរ គិតចាប់តាំងពីចុងឆ្នាំ២០១៩ និងដើមឆ្នាំ២០២០ មក ជារយៈពេលដែលប្រធានាធិបតីអាមេរិក លោក ដូនាល់ ត្រាំ បានបន្តយុទ្ធសាស្រ្តដាក់សម្ពាធរបស់ខ្លួន ប្រឆាំងទៅនឹងអ៊ីរ៉ង់ ក្នុងអំឡុងពេលអាណត្តិដំបូងរបស់លោក។

យ៉ាងណាមិញ ជុំវិញបញ្ហាចម្បងនៃការធ្លាក់ចុះយ៉ាងខ្លាំងនៃការនាំចេញប្រេងឆៅរបស់អ៊ីរ៉ង់ កាលពីខែមុននេះ គឺបានកើតឡើងដោយសារតែការបិទផ្លូវកំពង់ផែ ពីសំណាក់កងទ័ពអាមេរិក ដែលបានចាប់ផ្តើមនៅថ្ងៃទី១៣ ខែមេសាមក។ អស់រយៈពេលជាងបីខែមកហើយ អ៊ីរ៉ង់ក៏បានបិទច្រកសមុទ្រ Hormuz ដែលធ្វើឱ្យការនាំចេញប្រេងពីប្រទេសអារ៉ាប៊ីសាអូឌីត គុយវ៉ែត អ៊ីរ៉ាក់ និងអារ៉ាប់រួមជាប់គាំងផងដែរ។

ទន្ទឹងមនឹងនេះ​ លោក Claire Jungman អ្នកវិភាគនៅ Vortexa បានពន្យល់ថា ៖” មូលហេតុចម្បងអាចជាការរំខាននៅក្នុងច្រកសមុទ្រ Hormuz ក៏ដូចជាការបិទផ្លូវនាវារបស់កងទ័ពជើងទឹកអាមេរិកដែលចូល និងចេញពីកំពង់ផែអ៊ីរ៉ង់។ ជាមួយគ្នានេះ ម្ចាស់នាវា ក្រុមហ៊ុនធានារ៉ាប់រង និងអ្នកពាក់ព័ន្ធផ្សេងទៀតបានឈប់បញ្ជូននាវា និងក្រុមនាវិកចូលទៅក្នុងតំបន់នោះផងដែរ”៕

The post ការនាំចេញប្រេងឆៅរបស់អ៊ីរ៉ង់ ធ្លាក់ដាំក្បាលចុះដល់កម្រិតទាបបំផុត រយៈពេល ៥ឆ្នាំចុងក្រោយ appeared first on .

គិតត្រឹមការជួញដូរចុងក្រោយ តម្លៃប្រេងឆៅប្រភេទ Brent បានធ្លាក់ចុះ ៨៧សេន ឬ ០,៨៩% មកនៅត្រឹម ៩៦,៩២ដុល្លារក្នុងមួយបារ៉ែល ខណៈប្រេងឆៅប្រភេទ West Texas Intermediate (WTI) របស់សហរដ្ឋអាមេរិកបានធ្លាក់ចុះ ៧៨សេន ឬ ០,៨១% មកនៅត្រឹម ៩៥,២៤ដុល្លារ បន្ទាប់ពីមានការកើនឡើងនៅដើមសប្តាហ៍នេះ។

នៅមុនការប្រកាសនេះ ទាំងប្រេងឆៅប្រភេទ Brent និង WTI បានកើនឡើងប្រហែល ២% បន្ទាប់ពីមានការផ្ទុះនៃជម្លោះនៅមជ្ឈិមបូព៌ាឡើងវិញ រួមទាំងការវាយប្រហាររបស់អ៊ីរ៉ង់លើប្រទេសគុយវ៉ែត និងការវាយប្រហារដោយយោធារបស់សហរដ្ឋអាមេរិក នៅជិតច្រកសមុទ្រ Hormuz ផងដែរ។

យ៉ាងណាមិញ អ៊ីស្រាអែល និងលីបង់ បាននិយាយនៅយប់ថ្ងៃពុធថា ពួកគេបានយល់ព្រមអនុវត្តបទឈប់បាញ់ ដោយបង្កើនក្តីសង្ឃឹមសម្រាប់កិច្ចព្រមព្រៀងរវាងទីក្រុងវ៉ាស៊ីនតោន និងទីក្រុងតេអេរ៉ង់ ដែលបានកំណត់លក្ខខណ្ឌនៃកិច្ចព្រមព្រៀងណាមួយ ដោយផ្អែកលើការបញ្ចប់ការប្រយុទ្ធគ្នារវាងអ៊ីស្រាអែល និងលីបង់។

ទន្ទឹមនឹងនេះ​ប្រធានាធិបតីអាមេរិក លោក ដូណាល់ ត្រាំ បានស្នើកាលពីថ្ងៃពុធថា អាចមានវឌ្ឍនភាពក្នុងការចរចាជាមួយអ៊ីរ៉ង់ ឱ្យបានឆាប់តាមដែលអាចធ្វើទៅបាននៅចុងសប្តាហ៍នេះ ដោយបង្ហាញក្តីសង្ឃឹមថាជម្លោះអាចនឹងបញ្ចប់ទាំងស្រុង៕​

The post តម្លៃប្រេងឆៅសកលធ្លាក់ចុះវិញ ខណៈលីបង់ និងអ៊ីស្រាអែលយល់ព្រមលើបទឈប់បាញ់ appeared first on .

តម្លៃប្រេងឆៅប្រភេទ Brent បានកើនឡើង ១,០៥ដុល្លារ ឬ ១,០៩% ដល់ ៩៧,០៥ដុល្លារក្នុងមួយបារ៉ែល ខណៈពេលដែលប្រេងឆៅប្រភេទ WTI របស់សហរដ្ឋអាមេរិក បានកើនឡើង ១,០១% ឬ ១,០៨% ដល់ ៩៤,៧៧ដុល្លារក្នុងមួយបារ៉ែល។

ជុំវិញការកើនឡើងនៃតម្លៃប្រេងឆៅដ៏សំខាន់ទាំងនេះ បានកើតឡើង បន្ទាប់ពីយោធាសហរដ្ឋអាមេរិក បាននិយាយថា អ៊ីរ៉ង់បានបាញ់មីស៊ីលផ្លោងទៅកាន់ប្រទេសជិតខាងក្នុងតំបន់គឺគុយវ៉ែត និងបារ៉ែន ប៉ុន្តែមិនបានវាយប្រហារចំគោលដៅនោះទេ ដោយបន្ថែមថាកងកម្លាំងសហរដ្ឋអាមេរិកបានធ្វើការវាយប្រហារលើកោះ Qeshm របស់អ៊ីរ៉ង់វិញ ដើម្បីឆ្លើយតប។

យ៉ាងណាមិញ ទីផ្សារថាមពលពិភពលោក ក៏កំពុងរង់ចាំព័ត៌មានបន្ថែមទៀត អំពីសង្គ្រាមអ៊ីរ៉ង់ ដោយទីក្រុងតេអេរ៉ង់កំពុងពិនិត្យមើលកិច្ចព្រមព្រៀងដែលបានស្នើឡើងជាមួយសហរដ្ឋអាមេរិក ដើម្បីបញ្ឈប់ជម្លោះ។

ប្រព័ន្ធផ្សព្វផ្សាយអ៊ីរ៉ង់បានរាយការណ៍នៅថ្ងៃអង្គារថា អ៊ីរ៉ង់មិនបានធ្វើទំនាក់ទំនងជាមួយទីក្រុងវ៉ាស៊ីនតោនអស់រយៈពេលពីរបីថ្ងៃមកហើយ ទោះបីជាប្រធានាធិបតីអាមេរិក លោក ដូណាល់ ត្រាំ បាននិយាយថា ការចរចានៅតែបន្តក៏ដោយ៕​

The post តម្លៃប្រេងសកល ហក់ឡើងបន្ថែមទៀត ខណៈជម្លោះថ្មីនៅមជ្ឈិមបូព៌ាផ្ទុះឡើង និងកិច្ចចរចាកំពុងជាប់គាំង appeared first on .

ស្ថិតក្រោមរដ្ឋាភិបាលដែលគាំទ្រដោយសហរដ្ឋអាមេរិករបស់ប្រធានាធិបតីបណ្ដោះអាសន្ន លោកស្រី Delcy Rodriguez ការផលិត និងការនាំចេញប្រេងឆៅរបស់ប្រទេសវេណេស៊ុយអេឡា បានកើនឡើងយ៉ាងខ្លាំងនៅឆ្នាំនេះ ខណៈពេលដែលទីក្រុងវ៉ាស៊ីនតោន បានបន្ធូរបន្ថយទណ្ឌកម្ម និងក្រុមហ៊ុនបរទេសជាច្រើនបាននិងកំពុងពង្រីកគម្រោងប្រេង និងឧស្ម័ន នៅក្នុងប្រទេសអង្គការ OPEC។

យោងតាមក្រសួងប្រេងរបស់វេណេស៊ុយអេឡា បានព្យាករថាទិន្នផលប្រេងឆៅរបស់ខ្លួននឹងមានចំនួន ១,៣៧លានបារ៉ែលក្នុងមួយថ្ងៃ នៅចុងឆ្នាំនេះ ដែលនេះមានន័យនឹងកើនឡើង ២២% ធៀបទៅនឹងចុងឆ្នាំ២០២៥ និងជាចំនួនច្រើនបំផុតមិនធ្លាប់មាន គិតចាប់តាំងពីមានការដាក់ទណ្ឌកម្មថាមពលរបស់សហរដ្ឋអាមេរិក នៅឆ្នាំ២០១៩ មក។

យ៉ាងណាមិញ ជុំវិញកំណើននេះ ក៏បានអនុញ្ញាតឲ្យប្រទេសវេណេស៊ុយអេឡា បន្តការនាំចេញទៅកាន់ប្រទេសដែលពួកគេមិនអាចលក់ប្រេងឲ្យបាន ក្នុងរយៈពេលជាច្រើនឆ្នាំផងដែរ។

យោងតាមទិន្នន័យ និងឯកសារផ្លូវការបានបង្ហាញថា សហរដ្ឋអាមេរិកគឺជាគោលដៅដំបូងនៃការនាំចេញប្រេងរបស់ប្រទេសវេណេស៊ុយអេឡា ដែលមានប្រហែល ៥៥៨ ០០០ បារ៉ែលក្នុងមួយថ្ងៃ បន្ទាប់មកគឺប្រទេសឥណ្ឌា ដែលមាន ៤២៧ ០០០ បារ៉ែលក្នុងមួយថ្ងៃ និងអឺរ៉ុប ដែលមាន ១៦៩ ០០០ បារ៉ែលក្នុងមួយថ្ងៃ៕​

The post ការនាំចេញប្រេងរបស់វេណេស៊ុយអេឡា ហក់ឡើងខ្លាំង ចំពេលកំពុងមានវិបត្តិនៅមជ្ឈិមបូព៌ា appeared first on .

យោងតាមទីភ្នាក់ងារព័ត៌មាន Reuters ដែលដោយដកស្រង់ទិន្នន័យពី Kpler បានរាយការណ៍ថា ការនាំចេញប្រេងឆៅរបស់សហរដ្ឋអាមេរិកក្នុងខែឧសភាបានឈានដល់កំណត់ត្រា ៥,៦ លានបារ៉ែលក្នុងមួយថ្ងៃ។ តួលេខនេះបានលើសពីកម្រិតកំពូលមុន នៅក្នុងខែមេសា ដែលមានចំនួន ៥,២ លានបារ៉ែល។

ជម្លោះនៅមជ្ឈិមបូព៌ាកំពុងបង្កឱ្យមានការរំខានដែលមិនធ្លាប់មានពីមុនមកចំពោះទីផ្សារថាមពលសកល។ ការបិទច្រកសមុទ្រ Hormuz បានធ្វើឱ្យរាំងស្ទះដល់លំហូរប្រេងឆៅ និងឧស្ម័នធម្មជាតិចំនួន ២០% របស់ពិភពលោក។

ដូច្នេះ ការនាំចេញប្រេងរបស់សហរដ្ឋអាមេរិកទៅកាន់អាស៊ី និងអឺរ៉ុបបានឈានដល់កម្រិតខ្ពស់បំផុតក្នុងខែឧសភា។ ក្នុងនោះអាស៊ីបានទិញប្រហែល ២,៤៥ លានបារ៉ែលក្នុងមួយថ្ងៃ ដែលជាគោលដៅកំពូលនៃការនាំចេញប្រេងរបស់សហរដ្ឋអាមេរិក សម្រាប់ខែទីពីរជាប់ៗគ្នា។ បន្ទាប់មកគឺអឺរ៉ុបដែលមានចំនួន ២,៤ លានបារ៉ែលក្នុងមួយថ្ងៃ៕​

The post ការនាំចេញប្រេងឆៅរបស់សហរដ្ឋអាមេរិក បន្តកើនឡើងខ្ពស់បំផុតមិនធ្លាប់មាន appeared first on .