ភាពយន្តជាតិ

ព្រះអង្គ គូ សុភាព ទទួលបានការឧបត្ថម្ភពី ស្រីអូន ក្នុងការផលិតខ្សែភាពយន្ត ភិក្ខុពនេចរ

ឧកញ៉ាកោះក្របី — Mon, 14 Dec 2020 00:15:18 +0000

ម្ចាស់ផលិតផល សម្រស់ធម្មជាតិ អ្នកនាង ស្រីអូន និងស្វាមី បានចូលរួមបរិច្ចាគថវិកា ប្រគេនព្រះគ្រូ គូ សុភាព គង់នៅវត្តគល់ទទឹង ខណ្ឌច្បារអំពៅ រាជធានីភ្នំពេញ ក្នុងការផលិតខ្សែភាពយន្តផ្នែកអប់រំ ដកស្រង់ពីព្រះពុទ្ធសាសនា គឺរឿង ភិក្ខុពនេចរ ចំនួន ២០ភាគ ដែលជារឿងអប់រំផ្លូវចិត្តបែបសាសនា និងសង្គម។

ទំព័រហ្វេសបុក សម្រស់ធម្មជាតិ បានឲ្យដឹងថា “នាងខ្ញុំស្រីអូន និងស្វាមីបានឧបត្ថម្ភ ការផលិតរឿងអប់រំផ្លូវចិត្ត “ភិក្ខុពនេចរ” របស់ព្រះតេជគុណ គូ សុភាព ដែលមាន ២០ ភាគ សម្រាប់ជាធម្មទានដល់ប្រជាជនកម្ពុជា។
ថៅកែសម្រស់ធម្មជាតិ សូមអំពាវនាវឲ្យរង់ចាំតាមដានទស្សនាបងប្អូន។

ស្រីអូន បានបញ្ជាក់ថា រឿងនេះជារឿងដែលអាចជួយដល់សង្គមបានដូចគ្នា ជារឿងដែលអាចអោយបងប្អូនផ្លាស់ប្ដូរការគិតអវិជ្ជមានបានច្រេីន ជូនបុណ្យផងបងប្អូន ជួយសង្គមអោយបានច្រេីនផ្នែក។

ព្រះអង្គ គូ សុភាព ជាសង្ឃដែលចូលរួមចំណែកក្នុងការផ្សព្វផ្សាយព្រះពុទ្ធសាសនា និងផ្នែកអប់រំដ៍ល្បីល្បាញមួយព្រះអង្គនៅកម្ពុជា ក៍សូមថ្លែងអំណរគុណលោកស្រី នួន ស៊ុន្ទរី (ស្រីអូន) និងស្វាមី ប្រធានក្រុមហ៊ុនសម្រស់ធម្មជាតិ ដែលបានចូលរួមឧបត្ថម្ភផលិតរឿងអប់រំ “ភិក្ខុពនេចរ”។ សូមញាតិញោមរង់ចាំទស្សនា។

The post ព្រះអង្គ គូ សុភាព ទទួលបានការឧបត្ថម្ភពី ស្រីអូន ក្នុងការផលិតខ្សែភាពយន្ត ភិក្ខុពនេចរ appeared first on .

ស្តែងៗឈុត១នេះ ស្រីអូន ហ៊ានលេបដង្កូវទាំងរស់

កូនចៅឧកញ៉ា — Sat, 15 Aug 2020 08:28:39 +0000

បន្ទាប់ពីថតនៅក្រុងបាត់ដំបងអស់រយៈ៣សប្តាហ៍ ឃើញមានបែកធ្លាយរូបសម្តែង របស់គាត់ជាមួយសត្វ ដង្កូវយ៉ាងស្តែង សឹងមិនគួរឱ្យជឿ។«ទោះបីជានេះជាលើកទី១ សម្រាប់ នាងខ្ញុំក្នុងការសម្តែងឈុតដ៏ព្រឺព្រួចបែបនេះ នាងខ្ញុំក៏ហ៊ានធ្វើដែរ។ នាងខ្ញុំជឿថា ស្នាដៃល្អទាល់តែមានការលះបង់ខ្លះ។ ដូច្នេះ សង្ឃឹមថាទស្សនិកជន នឹងអាចពេញចិត្តការសម្តែង របស់នាងខ្ញុំផ្ទាល់ ក៏ដូចតារាសម្តែងផ្សេងៗទៀត»នេះបើតាមចំណាប់អារម្មណ៍ផ្ទាល់ របស់អ្នកនាងស្រីអូន។

បើលោកអ្នកចង់ដឹងថាដំណើរការថតនៅបាត់ដំបងប្រព្រឹត្តទៅយ៉ាងណានោះ អាចទស្សនារូបភាពក្រៅឆាកមួយចំនួនទៀត។ គ្រាន់តែឃើញ ក៏យើងដឹងថាក្រុមការងារ និងតួសម្តែង សុទ្ធតែប្រឹងប្រែងអស់ពីលទ្ធភាព តាមបែបស្តង់ដារដែរ។

សូមបញ្ជាក់ថាខ្សែភាពយន្តរន្ធត់ខ្នាតធំនេះ នឹងបញ្ចប់ការថតរបស់ខ្លួន នៅរាជធានីភ្នំពេញនៅពាក់កណ្ដាលខែសីហាយើងនេះ។ ទោះបីមានការយឺតយ៉ាវក្នុងការថតខ្លះ ក្រុមហ៊ុន«ដេនស៊ីងរ៉េន» ដែល ចែកចាយរឿង «កម្ម» បញ្ជាក់ ថានៅអាចចាក់បញ្ចាំងនៅដើមឆ្នាំ២០២១ដូចគ្រោងទុក បន្ទាប់ពីដំណើរការកាត់ត និង បច្ចេកទេសCGIចប់សព្វគ្រប់។

The post ស្តែងៗឈុត១នេះ ស្រីអូន ហ៊ានលេបដង្កូវទាំងរស់ appeared first on .

Wow! រឿង “កម្ម” របស់ “ស្រីអូន” ថតដោយកាមេរ៉ាដែលប្រើក្នុងឧស្សាហកម្មហូលីវូដ!

កូនចៅឧកញ៉ា — Wed, 15 Jul 2020 03:18:05 +0000

តាមលោក ភីជិត ឬទ្ធា ជាអ្នកដឹកនាំរឿង “កម្ម” ដែលជាភាពយន្តខ្នាតធំដំបូងរបស់ផលិតកម្ម “រាម” របស់ស្រីអូន សម្រស់ធម្មជាតិល្បីលើហ្វេសប៊ុក បានឲ្យដឹងថា ក្រុមការងារផលិត ពិសេសថ្នាក់ដឹកនាំផលិតកម្មបានសម្រេចនាំយកកាមេរ៉ាប្រភេទទំនើបបំផុតដែលមានប្រើក្នុងឧស្សាហកម្មភាពយន្តហូលីវូដ មកប្រើក្នុងការផលិតរឿងនេះដែរ។

“ប្រសិនបើទាំងអស់គ្នាចូលចិត្តរឿងហូលីវូដ ហើយចាប់អារម្មណ៍គុណភាពរូបពីអេក្រង់ នោះខ្ញុំអាចប្រាប់ថា គឺមកពី កាមេរ៉ា ARRIនេះឯង”។ លោក ភីជិត ឬទ្ធា ថ្លែង។

ដោយសារតែប្រភេទកាមេរ៉ា ARRI ហាក់ជារឿងថ្មីពេក អ្នកដឹកនាំរឿងខាងលើឲ្យដឹងថា ថ្មីៗនេះ “ដានស៊ីងរ៉េន” (DancingRains) ដែលជាក្រុមហ៊ុនចែកចាយ ភាពយន្តខ្នាតធំរឿង “កម្ម” របស់ផលិតកម្ម “រាម” ក៏បានរៀបចំសិក្ខាសាលាពិសេសមួយនៅ ទីតាំងថតផ្ទាល់របស់រឿងរន្ធត់ខាងលើតែម្តង ដល់សមិទ្ធិករភាពយន្តនៅក្រុងបាត់ដំបង ដើម្បីពង្រឹងចំណេះដឹងរបស់ពួកគេលើការផលិតភាពយន្ត ដោយកាមេរ៉ាទំនើបកម្រិតហូលីវូឌ ហៅថាARRI (អានថា «អេរី»)នេះ។

លោក ឬទ្ធា ដែលមិនត្រឹមជាអ្នកដឹកនាំរឿង តែក៏ជាតំណាងចែកចាយARRI Cambodia ដែរនោះ បានមានប្រសាសន៍ថា ក្រុមការងារលោកសម្រេចប្រើកាមេរ៉ា ARRI Alexa Mini LF ដែលជាម៉ូដែល ARRI ALEXA MINI ចុងក្រោយគេ ដើម្បីជួយលើកគុណភាព រូបភាពបានកម្រិតខ្ពស់ ក្នុងនោះក៏ព្រោះតែវាផ្ដល់ភាពងាយស្រួលលើការកែសម្រួលទាំងក្រាហ្វិច និងការរចនាប្លង់ផ្សេងៗ ដែលវានឹងផ្ដល់មកវិញ នូវគុណភាពរូបភាព និងសម្លេងកាន់តែមានគុណភាពខ្ពស់។

ក៏ដូចគ្នាដែរលោក នៅ សុវណ្ណារ័ត្ន ប្រធានផ្នែករូបភាព (Director of Photography) បានឲ្យដឹងថា មាន៣ចំណុចសំខាន់ដែលចាំបាច់ក្រុមការងារផលិត សម្រេចយក ARRI មកប្រើ។ ទី១ ផលិតកម្មចង់ពង្រឹងគុណភាព ភាពយន្តឱ្យខ្លាំង។ ទី២ ចង់នាំចេញស្នាដៃដំបូងនេះ ឱ្យបានលក់ចេញទៅក្រៅស្រុក និងទី៣ គឺដើម្បីទាក់ចិត្តទស្សនិកជនក្នុងស្រុកជាមួយគុណភាពដ៏ខ្ពស់ទាំងរូបភាព និងសំឡេង ក្រោមការគាំទ្រដោយឧបករណ៍មានបច្ចេកវិទ្យាទំនើបនេះដែរ។

បច្ចេកវិទ្យារបស់ ARRI បានធ្វើឲ្យលោក ប៉ោយ ឈុនលី សិក្ខាកាមម្នាក់ដែលមានវត្តមានបានមានការភ្ញាក់ផ្អើល លោកថា មិននឹកស្មានថា កាមេរ៉ាមួយនេះ ផ្តល់រូបភាពអស្ចារ្យយ៉ាងនេះ។ ដូច្នេះហើយ លោកបញ្ជាក់ថា លោកក៏នឹង សាកប្រើកាមេរ៉ាមួយនេះ សម្រាប់ភាពយន្តខ្លីរបស់លោកនៅពេលក្រោយដែរ។

រឿង “កម្ម” ត្រូវបានផលិតកម្ម “រាម” ដែលគេដឹងថា ស្រីអូន ជាបុគ្គលល្បីឈ្មោះតាមហ្វេសប៊ុកជាចាងហ្វាងនោះ បានប្រកាសចេញផលិតកាលពីសប្ដាហ៍មុន ដោយក្នុងនោះ សាច់រឿងស្ទើរទាំងស្រុងត្រូវថតនៅខេត្តបាត់ដំបង។ ក្រោយពីថតចប់ បើតាមតម្រុយខ្លះៗពី “ដានស៊ីងរ៉េន” ថា ប្រសិនបើស្ថានភាពអំណោយផល ខ្សែភាពយន្ត ខ្នាតធំរន្ធត់១នេះ នឹងបង្ហាញជូនទស្សនិកជន នៅគ្រប់រោង ភាពយន្តក្នុងស្រុក នៅដើមឆ្នាំ ២០២១នេះ៕

The post Wow! រឿង “កម្ម” របស់ “ស្រីអូន” ថតដោយកាមេរ៉ាដែលប្រើក្នុងឧស្សាហកម្មហូលីវូដ! appeared first on .

ស្រីម្នាក់ បោះទុន៥០ម៉ឺនដុល្លារ វិនិយោគលើវិស័យភាពយន្ត

កូនចៅឧកញ៉ា — Fri, 03 Jul 2020 23:23:31 +0000

លោកស្រី នួន ស៊ុន្ទរី ហៅ «ស្រីអូន»ថៅកែយីហោផលិតផលថែរក្សាសម្ភស្ស «សម្រស់ធម្មជាតិ» ល្បីមួយ ពេលនេះបាន សម្រេចចិត្ត ប្រឡូកចូលក្នុងវិស័យភាពយន្ត បន្តែមលើមុខជំនួញបច្ចុប្បន្ន ក្នុងនាមជាចាងហ្វាងផលិតកម្មផង និងជាតួសម្តែងផង។ មុខជំនួញថ្មីនេះ អ្នកនា បានដាក់ទុនវិនិយោគដំបូង ៥០ម៉ឺនដុល្លារ។

ថៅកែស្រីល្បីឈ្មោះរូបនេះ បានរៀបចំពិធីក្រុងពាលី កាលពីថ្ងៃទី០៣ កក្កដាកន្លងទៅនេះ នៅទីតាំងថតផ្ទាល់ ក្នុងក្រុងបាត់ដំបង ដែលជាទឹកដីអំណោយផលខាងសិល្បៈ និងសម្បូរទៅដោយ សំណង់ អាណានិគមចាស់ៗ។អ្វីដែលកាន់តែប្លែក គឺរឿងដំបូង ដែលស្រីអូន ប្រុងផលិតនោះ ជារឿងបែបរន្ធត់ខ្នាតធំ ប្រមូលផ្តុំដោយតារាសម្តែងអាជីពទាក់ទាញ ក្រុម ការងារ និងឧបករណ៍ថតទំនើប មិនចាញ់ផលិតកម្មក្រៅស្រុក។

ក្នុងពិធីនោះ ស្រីអូនជាប្រធានចាងហ្វាងផលិតកម្មបានលើកឡើងថា៖ «ផលិតកម្ម រាម» (Ream Production) លេច រូបរាងឡើងក៏ដោយសារតែចិត្តខ្ញុំស្រលាញ់វិស័យសិល្ប:ខ្លាំង ហើយលើសពីចិត្តស្រឡាញ់ ក៏យើងចង់រួមចំណែក អភិវឌ្ឃឧស្សាហកម្មភាពយន្តកម្ពុជា ដោយក្រុមហ៊ុនបានកំណត់ទស្សន:វិស័យយ៉ាងច្បាស់លាស់ថា «នាំភាពយន្តខ្មែរ ទៅកាន់ពិភពលោក»។ ហេតុដូចនេះហើយបានជាយើងសម្រេចវិនិយោគ ៥០ម៉ឺនដុល្លារ ជាការដាក់ទុនដំបូង ដោយ ចំណាយ៣០ម៉ឺនដុល្លារ លើកាមេរ៉ាថតលំដាប់ហូលីវូឌម៉ាក ARRI កុំព្យូទ័រកាត់តរូបភាព ឧបករណ៍ច្នៃសម្លេង និងសម្ភារៈ ទំនើបផ្សេងៗទៀត និងចំណាយ២០ម៉ឺនដុល្លារ លើការផលិតរឿងទី១ឡើងដែលមានចំណងជើងថា «កម្ម» រឺហៅជា ភាសាអង់គ្លេសថា «Karma»។

ចំណែកឯ Zanith ដែលជាតួឯកប្រុសក្នុងខ្សែភាពយន្តខ្នាតធំនេះវិញ សម្តែងចំណាប់អារម្មណ៍ថា៖ «ទោះបីខ្ញុំប្រឡូកក្នុង វិស័យសិល្បៈបាន៤ឆ្នាំមកហើយក្តី លើកនេះជារឿងដំបូងសម្រាប់ខ្ញុំសម្តែង សម្រាប់ចាក់នៅរោងភាពយន្ត។ ខ្ញុំពិតជា ស្រឡាញ់តួអង្គប្រុសជា «វិសុទ្ធ» ដោយសារមានស្នេហ៍ស្មោះ ដែលអាចឈ្នះអ្វីគ្រប់យ៉ាង។» គួរបញ្ជាក់ដែរថា Zanith បានលេចធ្លោក្នុងវិស័យភាពយន្ត បន្ទាប់ពីជាប់ការប្រកួតMr. United នៅប្រទេសហ្វីលីពីនក្នុងចំណោមជ័យលាភី៣រូប។ រួចប្អូនបានសម្តែងក្នុងភាពយន្តភាគតាមទូរទស្សន៍ដូចជា «មនុស្សពិត» នៅប៉ុស្តិ៍បាយ័ន។

សម្រាប់កញ្ញា Bella វិញដែលចាប់អាជីពពីតារាម៉ូដែលចេញពីកម្មវិធី Khmer Super Model បានគូសបញ្ញាក់ថា៖ ««កម្ម» ក៏ជាខ្សែភាពយន្តខ្នាតធំទី១ សម្រាប់នាងខ្ញុំដែរ។ នាងខ្ញុំត្រូវសម្តែងសាកដល់ទៅ៣ដង ទម្រាំបងដឹកនាំរឿង សម្រេចយក។ នាងខ្ញុំពិតជារំភើប ដែលបានចូលរួមសម្តែងក្នុងខ្សែភាពយន្តមួយនេះ ជាពិសេសដើរតួ«មាលា»ជាតួ ពិសពុល ពោរពេញដោយការប្រចណ្ឌ បណ្តាលពីចិត្តស្នេហ៍តែម្ខាងទៅលើ«វិសុទ្ធ»។»

បើក្រឡេកទៅ លោក ភិជិត ឬទ្ធា អ្នកដឹកនាំរឿងវិញ លោកមានប្រសាសន៍ថា៖ «ចំពោះដំណើរការផលិតរឿង «កម្ម» ក្រុមការងារមានការសម្អិតសម្អាងពិសេសលើការតុបតែងឆាក ការរចនាសម្លៀកបំពាក់ ការផាត់មុខ បច្ចេកទេសថត និង រចនាសម្លេង បច្ចេកទេសរចនា Visual Effects និងបច្ចេកទេសថតបូកផ្សំជាមួយបច្ចេកទេសពន្លឺ។ ជាពិសេសយើង ប្រើកាមេរ៉ា ARRI Alexa Mini LF ដែលជាម៉ូដែល ARRI ALEXA MINI ចុងក្រោយគេ ដែលជួយលើកគុណភាព រូបភាពបានកម្រិតខ្ពស់ ដែលធ្វើឱ្យយើងមានភាពងាយស្រួលកែសម្រួលទាំងក្រាហ្វិច និងការរចនាប្លង់ផ្សេងៗ នៅកំឡុង ពេលប្រើប្រាស់បច្ចេកទេសកាត់ត ដែលក្រុមបច្ចេកទេសរចនារូបភាពយើងចង់បាន ក្នុងការធ្វើឱ្យគុណភាពរូបភាព និង សម្លេងរបស់រឿងនេះកាន់តែប្រណីត។ បូកផ្សំជាមួយក្រុមការងារដែលមានគុណភាពនិងបទពិសោធន៍ វាកាន់តែធ្វើឱ្យ សង្វាក់ផលិតកម្មយើងប្រព្រឹត្តទៅតាមស្តង់ដាផលិតមួយដែលជួយលើកកំពស់គុណភាពកុនខ្មែរយើងទៅដល់កម្រិតខ្ពស់។ នេះជាការលើកឡើងត្រួសៗរបស់សមិទ្ធិករយើងដែលធ្លាប់ទទួលបានការបណ្តុះបណ្តាលភាពយន្ត ទាំងក្នុងស្រុក និងក្រៅ ស្រុកដូចជានៅជប៉ុន និងកូរ៉េ។

ដូច្នេះសូមទស្សនិកជនទាំងអស់កុំភ្លេចតាមដាន ដំណើរការផលិតរឿង «កម្ម» តាមបណ្តាញព័ត៌មាន និងអនឡាញ រហូត ដល់ថ្ងៃចាក់បញ្ចាំង។ តាមតម្រុយខ្លះៗពី«ដានស៊ីងរ៉េន» ដែលជាក្រុមហ៊ុនចែកចាយរឿង«កម្ម»នេះ បើស្ថានភាព អំណោយផល ខ្សែភាពយន្តខ្នាតធំរន្ធត់១នេះ នឹងបង្ហាញជូនទស្សនិកជន នៅគ្រប់រោង ភាពយន្តក្នុងស្រុក នៅដើមឆ្នាំ ២០២១នេះ។

The post ស្រីម្នាក់ បោះទុន៥០ម៉ឺនដុល្លារ វិនិយោគលើវិស័យភាពយន្ត appeared first on .

ស្អែកនេះភីអិនអិនទទួលសំណួរប្រិយមិត្តអំពីកុនខ្មែរតាមវិទ្យុអែហ្វអឹម១០២

កូនចៅឧកញ៉ា — Thu, 02 Jul 2020 05:14:37 +0000

ទូរទស្សន៍ភីអីនអិន ដែលកំពុងត្រៀមដាក់ផ្សាយរឿងភាគបែបអប់រំចិត្ត «អ្នកទីបី» នៅ ថ្ងៃ ស្អែក បាន បង្កើតយុទ្ធនាការផ្សព្វផសាយដ៏អស្ចារ្សមួយ ដោយមានអ្នកនិពន្ធ ល្បីឈ្មោះ ម៉ីសន សុធារី ជាទូតផ្សព្វផ្សាយរបស់ខ្លួន។ កញ្ញា ទូច បុប្ផា ប្រធានកម្មវិធីផ្សាយរបស់ទូរទស្សន៍ភីអីនអិន បានឱ្យដឹងថា ផ្នែកនៃយុទ្ធនាការនេះកញ្ញានិងជជែកផ្ទាល់ជាមួយប្រិយមិត្តមកពីបណ្តាខេត្តដែលជាអ្នកគាំទ្រកុនខ្មែរយ៉ាងចំណាប់ចំនួន តាមរយៈវិទ្យុដ៏ល្បីវបំផុតពីរ គឺ វាយោអែហ្វអឹមនិងវិទ្យុអែហ្វអឹម១០២។

នៅព្រឹកម៉ោង១០ស្អែកនេះប្រិយមិត្តអ្នកស្នេហាកុនខ្មែរផលិតករ អ្នកដឹកនាំរឿង អ្នកឧបត្ថម្ភដែលមានបំណងចោទសួរកញ្ញាអំពីរឿងភាគអ្នកទីបីនេះអាច ខលមកកាន់ស្ថានីយ៍វិទ្យុ១០២FMដើម្បីឆ្លើយឆ្លងបានចម្លើយភ្លាមៗ។ លោកជំទាវ ជា ស៊ុនដាណែត នាយិកាគ្រប់គ្រងវិទ្យុអែហ្វអឹម១០២បានមានប្រសាសន៍ថា «ដោយសារតែPNN មានកុនខ្មែរគ្រាន់បើមើលហើយ ទើបខ្ញុំរាល់ថ្ងៃ មើលតែPNN ទេ និយាយពិត!PNN ជ្រើសរើសដៃគូសហការ តាម ខ្ញុំដឹង មិនមែនចេះតែទទួលទេ ដូច្នេះខ្ញុំគិតថានេះជារឿងអប់រំសង្គម អប់រំស្ត្រី!» អ្នកនិពន្ធម៉ីសនសុធារីឱ្យដឹងយ៉ាងខ្លីថា «នេះជាការឃោសនាមួយដើម្បីជួយដល់ភាពយន្តភាគខ្មែរ ក៏ជាគោលការណ៍ចម្បងរបស់ម៉ីសនសុធារីហ្វេនក្លឹបMST គ្រប់គ្នាចង់ឃើញសង្គមយើងពោរពេញទៅដោយការជ្រោមជ្រែង និងលើកកម្ពស់សិល្បៈមួយប្រភេទដែលនៅត្រដាបត្រដួសនៅឡើយ»។ ភាពយន្តភាគរឿង អ្នកទីបី បានបង្ហាញអំពីល្បិចល្បងល្បួងស្នេហ៍បោកបញ្ឆោតបំផ្លាញអនាគតនារីវ័យក្មេង និងការប្រើអន្ទាក់លាភសក្ការៈលុយកាក់ គំនិតភ្លើតភ្លើនសម្ភារៈនិយមចង់ឈ្នះចាញ់ ដែលសុទ្ធសឹងជាពុទ្ធិដ៏មានតម្លៃសម្រាប់ព្រមានឱ្យមានការគ្រប់គ្រងខ្លួនឯងឡើងវិញ ក្នុងចំណោមបុរសនិងនារី ខណៈបញ្ហាស្នេហាត្រីកោណនិងការបណ្តាក់ទុនរឿងបេះដូង ប្តូរយកឱកាស ឋានៈលុយកាក់ នៅតែពុះកញ្ជ្រោលក្នុងសង្គមខ្មែរបច្ចុប្បន្ន។

ភាពយន្តភាគ រឿងអ្នកទីបី ដឹកនាំផលិតដោយលោក លៀក លីណានៃផលិតកម្ម LD និងមានអ្នកនិពន្ធ ឆាយ សុមាលី អ្នកដឹកនាំរឿងពីររូប គឺលោក មង្គល និង លោកស៊ីណាន ដែលភីអិនអិន នឹងចាប់ផ្តើមចាក់ផ្សាយភាគដំបូង ថ្ងៃសុក្រទី០៣ ខែកក្កដា ឆ្នាំ២០២០នេះតទៅ ពីថ្ងៃចន្ទ ដល់សុក្រ នៅវេលាម៉ោង៨ដល់ម៉ោង៩យប់។

The post ស្អែកនេះភីអិនអិនទទួលសំណួរប្រិយមិត្តអំពីកុនខ្មែរតាមវិទ្យុអែហ្វអឹម១០២ appeared first on .

មួយរឿងនេះ ភុល សុវណ្ណដានីន ស៊ីតួស្រី បានសម្រេចច្រើននាក់

កូនចៅឧកញ៉ា — Thu, 25 Jun 2020 02:39:22 +0000

“ក្នុងរឿងហ្នឹងខ្ញុំមានប្រពន្ធ១ ស្រី៣ នាក់ ខ្ញុំយកពួកគាត់មកបណ្ដុះក្នុងវិស័យសិល្បៈឲ្យពួកគាត់ល្បី ខ្ញុំជាចាងហ្វាងផលិតកម្ម ខ្ញុំមានលុយ ខ្ញុំទិញខនដូឲ្យពួកគាត់ន ទិញឡានឲ្យគាត់ជិះ ពួកគាត់ជាស្រីរបស់ខ្ញុំ” នេះជាការលើកឡើយ របស់បុរសសង្ហា លោក ភុល សុវណ្ណដានីន តួអង្គព្រាននារីនៅក្នុងរឿង « អ្នកទី ៣ » បានរៀបរាប់ពីឈុតឆាកខ្លះៗនៃរឿងភាគមួយនេះ ជូនក្រុមអ្នកសារព័ត៌មាន ក្នុងការជជែកលេង តុកាហ្វេមួយភីអិនអិន កាលពីម្សិលមិញ ។

ក្នុងខ្សែភាពយន្តខាងលើលោក ភុល សុវណ្ណដានីន ត្រូវបានផលិតកម្ម LD Picture ជ្រើសរើសឲ្យដើរ តួអង្គព្រាននារី។ រឿង « អ្នកទី ៣ » ជាប្រភេទខ្សែភាពយន្តភាគ និយាយពី ជីវិតពិតដ៏ល្អពិសេស ក្នុងអត្ថន័យលើកកម្ពស់សីលធម៌រស់នៅ កែលំអផ្នត់គំនិតនិងផ្លាស់ប្ដូរទស្សនៈអំពីស្នេហា មនោសញ្ចេតនា ក្នុងចំណោមយុវនារីនាពេលបច្ចុប្បន្ន។

លោក ភុល សុវណ្ណដានីន ដើរតួ គឺជា ចាងហ្វាងផលិតកម្ម ជាអ្នកមានទ្រព្យ ជាមនុស្សមានស្រីច្រើន។លោកបានថ្លែងថា រឿងក្នុងសាច់រឿង មិនសុខពីជីវិតពិតឡើយ មានលុយគឺ ជាពិតជាងាយស្រួល ចង់មានស្រី ចង់សប្បាយ វាមិនមែនជាបញ្ហាឡើយ ប៉ុន្តែការសប្បាយ ប្រសិនមិនចេះគិតត្រឹមត្រូវ នឹងនាំឲ្យ វិនាសដល់ក្រុមគ្រួសារជាក់ជាមិនខាន។

តាមរយសាច់រឿងនេះ ដាលីនថា បានអប់រំឲ្យបុរសទាំងអស់ ត្រូវចេះបែងចែកភាពសប្បាយរបស់ខ្លួនឲ្យបានត្រឹមត្រូវ ជាមួយក្រុមគ្រួសារ ជាមួយ ស្រីខាងក្រៅ។ ប្រសិនបើជ្រុលជាមានស្រី ត្រូវលៃយ៉ាងណាកុំឲ្យជាប់ដៃជាប់ជើង កុំទៅបំផ្លាញអនាគតគេ ហាមផ្ដាច់មិនត្រូវបោះបង់ចោលប្រពន្ធកូនឡើយ។

តារាប្រុសដែលមានងារជា ប៉ូលិសរូបនេះបានសង្កត់ធន់ថា ការបែកបាក់គ្រួសារ មិនមែនជារឿងងាយស្រួលឡើយ ច្បាស់ណាស់គ្រួសារមិនមានសុភមង្គលនោះទេ វានឹងប៉ះពាល់ដល់អារម្មណ៍កូនៗខ្វះភាពលក់ក្ដៅ ដូចនេះបុរសទាំងអស់ត្រូវគិត មុនសម្រេចចិត្តលួចទៅ មានស្រី ក្បត់ប្រពន្ធកូននោះ។

ខ្សែភាពយន្តរឿង « អ្នកទី៣ » មានទាំងអស់ចំនួន៤០ភាគ ភាពយន្តមួយនេះ ប្រជុំទៅដោយតារាល្បីៗជាច្រើនរួមមាន កញ្ញា. ស៊ឹម ស្រីមុំ លោក. លឹម ជាឡាយ លោក ភុល សុវណ្ណដានី កញ្ញា. សាយ ចាន់រាសី កញ្ញា. សួង ស៊ីធឿន ព្រមទាំង សិល្បករសិលក្បៈការិនីជាច្រើនរូបទៀត។

កញ្ញា ទូច បុប្ផាអ្នកគ្រប់គ្រងកម្មវិធីផ្សាយរបស់ទូរទស្សន៍ភីអិនអិន នឹងជាអ្នកដែលចូលរួមយ៉ាងសកម្មក្នុងការលើកកម្ពស់ទីផ្សារភាពយន្តខ្មែរនៅកម្ពុជាបានឱ្យដឹងថា នេះជារឿងភាគដែលសរសេរចេញពីជីវិតពិតក្នុងសង្គមជាក់ស្តែង ក៏ជារឿងដំបូងដែលវាយលុកចំៗទៅនឹងផ្នត់គំនិតរបស់យុវវ័យភ្លើតភ្លើនមួយចំនួនឱ្យមើលឃើញច្បាស់អំពី លទ្ធផលនៃការធ្វេសប្រហែស មាក់ងាយស្ថានការណ៍និងការទុកចិត្តខ្លួនជ្រុលពេក ជាហេតុបណ្តាលឱ្យអំពើអនាចារ្សនានាមករួមរឹតជីវិតបាន បង្កជាកំហុសពិបាកបកក្រោយ។កញ្ញាបន្ថែមថា ភាពយន្តភាគ រឿង «អ្នកទីបី»ក្រៅតែពីលាតត្រដាងអំពី ស្ថានភាពផុយស្រួយនៃតួនាទីនិងកិត្តិនាមក្នុងវិស័យសិល្បៈទំនើប ថែមទាំងបង្ហាញអំពីចរិតលក្ខណៈនៃបុគ្គល(តួអង្គ)ម្នាក់ៗដែលនឹងធ្វើឱ្យជីវិតខ្លួនត្រូវលិចលង់ ឬថ្កុំថ្កើងបាន ព្រោះតែការជ្រើសរើសគោលដៅជីវិតរៀងៗខ្លួន។

តាមការបញ្ជាក់ពី អ្នកគ្រប់គ្រងកម្មវិធីផ្សាយ ខ្សែភាពយន្តភាគរឿង «អ្នកទីបី»នេះ ដែលគ្រោងនឹងចាក់បញ្ចាំងលើកញ្ចក់ទូរទស្សន៍ភីអិនអិនដើមខែ កក្កដា ឆ្នាំ ២០២០ ខាងមុខនេះហើយ៕

រូបថត៖ Art Ain

The post មួយរឿងនេះ ភុល សុវណ្ណដានីន ស៊ីតួស្រី បានសម្រេចច្រើននាក់ appeared first on .

អ្នកចូលចិត្តផឹកស៊ីជុំគ្នា ទស្សនារឿងមួយនេះ អាចភ្លឺភ្នែក អប់រំកូវីដ១៩

កូនចៅឧកញ៉ា — Mon, 13 Apr 2020 03:38:43 +0000

ផេក”ស្លឹកពោធិ៍” ដែលជាផេក ផលិតភាពយន្តអប់រំខ្លីៗ បានបញ្ចេញស្នាដៃថ្មីមួយទៀតហើយ គឺរឿង “ហាមព្រោះស្រឡាញ់” ដោយភាពយន្តមួយនេះ បានបង្កប់អត្ថន័យអប់រំពីកូវីដ១៩ ពិសេសលើការអ្នកចូលចិត្តផឹកស៊ីជុំគ្នា ក្នុងរដូវចូលឆ្នាំនេះតែម្ដង។

ភាពយន្តខាងលើមានរយៈពេលជាង ៤នាទីនេះ បានអប់រំ ទាក់ទងនឹងជំនឿផ្ដេសផ្ដាស និងការដាក់ខ្លួនឲ្យស្ថិតនៅឆ្ងាយពីគ្នា ដើម្បីការពារខ្លួនពីការឆ្លងមេរោគរលាកផ្លូវដង្ហើមកូវីដ-១៩។ តារាសម្ដែងនៅក្នុងភាពយន្ត បានចូលរួមសម្ដែង ដោយ ភរិយា និងកូនរបស់តារាសម្ដែងវ័យជើងចាស់លោក សាវិន ហ្វីលីប ព្រមទាំង តារាសម្ដែងថ្មីៗមួយចំនួនទៀត។

ភាពយន្តខាងលើគឺជាភាពយន្តទី២ របស់ស្លឹកពោធិ៍ហើយ បន្ទាប់ពីរឿង “បន្ទប់ចត្ដាឡីស័ក” ជុំវិញ ការអប់រំ មនុស្សជុំវិញការ ការពារមេរោគកូវិដ-១៩ នេះ។ ចង់ដឹងថា រឿង”ហាមព្រោះស្រឡាញ់” សូមទស្សនាទាំងអស់គ្នា

https://www.facebook.com/Sleukpor/videos/655912405192835/

The post អ្នកចូលចិត្តផឹកស៊ីជុំគ្នា ទស្សនារឿងមួយនេះ អាចភ្លឺភ្នែក អប់រំកូវីដ១៩ appeared first on .

រឿង”ព្រលឹងល្បុក្កតោ” ភាពយន្តនិយាយពីក្បាច់គុណដូនតាខ្មែរ ប្រកាសថ្ងៃដាក់បញ្ចាំងផ្លូវការ

កូនចៅឧកញ៉ា — Mon, 16 Mar 2020 08:33:40 +0000

ភាពយន្ត”ព្រលឹងល្បុក្កតោ” ដែលជាភាពយន្តមួយផ្ដោតលើ ក្បាច់គុណខ្មែរ នឹងបង្កប់នូវស្នេហា មនោសញ្ចេតនា ស៊ីជម្រៅបានប្រកាសថ្ងៃ ចាក់បញ្ចាំងហើយ កាលពីថ្ងៃទី១៦ ខែមីនា ឆ្នាំ២០២០ នៅរោងភាពយន្ត Prime Cineplex សាខាSamai Square ក្រោមវត្តមាន ផលិតករ អ្នកដឹកនាំរឿង តួសម្តែងសំខាន់ៗ ដូចជាភ្ញៀវកិត្តិយសមួយចំនួនទៀត។

https://youtu.be/vZ9PkD3O8eU

ភាពយន្តខាងលើនិពន្ធនឹងដឹកនាំរឿងដោយ លោកគ្រូតា ព្រឹទ្ធាចារ្យក្រមាមាស «សាន គឹមស៊ាន» ក្រោមការជួយឧបត្ថម្ភដោយ ឧត្ដម តឹក ង៉ូយ ដែលមហាជនស្គាល់លោកថា ជាស្ដេចនំដូណាត់

រឿង”ព្រលឹងល្បុក្កតោ” ជាប្រភេទភាពយន្តខ្នាតធំ ដែលខ្លឹមសារសង្ខេបនៃ ចាស់រឿង និយយពី (នៅភូមិដាច់ស្រយាល១កន្លែង ប្រជារាស្ត្រតែងត្រូវក្រុមចោរ «តោកំណាច» យាយី និងកាប់សម្លាប់ ប្លន់យកទ្រព្យ សម្បត្តិ។ ក្រោយពីលោកគ្រូតា «ស៊ាន» ចុះពីលើភ្នំ ឃើញទ្រព្យសម្បត្តិត្រូវបាត់បង់អស់ ភូមិក៏ត្រូវដុតចោលទៀត ប្រពន្ធគាត់ក៏ត្រូវសម្លាប់ ដោយបន្សល់នូវកូនប្រុសម្នាក់ ស្រីម្នាក់។ ក្រោយមកពួកគេក៏បានកសាងភូមិដ្ឋានថ្មី ដោយ បានទទួលការបង្ហាត់ក្បាច់គុណល្បុក្កតោពីលោកគ្រូតា ជាពិសេសយុវជន និងយុវនារីក្នុងភូមិដែលនៅរួចរស់។ ច្រើន ឆ្នាំកន្លងផុតមក ពេលកូនគាត់ពេញវ័យ បានស្រឡាញ់កូនស្រីសេដ្ឋីចិត្តធម៌ម្នាក់។ តែភូមិក៏ត្រូវរងការឆក់ប្លន់ម្តងទៀត ពីក្រុមចោរ «តោកំណាច»នោះ។ អ្នកភូមិរួមគ្នាប្រើក្បាច់គុណដែលខ្លួនចេះ ដើម្បីការពារភូមិ និងបើករបាំង មេចោរ អាថ៌កំបាំងម្នាក់នោះ រហូតបានសម្រេច។)

លោកគ្រូតា សាន គឹមស៊ាន ហៅតាក្រមាមាស ដែលជាអ្នកដឹកនាំរឿងបានមាន ប្រសាសន៍ថា សាច់រឿងទាំងមូលគឹឆ្លុះបញ្ចាំងពីរបៀបហ្វឹកហាត់គុណបុរាណ និងវិភាគពីចរិតមនុស្ស ដែលមិនអាច មើលតែសំបកក្រៅនោះទេ។ លោកថា “ព្រលឹងល្បុក្កតោ” ដែលលោកផលិតឡើងមកនេះ គឺចង់ឲ្យក្មេងជំនាន់ក្រោយបានស្គាល់ ពីច្បាច់គុណរបស់ខ្មែរ ដែលបន្សល់ទុករាប់ពាន់ឆ្នាំមកហើយ ពិសេស ក្បាច់ល្បុក្កតោ នេះតែម្ដង។

ជាមួយនឹង ស្នាដៃខាងលើ ព្រឹទ្ធាចារ្យក្រមាមាស លោក សាន គឹមស៊ាន រង់ចាំមតិយោបល់កែលម្អពីប្រិយមិត្តខាងព៏ត៌មាន និងទស្សនិកជន ដោយក្តីរីករាយ ព្រោះថានេះជាស្នាដៃដំបូងរបស់លោកផ្ទាល់បានដឹកនាំខ្លួនឯង ដោយសហការជាមួយការីថត និងកាត់ត ចំណាន គឺលោក សុង សូរភក្តី។

សម្រាប់ឯកឧត្តម តឹក ង៉ូយ ដែលសាធារណជនមួយចំនួនហៅគាត់ថា «ស្តេចនំដូណាត់» និងជាផលិតករ ក៏ដូចជា អ្នកឧបត្ថម្ភ ការចំណាយទាំងស្រុង លើការថតភាពយន្តគុននិយមនេះ បានថ្លែងថា មូលហេតុដែលនាំឲ្យសម្រេច ចំណាយប្រាក់រហូតដល់ទៅ១០ម៉ឺន ដុល្លារ ក្នុងផលិតភាពយន្តនេះឡើង ក៏ព្រោះតែលោក ចង់រួមចំណែកលើកតម្កើង ក្បាច់គុណរបស់ខ្មែរ ពិសេសក្បាច់គុនល្បុក្កតោតែម្ដង។ ឯកឧត្តម បានបន្តថា លោកមមានជំនាញខាងខ្សែភាពយន្តតិចតួចយ៉ាងណាក្តី លោកសូមកោតសសើរ ដល់លោកគ្រូគឺមស៊ាន ដែលពុះពារលើកតម្កើងក្បាច់គុនល្បុក្កតោរបស់ខ្មែរ។ លោកថា នេះហើយជាដួងព្រលឹងមួយរបស់ជាតិ យើង ដែលខ្មែរយើងគ្រប់គ្នាគួរយកលំនាំតាម ហើយនាំងគ្នាអភិរក្ស។

រីឯលោកយឹម លីនហោស ប្រធានផ្នែកប្រតិបត្តរោងភាពយន្ត Prime Cineplexវិញ បានបញ្ជាក់ថា៖ «ជាការពិត ណាស់ រោងភាពយន្តយើងខ្ញុំប្រកាន់គោលជំហរគាំទ្រស្នាដៃខ្មែរ ជាពិសេសគឺរឿង «ព្រលឹងល្បុក្កតោ» នេះឯង។»

តាមផែនការ «ព្រលឹងល្បុក្កតោ» នឹងចាក់ជូន ទស្សនិកជនទាំងអស់បានទស្សនា ចាប់ពីថ្ងៃទី៣០ខែមេសា ឆ្នាំ២០២០នេះតទៅ នៅគ្រប់រោងភាពយន្តទាំងអស់ក្នុងប្រទេសកម្ពុជា។ ទទឹមគ្នានោះ ភាពយន្តមួយនេះក៏គ្រោង នឹង យកទៅដាក់លើទឹកដីអាមេរិកផងដែរ៕

The post រឿង”ព្រលឹងល្បុក្កតោ” ភាពយន្តនិយាយពីក្បាច់គុណដូនតាខ្មែរ ប្រកាសថ្ងៃដាក់បញ្ចាំងផ្លូវការ appeared first on .

ផលិតកម្មថ្មីមួយ ក្រុងពាលីថតខ្សែភាពយន្ត “កំពូលលោកប្ដី” ត្រៀមវាយលុកទីផ្សារឆ្នាំ២០២០

កូនចៅឧកញ៉ា — Fri, 13 Mar 2020 03:45:24 +0000

ផលិតកម្មថ្មីមួយឈ្មោះថា “ផលិតកម្ម BN” បានធ្វើពិធីក្រុងពាលីថតខ្សែភាពយន្ត N Love Series “កំពូលលោកប្ដី” ដើម្បីចូលរួមចំណែកលើ វិស័យភាពយន្ត ក្នុងឆ្នាំ២០២០នេះ ពិធីក្រុងពាលី បានធ្វើនៅស្នាក់ការផលិតកម្មតែម្ដង ក្នុងសង្កាត់ស្ទឹងមានជ័យ ក្រោមវត្តមានតារាសម្ដែងប្រុសស្រីល្បីឈ្មោះចូលរួមយ៉ាងច្រើនកុះករ។

ថ្លែងក្នុងពិធីក្រុងពាលីរឿងខាងលើនេះដែរលោក ផុន សេម ជាចាងហ្វាងផលិតកម្មបានឲ្យដឹងថា ខ្សែភាពយន្ត N Love Series “កំពូលលោកប្ដី” ជាប្រភេទរឿង បែបមនោសញ្ចេតនាស្នេហាអូនបង បែបកំប្លែងលាយលំជាមួយឈុតវាយតប់ទាស់យ៉ាងជក់ចិត្ត និងការអប់រំជាច្រើន ធ្វើឲ្យអ្នកទស្សនាជក់ចិត្តមិនខាន។

ភាពយន្តមួយនេះ នឹងចេញថតបន្ទាប់ពីថ្ងៃក្រុងពាលីរួច ដោយប្រើរយៈពេលនៃការ២ខែ ដែលទីតាំងនៃការថត មាននៅរាជធានីភ្នំពេញ និង បណ្ដាខេត្តមួយចំនួនដូចជាកោះកុងជាដើម។ ការចំណាយនៃការផលិតភាពយន្តមួយនេះ គ្រោងចំណាយរហូតដល់ខ្ទង់៥ម៉ឺនដុល្លារ។

លោក ផុន សេម ដែលជាចាងហ្វាងផលិតកម្ម បានលើកឡើងទៀតថា បន្ទាប់ពីរឿងនេះទៅផលិតកម្ម BN មានផែនការផលិតរឿងថ្មីត្រៀមថតបន្តផងដែរ។

សូមបញ្ញាក់ផងដែរថា ភាពយន្តខ្នាតធំ N Love Series “កំពូលលោកប្ដី” ចូលរួមសម្ដែងដោយ៖ កញ្ញា ចាន់ ស្រី ម៉ី កញ្ញា សូ សីតា លោក លឹមម៉េងគ័ង កញ្ញា អាហ្វុង លោក រ៉េត សុវណ្ណពន្លឺ នឹង ចាងហ្វាងផលិតកម្ម លោក ផុន សេម ។

The post ផលិតកម្មថ្មីមួយ ក្រុងពាលីថតខ្សែភាពយន្ត “កំពូលលោកប្ដី” ត្រៀមវាយលុកទីផ្សារឆ្នាំ២០២០ appeared first on .

រឿង «កុំងាកក្រោយ» របស់ផលិតកម្ម « Galaxy Navatra » ដាក់សម្ពោធជាផ្លូវការហើយ

កូនចៅឧកញ៉ា — Wed, 25 Dec 2019 02:29:26 +0000

រឿង «កុំងាកក្រោយ» ដែលជាស្នាដៃទី២ របស់ផលិតកម្ម « Galaxy Navatra » បានដាក់សម្ផោធ ជាផ្លូវការ នៅល្ងាចថ្ងៃទី២៤ ខែធ្នូ ឆ្នាំ២០១៩ នៅរោងភាពយន្តអេឌីនបឹងកក់ ដោយមានតារាសិល្បៈជាច្រើនដួង អញ្ជើញចូលរួមជាភ្ញៀវកិត្តិយសយ៉ាងច្រើនកុះករ។

បន្ទាប់ពីស្ងប់ស្ងាត់មួយរយៈក្រោយពីបញ្ចេញរឿងទី១ “កំពូលល្ងង់នៅអាស៊ី” នៅពេលនេះ ផលិតកម្ម Galaxy របស់ឧកញ៉ា ឡេង ណាវ៉ាត្រា បានបញ្ចេញស្នាដៃទី២ទៀតហើយ គឺរឿង “កុំងាកក្រោយ” ដែលជាស្នាដៃដឹកនាំរឿងរបស់ រ៉ូណាន ចាន់ណា។នេះជារសជាតិថ្មីរបស់ផលិតកម្ម ដែលរឿងទី១ជាប្រភេទរឿងកំប្លែងសើចសប្បាយ ប៉ុន្តែរឿងទី២នេះវិញ គឺប្រភេទរឿងភ័យរន្ធត់ ព្រឺព្រួច បើនៅម្នាក់ឯងស្ទើរមិនចង់ហ៊ានមើល។

បើយោងតាមការបញ្ជាក់របស់លោក ចាន់ណា រ៉ូណាន់ អ្នកនិពន្ធ និងដឹកនាំរឿងបានលើកឡើងថា នេះ ជាស្នាដៃដែលលោកបានដាក់ចិត្តដាក់បេះដូង កម្លាំងកាយចិត្តរួមគ្នាជាមួយសិល្បករ និងក្រុមការងារដើម្បីបង្កើតឲ្យបានភាពយន្តដែលមានគុណភាព និងបំពេញចិត្តទស្សនិកជន។ ទោះឆ្លងកាត់ការលំបាក ពិសេសការថតរហូតដល់យប់ជ្រៅ ទីតាំងនៅខេត្តបាត់ដំបង ប៉ុន្តែក្រុមការងារ សិល្បករ ពិតជាសប្បាយចិត្តដែលស្នាដៃមួយនេះត្រៀមចាក់បញ្ចាំង។

លោកឧកញ៉ាវ័យក្មេង ឡេង ណាវ៉ាត់ត្រា ដែលជាម្ចាស់ផលិតកម្មបានថ្លែងថា ភាពយន្តរឿង «កុំងាកក្រោយ» ត្រូវបានផលិតជិតរយៈពេលកន្លះឆ្នាំ ទម្រាំបានបញ្ចាំង ដោយលោកឧកញ៉ា រំពឹងយ៉ាងខ្លាំងថា ភាពយន្តនេះ នឹងទទួលបានភាពជោគជ័យ និងមានការគាំទ្រច្រើន ពីសំណាក់បងប្អូនប្រជាពលរដ្ឋ ពីព្រោះសម្អាងថា ជារឿងដែលមានរូបភាពភ្លឺច្បាស់ល្អ សម្លេងស្ដង់ដា និងមានគុណភាពពេញលក្ខណៈជាភាពយន្ត និងមានឈុតឆាកភ័យរន្ធត់តាំងពីដើមរហូតដល់ចប់ គឺទាក់ចិត្តតែម្តង។

លោកឧកញ៉ាវ័យក្មេងរូបនេះ បានឲ្យដឹងទៀតថា នៅក្នុងឆ្នាំ២០២០ខាងមុខនេះ ផលិតកម្មរបស់លោក និងត្រៀមរៀបចំដើម្បីផលិតនូវរឿងថ្មីៗទៀតជាច្រើន ដើម្បីបំពេញតាមសេចក្ដីត្រូវការ របស់ប្រិយមិត្ត។

លោកបានបន្ថែមថា រឿងទាំងពីររបស់ផលិតកម្ម លោកផលិតកន្លងមកនេះ គ្រាន់តែជាការឆាប់ផ្ដើមដំបូងប៉ុណ្ណោះ។ លោកឧកញ៉ាបន្ដថា លោកមានមហិច្ឆតាធំ ដោយចង់ផលិតរឿងជាច្រើនទៀតដើម្បីបង្ហាញពីគុណភាព និងស្នាដៃរបស់កូនខ្មែរ ដើម្បីយកទៅប្រកួតប្រជែងនៅលើទីផ្សារអន្ដរជាតិទៀតផង។ រឿង «កុំងាកក្រោយ» នេះបានចំណាយថវិការអស់ប្រមាណជា ៦ ម៉ឺនទៅ ៨ម៉ឺនដុល្លារ ផងដែរ។

រឿង «កុំងាកក្រោយ» ចូលរួមសម្តែងដោយ តារាសម្តែងជាច្រើនរូបរួមគ្នាមានដូចជាលោក ទ្រី តារាវុធ កញ្ញា ឆាយ នីតា លោក ជា លាងឈែ លោក ភីម៉ៃ លោកស្រី អ៊ុំ សក្ខណា និងតារាសម្តែងជាច្រើនរូបទៀត។ ការដាក់លក់សំបុត្រជាផ្លូវការនៅ ថ្ងៃទី២៦ខែធ្នូ ឆ្នាំ២០១៩ នៅគ្រប់រោងភាពយន្តទាំងអស់ក្នុងរាជធានីភ្នំពេញ។ តាមកាលវិភាគ ក្រៅពីនៅភ្នំពេញ បងប្អូនប្រិយមិត្តនៅតាមបណ្ដាខេត្តដូចជា បាត់ដំបង-សៀមរាប-ព្រះសីហនុ-បន្ទាយមានជ័យ-ប៉ោយប៉ែត-តំបន់អ្នកលឿង-ស្វាយរៀង និងខេត្ត កំពង់ចាម ក៏អាចទស្សនាព្រមៗគ្នាដែរ៕

The post រឿង «កុំងាកក្រោយ» របស់ផលិតកម្ម « Galaxy Navatra » ដាក់សម្ពោធជាផ្លូវការហើយ appeared first on .

ភាពយន្តជាតិ

ព្រះអង្គ គូ សុភាព ទទួលបានការឧបត្ថម្ភពី ស្រីអូន ក្នុងការផលិតខ្សែភាពយន្ត ភិក្ខុពនេចរ

ស្តែងៗ​ឈុត​១នេះ ស្រីអូន ហ៊ាន​លេប​ដង្កូវ​ទាំង​រស់

Wow! រឿង “កម្ម” របស់ “ស្រី​អូន” ថត​ដោយ​កាមេរ៉ា​ដែល​ប្រើ​ក្នុង​ឧស្សាហកម្ម​ហូលីវូដ!

ស្រី​ម្នាក់ បោះ​ទុន​៥០​ម៉ឺនដុល្លារ ​វិនិយោគ​លើ​វិស័យ​ភាពយន្ត

ស្អែកនេះភីអិនអិនទទួលសំណួរប្រិយមិត្តអំពីកុនខ្មែរតាមវិទ្យុ​អែហ្វអឹម​១០២

មួយ​រឿង​នេះ ភុល សុវណ្ណដានីន ស៊ី​តួ​ស្រី ​បាន​សម្រេច​ច្រើន​នាក់

អ្នក​ចូល​ចិត្ត​ផឹក​ស៊ី​ជុំ​គ្នា ​ទស្សនា​រឿង​មួយ​នេះ អាច​ភ្លឺ​ភ្នែក អប់រំ​កូវីដ​១៩

រឿង”ព្រលឹងល្បុក្កតោ” ភាពយន្ត​និយាយ​ពី​ក្បាច់​គុណ​ដូនតា​ខ្មែរ ប្រកាស​​ថ្ងៃ​ដាក់​បញ្ចាំង​ផ្លូវ​ការ

ផលិតកម្ម​ថ្មី​មួយ ក្រុង​ពាលីថតខ្សែភាពយន្ត “កំពូលលោកប្ដី” ត្រៀម​វាយ​លុក​ទីផ្សារ​ឆ្នាំ២០២០

រឿង «កុំងាកក្រោយ» របស់​ផលិតកម្ម « Galaxy Navatra » ដាក់សម្ពោធជាផ្លូវការ​ហើយ​