មន្ត្រីក្រសួងពាណិជ្ជកម្ម

មន្ត្រីជាន់ខ្ពស់៖ យុទ្ធសាស្ត្រសមាហរណកម្មពាណិជ្ជកម្មឆ្នាំ២០១៩-២០២៣ ឆ្លុះបញ្ចំាងពីតម្រូវការជាក់ស្តែងនៅកម្ពុជា

រ៉េត សុកធា — Wed, 19 Jul 2023 04:56:13 +0000

យុទ្ធសាស្ត្រសមាហរណកម្មពាណិជ្ជកម្ម (CTIS) ឆ្នាំ២០១៩-២០២៣ បានរៀបចំ និងចែកចេញជា១២ ជំពូក ដែលសុទ្ធសឹងតែជាចំណុចសំខាន់ៗ និងឆ្លុះបញ្ចាំងពីតម្រូវការជាក់ស្ដែងនៅកម្ពុជាក្នុងបរិបទបច្ចុប្បន្ន។ នេះបើតាមមន្ត្រីជាន់ខ្ពស់ក្រសួងពាណិជ្ជកម្ម។

ក្នុងកិច្ចប្រជុំគណៈកម្មការអន្តរក្រសួង ក្នុងគោលបំណងពិនិត្យ និងអនុម័តលើរបាយការណ៍វាយតម្លៃយុទ្ធសាស្ត្រសមាហរណកម្មពាណិជ្ជកម្ម(CTIS)ឆ្នាំ២០១៩-២០២៣កាលថ្មីៗនេះ លោកជំទាវ តឹករ៉េត កំរង រដ្ឋលេខាធិការក្រសួងពាណិជ្ជកម្មគូសបញ្ជាក់ថាយុទ្ធសាស្ត្រសមាហរណកម្មពាណិជ្ជកម្មឆ្នំា២០១៩-២០២៣មាន៖ ១)-គោលនយោបាយពាណិជ្ជកម្ម និងកិច្ចចរចាក្នុងតំបន់, ២)- ពាណិជ្ជកម្ម ការចាកចេញពីប្រទេសអភិវឌ្ឍន៍តិចតួច និងគុណភាពនៃកំណើន, ៣)-ជំនាញ ការអប់រំ និងការបណ្តុះបណ្តាលសម្រាប់កំណើន, ៤)-កិច្ចសម្រួលពាណិជ្ជកម្ម, ៥)-ភ័ស្តុភារពាណិជ្ជកម្ម, ៦)-ការប្រកួតប្រជែង បរិយាកាសធុរៈកិច្ច ហិរញ្ញវត្ថុពាណិជ្ជកម្ម និងកម្មសិទិ្ធបញ្ញា, ៧)-ស្តង់ដារ និងរចនាសម្ព័ន្ធគុណភាព, ៨)-ខ្សែសង្វាក់តម្លៃនៃកសិឧស្សាហកម្មសម្រាប់នាំចេញ, ៩)-ឧស្សាហកម្មធន់ស្រាលសម្រាប់ការធ្វើពិពិធកម្មនាំចេញ, ១០)-ពាណិជ្ជកម្មសេវាកម្ម, ១១)-ពាណិជ្ជកម្មតាមប្រព័ន្ធអេឡិចត្រូនិកនិង ១២)-សេដ្ឋកិច្ចឌីជីថល និងឧស្សាហកម្ម ៤.០»។

ពាក់ព័ន្ធនិងយុទ្ធសាស្ត្រសមាហរណកម្មពាណិជ្ជកម្មឆ្នំា២០១៩-២០២៣ បើតាមលោកជំទាវរដ្ឋលេខាធិការ លើកឡើងថា ប្រវត្តិនៃការបង្កើតយុទ្ធសាស្ត្រសមាហរណកម្មពាណិជ្ជកម្ម ផ្ដួចផ្ដើមដំបូងដោយអង្គភាពក្របខណ្ឌសមាហរណកម្មនៅឆ្នាំ២០០១ ក្នុងនាមជាប្រទេសអនុវត្តសាកល្បង ហើយបានធ្វើបច្ចុប្បន្នភាពលើកទី១ នៅឆ្នាំ២០០៧ ដោយផ្ដោតលើពិពិធកម្មការនាំចេញ ជាយន្តការគាំទ្រដល់ការអភិវឌ្ឍពាណិជ្ជកម្មនៅកម្ពុជា ដែលមានសសរស្ដម្ភចំនួនបីនៅក្នុងយន្តការអភិវឌ្ឍន៍ពាណិជ្ជកម្មមួយដែលហៅថា អភិក្រមគ្របដណ្ដប់លើវិស័យពាណិជ្ជកម្ម ក្នុងមានគោលបំណងបញ្ជ្រាប វិស័យពាណិជ្ជកម្មចូលទៅក្នុងគោលនយោបាយអភិវឌ្ឍន៍របស់រាជរដ្ឋាភិបាល។

ការធ្វើបច្ចុប្បន្នភាពលើកទី២ នៅឆ្នាំ២០១៤ ដែលធ្វើឱ្យកម្ពុជាក្លាយជាប្រទេសទី១ ក្នុងចំណោមប្រទេសអភិវឌ្ឍន៍ដទៃទៀតដែលបានធ្វើបច្ចុប្បន្នភាពយុទ្ធសាស្ត្រនេះ បានពីរដង ដែលប្រធានបទរបស់ CTIS ឆ្នាំ២០១៤-២០១៨ បានសង្កត់ធ្ងន់លើកាលានុវត្តភាពនិងបញ្ហាប្រឈមរបស់កម្ពុជាក្នុងការពង្រីកនិងធ្វើពិពិធកម្មការនាំចេញ និងសិក្សាលម្អិតលើការធ្វើសមាហរណកម្មពាណិជ្ជកម្មក្នុងតំបន់ និងទីផ្សារដទៃទៀត។ ហើយនៅឆ្នាំ២០១៨ យុទ្ធសាស្ត្រនេះត្រូវបានធ្វើបច្ចុប្បន្នលើកទី៣ដែលយុទ្ធសាស្ត្រ CTIS ឆ្នាំ២០១៩-២០២៣នេះ មានគោលបំណងជំរុញសមាហរណកម្មពាណិជ្ជកម្មកម្ពុជាចូលក្នុងទីផ្សារពិភពលោក ការធ្វើពិពិធកម្មទីផ្សារ និងផលិតផលសម្រាប់នាំចេញ៕

អត្ថបទ៖សារេត

The post មន្ត្រីជាន់ខ្ពស់៖ យុទ្ធសាស្ត្រសមាហរណកម្មពាណិជ្ជកម្មឆ្នាំ២០១៩-២០២៣ ឆ្លុះបញ្ចំាងពីតម្រូវការជាក់ស្តែងនៅកម្ពុជា appeared first on .

លោក ប៉ាន សូរស័ក្តិ បញ្ជាឱ្យមន្ត្រីក្រោមឱវាទត្រូវចេះប្រើប្រាស់មន្រ្តីឱ្យអស់លទ្ធភាព

ឧកញ៉ាកោះក្របី — Sun, 27 Mar 2022 09:49:14 +0000

រដ្ឋមន្ដ្រីពាណិជ្ជកម្ម ណែនាំការងារអាទិភាព ៦ ចំណុច ឱ្យមន្ត្រីក្រោមឱវាទយកទៅបដិបត្តិឱ្យបានខ្ជប់ខ្ជួន ដើម្បីឱ្យការងារមានប្រសិទ្ធិភាពខ្ពស់ និងលទ្ធផលកាន់តែល្អប្រសើ។ លោក ប៉ាន សូរស័ក្តិ បានណែនាំការងារសំខាន់ៗ ដែលជាការងារអាទិភាពទាំងនេះ ក្នុងពេលជួបសំណេះសំណាល ជាមួយមន្ត្រីរាជការមន្ទីរពាណិជ្ជកម្ម និងសាខា ក.ប.ប ខេត្តរតនគីរីនៅព្រឹកថ្ងៃទី២៦ ខែមីនា ឆ្នាំ២០២២នេះ។

ក្នុងឱកាសនោះ លោករដ្ឋមន្ត្រី បានចង្អុលបង្ហាញការងារសំខាន់ៗ និងជាការងារអាទិភាពដល់មន្ត្រីមន្ទីរពាណិជ្ជកម្ម និងមន្ត្រីសាខា ក.ប.ប. ត្រូវយកចិត្តទុកដាក់ខិតខំបដិបត្តិឱ្យបានខ្ជប់ខ្ជួននូវគោលការណ៍សំខាន់ៗទាំងនោះរួមមាន៖

ទី១- មន្ត្រីទាំងអស់ត្រូវបន្តខិតខំពង្រីកចំណេះដឹងខ្លួនបន្ថែមទៀត ទាំងកម្រិតជំនាញ និងភាសាបរទេស តាមរយៈការសិក្សាបន្ថែម ការស្រាវជ្រាវ និងដកស្រង់នូវបទពិសោធន៍ពីមន្រ្តីដែលមានសមត្ថភាព និងជាពិសេសរួមសហការគ្នាចុះត្រួតពិនិត្យទំនិញដែលខូចគុណភាព នៅលើទីផ្សារឱ្យកាន់តែស្វាហាប់ ដើម្បីការពារសុខភាពរបស់ប្រជាពលរដ្ឋ ក៏ដូចជាការពារសុខភាពបងប្អូន កូនចៅរបស់ខ្លួនឯងដែរ។

ទី២- ត្រូវចេះប្រើប្រាស់មន្រ្តីឱ្យអស់លទ្ធភាព និងបណ្តុះបណ្តាលមន្រ្តីដែលមានស្រាប់ទៅតាមជំនាញ។

ទី៣- មន្រ្តីទាំងអស់ត្រូវបន្តធ្វើសហប្រតិបត្តិការឱ្យកាន់តែជិតស្និទ្ធជាមួយអាជ្ញាធរមូលដ្ឋាន ដើម្បីចូលរួមផ្សព្វផ្សាយឱ្យបានទូលំទូលាយនូវកម្មវិធីកែទម្រង់ស៊ីជម្រៅរបស់រាជរដ្ឋាភិបាល ជាពិសេសកំណែទម្រង់ស៊ីជម្រៅរបស់ក្រសួងពាណិជ្ជកម្ម ក្នុងការដាក់ចេញគោលនយោបាយពាណិជ្ជកម្ម សំដៅជួយសម្រួលពាណិជ្ជកម្ម ក្នុងការនាំចេញ និងសម្រួលដល់ការផ្តល់សេវាសាធារណៈជូនប្រជាពលរដ្ឋ។

ទី៤- បញ្ចៀសដាច់ខាតការទាមទារកម្រៃសេវាក្រៅផ្លូវការពីអាជីករ ពាណិជ្ជករ ផលិតករ អ្នកនាំចេញ និងសេវាផេ្សងៗ ដែលផ្ទុយពីខ្លឹមសារប្រកាសរួមស្តីពីកម្រងសេវាសាធារណៈរវាងក្រសួងពាណិជ្ជកម្ម និងក្រសួងសេដ្ឋកិច្ច និងហិរញ្ញវត្ថុ។

ទី៥- ត្រូវបន្តជំរុញពង្រឹងបន្ថែមយន្តការតាមដាន និងត្រួតពិនិត្យការគ្រប់គ្រងអាជីវកម្ម សេវាកម្ម ពាណិជ្ជកម្ម ថ្លៃទំនិញ និងសន្និធិទំនិញចាំបាច់ ស្រូវ-អង្ករ ប្រេងឥន្ធនៈ និងការធ្វើពាណិជ្ជកម្មទំនិញនៅតាមព្រំដែន ដោយប្រើប្រាស់ប្រព័ន្ធបច្ចេកវិទ្យាព័ត៌មាន និងជំរុញយន្តការដោះស្រាយបញ្ហាដល់កសិករ ផលិតករ ដោយផ្តោតលើផលិតផលសក្តានុពលចំនួន ៥មុខ មាន់ស្រែ បន្លែ ដំឡូង ស្រូវប្រណិត និងសូត្រ ដោយបង្កើតផ្សារចុងសប្តាហ៍នៅតាមបណ្តាខេត្តទាំង ១៨ ព្រមទាំងឧបត្ថម្ភទុន ផ្តល់កម្ចី និងកសាងហេដ្ឋារចនាសម្ព័ន្ធគាំទ្រតាមរយៈគម្រោងជំរុញទីផ្សារសម្រាប់កសិកម្មខ្នាតតូច (AIMS) ដែលអនុវត្តដោយក្រសួងពាណិជ្ជកម្ម។

ទី៦- ពេលចុះអនុវត្តន៍ការងារក្នុងពេលប្រយុទ្ធប្រឆាំងនឹងជំងឺកូវីដ-១៩ នាពេលនេះ និងដើម្បីរក្សាគម្លាតសង្គម សូម ឯកឧត្តម លោក លោកស្រី មន្រ្តីរាជការយើងទាំងអស់ ត្រូវប្រុងប្រយ័ត្ន និងត្រូវអនុវត្តឱ្យបានត្រឹមត្រូវតាមការណែនាំរបស់ក្រសួងសុខាភិបាល។

បន្ថែមពីលើការងារអាទិភាពដែលបានណែនាំខាងលើ លោករដ្ឋមន្ត្រី បានលើកឡើងថា រាជរដ្ឋាភិបាលកម្ពុជា បាននិងកំពុងជំរុញការនាំចេញ និងបើកច្រកទីផ្សារបន្ថែមទៀត ទាំងទីផ្សារក្នុងស្រុក តំបន់ និងទីផ្សារអន្តរជាតិផ្សេងៗទៀត ក្រោមប្រព័ន្ធអនុគ្រោះពន្ធដែលកម្ពុជាសម្រេចបាន នាពេលថ្មីៗនេះ រួមមាន៖ កិច្ចព្រមព្រៀងពាណិជ្ជកម្មសេរីទ្វេភាគីកម្ពុជា-ចិន កិច្ចព្រមព្រៀងពាណិជ្ជកម្មសេរីទ្វេភាគីកម្ពុជា-កូរ៉េ និង ភាពជាដៃគូសេដ្ឋកិច្ចគ្រប់ជ្រុងជ្រោយក្នុងតំបន់ (RCEP) ជាដើម៕

The post លោក ប៉ាន សូរស័ក្តិ បញ្ជាឱ្យមន្ត្រីក្រោមឱវាទត្រូវចេះប្រើប្រាស់មន្រ្តីឱ្យអស់លទ្ធភាព appeared first on .

មន្ត្រី៖ មិនមានឈ្មោះក្រុមហ៊ុន Tesla របស់មហាសេដ្ឋី Elon Musk បានចុះបញ្ជីនៅក្រសួងពាណិជ្ជកម្មកម្ពុជានោះទេ

ឧកញ៉ាកោះក្របី — Sat, 03 Apr 2021 10:07:37 +0000

មន្រ្តីក្រសួងពាណិជ្ជកម្ម បានអះអាងថា មិនមានឈ្មោះក្រុមហ៊ុន Tesla របស់មហាសេដ្ឋីលោក Elon Musk បានចុះបញ្ជីនៅក្រសួងពាណិជ្ជកម្មកម្ពុជានោះទេ។ នេះបើតាមមន្ត្រីអ្នកនាំពាក្យក្រសួងពាណិជ្ជកម្ម លោក ស៊ាង ថៃ ប្រាប់សារព័ត៌មានខេមបូណូមីស នៅថ្ងៃទី៣មេសានេះ។

ការអះអាងរបស់អ្នកនាំពាក្យក្រសួងពាណិជ្ជកម្មយ៉ាងដូច្នេះ គឺបន្ទាប់ពីមានការចុះផ្សាយ និងចែកចាយជាបន្តបន្ទាប់នៅលើបណ្ដាញសង្គមហ្វេសប៊ុក ដោយថាក្រុមហ៊ុន Tesla របស់អាមេរិកបានចូលមកវិនិយោគរកស៊ីនៅកម្ពុជា។

តាមការចែកចាយតៗគ្នារបស់អ្នកប្រើប្រាស់បណ្ដាញសង្គម ក៏មានភ្ជាប់ជាមួយនឹងរូបភាពអគារតាំងបង្ហាញលក់រថយន្ដមួយកន្លែង ដែលមានដាក់ឈ្មោះធំៗថា Tesla ដែលធ្វើឲ្យក្រុមអ្នកប្រើប្រាស់បណ្ដាញសង្គមយល់ថា គឺជារបស់ក្រុមហ៊ុន Tesla អាមេរិក ដែលបានចូលរកស៊ីនៅក្នុងទីផ្សារកម្ពុជា។

កាលពីប្រហែល១ខែកន្លងទៅនេះ មានការភ្ញាក់ផ្អើលពីសាធារណៈជន និងអ្នកសារព័ត៌មាន ដោយសារតែឃើញមានអគារក្រុមហ៊ុនមួយមានទីតាំងនៅតាមបណ្តោយមហាវិថីសហព័ន្ធ ដោយដាក់ឈ្មោះថា Tesla (ថេសឡា) ដែលដូចទៅនឹងក្រុមហ៊ុនផលិតរថយន្តអគ្គីសនីរបស់អាមេរិក Tesla (ថេសឡា) របស់លោកមហាសេដ្ឋី Elon Muskដែរ។

ប៉ុន្តែ អ្នកនាំពាក្យក្រសួងពាណិជ្ជកម្ម លោក ស៊ាង ថៃ បានឲ្យដឹងថា មានក្រុមហ៊ុនឈ្មោះ Tesla ដែលបានចុះបញ្ជីនៅក្រសួងពាណិជ្ជកម្មដែរ ប៉ុន្ដែមិនមែនជាក្រុមហ៊ុនសាខារបស់ Tesla របស់លោក Elon Musk នោះទេ។

លោក ស៊ាង ថៃ បញ្ជាក់ថា «ខ្ញុំបានឲ្យមន្រ្តីជំនាញ គេសិក្សាស្រាវជ្រាវ ឃើញថា មានក្រុមហ៊ុន ដែលមានចុះឈ្មោះ ដាក់ថា Tesla Industries មួយ និងមួយទៀតគឺ ឈ្មោះ Tesla Engineering and Construction ហើយក្រុមហ៊ុនហ្នឹងមិនមែនជាក្រុមហ៊ុនរបស់ លោក ELON MUSK ទេ ព្រោះថាក្រុមហ៊ុន Tesla ដែលបានចុះបញ្ជីនោះ ទីតាំងអាស័យដ្ឋានរបស់គេ ដាក់ថានៅមហាវិថីព្រះមុនីវង្ស ចំណែក ក្រុមហ៊ុន Tesla ដែលប្រទះឃើញនោះ គឺនៅផ្លូវសហព័ន្ធរុស្សី ដូចនេះ បើសិន ក្រុមហ៊ុនទាំង២នេះ ជាក្រុមហ៊ុនតែមួយ ត្រូវតែមកសុំចុះបញ្ជីទៀត ព្រោះទីស្នាក់ការខុសគ្នា »។

សូមរម្លឹកថា Tesla គឺជាក្រុមហ៊ុនផលិតរថយន្តអគ្គិសនីដ៏ល្បីល្បាញមួយនៅលើពិភពលោក ជារបស់កំពូលមហាសេដ្ឋី Elon Musk ដោយបច្ចុប្បន្នក្រុមហ៊ុនផ្លូវការ Tesla មានសាខានៅតាមប្រទេសប្រមាណជិត ៤០ប្រទេស ហើយក្នុងនោះសម្រាប់ប្រទេសសមាជិកអាស៊ានវិញ គឺមានតែសឹង្ហបុរីតែមួយគត់៕

ប្រភព៖ សារព័ត៌មានខេមបូណូមីស

The post មន្ត្រី៖ មិនមានឈ្មោះក្រុមហ៊ុន Tesla របស់មហាសេដ្ឋី Elon Musk បានចុះបញ្ជីនៅក្រសួងពាណិជ្ជកម្មកម្ពុជានោះទេ appeared first on .