ការលើកឡើងពីតំណាងក្រុមហ៊ុនខាងលើ បានធ្វើឡើងក្នុងពេលជួបពិភាក្សាការងារ ជាមួយលោកឧបនាយករដ្ឋមន្ត្រី ស៊ុន ចាន់ថុល បានធ្វើដំណើរទៅ​កាន់​ទីក្រុងហ្សិនចិន (Shenzhen) ដែលជាទីក្រុងឧស្សាហ៍កម្មបច្ចេកវិទ្យាដ៏ធំរបស់ចិន កាលព្រឹកថ្ងៃសុក្រ ទី២០ ខែតុលា ឆ្នាំ២០២៣។

ថ្លែងក្នុងជំនួបនោះ លោកស្រី Chuqiao Li អនុប្រធានក្រុមហ៊ុន SHENZHEN XIDESHENG Bicycle Co., Ltd. (XDS) បានថ្លែងអំណរគុណដល់រាជរដ្ឋាភិបាលកម្ពុជា ដែលបានផ្តល់​ការយកចិត្តទុកដាក់ជាខ្លាំង និងបានផ្តល់ឱកាសឱ្យក្រុមហ៊ុនមានលទ្ធភាពក្នុងការពង្រីកច្រវាក់​ផលិតកម្ម​របស់​ខ្លួនបានយ៉ាងឆាប់រហ័ស។

លោកស្រីបន្តថា៖«សម្រេចគោលដៅទៅថ្ងៃខាងមុខ ក្រុមហ៊ុនបានបង្ហាញអំពីចក្ខុវិស័យ ក្នុងការពង្រីករោង​ចក្រ​របស់ខ្លួនដែលមានទីតាំងក្នុងក្រុងបាវិត ឱ្យមានទំហំធំដូចរោងចក្រក្នុងទីស្នាក់ការកណ្តាលទីក្រុង Shenzhen នេះផងដែរ»។

ជុំវិញការលើកឡើងនេះ លោកឧបនាយករដ្ឋមន្ត្រី ស៊ុន ចាន់ថុល អនុប្រធានទី១ នៃក្រុមប្រឹក្សា​អភិ​វឌ្ឍន៍​កម្ពុជា បានថ្លែងអំណរគុណដល់ក្រុមហ៊ុន XDS Bicycle ដែលសម្រេចចិត្តចូលមក​វិនិយោគបង្កើតរោងចក្រនៅកម្ពុជា រហូតបច្ចុប្បន្ននេះ បានផ្តល់ឱកាសការងារជូន​ដល់ប្រជា​ពលរដ្ឋ​ប្រមាណ ១,៤០០នាក់រួចមកហើយ។

ដោយលោកឧបនាយករដ្ឋមន្ត្រី ក៏បានអនុញ្ញាតឱ្យក្រុមហ៊ុនលើកជា​សំណូមពរ និងបង្ហាញនូវបញ្ហា​ប្រឈម​ដែល​ក្រុមហ៊ុនកំពុងជួប ដើម្បីឱ្យរដ្ឋាភិបាលកម្ពុជាចូលរួមដោះស្រាយ ក្នុងទិសដៅជម្រុញឱ្យក្រុមហ៊ុនវិនិយោគ​ពង្រីករោងចក្របន្ថែមទៀតនៅកម្ពុជា ព្រមទាំងអាចប្រែក្លាយជាមជ្ឈមណ្ឌលនៃឧត្តមភាព (Center of Excellence) នៅក្នុងតំបន់ និងនៅលើពិភពលោក ដើម្បីបង្កើតការងារបន្ថែមដល់ប្រជាពលរដ្ឋកម្ពុជា។

គួរបញ្ជាក់ដែរថា តាមរយៈជំនួបនោះដែរ លោកឧបនាយករដ្ឋមន្ត្រី ស៊ុន ចាន់ថុល ក៏បានឆ្លៀតយកឱកាសនេះផ្តួចផ្តើមគំនិតឱ្យមានរៀបចំ​ការជិះ​កង់​របស់ក្រុមហ៊ុនខាងលើ (XDS Bike Tour) នៅក្នុងខេត្តសៀមរាប ដើម្បីគោលដៅសំខាន់ៗចំនួន ៤ រួមមាន៖ ១) ផ្សព្វផ្សាយអំពីការវិនិយោគរបស់ក្រុមហ៊ុន XDS នៅកម្ពុជា, ២) ផ្សព្វផ្សាយអំពីវិស័យ​ទេស​ចរណ៍នៅប្រទេសកម្ពុជា ៣) ផ្សព្វផ្សាយផលិតផលរបស់ក្រុមហ៊ុន និង៤) រៃអង្គាសថវិកាជូនដល់មន្ទីរ​ពេទ្យ​កុមារអង្គរផងដែរ៕

The post ក្រុមហ៊ុនចិនមួយ ចង់ពង្រីករោង​ចក្រ​ផលិតកង់ក្នុងក្រុងបាវិតឱ្យកាន់តែធំ ដើម្បីពង្រីកច្រវាក់​ផលិតកម្មបន្ថែម appeared first on .

យោងតាមវេបសាយផ្លូវការរបស់ក្រុមប្រឹក្សាអភិវឌ្ឍន៍កម្ពុជា ហៅកាត់ថា CDC បានឱ្យដឹងថា ប្រទេសកម្ពុជាក្លាយជាប្រទេសនាំមុខគេក្នុងការនាំចេញកង់នៅក្នុងអាស៊ាន ដោយឡែកប្រទេសនៅក្នុងសហភាពអឺរ៉ុប និងសហរដ្ឋអាមេរិក នៅតែជាទីផ្សារនាំចេញសំខាន់ដដែល។

បើតាម CDC កម្ពុជាបានធ្វើការនាំចេញកង់គិតជាទឹកប្រាក់មានចំនួនជាង ៥៣៣លានដុល្លារអាមេរិក ទៅកាន់ទីផ្សារអន្តរជាតិ នៅក្នុងឆ្នាំ២០២០។ការនាំចេញនេះ មានចំនួនកើនឡើង២៧% ធៀបទៅនឹងឆ្នាំ២០១៩។លើសពីនេះ ការនាំចេញកង់ពីកម្ពុជាទៅកាន់សហរដ្ឋអាមេរិកបានកើនឡើងប្រមាណ ៣ដង ដែលធ្វើឱ្យកម្ពុជាមានឈ្មោះជាប្រទេសដែលនាំមុខគេ ក្នុងការនាំចេញកង់នៅក្នុងតំបន់អាស៊ាន។

ដោយឡែកការនាំចេញកង់ទៅកាន់សហភាពអឺរ៉ុបវិញ ក្នុងមួយឆ្នាំៗ កង់ចំនួនជាង១.៥លានគ្រឿង ត្រូវបាននាំចេញពីតំបន់សេដ្ឋកិច្ចពិសេសនៃប្រទេសកម្ពុជា។ហើយជារៀងរាល់ឆ្នាំ ចំនួននៃការនាំចេញកង់បានកើនឡើងគួរឱ្យកត់សម្គាល់ ដែលប្រមាណ២/៣ នៃការនាំចេញសរុបគឺនាំចេញទៅកាន់ប្រទេសនៅក្នុងសហភាពអឺរ៉ុប។

CDC បានគូសបញ្ជាក់ថា ប្រទេសកម្ពុជាមិនតែជាប្រទេសមួយក្នុងចំណោមប្រទេសដែលនាំមុខគេ ក្នុងការនាំចេញកង់នៅក្នុងពិភពលោកប៉ុណ្ណោះទេ កម្ពុជាក៏ជាប្រទេសដែលផ្គត់ផ្គង់គ្រឿងបង្គុំរបស់កង់ដ៏ឈានមុខមួយផងដែរ។ក្នុងនោះ កម្ពុជាបានផលិតកង់ និងគ្រឿងបង្គុំកង់យ៉ាងច្រើនប្រភេទសម្រាប់បំពេញតម្រូវការក្នុងស្រុក និងក្រៅស្រុក។

យោងតាមរបាយការណ៍ក្រសួងពាណិជ្ជកម្ម រយៈពេល៦ខែ ពោលចាប់ពីខែមករា ដល់ខែមិថុនា ឆ្នាំ២០២៣នេះ កម្ពុជាទទួលបានចំណូលជាង ៣៣១លានដុល្លារ ពីការនាំចេញកង់ ថយចុះ ៣០.៥២% បើធៀបនឹងរយៈពេលដូចគ្នា នៅឆ្នាំ២០២២ មានចំនួនជាង៤៧៧លានដុល្លារ។ប្រទេសកម្ពុជា ជាប់ចំណាត់ថ្នាក់លេខ១ នៅតំបន់អាស៊ាន ក្នុងការនាំចេញកង់ និងជាប់ចំណាត់ថ្នាក់លេខ៥ ក្នុងពិភពលោក បន្ទាប់ពី ចិន តៃវ៉ាន់ ហូឡង់ និងអាល្លឺម៉ង់។

គួរបញ្ជក់ថា បច្ចុប្បន្ន កម្ពុជាមានរោងចក្រ សម្រាប់ដំឡើងកង់ចំនួន៥ រួមមាន  រោងចក្រA AND J (CAMBODIA) CO.,LTD.រោងចក្រ SPEEDTECH INDUSTRIAL CO., LTD. រោងចក្រ SMART TECH (CAMBODIA) CO.,LTD. រោងចក្រ XDS BICYCLE (CAMBODIA) CO.,LTD. រោងចក្រ EVERGRAND BICYCLE (CAMBODIA) CO., LTD៕

The post ប្រទេសកម្ពុជា នៅតែជាប្រទេសនាំមុខគេក្នុងការនាំចេញកង់ និងផ្គត់ផ្គង់គ្រឿងបង្គុំកង់ appeared first on .