មុខជំនួញ

លោក ឌី វ៉ាន់ខូវ៖ ខ្ញុំខ្លួនឯង ចង់បញ្ឈប់ភាពក្រ ហើយជួយបងប្អូនរួមផ្ទៃកុំឲ្យក្រ ព្រោះជួបឆ្អែតរួចមកហើយ

ឧកញ៉ាកោះក្របី — Wed, 27 Oct 2021 02:36:05 +0000

ម្ចាស់ក្រុមហ៊ុន P.Y Mart លោក ឌី វ៉ាន់ខូវ បានពង្រីកវិសាលភាពអាជីវកម្មរបស់ខ្លួនជាង ៣០០ សាខានៅទូទាំងប្រទេស ផ្តោលើសេវាកម្មប្រេនឆាយបើកប្រភេទម៉ាតតូចៗ ដែលមានសម្ភារៈប្រើប្រាស់ក្នុងផ្ទះ គ្រឿងអេឡិចត្រូនិច ឧបករណ៍ផ្គត់ផ្គង់អគិសនី សម្ភារៈកូនក្មេង ដែលនាំចូលពីសហរដ្ឋអាមេរិក អ៊ឺរ៉ុប កូរ៉េ ថៃ ចិន។

សូមចុច Subscribe Telegram oknha_news ដើម្បីទទួលបានព័ត៌មានគ្រប់សកម្មភាពឧកញ៉ា អាជីវកម្ម ចែករំលែក ជោគជ័យ

កើតនៅស្រុកបសេដ្ឋ ខេត្តកំពង់ស្ពឺ លោកគឺជាកូនច្បងក្នុងចំណោមបងប្អូន ៥ នាក់ ដែលមានឪពុកម្ដាយប្រកបរបរធ្វើស្រែចម្ការ។ នៅអំឡុងឆ្នាំ២០០៨ លោកឃ្លាតឆ្ងាយពីស្រុកកំណើត និងអ្នកមានគុណ ផ្លាស់មករស់នៅរាជធានីភ្នំពេញ ហើយបានរៀនចប់មធ្យមសិក្សានៅវិទ្យាល័យច្បារអំពៅ ក្នុងឆ្នាំ ២០១១ និងបានចូលរៀនមហាវិទ្យាល័យ ជំនាញព័ត៌មានវិទ្យា IT នៅសាកលវិទ្យាល័យ IIC។

លោកបានចូលបម្រើការងារនៅក្រុមហ៊ុនមួយផ្នែក TI ក្រោយមកលោកបានលាឈប់ទៅវិញ។ នៅឆ្នាំ២០១៥ លោក ឌី វ៉ាន់ខូវ បានចាប់ផ្តើមជំនួញអនឡាយ ធ្វើវេបសាយលក់ បង្រៀនប៊ូសផេក រៀបចំបង្កើតផេកហ្វេសប៊ុក។ “ធ្វើការឲ្យគេវាសុវត្ថិភាព បើទោះបីមានបញ្ហាអ្វីកើតឡើងក៏ដោយ យើងនៅតែមានប្រាក់ខែ ប៉ុន្តែវាមានសម្ពាធត្រង់ថា ខ្ញុំមិនចេះនៅស្ងៀមមួយកន្លែង ហើយចាំតែយកប្រាក់ខែពីគេនោះទេ។ ខ្ញុំចង់ធ្វើអ្វីជាគំនិតខ្លួនឯង ដែលជាការរកលុយចេញពីខ្លួនឯង។ និយាយជារួម គឺខ្ញុំចង់ក្លាយជាកម្មសិទ្ធិខ្លួនឯង ចង់បង្កើតក្រុមហ៊ុនខ្លួនឯង ព្រោះធ្វើការឲ្យគេយើងត្រូវសួរខ្លួនឯងថា ម្ចាស់ក្រុមហ៊ុនយើងកំពុងធ្វើការហ្នឹង តើគាត់ជានរណា? ខណៈដែលគាត់ជាមនុស្សដូចយើងដែល គាត់អាចធ្វើបានក្លាយជាម្ចាស់ក្រុមហ៊ុន ចឹងយើងមនុស្សដូចគ្នា ក៏នឹងអាចក្លាយជាម្ចាស់ក្រុមហ៊ុន មានបុគ្គលិកធ្វើការឲ្យយើងរកប្រាក់ចំណូលដូចគាត់ដែរតើ”។

មុនទទួលបានជោគជ័យក្នុងជំនួញដូចបច្ចុប្បន្ន លោកបានហែរឆ្លងការលំបាកមិនតិចឡើយ ដូចជាធ្លាប់ចេញរកស៊ីខាតផ្ញាជើង ជួបឧបសគ្គច្រើនមានការវ៉ៃបំបាក់ស្មារតី មើលងាយមើលថោកពីអ្នកដទៃថាវាមិនអាចទៅរួច។

មកដល់បច្ចុប្បន្នអតីតក្មេងមកពីខេត្តកំពង់ស្ពឺរូបនេះ បានក្លាយជាថៅកែក្រុមហ៊ុន P.Y Mart ពិសេសជាមេដឹកនាំមួយរូប ដែលពោរពេញដោយសមត្ថភាព និងចក្ខុវិស័យវែងឆ្ងាយ។ “និយាយទៅកើតមកដឹងក្តីភ្លាម គឺចង់ក្លាយជាអ្នកជំនួញ បើទោះបីកន្លងមកមិនដែលបានអានសៀវភៅជោគជ័យ ឬមិនដែលជួបមនុស្សជោគជ័យ ប៉ុន្តែចង់រកស៊ីតែម្តង”។

បន្ទាប់ពីការខិតខំប្រឹងប្រែង និងទទួលបាននូវបទពិសោធន៍ជាច្រើនមក លោកបានសម្រេចក្តីស្រមៃ ដោយបង្កើតក្រុមហ៊ុន P.Y Mart។ នេះជាសមិទ្ធផលធំមួយ បន្ទាប់ពីបានខិតខំប្រឹងប្រែងជាច្រើនឆ្នាំ។ ប៉ុន្តែលោកក៏បានដឹងរួចជាស្រេចហើយថា នឹងអាចមានឧបសគ្គចំពោះមុខជាច្រើន ដែលត្រូវដោះស្រាយ។ ** យ៉ាងណាមិញលោកហាក់មានជំនឿចិត្តលើសមត្ថភាពខ្លួនឯង ដោយសារមានការគាំទ្រពីក្រុមការងារ ពិសេសពីគ្រួសារតែម្តង**។

លោក ឌី វាន់ខូវ ឱ្យដឹងថា មានកត្តាបី ដែលជំរុញឱ្យលោកទទួលបានជោគជ័យគឺ កត្តាគ្រួសារដែលមានប្រពន្ធកូន បងប្អូន និងដៃគូសហការមួយគ្នាដែលជាស្ថាបនិក ប្រេនឆាយសាច់អាំងចង្កាក់ HBF។ លោកបានចាត់ទុកអ្វីគ្រប់យ៉ាងដែលទទួលបាន គឺជាភាពជោគជ័យដ៏ត្រចះត្រចង់បំផុត ព្រោះភាពជោគជ័យកើតចេញគំនិតខ្លួនឯង មានកម្មសិទ្ធិលើជីវិតខ្លួនឯង ដែលជាការរកលុយចេញពីខ្លួនឯង។

នៅពីក្រោយជោគជ័យរបស់លោក ឌី វ៉ាន់ខូវ គឺផ្តើមចេញពាក្យថា “យើងជាកូនច្បង ប្រៀបបាននឹងឪពុកចឹង ដូច្នេះយើងចង់ឲ្យត្រកូលយើងហ្នឹងឈប់ក្រ ចាប់ពីត្រឹមពេលខ្ញុំកើតមកតទៅ។ ខ្ញុំខ្លួនឯង គឺចង់បញ្ឈប់ភាពក្រ ចង់ជួយបងប្អូនរួមផ្ទៃតែមួយកុំឲ្យក្រទៀត ព្រោះតែខ្ញុំធ្លាប់បានជួបនិងកាត់នូវភាពក្រក្រីលំបាកឆ្អែតរួចមកហើយ”។

“មិនថាយើងជាអ្នករកស៊ី ឬធ្វើការឲ្យគេទេ ទោះបីចាប់ផ្តើមអាជីវកម្មក៏នៅតែបន្តការធ្វើការឲ្យគេដែរ ព្រោះការធ្វើការឲ្យគេមិនមែនយកតែប្រាក់ខែនោះទេ គឺដើម្បីរៀនសូត្រពីម្ចាស់ក្រុមហ៊ុន ហើយយកមកអនុវត្ត។ ពេលយើងរកស៊ីបណ្តើរ គឺយើងរៀនបណ្តើរ ហើយត្រូវមានអ្នកប្រឹក្សាយោបល់ អ្នកសួរនាំផ្លូវ នៅពេលដែលដើរបណ្តើរត្រូវចេះសួរនាំផ្លូវគេបណ្តើរ”។ លោកបន្ថែម។

លោកបានផ្ដាំផ្ញើទៅយុវជនជំនាន់ក្រោយ ត្រូវមានហេតុផលគោលដៅច្បាស់លាស់ និងត្រូវចាំថា អ្វីក៏យើងអាចធ្វើបានដែរឱ្យតែយើងមានផ្លូវទៅរកគោលដៅដែលយើងចង់ទៅ ព្រោះគ្រប់ចម្លើយតែងមានហេតុនិងផល ចឹងមនុស្សគ្រប់រូប ត្រូវតែរកមូលហេតុផល និងគោលដៅឲ្យឃើញ ប្រសិនបើយើងចង់បានជោគជ័យ។ “ពាក់ព័ន្ធនឹងភាពក្លាហាន ការគិតតូចការគិតធំ វាអត់សំខាន់នោះទេ សំខាន់គឺនៅត្រង់ថា យើងមានផ្លូវទៅរកគោលដៅដែលយើងចង់ទៅ ព្រោះគ្រប់ចម្លើយតែងមានហេតុនិងផល ចឹងមនុស្សគ្រប់រូប រកមូលហេតុផលច្បាស់លាស់ ហើយយើងមានគោលដៅ ប្រសិនបើយើងអត់ទេយើងអត់ជោគជ័យនោះទេ”៕

The post លោក ឌី វ៉ាន់ខូវ៖ ខ្ញុំខ្លួនឯង ចង់បញ្ឈប់ភាពក្រ ហើយជួយបងប្អូនរួមផ្ទៃកុំឲ្យក្រ ព្រោះជួបឆ្អែតរួចមកហើយ appeared first on .

បើកអាជីវកម្មចំសម័យកូវីដ គ្មានប្រាក់ចំណេញសោះ តើគួរធ្វើដូចម្ដេច?

អ្នកឧកញ៉ាវត្តភ្នំ — Mon, 27 Sep 2021 07:46:27 +0000

នៅក្នុងដំណាក់កាលជំងឺកូវីតដ៏កាចសាហាវមួយនេះ គឺមានអាជីវកម្មជាច្រើនត្រូវបានដួលរលំ ឬដើរទៅមុខស្ទើរតែមិនរួចព្រោះគ្មានប្រាក់ចំណេញ។ អ្នកប្រហែលជាគិតថានិងចង់បោះបង់វា តែមុននឹងឈានទៅដល់ដំណាក់កាលនោះមានរឿងមួយចំនួនដែលអ្នកគួរសាកល្បងពិចារណាជាមុនសិន៖

១. ការស្វែងរកដើមទុនបន្ថែម៖ បើអ្នកមានដើមទុនផ្ទាល់ខ្លួនបម្រុងរួចមកហើយវាជារឿងល្អ តែបើអ្នកមិនទាន់មានទេការយកប្រាក់កម្ចីជារឿងមួយដែរអ្នកគួរពិចារណា។ សម័យនេះមានធានាគារ ឬគ្រឹះស្ថានហិរញ្ញវត្ថុ ផ្ដល់ប្រាក់កម្ចីជាច្រើន ជាពិសេសធនាគារសហគ្រាសធុនតូចនិងមធ្យមកម្ពុជា ក៏បានផ្ដល់នូវប្រាក់កម្ចីជាច្រើនសម្រាប់ជួយអាជីវកម្មធុនតូច និងមធ្យមនៅកម្ពុជា ដែលខ្វះធនធានហិរញ្ញវត្ថុ ជាមួយនិងអត្រាការប្រាក់ទាប។ មុននិងអ្នកសម្រេចចិត្តខ្ចីប្រាក់ពីធនាគារណាមួយផ្សេងទៀត អ្នកត្រូវដឹងអោយច្បាស់ថាធនាគារនោះមានការប្រាក់ទាប និងត្រូវតាមសមត្ថភាពដែរអ្នកមាន ជៀសវាងពីការប្រាក់កម្ចីណាដែរមានការប្រាក់ថ្លៃហួសហេតុ។ ពេលដែលបានដើមទុនមកបន្តអាជីវកម្មហើយ អ្នកត្រូវប្រើប្រាស់វាអោយបានល្អ កុំខ្ចីយកមកគ្រាន់តែបើកប្រាក់ខែអោយបុគ្គលិក និងចំណាយធម្មតា។

២. ការបន្ថែមសេវាកម្ម និងផលិតផល៖ ប្រសិនបើអាជីវកម្មរបស់ អ្នកអាចអោយអ្នកបន្ថែមសេវាកម្ម ឬផលិតផលបាន អ្នកគួរតែសាកល្បងធ្វើវា។ ឧទាហរណ៌ ថាអាជីវកម្មរបស់អ្នកបើកលក់នូវបាយពេលព្រឹក ហើយពេលថ្ងៃ និងពេលល្ងាចអ្នកអាចបើកលក់នូវភេសជ្ជះ និងអាហារផ្សេងៗទៀត ដែរអាចជួយរកប្រាក់ចំណូលអោយអ្នកបានបន្ថែមទៀត។

៣. ការដុះខាតជំនាញបុគ្គលិក និងខ្លួនឯងផ្ទាល់៖ មូលហេតុដែលធ្វើអោយហាងរបស់អ្នកមានអតិថជនតិចជាងបើធៀបទៅ និងគូរប្រកួតអ្នក អាចមកពីសមត្ថភាពបុគ្គលិករបស់អ្នកនៅខ្សោយពេក។ បើហាងរបស់អ្នកកបើលក់នូវសម្លៀកបំពាក់ ឬសម្ភារះប្រើប្រាស់ផ្សេងៗ វាអាចមកពីសេវាកម្មរបស់អ្នកមិនល្អ យឺតយ៉ាវ មិនមានអនាម័យ គ្មានភាពរួសរាយរាក់ទាក់។ល។ ដូច្នេះអ្នកត្រួវមើលពីបុគ្គលិកខ្លូនឯងថាតើមានចំណុចណាខុសឆ្គងដែរឬទេ រួចធ្វើការកែខៃទៅតាមនោះ។

៤. កុំទិញរបស់ស្តុកទុកច្រើន៖ សម្រាប់អ្នកដែរលក់នូវសម្ភារះ និងផលិតផលប្រើប្រាស់ផ្សេងៗ ក្នុងរដូវការកូវីតនេះអ្នកមិនត្រូវទិញផលិតផលស្តុកទុកប្រើនពេកទេ ព្រោះអ្នកមិនដឹងថាថ្ងៃណាតំបន់ណាត្រូវបានបិទ ឬថ្ងៃណាអ្នកត្រូវបានឃុំខ្លួននៅក្នុងផ្ទះ ដូច្នេះមិនត្រូវស្ដុកទុកផលិតផលប្រើនពេកទេ ដែលអាចធ្វើអោយខូចគុណភាព និងធ្វើអោយអ្នកខាតថវិការផងដែរ។

៥. ការប្រើប្រាស់សេវាកម្ម និងដឹកជញ្ជូន៖ សម្រាប់អ្នកដែលលក់ចំណីអាហារ ផលិតផលប្រើប្រាស់ និងលក់សម្លឿកបំពាក់់ អ្នកអាចសាកល្បងដាក់ហាងរបស់អ្នកទៅលើកម្មវិធីដឹងជញ្ជូនដូចជា Food Panda Nham24 និងកម្មវិធីផ្សេងទៀតបាន។ ការធ្វើបែបនេះអ្នកមិនត្រឹមតែបន្ថែមអតិថិជនប៉ុណ្ណោះទេ តែអ្នកក៏អាចធ្វើអោយគេស្គាល់ហាងរបស់អ្នកកាន់តែច្រើនថែមទៀតទោះគេទិញ ឬមិនទិញក៏ដោយ។

The post បើកអាជីវកម្មចំសម័យកូវីដ គ្មានប្រាក់ចំណេញសោះ តើគួរធ្វើដូចម្ដេច? appeared first on .

លម្អិត កសិដ្ឋានគិរីសួគ៍ ចិញ្ចឹមគោយកទឹកដោះស្រស់ទំនើបបំផុតនៅកម្ពុជាវិនិយោគ១៥លានដុល្លារ ល្បីថាឆ្ងាញ់ជក់មាត់

ឧកញ៉ាកោះក្របី — Mon, 30 Aug 2021 05:25:25 +0000

ជឿថា មានប្រិយមិត្តជាច្រើនបានស្គាល់ និងធ្លាប់ញាំទឹកដោះគោសុទ្ធធម្មជាតិល្បីឈ្មោះ “គិរីសួគ៍” កំពុងពេញនិយមលាន់មាត់ថាឆ្ងាញ់ ដែលផលិតឡើងពីកសិដ្ឋានចិញ្ចឹមគោធំបំផុត និងទំនើបនៅស្រុកខ្មែរ បានបង្កើនការលក់ពីមួយថ្ងៃទៅមួយថ្ងៃ ដោយសារតែមានសន្ទុះនៃការគាំទ្រយ៉ាងច្រើនលើសលប់។ មែនទែនទៅកសិដ្ឋានក្នុងស្រុកមួយនេះ ទើបតែហក់មកប្រកួតប្រជែងលើទីផ្សារនៅប៉ុន្មានឆ្នាំចុងក្រោយប៉ុណ្ណោះ ប៉ុន្តែទទួលបានការចាប់អារម្មណ៍ និងជោគជ័យខ្លាំង បើទោះបីមានផលិតផលទឹកដោះគោនាំចូលពីបរទេសកំពុងដាក់លក់លើទីផ្សារស្រាប់ទៅហើយក្តី។

កសិដ្ឋានគិរីសួគ៌ (Kirisu Farm) គឺជាគម្រោងរួមគ្នារបស់សហគ្រិនកំពូលៗក្នុងស្រុក វិនិយោគជាមួយនឹងអ្នកជំនាញអន្តរជាតិ ដែលបង្កើតបរិយាកាសល្អត្រកាល ប្រកបដោយភាពសុខុដុមរមនា សម្រាប់សុខភាពល្អរបស់គោ ខណៈដែលកសិដ្ឋានបាននាំចូលគ្រឿងចក្រទំនើប សម្រាប់ដាំដុះស្លឹកឈើមានតម្លៃប្រមាណ ១.៥.លានដុល្លារអាមេរិក ដើម្បីជំរុញឲ្យការផលិតបាននូវទឹកដោះ និងជារោងចក្រកែច្នៃទឹកដោះគោប្រើបច្ចេកវិទ្យាទំនើបថ្មីចុងក្រោយគេបង្អស់។

ការបោះជំហានក្នុងការអភិវឌ្ឍវិស័យកសិ-ឧស្សាហកម្ម (ការចិញ្ចឹមគោទឹកដោះ) ត្រូវបានកសិដ្ឋានមើលឃើញពីវិសាលភាពប្រកបដោយសក្កានុពលដើម្បីចាប់យកចំណែកទីផ្សារក្នុងស្រុកឱ្យបានទូលំទូលាយបំផុត ខណៈក្រុមហ៊ុន ផ្សារទំនើប ហាងនំមួយចំនួនបាននឹងកំពុងបញ្ជាទិញផលិតផលចេញពីទឹកដោះគោសុទ្ធធម្មជាតិ “គិរីសួគ៍” ជារៀងរាល់ថ្ងៃ។

ឧកញ៉ាញូស៍ សូមបើកកកាយលាតត្រដាងឲ្យប្រិយមិត្តអ្នកអានបានស្គាល់ កសិដ្ឋានគិរីសួគ៌ (Kirisu Farm) ឲ្យកាន់តែច្បាស់ថែមទៀត តើសហគ្រិនរូបណាខ្លះដែលបានសហការរួមគ្នាវិនិយោគលើកសិដ្ឋានក្នុងស្រុកដ៏ធំបំផុតមួយនេះ?

កសិដ្ឋានគិរីសួគ៌របស់ក្រុមហ៊ុន Khmer Fresh Milk Co., Ltd ត្រូវបានក្រុមប្រឹក្សាអភិវឌ្ឍន៍កម្ពុជា (CDC) អនុម័តគម្រោងវិនិយោគកាលពីថ្ងៃទី២៤ ខែកក្កដា ឆ្នាំ២០១៩កន្លងទៅ ដែលមានទំហំដីវិនិយោគរហូតដល់ទៅ ៣០០ ហិចតា ស្ថិតនៅជ្រលងភ្នំតាម៉ៅ នៅខេត្តតាកែវ ចម្ងាយជាង ៣០ គីឡូម៉ែត្រ ពីភាគខាងត្បូង រាជធានីភ្នំពេញ។

ក្រុមហ៊ុន Khmer Fresh Milk បានកកើតចេញពីការចាប់ដៃគូរវាង Cambodia-Laos-Myanmar Development Fund II ដែលមានមូលដ្ឋាននៅប្រទេសសិង្ហបុរី តំណាងដោយក្រុមហ៊ុន Emerging Markets Investment Advisers (EMIA), មូលនិធិ Nexasia របស់ជប៉ុន ដែលមានមូលដ្ឋាននៅប្រទេសសិង្ហបុរី និង ក្រុមស្ថាបនិកដែលទទួលបានជោគជ័យខ្ពស់ រួមមាន សហគ្រិនកម្ពុជា និងសហគ្រិនមកពីប្រទេសអ៊ីស្រាអែល។

នៅទីនេះឧកញ៉ាញូស៍ សូមបង្ហាញបញ្ជីឈ្មោះពាណិជ្ជករខ្មែរ ៣រូប ដែលបានផ្តួចផ្តើមបោះទុន ១៥លានដុល្លារវិនិយោគលើគម្រោងដ៏ធំមួយនេះ គឺលោក ជី សិលា ដៃគូសហស្ថាបនិក ក្រុមហ៊ុន Khmer Fresh Milk និងជាស្ថាបនិកក្រុមហ៊ុន សប្បាយឌីជិថល (Sabay Digital Media) លោក គួច សុខលី នាយកចាត់ការទូទៅ និងជាអគ្គនាយកគ្រប់គ្រងក្រុមហ៊ុន Cambodia Best Meal (CBM) ដែលមានភោជនីយដ្ឋាន និងអាហារដ្ឋានជាច្រើនកន្លែងនៅរាជធានីភ្នំពេញ និងលោក ឈរ រិទ្ធី នាយកប្រតិបត្តិក្រុមហ៊ុន Khmer Fresh Milk Co., Ltd. និងជាប្រតិបត្តិករកសិដ្ឋាន គិរីសួគ៍ រួមនឹងសហគ្រិនបរទេសជាច្រើនរូបទៀត។

បន្ថែមលើនេះ កសិដ្ឋានគិរីសួគ៍ មានដៃគូផ្នែកបច្ចេកវិទ្យាគឺក្រុមហ៊ុន Afimilk របស់ប្រទេសអ៊ីស្រាអែល ជាក្រុមហ៊ុនមួយក្នុងចំណោមក្រុមហ៊ុនផ្គត់ផ្គង់ធំបំផុតខាងបច្ចេកវិទ្យា និងគ្រប់គ្រងកសិដ្ឋានគោទឹកដោះ នៅលើពិភពលោក។ Afimilk បានទទួលជោគជ័យជាច្រើនមកហើយ ក្នុងការបង្កើត និងគ្រប់គ្រងគម្រោងអាជីវកម្មស្រដៀង គ្នានេះនៅទូទាំងពិភពលោក ក៏ដូចជាគម្រោងនៅប្រទេស វៀតណាម បង់ក្លាដែស និង ចិន។

កសិដ្ឋាន គិរីសួគ៌ (Kirisu Farm) មានចក្ខុវិស័យយូរអង្វែង ក្នុងការនាំយកទឹកដោះគោសុទ្ធពីធម្មជាតិ បច្ចេកទេសកសិកម្ម និងការកែច្នៃចំណីអាហារលំដាប់ពិភពលោកនូវទឹកដោះគោសុទ្ធពីធម្មជាតិ ១០០ ភាគរយ ឲ្យមានគុណភាពខ្ពស់តាមស្ដង់ដារអន្តរជាតិ។

អ្វីដែលធ្វើឲ្យ “គិរីសួគ៍” កាន់តែពិសេសប្លែកគេ គឺគោរបស់គោ Holstein ពូជសុទ្ធចំនួន ៥៥០ ក្បាល ត្រូវបាននាំចូលពីប្រទេសអូស្ត្រាលី។ គោ Holstein មានឈ្មោះល្បីទូទាំងពិភពលោក ថាជាគោ ផលិតទឹកដោះល្អបំផុត។ កសិដ្ឋានប្រើប្រាស់ស្មៅ ពោត និងសណ្ដែក legume ដែលដាំនៅលើទីតាំងនោះផ្ទាល់ ជាចំណី ដល់សត្វគោទាំងនោះ ជាមួយនឹងអ្នកត្រួតពិនិត្យដោយផ្ទាល់នៅកសិដ្ធាន សំរាប់ការមើលគុណភាពចំណីរបស់វា ព្រមទាំងដើម្បីកាត់បន្ថយផលប៉ះពាល់ផ្នែកបរិស្ថាន។

តាមរយៈគម្រោងដ៏ធំមហិមារនេះ រាជរដ្ឋាភិបាលកម្ពុជា បានរំពឹងថា ពិតជានឹងចូលរួមចំណែកក្នុងការផ្គត់ផ្គង ផលិតផលទឹកដោះគោស្រស់ និងកែច្នៃសម្រាប់ទីផ្សារក្នុងស្រុក។ មិនតែប៉ុណ្ណោះ កសិដ្ឋានមួយនេះ បានជួយនាំយកបច្ចេកវិទ្យាទំនើប ទាន់សម័យ វៃឆ្លាត និងចុងក្រោយ មកប្រើក្នុងការចិញ្ចឹម និងផលិតទឹកដោះ ធានាគុណភាព និងសុវត្ថិភាព ឈានទៅធានាសុខភាពអ្នកបរិភោគ និងអាហារូបត្ថម្ភសម្រាប់កុមារ។

ជាមួយគ្នានេះកសិដ្ឋានបានស្រូបយកកំលាំងពលកម្មក្នុងស្រុក និស្សិតបញ្ចប់ការសិក្សា ទទួលបានចំណេះដឹង និងបទពិសោធន៍ សម្រាប់ពង្រីកចំណេះ និងជំនាញថ្មីពីប្រទេសដែលមានបច្ចេកវិទ្យាខ្ពស់ទៅលើផ្នែកកសិកម្មផងដែរ៕

The post លម្អិត កសិដ្ឋានគិរីសួគ៍ ចិញ្ចឹមគោយកទឹកដោះស្រស់ទំនើបបំផុតនៅកម្ពុជាវិនិយោគ១៥លានដុល្លារ ល្បីថាឆ្ងាញ់ជក់មាត់ appeared first on .

តើម្ចាស់សាលាអន្តរជាតិ South Bridge ល្បីថាបង់ថ្លៃសិក្សារាប់ពាន់ ឬម៉ឺនដុល្លារ ក្នុង១ឆ្នាំៗ ជានរណា?

ឧកញ៉ាកោះក្របី — Wed, 25 Aug 2021 03:40:48 +0000

South Bridge International School Cambodia (SISC) គឺជាសាលាអន្ដរជាតិថ្មីមួយ ដែលផ្ដល់ការអប់រំកម្រិតស្តង់ដារអន្តរជាតិលើកម្មវិធីសិក្សាពីរភាសា (Bi- lingual Programme) ព្រមទាំងផ្ដោតសំខាន់ទៅលើគុណភាពជាចំបង ត្រូវបានបង្កើតឡើងដោយពាណិជ្ជករល្បីឈ្មោះពីររូបនៅស្រុកខ្មែរ។

សាលាអន្តរជាតិ South Bridge គឺជាសាលាសម្រាប់សិស្សានុស្សិស្សភាគច្រើនកូនអ្នកមាន កូនបរទេស កូនមន្រ្តីទូតនៅរាជធានីភ្នំពេញ ដោយការបង់ថ្លៃសិក្សាមានតម្លៃរាប់ពាន់ ឬម៉ឺនដុល្លារ ក្នុង១ឆ្នាំៗ។ សិស្សដែលបញ្ចប់ការសិក្សានៅសាលាអន្តរជាតិមួយនេះ ក៏អាចទៅសិក្សានៅសកលវិទ្យាល័យឯបរទេសបានផងទៀត។

សូមចុច Subscribe Telegram oknha_news នឹងទទួលបានព័ត៌មានពីសកម្មភាពឧកញ៉ា សេដ្ឋកិច្ច ពាណិជ្ជកម្ម និងសហគ្រិនភាព

តើពាណិជ្ជកររូបណាខ្លះចូលរួមបង្កើតសាលាអន្តរជាតិ South Bridge International School លំដាប់ពិភពលោកនៅប្រទេសកម្ពុជា?

សាលាអន្តរជាតិ South Bridge ត្រូវបានបើកដំណើរការជាផ្លូវការនៅថ្ងៃទី២៤ ខែមេសា ឆ្នាំ២០១៧កន្លងទៅ ស្ថិតនៅបុរីប៉េងហួត បឹងស្នោរ ខណ្ឌច្បារអំពៅ។ សាលានេះគឺជាការវិនិយោគរួមគ្នារវាងអ្នកឧញ៉ា គិត ម៉េង អគ្គនាយកក្រុមហ៊ុន រ៉ូយ៉ាល់ គ្រុប និងលោកឧញ៉ា ថៃ ជាហួត ម្ចាស់ក្រុមហ៊ុន បុរី ប៉េង ហួត គ្រុប។

South Bridge International School ត្រូវបានវិនិយោគសាងសង់សាលាក្នុងតម្លៃប្រមាណ ១២លានដុល្លារអាមេរិក ចំនួននេះដោយមិនទាន់គិតបញ្ចូលតម្លៃបរិក្ខារបំពាក់ផ្សេងៗ និងតម្លៃដីដែលមានទំហំជាង៤ហិកតានៅក្នុងបុរី ប៉េង ហួត ដែលមានស្រាប់។

ការបង្កើតសាលាអន្តរជាតិ South Bridge នេះឡើងជាសញ្ញាវិជ្ជមានមួយដើម្បីផ្ដល់ឱកាសឲ្យផ្នែកឯកជន ចូលរួមផ្ដល់សេវាប្រកបដោយគុណភាព ខណៈដែលក្រសួងអប់រំយុវជន និងកីឡា ក៏មានគោលដៅរួចមកហើយក្នុងការពង្រឹងគុណភាពអប់រំ និងអភិវឌ្ឍមូលធនមនុស្ស។ South Bridge International School ទទួលសិស្សចូលរៀនចាប់ពីថ្នាក់មត្តេយ្យរហូតដល់ថ្នាក់វិទ្យាល័យ ជាមួយនឹងបរិក្ខារទំនើបៗ និងគ្រូក្នុងស្រុក និងពីបរទេសដែលមានសមត្ថភាពខ្ពស់ និងបទពិសោធជាច្រើនឆ្នាំក្នុងវិស័យអប់រំ។

លោក Ray Mondyager អគ្គនាយកក្រុមហ៊ុន South Bridge International School limited បានអោយដឹងថា សាលារបស់យើងមានបទពិសោធន៍ អប់រំនិងមានសាខានៅប្រទេសជាច្រើន ហើយយើងក៏រីករាយក្នុងការមកវិនិយោគវិស័យអប់រំនៅកម្ពុជា។ សាលារបស់យើងមានគ្រូជនជាតិខ្មែរ និងគ្រូជនជាតិបរទេសដើម្បីបណ្ដុះបណ្ដាល និងបង្រៀនសិស្សប្រកបគុណភាពខ្ពស់ ។

សាលាអន្ដរជាតិ South Bridge ផ្ដោតលើកម្មវិធីសិក្សាដែលទទួលស្គាល់ជាលក្ខណៈអន្ដរជាតិ ដែលបានទទួលអាជ្ញាប័ណ្ណពីចក្រភពអង់គ្លេស។ កម្មវិធីសិក្សានេះត្រូវបានរៀបចំឡើងដោយធានាឲ្យបាននូវការសិក្សា យ៉ាងម៉ត់ចត់ ក្នុងគោលបំណងចូលរួមអភិវឌ្ឍសិស្សានុសិស្ស ដើម្បីក្លាយទៅជាបុគ្គលដែលប្រកបដោយសម្បជញ្ញៈ បុគ្គលដែលចេះដោះស្រាយបញ្ហាបានព្រមជាមួយនឹងស្ដង់ដារនៃវិជ្ជាជីវៈ ហើយនឹងក្លាយជាអនាគតអ្នកដឹកនាំតាមជំនាញដែលពួកគេជ្រើសរើស៕

The post តើម្ចាស់សាលាអន្តរជាតិ South Bridge ល្បីថាបង់ថ្លៃសិក្សារាប់ពាន់ ឬម៉ឺនដុល្លារ ក្នុង១ឆ្នាំៗ ជានរណា? appeared first on .

ឥស្សរជនឆ្នើមក្នុងជួររដ្ឋាភិបាលពីរនាក់ ជាប្រទីបបំភ្លឺឲ្យអ្នកឧកញ៉ា ពុង ឃាវសែ សម្រេចចិត្តវិលត្រលប់មកវិនិយោគនៅកម្ពុជា

ឧកញ៉ាកោះក្របី — Mon, 23 Aug 2021 07:10:41 +0000

ជាបុគ្គលមួយរូបដែលមិនចុះចាញ់នឹងការលំបាកក្នុងជីវិត អ្នកឧកញ៉ា ពុង ឃាវសែ ចាប់ផ្តើមមុខរបរទទួលទានដំបូងក្នុងអាជីពជាងមាសតូចតាចជាមួយនឹងតូបទំហំ ២,៥ ម៉ែត្រការ៉េមួយកន្លែងក្នុងទីក្រុងម៉ុងរ៉េអាល់ និងអាជីវកម្មផ្ញើប្រាក់មកកាន់ប្រទេសកម្ពុជា ដោយមានដើមទុនត្រឹមតែ ១០ ម៉ឺនដុល្លារក្នុងមួយឆ្នាំ ខណៈដែលលោកកំពុងរស់នៅជាជនអន្តោប្រវេសន៍នៅប្រទេសកាណាដា។

មានសេចក្តីរាយការណ៍ជាច្រើនឲ្យបានដឹង មុខជំនួញនេះហើយជាអ្វីដែលជំរុញឲ្យលោកសម្រេចចិត្តវិលត្រឡប់មកប្រទេសកម្ពុជាដើម្បីស្វែងយល់បន្ថែមអំពីឱកាសអាជីវកម្មដែលមានសក្តានុពល។ នៅឆ្នាំ ១៩៩១ លោកក៏បានវិលត្រឡប់មកមាតុភូមិវិញ ហើយជួបជាមួយនឹងឪពុកមា របស់លោកដែលជាអតីតទីប្រឹក្សារដ្ឋាភិបាលគឺ លោក ពុង ប៉េងចេង អតីតរដ្ឋមន្រ្តីក្រសួងផែនការគឺ លោក ជា ចាន់តូ ដែលបច្ចុប្បន្នលោកជាទេសាភិបាលធនាគារជាតិនៃកម្ពុជា National Bank of Cambddia។

តាមរយៈជំនួបដ៏វិសេសវិសាលក្រោយបែកគ្នាច្រើនឆ្នាំមកនេះ គឺជាប្រទីបបំភ្លឺឲ្យលោកវិលត្រលប់មកប្រទេសកម្ពុជាដើម្បីចាប់ផ្តើមវិនិយោគលើកទឹកដីជ័យភូមិរបស់ខ្លួនជាអចិន្ត្រៃ។

អ្នកឧកញ៉ាមានប្រសាសន៍ប្រាប់សារព័ត៌មានខ្មែរថែមស៍ថា៖ «តាមរយៈការសន្ទនាជាមួយលោកទាំងនោះ ខ្ញុំមានអារម្មណ៍ថា ពួកលោកមានសេចក្តីស្មោះត្រង់ និងប្តូរផ្តាច់ចំពោះការអភិវឌ្ឍសេដ្ឋកិច្ចជាតិនៅគ្រាលំបាកជាច្រើន។ ដូច្នេះហើយខ្ញុំក៏បានសម្រេចចិត្តត្រលប់មកស្រុកកំណើតរបស់ខ្ញុំវិញ និងធ្វើការវិនិយោគដើម្បីរួមចំណែកទៅដល់ការអភិវឌ្ឍប្រទេសកម្ពុជា»។

នៅឆ្នាំ ១៩៩១ ក្រុមហ៊ុន Canadia Gold & Trust ត្រូវបានបង្កើតឡើងជាផ្លូវការ បន្ទាប់ពីលោកបានជួបឥស្សរជនឆ្នើមក្នុងជួររាជរដ្ឋាភិបាលទាំងពីរ។ ក្រុមហ៊ុនដែលលោកទើបបង្កើតឡើង គឺធ្វើប្រតិបត្តិការអាជីវកម្មចម្បងរបស់ខ្លួនទៅលើសេវាធ្វើមាស ចេញកាក់មាស និងបម្រើសេវាកម្មធនាគារ។ គឺចាប់ពីពេលនោះមកហើយ ដែលអ្នកឧកញ៉ា ពុង ឃាវសែ បានចាប់ផ្តើមកសាងកេរ្តិ៍ឈ្មោះល្បាញល្បីរហូតបានមកដល់សព្វថ្ងៃនេះ និងបង្កើតអាណាចក្រជំនួញប្រាក់វាល់លានដុល្លារជាច្រើននៅក្នុងដៃ។

គិតមកដល់ពេលបច្ចុប្បន្នអ្នកឧកញ៉ា គឺជាធុរៈជនខ្មែរម្នាក់ដែលមានប្រាក់វាល់លានដុល្លារ ឈរឈ្មោះក្នុងបញ្ជីចំណោមមហាសេដ្ឋីគ្រាក់ៗនៅស្រុកខ្មែរ ដែលបានចូលរួមចំណែងយ៉ាងធំធេងជាមួយរាជរដ្ឋាភិបាលសម្តេចតេជោ ហ៊ុន សែន ក្នុងការស្តារនិងអភិវឌ្ឍន៍សេដ្ឋកិច្ចជាតិឲ្យមានកំណើនកើនឡើងជាលំដាប់។

ក្នុងនាមជាពាណិជ្ជករម្នាក់ដែលចាប់ផ្តើមពីចំណុចដ៏តូចមួយកាលរស់នៅជាជនអន្តោប្រវេសន៍ អ្នកឧកញ៉ា ពុង ឃាវសែ បានអំពាវនាវដល់ប្រជាជនកម្ពុជាដទៃទៀតដែលកំពុងរស់នៅឯបរទេសឱ្យមកផ្ទះនិងបម្រើប្រទេសដោយអនុវត្តជំនាញ និងចំណេះដឹងទាំងអស់ដែលពួកគេបានសិក្សាឆ្ពោះទៅរកកិច្ចខិតខំប្រឹងប្រែងដែលអាចធ្វើឱ្យព្រះរាជាណាចក្រកម្ពុជារីកចម្រើនបន្តទៅទៀត៕

The post ឥស្សរជនឆ្នើមក្នុងជួររដ្ឋាភិបាលពីរនាក់ ជាប្រទីបបំភ្លឺឲ្យអ្នកឧកញ៉ា ពុង ឃាវសែ សម្រេចចិត្តវិលត្រលប់មកវិនិយោគនៅកម្ពុជា appeared first on .

ឧកញ៉ាញូស៍ ទម្លាយឲ្យដឹងមុខជំនួញដំបូងអ្នកឧកញ៉ា គិត ម៉េង ទម្រាំមានអាជីវកម្មគ្រាក់ៗមិនក្រោម ៣០នៅក្នុងដៃ

ឧកញ៉ាកោះក្របី — Sat, 21 Aug 2021 09:23:38 +0000

អ្នកឧកញ៉ា គិត ម៉េង បច្ចុប្បន្នកំពុងដឹកនាំសភាពាណិជ្ជកម្មកម្ពុជា និងក្រុមហ៊ុន រ៉ូយ៉ាល់ គ្រុប ដែលគ្រប់គ្រងអាណាចក្រជំនួញប្រមាណជាង ៣០ក្រុមហ៊ុនជាមួយនឹងភាពល្បីល្បាញច្រើនទស្សវត្សរ៍មកហើយ។ លោកគឺជាមនុស្សមានឥទ្ធិពលបំផុតមួយក្នុងចំណោមពាណិជ្ជករគ្រាក់ៗនៅកម្ពុជា ជានិច្ចកាលតែងតែអមដំណើរនាយករដ្ឋមន្រ្តីទៅបំពេញទស្សនៈកិច្ចការទូត កិច្ចប្រជុំអន្តរជាតិនានា ចុះកិច្ចព្រមព្រៀងពាណិជ្ជកម្មជាមួយបណ្តាលប្រទេសដៃគូ និងបំផុសបំផុលគំនិតគៀងគរវិនិយោគិនបរទេសឲ្យមកបណ្តាក់ទុនវិនិយោគនៅប្រទេសកម្ពុជា។

ជឿថា មានមនុស្សមិនតិចនោះទេមានចម្ងល់ចង់ដឹងអាជីវកម្មដំបូងរបស់អ្នកឧកញ៉ា គិត ម៉េង មុនឈានមកដល់ចំណុចកំពូលមហាសេដ្ឋីប្រាក់វ៉ាល់លាន និងមានមុខជំនួញលើសពីសាមសិបនៅក្នុងដៃ។ តើការវិនិយោគលើកដំបូងរបស់លោកត្រូវចំណាយដើមទុនប៉ុន្មាន?

ទាក់ទងនឹងចំណោទបញ្ហាខាងលើ អ្នកឧកញ៉ា គិត ម៉េង បានឲ្យដឹងថា ក្រុមហ៊ុនដំបូងរបស់លោកគឺចាប់ផ្តើមពីអាជីវកម្មតូចតាចមួយកន្លែងដោយផ្តល់អាហារ និងវិទ្យុទាក់ទងទៅកាន់អាជ្ញាធរអ៊ុនតាក់ប្រចាំកម្ពុជា (UNTAC) លោកសង្កត់ធ្ងន់ថា ក៏ព្រោះតែលោកមើលឃើញឪកាសច្រើន ប៉ុន្តែទន្ទឹមនឹងនោះនៅពេលដំណើរការក៏ជួបបញ្ហាមួយចំនួនផងដែរ។

អ្នកឧកញ៉ា គិត ម៉េង មានប្រសាសន៍ថា៖ “តាមពិតទៅ នៅពេលដែលខ្ញុំផ្តើមបង្កើតក្រុមហ៊ុន រ៉ូយ៉ាល់ គ្រុប ដំបូង យើងចាប់ផ្តើមពីកម្រិតតូចតាច ដូចជាការផ្តល់អាហារ និងវិទ្យុទាក់ទងទៅកាន់អាជ្ញាធរបណ្តោះអាសន្នប្រចំាកម្ពុជា(UNTAC)។ បន្ទាប់មកទៀត ខ្ញុំបានឃើញឱកាស និងជួបហានិភ័យខ្លះដែរ (ជាពិសេសនៅពេលដែលខ្ញុំមិនមានអ្វីច្រើន)។ ខ្ញុំក៏ចាប់ផ្តើមនំាចូលម៉ាស៊ីនកូពីកូល័រម៉ាក កាណុងដំបូងបង្អស់មកកាន់ប្រទេសកម្ពុជា”។

អ្នកឧកញ៉ាបន្តថា វាជាការពិតណាស់ដែលជំហានដំបូងតែងតែជាជំហានពិបាកបំផុត។ វាមិនងាយស្រួលនោះទេ ហើយមានការខិតខំជាច្រើនរាប់មិនអស់ដែលត្រូវបានធ្វើ ត្រូវមានការអត់ធ្មត់ជាខ្លាំង និងត្រូវតែមានភាពជឿជាក់លើខ្លួនឯងជានិច្ច។

បើតាមអ្នកឧកញ៉ា ការនាំចូល Canon គឺជាភាពជោគជ័យដំបូងរបស់លោក ហើយតាមរយៈភាពជោគជ័យនោះ លោកអាចសង់ប្រាក់កម្ចីបានភ្លាមៗ ហើយបន្តទៅអាជីវកម្មបន្តបន្ទាប់របស់ខ្ញុំទៅមុខទៀត។

អ្នកឧកញ៉ាបញ្ជាក់ថា៖ “ក្រុមហ៊ុន រ៉ូយ៉ាល់គ្រុប បានចាប់ផ្តើមពីតូចតាច ប៉ុន្តែមានក្តីសុបិន្តធំ ដែលជាក្តីសុបិន្តនៃការធ្វើឱ្យមានភាពខុសប្លែកគ្នាជាវិជ្ជមាននៅក្នុងប្រទេសកម្ពុជា។ ដោយស្ថិរភាព យើងបានទទួលជោគជ័យ ហើយបានរីកចម្រើនទៅជាក្រុមហ៊ុនដែលជួយដល់ ជីវិភាពរបស់ប្រជាជនកម្ពុជារាប់ពាន់នាក់ដោយផ្ទាល់និងច្រើនលាននាក់ទៀតដោយប្រយោល”។

នៅក្រុមហ៊ុន រ៉ូយ៉ាល់គ្រុប យើងក៏គាំទ្រការចាប់ផ្តើមអាជីវកម្មនិងជឿជាក់យ៉ាងមុតមាំចំពោះអនាគតនៃភាពជាសហគ្រិន។ Cambo Ticket និង YouAdMe គឺជាឧទាហរណ៍ពីរក្នុងចំណោមឧទាហរណ៍ជាច្រើននៅក្នុងការវិនិយោគរបស់យើងនៅក្នុងសហគ្រាសធុនតូចនិងមធ្យមនាពេលកន្លងមកនេះ។ ជាមួយនឹងការប្តេជ្ញាចិត្តនិងការតស៊ូ ខ្ញុំជឿជាក់ថាការវិនិយោគណាមួយក៏ដោយក៏នឹងនាំមកនូវផលវិជ្ជមានដែរ។ អ្នកឧកញ៉ាបញ្ជាក់បន្ថែម។

ប្រធានអគ្គនាយកក្រុមហ៊ុន រ៉ូយ៉ាល់គ្រុប បានផ្តល់អនុសាសន៍ថា៖ នៅពេលអ្នកសំរេចចិត្តបោះជំហានដំបូង ចូរគប្បីត្រូវប្រាកដថាអ្នកអនុវត្តជំហាននោះជាមួយការប្តេជ្ញាចិត្ត បោះទន់លើភាពជៀជាក់និងទំនុកចិត្តលើខ្លួនឯងឱ្យបានមោះមុត វាអាចផ្លាស់ប្តូរជីវិតអ្នកដូចជារបៀបដែលវាផ្លាស់ប្តូរជីវិតរបស់ខ្ញុំដែរ។ លោកថា ដូចសុភាសិតមួយដែលលើកឡើងថា “តក់ៗពេញបំពង់” ។

លោកបញ្ជាក់ថា៖ “ចូរដាក់គោលដៅឱ្យខ្ពស់ហើយអោនឱ្យទាបដោយមានការដាក់ខ្លួនជានិច្ច។ វិនិយោគលើទំនុកចិត្តរបស់អ្នកហើយជឿជាក់លើខ្លួនឯងឱ្យបានច្រើន។ ដរាបណាអ្នកដឹងពីសុបិនរបស់អ្នកហើយមានចក្ខុវិស័យ អ្នកអាចក្លាយទៅជា គិត ម៉េង ម្នាក់ទៀតនៅពេលអនាគត”។

The post ឧកញ៉ាញូស៍ ទម្លាយឲ្យដឹងមុខជំនួញដំបូងអ្នកឧកញ៉ា គិត ម៉េង ទម្រាំមានអាជីវកម្មគ្រាក់ៗមិនក្រោម ៣០នៅក្នុងដៃ appeared first on .

មិនក្រោម ១០០លានដុល្លារ អ្នកឧកញ៉ា ចេន ហ្សុី ទិញ យកអគារមជ្ឈមណ្ឌលពាណិជ្ជកម្មធំៗចំនួនពីរ

ឧកញ៉ាកោះក្របី — Thu, 19 Aug 2021 10:41:35 +0000

ឈរជើងក្នុងពិភពជំនួញផ្នែកវិស័យអចលនទ្រព្យជាង ៦ឆ្នាំមកនេះក្រុមហ៊ុន ព្រីនស៍ រៀល អ៊ីស្ទេត គ្រុប បានក្លាយជាក្រុមហ៊ុនគំរូមួយដែលបានបង្កើតឡើងស្របតាមនិន្នាការអភិវឌ្ឍន៍អចលនទ្រព្យនៅកម្ពុជា។ បន្ទាប់ពីការរីកចម្រើនជាបន្តបន្ទាប់ក្រុមហ៊ុនបានបង្កើតឡើងនូវលំនាំអាជីវកម្មចម្រុះមួយ ដោយផ្តោតសំខាន់លើការអភិវឌ្ឍអចលនទ្រព្យ គួបផ្សំនឹងការអភិវឌ្ឍលើវិស័យពាក់ព័ន្ធនានា ដូចជាមជ្ឈមណ្ឌលកម្សាន្ត សណ្ឋាគារ ធនាគារ ផ្សារទំនើប និងភោជនីយដ្ឋានជាដើម។

ការរីកចំរើនយ៉ាងសម្បើមនេះ ត្រូវបានគេមើលឃើញថា ក្រុមហ៊ុនបង្កើតបានជាប្រព័ន្ធឧស្សាហកម្មអចលនទ្រព្យដ៏ពេញលេញមួយ ដែលមានលក្ខណៈជាខ្សែសង្វាក់បិទជិត។ គិតត្រឹមឆ្នាំ២០២១នេះ ក្រុមហ៊ុន ព្រីន រៀល អ៊ីស្ទេត គ្រុប មានក្រុមហ៊ុនបុត្រសម្ព័ន្ធនិងស្ថាប័នសរុបចំនួន ៣០ ព្រមទាំងមានដីបម្រុងសរុបជាង ១២០០ ហិកតា ដែលអាចអភិវឌ្ឍជាផ្ទៃក្រឡាសំណង់សរុបជាង ២០ លានម៉ែត្រការ៉េ និងបានបោះទុនវិនិយោគសរុបជាង ២ ពាន់លានដុល្លារអាមេរិក។

ក្រោមដឹកនាំប្រកបដោយចក្ខុវិស័យវែងឆ្ងាយនិងយូអង្វែងរបស់ពាណិជ្ជករដើមកំណើតចិន អ្នកឧកញ៉ា ចេន ហ្ស៊ី បានបោះទុនវិនិយោគលើគម្រោងធំៗតម្លៃវាល់លានដុល្លារជាច្រើនគម្រោងក្នុងតំបន់ដែលមានសក្តានុពល ខណៈទីតាំងទាំងនោះ គឺជាទីតាំងយុទ្ធសាស្ត្រនៃអភិវឌ្ឍន៍។ ក្រុមហ៊ុនបាននឹងពង្រីកវិសាលភាពអាជីវកម្មរបស់ខ្លួនទៅកាន់ប្រទេសសិង្ហបុរី ថៃ ម៉ាឡេស៊ី និងប្រទេសដទៃទៀត ដើម្បីសម្រេចនូវគោលដៅចូលទីផ្សារហ៊ុននៅហុងកុង សិង្ហបុរី និងកម្ពុជា។ល។ និងក្លាយជាក្រុមហ៊ុនអន្តរជាតិដែលមានឥទ្ធិពលខ្លាំងបំផុតមួយនៅអាស៊ីអាគ្នេយ៍។

បន្ថែមលើការវិនិយោគផ្ទាល់ អ្នកឧកញ៉ា ចេន ហ្ស៊ី បានទិញយកអគារមជ្ឈមណ្ឌលពាណិជ្ជកម្មចំនួន ២ធំៗនៅរាជធានីភ្នំពេញដែលជាបេះដូងប្រទេសកម្ពុជា គឺ អគារព្រីនស៍ ភ្នំពេញ ថៅវើរ និងអគារ ឌាយមិន វ័ន។

អគារព្រីនស៍ ភ្នំពេញ ថៅវើរ

គម្រោងនេះជាអគារការិយាល័យលំដាប់កំពូលនៅភ្នំពេញ មានទីតាំងស្ថិតនៅតាមបណ្តោយមហាវិថីព្រះមុនីវង្ស។ ក្រុមហ៊ុនព្រីនស៍ រៀល អ៊ីស្ទេត គ្រុប បានចំណាយថវិកា ៥០លានដុល្លារអាមេរិក ដើម្បីទិញយកអគារភ្នំពេញថោវើ នៅខែវិច្ឆិការ ឆ្នាំ២០១៧ ហើយបច្ចុប្បន្ននេះត្រូវបានប្តូរឈ្មោះទៅជាអគារ ព្រីនស៍ ភ្នំពេញ ថោវើ។

គម្រោងនេះមានអត្រាប្រើប្រាស់ជាង ៩០% ដែលក្នុងនោះមានក្រុមហ៊ុនល្បីៗលើពិភពលោកជាច្រើន ដូចជា Hyundai, Samsung Electronics, Schneider Electric និងក្រុមហ៊ុនអាកាសចរណ៍ម៉ាឡេស៊ី។ល។

អគារ ឌាយមិន វ័ន

កោះពេជ្រស្ថិតនៅតំបន់ទន្លេចតុមុខ ដែលជាចំណុចប្រសព្វនៃទន្លេមេគង្គលើ ទន្លេមេគង្គក្រោម ទន្លេសាប និងទន្លេបាសាក់ និងជាតំបន់ស្នូលនៃរាជធានីភ្នំពេញ។ ឌាយមិន វ័ន ស្ថិតក្នុងតំបន់ជាមួយរដ្ឋសភា ក្រសួងការបរទេសនិងសហប្រតិបត្តិការអន្តរជាតិ ណាហ្គាវើលដ៍ ក្រសួងបរិស្ថាន ស្ថានទូតអូស្ត្រាលី និងមជ្ឈមណ្ឌលសន្និបាតនិងពិពណ៌កោះពេជ្រ។

ឌាយមិន វ័ន មានផ្ទះល្វែង ៤៣ ល្វែង និងអគារស្នាក់នៅរួម ១ខ្នង ដែលមានការរចនាប្រណីត និងស្រស់ស្អាតបំផុត ដែលផ្តល់ជូននូវលំនៅឋានប្រកបដោយសុវត្ថិភាព ផាសុកភាព និងភាពថ្លៃថ្នូរ៕

The post មិនក្រោម ១០០លានដុល្លារ អ្នកឧកញ៉ា ចេន ហ្សុី ទិញ យកអគារមជ្ឈមណ្ឌលពាណិជ្ជកម្មធំៗចំនួនពីរ appeared first on .

ចង់បើកក្រុមហ៊ុនមួយ ត្រូវយល់ពីរបៀបដាក់ឈ្មោះទាំងនេះនៅក្រសួងពាណិជ្ជកម្មជាមុនសិន

អ្នកឧកញ៉ាវត្តភ្នំ — Sat, 14 Aug 2021 00:10:51 +0000

កាលពីថ្ងៃទី ១២ ខែសីហា ឆ្នាំ ២០២១ ក្រសួងពាណិជ្ជកម្ម បានដាក់ចេញនូវសេចក្តីប្រកាសមួយ ស្តីពីការដាក់ពាក្យសម្គាល់ទ្រង់ទ្រាយក្រុមហ៊ុន ក្នុងការកំណត់ដោយពាក្យសម្គាល់ទ្រង់ទ្រាយនៅខាងចុង ឬខាងក្រោមនាមករណ៍របស់ក្រុមហ៊ុន ដោយប្រើពាក្យពេញ ឬជាអក្សរកាត់បាន ។ ការបញ្ជាក់យ៉ាងលម្អិតពីបែបបទរដ្ឋបាលនៃរបៀបដាក់ឈ្មោះរបស់ក្រសួងជាថ្មីម្ដងទៀតនេះ ពិតជាមានសារៈសំខាន់ខ្លាំង ដល់ម្ចាស់សហគ្រាស និងម្ចាស់អាជីវកម្មទាំងឡាយ អាចស្វែងយល់ទុកជាមុន។

ក្រសួង បានបញ្ជាក់ថា នាមករណ៍របស់ក្រុមហ៊ុនឯកជន ទទួលខុសត្រូវមានកម្រិត ត្រូវដាក់ពាក្យសម្គាល់ទ្រង់ទ្រាយដោយពាក់ពេញលេញលេញថា ” ក្រុមហ៊ុនឯកជនទទួលខុសត្រូវមានកម្រិត” ឬអក្សរកាត់ថា ” ឯ.ក” នៅខាងចុង ឬខាងក្រោមនាមករណ៍របស់ក្រុមហ៊ុន ។

នាមករណ៍របស់ក្រុមហ៊ុនមហាជនទទួលខុសត្រូវមានកម្រិត ត្រូវដាក់ពាក្យសម្គាល់ទ្រង់ទ្រាយដោយពាក្យពេញលេញថា ” ក្រុមហ៊ុនមហាជនទទួលខុសត្រូវមានកម្រិត ” ឬជាអក្សរកាត់ថា “ម.ក” នៅខាងចុង ទខាងក្រោមនាមករណ៍របស់ក្រុមហ៊ុន ។ សហគ្រាសឯកបុគ្គលត្រូវដាក់នូវពាក្យថា ” សហគ្រាសឯកបុគ្គល “នៅពីមុខនាមករណ៍នោះ ។ នាមករណ៍របស់សាខាក្រុមហ៊ុនក្នុងស្រុក គឺជានាមករណ៍របស់ក្រុមហ៊ុនដើម។ នៅពីលើ ទនៅពីមុខនាមករណ៍របស់សាខានោះត្រូវសរសេរពាក្យ ” សាខាក្រុមហ៊ុនក្នុងស្រុក ” ។

នាមករណ៍របស់សាខាក្រុមហ៊ុនបរទេស គឺជានាមករណ៍របស់ក្រុមហ៊ុនដើម។ នៅពីលើ ឬនៅពីមុខនាមករណ៍របស់សាខានោះត្រូវសរសេរពាក្យ ” សាខាក្រុមហ៊ុនបរទេស” ។ នាមករណ៍របស់ការិយាល័យតំណាងពាណិជ្ជកម្ម ការិយាល័យទំនាក់ទំនងពាណិជ្ជកម្ម ជានាមករណ៍របស់ក្រុមហ៊ុនដើមនៅបរទេស។ នៅពីលើ ឬនៅពីមុខនាមករណ៍នេះ ត្រូវសរសេរពាក្យ ” ការិយាល័យតំណាងពាណិជ្ជកម្មបរទេស ឬការិយាល័យទំនាក់ទំនងពាណិជ្ជកម្មបរទេស ។

នាមករណ៍របស់ក្រុមហ៊ុនសហកម្មសិទ្ធិទូទៅ ត្រូវដាក់ពាក្យសម្គាល់ទ្រង់ទ្រាយដោយពាក្យពេញលេញថា ” ក្រុមហ៊នសហកម្មសិទ្ធិទូទៅ” ឬអក្សរកាត់ថា “ស.ទ” នៅខាងចុង ទខាងក្រោមនាមករណ៍របស់ក្រុមហ៊ុន ។ នាមករណ៍របស់ក្រុមហ៊ុនសហកម្មសិទ្ធិមានកម្រិត ត្រូវដាក់ពាក្យសម្គាល់ទ្រង់ទ្រាយដោយពាក្យពេញលេញថា ” ក្រុមហ៊ុនសហកម្មសិទ្ធិមានកម្រិត ” ឬពាក្យកាត់ថា “ស.ក” នៅខាងចុង ឬនៅខាងក្រោមនាមករណ៍របស់ក្រហ៊ុន។

ក្រុមហ៊នឯកជនទទួលខុសត្រូវមានកម្រិត និងក្រុមហ៊ុមមហាជនទទួលខុសត្រូវមានកម្រិតដែលអនុញ្ញាតឲ្យប្រើពាក្យ ហូលឌីង (HOLDING) ឬគ្រុប (GROUP) នៅបន្ទាប់ពីឈ្មោះក្រុមហ៊ុន ត្រូវបំពេញលក្ខខណ្ឌដូចខាងក្រោម ៖

១. នាមករណ៍ក្រុមហ៊ុនដែលប្រើពាក្យ ហូលឌីង (HOLDING) ត្រូវមានក្រុមហ៊ុនជាបុត្រសម្ព័ន្ធយ៉ាងតិច ៣ ក្រុមហ៊ុន ដែលបានចុះបញ្ជីក្នុងព្រះរាជាណាចក្រកម្ពុជា ចំណុចមួយទៀត ក្រុមហ៊ុនដើម ជាក្រុមហ៊ុនដែលត្រូវមានកម្មវត្ថុអាជីវកម្មលេខ ៦៤២ (សកម្មភាពរបស់ក្រុមហ៊ុនភាគហ៊ុន) និងផ្តល់ទុនទៅឲ្យក្រុមហ៊ុនជាបុត្រសម្ព័ន្ធដើម្បីធ្វើពាណិជ្ជកម្ម។ ក្រុមហ៊ុនដើម មិនអាចធ្វើសកម្មភាពពាណិជ្ជកម្មដោយផ្តាល់បានឡើយ ។

២. នាមករណ៍ក្រុមហ៊នដែលប្រើពាក្យគ្រុប (GROUP) ត្រូវមានក្រុមហ៊ុនជាបុត្រសម្ព័ន្ធយ៉ាងតិច ៣ ក្រុមហ៊ុនដែលបានចុះបញ្ជីក្នុងព្រះរាជាណាចក្រកម្ពុជា ។ ក្រុមហ៊ុនដើម ត្រូវកាន់កាប់ដោយភាគហ៊ុនដែលមានសិទ្ធិបោះឆ្នោតយ៉ាងតិច ៥១ ភាគរយ នៅក្នុងក្រុមហ៊ុនជាបុត្រសម្ព័ន្ធនីមួយៗ ៕

The post ចង់បើកក្រុមហ៊ុនមួយ ត្រូវយល់ពីរបៀបដាក់ឈ្មោះទាំងនេះនៅក្រសួងពាណិជ្ជកម្មជាមុនសិន appeared first on .

ចេញរកស៊ីបរាជ័យបិទអាជីវកម្មចំនួនពីរ លោក ជា សំអាន តស៊ូមិនបោះបង់គោលដៅរហូតប្រែក្លាយជាម្ចាស់ក្រុមហ៊ុនតម្លៃខ្ទង់លានដុល្លារ

ឧកញ៉ាកោះក្របី — Mon, 09 Aug 2021 05:46:42 +0000

ជឿថា មានប្រិយមិត្តកំពុងប្រឡូកក្នុងវិស័យអចលនទ្រព្យភាគច្រើនបានស្គាល់លោក ជា សំអាន ដែលមនុស្សភាគច្រើនលោកថា Spy ជាប្រធានក្រុមប្រឹក្សាភិបាលក្រុមហ៊ុន ហ្គោល 7D ប្រផឹធី ឯ.ក ដែលវិនិយោគលើអចលនទ្រព្យមានភាពលេចធ្លោមួយរូបនៅក្នុងស្រុកខ្មែរ។ ប៉ុន្តែនៅពីក្រោយភាពជោគជ័យអស្ចារ្យរបស់លោកដែលតស៊ូបង្កើតក្រុមហ៊ុនដោយខ្លួនឯង មិនមានមនុស្សច្រើនប៉ុន្មានទេបានស្គាល់ ដែលជាសហគ្រិនដ៏ប៉ិនប្រសព្វក្នុងការដឹកនាំគ្រប់គ្រងប្រកបដោយចក្ខុវិស័យវែងឆ្ងាញក្នុងការធ្វើជំនួញ។

ជាកូនកសិកររស់នៅភូមិសំឡីខាងជើង ឃុំសំឡី ស្រុកកំពង់រោទ៍ ខេត្តស្វាយរៀង មានឪពុកឈ្មោះ អ៊ុក សំអាត ម្តាយឈ្មោះ ទុំ ណាវី លោក ជា សំអាន ជាកូនច្បងគេក្នុងចំណោមបងប្អូន៣នាក់។ ក្នុងឆ្នាំ១៩៩៧ លោកបានចាកចេញពីស្រុកកំណើតមករស់នៅ និងបន្តការសិក្សានៅរាជធានីភ្នំពេញដោយរស់នៅជាមួយអ៊ុំ ឈ្មោះ ទុំ សារី។ ដោយហេតុស្រឡាញ់ការសិក្សាខំប្រឹងក្លៀវក្លារៀនផង យុវជនអ្នកខេត្តស្វារៀងរូបនេះ បានរំលឹកថា “ខ្ញុំបានជំនះរាល់ឧបសគ្គកាលមករស់នៅភ្នំពេញ ដោយពេលខ្លះខ្ញុំឆ្លៀតពេលរៀនផង និងជួយលក់បបរបាញ់កាញ់ជាមួយអ៊ុំនៅផ្សារចាស់ជារៀងរាល់ថ្ងៃ”។

ថ្លែងប្រាប់គេហទំព័រឧកញ៉ាញូស៍ លោក ជា សំអាន ហៅ Spy ថា “នៅឆ្នាំ២០០៦ ខ្ញុំបានចូលធ្វើការជាអ្នកនាំសិស្សចូលរៀននៅសាលាឯកជនមួយកន្លែង នៅជាប់នឹងរង្វង់មូលនាងគង្ហីង ពេលនោះទទួលបានប្រាក់ខែត្រឹមតែ ១៥$ក្នុងមួយខែប៉ុណ្ណោះ ខណៈដែលនេះជាចំនួនប្រាក់ខែដំបូងក្នុងជីវិត ក្រោយចេញធ្វើការស្វែងរកលុយជួយទំនុកបំរុងជូនគ្រួសារ”។

ធ្វើការជាមួយប្រាក់ខែ ១៥$ក្នុងមួយខែបានមួយរយៈ នៅឆ្នាំ២០០៧ ដល់ ២០១០ លោក Spy ក៏បានធ្វើការឲ្យក្រុមហ៊ុន ផលិតផលអាហាររួបបឋម ដោយទទួលប្រាក់ជាភាគរយ បានន័យថា បើយើងខំប្រឹងលក់ដាច់ឲ្យបានច្រើន យើងទទួលបានផលិតកម្រៃភាគរយច្រើនទៅតាមចំនួនផលិតផល។

ជីវិតជាអ្នកធ្វើការស៊ីប្រាក់ខែបានត្រឹមតែធ្វើឲ្យលោក Spy ដោះស្រាយបានមួយពេលៗប៉ុណ្ណោះ ដោយចិញ្ចឹមចិត្តធ្វើជាថៅកែខ្លួនឯង លោកក៏សម្រេចចិត្តបង្កើតទំព័រជីវិតថ្មីរបស់ខ្លួនដោយសារការខិតខំប្រឹងប្រែងរៀនសូត្រ និងតស៊ូគ្រប់ស្ថានភាពលំបាកមិនរុញរា គឺក្នុងឆ្នាំ២០១១ ដល់ ២០១៣ លោកចាប់ផ្តើមបង្កើតអាជីវកម្មដោយខ្លួនឯងតែម្តង។

អាជីវកម្មដំបូងដែលផ្តើមចេញពីក្តីស្រឡាញ់មិនមានទីបញ្ចប់នោះ គឺមានឈ្មោះថា ក្រុមហ៊ុន ONETEAM INTERNATIONAL.,Ltd ជាការបង្កើតរួមគ្នា ដោយនាំចូល និង ចែកចាយ ផលិតផលអារហាររួបបឋម។ ជំហានបន្ទាប់ លោកសម្រេចបើកមជ្ឈមណ្ឌលបណ្តុះបណ្តាល ហៅកាត់ថា (SES) ឡើងក្នុង២០១២។ ហើយលោកក៏ជាថ្នាក់ដឹកនាំដ៏ឆ្នើមម្នាក់ដែលទទួលគ្រប់គ្រង និងជាអ្នកជួយជ្រុុមជ្រែងនាំមកនូវភាពជោគជ័យឲ្យក្រុមហ៊ុន។

ជាអកុសលនៅអំឡុងឆ្នាំ២០១២ ឆ្នាំ២០១៤ អាជីវកម្មចេះតែជួបបញ្ហាមិនចេះចប់មិនចេះហើយ លោកថា យើងឡុងចុងខាតអស់គូទខោ គឺបាត់បង់លុយទាំងស្រុងដោយតែម្តង មិនតែប៉ុណ្ណោក្រៅពីរកស៊ីខាតហើយត្រូវគេបោកទៀត។ លោកនិយាយថា នៅក្នុងអំឡុងពេលហ្នឹងគឺជាពេលវេលាអាក្រក់បំផុតក្នុងការរកស៊ីរបស់ខ្ញុំ។

ក្រោយជួបឧបសគ្គផ្ទួនៗក្នុងមុខជំនួញ ដែលជាហេតុបណ្តាលឲ្យអត់មានដើមទុនបន្តអាជីវកម្ម លោក Spy ក៏សម្រេចចិត្តបិទទ្វារក្រុមហ៊ុនទាំងពីរខាងលើ។

នៅប៉ុន្មានឆ្នាំចុងក្រោយនេះ វិស័យអចលនទ្រព្យនៅប្រទេសកម្ពុជា បាននឹងកំពុងរីកចំរើនយ៉ាងខ្លាំង ទាំងវិស័យដីធ្លី គម្រោងអភិវឌ្ឍន៍លំនៅដ្ឋាន ពាណិជ្ជកម្ម និងគម្រោងអភិវឌ្ឍន៍ចម្រុះជាដើម។ ទឡ្ហីករណ៍នេះបានជំរុញលើកទឹកចិត្តឲ្យ លោក Spy ហក់មកប្រឡូកក្នុងវិស័យអចលនទ្រព្យដោយធ្វើជាអ្នកទីផ្សារនៃគម្រោងដីឡូតិ៍ រហូតអាចបង្កើតក្រុមហ៊ុនថ្មីមួយទៀត គឺក្រុមហ៊ុន ហ្គោល 7D ប្រផឹធី ឯ.ក ដែលធ្វើការប្រឹក្សាយោបល់អចលនទ្រព្យនៅកម្ពុជា។

ឧកញ៉ាញូស៍ បានសួរថា ពេលចេញបើកក្រុមហ៊ុនខ្លួនឯង និងនៅកាលធ្វើការឲ្យគេខុសគ្នាដូចម្តេច? លោក Spy ឆ្លើយតបយ៉ាងខ្លីតែខ្លឹមថា ” ការដែលបើកក្រុមហ៊ុនខ្លួនឯង គឺ (ខុសត្រង់ភាពជាម្ចាស់) ព្រោះពីមុនយើងមិនមែនជាម្ចាស់ ឥឡូវក្លាយជាម្ចាស់ និងការទទួលខុសត្រូវ មានន័យថា ទោះបីយើងធ្វើការងារឲ្យគេក៏ដោយ គឺត្រូវមានការទទួលខុសត្រូវ ចំណែកធ្វើការក្រុមហ៊ុនខ្លួនឯងក៏រិតតែមានទទួលខុសត្រូវខ្ពស់ទៀត អ្វីដែលសំខាន់គឺយើងប្រកាន់គោលការណ៍ទទួលខុសត្រូវ ទៅដល់កន្លែងណាក៏នៅតែទទួលខុសត្រូវដែរ និយាយជារួម គឺគ្មានកិច្ចការណាដែលស្រួលៗនោះទេ”។

ជាមួយគ្នានេះ លោកក៏បានផ្ញើសារជូនយុវជនជំនាន់ក្រោយឲ្យដើរលើផ្លូវត្រូវ ដោយចាប់ផ្តើមពីការស្រលាញ់អ្វីដែលខ្លួនធ្វើនោះឲ្យបាន ១០០% និងកុំបោះបង់ ហើយត្រូវចាំ “បទពិសោធន៍ជារឿងសំខាន់បំផុត សម្រាប់វិថីឆ្ពោះទៅរកភាពជោគជ័យ”៕

The post ចេញរកស៊ីបរាជ័យបិទអាជីវកម្មចំនួនពីរ លោក ជា សំអាន តស៊ូមិនបោះបង់គោលដៅរហូតប្រែក្លាយជាម្ចាស់ក្រុមហ៊ុនតម្លៃខ្ទង់លានដុល្លារ appeared first on .

តើមហាសេដ្ឋីលំដាប់កំពូល ពុង ឃាវសែ គ្រប់គ្រងអាណាចក្រជំនួញប្រាក់លានប៉ុន្មាននៅក្នុងដៃ?

ឧកញ៉ាកោះក្របី — Mon, 09 Aug 2021 01:28:49 +0000

នៅប៉ុន្មានទស្សវត្សរ៍ចុងក្រោយនេះ កេរ្តិ៍ឈ្មោះរបស់អ្នកឧកញ៉ា ពុង ឃាវសែ ហាក់បីដូចជាមិនមានការស្រុតចុះសោះឡើយ ពីមួយឆ្នាំទៅមួយឆ្នាំ កាន់តែល្បីល្បាញរន្ទឺឡើងៗ តាមរយៈការអភិវឌ្ឍន៍គម្រោងវិនិយោគតម្លៃវ៉ាល់លានដុល្លារអាមេរិកជាច្រើននៅក្នុងប្រទេសកម្ពុជា និងបណ្តាលប្រទេសមួយចំនួននៅក្នុងតំបន់អាស៊ី។

គេហទំព័រឧកញ៉ាញូស៍ បានជួបពិភាក្សាជាមួយពាណិជ្ជករខ្មែរ និងបរទេសជាច្រើននាក់នាពេលកន្លងទៅ ដោយពួកគាត់បានលើកឡើងដូចៗគ្នាថា អ្នកឧកញ៉ា ពុង ឃាវសែ គឺជាពាណិជ្ជករខ្មែរដ៏គំរូម្នាក់ ដែលមានឥទ្ធិពលរឹងមាំបំផុតអស់រយៈពេលជាច្រើនទសវត្សរ៍មកហើយ ជាមួយនឹងភាពលេចធ្លោជាងគេក្នុងចំណោមពាណិជ្ជករគ្រាក់ៗក្នុងពិភពជំនួញនៅប្រទេសកម្ពុជា។

អ្នកឧកញ៉ា ពុង ឃាវសែ ជាប្រធានក្រុមប្រឹក្សាភិបាលនៃធនាគារកាណាឌីយ៉ា, ធនាគារប្រៃសណីយ៍កម្ពុជា, ក្រុមហ៊ុនវិនិយោគទុនអាណិកជនកម្ពុជា OCIC, និងជាអ្នកដឹកនាំធុរកិច្ចគួរឱ្យគោរពនៅប្រទេសកម្ពុជានិងប្រទេសកាណាដា។ លោកធ្លាប់បម្រើការជាប្រធានក្រុមប្រឹក្សាភិបាល, ប្រធាន, នាយកប្រតិបត្តិ និងជាសមាជិកក្រុមប្រឹក្សាភិបាលរបស់ក្រុមហ៊ុនមួយចំនួន ដូចជា៖ក្រុមហ៊ុនផ្គត់ផ្គង់នាវា និង Oriental Commercial Inc ជាដើម។

តើអ្នកឧកញ៉ា ពុង ឃាវសែ មានប្រវត្តិយ៉ាងណា? កំពុងក្តោបក្តាប់ជំនួញប្រាក់លានប៉ុន្មាននៅក្នុងដៃ? សូមតាមដានជាមួយឧកញ៉ាញូស៍ ដូចតទៅ៖

ជីវិតរស់នៅក្នុងរបបខ្មៅងងឹតស្រអាប់ស្ទើរតែរកពន្លឺគ្មាននៃផ្សែងសង្គ្រាមខ្មែរក្រហមក្នុងឆ្នាំ ១៩៧៥ ដល់ឆ្នាំ ១៩៧៩ លោក ពុង ឃាវសែ មានជីវិតហាក់មិនខុសពីប្រជាពលរដ្ឋខ្មែររាប់លាននាក់ផ្សេងទៀតឡើយ ខណៈដែលមានការប្រហារជីវិតធ្វើទារុណកម្មដោយការបង្អត់បាយ ជាពិសេសបង្ខំអោយធ្វើការងារខ្លាំងហួសកម្លាំងព្រមទាំងមិនមានអាហារគ្រប់គ្រាន់សម្រាប់បរិភោគទៀតផង។

ជីវិតមានតម្លៃថ្លៃ និងមានសំណាងខ្ពស់ លោក ពុង ឃាវសែ ក៏បានរួចផុតពីរបបក្រហមខ្មែរ ដោយបានទៅរស់នៅជំរំជនភៀសខ្លួននៅប្រទេសថៃ។ ក្នុងឆ្នាំ ១៩៨០ លោកបានចាកចេញពីជំរំទៅកាន់ប្រទេសកាណាដា ក្រោមជំនួយពីការិយាល័យអន្តោប្រវេសន៍នៃប្រទេសនេះ។ ទៅដល់ប្រទេសកាណាដា លោកទទួលបានការងារជាបុគ្គលិកផ្នែកលក់នៅទីក្រុងម៉ុងរ៉េអាល់ ប៉ុន្តែលោកធ្វើបានត្រឹមតែរយៈពេល ៨ខែប៉ុណ្ណោះ ដោយសារតែអាជីវកម្មជួបបញ្ហាហិរញ្ញវត្ថុ លោកក៏អត់ការងារធ្វើវិញ។

ជីវិតធ្លាប់ស្គាល់ភាពលំបាកស្ទើរអស់ជីវិតក្នុងភ្លើងសង្គ្រាម បានបង្រៀនលោកឲ្យចេះតស៊ូននាលមិនចុះចាញ់រាល់ឧបសគ្គរាប់ម៉ឺនជំពូក បន្តជំរុញលើកទឹកចិត្តលោកសម្រេចចិត្តយកប្រាក់សន្សំទាំងអស់ដែលទទួលបានពីការងារដំបូងទៅចាប់ផ្តើមអាជីពថ្មី គឺជាងមាសតូចតាចមួយរូប ដោយចាប់ផ្តើមឡើងជាមួយនឹងតូបទំហំ ២,៥ ម៉ែត្រការ៉េមួយកន្លែង ដែលស្ថិតក្នុងហាងលក់គ្រឿងទេសមួយនៅសង្កាត់ទីក្រុងចិន នៃទីក្រុងម៉ុងរ៉េអាល់។ នេះបើតាមអ្នកឧកញ៉ាបានប្រាប់សារព័ត៌មាន Khmertime ពេលកន្លងមក។

លោកបានថ្លែងថា ក្នុងរយៈពេលតែ ៦ ឆ្នាំប៉ុណ្ណោះ អាជីវកម្មរបស់លោកបានរីកដុះដាល ហើយបានផ្លាស់ប្តូរទីតាំងដោយជោគជ័យទៅកាន់ហាងមួយដែលមានទំហំជាងតូបចាស់របស់លោក ៤ ដង។ លោកមិនបានដឹងទាល់តែសោះថា នេះគឺជាជោគជ័យដំបូងក្នុងចំណោមជោគជ័យជាច្រើនទៀតដែលលោកនឹងសម្រេចបាន។

បន្ទាប់ពីទទួលបាននូវភាពជោគជ័យលើមុខរបបដំបូងក្នុងជីវិត នៅឆ្នាំ ១៩៨៨ លោកបានបោះជំហានចូលទៅកាន់វិស័យផ្ទេរប្រាក់ ខណៈដែលលោកមិនសូវមានការយល់ដឹងពីវាទាល់តែសោះ ប៉ុន្តែលោកបានសំឡឹងមើលឃើញឪកាសវិនិយោគ នៅពេលដែលប្រជាជនកម្ពុជាឯនាយសមុទ្រចាប់ផ្តើមផ្ញើប្រាក់ទៅបងប្អូនឪពុកម្តាយដែលនៅប្រទេសកម្ពុជា។ នៅពេលចាប់ផ្តើមដំបូងលោកមានប្រាក់ផ្ញើត្រឹមតែ ១០ ម៉ឺនដុល្លារប៉ុណ្ណោះក្នុងមួយឆ្នាំ។ ពីរឆ្នាំក្រោយមក (១៩៩០) មូលនិធិផ្ទេរប្រាក់បានកើនឡើងដល់ជាង ២ លានដុល្លារក្នុងមួយឆ្នាំ។

អាជីវកម្មចេះតែរីកចម្រើនឡើងៗឥតឈប់ឈរនៅប្រទេសកាណាដា ជាហេតុជំរុញចិត្តលោក ពុង ឃាវសែ មានបំណងចង់មកវិនិយោគនៅប្រទេសកម្ពុជា ដើម្បីជំរុញកំណើនសេដ្ឋកិច្ចរបស់ប្រទេសខ្លួន។ ក្នុងឆ្នាំ១៩៩១ លោកបានវិលត្រឡប់មកប្រទេសកម្ពុជាដើម្បីស្វែងយល់បន្ថែមអំពីឱកាសវិនិយោគដែលមានសក្តានុពល ដោយលោកបានស្វះស្វែងធ្វើការវិនិយោគជាមួយសហគ្រិនខ្មែរនិងបរទេស។ ស្របជាមួយគ្នានោះ លោកត្រូវបានផ្តល់អាជ្ញាប័ណឲ្យបើកដំណើរការក្រុមហ៊ុន Canadia Gold & Trust ជាការបណ្តាក់ទុនបង្កើតរួមគ្នាជាមួយ នឹងធនាគារជាតិនៃកម្ពុជា ដើម្បីផ្តល់សេវាធ្វើមាស ចេញកាក់មាស និងបម្រើសេវាកម្មធនាគារ។

តាមរយៈសកម្មភាពវិនិយោគដ៏មហិមារលើក្រុមហ៊ុន Canadia Good & Trust ពេលនោះមកហើយ ដែលអ្នកឧកញ៉ា ពុង ឃាវសែ បានចាប់ផ្តើមកសាងកេរ្តិ៍ឈ្មោះល្បាញល្បីរហូតបានមកដល់សព្វថ្ងៃបង្កើតអាណាចក្រជំនួញវ៉ាល់លានជាច្រើននៅក្នុងដៃ។

ទន្ទឹមនឹងនេះ អ្នកឧកញ៉ា ពុង ឃាវសែ បានវិនិយោគស្ទើរតែគ្រប់វិស័យនៅកម្ពុជា អ្វីដែលមានភាពលេចធ្លោជាងគេ គឺការវិនិយោគនៅក្នុងវិស័យធនាគារ ហិរញ្ញវត្ថុ និង សំណង់អចលនទ្រព្យ។ លើសពីនេះលោកក៏វិនិយោគទៅលើក្រុមហ៊ុនធានារ៉ាប់រងអាយុជីវិត សុវណ្ណភូមិ និងក្រុមហ៊ុនធានារ៉ាប់រងទូទៅ Cambodia-Vietnam Insurance Plc.។ មិនតែប៉ុណ្ណោះ លោកបានបន្តវិនិយោគសួនឧស្សាហកម្មកាណាឌីយ៉ា ដែលក្រោបដណ្តាប់ទៅដោយរោងចក្រកាត់ដេរសម្លៀកបំពាក់ ផ្សារ ឃ្លាំងស្តុកទំនិញ ជាច្រើនផ្សេងទៀត។

សកម្មភាពក្នុងការវិនិយោគដ៏ល្បីល្បាញនៅប៉ុន្មានឆ្នាំចុងក្រោយនេះ អ្នកឧកញ៉ាតាមរយៈក្រុមហ៊ុន OCIC បានសាងសង់ស្ពានព្រះមុនីវង្ស ស្ពានអាកាស ផ្លូវថ្នល់ នឹងទទួលបានសិទ្ធិអភិវឌ្ឍន៍គម្រោងអភិវឌ្ឍន៍ទីក្រុងរណបចំនួនពីរនៅក្នុងទីក្រុងភ្នំពេញ ដែលបោះទុនរាប់ពាន់លានដុល្លារអាមេរិករួមមាន៖

ទី១ ទីក្រុងរណបកោះពេជ្រ៖ ជាមជ្ឈមណ្ឌលពាណិជ្ជកម្ម ទេសចរណ៍ ដ៏ទាក់ទាញបំផុតសម្រាប់រាជធានីភ្នំពេញ ជាទីកន្លែងបណ្តុំទៅដោយអគារពាណិជ្ជកម្មធំៗ ខ្ពស់ៗ ដូចជា អគារស្នាក់នៅរួម ខុនដូ ផ្សារទំនើប សណ្ឋាគារ ដែលភាគច្រើនវិនិយោគដោយពាណិជ្ជករជនជាតិចិន ដែលមានតម្លៃរាប់ពាន់លានដុល្លារអាមេរិក។

ទី២ ទីក្រុងរណបជ្រោយចង្វារ៖ ដែលគ្រប់គ្នាស្គាល់ថា ទីក្រុងនៃអនាគត វិនិយោគដោយក្រុមហ៊ុនវិនិយោគទុនអាណិកជនកម្ពុជា OCIC ក្រោមទុនប្រមាណ ១៦០០លានដុល្លារអាមេរិក កំពុងដំណើរការទៅមុខយ៉ាងរលូន ក្នុងគម្រោងប្លង់មេ និងមានការសាងសង់អគារពាណិជ្ជកម្មធំៗ ផ្សារទំនើប លំនៅដ្ឋានប្រណីតៗ អគារស្នាក់នៅរួម និងកន្លែងកម្សាន្តផ្សេងៗទៀត។

ការខិតខំប្រឹងប្រែងរបស់អ្នកឧកញ៉ា ពុង ឃាវសែ មិនបានឈប់នៅទីនោះទេ ដោយបានបោះទុនវិនិយោគរាប់ពាន់លានដុល្លារអាមេរិកបន្ថែមទៀត ទៅលើគម្រោងបុរីលំនៅដ្ឋាន និងអគារពាណិជ្ជកម្មធំៗ ជាច្រើនដូចជា៖ មជ្ឈមណ្ឌលវប្បធម៌ភ្នំពេញ ភូមិវប្បធម៌កម្ពុជា សណ្ឋាគារឯករាជ្យក្រុងព្រះសីហនុ បុរីទន្លេបាសាក់ បុរីចម្ការមន បុរីវរជន អូឡាំព្យាស៊ីធី នៅជុំវិញស្តាតអូឡាំពិក សាន់វ៉េ ស៊ីធី ទួលគោក លំនៅឋានជាច្រើននៅជុំវិញផ្សារទំនើបរតនាផ្លាហ្សា និងទល់មុខព្រលានយន្តហោះអន្តរជាតិភ្នំពេញ អគារផ្សារទំនើបសូរិយា សុវណ្ណា អគារខុនដូរ… និងបុរីលំនៅឋាន នៅតាមបណ្តាខេត្តមួយចំនួន ដូចជា សៀមរាប បាត់ដំបង និងខេត្តព្រះសីហនុ ។ល។។

ប្រិយមិត្តគ្រប់គ្នាប្រាកដជាបានដឹងជ្រាបច្បាស់អំពីគម្រោងអភិវឌ្ឍន៍សាងសង់ព្រលានយន្តហោះអន្តរជាតិភ្នំពេញថ្មី ដែលមានទីតាំងស្ថិតនៅក្នុងស្រុកកណ្ដាល ស្ទឹង និងខេត្តតាកែវត្រូវបានវិនិយោគទឹកប្រាក់វ៉ាល់លានដុល្លាររបស់អ្នកឧកញ៉ា ពុង ឃាវសែ អគ្គនាយកក្រុមហ៊ុន OCIC។

គម្រោងធំមហិមារនេះត្រូវបានអ្នកឧកញ៉ា ចាត់ថាជា “ស្នាដៃជាប្រវត្តិសាស្ត្រ” ដែលត្រូវបានរាជរដ្ឋាភិបាលកម្ពុជាផ្តល់សិទ្ធិសាងសង់និងប្រតិបត្តិការនៃគម្រោងអាកាសយានដ្ឋានអន្តរជាតិភ្នំពេញថ្មី គ្រោងវិនិយោគក្នុងទឹកប្រាក់ប្រមាណ១,៥០០លានដុល្លារ ក្នុងនោះទឹកប្រាក់១,១០០លានដុល្លារជាកម្ចីពីធនាគារបរទេស និង ២៨០លានដុល្លារទៀតជារបស់ក្រុមហ៊ុន CAIC របស់អ្នកឧកញ៉ា ពុង ខៀវសែ ហើយដើមទុនចុះបញ្ជីមានរហូតដល់១២០លានដុល្លារអាមេរិក។

បន្ថែមពីនេះ គម្រោងទទួលបានការចាប់អារម្មណ៍ខ្លាំងពីអ្នកវិនិយោគិនក្នុងស្រុក និងបរទេសនោះ គឺគម្រោងអភិវឌ្ឍន៍ទីក្រុងរណបកោះនរាតម្លៃប្រមាណ ២,៥ ពាន់លានដុល្លារអាមេរិក ដែលអភិវឌ្ឍលើទំហំដីប្រមាណ ១២៥ហិកតា ដោយតំបន់នេះ នឹងអភិវឌ្ឍជាតំបន់ពាណិជ្ជកម្មខ្នាតធំ ខ្នាតមធ្យម និងខ្នាតតូច រោងមហោស្រប សួនសាធារណះ តំបន់សំណង់លំនៅដ្ឋាន ធនាគារ សកលវិទ្យាល័យ និង មន្ទីរពហុព្យាបាល ជាដើម៕

The post តើមហាសេដ្ឋីលំដាប់កំពូល ពុង ឃាវសែ គ្រប់គ្រងអាណាចក្រជំនួញប្រាក់លានប៉ុន្មាននៅក្នុងដៃ? appeared first on .