នេះបើតាមរយៈជំនួបរវាងលោក រាជ រ៉ា រដ្ឋលេខាធិការក្រសួងពាណិជ្ជកម្ម និងប្រតិភូសហព័ន្ធដំឡូងមីកម្ពុជា  តំណាងដោយ ឧកញ៉ា ច្រាយ សុន ប្រធានសហព័ន្ធដំឡូងមី ចូលរួមក្នុងជំនួបជាមួយសភាឧស្សាកម្មថៃ និងពិធីចុះអនុស្សរណៈនៃការយោគយល់គ្នាលើការទិញដំឡូងមី និងពោតក្រហមកម្ពុជា កាលពីថ្ងៃទី២២-២៥ ខែមេសា ឆ្នាំ២០២៥។

ប្រតិភូកម្ពុជា និងសភាឧហ្សាកម្មថៃបានពិភាក្សា យ៉ាងផុលផុស ស្វែងរកបញ្ហាប្រឈម និងដំណោះស្រាយ ពាក់ព័ន្ធនឹងទីផ្សារ និងខ្សែច្រវាក់ផ្គត់ផ្គង់ផលិតកម្មកែច្នៃរវាងកម្ពុជា-ថៃ ដែលផ្តោតទៅលើផលិតកម្មដំឡូងមី ពោត សណ្តែក វត្ថុធាតុដើមផលិតចំណីសត្វ,កិច្ចសម្រួលពាណិជ្ជកម្ម និងភស្តុភាកម្ម។

ជាមួយគ្នានោះ លោក រាជ រ៉ា បានជំរុញ និងលើកទឹកចិត្តអ្នកវិនិយោគថៃ ទៅដាក់ទុនវិនិយោគ និងធ្វើអាជីកម្មនៅកម្ពុជា អោយបានច្រើនបន្ថែមទៀត។

សូមបញ្ជាក់ថា ការចុះអនុស្សរណៈនៃការយោគយល់គ្នាទិញដំឡូងមីកម្ពុជា ចំនួន ៣០០,០០០តោន និងពោតក្រហមកម្ពុជាចំនួន ១០០,០០០តោន ក្នុងមួយឆ្នាំនេះ គឺតាមរយៈសហព័ន្ធដំឡូងមីកម្ពុជា ដែលមានឧកញ៉ា ច្រាយ សុន ជាប្រធាន៕

The post ក្រុមហ៊ុនមួយរបស់ថៃប្រមូលទិញដំឡូងមី ៣០ម៉ឺនតោន និងពោតក្រហម ១០ម៉ឺនតោនក្នុងមួយឆ្នាំពីកម្ពុជា appeared first on .