មហាសេដ្ឋីកាណាដា

ចាប់ខ្លួនមហាសេដ្ឋីវ័យ ៩១ឆ្នាំ ករណីរំលោភបំពានផ្លូវភេទរាប់ភ្លេចតាំងពីទសវត្សឆ្នាំ១៩៨០ ដល់ឆ្នាំ២០២៣

ឧកញ៉ាសំពៅ — Tue, 11 Jun 2024 05:00:00 +0000

មហាសេដ្ឋីកាណាដា Frank Stronach ដែលមានវ័យ ៩១ឆ្នាំ ត្រូវបានចាប់ខ្លួនកាលពីថ្ងៃទី០៧ ខែមិថុនា បន្ទាប់ពីរងការចោទប្រកាន់ទាក់ទងនឹងករណីរំលោភបំពានផ្លូវភេទជាច្រើនករណី។ នេះបើតាមការចុះផ្សាយពីសារព័ត៌មាន The Mirror។

ក្រុមប៉ូលិសនៅក្នុងតំបន់ Peel នៃទីក្រុង Ontario បានប្រកាសបើកការស៊ើបអង្កេតពិសេស និងបានចាប់ខ្លួនមហាសេដ្ឋីវ័យ ៩១ឆ្នាំរូបនេះ ដោយចោទប្រកាន់ថា រូបលោកពាក់ព័ន្ធនឹងការរំលោភបំពានផ្លូវភេទច្រើនករណី ចន្លោះពីទសវត្សឆ្នាំ១៩៨០ រហូតដល់ឆ្នាំ២០២៣។

ពាក់ព័ន្ធនឹងការចោទប្រកាន់នេះផងដែរ លោក Stronach បានច្រានចោលទាំងស្រុង និងបានអះអាងថា លោកហ៊ានប្រឈមមុខជាមួយផ្លូវច្បាប់ ដ្បិតរូបលោកមិនបានធ្វើខុស ដូចជាការចោទប្រកាន់នោះឡើយ។

គួររំលឹកបន្តិចថា លោក Stronach គឺជាម្ចាស់កសិដ្ឋានចិញ្ចឹម និងបង្កាត់ពូជសត្វធំបំផុតមួយលើលោក ហើយរូបលោកក៏ជាធុរកិច្ចជនកំពូលមួយរូប ប្រចាំប្រទេសកាណាដាផងដែរ៕

The post ចាប់ខ្លួនមហាសេដ្ឋីវ័យ ៩១ឆ្នាំ ករណីរំលោភបំពានផ្លូវភេទរាប់ភ្លេចតាំងពីទសវត្សឆ្នាំ១៩៨០ ដល់ឆ្នាំ២០២៣ appeared first on .

មហាសេដ្ឋីកាណាដា ត្រូវបានចោទប្រកាន់ពីបទរំលោភផ្លូវភេទជាច្រើនករណី

ឧកញ៉ាសំពៅ — Fri, 31 May 2024 10:00:00 +0000

កាលពីថ្ងៃទី៣០ ខែឧសភា មហាសេដ្ឋីកាណាដា Robert Miller ត្រូវបានក្រុមប៉ូលិសបើកការស៊ើបអង្កេត ទាក់ទងនឹងរូបលោក ហើយក៏ត្រូវបានចោទប្រកាន់ជាមួយនឹងករណីរំលោភផ្លូវភេទរាប់សិបករណីឯណោះ។

យោងតាមការចុះផ្សាយពីគេហទំព័រ CTVNews បានបង្ហាញថា មហាសេដ្ឋីវ័យ ៨០ឆ្នាំរូបនេះ កំពុងទទួលរងការចោទប្រកាន់ប្រមាណ ២១ករណី ទាក់ទងនឹងករណីរំលោភផ្លូវភេទ ចន្លោះពីឆ្នាំ១៩៩៤ រហូតដល់ឆ្នាំ២០០៦។

ក្នុងចំណោមការចោទប្រកាន់ទាំង ២១ករណីនោះ ក៏រួមមានដូចជាការរំលោភផ្លូវភេទ ការកេងប្រវ័ញ្ចផ្លូវភេទ និងការជ្រៀតជ្រែកផ្លូវភេទ ក៏ដូចជាបទល្មើសមួយចំនួនទាក់ទងនឹងពេស្យាចារ ហើយថែមទាំងមានជនរងគ្រោះ ជាអនីតិជនថែមទៀត។

សូមជម្រាបដែរថា មហាសេដ្ឋីមានលុយជិត ២ពាន់លានដុល្លាររូបនេះ ក៏បានច្រនាចោលការចោទប្រកាន់ទាំងនោះ និងបានលាលែងតំណែងជា CEO នៃក្រុមហ៊ុន Future Electronic ដែលជាក្រុមហ៊ុនចែកចាយគ្រឿងអេឡិចត្រូនិកធំបំផុតលើលោកទី៣ ផងដែរ ក្រោយព័ត៌មានមួយនេះបានផ្សព្វផ្សាយជាសាធារណៈ៕

The post មហាសេដ្ឋីកាណាដា ត្រូវបានចោទប្រកាន់ពីបទរំលោភផ្លូវភេទជាច្រើនករណី appeared first on .

ទោះបរាជ័យក្នុងការសិក្សា តែបុគ្គល ៥ រូបនេះជោគជ័យលើវិថីជីវិតក្លាយជាមហាសេដ្ឋី

ឧកញ៉ាសំពៅ — Fri, 11 Aug 2023 09:55:00 +0000

“ចំណេះវិជ្ជាជាស្ពានឆ្ពោះទៅរកភាពជោគជ័យ” នេះគឺជាពាក្យស្លោកដែលយើងគ្រប់គ្នាតែងតែធ្លាប់បានលឺនៅអំឡុងពេលវ័យសិក្សា ហើយវាគឺជាការពិតដែលមិនអាចប្រកែកបានឡើយ។

យ៉ាងណា មិនមែនសុទ្ធតែគ្រប់បុគ្គលជោគជ័យគឺសុទ្ធតែបានបញ្ចប់ថ្នាក់សិក្សាខ្ពង់ខ្ពស់នោះឡើយ ជាក់ស្ដែងក៏មានបុគ្គលមួយចំនួនបានបោះបង់ការសិក្សា ងាកមកស្រវាតាមចាប់ក្ដីស្រមៃតាំងពីវ័យក្មេង ឬក៏កត្តាជីវភាពគ្រួសារបង្ខំឲ្យពួកគេបោះបង់ការសិក្សា ដើម្បីរកចំណូលផ្គត់ផ្គង់ជីវភាព រហូតក្លាយជាមហាសេដ្ឋីសព្វថ្ងៃផងដែរ។

តួយ៉ាង បើយោងតាមការចុះផ្សាយពី SCMP បានឲ្យដឹងថា មានបុគ្គល ៥ រូបដែលបានបោះបង់ការសិក្សាតាំងពីក្មេងៗ ដោយសារកត្តាជីវភាពគ្រួសារ និងត្រូវងាកមករកចំណូល ក៏ដូចជាតាមចាប់ក្ដីស្រមៃរបស់ពួកគេរហូតទទួលបានភាពជោគជ័យក្លាយជាមហាសេដ្ឋីសព្វថ្ងៃ។

ខាងក្រោមគឺជាបញ្ជីឈ្មោះរបស់បុគ្គល ៥ រូបដែលក្រុមហ៊ុនសារព័ត៌មានកាន់កាប់ដោយ Alibaba បានចុះផ្សាយ៖

1/ Li Ka-Shing

មហាសេដ្ឋីមានបំផុតនៅហុងកុងរូបនេះបានរត់ភៀសខ្លួនពីប្រទេសចិននៅពេលលោកមានវ័យត្រឹមតែ ១២ ឆ្នាំ ហើយរំលងបាន ២ ឆ្នាំ ឪពុករបស់លោកបានចែកឋាន ដែលបណ្ដាលឲ្យបុរសរូបនេះត្រូវបោះបង់ការសិក្សាទាំងមិនបានបញ្ចប់ថ្នាក់វិទ្យាល័យ។

នៅវ័យ ១៦ ឆ្នាំស្ដេចត្រាញ់ហុងកុងគ្រាន់តែជាបុគ្គលិកធ្វើការនៅរោងចក្រប្លាស្ទិកមួយកន្លែង តែបច្ចុប្បន្ន Li Ka-Shing បានក្លាយជាមហាសេដ្ឋីមានបំផុតទី ៣៤ នៅលើពិភពលោក និងមានបំផុតនៅហុងកុង ជាមួយទ្រព្យសម្បត្តិប្រមាណ ៣៧,៨ពាន់លានដុល្លារ។

2/ Roman Abramovich

មហាសេដ្ឋីរុស្ស៊ីដែលកំពុងស្ថិតនៅក្នុងស្ថានការណ៍ដ៏យ៉ាប់យ៉ឺន ពោលគឺទទួលរងទណ្ឌកម្មសេដ្ឋកិច្ចពីបណ្ដាប្រទេសជាច្រើន ជាពិសេសគឺអង់គ្លេស បន្ទាប់ពីរុស្ស៊ីបើកការវាយប្រហារទៅលើអ៊ុយក្រែនកន្លងទៅ។

ប្រវត្តិរបស់អ្នកមានម្នាក់នេះគឺ កំព្រាម្ដាយឪពុកតាំងពីអាយុ ៣ ឆ្នាំ និងបានឈប់រៀនត្រឹមថ្នាក់មហាវិទ្យាល័យ ដោយបានចូលបម្រើកងទ័ពរុស្ស៊ី ហើយវាគឺជាឱកាសមាសមួយរបស់ Abramovich ក្នុងការកសាងទ្រព្យសម្បត្តិរបស់លោកពីពេលនោះមក។

អំឡុងពេលនៅបម្រើការក្នុងជួរកងទ័ព Abramovich បានលួចប្រេងយកទៅលក់ឲ្យឈ្មួញកណ្ដាល ហើយក៏ចាប់ផ្ដើមបោះជំហានលើវិស័យអាជីវកម្មផ្សេងៗ រហូតដល់មានមុខមាត់នៅលើវិស័យនយោបាយថែមទៀត។

បច្ចុប្បន្ន Roman Abramovich គឺជាមហាសេដ្ឋីលេខរៀងទី ២២៤ ទូទាំងពិភពលោក ជាមួយទំហំទ្រព្យសម្បត្តិប្រមាណ ៩,២ពាន់លានដុល្លារ។

3/ Jan Koum

ស្ថាបនិក WhatsApp ម្នាក់នេះមានដើមកំណើតជាជនជាតិអ៊ុយក្រែន និងកើតនៅក្នុងគ្រួសារមានជីវភាពក្រីក្រដែលមានឪពុកជាកម្មករសំណង់ ម្ដាយជាស្ត្រីមេផ្ទះ។ នៅពេលលោកមានវ័យត្រឹម ១៦ ឆ្នាំ គ្រួសាររបស់លោកបានភៀសខ្លួនមកទីក្រុង California និងធ្វើការជូតឥដ្ឋដើម្បីចិញ្ចឹមជីវិត។

អាចនិយាយបានថា ជាដុងពីកំណើត Koum បានរៀនសូត្រដោយខ្លួនឯងអំពីការប្រើប្រាស់កុំព្យូទ័របានយ៉ាងស្ទាត់ជំនាញ និងទទួលបានការងារមួយនៅក្រុមហ៊ុន Yahoo ទាំងមិនបានបញ្ចប់ថ្នាក់សិក្សាមហាវិទ្យាល័យ។

បច្ចុប្បន្ន បុរសម្នាក់នេះគឺជាមហាសេដ្ឋីមានបំផុតទី ១២១ លើពិភពលោកជាមួយទំហំទ្រព្យសម្បត្តិប្រមាណ ១៤,៣ពាន់លានដុល្លារ ក្រោយលក់ WhatsApp ទៅឲ្យ Facebook ក្នុងឆ្នាំ ២០១៤ ក្នុងតម្លៃ ២២ ពាន់លានដុល្លារ។

4/ Oprah Winfrey

ជាស្ត្រីតែម្នាក់គត់នៅក្នុងបញ្ជីមួយនេះ និងជាពិធីការនីដ៏មានឥទ្ធិពលបំផុតមួយនៅលើបណ្ដាញប្រព័ន្ធផ្សព្វផ្សាយនៅអាមេរិក។ នៅវ័យត្រឹម ១៤ ឆ្នាំ Winfrey បានលួចរត់ទៅរស់នៅជាមួយឪពុក និងទទួលបានអាហារូបករណ៍នៅសាកលវិទ្យាល័យ Tennessee State University ប៉ុន្តែបានបោះបង់ការសិក្សានៅវ័យ ១៩ ឆ្នាំ ដើម្បីធ្វើការនៅលើបណ្ដាញផ្សព្វផ្សាយ។

ចាប់តាំងពីពេលនោះមក Oprah Winfrey តែងតែលេចមុខនៅក្នុងកម្មវិធីទូរទស្សន៍ធំៗ ដោយសារទេពកោសល្យក្នុងការនិយាយរបស់លោកស្រី ហើយបច្ចុប្បន្នលោកស្រីគឺជាមហាសេដ្ឋីស្ត្រីដ៏មានឥទ្ធិពលបំផុតមួយជាមួយទំហំទ្រព្យសម្បត្តិ ២,៥ពាន់លានដុល្លារ។

5/ Guy Laliberte

លោក Laliberte បានចាកចេញពីស្រុកកំណើត Canada នៅវ័យត្រឹម ១៤ ឆ្នាំ តាមចាប់ក្ដីស្រមៃដ៏អស្ចារ្យរបស់លោកនៅឆ្នាំ ១៩៧៨ ហើយនៅវ័យ ១៩ ឆ្នាំ បុរសម្នាក់នេះបានសម្រេចបោះបង់ការសិក្សា។

ដោយសារចិត្តស្រឡាញ់ការសម្ដែង បុរសម្នាក់នេះបានចំណាយពេលដេកលើបង់តាមទីសាធារណៈនៅប្រទេសផ្សេងៗ ជាមួយក្រុមសម្ដែងសៀកតាមផ្លូវ រហូតដល់ឆ្នាំ ១៩៨៤ លោកបានបង្កើតក្រុមសៀកCirque du Soleil ដែលជាសព្វថ្ងៃជាក្រុមសៀករហ័សកម្មធំបំផុតលើលោក។

ជិត ១០ ឆ្នាំក្រោយបង្កើតក្រុមសៀកដ៏ល្បី ពោលនៅឆ្នាំ ១៩៩៣ Cirque du Soleil អាចរកចំណូលបានយ៉ាងស្រួលពោល ៣០លានដុល្លារជារៀងរាល់ឆ្នាំ ហើយវាបានធ្វើឲ្យ Laliberte ទទួលបានងារជាមហាសេដ្ឋីក្នុងទំហំទ្រព្យសម្បត្តិជាង ១ពាន់លានដុល្លារផងដែរ។

ដោយឡែក ក្រៅពីបុគ្គលទាំង ៥ រូបខាងលើ ក៏នៅមានមហាសេដ្ឋីឯទៀតដែលមិនបានបញ្ចប់ថ្នាក់សិក្សាមហាវិទ្យាល័យ ដូចជា Mark Zuckerberg និង Bill Gates ជាដើម គ្រាន់តែថាអ្នកទាំង ៥ ដែលបានរៀបរាប់ខាងលើ គឺមានជីវភាពលំបាកតាំងពីក្មេងជាងបុគ្គលផ្សេងៗប៉ុណ្ណោះ។

បញ្ជាក់ដែរថា អត្ថបទមួយនេះមិនមែនលើកទឹកចិត្តឲ្យមនុស្សឯទៀតបោះបង់ការសិក្សាឡើយ គ្រាន់តែថា ខ្សែជីវិតរបស់មនុស្សយើងម្នាក់ៗគឺមានភាពខុសគ្នា អ្នកខ្លះជោគជ័យលើការសិក្សា អ្នកខ្លះជោគជ័យលើការធ្វើអាជីវកម្ម ដូច្នេះដរាបណាបើអ្នកនៅតែមានការតស៊ូ និងក្ដីស្រមៃ បូកផ្សំជាមួយនឹងឱកាសផង នោះភាពជោគជ័យច្បាស់ជារត់មករកអ្នកដោយឯកឯងជាមិនខាន៕

ប្រភព: SCMP

The post ទោះបរាជ័យក្នុងការសិក្សា តែបុគ្គល ៥ រូបនេះជោគជ័យលើវិថីជីវិតក្លាយជាមហាសេដ្ឋី appeared first on .

ប្រធានក្រុមហ៊ុនរថយន្តទំនើប Aston Martin នឹងដោះស្រាយបំណុលក្រុមហ៊ុន រហូតប្រកាសហ៊ានដកចាយលុយហៅប៉ៅផ្ទាល់ខ្លួន

ឧកញ៉ាសំពៅ — Sat, 12 Feb 2022 04:21:48 +0000

ប្រធានក្រុមហ៊ុន Aston Martin Lagonda Global Holdings Plc លោក Lawrence Stroll បាននិយាយថា លោកនឹងព្យាយាមពង្រឹងតុល្យភាពនៃតារាងចំណូលចំណាយនៃរោងចក្រផលិតរថយន្តទំនើប Aston Martin ឲ្យបានល្អប្រសើរ ដោយចាប់ផ្ដើមពីការសងបំណុលទៅកាន់ម្ចាស់បំណុលមានការប្រាក់ខ្ពស់ជាមុនសិន។

កាលពីថ្ងៃព្រហស្បតិ៍កន្លងទៅ លោក Stroll ដែលធ្លាប់ជួយដោះស្រាយវិបត្តិក្រុមហ៊ុនដែលធ្លាប់ជួបបញ្ហាកាលពីឆ្នាំ ២០២០ នៅពេលជាប់គាំងក្នុងការរកចំណូល មានបំណងចង់ចរចាដល់ម្ចាស់បំណុលដែលមានការប្រាក់ខ្ពស់កប់ពពក។

“ខ្ញុំនឹងធ្វើការចរចាជាមួយម្ចាស់បំណុលម្ដងទៀត ដោយសុំបន្ធូរបន្ថយការប្រាក់ឲ្យមានភាពល្អជាងមុន ហើយក៏ប្រហែលជាដកប្រាក់ផ្ទាល់ខ្លួនមួយចំនួនសងទៅពួកគេខ្លះដែរ។ ក្រុមហ៊ុននឹងមានលំហូរសាច់ប្រាក់វិជ្ជមាននៅឆ្នាំ ២០២៣”។ នេះបើតាមសម្ដីដែល Stroll ប្រាប់ទៅកាន់បណ្ដាញសារព័ត៌មាន។

គិតត្រឹមចុងត្រីមាសទី ៣ ឆ្នាំ២០២១ Aston Martin មានបំណុលប្រមាណ ៨០៩ លានផោន ឬ ១,១ ពាន់លានដុល្លារ ខណៈអត្រាការប្រាក់គឺរំពឹងថា នឹងមានរហូតដល់ ១៦៥ លានផោន ឬ ២២៣ លានដុល្លារនៅចុងឆ្នាំ ២០២១ ស្របពេលប្រធានក្រុមហ៊ុនខាងលើមានទ្រព្យសម្បត្តិសរុបប្រមាណជិត ៣ ពាន់លានដុល្លារ៕

ប្រភព: bnnbloomberg

The post ប្រធានក្រុមហ៊ុនរថយន្តទំនើប Aston Martin នឹងដោះស្រាយបំណុលក្រុមហ៊ុន រហូតប្រកាសហ៊ានដកចាយលុយហៅប៉ៅផ្ទាល់ខ្លួន appeared first on .

មហាសេដ្ឋីកាណាដា

ចាប់ខ្លួនមហាសេដ្ឋីវ័យ ៩១ឆ្នាំ ករណីរំលោភបំពានផ្លូវភេទរាប់ភ្លេចតាំងពីទសវត្សឆ្នាំ១៩៨០ ដល់ឆ្នាំ២០២៣

មហាសេដ្ឋីកាណាដា ត្រូវបានចោទប្រកាន់ពីបទរំលោភផ្លូវភេទជាច្រើនករណី

ទោះ​បរាជ័យ​ក្នុង​ការ​សិក្សា តែ​បុគ្គល ៥ រូប​នេះ​ជោគជ័យ​លើ​វិថី​ជីវិត​ក្លាយជា​មហាសេដ្ឋី​

ទោះបរាជ័យក្នុងការសិក្សា តែបុគ្គល ៥ រូបនេះជោគជ័យលើវិថីជីវិតក្លាយជាមហាសេដ្ឋី