យន្តហោះផ្ទាល់ខ្លួន

គ្រាន់តែថ្លៃចាក់សាំងយន្តហោះ Elon Musk ចាយលុយជាង ៣លានដុល្លារ

ឧកញ៉ាសំពៅ — Tue, 19 Dec 2023 01:57:00 +0000

ក្នុងរយៈពេលជិតមួយឆ្នាំមកនេះ មហាសេដ្ឋីមានដាច់គេលើលោក Elon Musk បានជិះយន្តហោះផ្ទាល់ខ្លួនរបស់លោក ប្រហែល ៤៤១ដង សម្រាប់បំពេញទស្សនកិច្ចនៅក្រៅប្រទេស ក៏ដូចជាទៅមើលការខុសត្រូវនៅក្រុមហ៊ុននានា ដែលស្ថិតនៅរដ្ឋផ្សេងៗគ្នាជុំវិញសហរដ្ឋអាមេរិក ខណៈការចាក់សាំងយន្តហោះវិញ សរុបជាទឹកប្រាក់ ៣,២លានដុល្លារ។ នេះបើតាមការចុះផ្សាយពីគេហទំព័រ Insider។

បច្ចុប្បន្ន មហាសេដ្ឋីអាមេរិកម្នាក់នេះ មានយន្តហោះផ្ទាល់ខ្លួនចំនួន ២គ្រឿងគឺ G650ER និងG550 ខណៈយន្តហោះទាំង ២គ្រឿងនេះ គឺសុទ្ធតែមានតម្លៃលើសពី ១០០លានដុល្លារក្នុងមួយគ្រឿង ស្របពេលលេចលឺដំណឹងថា លោកកំពុងដាក់បញ្ជាទិញមួយគ្រឿងបន្ថែមទៀត ជាប្រភេទ Gulfstream G700។

ជាមួយគ្នា របាយការណ៍ពីគេហទំព័រ JetSpy ក៏បានបង្ហាញទៀតថា គិតត្រឹមពាក់កណ្ដាលខែធ្នូ ឆ្នាំ២០២៣នេះ យន្តហោះផ្ទាល់ខ្លួនរបស់ Elon Musk បានធ្វើការហោះហើរច្រើនជាង ១ ១៦១ម៉ោង ឬស្មើហ្នឹងរយៈពេល ៤៨ថ្ងៃ។

បន្ថែមពីនោះ គេហទំព័រ JetSpy ក៏បានបញ្ជាក់ទៀតថា ក្នុងឆ្នាំ២០២៣ យន្តហោះផ្ទាល់ខ្លួនរបស់មេធំ Tesla បានហោះហើរជាមធ្យម រយៈពេល ២ម៉ោងកន្លះ និងហោះចេញពីរដ្ឋកាលីហ្វ័រញ៉ា ទៅកាន់រដ្ឋតិចសាស់ញឹកញាប់ជាងគេ ដ្បិតរដ្ឋទាំង២នេះ គឺជាមូលដ្ឋានរបស់ក្រុមហ៊ុន SpaceX និងក្រុមហ៊ុន Tesla។

ដោយឡែក សម្រាប់ការហោះហើរយៈពេលយូរបំផុតរបស់ Elon Musk នាឆ្នាំនេះ គឺការធ្វើដំណើរឆ្ពោះទៅទីក្រុងតូក្យូ ប្រទេសជប៉ុន ដែលចំណាយពេលជិត ១៣ម៉ោង កាលពីខែសីហា៕

The post គ្រាន់តែថ្លៃចាក់សាំងយន្តហោះ Elon Musk ចាយលុយជាង ៣លានដុល្លារ appeared first on .

Evergrande លក់នាវាផ្ទាល់ខ្លួនតម្លៃជាង ៣០លានដុល្លារ ដោះស្រាយបញ្ហាបំណុល

ឧកញ៉ាសំពៅ — Fri, 29 Sep 2023 07:57:00 +0000

ក្រុមហ៊ុនជាប់បំណុលច្រើនបំផុតលើលោក China Evergrande Group បានលក់នាវាផ្ទាល់ខ្លួន បានទឹកប្រាក់ប្រមាណ ៣២លានដុល្លារ នាដើមឆ្នាំនេះ ដើម្បីរៀបចំផែនការសងបំណុល ចំពេលម្ចាស់បំណុលកំពុងសម្រុកទារប្រាក់។ នេះបើតាមការចុះផ្សាយពីគេហទំព័រ CNA។

នាវាប្រណីតដែល Evergrande បានលក់គឺមានឈ្មោះថា EVENT មានប្រវែង ៦០ម៉ែត្រ ខណៈកន្លងមកក្រុមហ៊ុននេះ ក៏ធ្លាប់លក់យន្តហោះផ្ទាល់ខ្លួន ៣គ្រឿងផងដែរ។

គួររំលឹកបន្តិចថា កាលពីខែកក្កដា មានសេចក្ដីរាយការណ៍មួយថា Evergande បានលក់យន្តហោះផ្ទាល់ខ្លួន ប្រភេទ Boeing បានទឹកប្រាក់ប្រមាណ ១០០លានដុល្លារ ប៉ុន្តែក្រុមហ៊ុនមិនបានចេញមុខបកស្រាយលំអិតពីបញ្ហានេះឡើយ។

បន្ថែមពីនោះ កាលពីឆ្នាំ២០២១ សារព័ត៌មាន Reuters ក៏ធ្លាប់បានចុះផ្សាយថា ក្រុមហ៊ុនចិនមួយនេះ បានលក់យន្តហោះផ្ទាល់ខ្លួនប្រភេទ Gulfstream បានទឹកប្រាក់ប្រមាណ ៥០លានដុល្លារ ដើម្បីយកមកទប់ទល់នឹងបញ្ហាបំណុលផងដែរ៕

The post Evergrande លក់នាវាផ្ទាល់ខ្លួនតម្លៃជាង ៣០លានដុល្លារ ដោះស្រាយបញ្ហាបំណុល appeared first on .

ស្ដេចព្រុយណេ ជាម្ចាស់យន្តហោះផ្ទាល់ខ្លួនមានតម្លៃថ្លៃបំផុតលើលោកជិត ៤០០ លានដុល្លារ

ឧកញ៉ាសំពៅ — Thu, 10 Nov 2022 02:11:59 +0000

កាលពីរសៀលថ្ងៃទី ០៩ វិច្ឆិកាកន្លងទៅ ព្រះមហាក្សត្រនៃប្រទេសព្រុយណេដារ៉ូសាឡឹម ព្រះចៅស៊ុលតង់ ហាជី ហាសសាណាល់ បុលគីយ៉ាស់ មុយអ៊ីហ្សាឌីន វ៉ាឌូឡាហ៍ បានយាងមកដល់ប្រទេសកម្ពុជា ដើម្បីចូលរួមកិច្ចប្រជុំកំពូលអាស៊ានលើកទី ៤០ និង ៤១ ពីថ្ងៃទី ១០ ដល់ទី ១៣ ខែវិច្ឆិកា ២០២២។

សម្រាប់ការធ្វើដំណើរមកកម្ពុជាសារនេះវិញ ទ្រង់បានបើកយន្តហោះផ្ទាល់ព្រះអង្គ ជាមួយបុត្រាមួយអង្គ ព្រះនាម ព្រះអង្គម្ចាស់ Abdul Mateen ខណៈយន្តហោះដែលទ្រង់បានបើកមកដោយផ្ទាល់ព្រះអង្គ គឺជាយន្តហោះកម្រមួយមិនសូវមានអ្នកបើកក្នុងពេលបច្ចុប្បន្ន។ នេះបើតាមការចុះផ្សាយពី SCMP។

ប្រភពដដែលបន្ថែមថា យន្តហោះដែលព្រះមហាក្សត្របានបើកមកនោះ ជាប្រភេទ Boeing 767 គឺមិនសូវមានអ្នកប្រើប្រាស់ទូលាយឡើយ ខណៈតម្លៃវិញគឺមិនត្រូវបានទម្លាយដូចគ្នា គ្រាន់តែថា អ្វីដែលគ្រប់គ្នាដឹង គឺទ្រង់ជាម្ចាស់នៃយន្តហោះផ្ទាល់ខ្លួនដែលមានតម្លៃថ្លៃបំផុតលើលោក។

យន្តហោះផ្ទាល់ខ្លួនដែលត្រូវបានចាត់ទុកថាថ្លៃបំផុតនោះ ជាប្រភេទ Boeing 747-400 ដែលមានតម្លៃប្រមាណ ១០០ លានដុល្លារ ប៉ុន្តែត្រូវបានទ្រង់យកមកកែលំអទាំងរចនាបថខាងក្នុង និងក្រៅ ស្រោបដោយមាសផង រហូតធ្វើឲ្យតម្លៃយន្តហោះមួយគ្រឿងនេះឡើងដល់ជិត ៤០០ លានដុល្លារ និងទទួលបានរហស្សនាមថា “The Floating Palace” ថែមទៀតផង។

ក្រៅពីមានយន្តហោះផ្ទាល់ព្រះអង្គជាច្រើនគ្រឿង ព្រះមហាក្សត្រអង្គនេះក៏ត្រូវបានគេដឹងថា ជាអ្នកនិយមចូលចិត្តសន្សំរថយន្តផងដែរ រហូតលឺចចាមអារ៉ាមថា ទ្រង់មានរថយន្តទំនើបនៅឃ្លាំងប្រមាណ ៧ ០០០ គ្រឿងឯណោះ ដែលមានដូចជា Roll Royces ៦០០ គ្រឿង Ferraris ៤៥០ គ្រឿង និង Bentleys ៣៥០ គ្រឿង និងរថយន្តកម្រផ្សេងៗទៀត៕

The post ស្ដេចព្រុយណេ ជាម្ចាស់យន្តហោះផ្ទាល់ខ្លួនមានតម្លៃថ្លៃបំផុតលើលោកជិត ៤០០ លានដុល្លារ appeared first on .

ញាក់សាច់! លឺល្ហៀងៗថា Elon Musk គ្រោងសាងសង់ប្រលានយន្តហោះផ្ទាល់ខ្លួនមួយកន្លែង

ឧកញ៉ាសំពៅ — Fri, 29 Jul 2022 08:31:24 +0000

នាមជាមហាសេដ្ឋីមានបំផុតលើលោក ជាមួយនឹងទ្រព្យសម្បត្តិច្រើនជាង ២០០ ពាន់លានដុល្លារ មេធំ Tesla លោក Elon Musk កំពុងត្រៀមសាងសង់ប្រលានយន្តហោះផ្ទាល់ខ្លួនមួយកន្លែង។ នេះបើតាមការចុះផ្សាយពីសារព័ត៌មានធំៗជាច្រើន។

បើទោះជាទីតាំង និងកាលបរិច្ឆេទសាងសង់នៅមិនទាន់បញ្ចេញជាផ្លូវការក៏ពិតមែន ប៉ុន្តែប្រភពក្រៅផ្លូវការមួយបានទម្លាយថា គម្រោងសាងសង់នឹងអាចលេចរូបរាងនៅភាគខាងកើតទីក្រុង Austin រដ្ឋតិចសាស់។

មូលហេតុដែល Elon Musk ចង់សាងសង់ប្រលានយន្តហោះផ្ទាល់ខ្លួន ព្រោះអាចបម្រើការសម្រាប់ការងារផ្ទាល់ខ្លួនបានរហ័ស ហើយក៏អាចធ្វើឲ្យក្រុមការងារ Tesla, SpaceX និង Boring Company ជាដើម អាចប្រើប្រាស់ជាប្រយោជន៍ផ្សេងៗផងដែរ។

សូមជម្រាបដែរថា កាលពីពេលកន្លងទៅ Elon Musk ក៏ទើបនឹងកុម្ម៉ង់យន្តហោះផ្ទាល់ខ្លួនថ្មីមួយគ្រឿងទៀតផងដែរ ដែលជាម៉ូដែល G700 ខណៈតម្លៃរបស់វាគឺប្រហែល ៧៨ លានដុល្លារ៕

The post ញាក់សាច់! លឺល្ហៀងៗថា Elon Musk គ្រោងសាងសង់ប្រលានយន្តហោះផ្ទាល់ខ្លួនមួយកន្លែង appeared first on .

Ronaldo ប្រកាសវៃចេញយន្តហោះផ្ទាល់ខ្លួន ព្រោះតូចពេកពិបាកដឹកសង្សារ

ឧកញ៉ាសំពៅ — Thu, 07 Jul 2022 07:53:32 +0000

ស្របពេលពិភពលោកកំពុងប្រឈមមុខនឹងវិបត្តិសេដ្ឋកិច្ចធ្ងន់ធ្ងរ ប្រជាជនទូទាំងសកលលោកបានបង្ហាញសញ្ញាគួរឲ្យព្រួយបារម្ភ ប៉ុន្តែមានបុគ្គលខ្លះក៏មិនសូវអើពើប៉ុន្មានឡើយ ដ្បិតថ្មីៗនេះមហាសេដ្ឋី Elon Musk ទើបនឹងកុម្ម៉ង់ទិញយន្តហោះម៉ូដែល G700 ថ្មីមួយគ្រឿង។

ទន្ទឹមនឹងនោះ តារាបាល់ទាត់ Cristiano Ronaldo ក៏មានបំណងចង់ឡើងសេរីយន្តហោះផ្ទាល់ខ្លួនផងដែរ ដោយយល់ថាយន្តហោះបច្ចុប្បន្ននេះហាក់មានភាពចង្អៀតពេកសម្រាប់ក្រុមគ្រួសារ។ នេះបើតាមការចុះផ្សាយពី The Sun។

ប្រភពដដែលបានបន្ថែមថា កីឡាករក្រុម Manchester United បានដាក់លក់យន្តហោះផ្ទាល់ខ្លួនម៉ូដែល Gulfstream G200 របស់លោកក្នុងតម្លៃប្រមាណ ២៤ លានដុល្លារ។

សូមរំលឹកដែរថា យន្តហោះមួយគ្រឿងនេះត្រូវបាន Ronaldo ទិញតាំងពីឆ្នាំ ២០១៥ ខណៈម៉ូដែលមួយនេះបានបញ្ឈប់ការផលិតត្រឹមឆ្នាំ ២០១១។ វាអាចផ្ទុកមនុស្សបាន ១០ នាក់ និងអាចបើកបរបានល្បឿនលឿនបំផុត ប្រហែល ៨៥០ គម/ម៉ោង។

ជាទូទៅ វីរបុរសលើវិស័យបាល់ទាត់តែងតែប្រើប្រាស់យន្តហោះមួយគ្រឿងនេះ ដឹកគូសង្សារ Georgina Rodriguez និងកូនៗសម្រាប់ដំណើរកម្សាន្តផ្សេងៗ ហើយបើសិនជាមិនត្រូវទៅណាទេ គេនឹងដាក់ជួលវាក្នុងតម្លៃចន្លោះពី ៦ ០០០ ទៅ ១០ ០០០ ដុល្លារ/ម៉ោង។

យន្តហោះម៉ូដែល G200 របស់ Ronaldo បានបំពាក់ជាមួយនូវគ្រឿងសង្ហារិមទំនើបៗ រាប់បញ្ចូលទាំង Wi-Fi ទូរស័ព្ទ ម៉ាស៊ីនបញ្ជូនសារ ឆ្នាំងដុតអគ្គិសនី ឆ្នាំងកំដៅ ទូទឹកកក និងសូម្បីតែឧបករណ៍កំសាន្ត។

យ៉ាងណា គេនៅមិនទាន់ដឹងថា Ronaldo មានបំណងចង់ទិញយន្តហោះប្រភេទអ្វីបន្ទាប់នៅឡើយ ប៉ុន្តែបើយោងតាមហេតុផលដែលចង់លក់នេះ គេអាចសន្និដ្ឋានថា Gulfstream G700 ឬ Bombardier Global 8000 អាចនឹងជាជម្រើសសក្ដិសមបំផុត ដោយសារ ២ ម៉ូដែលនេះមានទំហំធំទូលាយជាង G200៕

The post Ronaldo ប្រកាសវៃចេញយន្តហោះផ្ទាល់ខ្លួន ព្រោះតូចពេកពិបាកដឹកសង្សារ appeared first on .

អាមេរិកគ្រោងពិន័យទឹកប្រាក់ ១ លានដុល្លារ និងរឹបអូសយន្តហោះផ្ទាល់ខ្លួនរបស់មហាសេដ្ឋីរុស្ស៊ី

ឧកញ៉ាសំពៅ — Tue, 07 Jun 2022 07:34:45 +0000

កាលពីថ្ងៃច័ន្ទកន្លងទៅ រដ្ឋាភិបាលអាមេរិកបានចេញលិខិតរឹបអូសយន្តហោះផ្ទាល់ខ្លួន ២ គ្រឿងរបស់មហាសេដ្ឋីរុស្ស៊ី Roman Abramovich យកមករក្សាទុក បន្ទាប់ពីរុស្ស៊ីបើកការឈ្លានពានទៅលើអ៊ុយក្រែន។ នេះបើតាមរបាយការណ៍បង្ហាញដោយតុលាការ។

យ៉ាងណា មន្ត្រីក្រសួងយុត្តិធម៌មួយរូបបានចេញមុខអះអាងថា យន្តហោះតម្លៃ ៣៥០ លានដុល្លារ និង ៦០ លានដុល្លាររបស់មហាសេដ្ឋីរុស្ស៊ី បច្ចុប្បន្នមិនបានស្ថិតក្រោមការគ្រប់គ្រងរបស់រដ្ឋាភិបាលឡើយ ហើយក៏មិនទាន់ដឹងពីទីតាំងពិតប្រាកដនៃយន្តហោះទាំង ២ គ្រឿងនេះដូចគ្នា។

មន្ត្រីខាងលើបានប្រាប់ទៅកាន់ Reuters ថា ដីកាចេញរឹបអូសយន្តហោះ ២ គ្រឿងនេះ គឺក្នុងគោលបំណងរារាំងក្រុមហ៊ុនផ្សេងៗ ក្នុងការជួយជម្លៀសយន្តហោះទាំង ២ នេះចេញពីដែនអាកាសអាមេរិក ស្របពេលមហាអំណាចលោកខាងលិចកំពុងគាបសង្កត់ខ្លាំងលើមហាសេដ្ឋីដែលមានទំនាក់ទំនងជិតស្និទ្ធនឹងថ្នាក់ដឹកនាំរុស្ស៊ី។

ដោយសារតែយន្តហោះទាំងនោះផលិតឡើងនៅសហរដ្ឋអាមេរិក ហើយការហោះហើរទាំងអស់ប្រព្រឹត្តឡើង ក្រោយចេញច្បាប់រឹតបន្តឹង ដូច្នេះ Abramovich ត្រូវតែទទួលបានការអនុញ្ញាតពីនាយកដ្ឋានពាណិជ្ជកម្មដើម្បីអាចហោះហើរទៅកាន់រុស្ស៊ី ប៉ុន្តែការស្នើសុំសិទ្ធហោះហើរមិនត្រូវបានធ្វើឡើងទាល់តែសោះ។

សូមជម្រាបដែរថា នាយកដ្ឋានពាណិជ្ជកម្មបានបង្ហើបថា យន្តហោះរបស់ Abramovich បានធ្វើការហោះហើរដោយគ្មានសិទ្ធត្រឹមត្រូវ ៣ លើក ពោលកាលពីថ្ងៃទី ០៤ មីនាហោះពីទីក្រុងឌូបៃទៅទីក្រុងមូស្គូ និងថ្ងៃទី ១២ និង ១៥ មីនាពីទីក្រុងអ៊ីស្តង់ប៊ូលទៅកាន់ទីក្រុងមូស្គូ។

ក្នុងករណីខាងលើ នាយកដ្ឋានពាណិជ្ជកម្មអាចនឹងដាក់ពិន័យទៅលើមហាសេដ្ឋីរុស្ស៊ី ក្នុងទំហំទឹកប្រាក់ប្រហែល ១ លានដុល្លារ សម្រាប់ការហោះហើរដោយល្មើសបម្រាមទាំង ៣ លើកនោះ ឬប្រមាណ ៣២៨ ១២១ ដុល្លារសម្រាប់មួយជើង៕

The post អាមេរិកគ្រោងពិន័យទឹកប្រាក់ ១ លានដុល្លារ និងរឹបអូសយន្តហោះផ្ទាល់ខ្លួនរបស់មហាសេដ្ឋីរុស្ស៊ី appeared first on .

រៀបការអស់ ១១ ឆ្នាំ មហាសេដ្ឋី Shojaee ទិញយន្តហោះផ្ទាល់ខ្លួនជាកាដូបុណ្យគ្រីស្តម៉ាស់ជូនភរិយា

ឧកញ៉ាសំពៅ — Sun, 26 Dec 2021 05:06:29 +0000

កាលពីពេលកន្លងទៅ មហាសេដ្ឋី Masoud Shojaee បានធ្វើឲ្យមនុស្សស្រីស្ទើរគ្រប់រូបច្រណែននឹងភរិយារបស់លោក បន្ទាប់ពីមានការបង្ហោះវីដេអូអំពីការទិញកាដូជូនភរិយានៅថ្ងៃបុណ្យគ្រីស្តម៉ាស់។

កាដូដែលអ្នកស្រី Stephanie Shojaee ទទួលបានពីស្វាមីគឺជាយន្តហោះផ្ទាល់ខ្លួនមួយគ្រឿងតែម្ដង។ តាមរយៈខ្សែវីដេអូគឺ នាយកប្រតិបត្តិក្រុមហ៊ុនអចលនទ្រព្យ Shoma Group បានដឹកដៃភរិយាដោយរុំភ្នែករបស់នាងលើកម្រាលព្រំ ហើយក្រោយពីស្រាយក្រណាត់រុំភ្នែក ស្ត្រីវ័យ ៣៧ ឆ្នាំមានការភ្ញាក់ផ្អើលជាខ្លាំងនៅពេលឃើញយន្តហោះផ្ទាល់ខ្លួនពណ៌សលាយក្រហមនៅនឹងមុខ។

ចង់ដឹងពីសកម្មភាព Surprise របស់គូស្វាមីទាំង ២ រូបនេះមានសភាពបែបណាសូមទស្សនាវីដេអូដូចខាងក្រោម៖

View this post on Instagram

A post shared by Stephanie Shojaee (@stephshojaee)

យ៉ាងណា ចំពោះតម្លៃរបស់យន្តហោះផ្ទាល់ខ្លួនមួយគ្រឿងនេះគឺមិនត្រូវបានទម្លាយពីតម្លៃជាក់លាក់ឡើយ៕

ប្រភព: Tuko

The post រៀបការអស់ ១១ ឆ្នាំ មហាសេដ្ឋី Shojaee ទិញយន្តហោះផ្ទាល់ខ្លួនជាកាដូបុណ្យគ្រីស្តម៉ាស់ជូនភរិយា appeared first on .

យន្តហោះផ្ទាល់ខ្លួន

គ្រាន់តែថ្លៃចាក់សាំងយន្តហោះ Elon Musk ចាយលុយជាង ៣លានដុល្លារ

Evergrande លក់នាវាផ្ទាល់ខ្លួនតម្លៃជាង ៣០លានដុល្លារ ដោះស្រាយបញ្ហាបំណុល

ស្ដេចព្រុយណេ ជាម្ចាស់យន្តហោះផ្ទាល់ខ្លួនមានតម្លៃថ្លៃបំផុតលើលោកជិត ៤០០ លានដុល្លារ

ញាក់សាច់! លឺ​ល្ហៀងៗ​ថា Elon Musk គ្រោង​សាងសង់​ប្រលានយន្តហោះ​ផ្ទាល់ខ្លួន​មួយ​កន្លែង

Ronaldo ប្រកាសវៃចេញ​យន្តហោះផ្ទាល់ខ្លួន ព្រោះតូចពេកពិបាកដឹកសង្សារ

អាមេរិក​គ្រោង​ពិន័យ​ទឹកប្រាក់ ១ លាន​ដុល្លារ និង​រឹបអូស​យន្តហោះ​ផ្ទាល់ខ្លួន​របស់​មហាសេដ្ឋី​រុស្ស៊ី

រៀបការ​អស់ ១១ ឆ្នាំ មហាសេដ្ឋី Shojaee ទិញ​យន្តហោះ​ផ្ទាល់ខ្លួន​ជា​កាដូ​បុណ្យ​គ្រីស្តម៉ាស់​ជូន​ភរិយា

ញាក់សាច់! លឺល្ហៀងៗថា Elon Musk គ្រោងសាងសង់ប្រលានយន្តហោះផ្ទាល់ខ្លួនមួយកន្លែង

Ronaldo ប្រកាសវៃចេញយន្តហោះផ្ទាល់ខ្លួន ព្រោះតូចពេកពិបាកដឹកសង្សារ

អាមេរិកគ្រោងពិន័យទឹកប្រាក់ ១ លានដុល្លារ និងរឹបអូសយន្តហោះផ្ទាល់ខ្លួនរបស់មហាសេដ្ឋីរុស្ស៊ី

រៀបការអស់ ១១ ឆ្នាំ មហាសេដ្ឋី Shojaee ទិញយន្តហោះផ្ទាល់ខ្លួនជាកាដូបុណ្យគ្រីស្តម៉ាស់ជូនភរិយា