នៅក្នុងពិធីនោះ លោក ឃួង ស្រេង បានថ្លែងថា បច្ចុប្បន្នទោះបីសេដ្ឋកិច្ចជាតិត្រូវបានរាំងស្ទះដោយវិបត្តិជាសកល និងភាពមិនច្បាស់លាស់នៃសេដ្ឋកិច្ចពិភពលោកយ៉ាងណាក្តី ក៏គម្រោងអភិវឌ្ឍន៍ជាច្រើនបាននិងកំពុងដំណើរការសាងសង់ក្នុងរាជធានីភ្នំពេញ ដោយមានរោងចក្រវិនិយោគប្រមាណ ៧៦៣រោងចក្រ ក្នុងនោះរោងចក្រដែលបានស្នើសុំចុះបញ្ជីនៅអនុគណៈកម្មាធិការវិនិយោគរាជធានីភ្នំពេញមានចំនួន៨១រោងចក្រ កើនឡើង១៨រោងចក្រ មានតម្លៃប៉ាន់ស្មានផលិតផលសរុប៦,៥៩៣លានដុល្លាអាមេរិក គឺកើនឡើងយ៉ាងគំហុកក្នុងអត្រាប្រមាណ២១៨% បើធៀបនឹងតម្លៃប៉ាន់ស្មានផលិតផលសរុបក្នុងឆ្នាំ២០២២កន្លងទៅ។

លោកបន្តថា ទាំងអស់នេះហើយជាការបង្ហាញឱ្យឃើញពីសញ្ញាណវិជ្ជមាននៃការវិនិយោគ ក្រោយពេលបើកដំណើរការសេដ្ឋកិច្ច-សង្គមពេញលេញឡើងវិញលើគ្រប់វិស័យនារយៈពេល២ឆ្នាំចុងក្រោយនេះ។

សូមជម្រាបជូនថា គិតមកដល់បច្ចុប្បន្នរាជធានីភ្នំពេញ មានរោងចក្រសហគ្រាសសរុបជាង១ពាន់រោងចក្រ មានកម្មករនិយោជិកប្រមាណជាង៦៦ម៉ឺននាក់ ដែលមានប្រាក់ឈ្មួលសរុបជាង២ពាន់លានដុល្លារក្នុងមួយឆ្នាំ ក្នុងនោះសហគ្រាសវិស័យកាត់ដេរមានជាង៧០០រោងចក្រ មានកម្មករនិយោជិកសរុបជាង៣៤ម៉ឺននាក់ ដែលមានប្រាក់ឈ្នួលសរុបជាង១ពាន់លានដុល្លារក្នុងមួយឆ្នាំ។ជាមួយគ្នានេះ រាជធានីភ្នំពេញគឺជាប៉ូលសេដ្ឋកិច្ចទី១ និងជាតំបន់ដែលមានការអភិវឌ្ឍន៍រោងចក្រសហគ្រាសច្រើនជាងគេផងដែរ៕

The post លោក ឃួង ស្រេង៖ ក្នុងឆ្នាំ២០២៣ រាជធានីភ្នំពេញមានរោងចក្រវិនិយោគសរុបប្រមាណ ៧៦៣រោងចក្រ appeared first on .