មកស្គាល់ប្រទេសទាំង១០ ដែលមានការយកពន្ធលើឧស្ម័នកាបូនខ្ពស់បំផុត ក្នុងពិភពលោក

ឧកញ៉ាសាមញ្ញ — Fri, 24 Jan 2025 09:30:00 +0000

នៅក្នុងរយ:ពេលប៉ុន្មានឆ្នាំចុងក្រោយនេះ រដ្ឋាភិបាលរបស់ប្រទេសជាច្រើន បានដាក់ចេញពន្ធលើឧស្ម័នកាបូនដែលត្រូវបានចាត់ទុកថាជាពន្ធដ៏សំខាន់មួយផ្តោតលើបរិស្ថាន តាមរយ:ការកំណត់តម្លៃក្នុងមួយឯកតា ដោយផ្នែកលើកាបូនដែលត្រូវបានបញ្ចេញ ជាមួយការតម្រង់សំខាន់ទៅលើក្រុមហ៊ុនផលិតថាមពល និងវិស័យឯកជននានា ដើម្បីឲ្យពួកគេងាកមកចូលរួមកាត់បន្ថយការបញ្ចេញឧស្ម័នកាបូនិចរួមគ្នា។

ទន្ទឹមនឹងនេះ លោក Axel van Trotsenburg នាយកគ្រប់គ្រងជាន់ខ្ពស់របស់ធនាគារពិភពលោក បានបង្ហាញឲ្យដឹងថា ការកំណត់តម្លៃកាបូន អាចជាឧបករណ៍ដ៏មានឥទ្ធិពលបំផុតមួយ ដើម្បីជួយប្រទេសនានាចូលរួមកាត់បន្ថយការបំភាយឧស្ម័នពុលនៅលើពិភពលោក បានមួយផ្នែកធំ។

យ៉ាងណាមិញ ខាងក្រោមនេះ គឺជាបញ្ជីឈ្មោះប្រទេសទាំង១០ ដែលមានការយកពន្ធលើកាបូនខ្ពស់ជាងគេបំផុត ក្នុងពិភពលោក ដោយផ្នែកទៅតាមទិន្នន័យទទួលបានពី Statista និង Insider Monkey ៖

១. អ៊ុយរូហ្គាយ យកពន្ធ ១៦៧ដុល្លារ ក្នុងមួយតោនកាបូនឌីអុកស៊ីត (CO2)

២. លិចតិនស្តាញ យកពន្ធ ១៣២,១ដុល្លារ ក្នុងមួយតោនកាបូនឌីអុកស៊ីត

៣. ស្វីស យកពន្ធ ១៣០,៨ដុល្លារ ក្នុងមួយតោនកាបូនឌីអុកស៊ីត

៤. ស៊ុយអែត យកពន្ធ ១២៧ដុល្លារ ក្នុងមួយតោនកាបូនឌីអុកស៊ីត

៥. ន័រវែស យកពន្ធ ១០៧,៨ដុល្លារ ក្នុងមួយតោនកាបូនឌីអុកស៊ីត

៦. ហ្វាំងឡង់ យកពន្ធ ៨៣,៧ដុល្លារ ក្នុងមួយតោនកាបូនឌីអុកស៊ីត

៧. ហូឡង់ យកពន្ធ ៧១,៤ដុល្លារ ក្នុងមួយតោនកាបូនឌីអុកស៊ីត

៨. អៀរឡង់ យកពន្ធ ៦០,១ដុល្លារ ក្នុងមួយតោនកាបូនឌីអុកស៊ីត

៩. កាណាដា យកពន្ធ ៥៨,៩ដុល្លារ ក្នុងមួយតោនកាបូនឌីអុកស៊ីត

១០. លុចសំបួ យកពន្ធ ៤៩,៩ដុល្លារ ក្នុងមួយតោនកាបូនឌីអុកស៊ីត៕

The post មកស្គាល់ប្រទេសទាំង១០ ដែលមានការយកពន្ធលើឧស្ម័នកាបូនខ្ពស់បំផុត ក្នុងពិភពលោក appeared first on .

គណ:រដ្ឋមន្ត្រីថៃ ចាប់ផ្តើមអនុម័តការយកពន្ធលើការបញ្ចេញឧស្ម័នកាបូន ដើម្បីកាត់បន្ថយកម្តៅផែនដី

ឧកញ៉ាសាមញ្ញ — Fri, 24 Jan 2025 08:57:47 +0000

អនុរដ្ឋមន្ត្រីក្រសួងហិរញ្ញវត្ថុ លោក Paopoom Rojanasakul បាននិយាយកាលពីពេលថ្មីៗនេះថា គណៈរដ្ឋមន្ត្រីថៃ បានអនុម័តលើការយកពន្ធចំពោះការបញ្ចេញឧស្ម័យកាបូន ចំនួន ២០០បាត (៥,៩ដុល្លារ) ក្នុងមួយតោននៃឧស្ម័នកាបូនឌីអុកស៊ីត (CO2) ដែលជាផ្នែកមួយនៃកិច្ចខិតខំប្រឹងប្រែងរបស់ប្រទេសដើម្បីកាត់បន្ថយការបំភាយឧស្ម័នផ្ទះកញ្ចក់ និងការកើនឡើងនៃកម្តៅរបស់ផែនដី។ នេះបើយោងតាមការចុះផ្សាយពីសារព័ត៌មាន Bangkok Post។

ទោះជាយ៉ាងណាក៏ដោយ លោក Paopoom បានបញ្ជាក់ថា ជុំវិញផែនការពន្ធកាបូនថ្មីនេះ នឹងត្រូវដាក់បញ្ចូលទៅក្នុងពន្ធប្រេងដែលមានស្រាប់ ហើយវានឹងមិនប៉ះពាល់ដល់តម្លៃលក់រាយរបស់ប្រេង និងផលិតផលប្រេងនោះទេ។

លោក Paopoom និយាយទៀតថា វិធានការនេះគឺជាការផ្លាស់ប្តូររចនាសម្ព័ន្ធផ្ទៃក្នុងនៃពន្ធអាករដែលគណនាតម្លៃកាបូនដែលត្រូវបង្កប់ក្នុងពន្ធប្រេង។ លោកបានបន្ថែមថា ការកំណត់តម្លៃពន្ធកាបូននឹងមិនប៉ះពាល់ដល់តម្លៃនៃវិស័យឧស្សាហកម្មទេ ហើយវាក៏នឹងមិនប៉ះពាល់ដល់តម្លៃប្រេងលក់រាយដែរ។

ការផ្លាស់ប្តូរនេះ ត្រូវបានធ្វើឡើង ដើម្បីជួយផ្លាស់ប្តូរឥរិយាបទរបស់អ្នកប្រើប្រាស់ឲ្យកាន់តែមានភាពស្និទ្ធស្នាលនឹងបរិស្ថាន និងជួយក្នុងការចរចាពាណិជ្ជកម្មអន្តរជាតិដែលផ្តល់អាទិភាពដល់ផលប៉ះពាល់បរិស្ថាន។

លោក Paopoom បាននិយាយថា ប្រទេសថៃបានកំណត់គោលដៅអព្យាក្រឹតកាបូននៅត្រឹមឆ្នាំ២០៥០ និងការបំភាយឧស្ម័នផ្ទះកញ្ចក់សុទ្ធត្រឹមឆ្នាំ២០៦៥ ខណៈពេលដែលឧស្សាហកម្មរថយន្ត និងប្រេង ត្រូវបានចាត់ទុកថាជាប្រភពចម្បងនៃការបំភាយឧស្ម័នកាបូនដល់ទៅ ៧០% ។

ជម្រាបជូនផងដែរថា ជុំវិញផែនការយកពន្ធកាបូននេះ នឹងត្រូវអនុវត្តលើផលិតផលសំខាន់ៗមួយចំនួន រួមមាន ប្រេងសាំង ហ្គាស ប្រេងកាត ប្រេងឥន្ធនៈយន្តហោះ ប្រេងម៉ាស៊ូត ឧស្ម័នរាវ និងប្រេងឥន្ធនៈ ជាដើម៕

The post គណ:រដ្ឋមន្ត្រីថៃ ចាប់ផ្តើមអនុម័តការយកពន្ធលើការបញ្ចេញឧស្ម័នកាបូន ដើម្បីកាត់បន្ថយកម្តៅផែនដី appeared first on .