ផ្លូវនាវាចរណ៍

នាវាទេសចរណ៍ ចូលចតនៅកំពង់ផែស្វយ័តក្រុងព្រះសីហនុ ជាថ្មីឡើងវិញ បន្ទាប់ពីខកខាន២ឆ្នាំដោយសារកូវីដ-១៩

អ្នកឧកញ៉ាវត្តភ្នំ — Thu, 29 Dec 2022 14:16:05 +0000

នាវាទេសចរណ៍ SEABOURN ENCORE ជាមួយអ្នកដំណើរជាទេសចរចំនួនប្រមាណជិត៥០០នាក់ បានចូលចតលើកទី១ជាថ្មីឡើងវិញ ព្រឹកថ្ងៃទី២៩ ខែធ្នូ ឆ្នាំ២០២២នេះ បន្ទាប់ពីអាក់ខានប្រមាណជាពីរឆ្នាំដោយជំងឺកូវីដ-១៩។

បើតាមរដ្ឋបាលខេត្តព្រះសីហនុ បានឲ្យដឹងថា នាវាឈ្មោះ SEABOURN ENCORE សញ្ជាតិ BAHAMAS ដែលមានប្រវែងបណ្តោយ ២១០.៥០ម៉ែត្រ ប្រវែងទទឹង២៨ម៉ែ្រត ជម្រៅទឹក ៦.៧ ម៉ែត្រ មាននាវិកសរុបចំនួន ៤៣២ នាក់ ស្រី ៩៣នាក់។

នាវាទេសចរណ៍នេះចេញដំណើរមកពីប្រទេសថៃ ចូលមកកម្ពុជា ដើម្បីមកទស្សនាប្រទេសកម្ពុជារយៈពេល១ថ្ងៃ ហើយក្រោយមកចាកចេញទៅវិញឆ្ពោះទៅប្រទេសវៀតណាម។

ឯកឧត្តម ហោ សារុន រដ្ឋលេខាធិការក្រសួងទេសចរណ៍ និង ឯកឧត្តម គួច ចំរើន អភិបាល នៃគណៈអភិបាលខេត្តព្រះសីហនុ បានទទួលស្វាគមន៍ដំណើរមកដល់នាវាទេសចរណ៍ SEABOURN ENCORE ចូលចតនៅកំពង់ផែស្វយ័តក្រុងព្រះសីហនុ ។

ឯកឧត្តម ហោ សារុន រដ្ឋលេខាធិការក្រសួងទេសចរណ៍ និង ឯកឧត្តម គួច ចំរើន អភិបាល នៃគណៈអភិបាលខេត្តព្រះសីហនុ បានស្វាគមន៍យ៉ាងកក់ក្តៅចំពោះដំណើរទេសចរណ៍របស់នាវាក៏ដូចជាភ្ញៀវទេសចរណ៍មកកាន់ប្រទេសកម្ពុជាក្នុងទឹកដីខេត្តព្រះសីហនុនាឱកាសនេះដែលសបញ្ជាក់ឱ្យឃើញថាប្រទេសកម្ពុជាមានសុខសន្តិភាព ស្ថេរភាពនយោបាយពេញលេញក្រោមម្លប់សន្តិភាពនៃការដឹកនាំដ៏ឈ្លាសវៃរបស់សម្ដេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា៕

The post នាវាទេសចរណ៍ ចូលចតនៅកំពង់ផែស្វយ័តក្រុងព្រះសីហនុ ជាថ្មីឡើងវិញ បន្ទាប់ពីខកខាន២ឆ្នាំដោយសារកូវីដ-១៩ appeared first on .

ការចេញចូលនាវាតាមកំពង់ផែ នឹងកាន់តែរហ័ស ក្រោយកម្ពុជាដាក់ដំណើរការប្រព័ន្ធPort EDI ជាផ្លូវការ

ឧកញ៉ាតូច — Wed, 17 Aug 2022 07:44:39 +0000

ប្រព័ន្ធផ្លាស់ប្តូរ ទិន្នន័យអេឡិចត្រូនិកកំពង់ផែ (Port EDI) ត្រូវបានប្រកាសដាក់ឲ្យដំណើរការជាផ្លូវការហើយ នៅថ្ងៃទី១៧ ខែសីហា ឆ្នាំ២០២២។ ទេសរដ្ឋមន្រ្តី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានលើកឡើងថា ការដាក់ឲ្យដំណើរការប្រព័ន្ធផ្លាស់ប្តូរទិន្នន័យអេឡិចត្រូនិកកំពង់ផែ ជាការធ្វើទំនើបកម្មឱ្យស្របតាមកំពង់ផែក្នុងតំបន់ និងសាកលលោក ពិសេសប្រព័ន្ធនេះ នឹងអាចទាក់ទាញឱ្យនាវានានាចូលចេញបានច្រើន នឹងជួយជំរុញដល់ការលូតលាស់សេដ្ឋកិច្ចជាតិបានកាន់តែល្អប្រសើរថែមទៀត។

គួរបញ្ជាក់ដែរថា ប្រព័ន្ធផ្លាស់ប្តូរទិន្នន័យអេឡិចត្រូនិកកំពង់ផែ (Port EDI) ត្រូវបានរៀបចំឡើងដោយមានក្រុមការងារនៃអគ្គនាយកដ្ឋានដឹកជញ្ជូនផ្លូវទឹក ផ្លូវសមុទ្រ និងកំពង់ផែ នាយកដ្ឋានព័ត៌មានវិទ្យា និងទំនាក់ទំនងសាធារណៈ សហការជាមួយក្រុមជំនាញ JICA ក្រុមហ៊ុនអភិវឌ្ឍន៍គម្រោង (EXEO GROUP, INC.) និងភាគីពាក់ព័ន្ធនានា។

បច្ចុប្បន្ន រាជរដ្ឋាភិបាលកម្ពុជាកំពុងរៀបចំពង្រីកសមត្ថភាពកំពង់ផែស្វយ័តក្រុងព្រះសីហនុបន្ថែមទៀត តាមរយៈការកសាងចំណតផែកុងតឺន័រថ្មីមួយជម្រៅទឹក ១៤.៥ម៉ែត្រ ប្រវែង៣៥០ម៉ែត្រ ដែលនឹងធានាដល់ការចូលចតនាវាកុងតឺន័រខ្នាតធំៗ មានចំណុះរហូតដល់ទៅ ៦០,០០០តោន ឬស្មើនឹង៩៣% នៃចំនួននាវាប្រចាំតំបន់អាស៊ី-ប៉ាស៊ីហ្វិក ដែលនឹងចាប់ផ្តើមសាងសង់នៅដើមឆ្នាំ២០២៣ ដើម្បីឆ្លើយតបទៅនឹងការកើនឡើងនៃបរិមាណកុងតឺន័រ ឆ្លងកាត់កំពង់ផែមួយនេះនាពេលអនាគត។

សូមជម្រាបជូនថា ក្រសួងសាធារណការ កំពុងត្រៀមលក្ខណៈផ្នែកបច្ចេកវិទ្យាដើម្បីចាប់ផ្តើមអនុវត្តការប្រើប្រាស់ប្រព័ន្ធផ្លាស់ប្តូរទិន្នន័យអេឡិចត្រូនិកកំពង់ផែ (Port EDI) ដែលក្នុងនោះរួមមាន៖ ការទទួលខុសត្រូវលើការធានាដំណើរការប្រព័ន្ធ ការរៀបចំឯកសារពាក់ព័ន្ធនឹងកិច្ចសហប្រតិបត្តិការជាមួយគ្រឹះស្ថានធនាគារ និងហិរញ្ញវត្ថុ ក្នុងការប្រមូលចំណូលពីការបង់កម្រៃសេវាសាធារណៈផងដែរ។

ហេតុនេះ ប្រព័ន្ធ Port EDIនេះ នឹងជួយសម្រួលដល់នីតិវិធីចូលចេញកំពង់ផែកម្ពុជា សម្រាប់នាវា ដឹកជញ្ជូនទំនិញអន្តរជាតិ សំដៅដល់ការគ្រប់គ្រងសេវាដឹកជញ្ជូនតាមផ្លូវទឹក ប្រកបដោយប្រសិទ្ធភាព តម្លាភាព ចំណេញពេលវេលា និងកាត់បន្ថយការចំណាយផ្សេងៗ ជាពិសេសបង្កើនការទាក់ទាញការវិនិយោគផ្ទាល់ពីបរទេសផងដែរ។នេះបើតាមប្រសាសន៍របស់ ទេសរដ្ឋមន្រ្តី ស៊ុន ចាន់ថុល៕ អត្ថបទ៖ រង្សី

The post ការចេញចូលនាវាតាមកំពង់ផែ នឹងកាន់តែរហ័ស ក្រោយកម្ពុជាដាក់ដំណើរការប្រព័ន្ធPort EDI ជាផ្លូវការ appeared first on .

កម្ពុជាកំពុងសិក្សាផ្លូវនាវាចរណ៍ និងប្រព័ន្ធភស្តុភារកម្មទន្លេបាសាក់ សម្រាប់ការដឹកជញ្ជូនតាមផ្លូវទឹក

ឧកញ៉ា ឆ្នាំងដី — Mon, 18 Jul 2022 04:24:34 +0000

ក្រសួងសាធារណការនិងដឹកជញ្ជូន កំពុងសិក្សាលើគម្រោងអភិវឌ្ឍន៍ផ្លូវនាវាចរណ៍ និងប្រព័ន្ធភស្តុភារកម្មទន្លេបាសាក់ សម្រាប់ការដឹកជញ្ជូនតាមផ្លូវទឹក។ ជំនួបពិភាក្សាការងារអំពីគម្រោងបានធ្វើឡើង កាលពីថ្ងៃទី១៥ ខែកក្កដា ឆ្នាំ២០២២ នៅទីស្តីការក្រសួង រវាង លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន ជាមួយគណៈប្រតិភូក្រុមហ៊ុនសាជីវកម្មស្ពានថ្នល់ចិន(CRBC) ដឹកនាំដោយលោក Zhou Yong ប្រធានគ្រប់គ្រងទូទៅប្រចាំប្រទេសកម្ពុជា។

លោក ស៊ុន ចាន់ថុល បានគូសបញ្ជាក់សារជាថ្មីអំពីសារសំខាន់នៃគម្រោងអភិវឌ្ឍន៍ផ្លូវនាវាចរណ៍ និងប្រព័ន្ធភស្តុភារកម្មទន្លេបាសាក់ សម្រាប់ការដឹកជញ្ជូនតាមផ្លូវទឹកនៅកម្ពុជា ដែលអាចជួយកាត់បន្ថយការចំណាយលើការដឹកជញ្ជូននិងភស្តុភារកម្ម និងមានប្រសិទ្ធភាពជាមុន ព្រមទាំងងាយស្រួលធ្វើសមាហរណកម្មផ្ទៃក្នុងក្នុងវិស័យដឹកជញ្ជូនតាមផ្លូវទឹកផងដែរ។

ការសិក្សាពីលទ្ធភាពនៃគម្រោងនេះចាំបាច់ត្រូវតែធ្វើឱ្យបានគ្រប់ជ្រុងជ្រោយ ដាក់ជូនទៅគណ:កម្មាធិការអន្តរក្រសួងពិភាក្សាមុននឹងរាយការណ៍ជូនដើម្បីរាជរដ្ឋាភិបាលកម្ពុជាពិនិត្យពិចារណា ហើយការសិក្សាខ្នាតអន្តរជាតិនេះត្រូវធ្វើឡើងដើម្បីស្វែងរកដែគូ វិនិយោគពីដៃគូអភិវឌ្ឍន៍ និងពីក្រុមហ៊ុននានា ។ នេះបើតាមការបញ្ជាក់បន្ថែមរបស់លោកទេសរដ្ឋមន្ត្រី ស៊ុន ចាន់ថុល។

លោក ស៊ុន ចាន់ថុល ក៏សង្កត់ធ្ងន់ថា គម្រោងនេះមិនត្រឹមតែផ្ដល់ផលប្រយោជន៍ដល់ប្រជាជនកម្ពុជាប៉ុណ្ណោះទេ ក៏ប៉ុន្តែវានឹងផ្ដល់ផលប្រយោជន៍ដល់ប្រទេសនៅក្នុងតំបន់ និងពិភពលោកផងដែរ ។

គួរបញ្ជាក់ថា កាលពីដើមឆ្នាំ២០២២ ក្រសួងសាធារណៈការ និងដឹកជញ្ជូន ក៏ធា្លប់បានបង្ហើបពីគម្រោងតភ្ជាប់ផ្លូវទឹកពីទន្លេបាសាក់ទៅសមុទ្រកែប ដើម្បីដឹកជញ្ជូនទំនិញតាមផ្លូវទឹកទៅកាន់ទីផ្សារអន្តរជាតិ ។ គម្រោងតភ្ជាប់ផ្លូវទឹកពីទន្លេទៅកាន់សមុទ្រ ត្រូវបានក្រសួងរំពឹងថា នឹងចូលរួមយ៉ាងសំខាន់ក្នុងការអភិវឌ្ឍវិស័យដឹកញ្ជូននៅកម្ពុជា ជំរុញការដឹកជញ្ជូនទំនិញតាមផ្លូវទឹក កាត់បន្ថយថ្លៃដឹកជញ្ជូនទំនិញ និងកាន់តែបង្កើនឱកាសឱ្យកម្ពុជា អាចនាំទំនិញចេញ-ចូល កាន់តែងាយស្រួលទៅកាន់ទីផ្សារអន្តរជាតិ ៕

The post កម្ពុជាកំពុងសិក្សាផ្លូវនាវាចរណ៍ និងប្រព័ន្ធភស្តុភារកម្មទន្លេបាសាក់ សម្រាប់ការដឹកជញ្ជូនតាមផ្លូវទឹក appeared first on .