ព្រះមហាក្សត្រកម្ពុជា យាងឡើងថ្លែងព្រះរាជសុន្ទរកថា ក្នុងមហាសន្និបាតលើកទី ៤១ របស់អង្គការយូណេស្កូ នៅទីក្រុងប៉ារីស

ឧកញ៉ាកោះក្របី — Sat, 13 Nov 2021 06:22:33 +0000

ព្រះករុណា ព្រះបាទសម្តេចព្រះបរមនាថ នរោត្តម សីហមុនី យាងចូលរួមក្នុងមហាសន្និបាតលើកទី ៤១របស់អង្គការយូណេស្កូ នៅទីក្រុងប៉ារីស កាលពីល្ងាចថ្ងៃទី១២ ខែវិច្ឆិកា ម្សិលមិញ តាមការអញ្ជើញរបស់លោកស្រី អូដ្រេយ អាហ្សូឡេយ អគ្គនាយិការនៃអង្គការយូណេស្កូ។

នៅក្នុងពិធីប្រារព្ធខួប៧៥ឆ្នាំនៃការបង្កើតអង្គការយូណេស្កូ ព្រះករុណា ព្រះបាទសម្តេចព្រះបរមនាថនរោត្តម សីហមុនី ជាមួយនឹងវត្តមានរបស់ប្រមុខរដ្ឋ និងរដ្ឋាភិបាលពីប្រទេសចំនួន ២០ ព្រះអង្គបានយាងឡើងថ្លែងព្រះរាជសុន្ទរកថា ដែលនៅក្នុងនោះ ព្រះអង្គបានសង្កត់ធ្ងន់លើសកម្មភាព របស់អង្គការយូណេស្កូនៅប្រទេសកម្ពុជា។

អង្គការ យូណេស្កូ ដែលជាស្ថាប័នមួយរបស់អង្គការសហប្រជាជាតិ ទទួលបន្ទុកទៅលើការអប់រំ វិទ្យាសាស្រ្ត និងវប្បធម៌ ត្រូវបានបង្កើតឡើងនៅថ្ងៃទី១៦ខែវិច្ឆិកា ឆ្នាំ ១៩៤៥ ខណៈដែល កម្ពុជាបានចូលជាសមាជិករបស់យូណេស្កូ នៅថ្ងៃទី ៣កក្កដា ឆ្នាំ ១៩៥១។

នៅចំពោះមុខគណៈប្រតិភូ បរទេស ដែលមានតាំងពីប្រមុខរដ្ឋ និងប្រមុខរដ្ឋាភិបាល រួមទាំងមន្រ្តីរដ្ឋាភិបាល មកពីប្រទេសជាង៦០ ក្នុងពិភពលោក ព្រះករុណាព្រះមហាក្សត្រនៃកម្ពុជា បានរំលឹកផងដែរអំពីអនុស្សាវរីយ៍ ក្នុងពេលព្រះអង្គធ្លាប់ ធ្វើជាឯកអគ្គរាជទូត តំណាងព្រះរាជាណាចក្រកម្ពុជា នៅអង្គការយូណេស្កូ ពីឆ្នាំ ១៩៩៣ ដល់ឆ្នាំ ២០០៣។

The post ព្រះមហាក្សត្រកម្ពុជា យាងឡើងថ្លែងព្រះរាជសុន្ទរកថា ក្នុងមហាសន្និបាតលើកទី ៤១ របស់អង្គការយូណេស្កូ នៅទីក្រុងប៉ារីស appeared first on .

មកដឹងប្រវត្តិការសិក្សារបស់ព្រះបាទ នរោត្តម សីហមុនី មុនព្រះអង្គឡើងសោយរាជ្យ

ឧកញ៉ាកោះក្របី — Fri, 14 May 2021 04:33:00 +0000

ព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា បានព្រះរាជសម្ភព (ប្រសូត) នៅថ្ងៃទី១៤ ខែឧសភា ឆ្នាំ១៩៥៣ នារាជធានីភ្នំពេញ។

សូមចុច Subscribe Telegram oknha_news ដើម្បីទទួលបានព័ត៌មានគ្រប់សកម្មភាពឧកញ៉ា អាជីវកម្ម ចែករំលែក ជោគជ័យ

ព្រះបាទ នរោត្តម សីហមុនី ឡើងសោយរាជ្យ កាលពីថ្ងៃឆ្នាំ២០០៤។ រូបពី AFP

នៅថ្ងៃទី១៤ ខែតុលា ឆ្នាំ២០០៤ ព្រះអង្គត្រូវជ្រើសតាំងឲ្យឡើងសោយរាជ្យ ជាព្រះមហាក្សត្រនៃ ព្រះរាជាណាចក្រកម្ពុជា។ ព្រះបរមនាម ក្នុងរាជ្យរបស់ព្រះករុណា ព្រះបាទសម្ដេចព្រះបរមនាថ នរោត្ដម សីហមុនី គឺ «អ្នកបម្រើមាតុភូមិ សាសនា ប្រជាជាតិ និងប្រជារាស្ត្រខ្មែរ ដោយស្វាមីភក្តិ និងភក្ដីភាព។ មហាក្សត្រ ដែលព្រះពុទ្ធ និងព្រះឥន្ទ្រ លោកឧបត្ថម្ភ ។ អ្នករួបរួម ខេមរជនទាំងអស់។ អ្នកការពារឯករាជ្យ បូរណភាពទឹកដី និងសន្តិភាពរបស់កម្ពុជា ព្រមទាំងសុភមង្គល សេរីភាព និងវិបុលភាព របស់ប្រជារាស្ត្រខ្មែរ»។

គេហទំព័រឧកញ៉ាញូស៍ សូមបើកកកាយព្រះរាជជីវប្រវត្តិសង្ខេបការសិក្សាសង្ខេបរបស់ព្រះអង្គ ដើម្បីជម្រាបជូនប្រិយមិត្តបានដឹងក្នុងព្រះរាជពិធីចម្រើនព្រះជន្មគម្រប់ ៦៨ព្រះវស្សា យាងចូល ៦៩ព្រះវស្សា នៅថ្ងៃសុក្រទី១៤ ខែឧសភា ឆ្នាំ២០២១នេះ។

នៅឆ្នាំ១៩៥៩ ដល់១៩៦២ សម្តេចព្រះបរមនាថ នរោត្តម សីហមុនី ទ្រង់បានចូលសិក្សានៅសាលាបឋមសិក្សានរោត្ដម, វិទ្យាល័យដេកាតនៅរាជធានីភ្នំពេញ។ បន្ទាប់មកព្រះអង្គត្រូវបានព្រះបិតាបញ្ជូនទៅទីក្រុងប្រ៉ាក (Prague) ប្រទេសឆេកូស្លូវ៉ាគី នៅពីឆ្នាំ១៩៦២។ នៅទីនោះព្រះអង្គបានចូលរៀននៅសាលាបឋមសិក្សា, វិទ្យាល័យ និងសាលាតូរ្យតន្ត្រី ដែលទ្រង់បានសិក្សាផ្នែកតន្ត្រី និងរបាំបុរាណរហូតដល់ឆ្នាំ១៩៧៥។

ព្រះអង្គស្ទាត់ជំនាញខាងភាសាសាស្ត្រ ដោយទ្រង់ចេះភាសាបារាំង និងឆែកយ៉ាងស្ទាត់ជំនាញ។ ក្រៅពីនេះ ទ្រង់ក៏អាចប្រាស្រ័យភាសាអង់គ្លេស និងរុស្សីបានយ៉ាងប្រសើរផងដែរ។ នៅក្នុងឆ្នាំ១៩៧៥ ព្រះអង្គបានចាកចេញពីប្រាហ្ក ដើម្បីទៅសិក្សាផ្នែកខ្សែភាពយន្ត នៅប្រទេសកូរ៉េខាងជើង ហើយបន្ទាប់មកទ្រង់បានត្រឡប់ចូលមាតុភូមិវិញនៅឆ្នាំ១៩៧៧។

នៅឆ្នាំ១៩៨១ ព្រះអង្គបានផ្លាស់ទៅប្រទេសបារាំង ដើម្បីបង្រៀនរបាំបាឡេហើយបន្ទាប់មកព្រះអង្គធ្វើជាប្រធានសមាគមរបាំខ្មែរ។ ព្រះអង្គទ្រង់គង់នៅប្រទេសបារាំងអស់រយៈពេលជាង២០ឆ្នាំ។

មុនពេលដែលទ្រង់ក្លាយជាព្រះមហាក្សត្រ ព្រះអង្គមានគោរម្យងារជា “ស្ដេចក្រុមឃុន” ដែលព្រះមហាក្សត្រ ព្រះបាទសម្ដេចព្រះនរោត្ដម សីហនុ ទ្រង់ព្រះរាជទាន នាថ្ងៃទី១ ខែកុម្ភៈ ឆ្នាំ១៩៩៤ បន្ទាប់មកត្រូវបានតំឡើងជា “សម្ដេចព្រះបរមនាថ” នាថ្ងៃទី៣១ ខែសីហា ឆ្នាំ២០០៤៕

The post មកដឹងប្រវត្តិការសិក្សារបស់ព្រះបាទ នរោត្តម សីហមុនី មុនព្រះអង្គឡើងសោយរាជ្យ appeared first on .