មហាសេដ្ឋីសាំងហ្គាពួរ

មហាសេដ្ឋីសិង្ហបុរី ចាយលុយជាង ៣៥០លានដុល្លារ ទិញមន្ទីរពេទ្យមួយកន្លែងនៅវៀតណាម

ឧកញ៉ាសំពៅ — Thu, 28 Dec 2023 09:59:00 +0000

ក្រុមហ៊ុន Thomson Medical Group គ្រប់គ្រងដោយមហាសេដ្ឋីសិង្ហបុរី Peter Lim បានប្រកាសពីការទិញយកក្រុមហ៊ុន Far East Medical Vietnam ដែលជាក្រុមហ៊ុនមេមន្ទីរពេទ្យ FV Hospital នៅទីក្រុងហូជីមិញ ក្នុងតម្លៃប្រមាណ ៣៥២,៨លានដុល្លារ។

យោងតាមការចុះផ្សាយពីសារព័ត៌មាន Forbes បានបង្ហាញថា ដើម្បីសម្រេចការទិញយកមន្ទីរពេទ្យនៅវៀតណាមមួយនេះ ក្រុមហ៊ុនរបស់មហាសេដ្ឋីសិង្ហបុរី បានលក់ភាគហ៊ុនមួយចំនួនធំ និងខ្ចីប្រាក់ពីធនាគារផងដែរ ខណៈការទិញយកនេះ នឹងធ្វើឲ្យក្រុមហ៊ុន Thomson Medical ឈរជើងកាន់តែរឹងមាំ នៅប្រទេសវៀតណាមមួយកម្រិតទៀត។

“ការដាក់បន្ថែមមន្ទីរពេទ្យ FV Hospital ទៅក្នុងក្រុមហ៊ុន Thomson Medical Group គឺធ្វើឲ្យពួកយើងមានមូលដ្ឋានគ្រឹះកាន់តែរឹងមាំ នៅប្រទេសវៀតណាម ហើយយើងកាន់តែមានលទ្ធភាពពង្រីកខ្លួននៅទូទាំងតំបន់អាស៊ីអាគ្នេយ៍នាពេលខាងមុខ”។ នេះបើតាមសម្ដីរបស់លោក Kiat Lim កូនប្រុសមហាសេដ្ឋីសិង្ហបុរីបានអះអាង។

សូមជម្រាបដែរថា មហាសេដ្ឋីសិង្ហបុរី លោក Peter Lim មានឆន្ទៈក្នុងការពង្រីកក្រុមហ៊ុន Thomson Medical Group នៅទូទាំងតំបន់អាស៊ីអាគ្នេយ៍ ខណៈបច្ចុប្បន្នក្រុមហ៊ុនខ្នាតយក្សមួយនេះ មានសាខារហូតដល់ ៣ប្រទេស ដូចជា ប្រទេសសិង្ហបុរី ម៉ាឡេស៊ី និងវៀតណាម៕

The post មហាសេដ្ឋីសិង្ហបុរី ចាយលុយជាង ៣៥០លានដុល្លារ ទិញមន្ទីរពេទ្យមួយកន្លែងនៅវៀតណាម appeared first on .

ទម្លាយឈ្មោះមហាសេដ្ឋីមានបំផុតប្រចាំប្រទេស នៅតំបន់អាស៊ីអាគ្នេយ៍

ឧកញ៉ាសំពៅ — Mon, 20 Nov 2023 03:11:00 +0000

ស្ដេចសុលតង់នៃប្រទេសប៊្រុយណេ ជាបុគ្គលមានឥទ្ធិពលមួយរូបនៅប៉ែកអាស៊ីអាគ្នេយ៍នេះ ហើយធ្លាប់ល្បីសុសសាយជាបុគ្គលមានបំផុតប្រចាំតំបន់ តែការពិតមិនអីចឹងទេ។

បើទោះជាទ្រង់ជាប់ងារជាបុគ្គលមានឥទ្ធិពលមួយរូបក្នុងចំណោមមនុស្សរាប់រយលាននាក់ក៏ពិតមែន តែបើនិយាយពីទំហំទ្រព្យសម្បត្តិវិញ គឺនៅចាញ់ស្ដេចត្រាញ់ឥណ្ឌូណេស៊ីនៅឡើយ គឺលោក Prajogo Pangestu ដែលមានទ្រព្យសម្បត្តិច្រើនបំផុតនៅអាស៊ីអាគ្នេយ៍។

ខាងក្រោមនេះ គឺជាបញ្ជីឈ្មោះមហាសេដ្ឋីមានបំផុតប្រចាំប្រទេសនៅតំបន់អាស៊ីអាគ្នេយ៍ សម្រាប់ឆ្នាំ ២០២៣ ផ្អែកតាមទិន្នន័យផ្ដល់ឲ្យដោយ Forbes៖

1/ មហាសេដ្ឋី Prajogo Pangestu នៃប្រទេសឥណ្ឌូណេស៊ី មានទ្រព្យសម្បត្តិប្រមាណ ៤៦,២ពាន់លានដុល្លារ

2/ ស្ដេចសុលតង់ Sultan Hassanal Bolkiah នៃប្រទេសប៊្រុយណេ មានទ្រព្យសម្បត្តិប្រមាណ ៣០ពាន់លានដុល្លារ

3/ លោក Li Xiting នៃប្រទេសសិង្ហបុរី មានទ្រព្យសម្បត្តិប្រមាណ ១៤,៦ ពាន់លានដុល្លារ

4/ បងប្អូនត្រកូល Chearavanont នៃប្រទេសថៃ មានទ្រព្យសម្បត្តិប្រមាណ ១២,៦ពាន់លានដុល្លារ

5/ លោក Tan Sri Robert Kuok នៃប្រទេសម៉ាឡេស៊ី មានទ្រព្យសម្បត្តិប្រមាណ ១០,៣ពាន់លានដុល្លារ

6/ មហាសេដ្ឋី Manuel Villar នៃប្រទេសហ្វីលីពីន មានទ្រព្យសម្បត្តិប្រមាណ ៩,២ពាន់លានដុល្លារ

7/ លោក Pham Nhat Vuong នៃប្រទេសវៀតណាម មានទ្រព្យសម្បត្តិប្រមាណ ៤,៤ពាន់លានដុល្លារ

បញ្ជាក់ដែរថា ដោយសារនៅប្រទេស ៤ផ្សេងទៀតដូចជា ប្រទេសឡាវ កម្ពុជា មីយ៉ាន់ម៉ា និងទីម័រខាងកើតមិនមានព័ត៌មានបញ្ជាក់ច្បាស់លាស់ពីទំហំទ្រព្យសម្បត្តិរបស់បុគ្គលមានបំផុតប្រចាំប្រទេស ទើបឧកញ៉ាញូវសន៍មិនអាចរកទិន្នន័យមកចុះផ្សាយបាន៕

The post ទម្លាយឈ្មោះមហាសេដ្ឋីមានបំផុតប្រចាំប្រទេស នៅតំបន់អាស៊ីអាគ្នេយ៍ appeared first on .

ចំនួនមហាសេដ្ឋីសិង្ហបុរីកើនឡើងខ្លាំង បើទោះសេដ្ឋកិច្ចបច្ចុប្បន្នកំពុងមានបញ្ហា

ឧកញ៉ាសំពៅ — Fri, 07 Apr 2023 08:50:35 +0000

មួយរយៈកាលចុងក្រោយនេះ សេដ្ឋកិច្ចពិភពលោកកំពុងមានសភាពមិនប្រក្រតី តួយ៉ាងស្ថាប័នហិរញ្ញវត្ថុធំៗទូទាំងពិភពលោក កំពុងមានភាពជ្រួលច្របល់ តួយ៉ាងធនាគារលំដាប់កំពូលអាមេរិក Silicon Valley Bank ទើបនឹងដួលរលំថ្មីថ្មោង។

បើទោះជាសេដ្ឋកិច្ចពិភពលោកហាក់រអាក់រអួលក្ដី ប៉ុន្តែសេដ្ឋកិច្ចនៅតំបន់អាស៊ីហាក់មិនសូវប៉ះពាល់ ដូចជាសេដ្ឋកិច្ចសិង្ហបុរីកំពុងបង្ហាញសញ្ញាល្អ ដោយចំនួនមហាសេដ្ឋីសម្រាប់ឆ្នាំ ២០២៣ កើនឡើងពី ២៦ ដល់ ៣៥នាក់ បើធៀបនឹងឆ្នាំមុន។ នេះបើតាមការចុះផ្សាយពី Goodyfeed។

ចំណែកមហាសេដ្ឋីមានបំផុតប្រចាំប្រទេស នៅតែជាស្ដេចត្រាញ់ Li Xiting ដែលគ្រងតំណែងមួយនេះកាលពីឆ្នាំទៅ ជាមួយទំហំទ្រព្យសម្បត្តិប្រមាណ ១៦,៣ពាន់លានដុល្លារ និងរកស៊ីលើវិស័យសុខាភិបាល។

សូមជម្រាបដែរថា ទ្រព្យសម្បត្តិមហាសេដ្ឋីសរុប ៣៥នាក់ ក្នុងឆ្នាំ ២០២៣នេះ មានសរុបប្រមាណ ១១៩ពាន់លានដុល្លារ ច្រើនជាងឆ្នាំទៅដែលមានត្រឹម ១០៦,៧ពាន់លានដុល្លារប៉ុណ្ណោះ៕

The post ចំនួនមហាសេដ្ឋីសិង្ហបុរីកើនឡើងខ្លាំង បើទោះសេដ្ឋកិច្ចបច្ចុប្បន្នកំពុងមានបញ្ហា appeared first on .

មេធំ Royal Group ចាយលុយជាង ១០០ លានដុល្លារ ទិញអគារពាណិជ្ជកម្មនៅសាំងហ្គាពួរ

ឧកញ៉ាសំពៅ — Mon, 19 Dec 2022 06:59:37 +0000

ក្រុមហ៊ុន Royal Group of Companies ដែលគ្រប់គ្រងដោយមហាសេដ្ឋី Asok Kumar Hinranandani គឺកំពុងទិញយកអគារ Ming Arcade ដែលស្ថិតនៅសង្កាត់ពាណិជ្ជកម្ម Orchard Road ក្នុងតម្លៃប្រមាណ ១៧២ លានដុល្លារសាំងហ្គាពួរ ឬ ១២៦,៦ លានដុល្លារអាមេរិក។

យោងតាមការចុះផ្សាយពី Forbes បានបង្ហាញថា តម្លៃខាងលើបានបង្កើតកំណត់ត្រាថ្មី សម្រាប់ការទិញយកអគារពាណិជ្ជកម្មនៅសិង្ហបុរី ដោយសារវាមានតម្លៃថ្លៃបំផុត ពោលប្រមាណ ៣ ១២៥ ដុល្លារសាំងហ្គាពួរ/ហ្វីតការ៉េ ឬជាង ២ ម៉ឺនដុល្លារ/ម៉ែត្រការ៉េ។

សូមជម្រាបដែរថា Ming Arcade គឺជាអគារពាណិជ្ជកម្មមួយ ដែលឡោមព័ទ្ធទៅដោយសំណង់អាគារធំៗជាច្រើនដូចជា សណ្ឋាគារ Four Seasons Hotel និង St Regis Hotel & Residences ក៏ដូចជាខន់ដូទំនើបជារាប់មិនអស់ថែមទៀត។

ដោយឡែក មេធំ Royal Group វិញ គឺត្រូវបានគេស្គាល់ថាជាមហាសេដ្ឋីមានបំផុតមួយរូបនៅសិង្ហបុរី ដោយជាប់លេខរៀងទី ២៥ នៃតារាងអ្នកមានដាច់គេប្រចាំប្រទេស ជាមួយទ្រព្យសម្បត្តិប្រមាណ ១,៧ ពាន់លានដុល្លារអាមេរិក៕

The post មេធំ Royal Group ចាយលុយជាង ១០០ លានដុល្លារ ទិញអគារពាណិជ្ជកម្មនៅសាំងហ្គាពួរ appeared first on .

ទោះទ្រព្យសម្បត្តិធ្លាក់ចុះជាង ២០% តែ Li Xiting នៅរក្សាងារជាអ្នកមានដាច់គេនៅសិង្ហបុរី

ឧកញ៉ាសំពៅ — Fri, 07 Oct 2022 08:27:00 +0000

លោក Li Xiting នៅតែអាចរក្សាតំណែងជាមហាសេដ្ឋីមានដាច់គេនៅសិង្ហបុរីសម្រាប់ឆ្នាំ ២០២២ បើទោះជាទ្រព្យសម្បត្តិរបស់លោកបានធ្លាក់ចុះប្រហែល ២១,៤% ក៏ដោយ។ នេះបើតាមការចុះផ្សាយពី Forbes។

សារព័ត៌មានដដែលបានបន្ថែមថា បច្ចុប្បន្នទ្រព្យសម្បត្តិសរុបរបស់ស្ថាបនិក Shenzhen Mindray Bio-Medical Electronic គឺ មានប្រមាណ ១៥,៦ ពាន់លានដុល្លារ ថយចុះកាលពីឆ្នាំ ២០២១ ដែលមានប្រហែល ២១,៥ ពាន់លានដុល្លារ។

ដោយឡែក បុរសដែលធ្លាប់មានរហស្សនាមអ្នកមានបំផុតនៅសាំងហ្គាពួរ Goh Cheng Lieang បានខ្ទាតមកកាន់តំណែងលេខ ៣ ជាមួយទ្រព្យសម្បត្តិជាង ១២ ពាន់លានដុល្លារ ថយចុះ ៤៤,២% កាលពីឆ្នាំ ២០២១ ដែលមានប្រមាណជិត ២២ ពាន់លានដុល្លារ។

តទៅនេះគឺជាបញ្ជីឈ្មោះមហាសេដ្ឋីមានបំផុត ១០ រូបនៅសិង្ហបុរីសម្រាប់ឆ្នាំ ២០២២ ចេញផ្សាយដោយ Forbes៖

1/ Li Xiting មានទ្រព្យសម្បត្តិសរុបប្រមាណ ១៥,៦ ពាន់លានដុល្លារ

2/ Robert & Philip Ng មានទ្រព្យសម្បត្តិសរុបប្រមាណ ១៥,២ ពាន់លានដុល្លារ

3/ Goh Cheng Liang មានទ្រព្យសម្បត្តិសរុបប្រមាណ ១៣ ពាន់លានដុល្លារ

4/ Eduardo Saverin មានទ្រព្យសម្បត្តិសរុបប្រមាណ ៩,៦ ពាន់លានដុល្លារ

5/ Kwek Leng Beng និងគ្រួសារមានទ្រព្យសម្បត្តិសរុបប្រមាណ ៩,៣ ពាន់លានដុល្លារ

6/ Zhang Yong & Shu Ping មានទ្រព្យសម្បត្តិសរុបប្រមាណ ៧,៧ ពាន់លានដុល្លារ

7/ Leo Koguan មានទ្រព្យសម្បត្តិសរុបប្រមាណ ៧,៦ ពាន់លានដុល្លារ

8/ គ្រួសារត្រកូល Khoo មានទ្រព្យសម្បត្តិសរុបប្រមាណ ៦,៩ ពាន់លានដុល្លារ

9/ Wee Cho Yaw មានទ្រព្យសម្បត្តិសរុបប្រមាណ ៦,៨ ពាន់លានដុល្លារ

10/ បងប្អូនត្រកូល Kwee មានទ្រព្យសម្បត្តិសរុបប្រមាណ ៥,៨ ពាន់លានដុល្លារ៕

The post ទោះទ្រព្យសម្បត្តិធ្លាក់ចុះជាង ២០% តែ Li Xiting នៅរក្សាងារជាអ្នកមានដាច់គេនៅសិង្ហបុរី appeared first on .

មហាសេដ្ឋីសិង្ហបុរី ប្រកាសមិនយកប្រាក់ខែ ជួយសម្រាលការចំណាយរបស់ក្រុមហ៊ុន

ឧកញ៉ាសំពៅ — Thu, 15 Sep 2022 09:50:00 +0000

ការធ្លាក់ចុះនៃសេដ្ឋកិច្ចជាសកល បានប៉ះទង្គិចយ៉ាងខ្លាំងដល់វិស័យជំនួយនានា ហើយក្នុងនោះក្រុមហ៊ុន Sea Ltd. នៅសិង្ហបុរីក៏ទទួលឥទ្ធិពលមួយនេះធ្ងន់ធ្ងរផងដែរ។

យោងតាមរបាយការណ៍ចុះផ្សាយដោយ Bloomberg បានបង្ហាញថា ក្រុមហ៊ុនរបស់មហាសេដ្ឋី Forrest Li ទទួលរងការខូចខាតជាខ្លាំងក្នុងរយៈពេលជិត ១ ឆ្នាំចុងក្រោយ ពោលមូលធនទីផ្សាររបស់ក្រុមហ៊ុនបានធ្លាក់ចុះរហូតដល់ជាង ១៧០ ពាន់លានដុល្លារ តាំងពីខែតុលាឆ្នាំមុនមកទល់ពេលនេះ។

ដើម្បីជួយសម្រាលដល់ការចំណាយរបស់ក្រុមហ៊ុន ថ្មីៗនេះលោក Li បានប្រកាសថា នឹងយកប្រាក់ខែឡើយ រហូតដល់ក្រុមហ៊ុនមានស្ថិរភាពល្អឡើងវិញ ហើយលោកនឹងរឹតបន្តឹងបន្ថែមលើគោលនយោបាយចំណាយផងដែរ។

បើតាមការចុះផ្សាយពី The EDGE បានឲ្យដឹងថា ក្រុមហ៊ុននឹងប្ដូរសំបុត្រយន្តហោះពី Business Class មក Economy Class ការចំណាយលុយលើម្ហូបអាហារក្នុងថ្ងៃត្រឹម ៣០ ដុល្លារ និងថ្លៃចាយវាយ ១៥០ ដុល្លារ/ថ្ងៃ រាប់បញ្ចូលតាំងថ្លៃស្នាក់នៅផងដែរ សម្រាប់បុគ្គលិកមានបេសកកម្មទៅក្រៅប្រទេស៕

The post មហាសេដ្ឋីសិង្ហបុរី ប្រកាសមិនយកប្រាក់ខែ ជួយសម្រាលការចំណាយរបស់ក្រុមហ៊ុន appeared first on .

អតីតអ្នកមានដាច់គេនៅសិង្ហបុរី បាត់បង់ទ្រព្យសម្បត្តិប្រហែល ៨០% ត្រឹមរយៈពេលខ្លី

ឧកញ៉ាសំពៅ — Tue, 17 May 2022 08:41:29 +0000

កាលពីប៉ុន្មានខែមុន Forrest Li មានទ្រព្យសម្បត្តិប្រហែល ២២ ពាន់លានដុល្លារ និងជាបុគ្គលមានបំផុតនៅប្រទេសសិង្ហបុរី ប៉ុន្តែបច្ចុប្បន្នលោកបានជាប់ជាបុគ្គលដែលបាត់បង់ធនធានច្រើនបំផុត នៅពេលទីផ្សារកំពុងក្រឡាប់ចាក់។

អាចនិយាយបានថា វាជាពេលវេលាដ៏អាក្រក់បំផុតមួយសម្រាប់ស្ថាបនិក Sea ដោយបានបិទអាជីវកម្មពាណិជ្ជកម្មអេឡិចត្រូនិកទាំងស្រុងនៅឥណ្ឌា និងប្រាក់ចំណូលនៅអាមេរិកវិញក៏បានមកតិចតួចទៀត រហូតធ្វើឲ្យបុរសម្នាក់នេះរបូតទ្រព្យសម្បត្តិប្រមាណ ៨០% តាំងពីចុងខែតុលា។

ទោះបីជារបូតទ្រព្យសម្បត្តិប្រហែល ៨០% ក្ដី តែលោកនៅតែជាអ្នកមានបំផុតមួយរូបនៅសិង្ហបុរីដដែលពោលគឺកំពុងមានប្រហែល ៤,៧ ពាន់លានដុល្លារ នេះបើតាមការអះអាងពី Bloomberg Billionaires Index គ្រាន់តែថាតួលេខនេះមិនអាចឲ្យ CEO ក្រុមហ៊ុន Garena ជាប់នៅបញ្ជីអ្នកមានបំផុត ៥០០ នាក់លើលោកឡើយ។

មិនតែប៉ុណ្ណោះ ក្រុមអ្នកជួញដូរកំពុងតែត្រៀមខ្លួនទទួលដំណឹងអាក្រក់ផ្សេងទៀត ដូចជាការប្រកាសពីការខាតបង់ប្រាក់ចំណូលនៅត្រីមាសតំបូង ដែលគេសន្និដ្ឋានថា អាចនឹងខាតបង់ខ្ទង់ ៧៤០ លានដុល្លារ បើតាមការគណនាជាមធ្យមរបស់ Bloomberg។

បញ្ជាក់ដែរថា កាលពីឆ្នាំទៅ Sea ក៏បានរបូតប្រាក់ចំណូលនៅត្រីមាសចុងក្រោយផងដែរ ស្របពេលក្រុមហ៊ុនមួយនេះបានពន្លឿនការពង្រីកក្រុមហ៊ុនរបស់ពួកគេផងដែរ៕

ប្រភព: CNA

The post អតីតអ្នកមានដាច់គេនៅសិង្ហបុរី បាត់បង់ទ្រព្យសម្បត្តិប្រហែល ៨០% ត្រឹមរយៈពេលខ្លី appeared first on .

មហាសេដ្ឋី Peter Lim គ្រោងនាំយកវិទ្យាស្ថានលំដាប់កំពូលនៅអង់គ្លេសមួយឆ្នាំ ៣ ម៉ឺនដុល្លារ មកប្រទេសសិង្ហបុរី

ឧកញ៉ាសំពៅ — Thu, 24 Feb 2022 08:27:30 +0000

វិទ្យាស្ថានលំដាប់កំពូល Wellington College ដែលធ្លាប់តែមាននៅចក្រភពអង់គ្លេសនឹងបង្ហាញខ្លួននៅប្រទេសសិង្ហបុរីនៅរយៈពេលប៉ុន្មានឆ្នាំខាងមុខ ដែលមានមហាសេដ្ឋីសិង្ហបុរី Peter Lim ជាអ្នកនាំយកមក។

សាលាឯកជនមួយនេះផងដែរ នឹងទទួលបង្រៀនសិស្សដែលមានអាយុចាប់ពី ៣ ដល់ ១៨ ឆ្នាំ ខណៈកម្មវិធីសាលានឹងអាចផ្ដល់ឱកាសឲ្យសិស្សផ្លាស់ប្ដូរបទពិសោធន៍ទៅកាន់សាលានៅបរទេសផ្សេងដែលស្ថិតនៅក្រោមការគ្រប់គ្រងរបស់ Wellington College International (WCI)។

ដោយឡែក បើយោងតាមការប្រកាសពី WCI បានឲ្យដឹងដែរថា ក្រុមហ៊ុនដែលគ្រប់គ្រងដោយមហាសេដ្ឋីសិង្ហបុរីម្នាក់នេះបានយល់ព្រមទិញសិទ្ធិក្នុងការសាងសង់សាលាឯកជន WCI ៣ កន្លែងនៅប្រទេសសិង្ហបុរី ឥណ្ឌូណេស៊ី និងម៉ាឡេស៊ី។

បន្ថែមពីនោះ ក្នុងចំណោម ៣ សាខាខាងលើ យូរបំផុតគឺនឹងត្រូវបើកសម្ពោធនៅឆ្នាំ ២០២៥ ឲ្យបានយ៉ាងតិចមួយសាខា ខណៈចំពោះតម្លៃសិក្សាវិញ គឺប្រហែល ៣០ ០០០ ដុល្លារ ឬច្រើនជាងនេះ។

បញ្ជាក់ដែរថា បច្ចុប្បន្ន WCI គឺមានសាខានៅអាស៊ីអាគ្នេយ៍តែមួយគត់គឺនៅព្រះរាជាណាចក្រថៃ ស្របពេលលឺល្ហៀងៗថានៅឆ្នាំ ២០២៣ នឹងមានសាខានៅប្រទេសឥណ្ឌាផងដែរ ខណៈបច្ចុប្បន្នសាលាលំដាប់ពិភពលោកមួយនេះក៏មានវត្តមាននៅប្រទេសចិនដូចគ្នា៕

ប្រភព: Asiaone

The post មហាសេដ្ឋី Peter Lim គ្រោងនាំយកវិទ្យាស្ថានលំដាប់កំពូលនៅអង់គ្លេសមួយឆ្នាំ ៣ ម៉ឺនដុល្លារ មកប្រទេសសិង្ហបុរី appeared first on .

មង្គលការកូនមហាសេដ្ឋីសិង្ហបុរី គ្រាន់តែកាដូកូនកំលោះជូនកូនក្រមុំ តម្លៃជាង ១,៥ លានដុល្លារ

ឧកញ៉ាសំពៅ — Fri, 18 Feb 2022 05:45:17 +0000

កាលពីថ្ងៃទី ១៦ កុម្ភៈកន្លងទៅ កូនស្រីរបស់ស្ដេចត្រាញ់សិង្ហបុរី Peter Lim បានរៀបអាពាហ៍ពិពាហ៍ជាមួយនឹងសង្សាររបស់នាង ដែលមិនត្រូវបានទម្លាយឲ្យដឹងពីប្រវត្តិរូបនៅឡើយ ដោយត្រូវបានគេហៅថា “L”។

កូនកំលោះម្នាក់នេះបានសុំ Kim Lim រៀបការកាលពីខែកញ្ញាកន្លងទៅ ជាមួយនឹងចិញ្ចៀនពេជ្រ ដែលមានតម្លៃអាចទិញបានខុនដូ HBD នៅសិង្ហបុរីមួយ។

ដោយសារជាប់សែស្រឡាយចិន ដូច្នេះកម្មវិធីមង្គលការក៏បានប្រារព្ធធ្វើទៅតាមប្រពៃណីចិន ដែលក្នុងនោះមានកម្មវិធីមួយឈ្មោះថា Guo Da Li ដែលតម្រូវឲ្យគ្រួសារកូនកំលោះនាំយកកាដូជូនដល់គ្រួសារកូនក្រមុំ ដើម្បីបង្ហាញពីការគោរព និងភាពស្មោះត្រង់ ហើយគ្រួសារកូនក្រមុំត្រូវទទួលយកកាដូទាំងនោះ ដើម្បីសំដែងពីការទទួលយកកូនកំលោះចូលក្នុងគ្រួសារ។

កាដូដែល L បានជូនដល់គ្រួសារមហាសេដ្ឋីដែលមានទ្រព្យសម្បត្តិប្រមាណ ២,៥ ពាន់លានដុល្លារមួយនេះ មានដូចគ្នា មាសគីឡូ ១៥ ដុំ កងដៃនិងខ្សែដៃរូបនាគ និងមយូរា ៨ គូ ខ្សែកមាស ២ ខ្សែ ចិញ្ចៀនមាស និងក្រវិលមាសជាច្រើនគូ កាបូបម៉ាក Hermes ២ នាឡិកា Rolex ១គូ គ្រឿងអលង្ការពេជ្រ ២ ឈុតមានឆ្លាក់ឈ្មោះ Jimmy Choos និងរបស់របរជាច្រើនទៀត។

View this post on Instagram

A post shared by Lelian Chew (@lelianchew)

ដោយឡែកបើយោងតាមការចុះផ្សាយ ពី ICON បានឲ្យដឹងថា តម្លៃសរុបនៃកាដូដែលគ្រួសារកូនកំលោះផ្ដល់ជូនគ្រួសារកូនក្រមុំគឺមានតម្លៃប្រហែល ២ លានដុល្លារសាំងហ្គាពួរ ឬ ១,៥ លានដុល្លារអាមេរិក។

បញ្ជាក់ដែរថា តាមពិតទៅ Lim ធ្លាប់មានគ្រួសារម្ដងហើយ តែដោយសាររស់នៅមិនចុះសម្រុងក៏សម្រេចចិត្តលែងលះ និងបន្សល់កូនប្រុសម្នាក់ជាចំណងដៃ ខណៈស្វាមីថ្មីម្នាក់នេះគឺមិនត្រូវបានដឹងច្បាស់ពីប្រវត្តិនៅឡើយ សូម្បីតែឈ្មោះ ដោយគ្រាន់តែដឹងថា រូបគេនិង Lim ធ្វើការនៅលើវិស័យ IT ជាមួយគ្នាអស់រយៈពេលយូរក្រែលដែរ ហើយបើមើលតាមកាដូដែលជូននេះ សមល្មមអាចសន្និដ្ឋានថា គ្រួសារកូនកំលោះក៏ស្ថិតនៅក្នុងលំដាប់អភិជនដូចគ្នា៕

ប្រភព: cnaluxury

The post មង្គលការកូនមហាសេដ្ឋីសិង្ហបុរី គ្រាន់តែកាដូកូនកំលោះជូនកូនក្រមុំ តម្លៃជាង ១,៥ លានដុល្លារ appeared first on .

អតីតអ្នកមានដាច់គេនៅសិង្ហបុរី បាត់ទ្រព្យសម្បត្តិជាង ១០ ពាន់លានដុល្លារ ក្រោយ Tencent ដកភាគហ៊ុនមួយចំណែក

ឧកញ៉ាសំពៅ — Thu, 06 Jan 2022 09:30:05 +0000

លោក Forrest Li អតីតមហាសេដ្ឋីមានដាច់គេនៅសិង្ហបុរីកាលពីឆ្នាំទៅ បានបាត់បង់ទ្រព្យសម្បត្តិប្រមាណជាង ១០ ពាន់លានដុល្លារ ដោយសារតម្លៃភាគហ៊ុន Sea Ltd មានការធ្លាក់ចុះ ក្រោយក្រុមហ៊ុនផលិតហ្គេមចិន Tencent Holdings Ltd កាត់បន្ថយចំណែកភាគហ៊ុនរបស់ពួកគេ។ នេះបើតាមការចុះផ្សាយពី Bloomberg Billionaires Index។

ប្រភពដដែលបន្ថែមទៀតថា Tencent បានអះអាងកាលពីថ្ងៃអង្គារ៍កន្លងទៅថា ការសម្រេចចិត្តកាត់ចំណែកភាគហ៊ុនរបស់ Sea ពី ២១,៣% មកសល់ត្រឹម ១៨,៧% គឺដោយសារសិទ្ធិបោះឆ្នោតក្នុងការបន្ថយភាគហ៊ុនទៅសល់ក្រោម ១០% របស់ក្រុមហ៊ុន។

ការសម្រេចចិត្តធ្វើបែបនេះ គឺ Tencent ចង់ប្រមូលម្ចាស់ភាគហ៊ុនលំដាប់ Class B ទាំងអស់ ឲ្យចូលជាមួយម្ចាស់ភាគហ៊ុនលំដាប់ Class A តែជាលទ្ធផលវាបានជួយឲ្យលោក Li មានអំណាចសម្រាប់ម្ចាស់ភាគហ៊ុន Class B ទាំងអស់ ពោលលោកមានសិទ្ធដល់ទៅ ៥៧% សម្រាប់ការបោះឆ្នោត។

បញ្ជាក់ដែរថា ក្រុមហ៊ុន Sea ដែលមានទីស្នាក់ការកណ្ដាលនៅប្រទេសសិង្ហបុរី និងមានឈ្មោះលើផ្សារហ៊ុនអាមេរិក បានក្លាយជាក្រុមហ៊ុនមានតម្លៃបំផុតនៅតំបន់អាស៊ីអាគ្នេយ៍ ដោយសារភាពជោគជ័យទទួលបានពីផ្សារអនឡាញ Shopee និងហ្គេមទូរស័ព្ទ Free Fire។

បច្ចុប្បន្ន លោក Li គឺជាបុគ្គលមានទ្រព្យច្រើនបំផុតទី ៣ នៅសិង្ហបុរីដោយមាន ១១,៨ ពាន់លានដុល្លារ ដែលនេះរាប់ទាំងកាលពីថ្ងៃអង្គារកន្លងទៅលោកខាតបង់អស់ ១,៥ ពាន់លានដុល្លារត្រឹមមួយថ្ងៃ ស្របពេលដៃគូស្ថាបនិកក្រុមហ៊ុន Gang Ye និងDavid Chen មានទ្រព្យសម្បត្តិ ៦,៣ ពាន់លានដុល្លារ និង ២,១ ពាន់លានដុល្លារ៕

ប្រភព: livemint

The post អតីតអ្នកមានដាច់គេនៅសិង្ហបុរី បាត់ទ្រព្យសម្បត្តិជាង ១០ ពាន់លានដុល្លារ ក្រោយ Tencent ដកភាគហ៊ុនមួយចំណែក appeared first on .