ផ្លូវថ្នល់

ក្រសួងសាធារណការ និងដឹកជញ្ជូន តម្រូវឲ្យអ្នកធ្វើអាជីវកម្មលើវិស័យហេដ្ឋារចនាសម្ព័ន្ធផ្លូវថ្នល់ ដាក់ពាក្យស្នើសុំអាជ្ញាបណ្ណ

ឧកញ៉ា ឆ្នាំងដី — Mon, 18 Jul 2022 05:29:04 +0000

បណ្តាអង្គភាពរដ្ឋ និង ក្រុមហ៊ុនឯកជន ដែលមានបំណងចង់ប្រកបអាជីវកម្មលើវិស័យហេដ្ឋារចនាសម្ព័ន្ធផ្លូវថ្នល់ ការថែទាំផ្លូវថ្នល់ ការផ្តល់ សេវាទីប្រឹក្សាបច្ចេកទេសសំណង់ផ្លូវថ្នល់ ការសិក្សាគម្រោងប្លង់ ការត្រួតពិនិត្យសំណង់ហេដ្ឋារចនាសម្ព័ន្ធផ្លូវថ្នល់ និងការបើកមន្ទីរពិសោធន៍វិស័យផ្លូវថ្នល់ តម្រូវដាក់ពាក្យស្នើសុំអាជ្ញាបណ្ណផ្លូវថ្នល់ នៅក្រសួង ។ នេះបើតាមការជូនដំណឹង របស់ក្រសួងសាធារណការ និងដឹកជញ្ជូន នៅថ្ងៃទី១៨ ខែកក្កដា ឆ្នាំ២០២២។

ដោយឡែកចំពោះអង្គភាពរដ្ឋ និងឯកជន មានអាជ្ញាបណ្ណប្រកបអាជីវកម្មលើវិស័យហេដ្ឋារចនាសម្ព័ន្ធ ផ្លូវថ្នល់ ដែលជិតផុតរយៈពេលសុពលភាព ឬមានបំណងចង់ផ្លាស់ប្តូរប្រភេទអាជ្ញាបណ្ណ ក្រសួងសាធារណការ និងដឹកជញ្ជូន ក៏តម្រូវឲ្យដាក់ពាក្យស្នើសុំមក ក្រសួង ឱ្យបានមុនថ្ងៃផុតសុពលភាពអាជ្ញាបណ្ណយ៉ាងតិច៣ខែ ដោយភ្ជាប់ មកជាមួយនូវអាជ្ញាបណ្ណចាស់ក្នុងអំឡុងពេលសុពលភាព និងរបាយការណ៍សកម្មភាពការងារប្រចាំឆ្នាំរបស់ខ្លួន។

ក្រសួងសាធារណការ និងដឹកជញ្ជូន ក៏ព្រមានពិន័យអន្តរការណ៍ស្របតាមបទប្បញ្ញត្តិនៃច្បាប់ ស្តីពីផ្លូវថ្នល់ ចំពោះបុគ្គលដែលប្រកបអាជីវកម្មលើវិស័យហេដ្ឋារចនាសម្ព័ន្ធផ្លូវថ្នល់ ការថែទាំផ្លូវថ្នល់ ការផ្តល់សេវាទីប្រឹក្សា បច្ចេកទេសសំណង់ផ្លូវថ្នល់ ការសិក្សាគម្រោងប្លង់ ការត្រួតពិនិត្យសំណង់ហេដ្ឋារចនាសម្ព័ន្ធផ្លូវថ្នល់ និងការបើក មន្ទីរពិសោធន៍វិស័យផ្លូវថ្នល់ ដោយគ្មានអាជ្ញាបណ្ណ ។

The post ក្រសួងសាធារណការ និងដឹកជញ្ជូន តម្រូវឲ្យអ្នកធ្វើអាជីវកម្មលើវិស័យហេដ្ឋារចនាសម្ព័ន្ធផ្លូវថ្នល់ ដាក់ពាក្យស្នើសុំអាជ្ញាបណ្ណ appeared first on .

ចិន សន្យាជួយពង្រឹងសមត្ថភាពធនធានមនុស្សកម្ពុជាលើជំនាញសាងសង់ផ្លូវដែក

ឧកញ៉ាតូច — Fri, 13 May 2022 10:22:21 +0000

វិទ្យាស្ថានតេជោសែន សាធារណការ និងដឹកជញ្ជូន ព្រមទាំងសាកលវិទ្យាល័យ Beijing Jiao Tong University (BJTU)និងក្រុមហ៊ុន Beijing Urban Construction Group បានចុះហត្ថលេខាលើអនុស្សរណៈយោគយល់គ្នាត្រីភាគី ដើម្បីពង្រឹងសមត្ថភាពធនធានមនុស្សបន្ថែមទៀត។ ជាមួយគ្នានេះភាគីចិន បានសន្យានឹងជួយពង្រឹងសមត្ថភាពធនធានមនុស្សកម្ពុជាលើជំនាញសាងសង់ផ្លូវដែកបន្ថែមទៀត។

ថ្លែងក្នុងពិធីចុះកិច្ចព្រមព្រៀង ដែលធ្វើឡើងកាលថ្ងៃទី១២ ខែឧសភា ឆ្នាំ ២០២២ ឯកឧត្តម វ៉ាស៊ឹម សុរិយា អនុរដ្ឋលេខាធិការក្រសួងសាធារណការ និងដឹកជញ្ជូន បានឲ្យដឹងថា កិច្ចព្រមព្រៀងរវាងវិទ្យាស្ថាន សាធារណការ សាកលវិទ្យាល័យចិន(BJTU)និងក្រុមហ៊ុនដ៏ធំរបស់ចិន គឺដើម្បីពង្រឹងសមត្ថភាពធនធានមនុស្ស និងកិច្ចសហប្រតិបត្តិការត្រីភាគីក្នុងការ ផ្លាស់ប្តូរនិស្សិត និងការចុះកម្មសិក្សា ទស្សនកិច្ច ឯកទេសសាងសង់ ការស្រាវជ្រាវរួមគ្នា និងការបណ្តុះបណ្តាលបច្ចេកទេសផ្លូវដែក។

បន្ថែមពីនេះទៀត ឯកឧត្តម ហឿន សំនៀង នាយកវិទ្យាស្ថានតេជោសែន សាធារណការ និងដឹកជញ្ជូន ក៏បង្ហាញក្តីរំពឹងទុកថា តាមរយៈអនុស្សរណៈនៃការយោគយល់គ្នានេះ ស្ថាប័នទាំងបីនឹងធ្វើការរួមគ្នា ដើម្បីដោះស្រាយវិបត្តិកង្វះអ្នកជំនាញបច្ចេកទេសវិស័យសាធារណការ និងដឹកជញ្ជូន នាពេលបច្ចុប្បន្នផង និង នាពេលអនាគតផង។

ក្នុងឪកាសនោះដែរ លោក HUANG Taiyan លេខាធិការបក្សកុម្មុយនីស្តចិន និងជាប្រធានក្រុមប្រឹក្សានៃសាកលវិទ្យាល័យ Beijing Jiao Tong University បានលើកឡើងថា សាកលវិទ្យាល័យ BJTU នឹងរង់ចាំការពង្រឹងទំនាក់ទំនងជាមួយវិទ្យាស្ថានសាធារណការ និងក្រុមហ៊ុន Beijing Urban Construction Group ដើម្បីពង្រឹងសមត្ថភាពធនធានមនុស្ស ក្នុងការផ្លាស់ប្តូរនិស្សិត និងការចុះកម្មសិក្សា ទស្សនកិច្ច ឯកទេសសាងសង់ ការស្រាវជ្រាវរួមគ្នា និងការបណ្តុះបណ្តាលបច្ចេកទេសផ្លូវដែក។

គួរបញ្ជាក់ដែរថា តាមរយៈចុះអនុស្សរណៈយោគយល់គ្នានេះផងដែរ ភាគីចិន ក៏ប្តេជ្ញាចិត្តបម្រើការអភិវឌ្ឍនលើវិស័យដឹកជញ្ជូនរបស់ប្រទេសចិន និងបានចូលរួមយ៉ាងពេញទំហឹងក្នុងការស្រាវជ្រាវ និងការសាងសង់ផ្លូវរថភ្លើងល្បឿនលឿន ពិសេសនឹងជួយបណ្តុះបណ្តាលលើផ្នែកវិស្វកម្មសំណង់ស៊ីវិល វិស្វកម្មអគ្គិសនី សេដ្ឋកិច្ច និងការគ្រប់គ្រង។លើសពីនេះទៀត នាពេលអនាគត សាកលវិទ្យាល័យ(BJTU)នឹងស្វាគមន៍និស្សិតឆ្នើមកម្ពុជាពីវិទ្យាស្ថានតេជោសែន សាធារណការ និងដឹកជញ្ជូន បន្ថែមទៀត ដើម្បីទៅសិក្សានៅប្រទេសចិន៕

The post ចិន សន្យាជួយពង្រឹងសមត្ថភាពធនធានមនុស្សកម្ពុជាលើជំនាញសាងសង់ផ្លូវដែក appeared first on .

ឥណ្ឌាសង់ផ្លូវក្រោមដីប្រវែងជាង ២០ គីឡូម៉ែត្រភ្ជាប់ទៅប្រទេសចិន ឥលូវសម្រេចបានជាង ៦ គីឡូម៉ែត្រហើយ

ឧកញ៉ាសំពៅ — Fri, 08 Oct 2021 06:58:49 +0000

បើតាមការចុះផ្សាយពីប្រភពសារព័ត៌មាននៅក្នុងប្រទេសឥណ្ឌា គម្រោងសាងសង់ផ្លូវក្រោមដីប្រវែងជាង ២០ គីឡូម៉ែត្រ ដែលចាយថវិកាអស់ប្រមាណជាង ១ ពាន់លានដុល្លារ ដើម្បីសម្រួលដល់ការធ្វើពាណិជ្ជកម្មរវាងឥណ្ឌា និងចិន។

ផ្លូវក្រោមដីប្រវែង ៦,៥ គីឡូម៉ែត្រនៅតំបន់ Sonamarg នឹងប្រកាសដាក់ឲ្យប្រើប្រាស់នៅអំឡុងរដូវរងានេះ ខណៈគម្រោងការបន្ទាប់គឺមានប្រវែង ១៤ គីឡូម៉ែត្រ ដែលនៅសល់ឆ្លងកាត់ពីតំបន់ Sonmarg និង Drass រំពឹងបញ្ចប់ការសាងសង់នៅឆ្នាំ ២០២៥ ដែលនឹងក្លាយជាកំណត់ត្រាសាងសង់យូរបំផុតនៅឥណ្ឌា។

គ្រោងការនេះផងដែរ នឹងជួយសម្រួលដល់វិស័យពាណិជ្ជកម្មរវាងប្រទេសឥណ្ឌា និងចិនតាមរយៈការនាំចេញចូលទំនិញ តាមច្រកព្រំដែន Ladakh ដែលវានឹងពង្រឹងដល់វិស័យការងារមួយចំនួនធំនៅតំបន់នោះ ដូចជាការសាងសង់ផ្លូវថ្នល់ ៥៧ ខ្សែ ចំណតឧទ្ធម្ភាគចក្រ ៣២ កន្លែង។

បញ្ជាក់ដែរថា កន្លងមកឥណ្ឌា និងចិនមានជម្លោះបញ្ហាច្រកព្រំដែននៅតំបន់ Ladakh នេះ រហូតដល់មានការផ្ទុះអាវុធរវាងភាគីទាំងសងខាងថែមទៀត ហើយចាប់តាំងពីពេលនោះមក ប្រទេសទាំង ២ បានចាប់ផ្ដើមពង្រឹងទាំងផ្នែកហេដ្ឋារចនាសម្ព័ន្ធ និងមូលដ្ឋានយោធានៅទីនោះរៀងៗខ្លួន៕

ប្រភព: globalconstructionreview

The post ឥណ្ឌាសង់ផ្លូវក្រោមដីប្រវែងជាង ២០ គីឡូម៉ែត្រភ្ជាប់ទៅប្រទេសចិន ឥលូវសម្រេចបានជាង ៦ គីឡូម៉ែត្រហើយ appeared first on .

ភ្ជុំបិណ្ឌឆ្នាំនេះពលរដ្ឋខេត្តព្រៃវែងបានទទួលកាដូធំ ពីសម្ដេចតេជោ ហ៊ុន សែន

កូនចៅឧកញ៉ា — Wed, 16 Sep 2020 01:54:56 +0000

ប្រជាពលរដ្ឋក្នុងខេត្តព្រៃវែងបានអរគុណចំពោះប្រមុខរាជរដ្ឋាភិបាលកម្ពុជា សម្តេចតេជោ ហ៊ុន សែន ដោយបានសម្តែងការសប្បាយរីករាយដោយទទួលបានសមិទ្ធផលថ្មីដែលពុំធ្លាប់មាន ហើយផ្លូវពីរខ្សែនេះ អាចចាត់ទុកថា ជាប្រវត្តិសាស្ត្ររបស់ខេត្តព្រៃវែង ផ្លូវកៅស៊ូរលោងស្រិល ជាផ្លូវវៀងក្រុងព្រៃវែង ដែលប្រែក្លាយដីវាលស្រែទៅជាផ្លូវយុទ្ឋសាស្ត្រសេដ្ឋកិច្ច ចំណែកផ្លូវបេតុងថ្មីស្រឡាងជាផ្លូវនិគមន៏ជនបទ ទឹកលិចរាល់ឆ្នាំទទឹងបីម៉ែត្រស្ទើរតែដើរមិនចង់រួច បច្ចុប្បន្នក្លាយជាផ្លូវថ្មរឹងមាំទំហំធំ លូនកាត់កម្រាលព្រំពណ៌បៃតងពីភូមិទ្រា ទៅភូមិកាឡីខាងត្បូង ឃុំឈើកាច់នឹងឃុំស្ពឺ ក ស្រុកបាភ្នំ ខេត្ត ព្រៃវែង ។

ប្រភព៖ទូរទស្សន៍ជាតិកម្ពុជា ទទក – TVK

The post ភ្ជុំបិណ្ឌឆ្នាំនេះពលរដ្ឋខេត្តព្រៃវែងបានទទួលកាដូធំ ពីសម្ដេចតេជោ ហ៊ុន សែន appeared first on .

ផ្លូវជាតិលេខ៥៨ ប្រវែងសរុប១៧៤,១៦ គីឡូម៉ែត្រ នឹងសម្ពោធថ្ងៃនេះ

កូនចៅឧកញ៉ា — Wed, 26 Feb 2020 01:14:35 +0000

ផ្លូវជាតិលេខ៥៨ មានប្រវែងសរុប១៧៤,១៦ គ.ម (រួមទាំងផ្លូវច្រកព្រំដែន ៤កន្លែង ៨,៩៨គ.ម) ពីក្រុងប៉ោយប៉ែត ខេត្តបន្ទាយមានជ័យ ដល់ឃុំផ្អុង ខេត្តឧត្តរមានជ័យ នឹងបើកឱ្យប្រើប្រាស់ជាផ្លូវការ នាថ្ងៃស្អែកនេះ ក្រោមអធិបតីភាពដ៏ខ្ពង់ខ្ពស់ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា។

ផ្លូវនេះសាងសង់ដោយក្រុមហ៊ុន Shanghai Construction Group Co., Ltd ក្រោមការត្រួតពិនិត្យលក្ខណៈបច្ចេកទេសពីក្រុមហ៊ុន Guangzhou Wanna Construction Supervision Co., Ltd នៃសាធារណរដ្ឋប្រជាមានិតចិន។ ក្រោមប្រាក់កម្ចីសម្បទានពីរដ្ឋាភិបាលនៃ សាធារណរដ្ឋប្រជាមានិតចិន រួមជាមួយនឹងថវិកាបដិភាគរបស់រាជរដ្ឋាភិបាលកម្ពុជា សរុបប្រមាណជាង ១២២លាន ដុល្លារសហរដ្ឋអាមេរិក ជាប្រភេទផ្លូវក្រាលកៅស៊ូពីរស្រទាប់ (DBST) គិតចាប់ពីផ្លូវជាតិ លេខ៥ ត្រង់គ.ម ៣៩៩+៩០០ ក្រុងប៉ោយប៉ែត ខេត្តបន្ទាយមានជ័យ ទៅកាន់ផ្លូវជាតិលេខ៦៨ ត្រង់គ.ម ១០១+៥០០ (ផ្លុង) ខេត្តឧត្តរមានជ័យ ។

គម្រោងផ្លូវនេះបានចាប់ដំណើរការបើកការដ្ឋានសាងសង់ កាលពីថ្ងៃទី១០ ខែមិថុនា ឆ្នាំ២០១៥ និងត្រូវបានបញ្ចប់ការងារសាងសង់ជាស្ថាពរ ១០០%នៅថ្ងៃទី០៨ ខែកុម្ភៈ ឆ្នាំ២០១៩ កន្លងទៅនេះ។

កំណាត់ផ្លូវនេះចូលរួមចំណែកយ៉ាងសំខាន់ក្នុងការសម្រួលដល់ការធ្វើដំណើររបស់បងប្អូនប្រជាពលរដ្ឋនៅ តំបន់ភាគពាយ័ព្យប្រទេស ព្រមទាំងការដឹកជញ្ជូនកាន់តែប្រសើរមួយកម្រិតទៀត ជាពិសេសកំណាត់ផ្លូវ នេះអាចសម្រួលដល់ការតភ្ជាប់ជាមួយព្រះរាជាណាចក្រថៃ ក្នុងការពង្រីកសក្ដានុពលសេដ្ឋកិច្ចពាណិជ្ជ កម្មថែមទៀតរបស់ប្រទេសជាតិ៕

The post ផ្លូវជាតិលេខ៥៨ ប្រវែងសរុប១៧៤,១៦ គីឡូម៉ែត្រ នឹងសម្ពោធថ្ងៃនេះ appeared first on .

ឯកឧត្តម ស៊ុន ចាន់ថុល ស្នើជប៉ុនបញ្ជូនក្រុមជំនាញការ ជួយបណ្ដុះបណ្ដាលធនធានមនុស្សផ្នែកវិស្វកម្មសំណង់ដល់កម្ពុជា

កូនចៅឧកញ៉ា — Thu, 16 Jan 2020 01:51:27 +0000

ភ្នំពេញ៖ រដ្ឋមន្រ្តីក្រសួងសាធារណការ និងដឹកជញ្ជូន ឯកឧត្តម ស៊ុន ចាន់ថុល ស្នើភាគីជប៉ុនពិចារណាបញ្ជូនក្រុមជំនាញការ ជួយបណ្ដុះបណ្ដាលធនធានមនុស្សផ្នែកវិស្វកម្មសំណង់ដល់កម្ពុជា។ ការស្នើនេះធ្វើឡើងនៅក្នុងជំនួបរវាងឯកឧត្តមរដ្ឋមន្រ្តីជាមួយគណៈប្រតិភូជប៉ុន កាលពីថ្ងៃទី ១៥ ខែមករា ឆ្នាំ ២០២០។

រដ្ឋមន្ត្រីក្រសួងសាធារណការ និងដឹកជញ្ជូនបានស្នើឱ្យភាគីជប៉ុនពិនិត្យពិចារណាបញ្ជូនក្រុម ជំនាញការរបស់ខ្លួនដើម្បីជួយបណ្ដុះបណ្ដាលធនធានមនុស្សផ្នែកលើវិស្វកម្មសំណង់ ដើម្បី ជួយពង្រឹងសមត្ថភាពមន្ត្រីក្រសួងសាធារណការលើការ កសាងស្ពានថ្នល់ប្រកបដោយគុណ ភាព។ នេះបើតាមការលើកឡើងរបស់ឯកឧត្ដម ស៊ុន ចាន់ថុល ទេសរដ្ឋមន្រ្ដី រដ្ឋមន្រ្ដីក្រសួងសាធារណការ និងដឹកជញ្ជូន ក្នុងជំនួបពិភាក្សាការងារជាមួយគណៈប្រតិភូជប៉ុន ដឹកនាំដោយឯកឧត្តម NAKANE Kazuyuki សមាជិកសភាជប៉ុន។

ឯកឧត្តម ស៊ុន ចាន់ថុល កត់សម្គាល់ថា សព្វថ្ងៃនេះមាននិស្សិតកម្ពុជាត្រឹមតែ៣,៤ភាគរយប៉ុណ្ណោះ ដែលសិក្សាជំនាញនេះនៅតាមសាកលវិទ្យាល័យនានា។ ឯកឧត្តមទេសរដ្ឋមន្រ្តីបានសម្តែងការកោតសរសើរ និងថ្លែងអំណរគុណយ៉ាងជ្រាលជ្រៅចំពោះភាគីជប៉ុន និងប្រជាជនជប៉ុនដែលបានផ្តល់ការគាំទ្រ និងកិច្ចសហប្រតិបត្តិការដើម្បីរួមចំណែកដល់ការស្តារ និងការអភិវឌ្ឍហេដ្ឋារចនាសម្ព័ន្ធដឹកជញ្ជូននៅកម្ពុជា។ ឯកឧត្ដមបានគូសបញ្ជាក់អំពីបច្ចុប្បន្នភាពនៃគម្រោងសាងសង់ពង្រីកផ្លូវជាតិ លេខ៥ ពីព្រែកក្តាមទៅប៉ោយប៉ែតជាពី២គន្លង ទៅ៤គន្លង ដែលជាផ្លូវសេដ្ឋកិច្ចមួយយ៉ាងសំខាន់ដើម្បីដឹកជញ្ជូន ទំនិញទៅកាន់ប្រទេសជិតខាង។

ទន្ទឹមនេះ ឯកឧត្តមទេសរដ្ឋមន្ត្រីបានមានប្រសាសន៍អំពីគម្រោងពង្រីកកំពង់ផែស្វយ័តក្រុង ព្រះសីហនុ គម្រោងប្រើប្រាស់ប្រព័ន្ធPort EDIនៅកំពង់ផែ ផែនការមេភស្តុភារកម្ម ប្រព័ន្ធគ្រប់គ្រងទឹកកខ្វក់ក្នុងរាជធានីភ្នំពេញ ប្រព័ន្ធចុះបញ្ជីរថយន្តតាមអនឡាញ ការត្រួតពិនិត្យលក្ខណៈបច្ចេកទេសយានយន្តតាមប្រព័ន្ធអនឡាញ គម្រោងសិក្សាលើការកាត់បន្ថយការកកស្ទះ ចរាចរណ៍ក្នុងរាជធានីភ្នំពេញ ប្រព័ន្ធប្រតិបត្តិការរថភ្លើងស្វ័យប្រវត្តិ(AGT) និងគម្រោងមេគង្គ-ជប៉ុនដើម្បីជំរុញការដឹកជញ្ជូនតាមផ្លូវទឹក។

ឯកឧត្តមទេសរដ្ឋមន្ត្រីបានបន្ថែមថា ក្រសួងកំពុងធ្វើការជាមួយទីភ្នាក់ងារ JICA ដើម្បីសម្របសម្រួលរវាងកម្ពុជា និងភាគីថៃទាក់ទងនឹងការបើកច្រកទ្វារព្រំដែនអន្តរជាតិស្ទឹងបត់ (ស្ពានស្ទឹងបត់) ជាបណ្ដោះអាសន្នដើម្បីសម្រួលដល់ការកកស្ទះចរាចរណ៍ពីការដឹកជញ្ជូនឆ្លងកាត់ព្រំដែន នៅច្រកទ្វារព្រំដែនអន្តរជាតិប៉ោយប៉ែតជាប់ព្រំដែនថៃ ខណៈកំពុងរង់ចាំការបញ្ចប់ការសាងសង់អគាររដ្ឋបាល។

ជាការឆ្លើយតប ឯកឧត្តម NAKANE បានកត់សម្គាល់ និងទទួលយកសំណើទាំងឡាយ ដែលឯកឧត្តមទេសរដ្ឋមន្ត្រីបានស្នើឡើង ដើម្បីពិនិត្យពិចារណា និងឆ្លើយតបប្រកបដោយភាពវិជ្ជមាន។ ឯកឧត្តម NAKANE បានថ្លែងការកោតសរសើរដល់គំនិតផ្តួចផ្តើមកំណែទម្រង់ ស៊ីជម្រៅរបស់ក្រសួងសាធារណការទាក់ទងនឹងការដាក់ឱ្យដំណើរការកម្មវិធីថែទាំផ្លូវ (ROAD CARE Mobile App) និងការរីកចម្រើនរបស់កម្ពុជាយ៉ាងឆាប់រហ័សក្នុងរយៈពេលប៉ុន្មានឆ្នាំចុងក្រោយនេះ៕

The post ឯកឧត្តម ស៊ុន ចាន់ថុល ស្នើជប៉ុនបញ្ជូនក្រុមជំនាញការ ជួយបណ្ដុះបណ្ដាលធនធានមនុស្សផ្នែកវិស្វកម្មសំណង់ដល់កម្ពុជា appeared first on .

ផ្លូវថ្នល់

ចិន សន្យាជួយពង្រឹងសមត្ថភាពធនធានមនុស្សកម្ពុជាលើជំនាញសាងសង់ផ្លូវដែក

ភ្ជុំបិណ្ឌ​ឆ្នាំ​នេះពលរដ្ឋ​ខេត្ត​ព្រៃវែង​បាន​ទទួល​កាដូ​ធំ ពី​​សម្ដេច​តេជោ ហ៊ុន សែន

ផ្លូវជាតិលេខ៥៨​ ​ប្រវែងសរុប​១៧៤,១៦​ គីឡូម៉ែត្រ​ នឹង​​សម្ពោធថ្ងៃនេះ

ភ្ជុំបិណ្ឌឆ្នាំនេះពលរដ្ឋខេត្តព្រៃវែងបានទទួលកាដូធំ ពីសម្ដេចតេជោ ហ៊ុន សែន

ផ្លូវជាតិលេខ៥៨ ប្រវែងសរុប១៧៤,១៦ គីឡូម៉ែត្រ នឹងសម្ពោធថ្ងៃនេះ