នៅក្នុងអត្ថបទមួយដែលបានចេញផ្សាយនៅលើគេហទំព័រវិមានក្រឹមឡាំង នៅថ្ងៃទី២៦ ខែឧសភា លោក ពូទីន បាននិយាយថា ប្រទេសរុស្ស៊ីបានដឹកជញ្ជូនខ្លា Amur ចំនួនបួនក្បាលដែលចាប់បាននៅតំបន់ព្រំដែន ទៅកាន់ប្រទេសកាហ្សាក់ស្ថានវិញ តាមរយៈផ្លូវអាកាស។

ក្នុងចំណោមខ្លា ៤ ក្បាលនោះ មានកូនខ្លាចំនួនពីរ ដែលត្រូវផ្តល់ជូន ដើម្បីជួយប្រទេសកាហ្សាក់ស្ថានស្តារចំនួនខ្លារបស់ខ្លួនឡើងវិញ។ ខ្លាទាំងបួនក្បាលត្រូវបានគេរំពឹងថានឹងត្រូវបានដោះលែងចូលទៅក្នុងព្រៃវិញ ក្នុងពេលឆាប់ៗនេះ។

យ៉ាងណាមិញ ជុំវិញប្រកាសពីការជូនអំណោយជាសត្វខ្លា ដល់ប្រទេសកាហ្សាក់ស្ថាននេះ ត្រូវបានធ្វើឡើងមុនពេល លោក ពូទីន ទៅបំពេញទស្សនកិច្ចក្នុងប្រទេសអាស៊ីកណ្តាល នៅសប្តាហ៍នេះ។ ប្រទេសកាហ្សាក់ស្ថាន ដែលជាប្រទេសសម្បូរទៅដោយធនធាន មានព្រំប្រទល់ជាប់នឹងប្រទេសរុស្ស៊ី ក៏ជាសម្ព័ន្ធមិត្តជិតស្និទ្ធរបស់ទីក្រុងមូស្គូ នៅក្នុងតំបន់នេះផងដែរ។

គួរជម្រាបជូនផងដែរថា នេះហាក់មិនមែនជារឿងចម្លែកនោះឡើយ ដែលលោក ពូទីន តែងជូនអំណោយជាសត្វទៅកាន់ប្រទេសសម្ព័ន្ធមិត្តរបស់ខ្លួន។ ដោយនៅឆ្នាំ២០២២ ប្រទេសរុស្ស៊ី ក៏បានបញ្ជូនសេះពូជចំនួន ៣០ ក្បាលទៅកាន់ប្រទេសកូរ៉េខាងជើង ចំពេលមានការពង្រឹងទំនាក់ទំនងរវាងប្រទេសទាំងពីរ៕

The post បុរសខ្លាំងពូទីន ជូនសត្វខ្លា ៤ ក្បាលជាអំណោយដល់ប្រទេសកាហ្សាក់ស្ថាន មុនដំណើរទស្សនកិច្ច appeared first on .

លោក ពូទីន បានមកដល់ទីក្រុងប៉េកាំង នៅល្ងាចថ្ងៃទី១៩ ខែឧសភា ដោយចាប់ផ្តើមដំណើរទស្សនកិច្ចរយៈពេលពីរថ្ងៃរបស់លោក។ មេដឹកនាំកំពូលរុស្ស៊ីរូបនេះ បានដោះអាវធំរបស់លោក មុនពេលឡើងឡានដឹកប្រធានាធិបតី នៅអាកាសយានដ្ឋាន។ នៅថ្ងៃទី២០ ខែឧសភា លោកបានធ្វើម្តងទៀតនូវសកម្មភាពបែបនេះ នៅពេលដែលលោកចេញដំណើរ បន្ទាប់ពីកិច្ចប្រជុំជាងបួនម៉ោងជាមួយលោកប្រធានាធិបតីចិន ស៊ី ជីនពីង នៅសាលប្រជុំប្រជាជន នៅទីក្រុងប៉េកាំង។

យោងតាមសារព័ត៌មានចិន នេះជាសកម្មភាពដ៏កម្រមួយ ពីព្រោះនៅក្នុងវប្បធម៌រុស្ស៊ី មនុស្សដោះអាវធំរបស់ពួកគេ លុះត្រាតែពួកគេនៅក្នុងផ្ទះ ឬក្នុងបរិយាកាសសុខស្រួលខ្លាំង។ យ៉ាងណាមិញ វីដេអូនេះបានទាក់ទាញអ្នកចូលមើលជាង ២,៥ លានដង រួមជាមួយនឹងការចូលចិត្ត និងការផ្តល់មតិយោបល់ផ្សេងៗគ្នា រាប់រយរាប់ពាន់។

យោងតាមឧបករណ៍សង្ខេបរបស់បណ្តាញសង្គម Weibo បានបង្ហាញថា មតិយោបល់ប្រហែល ៤៥% ជឿថាការដោះអាវធំរបស់លោក ពូទីន គឺបានបង្ហាញពីអាកប្បកិរិយារួសរាយរាក់ទាក់ ដែលឆ្លុះបញ្ចាំងពីទំនាក់ទំនងដ៏ស៊ីជម្រៅរវាងចិន និងរុស្ស៊ី។ ហើយប្រហែល ៣៥% ផ្សេងទៀត បានចាត់ទុកថាវាជាប្រតិកម្មធម្មតា ដោយសារសីតុណ្ហភាពក្តៅនៅទីក្រុងប៉េកាំង នៅពេលនោះ ខណៈអ្នកដែលនៅសល់ផ្សេងទៀត បានជជែកវែកញែកថា សកម្មភាពនេះមិនគួរត្រូវបានយកវិភាគ ឬសន្មតដោយផ្តោតលើន័យនយោបាយច្រើនពេកនោះឡើយ។

គួរជម្រាបជូនផងដែរថា ដំណើរទស្សនកិច្ចនៅថ្ងៃទី១៩-២០ ខែឧសភាកន្លងទៅនេះ គឺជាលើកទីពីរហើយដែលលោ កពូទីន បានជួបជាមួយលោក ស៊ី ជីនពីង ក្នុងរយៈពេលមួយឆ្នាំ បន្ទាប់ពីដំណើរទស្សនកិច្ចរយៈពេលបួនថ្ងៃរបស់មេដឹកនាំរុស្ស៊ី មកកាន់ប្រទេសចិន កាលពីចុងខែសីហា ឆ្នាំ២០២៥។ ក្នុងអំឡុងពេលនៃកិច្ចពិភាក្សា លោក ពូទីន បានសរសើរទំនាក់ទំនងរុស្ស៊ី-ចិនថាស្ថិតក្នុងកម្រិតខ្ពស់មិនធ្លាប់មានពីមុនមក៕​

The post វីដេអូរបស់បុរសខ្លាំង ពូទីន ដោះអាវធំដើរចូលឡាន នៅប្រទេសចិន កំពុងផ្ទុះល្បីពេញអ៊ីនធឺណិត appeared first on .

លោក Scott Bessent រដ្ឋមន្ត្រីក្រសួងរតនាគារអាមេរិក បានបង្ហោះសារមួយលើប្រព័ន្ធផ្សព្វផ្សាយសង្គមនៅថ្ងៃទី១៨ ខែឧសភាថា លខិតអនុញ្ញាតរយៈពេល ៣០ថ្ងៃ នឹងជួយដល់ប្រទេសងាយរងគ្រោះបំផុត ឲ្យចូលទៅប្រើប្រាស់ប្រេងរបស់រុស្ស៊ីដែលបច្ចុប្បន្នកំពុងជាប់គាំង នៅលើសមុទ្រ។

លោក Bessent បានសង្កត់ធ្ងន់ទៀតថា ការបន្តពន្យារពេលនៃទណ្ឌកម្មនេះក៏នឹងជួយបង្កើនភាពបត់បែន និងស្ថិរភាពនៃទីផ្សារប្រេងឆៅ ដោយធានាបានថាប្រេងទាំងនេះអាចទៅដល់ប្រទេសដែលមានតម្រូវការចាំបាច់ខ្លាំងបំផុត សម្រាប់ថាមពល។

យោងតាមលិខិតអនុញ្ញាតដែលចេញដោយក្រសួងរតនាគារសហរដ្ឋអាមេរិក បានបង្ហាញឲ្យដឹងថា ការលើកលែងទណ្ឌកម្មថ្មីនេះ នឹងមានប្រសិទ្ធភាពរហូតដល់ថ្ងៃទី១៧ ខែមិថុនា។ ដូចគ្នានឹងការលើកលែងពីមុនដែរ វិធានការនេះហាមឃាត់ប្រតិបត្តិការដែលពាក់ព័ន្ធនឹងបុគ្គល ឬក្រុមហ៊ុនមកពីអ៊ីរ៉ង់ កូរ៉េខាងជើង គុយបា និងទឹកដីអ៊ុយក្រែនដែលគ្រប់គ្រងដោយរុស្ស៊ី។

គួរជម្រាបជូនថា នេះជាលើកទីពីរហើយដែលរដ្ឋបាលលោក ត្រាំ បានពង្រីកការលើកលែងសម្រាប់ប្រេងរបស់រុស្ស៊ីដែលមានគោលបំណងដោះស្រាយកង្វះខាតការផ្គត់ផ្គង់ប្រេងឥន្ធនៈដែលបណ្តាលមកពីជម្លោះនៅអ៊ីរ៉ង់៕​

The post សហរដ្ឋអាមេរិក បន្តលើកលែងទណ្ឌកម្មលើប្រេងរបស់រុស្ស៊ីសម្រាប់រយៈពេល ៣០ថ្ងៃទៀត appeared first on .

លោក Prabowo បានជួបជាមួយប្រធានាធិបតីរុស្ស៊ី លោក វ៉្លាឌីមៀ ពូទីន នៅឯវិមានក្រឹមឡាំង កាលពីសប្តាហ៍មុន ដែលជាកន្លែងមេដឹកនាំទាំងពីរពិភាក្សាគ្នា​អំពីការពង្រឹងភាពជាដៃគូយុទ្ធសាស្ត្រ រួមទាំងវិស័យថាមពលផងដែរ ។

ទីភ្នាក់ងារសារព័ត៌មានរដ្ឋ Antara បានដកស្រង់សម្តីរបស់លេខាធិការគណៈរដ្ឋមន្ត្រី លោក Teddy Indra Wijaya ថា ក្នុងអំឡុងដំណើរទស្សនកិច្ចនោះ ឥណ្ឌូណេស៊ី ទទួលបានការផ្គត់ផ្គង់ប្រេងចំនួន ១៥០ លានបារ៉ែល ដើម្បីដោះស្រាយបញ្ហាប្រែប្រួលសេដ្ឋកិច្ច។

ជម្រាបជូនផងដែរថា ដូចទៅនឹងប្រទេសជាច្រើនផ្សេងទៀតដែរ ឥណ្ឌូណេស៊ី បានស្ថិតនៅក្រោមសម្ពាធពីការកើនឡើងនៃតម្លៃប្រេងសកល ដោយសារតែសង្គ្រាមនៅមជ្ឈិមបូព៌ា ហើយបានខិតខំប្រឹងប្រែងដើម្បីធានាបាននូវអ្នកផ្គត់ផ្គង់ជំនួស។ ប្រហែល ២០% ទៅ ២៥% នៃការនាំចូលប្រេងឆៅរបស់ឥណ្ឌូណេស៊ី គឺបានមកពីមជ្ឈិមបូព៌ា ហើយត្រូវឆ្លងកាត់ច្រកសមុទ្រ Hormuz ដ៏សំខាន់៕​

The post លែងខ្វះប្រេងប្រើ ឥណ្ឌូណេស៊ី ទទួលបានការផ្គត់ផ្គង់ប្រេងឆៅចំនួន ១៥០ លានបារ៉ែលពីប្រទេសរុស្ស៊ី appeared first on .

យោងតាមយន្តការលើកលែងដែលបានចេញផ្សាយនៅលើគេហទំព័ររបស់ការិយាល័យគ្រប់គ្រងទ្រព្យសម្បត្តិបរទេស (OFAC) នៃក្រសួងរតនាគារសហរដ្ឋអាមេរិក នៅថ្ងៃទី១៧ ខែមេសា បានបង្ហាញថាទីក្រុងវ៉ាស៊ីនតោនអនុញ្ញាតឲ្យភាគីពាក់ព័ន្ធអាចលក់ ដឹកជញ្ជូន ឬផ្ទុកប្រេងឆៅ និងផលិតផលប្រេងកាតដែលមានប្រភពមកពីរុស្ស៊ីរហូតដល់ថ្ងៃទី១៦ ខែឧសភា។

នេះមានន័យថាប្រេងរបស់រុស្ស៊ីត្រូវបានលើកលែងពីទណ្ឌកម្មរបស់សហរដ្ឋអាមេរិករយៈពេលមួយខែបន្ថែមទៀត។ តែទោះជាយ៉ាងណាក៏ដោយ យន្តការនេះអនុវត្តចំពោះតែការដឹកជញ្ជូនប្រេងដែលត្រូវបានផ្ទុកនៅលើនាវាមុនថ្ងៃទី១៧ ខែមេសាប៉ុណ្ណោះ។

ជម្រាបជូនថាអាជ្ញាប័ណ្ណថ្មី ដែលជំនួសអាជ្ញាប័ណ្ណស្រដៀងគ្នាដែលចេញនៅថ្ងៃទី១៩ ខែមីនា និងត្រូវបានផុតកំណត់នៅថ្ងៃទី១១ ខែមេសា គឺមានបំណងគ្រប់គ្រងតម្លៃថាមពលសកល ដែលបានកើនឡើងយ៉ាងខ្លាំងក្នុងចំណោមជម្លោះរវាងសហរដ្ឋអាមេរិក អ៊ីស្រាអែល និងអ៊ីរ៉ង់ នៅមជ្ឈិមបូព៌ា៕​

The post អាមេរិក សម្រេចបន្ធូរបន្ថយទណ្ឌកម្មលើប្រេងរបស់ប្រទេសរុស្ស៊ីបន្តទៀត appeared first on .

លោក Scott Bessent រដ្ឋមន្ត្រីក្រសួងរតនាគារអាមេរិក បាននិយាយនៅក្នុងសន្និសីទសារព័ត៌មានមួយ នៅទីក្រុងវ៉ាស៊ីនតោនថា ៖”យើងនឹងមិនបន្តអាជ្ញាប័ណ្ណសម្រាប់ប្រេងរបស់រុស្ស៊ីទៀតទេ”។ នៅក្នុងនោះលោកក៏បានសង្កត់ធ្ងន់ទៀតផងដែរថា អាមេរិកនឹងមិនមានផែនការពង្រីកការលើកលែងបណ្ដោះអាសន្នដែលអនុញ្ញាតឲ្យប្រទេសនានាទិញប្រេងរបស់រុស្ស៊ីនៅលើសមុទ្រទៀតនោះឡើយ។

យ៉ាងណាមិញ​ ជុំវិញការប្រកាសនេះ​ ត្រូវបានធ្វើឡើង បន្ទាប់ពីក្រសួងរតនាគារសហរដ្ឋអាមេរិក ក៏បាននិយាយផងដែរថាខ្លួននឹងមិនបន្តគោលនយោបាយលើកលែងនេះ សម្រាប់ប្រេងរបស់អ៊ីរ៉ង់ផងដែរ។

ជម្រាបជូនថា កាលពីថ្ងៃទី១២ ខែមីនា នៅក្នុងការបង្ហោះមួយនៅលើ X លោក Scott Bessent បាននិយាយថា អាមេរិកកំពុងអនុញ្ញាតឲ្យប្រទេសនានាទិញប្រេងរបស់រុស្ស៊ីដែលជាប់គាំងនៅសមុទ្រជាបណ្ដោះអាសន្នរយៈពេល ៣០ថ្ងៃ។ ហើយនៅមួយសប្តាហ៍ក្រោយមក ពួកគេក៏បានបន្តលើកទណ្ឌកម្មជាបណ្ដោះអាសន្នលើប្រេងអ៊ីរ៉ង់ដែលផ្ទុកនៅលើកប៉ាល់ រហូតដល់ថ្ងៃទី១៩ ខែមេសាផងដែរ។ ចំពោះគោលនយោបាយទាំងពីរនេះ គឺមានគោលបំណងកាត់បន្ថយកង្វះខាតការផ្គត់ផ្គង់ដែលបណ្តាលមកពីជម្លោះនៅមជ្ឈិមបូព៌ា៕​

The post អាមេរិក បញ្ជាក់ថានឹងគ្មានការលើកលែងទណ្ឌកម្មចំពោះប្រេងរបស់រុស្ស៊ីទៀតឡើយ appeared first on .

ដោយផ្អែកលើស្ថិតិផ្លូវការ និងប្រភពឧស្សាហកម្មស្តីពីការផលិត ការចម្រាញ់ និងការផ្គត់ផ្គង់ Reuters បានគណនាថាចំណូលប្រេង និងឧស្ម័នរបស់រុស្ស៊ីក្នុងខែមេសា បានកើនឡើងទ្វេដងបើប្រៀបធៀបទៅនឹងខែមីនា ពីចំនួន ៣២៧ពាន់លានរូបល ដល់ ៧០០ពាន់លានរូបល(៩ពាន់លានដុល្លារ)។

គួរឲ្យដឹងថា បើប្រៀបធៀបទៅនឹងរយៈពេលដូចគ្នាក្នុងឆ្នាំ២០២៥ ចំណូលនេះបានកើនឡើង ១០%។ ក្នុងនាមជាប្រទេសនាំចេញប្រេងធំជាងគេទីពីររបស់ពិភពលោក ប្រេងរបស់រុស្ស៊ីមានតម្រូវការខ្ពស់ គិតចាប់តាំងពីជម្លោះនៅមជ្ឈិមបូព៌ាបានផ្ទុះឡើងកាលពីប្រាំមួយសប្តាហ៍មុន។

ជម្រាបជូនផងដែរថា បន្ទាប់ពីការវាយប្រហារតាមអាកាសរបស់សហរដ្ឋអាមេរិក និងអ៊ីស្រាអែលចាប់តាំងពីចុងខែកុម្ភៈ អ៊ីរ៉ង់បានបិទច្រកសមុទ្រ Hormuz ដែលជាផ្លូវដឹកជញ្ជូនសម្រាប់ប្រេង និងឧស្ម័នប្រហែល ២០% របស់ពិភពលោក និងបណ្តាលឱ្យតម្លៃប្រេងឆៅ Brent កើនឡើង លើសពី ១០០ដុល្លារក្នុងមួយបារ៉ែល៕​

The post ប្រាក់ចំណូលបានពីប្រេង និងឧស្ម័នរបស់រុស្ស៊ីកើនឡើងដល់ទ្វេដង appeared first on .

ឧបនាយករដ្ឋមន្ត្រីរុស្ស៊ី លោក Alexander Novak បានណែនាំក្រសួងថាមពលឲ្យរៀបចំសេចក្តីសម្រេចដើម្បីហាមឃាត់ការនាំចេញប្រេងសាំងចាប់ពីថ្ងៃទី១ ខែមេសា។ ការសម្រេចចិត្តនេះត្រូវបានធ្វើឡើងបន្ទាប់ពីកិច្ចប្រជុំស្តីពីស្ថានភាពទីផ្សារប្រេងរបស់ប្រទេស ដោយការហាមឃាត់នេះនឹងនៅតែមានសុពលភាពរហូតដល់ថ្ងៃទី៣១ ខែកក្កដា។

មិនតែប៉ុណ្ណោះ លោក Novak បានថ្លែងថា ការវិវត្តនៅក្នុងទីផ្សារថាមពលសកលដោយសារតែជម្លោះនៅមជ្ឈិមបូព៌ាកំពុងបណ្តាលឲ្យមានការប្រែប្រួលតម្លៃគួរឲ្យកត់សម្គាល់ ខណៈគោលដៅធំនៃការសម្រេចចិត្តនេះ គឺដើម្បីធ្វើឲ្យតម្លៃមានស្ថេរភាព និងផ្តល់អាទិភាពដល់ការធានាការផ្គត់ផ្គង់ក្នុងស្រុក។

ជម្រាបជូនថា ជម្លោះនៅមជ្ឈិមបូព៌ាបានធ្វើឲ្យលំហូរថាមពលឆ្លងកាត់ច្រកសមុទ្រ Hormuz ស្ទើរតែជាប់គាំងអស់រយៈពេលជិតមួយខែ។ នេះគឺជាផ្លូវទឹកដ៏សំខាន់សម្រាប់ការដឹកជញ្ជូនប្រេង និងឧស្ម័នធម្មជាតិរាវ (LNG) ចំនួន ២០% របស់ពិភពលោក៕​

The post រុស្ស៊ី នឹងហាមឃាត់ការនាំចេញប្រេងសាំងទាំងស្រុង រហូតដល់ខែកក្កដា appeared first on .

ស្របពេលដែលពិភពលោកកំពុងជួបវិបត្តិប្រេងឡើងថ្លៃ ដោយសារតែសង្គ្រាមនៅតំបន់មជ្ឈិមបូព៌ា ប្រទេសទាំងពីរគ្រោងនឹងចុះហត្ថលេខាលើកិច្ចព្រមព្រៀងធំៗជាច្រើន ពាក់ព័ន្ធនឹងការរុករក ការបូម និងការជួញដូរប្រេងកាត និងឧស្ម័នធម្មជាតិ។

អ្វីដែលគួរ​ឲ្យ​ចាប់អារម្មណ៍បំផុតនោះគឺ «មហិច្ឆតានុយក្លេអ៊ែរ» របស់វៀតណាម។ នាយករដ្ឋមន្ត្រី​វៀតណាម មានគោលដៅចង់កសាងរោងចក្រថាមពលនុយក្លេអ៊ែរ​ឲ្យ​បានក្នុងរយៈពេល៥​ឆ្នាំខាងមុខ ដូច្នេះហើយទើបទស្សនកិច្ចនេះនឹងផ្តោតខ្លាំងលើការចុះកិច្ចព្រមព្រៀងជាមួយរុស្ស៊ី ដើម្បីជួយកសាងឧស្សាហកម្មនុយក្លេអ៊ែររបស់វៀតណាម​ឲ្យ​លេច​ចេញជារូបរាង។ កាលពីដើមឆ្នាំ២០២៥ រុស្ស៊ីក៏ធ្លាប់បានបង្ហាញឆន្ទៈរួចហើយ ក្នុងការផ្ទេរបច្ចេកវិទ្យា និងជួយវៀតណាមលើវិស័យដ៏ទំនើបមួយនេះ។

នៅថ្ងៃទី២៣ ខែមីនានេះ លោក Pham Minh Chinh នឹងត្រូវជួបពិភាក្សាការងារជាមួយសមភាគីរុស្ស៊ី លោក Mikhail Mishustin ដើម្បីពង្រឹងកិច្ចសហប្រតិបត្តិការលើការបណ្តុះបណ្តាលធនធានមនុស្ស និងហេដ្ឋារចនាសម្ព័ន្ធថាមពល។ ក្នុងនាមជាមជ្ឈមណ្ឌលផលិតកម្មដ៏ធំមួយក្នុងតំបន់ វៀតណាមចាត់ទុកភាពជាដៃគូជាមួយរុស្ស៊ីគឺជា​កូន​សោរដ៏សំខាន់ ដើម្បីទប់ទល់នឹងវិបត្តិថាមពលសកល និងរក្សាសេដ្ឋកិច្ចជាតិ​ឲ្យ​មានស្ថិរភាព៕

The post រុស្ស៊ី នឹងបំពេញមហិច្ឆតា​នុយក្លេអ៊ែររបស់វៀតណាម​ទេ? ​ appeared first on .

នៅថ្ងៃទី១៧ ខែមីនា លោក Phiphat Ratchakitprakarn បានប្រាប់អ្នកយកព័ត៌មានថា រដ្ឋមន្ត្រីការបរទេសថៃ លោក Sihasak Phuangketkeow បានពិភាក្សាអំពីការទិញប្រេងឆៅពីរុស្ស៊ីនៅក្នុងកិច្ចប្រជុំមួយនៅអឺរ៉ុបកាលពីមួយថ្ងៃមុន។ ការចរចាកំពុងដំណើរការ ហើយរុស្ស៊ីបានត្រៀមខ្លួនរួចជាស្រេចដើម្បីផ្គត់ផ្គង់ប្រេងរបស់ពួកគេ ដល់ប្រទេសថៃ។

ប្រេងឆៅរបស់រុស្ស៊ីត្រូវបានទទួលរងនូវទណ្ឌកម្មរបស់លោកខាងលិចចាប់តាំងពីជម្លោះនៅអ៊ុយក្រែនក្នុងឆ្នាំ២០២២ មក។ តែទោះជាយ៉ាងណាក៏ដោយ ដើម្បីបន្ថយការកើនឡើងនៃតម្លៃប្រេងពិភពលោក សហរដ្ឋអាមេរិក បានអនុញ្ញាតឲ្យប្រទេសនានាទិញប្រេងពីរុស្ស៊ីដែលកំពុងដឹកជញ្ជូនតាមសមុទ្ររហូតដល់ថ្ងៃទី១១ ខែមេសា។

គួរឲ្យដឹងថា ជម្លោះនៅមជ្ឈិមបូព៌ាបានរំខានដល់លំហូរថាមពលតាមរយៈច្រកសមុទ្រ Hormuz ដែលជាផ្លូវទឹកដ៏សំខាន់ ធ្លាប់ដឹកជញ្ជូនប្រេង និងឧស្ម័នចំនួន ២០% របស់ពិភពលោក។ ហើយដោយសារតែការផ្គត់ផ្គង់មានកម្រិត បានបណ្តាលឲ្យតម្លៃប្រេងឆៅពិភពលោកកើនឡើងយ៉ាងខ្លាំង។

ជម្រាបជូនផងដែរថា យោងតាមកាសែត Bangkok Post ក៏បានរាយការណ៍ផងដែរថា ដើម្បីទប់ទល់នឹងស្ថានភាពថ្មីៗនេះ ប្រទេសថៃបានប្រកាសកាលពីដើមខែនេះថា ខ្លួននឹងបញ្ឈប់ការនាំចេញប្រេងឥន្ធនៈចម្រាញ់ទៅកាន់ប្រទេសនានា លើកលែងតែឡាវ និងមីយ៉ាន់ម៉ា។ លើសពីនេះ ដើម្បីជំរុញសន្តិសុខផ្គត់ផ្គង់ ក្រសួងថាមពលបានទាមទារឲ្យក្រុមហ៊ុនប្រេងឥន្ធនៈបង្កើនសមាមាត្របម្រុងជាកាតព្វកិច្ចរបស់ពួកគេចន្លោះពី ១% ទៅ ៣% ផងដែរ៕​

The post ថៃ អាចនឹងទិញចូលប្រេងពីប្រទេសរុស្ស៊ី ចំពេលកំពុងមានវិបត្តិ appeared first on .