ពិធីនេះមានការអញ្ជើញជាអធិបតីក្នុងពិធីបើកវគ្គបំប៉នសមត្ថភាពផ្ទៃក្នុង ស្តីពី “ការអភិវឌ្ឍភាពជាអ្នកដឹកនាំក្នុងវិស័យអប់រំ” ជូនដល់ថ្នាក់ដឹកនាំ និងមន្រ្តីរាជការ នៃវិទ្យាស្ថានតេជោសែន សាធារណការ និងដឹកជញ្ជូន ពីសំណាក់លោកជំទាវ ឥម នីថារ៉ា រដ្ឋលេខាធិការ ក្រសួងសាធារណការ និងដឹកជញ្ជូ​ន នៅថ្ងៃទី១៩ ខែកក្កដានេះ។

បើតាមលោក ហឿន សំនៀង កម្មវិធីបណ្តុះបណ្តាលនាថ្ងៃនេះ គឺជាការចាប់ផ្តើមតែប៉ុណ្ណោះ ដោយវគ្គបណ្តុះបណ្តាល ត្រូវបានបែងចែកជា៨វគ្គ មានសរុបចំនួន ១៨ មេរៀន ដែលបង្ហាត់បង្ហាញដោយវាគ្មិនកិត្តិយស និងអ្នកជំនាញដែល មានបទពិសោធន៍ ជាច្រើនឆ្នាំលើមេរៀននីមួយៗ រួមមាន៖

• គោលការណ៍នៃការងាររដ្ឋបាលក្នុងវិស័យអប់រំ និងប្រភេទនៃគោលការណ៍រដ្ឋបាលអប់រំ
• ទំនាក់ទំនងនៅក្នុងសាលារៀន និងរចនាសម្ព័ន្ធសាលារៀន
• ការគ្រប់គ្រងធនធានមនុស្ស និងការកសាងធនធានមនុស្សក្នុងវិស័យអប់រំ
• ការគ្រប់គ្រងខ្លួនឯង​ (Emotional Intelligence, IQ vs EQ)
• ការកសាងក្រុម និងការបង្កើតបរិស្ថានជម្រុញ (Team Building and Creating Enabling Environment for team members)
• ការអភិវឌ្ឍខ្លួនឯង (Self Development and Growth)
• ការគ្រប់គ្រង និងភាពជាអ្នកដឹកនាំក្នុងវិស័យអប់រំ (Educational Management and Leadership)
• ការរៀបចំឱ្យផ្នត់គំនិតវិជ្ជមាន Fixed Mindset and Growth Mindset
• ការរៀបចំ និងអភិវឌ្ឍកម្មវិធីសិក្សា
• ការវាយតម្លៃ និងធានាគុណភាពផ្ទៃក្នុង (IQA)
• ការវាយតម្លៃ និងធានាគុណភាពខាងក្រៅ (EQA)
• វិធីសាស្ត្រដោះស្រាយទំនាស់ (Conflict Resultion)
• ការឆ្លុះបញ្ចាំងពីខ្លួនឯង និងភាពជាអ្នកដឹកនាំ (Anatomy – Self Reflection and Leadership)

លោកថា ក្នុងបរិបទនៃជំងឺកូវីដ-១៩ និងដើម្បីចូលរួមបង្ការទប់ស្កាត់ការឆ្លងរីករាលដាលនៃជំងឺកូវីដ-១៩ វគ្គបណ្តុះ បណ្តាល នឹងត្រូវធ្វើឡើងផ្ទាល់សម្រាប់ថ្នាក់ដឹកនាំក្រោម១៥រូប និងមន្រ្តីរាជការដទៃទៀត ត្រូវបានចូលរួមតាមរយៈ ប្រព័ន្ធអនឡាញ។

ជាមួយគ្នានេះដែលលោកជំទាវរដ្ឋលេខាធិការ ក៏បានជម្រុញ និងលើកទឹកចិត្តដល់មន្រ្តីទាំងអស់ ចូលរួមក្រេបយកចំណេះដឹង ឱ្យបានច្រើនបំផុត និងចូលរួមយ៉ាងសកម្មជាមួយនឹងគ្រូឧទ្ទេស ក្នុងវគ្គបណ្តុះបណ្តាល នីមួយៗ ដែលនឹងប្រព្រឹត្តទៅរយៈពេលសរុប ៦៤ម៉ោង ដ៏មានអត្ថន័យនេះ ដើម្បីរួមគ្នាកសាងមូលដ្ឋានគ្រឹះ ឱ្យកាន់តែរឹងមាំ និងអាចបំពេញការងារ របស់ខ្លួនកាន់តែមាន ប្រសិទ្ធភាពខ្ពស់ ក៏ដូចជាទុនបន្ថែមទៀត សម្រាប់ជួយជម្រុញគុណភាពអប់រំរបស់វិទ្យាស្ថាន ឱ្យមានការទទួលស្គាល់ និងល្បីល្បាញ ទាំងនៅថ្នាក់ជាតិ ថ្នាក់តំបន់ និងអន្តរជាតិ នាពេលខាងមុខ។

គួររម្លឹកជូនថា ដើម្បីផ្ដល់ចំណេះដឹង​ ទាំងផ្នែកបច្ចេកទេស និងទ្រឹស្តីដល់និស្សិតឲ្យក្លាយខ្លួនជាអ្នកមានជំនាញច្បាស់លាស់ បទពិសោធន៍ និងមានគុណធម៌ សីលធម៌ ដែលអាចដឹកនាំ និងអភិវឌ្ឍនៅក្នុងសង្គមបាននាពេលអនាគត វិទ្យាស្ថានតេជោសែន សាធារណការ និងដឹកជញ្ជូន (TSIPWT) បានចុះហត្ថលេខាលើអនុស្សរណៈនៃការយោគយល់គ្នា (MOU) ជាមួយវិទ្យាស្ថាន Zejiang Institute of Communication(ZJIC) នៃប្រទេសចិន តាមរយៈប្រព័ន្ធវីដេអូពីចម្ងាយ (Video Conference) នៅថ្ងៃទី២៤ ខែមិថុនា ឆ្នាំ២០២១នេះ។

ជាមួយនឹងទំនាក់ទំនង និងភាពជាដៃគូនេះ វិទ្យាស្ថានទាំងពីរបានឯកភាពគ្នាលើគោលការណ៍ជាច្រើននៃកិច្ចសហប្រតិបត្តិការ ក្នុងការផ្លាស់ប្តូរបទពិសោធន៍លើការអប់រំ ការបណ្តុះបណ្តាល ការផ្លាស់ប្តូរវប្បធម៌ ការអភិវឌ្ឍកម្មវិធីសិក្សា ការផ្លាស់ប្តូរCreditsទៅវិញទៅមក​ បង្កើតDual Degree Program, Internship Program ការផ្លាស់ប្តូរនិស្សិត សាស្ត្រាចារ្យ និងអ្នកស្រាវជ្រាវ ការផ្លាស់ប្តូរព័ត៌មាន ទិន្នន័យ បណ្ណាល័យ ការបោះពុម្ព ការបង្កើតសន្និសីទសារព័ត៌មាន និងសិក្ខាសាលា និងការផ្លាស់ប្តូរធនធានផ្សេងៗទៀតជាដើម៕

The post លោក ហឿន សំនៀង មានជំនឿយ៉ាងមុតមាំលើកម្មវិធី “ការអភិវឌ្ឍភាពជាអ្នកដឹកនាំក្នុងវិស័យអប់រំ” appeared first on .

អ្នកជំនួញវិស័យអចលនទ្រព្យ និងជាគ្រូបណ្តុះបណ្តាល ឧកញ៉ា យ៉ន សេងហាន មានប្រសាសន៍ក្នុងការផ្សាយផ្ទាល់លើទំព័រហ្វេសបុកនាពេលកន្លងទៅបានលើកឡើងថា ”អ្នកដឹកនាំ គឺជាអ្នកដែលពោរពេញទៅដោយជំនាញ បទពិសោធន៍ និងភាពជោគជ័យ ហើយនៅលើលោកនេះ ចង់ធ្វើអ្វីឲ្យជោគជ័យ រីកចម្រើន ត្រូវមានភាពជាអ្នកដឹកនាំ”។

អគ្គនាយក្រុមហ៊ុន សេងហាន ឯ.ក ដែលវិនិយោគលើវិស័យអចលនទ្រព្យ បានបន្តថា “ប្រទេសជាតិ គ្រួសារ ក្រុមហ៊ុន ស្ថាប័នទាំងអស់ បើគ្មានអ្នកដឹកនាំល្អ គឺមិនអាចរីកចម្រើនទៅមុខបាន”។

ភាពជាអ្នកដឹកនាំ ត្រូវបានចាត់ថា ជាមូលដ្ឋានគ្រឹះនៃមនុស្សគ្រប់គ្នាក្នុងការដឹកនាំខ្លួនឯង ក្រុមហ៊ុន និងក្រុមការងារ ដូច្នេះហើយទោះស្ថិតក្នុងកាលៈទេសៈណាក៏ដោយ ភាពជាអ្នកដឹកនាំត្រូវមានសម្រាប់មនុស្សគ្រប់គ្នា។

សហគ្រិនដែលជាអ្នកដឹកនាំ នឹងគ្រប់គ្រងក្រុមហ៊ុនផ្ទាល់ ឧកញ៉ា យ៉ន សេងហាន បានបង្ហាញក្បួនក្នុងការដឹកនាំឲ្យក្លាយជាអ្នកដឹកនាំពូកែហើយទទួលបានជោគជ័យ ដូចខាងក្រោម៖

១. មានទំនួលខុសត្រូវ ការទទួលខុសត្រូវក្នុងនាមជាអ្នកដឹកនាំពិតមានសារៈសំខាន់ណាស់ ដើម្បីឲ្យអ្នកក្រោមបង្គាប់របស់យើង ទទួលបាននូវចំណេះដឹង បទពិសោធន ភាពកត់ក្តៅ និងទទួលជោគជ័យ គឺសុទ្ធតែកើតចេញពីអ្នកដឹកនាំទាំងអស់។ អ្នកដឹកនាំដែលមានទំនួលខុសត្រូវខ្ពស់ តែងតែបណ្តុះបណ្តាលថ្នាក់ក្រាមបង្គាប់របស់ខ្លួនឲ្យឆ្ពោះទៅរកភាពជោគជ័យដែរ។

២. ភាពជាគំរូ បុគ្គលជាអ្នកដឹកនាំគេ គឺជាអ្នកដែលត្រូវដើរមុនគេ ត្រូវដើរមុនឲ្យបានមួយជំហាន ដូច្នេះយើងដើរបែបណា យើងគិតបែបណា ធ្វើបែបណា អ្នកដើរខាងក្រោយនឹងដើរតាម គិតតាម និងធ្វើតាមជាក់ជាមិនខាន់។ សំនួរសួរថា បើយើងជាអ្នកដឹកនាំគេ ហើយអត់មានភាពជាគំរូដល់អ្នកក្រោមបង្គាប់ ដូចម្តេចនឹងឲ្យគេដើរតាមយើងបាននោះ។

៣. មានវិន័យ គ្រប់គ្នាត្រូវមានវិន័យ ព្រោះជាក្រឹត្យក្រមច្បាស់លាស់មួយដើម្បីដឹកនាំ ហើយបើចង់ឲ្យគេដើរតាមយើង ទាល់តែយើងខ្លួនឯងមានវិន័យជាមុន និងមានសកម្មភាពជាប្រចាំផង។

៤.គោលដៅ ត្រូវមានគោលដៅឲ្យបានច្បាស់លាស់ក្នុងការដឹកនាំ និងកំណត់គោលដៅ យើងចង់ដឹកនាំពួកគាត់ទៅកាន់ទីណា កន្លែងណា បន្ទាប់មកកំណត់រយៈពេល ថា ១០ឆ្នាំក្រោយ ១៥ឆ្នាំខាងមុខ យើងចង់ឲ្យក្រុមហ៊ុនរីកចម្រើនកម្រិតណា ក្រុមហ៊ុនមានសាខា ហើយទ្រព្យសម្បតិ្តមានការកើនឡើង និងអតិថិជនដែលគាំទ្រមានប៉ុន្មានភាគរយ។

៥. មានផែនការច្បាស់លាស់ ក្នុនាមជាអ្នកដឹកនាំចាំបាច់បំផុតត្រូវមានផែនការ សូម្បីផែនការសម្រាប់ជីវិតរស់នៅ ការសិក្សា រកស៊ី ធ្វើការងារ ត្រូវរៀបចំផែនការឲ្យបានម៉ត់ចត់ ទើបអាចទទួលបានជោគជ័យពិតប្រាកដបាន។

៦. មានចំណេះដឹង ជាការពិតណាដែលថា ត្រូវមានចំណេះជាមុនដើម្បីដឹកនាំឲ្យបានល្អ ព្រោះជួបបញ្ហាយើងចេះថ្លឹងថ្លែងវែកញែក ដើម្បីដោះស្រាយទៅប្រកបដោយតម្លាភាព និងទទួលយកបានទាំងអស់គ្នា។

អ្នកដឹកនាំត្រូវហានគិត គិតឲ្យធំ ហាននិយាយ ហានធ្វើ ចេះទទួលខុសត្រូវ មានភាពក្លាហាន មានជំនឿ និងបង្កើតស្នាមញញឺមឲ្យបានច្រើន។ នេះបើតាមគ្រូបង្វឹកកំពុងមានឈ្មោះបោះសំឡេង ឧកញ៉ា យ៉ន សេងហាន បញ្ជាក់បន្ថែម។

លោកបានបញ្ជាក់ថា “អ្នកដឹកនាំមិនស្លន់ស្លោរទេ នៅពេលដែលជួបបញ្ហា ចេះគ្រប់គ្រងស្ថានការណ៍ ដើម្បីកុំឲ្យច្របូកច្របល់ ដូច្នេះធ្វើជាអ្នកដឹកនាំត្រូវកុំច្របូកច្របល់ ការណាច្របូកច្របល់ អ្វីៗក៏បរាជ័យដែរ”។ លោកថា ក្នុងសមរភូមិគេចល័តកងទ័ព ដើម្បឲ្យត្រូវក្បួន តែបើយើងចល័តខួរក្បាលចុះឡើងក្នុងពេលមានបញ្ហា គឺយើងដឹកនាំអត់ឆ្ពោះទៅរកភាពជោគជ័យបាននោះទេ៕

The post ឧកញ៉ា យ៉ន សេងហាន៖ អ្នកដឹកនាំមិនស្លន់ស្លោរនៅពេលដែលជួបបញ្ហា គ្រប់គ្រងស្ថានការណ៍ដើម្បីកុំឲ្យច្របូកច្របល់ appeared first on .