ចាប់តាំងពីថ្ងៃទី៧ ខែមករា ឆ្នាំ២០២៥ នេះមក ភ្លើងឆេះព្រៃនៅតំបន់ធំៗដូចជា Pacific Palisades, Eaton និង Hurst រួមជាមួយនឹងភ្លើងឆេះតូចៗជាច្រើនកន្លែងផ្សេងទៀត បានគ្របដណ្តប់លើផ្ទៃដីសរុបជាង ១១ ៦០០ ហិកតា ដោយបណ្តាលឲ្យមានការខូចខាត ឬឆេះទាំងស្រុងនូវរចនាសម្ព័ន្ធជាង ១០ ០០០ និងបង្ខំឲ្យមានការជម្លៀសចេញនៃមនុស្សជាង ១៨០ ០០០ នាក់ដែលរស់នៅក្នុងទីក្រុង Los Angeles ទៅកាន់ទីតាំងមាន​សុវត្ថិភាព​។

ជាមួយគ្នានេះ ប្រធានាធិបតីអាមេរិក លោក ចូ បៃដិន បានពណ៌នាថា នេះជា គ្រោះមហន្តរាយភ្លើងឆេះព្រៃដែលរីករាលដាលលឿនបំផុត និងបំផ្លិចបំផ្លាញខ្លាំងបំផុត នៅក្នុងប្រវត្តិសាស្ត្ររដ្ឋ California ខណ:ក្រុមអ្នកវិភាគនៅតែបន្តវាយតម្លៃចំពោះផលប៉ះពាល់ហិរញ្ញវត្ថុនៃគ្រោះមហន្តរាយដ៏អាក្រក់បំផុតមួយនេះ។

ក្នុងរយៈពេលត្រឹមតែប៉ុន្មានថ្ងៃចុងក្រោយប៉ុណ្ណោះ អង្គការ និងស្ថាប័នជាច្រើន បានលើកឡើងពីការប៉ាន់ស្មានរបស់ពួកគេខុសៗគ្នា អំពីទំហំនៃការខូចខាតបណ្តាលមកពីភ្លើងឆេះព្រៃដែលកំពុងបន្តរីករាលដាលកាន់តែខ្លាំង។ កាលពីថ្ងៃទី១០ ខែមករា ក្រុមហ៊ុន JP Morgan បានបង្កើនការព្យាកររបស់ខ្លួនទ្វេដងសម្រាប់ការខាតបង់ធានារ៉ាប់រង ដែលអាចឈានដល់ចំនួន ២០ពាន់លានដុល្លារ ស្របពេលស្ថាប័ន Wells Fargo ក៏បានផ្តល់តួលេខស្រដៀងគ្នានេះផងដែរ ដោយព្រមានថាការខាតបង់សេដ្ឋកិច្ចសរុបពីគ្រោះមហន្តរាយភ្លើងឆេះព្រៃនេះ អាចលើសពី ៦០ពាន់លានដុល្លារ។

ប៉ុន្តែទោះជាយ៉ាងណាក៏ដោយ ក្រុមអ្នកព្យាករអាកាសធាតុឯកជន AccuWeather បានបង្ហាញពីការប៉ាន់ប្រមាណរបស់ខ្លួន កាលពីពេលថ្មីៗនេះថា ការខាតបង់សេដ្ឋកិច្ចសរុប អាចបន្តកើនឡើងចន្លោះពី ១៣៥ ទៅ ១៥០ពាន់លានដុល្លារ ដែលជាសញ្ញាមួយបង្ហាញពីការស្តារឡើងវិញដ៏លំបាក និងការកើនឡើងខ្ពស់នៃបុព្វលាភធានារ៉ាប់រងរបស់ម្ចាស់ផ្ទះ។

មិនតែប៉ុណ្ណោះ ក្រុមហ៊ុនផ្តល់សេវាហិរញ្ញវត្ថុ Moody’s Ratings បាននិយាយទៀតថា ៖”វានឹងអាចចំណាយពេលច្រើនសប្តាហ៍ ឬច្រើនខែ ដើម្បីកំណត់ពីទំហំនៃការខាតបង់ដែលមានចំពោះការធានារ៉ាប់រង ដោយសារគ្រោះមហន្តរាយនេះ។ តែទោះជាយ៉ាងណាក៏ដោយ ភ្លើងឆេះព្រៃនៅទីក្រុង Los Angeles អាចមានតម្លៃថ្លៃបំផុតក្នុងប្រវត្តិសាស្ត្ររបស់រដ្ឋ California ” ។

ជម្រាបជូនថា Pacific Palisades គឺជាសង្កាត់មួយក្នុងចំនោមសង្កាត់ដែលមានតម្លៃអចលនទ្រព្យថ្លៃបំផុត នៅក្នុងសហរដ្ឋអាមេរិក ខណ:ទីនោះក៏ជាបណ្តុំទៅដោយផ្ទះរបស់តារា Hollywood ជាច្រើន និងវិមានដែលមានតម្លៃដល់ទៅរាប់លានដុល្លារ។ បន្ទាប់​ពី​ភ្លើង​ឆេះ​ក្នុង​សប្តាហ៍​នេះ តម្លៃ​ធានា​រ៉ាប់រង​នៅ​ទីនោះ​អាច​បន្តកើនឡើង​ថ្លៃបន្ថែមទៀត៕

The post ទំហំខាតបង់សេដ្ឋកិច្ចក្នុងមហន្តរាយភ្លើងឆេះព្រៃនៅ Los Angeles អាចបន្តកើនឡើងដល់ ១៥០ពាន់លានដុល្លារ appeared first on .

ភ្លើងឆេះព្រៃដ៏អាក្រក់បំផុតក្នុងប្រវត្តិសាស្រ្ត នៅទីក្រុង Los Angeles បានសម្លាប់មនុស្សយ៉ាងហោចណាស់ ២នាក់ បំផ្លាញអគារ និងផ្ទះសម្បែងប្រជាជនអស់រាប់រយ ចាប់តាំងពីហេតុការណ៍នេះ បានចាប់ផ្តើមកាលពីថ្ងៃអង្គារ ជាមួយនឹងខ្យល់បក់ខ្លាំងដែលបានរារាំងដល់ប្រតិបត្តិការពន្លត់អគ្គីភ័យ និងការឆេះកាន់តែរីករាលដាលធំឡើង។

ទន្ទឹមនឹងនេះ AccuWeather ដែលបានប៉ាន់ប្រមាណការខាតបង់ចន្លោះពី ៥២ពាន់លានដុល្លារ ទៅ ៥៧ពាន់លានដុល្លារ បានបន្ថែមថា ប្រសិនបើភ្លើងឆេះព្រៃនេះ បន្តរាលដាលដល់សង្កាត់ដែលមានប្រជាជនរស់នៅច្រើន ការប៉ាន់ប្រមាណបច្ចុប្បន្នចំពោះទំហំនៃការខូតខាត និងការខាតបង់សេដ្ឋកិច្ច អាចនឹងបន្តកើនឡើងកាន់តែច្រើនបន្ថែមទៀត។

លោក Jonathan Porter ប្រធានផ្នែកឧតុនិយមរបស់ AccuWeather បាននិយាយថា ៖”ប្រសិនបើរចនាសម្ព័ន្ធមួយចំនួនធំបន្ថែមទៀត ត្រូវបានដុតបំផ្លាញនៅក្នុងពេលប៉ុន្មានថ្ងៃខាងមុខ នោះវានឹងក្លាយជាគ្រោះមហន្តរាយភ្លើងឆេះព្រៃដ៏អាក្រក់បំផុតមិនធ្លាប់មាននៅក្នុងប្រវត្តិសាស្រ្តរដ្ឋកាលីហ្វ័រញ៉ាសម័យទំនើបនេះ ដោយផ្អែកលើចំនួនសំណង់ដែលបានឆេះ និងការខាតបង់សេដ្ឋកិច្ច” ។

ជាមួយគ្នានេះ ក្រុមហ៊ុនប្រឹក្សាអចលនទ្រព្យ CoreLogic ប៉ាន់ប្រមាណថាមានផ្ទះច្រើនជាង ៤៥៦ ០០០ ខ្នង អាចត្រូវបានបំផ្លាញ ខណ:តម្លៃសាងសង់ឡើងវិញ អាចកើនឡើងដល់ជិត ៣០០ពាន់លានដុល្លារ ជាពិសេសនៅតំបន់រងផលប៉ះពាល់ខ្លាំង ដូចជាទីក្រុង Los Angeles និងតំបន់ Riverside ជាដើម៕

The post មហន្តរាយភ្លើងឆេះព្រៃនៅ Los Angeles អាចធ្វើឲ្យមានការខាតបង់សេដ្ឋកិច្ចដល់ទៅជាង ៥០ពាន់លានដុល្លារ appeared first on .

ក្នុងសេចក្តីរាយការណ៍របស់ BBC បានបង្ហាញឲ្យដឹងថា គ្រោះមហន្តរាយភ្លើងឆេះព្រៃ ដែលបានផ្តើមឡើងដំបូងក្នុងតំបន់ Pacific Palisades កាលពីថ្ងៃអង្គារទី៧ ខែមករា ឆ្នាំ២០២៥ ឥឡូវនេះ កំពុងបន្តរាលដាលក្នុងល្បឿនយ៉ាងលឿន ឈានដល់ទីក្រុង Los Angeles រហូតមានការប្រកាសអាសន្ន ស្របពេលផ្ទះសម្បែងមួយចំនួនត្រូវបានបំផ្លាញ និងមានការជម្លៀសប្រជាជនទៅកាន់កន្លែងសុវត្ថិភាពផងដែរ។

យ៉ាងណាមិញ ជុំវិញគ្រោះមហន្តរាយភ្លើងឆេះព្រៃដ៏ធំសម្បើមនេះ កំពុងបន្តគំរាមកំហែងនៅក្នុងតំបន់ Pacific Palisades ខ្លាំងជាងគេ ខណ:អចលនទ្រព្យតម្លៃថ្លៃៗជាច្រើន ត្រូវបានបំផ្លាញក្លាយជាផេះ។

បើយោងតាមទិន្នន័យពីស្ថាប័នវាយតម្លៃ ​​Redfin បានបង្ហាញឲ្យដឹងថា តម្លៃលក់ជាមធ្យមសម្រាប់ផ្ទះមួយខ្នង ក្នុងតំបន់ Pacific Palisades ត្រូវបានគេរាយការណ៍ថាមានតម្លៃប្រមាណ ៣,៣លានដុល្លារ ឯណោះ គិតនៅក្នុងខែធ្នូ។ សង្កាត់​នេះ​ បណ្តុំទៅដោយ​ផ្ទះ​ដែល​ជា​កម្មសិទ្ធិ​របស់​តារា​ល្បីៗជាច្រើនរូប ​រួម​មាន Tom Hanks និង Rita Wilson, Ben Affleck, Jennifer Aniston និង Bradley Cooper ជាដើម។

ទន្ទឹមនឹងនេះ កាលពីថ្ងៃអង្គារ លោក Spencer Pratt ដែលជាតារាទូរទស្សន៍ដ៏ល្បីល្បាញរស់នៅតំបន់ Pacific Palisades នេះ បាននិយាយថាផ្ទះរបស់លោកត្រូវបាន​អគ្គិភ័យ​លេបត្របាក់ និងបណ្តាលឲ្យទ្រព្យសម្បត្តិផ្សេងទៀតខូចខាតទាំងស្រុង។

ក្រៅពីនោះ ក៏នៅមានតំបន់ផ្សេងៗទៀតដែលកំពុងរងគ្រោះសារភ្លើងឆេះព្រៃនេះផងដែរ ដូចជា Altadena ដែលតម្លៃផ្ទះនៅក្នុងតំបន់នេះជាមធ្យមមានចំនួនប្រមាណ ១,៣លានដុល្លារ គិតក្នុងខែធ្នូ ស្របពេលនៅតំបន់ Sylmar ដែលជាកន្លែងភ្លើងឆេះព្រៃ Hurst fire ផ្ទះជាធម្យមមានតម្លៃប្រមាណ ៧៦០ ០០០ដុល្លារ ។ នេះបើយោងតាមទន្នន័យពី ​​Rocket Homes។

បើតាមអាជ្ញាធរនៅក្នុងតំបន់ បានបង្ហាញថា Altadena ដែលជាកន្លែងភ្លើងឆេះព្រៃបានរីករាលដាលទ្វេដង ក្នុងរយៈពេលត្រឹមតែប៉ុន្មានម៉ោងចុងក្រោយ ធ្វើឲ្យផ្ទះអ្នកស្រុកចំនួនជាង ៤ម៉ឺនខ្នងត្រូវរងការខូចខាតទាំងស្រុង ខណ:នៅតំបន់ Sylmar មានចំនួនផ្ទះប្រជាជនប្រហែល ៨ម៉ឺនខ្នង។

ជម្រាបជូនថា លោក David Barrett មេបញ្ជាការអគ្គីភ័យ និងជានាយកប្រតិបត្តិ My Safe LA ដែលជាអង្គការមិនរកប្រាក់ចំណេញផ្តោតលើការអប់រំសុវត្ថិភាពអគ្គីភ័យ បាននិយាយថាវាលឿនខ្លាំងពេក ក្នុងការធ្វើការវាយតម្លៃអំពីចំនួនអចលនទ្រព្យដែលត្រូវបានបំផ្លាញ នៅក្នុងតំបន់ធំៗទាំងនោះ៕

The post អចលនទ្រព្យ​ថ្លៃ​ៗបំផុតមួយចំនួន​នៅក្នុងទីក្រុង Los Angeles កំពុងលេបត្របាក់ដោយភ្លើងឆេះព្រៃ appeared first on .