ពាណិជ្ជកម្មចិន-អាស៊ាន

ចិន ចូលតុចរចាជាមួយអាស៊ាន ពង្រីកតំបន់ពាណិជ្ជកម្មសេរីទ្វេភាគី

ឧកញ៉ាសំពៅ — Fri, 11 Nov 2022 09:08:39 +0000

នៅក្នុងកិច្ចប្រជុំកំពូលអាស៊ាន ដែលរៀបចំធ្វើឡើងនៅទីក្រុងភ្នំពេញ ចិនបានចូលចរចាជាមួយប្រទេសសមាជិកអាស៊ាន ក្នុងការពង្រីកតំបន់ពាណិជ្ជកម្មសេរីទ្វេភាគី ដើម្បីបង្កើនសង្វាក់ផ្គត់ផ្គង់ ក៏ដូចជាប្រជែងជាមួយសហរដ្ឋអាមេរិកផងដែរ។

យោងតាមការចុះផ្សាយ ពីកាសែតរដ្ឋទីក្រុងប៉េកាំងបានអះអាងថា ពួកគេនឹងជួបជជែកជាមួយថ្នាក់ដឹកនាំអាស៊ានទាំងអស់ ដែលចូលរួមក្នុងកិច្ចប្រជុំនៅក្នុងសប្ដាហ៍នេះ ដើម្បីពន្លឿនការចរចាគម្រោងពាណិជ្ជកម្មខ្នាតធំដែលមានឈ្មោះថា Asean-China Free Trade Area “Version 3.0”។

គួររំលឹកដែរថា សមាជិកអាស៊ាន ១០ ប្រទេស មិនរាប់បញ្ចូលសមាជិកកូនពៅ ទីម័រខាងកើត មានប្រជាជនប្រមាណ ៦៨៥ លាននាក់ និងកំពុងវិវឌ្ឍន៍ទៅជាមជ្ឈមណ្ឌលពាណិជ្ជកម្មសកលមួយ ខណៈទំហំពាណិជ្ជកម្មរវាងចិន និងអាស៊ានបានកើនឡើងដល់ ៨៧៨,២ ពាន់លានដុល្លារ ត្រឹមរយៈពេល ៩ ខែតំបូងឆ្នាំនេះ។

ដោយឡែក បើតាមការចុះផ្សាយពី TheStar បានបង្ហើបថា មូលហេតុដែលចិនចង់ពង្រីកតំបន់ពាណិជ្ជកម្មជាមួយអាស៊ាន ដោយសារមួយរយៈចុងក្រោយនេះ អាមេរិកធ្វើទុក្ខបុកម្នេញខ្លាំងពេក ដូចជា តំឡើងពន្ធលើការនាំចេញនាំចូលទំនិញផ្នែកបច្ចេកវិទ្យាពីចិនទៅអាមេរិកជាដើម។

សូមជម្រាបដែរថា រយៈពេល ១២ ឆ្នាំមកនេះ ពាណិជ្ជកម្មរវាងចិន និងអាស៊ានបានកាត់បន្ថយពន្ធទំនិញនាំចេញនាំចូល ប្រមាណ ៩០% ឯណោះ៕

The post ចិន ចូលតុចរចាជាមួយអាស៊ាន ពង្រីកតំបន់ពាណិជ្ជកម្មសេរីទ្វេភាគី appeared first on .

ចិនផ្ដួលអាមេរិក និងអឺរ៉ុប ក្លាយជាដៃគូពាណិជ្ជកម្មធំបំផុតរបស់ ASEAN នៅត្រីមាសទី ១

ឧកញ៉ាសំពៅ — Fri, 12 Aug 2022 08:19:12 +0000

ក្នុងរយៈពេល ៤ ខែតំបូងនៃឆ្នាំ ២០២២ ប្រទេសចិននៅតែបន្តគ្រងតំណែងជាដៃគូពាណិជ្ជកម្មធំបំផុតសម្រាប់តំបន់ ASEAN ជាមួយនឹងការធ្វើពាណិជ្ជកម្មបរទេសសរុបរបស់ចិនមាន ១៤,៦% ខណៈអឺរ៉ុបឈរលេខ ២ និងអាមេរិកនៅលេខ ៣។ នេះបើយោងតាមរបាយការណ៍ចុះផ្សាយដោយ Global Times។

កំណើនពាណិជ្ជកម្ម ចិន និងអាស៊ានគិតត្រឹមខែមករា ដល់មេសាមានសរុប ១,៨៤ ទ្រីលានយ័ន ឬប្រមាណ ២៧៤,៥ ពាន់លានដុល្លារ កើនឡើង ៧,២% បើធៀបនឹងឆ្នាំទៅ។

ដោយឡែក សម្រាប់ត្រីមាសទី ១ នៃឆ្នាំ ២០២២ វិញ ស្ថិតិនាំចេញ និងនាំចូលរវាងចិន និងអាស៊ានបានកើនឡើងដល់ ១,៣៥ ទ្រីលានយ័ន កើន ៨,៤% បើធៀបនឹងឆ្នាំទៅ ហើយក្នុងចំណោមការជួញដូររវាងចិន និងបរទេសទាំងអស់ អាស៊ានមានចំណែក ១៤,៤%។

សូមជម្រាបដែរថា ចិនបានក្លាយជាដៃគូពាណិជ្ជកម្មធំបំផុតរបស់ ASEAN ទាំងមូល ជាលើកដំបូងនៅឆ្នាំ ២០២០ ប៉ុន្តែបើមើលឲ្យមែនទែនទៅ ចិនគឺជាដៃគូពាណិជ្ជកម្មធំបំផុតជាមួយសមាជិក ASEAN មួយចំនួនតាំងពីឆ្នាំ ២០០៩ មកម៉្លេះ៕

The post ចិនផ្ដួលអាមេរិក និងអឺរ៉ុប ក្លាយជាដៃគូពាណិជ្ជកម្មធំបំផុតរបស់ ASEAN នៅត្រីមាសទី ១ appeared first on .

ឱកាសពិសេស ម្ចាស់សហគ្រាសនិងធុរកិច្ចបង្កើតថ្មីចូលរួមដាក់តាំងពិព័រណ៍អា៊សាន-ចិន

រ៉េត សុកធា — Wed, 13 Jul 2022 02:27:49 +0000

កាលពីថ្ងៃទី១២ ខែកក្កដា ឆ្នាំ២០២២ម្សិលមិញនេះ មូលនិធិអភិវឌ្ឍន៍សហគ្រិនភាព បានចេញសេចក្តីជូនដំណឹងស្ដីអំពីការដាក់តាំងផ្សព្វផ្សាយផលិតផល និង សេវាកម្មតាមរយៈថ្នាល CAMEX។

លេខាធិការដ្ឋានមូលនិធិអភិវឌ្ឍន៍សហគ្រិនភាពនៃក្រសួងសេដ្ឋកិច្ចនិងហិរញ្ញវត្ថុ បានជូនដំណឹងដល់ម្ចាស់សហគ្រាស និងធុរកិច្ចបង្កើតថ្មីដែលមានផលិតផល និងសេវាកម្ម អាចយកទៅដាក់តាំងផ្សព្វផ្សាយផលិតផល និងសេវាកម្មរបស់ខ្លួនតាមរយៈថ្នាល The China-ASEAN Mercantile Exchange (CAMEX) ដែលជាថ្នាលធុរកិច្ចត្រូវបានបង្កើតឡើងដើម្បីបង្កើនការដោះដូរ និងសម្រួលពាណិជ្ជកម្មតាមរយៈអនឡាញ និងផ្ទាល់រវាងសាធារណរដ្ឋប្រជាមានិតចិន និងប្រទេសនៅក្នុងតំបន់អាស៊ាន នឹងផ្តល់ជូននូវការដាក់តាំងផលិតផល និងសេវាកម្មចំនួន០២ឆ្នាំ ដោយឥតគិតថ្លៃ នៅក្នុងកម្មវិធី The China-ASEAN Expo (CAEXPO) ។

CAEXPO គឺជាព្រឹត្តិការណ៍ពិព័រណ៍ធុរកិច្ច ដែលបាន បង្កើតឡើងក្រោមគំនិតផ្តួចផ្តើមរបស់ថ្នាក់ដឹកនាំនៃបណ្តាប្រទេសនៅក្នុងតំបន់អាស៊ាន ជាមួយនឹងថ្នាក់ដឹកនាំនៃ សាធារណរដ្ឋប្រជាមានិតចិននៅក្នុងកិច្ចប្រជុំកំពូលនាខែតុលា ឆ្នាំ២០០៣។

ចំពោះម្ចាស់សហគ្រាសដែលមាន ចំណាប់អារម្មណ៍ អាចស្វែងរកព័ត៌មានបន្ថែមនៅក្នុងគេហទំព័រ http://www.csilp.com ឬទំនាក់ទំនងផ្ទាល់ទៅ កាន់លោក Simon Liao តាមរយៈទូរស័ព្ទលេខ 088 266 6318 និងអ៊ីមែល aseansikroad@gmail.com ៕

The post ឱកាសពិសេស ម្ចាស់សហគ្រាសនិងធុរកិច្ចបង្កើតថ្មីចូលរួមដាក់តាំងពិព័រណ៍អា៊សាន-ចិន appeared first on .

ពាណិជ្ជកម្មចិន-អាស៊ាន

ចិន ចូលតុចរចាជាមួយអាស៊ាន ពង្រីកតំបន់ពាណិជ្ជកម្មសេរីទ្វេភាគី

ចិនផ្ដួលអាមេរិក និងអឺរ៉ុប ក្លាយជាដៃគូពាណិជ្ជកម្មធំបំផុតរបស់ ASEAN នៅត្រីមាសទី ១

ឱកាសពិសេស ម្ចាស់សហគ្រាសនិងធុរកិច្ចបង្កើតថ្មីចូលរួមដាក់តាំងពិព័រណ៍អា៊សាន​-ចិន

ឱកាសពិសេស ម្ចាស់សហគ្រាសនិងធុរកិច្ចបង្កើតថ្មីចូលរួមដាក់តាំងពិព័រណ៍អា៊សាន-ចិន