ម្ចាស់ហាង Zara

ស្ថាបនិក Zara ចាយលុយជិត ១៥០ លានដុល្លារ ពង្រីកអាជីវកម្មលើវិស័យដឹកជញ្ជូន

ឧកញ៉ាសំពៅ — Fri, 09 Sep 2022 09:20:00 +0000

មួយរយៈកាលចុងក្រោយនេះ ស្ថាបនិកក្រុមហ៊ុន Zara បានបន្តទិញអចលនទ្រព្យខ្នាតយក្សជាច្រើន បើសរុបជាទឹកប្រាក់គឺមិនក្រោមខ្ទង់ពាន់លានដុល្លារឡើយ ហើយថ្មីៗនេះមហាសេដ្ឋីអេស្ប៉ាញ Amancio Ortega បានជះលុយជាង ១០០ លានដុល្លារដើម្បីពង្រីកអាជីវកម្មបន្ថែមទៀត។ នេះបើតាមការចុះផ្សាយពី Bloomberg។

ប្រភពដដែលបានបន្ថែមថា អ្នកមានបំផុតប្រចាំប្រទេសអេស្ប៉ាញបានចំណាយលុយប្រមាណ ១៤៨ លានដុល្លារអាមេរិក ក្នុងការទិញយកអគារមួយខ្នងនៅរដ្ឋ Pennsylvania ដើម្បីពង្រីកអាជីវកម្មលើវិស័យដឹកជញ្ជូន។

អគារមួយខ្នងដែលទើបនឹងក្លាយជាកម្មសិទ្ធិរបស់គ្រួសារត្រកូល Ortega គឺមានក្រឡាផ្ទៃ ៩៤ ០០០ ម៉ែត្រការ៉េ ស្ថិតនៅចំកណ្ដាលរដ្ឋ Pennsylvania តែម្ដង ហើយអគារមួយខ្នងនេះគឺជាអចលនទ្រព្យទី ២ ដែលមហាសេដ្ឋីអេស្ប៉ាញបានទិញដើម្បីរកស៊ីលើវិស័យដឹកជញ្ជូន។

សូមជម្រាបដែរថា លោក Amancio Ortega បច្ចុប្បន្នកំពុងគ្រងតំណែងជាអ្នកមានបំផុតនៅអេស្ប៉ាញជាមួយទំហំទ្រព្យសម្បត្តិប្រមាណ ៤៤ ពាន់លានដុល្លារអាមេរិក ខណៈប្រភពចំណូលធំរបស់លោកបានមកពីភាគហ៊ុន ៥៩% នៃក្រុមហ៊ុនសម្លៀកបំពាក់លំដាប់ពិភពលោក Inditex ជាក្រុមហ៊ុនមេរបស់ Brand ធំៗដូចជា Zara, Bershka និង Pull&Bear ជាដើម៕

The post ស្ថាបនិក Zara ចាយលុយជិត ១៥០ លានដុល្លារ ពង្រីកអាជីវកម្មលើវិស័យដឹកជញ្ជូន appeared first on .

អចលនទ្រព្យនៅក្នុងដៃមហាសេដ្ឋីមានបំផុតនៅអេស្ប៉ាញ មានតម្លៃរហូតដល់ជិត ១៦ ពាន់លានដុល្លារ

ឧកញ៉ាសំពៅ — Thu, 21 Jul 2022 09:13:40 +0000

ប៉ុន្មានឆ្នាំចុងក្រោយនេះ មហាសេដ្ឋីមានបំផុតនៅអេស្ប៉ាញ ស្ថាបនិកក្រុមហ៊ុន Zara លោក Amancio Ortega មានភាពមមាញឹកជាខ្លាំង សម្រាប់ការវិនិយោគលើវិស័យអចលនទ្រព្យ ពោលគឺបានចំណាយលុយអស់ច្រើនពាន់លានដុល្លារ លើការទិញអគារពាណិជ្ជកម្មធំៗ។

ថ្មីៗនេះ ស្ដេចត្រាញ់ខាងលើក៏ទើបនឹងទទួលបានផ្លែផ្កាគួរជាទីពេញចិត្តពីការវិនិយោគនេះផងដែរ ដោយសារតម្លៃអចលនទ្រព្យរបស់លោកបានកើនឡើងដល់ជិត ១៦ ពាន់លានដុល្លារ និងអាចមើលឃើញពីប្រាក់ចំណេញប្រហែលជាង ១ ពាន់លានដុល្លារនៅឆ្នាំ ២០២១។ នេះបើតាមការចុះផ្សាយពីសារព័ត៌មាន Reuters។

អគារធំៗដែលស្ថិតក្រោមការគ្រប់គ្រងរបស់លោក Ortega គឺមាននៅពាសពេញពិភពលោកដូចជានៅទីក្រុង New York, Toronto, London និងនៅប្រទេសកំណើតទីក្រុង Madrid ខណៈកាលពីឆ្នាំ ២០២០ អគារនៅទីក្រុងធំៗទាំងនេះមានតម្លៃសរុបប្រមាណជាង ១៤ ពាន់លានដុល្លារ។

បច្ចុប្បន្នបុរសវ័យ ៨៦ ឆ្នាំគឺជាអ្នកមានបំផុត និងជាវិនិយោគិនធំបំផុតលើវិស័យអចលនទ្រព្យនៅប្រទេសអេស្ប៉ាញ ជាមួយនឹងទំហំទ្រព្យសម្បត្តិប្រមាណក្បែរ ៦២ ពាន់លានដុល្លារ។ នេះបើតាមការចុះផ្សាយពី Forbes៕

The post អចលនទ្រព្យនៅក្នុងដៃមហាសេដ្ឋីមានបំផុតនៅអេស្ប៉ាញ មានតម្លៃរហូតដល់ជិត ១៦ ពាន់លានដុល្លារ appeared first on .

ទិញទៀតហើយ! ស្ថាបនិក Zara ទិញអគារពាណិជ្ជកម្មនៅ New York តម្លៃកន្លះពាន់លានដុល្លារ

ឧកញ៉ាសំពៅ — Fri, 15 Jul 2022 07:19:21 +0000

លោក Amancio Ortega ស្ថាបនិកក្រុមហ៊ុនលក់សម្លៀកបំពាក់ធំបំផុតមួយលើលោក Zara បានប្រកាសទិញយកអគារពាណិជ្ជកម្មមួយឈ្មោះ Dutch 19 នៅទីក្រុង New York សហរដ្ឋអាមេរិក។ នេះបើតាមការចុះផ្សាយពី The Real Deal និងបានបញ្ជាក់ផ្ទាល់ពីអ្នកតំណាង Ortega។

ប្រភពដដែលបានបន្ថែមថា ក្រុមហ៊ុន Pontegadea ដែលគ្រប់គ្រងដោយ Ortega បានចុះកុងត្រាទិញយកអគារពាណិជ្ជកម្មទំនើបកំពស់ ៦៤ ជាន់ ក្នុងតម្លៃប្រហែល ៥០០ លានដុល្លារ ហើយវាត្រូវបានលក់ដោយ Carmel Partners។

សូមជម្រាបដែរថា កាលពីដើមឆ្នាំនេះ Pontegadea ក៏ធ្លាប់បានទិញអគារជាច្រើនណាស់មកហើយ ដូចជាអគារពាណិជ្ជកម្មនៅ Glasgow តម្លៃប្រហែល ២៣៦ លានដុល្លារ និង Royal Bank Plaza នៅទីក្រុង Toronto ប្រទេសកាណាដា តម្លៃប្រហែល ៩១០ លានដុល្លារ។

ដោយឡែក បុរសដែលនៅពីក្រោយការទិញអគារពាណិជ្ជកម្មជាច្រើនកន្លែងនេះគឺជា អ្នកមានបំផុតប្រចាំអេស្ប៉ាញលោក Ortega ដែលមានទ្រព្យសម្បត្តិប្រមាណ ៤៨,៥ ពាន់លានដុល្លារ បើយោងតាមការចុះផ្សាយពី Bloomberg’s Billionaire Index៕

The post ទិញទៀតហើយ! ស្ថាបនិក Zara ទិញអគារពាណិជ្ជកម្មនៅ New York តម្លៃកន្លះពាន់លានដុល្លារ appeared first on .

ម្ចាស់ Brand ល្បីឈ្មោះ Zara ចាយលុយជាង ១ ពាន់លានដុល្លារ ទិញអគារពាណិជ្ជកម្មកណ្ដាលទីក្រុងតូរ៉ុនតូ

ឧកញ៉ាសំពៅ — Fri, 14 Jan 2022 08:38:23 +0000

កាលពីពេលថ្មីៗនេះ លោក Amancio Ortega ដែលជាមហាសេដ្ឋីជនជាតិអេស្ប៉ាញ និងជាម្ចាស់ម៉ាកយីហោហាងសម្លៀកបំពាក់ល្បីឈ្មោះ Zara បានចំណាយលុយប្រមាណ ១,២ ពាន់លានដុល្លារទិញយកអគារពាណិជ្ជកម្មនៅទីក្រុងតូរ៉ុនតូ ប្រទេសកាណាដា។

អគារពាណិជ្ជកម្មដែលត្រូវបានមហាសេដ្ឋីអេស្ប៉ាញទិញកាលពីពេលថ្មីៗនេះ គឺមានឈ្មោះថា Royal Bank Plaza ដែលជាទីប្រមូលផ្ដុំដោយធនាគារជួរមុខប្រចាំប្រទេស និងជាកន្លែងពាណិជ្ជកម្មធំៗផងដែរ។

បើតាមសម្ដីរបស់អ្នកតំណាងគ្រួសារត្រកូល Ortega បានបញ្ជាក់ប្រាប់ទៅកាន់ Bloomberg News កាលពីថ្ងៃព្រហស្បតិ៍ថា ក្រុមហ៊ុន Oxford Properties និង Canada Pension Plan Investment Board បានដាក់អគារមួយនេះលក់លើទីផ្សារតាំងពីឆ្នាំ ២០២១ មកម៉្លេះ និងដាក់តម្លៃប្រហែលខ្ទង់ ១ ពាន់លានដុល្លារ។

ដោយឡែក ការបញ្ជាទិញអគាររបស់ម្ចាស់ម៉ាកយីហោ Zara មួយនេះ បានក្លាយជាការទិញអចលនទ្រព្យធំបំផុតមួយលើលោក គិតចាប់តាំងពីមានការរាតត្បាតជំងឺកូវីដ-១៩ ខណៈក្រុមហ៊ុនអចលនទ្រព្យ CBRE បានបង្ហើបថា តាំងពីមានការរាតត្បាតមក ចំណូលរបស់ Royal Bank Plaza ហាក់មានការធ្លាក់ចុះបន្តបន្ទាប់ ដោយសារក្រុមហ៊ុនជាច្រើនមានបំណងចង់ឈប់ជួលកន្លែង និងងាកមកទីស្នាក់ការរបស់ពួកគេវិញ។

បញ្ជាក់ដែរថា ថ្វីបើជះលុយជាង ១ ពាន់លានដុល្លារទៅលើអគារពាណិជ្ជកម្មខ្នាតយក្សមួយនេះមែនពិត តែ Royal Bank Plaza មិនមែនជាអចលនទ្រព្យទី ១ នៅទ្វីបអាមេរិកខាងជើងដែល គ្រួសារ Ortega គ្រប់គ្រងឡើយ ពោលនៅមានដូចជា អគារប្រវត្តិសាស្ត្រ Haughwout នៅទីក្រុងម៉ាហាថាន់ សណ្ឋាគារ Chicago អគារការិយាល័យខ្ពស់បំផុតនៅទីក្រុង Miami និងអគារការិយាល័យចំនួនពីរនៅ Seattle ជួលដោយក្រុមហ៊ុន Amazon៕

ប្រភព: dailyhive

The post ម្ចាស់ Brand ល្បីឈ្មោះ Zara ចាយលុយជាង ១ ពាន់លានដុល្លារ ទិញអគារពាណិជ្ជកម្មកណ្ដាលទីក្រុងតូរ៉ុនតូ appeared first on .

ម្ចាស់ហាង Zara

ស្ថាបនិក Zara ចាយលុយជិត ១៥០ លានដុល្លារ ពង្រីកអាជីវកម្មលើវិស័យដឹកជញ្ជូន

អចលនទ្រព្យ​នៅ​ក្នុង​ដៃ​មហាសេដ្ឋី​មាន​បំផុត​នៅ​អេស្ប៉ាញ​ មាន​តម្លៃ​រហូត​ដល់​ជិត ១៦ ពាន់​លាន​ដុល្លារ

ទិញ​ទៀត​ហើយ! ស្ថាបនិក​ Zara ទិញ​អគារ​ពាណិជ្ជកម្ម​នៅ​ New York តម្លៃ​កន្លះ​ពាន់​លាន​ដុល្លារ

ម្ចាស់​ Brand ល្បីឈ្មោះ Zara ចាយ​លុយ​ជាង ១ ពាន់​លាន​ដុល្លារ​ ទិញ​អគារពាណិជ្ជកម្ម​កណ្ដាល​ទីក្រុង​តូរ៉ុនតូ

អចលនទ្រព្យនៅក្នុងដៃមហាសេដ្ឋីមានបំផុតនៅអេស្ប៉ាញ មានតម្លៃរហូតដល់ជិត ១៦ ពាន់លានដុល្លារ

ទិញទៀតហើយ! ស្ថាបនិក Zara ទិញអគារពាណិជ្ជកម្មនៅ New York តម្លៃកន្លះពាន់លានដុល្លារ

ម្ចាស់ Brand ល្បីឈ្មោះ Zara ចាយលុយជាង ១ ពាន់លានដុល្លារ ទិញអគារពាណិជ្ជកម្មកណ្ដាលទីក្រុងតូរ៉ុនតូ