លោក ងិន ឆាយ

ក្រសួងកសិកម្ម ត្រៀមបម្រុងគ្រាប់ពូជស្រូវ២ពាន់តោន និងពូជបន្លែ៥០តោន សម្រាប់ជួយកសិករពេលជួបគ្រោះធម្មជាតិ

ឧកញ៉ា ឆ្នាំងដី — Thu, 21 Jul 2022 03:24:57 +0000

លោក ងិន ឆាយ ប្រតិភូរាជរដ្ឋាភិបាលទទួលបន្ទុកជាអគ្គនាយក នៃអគ្គនាយកដ្ឋានកសិកម្ម បានបញ្ជាក់ថា ក្រសួងកសិកម្ម រុក្ខាប្រមាញ់និងនេសាទ បានត្រៀមគ្រាប់ពូជស្រូវចំនួន២ពាន់តោន និងគ្រាប់ពូជ ៥០តោន សម្រាប់អន្តរាយគមន៍ជួយកសិករពេលជួបគ្រោះធម្មជាតិ។ ការបញ្ជាក់របស់លោក ងិន ឆាយ បានធ្វើឡើងក្នុងសន្និសីទសារព័ត៌មាន ស្ដីពី “សមិទ្ធផលសម្រេចបានរយៈពេល ៥ឆ្នាំកន្លងមក របស់ក្រសួងពាណិជ្ជកម្ម” កាលពីថ្ងៃទី២១ ខែកក្កដា ឆ្នាំ២០២២ នៅទីស្ដីការគណៈរដ្ឋមន្រ្ដី ។

លោក ងិន ឆាយ បន្ថែមថា ក្រសួងក៏ត្រៀមមន្ត្រីជំនាញសម្រាប់អន្តរាយគមន៍ពេលផ្ទុះឡើងនូវសមាភាពចង្រៃ ផ្តល់ការបណ្តុះបណ្តាលផ្នែកបច្ចេកទេសប្រើប្រាស់ជីនិងថ្នាំកសិកម្មអោយចំគោលដៅ និងផ្សារភ្ជាប់វិស័យឯកជនជាមួយកសិករផងដែរ។

ទន្ទឹមគ្នានេះ លោក ងិន ឆាយ ក៏បានអំពាវនាវដល់អាជ្ញាធរមួលដ្ឋានត្រូវរួសរាន់ចុះវាយតម្លៃទៅលើផលប៉ះពាល់ឲ្យបានលឿន នៅពេលគ្រោះធម្មជាតិបំផ្លាញផលដំណាំប្រជាពលរដ្ឋ និងធ្វើរបាយការណ៍បានច្បាស់លាស់ ដើម្បីក្រសួងផ្តល់ជូនគ្រាប់ពូជត្រលប់ទៅវិញកុំឲ្យមានភាពយឺតយ៉ាវ។

បើតាមគណ:កម្មាធិការជាតិគ្រប់គ្រងគ្រោះមហន្តរាយ បានឲ្យដឹងថា គិតចាប់ពីថ្ងៃទី១១ ដល់ថ្ងៃទី១៨ ខែកក្កដា ឆ្នាំ២០២២ ដំណាំស្រូវជាង១ពាន់ហិកតា រីឯគ្រាប់ពូជបន្លែ មានជិត៨០ហិកតា បានរងផលប៉ះពាល់ពីជំនន់ទឹកភ្លៀង។ ដំណាំស្រូវនិងដំណាំរួមផ្សំទាំងនេះ មាននៅក្នុងខេត្តចំនួន៤ រួមមាន ខេត្តបាត់ដំបង កោះកុង ក្រចេះ និងខេត្តពោធិ៍សាត់៕

The post ក្រសួងកសិកម្ម ត្រៀមបម្រុងគ្រាប់ពូជស្រូវ២ពាន់តោន និងពូជបន្លែ៥០តោន សម្រាប់ជួយកសិករពេលជួបគ្រោះធម្មជាតិ appeared first on .

ផ្លែមៀនប៉ៃលិន មានក្តីសង្ឃឹមខ្ពស់អាចនាំចេញទៅប្រទេសចិនបាននៅក្នុងឆ្នាំនេះ ក្រោយឆ្លងកាត់វាយតម្លៃចុងក្រោយ

ឧកញ៉ា ឆ្នាំងដី — Tue, 19 Jul 2022 09:08:08 +0000

ផ្លែមៀនប៉ៃលិនរបស់កម្ពុជា មានភាគរយខ្ពស់អាចនឹងនាំចេញទៅកាន់ប្រទេសចិនបាន នៅក្នុងអំឡុងពេលប្រមូលផល នាខែសីហា និងខែកញ្ញា ឆ្នាំ២០២២ខាងមុខ ក្រោយពីការវាយតម្លៃចុងក្រោយរបស់ អគ្គរដ្ឋបាលគយចិន ឃើញថាផ្លែមៀនប៉ៃលិន មានគុណភាពស្របតាមស្តង់ដារតម្រូវរបស់ចិន។ នេះបើតាមការបញ្ជាក់របស់លោក ងិន ឆាយ ប្រតិភូរាជរដ្ឋា ភិបាលទទួលបន្ទុកជាអគ្គនាយក នៃអគ្គនាយកដ្ឋានកសិកម្ម នៅក្នុងសន្និសីទសារព័ត៌មានដែលរៀបចំឡើងដោយអង្គភាពអ្នកនាំពាក្យរាជរដ្ឋាភិបាល នាថ្ងៃទី១៩ ខែកក្កដា ឆ្នាំ២០២២នេះ។

លោក ងិន ឆាយ បានបញ្ជាក់ទៀតថា អគ្គរដ្ឋបាលគយចិន បានវាយតម្លៃចុងក្រោយ និងសន្និដ្ឋានថា ផ្លែមៀនប៉ៃលិនរបស់ កម្ពុជមានគុណភាពល្អ មិនមានសមាសភាពចង្រៃដែលប្រទេសចិនហាមឃាត់នោះទេ និងតម្លៃចម្ការមៀនរបស់កសិករបានអនុវត្តន៍តាមស្តង់ដារបានត្រឹមត្រូវ។

លោក ងិន ឆាយ បន្ថែមថា ក្រសួងកសិកម្ម រុក្ខាប្រមាញ់ និងនេសាទ ក៏កំពុងព្យាយាមចរចាជាមួយភាគីចិន ឲ្យមានច្រកពិសេសសម្រាប់នាំចូលផលិតផលកសិកម្មគ្រប់ប្រភេទនៅកាន់ទីផ្សារប្រទេសចិន។ ច្រកពិសេសនោះ គឺធ្វើយ៉ាងណាឲ្យមានការពន្លឿនការត្រួតពិនិត្យបច្ចេកទេសផ្សេងៗលើទំនិញកសិកម្មរបស់កម្ពុជា។

គួរបញ្ជាក់ថា រយៈពេល ៥ ឬ ៦ឆ្នាំចុងក្រោយនេះ ភាគីទាំងពីរបានធ្វើការដោះរបាំងភូតគាមអនាម័យ ចំនួន៦មុខ ហើយ រួមមាន ដំឡូងមី ពោត កញ្ចុងអង្ករ ស្វាយ និងចេក ដែលបាននាំចេញទៅចិន រួចរាល់ហើយ ដោយពេលនេះកំពុងចរចាគ្នា លើការនាំចេញ២មុខទៀត គឺផ្លែមៀនប៉ៃលិន និង ត្រីប្រា ដែលសង្ឃឹមថានឹងបញ្ចប់ក្នុង២០២២នេះ។

ក្រសួងកសិកម្ម រុក្ខាប្រមាញ់និងនេសាទ ក៏បានឲ្យដឹងដែរថា ក្រៅពីគម្រោងនាំចេញផលិតផលកសិកម្មនៅមានគម្រោងដែលសំខាន់មួយទៀតដែរ គឺភាគីចិនបាននិងកំពុង ជំរុញផែនការអនុវត្តផែនការទំនើបកម្មកសិកម្មនៅកម្ពុជា បានចុះវាយតម្លៃនៅតាមបណ្តាខេត្ត អំពីស្ថានភាពនៅកម្ពុជា។ តាមរយៈគម្រោងនេះ ក្រសួងក៏បានបង្ហាញការជឿជាក់ដែរថា បេសកកម្មរបស់មិត្តចិន អាចនឹងបន្តការសិក្សាបន្ថែមទៀត តាមរយៈការចុះអនុស្សរណៈយោគយល់គ្នា នាពេលកន្លងមក៕

The post ផ្លែមៀនប៉ៃលិន មានក្តីសង្ឃឹមខ្ពស់អាចនាំចេញទៅប្រទេសចិនបាននៅក្នុងឆ្នាំនេះ ក្រោយឆ្លងកាត់វាយតម្លៃចុងក្រោយ appeared first on .

មន្រ្តីរដ្ឋាភិបាលថា កម្ពុជាកំពុងជួបបញ្ហាប្រឈមលើកសិករមួយចំនួនប្រើប្រាស់ជីគីមីមិនទាន់ត្រឹមត្រូវ

ឧកញ៉ាកោះក្របី — Fri, 25 Feb 2022 07:32:36 +0000

លោក ងិន ឆាយ ប្រតិតូរាជរដ្ឋាភិបាលកម្ពុជា ទទួលបន្ទុកជាអគ្គនាយកនៃអគ្គនាយកដ្ឋានកសិកម្ម នៃក្រសួងកសិកម្ម ថ្លែងក្នុងសន្និបាតបូកសរុបការងារប្រចាំឆ្នាំ២០២១ និងលើកទិសដៅបន្តសម្រាប់ឆ្នាំ២០២២ របស់សហព័ន្ធស្រូវអង្ករកម្ពុជា កាលពីថ្ងៃទី២៣ ខែកុម្ភៈនេះ បានលើកឡើងនូវវឌ្ឍនភាពផ្នែកផលិតកម្មដំណាំស្រូវ និងការនាំចេញក្នុងឆ្នាំ២០២១ កន្លងទៅដែលអនុត្តន៍បានចំនួន ៣.៥លានហិកតា ស្មើនឹង ១១៦% នៃផែនការ។ ក្នុងនោះ ៦៥ ម៉ឺនហិកតាជាផ្ទៃដីស្រូវប្រាំងដែលទទួលបានទិន្នផលសរុបចំនួន ១២.២១លានតោន ខណៈស្រូវប្រាំងមានចំនួន ២.៩៣ លានតោន។

បើតាមលោក ងិន ឆាយ កម្ពុជាក៏កំពុងជួបបញ្ហាប្រឈមមួយចំនួនដែរ ដូចជាការមិនទាន់មានគ្រាប់ពូជស្រូវគុណភាពល្អសម្រាប់ដាំដុះគ្រប់គ្រាន់ ប្រព័ន្ធស្រោចស្រពមិនទាន់គ្របដណ្តប់ពេញលេញ កសិករមួយចំនួនប្រើប្រាស់ជីគីមីមិនទាន់ត្រឹមត្រូវ ថ្លៃដើមធាតុចូលកសិកម្មនៅមានតម្លៃថ្លៃ និងការផលិតពូជមិនទាន់មានលក្ខណៈប្រមូលផ្តុំ។

ទន្ទឹមនឹងនោះ លោកក៏បានបង្ហាញអំពីការជំរុញការធ្វើទំនើបកម្មនៃប្រព័ន្ធគ្រប់គ្រង និងសេវាកម្មនានា ជាពិសេស ការស្នើសុំវិញ្ញាបនបត្រ ភូតគាមអនាម័យ។

ថ្លែងក្នុងឪកាសនេះដែរ ឧកញ៉ា ហ៊ុនឡាក់ ប្រធានក្រុមប្រឹក្សាភិបាលសហព័ន្ធស្រូវអង្ករកម្ពុជា គូសបញ្ជាក់ថា ក្នុងឆ្នាំ២០២១ ទោះបីជាស្ថិតនៅក្នុងកាលៈទេសៈប្រឈមនៃការរីករាលដាលជំងឺកូវី-១៩ យ៉ាងណាក៏ដោយ ការនាំចេញរបស់កម្ពុជាសម្រេចបានចំនួន ៦១៧ ០៦៩ តោន ស្មើនឹង ៤១៨.១៥ លានដុល្លារសហរដ្ឋអាមេរិក។ ដោយឡែក ការនាំស្រូវចេញវិញសម្រេចបានចំនួន ៣ ៥២៧ ៤១៨ តោន ស្មើលនឹង ៨៤៥.៩៥ លានដុល្លារសហរដ្ឋអាមេរិក។

លោកបន្តថា បើនិយាយជារួម គឺការនាំចេញស្រូវនិងអង្ករសរុបបានចំនួនជាង ១ ២០០ លានដុល្លារសហរដ្ឋអាមេរិក ឬ ចំណូលពីការនាំចេញជាមធ្យមប្រមាណជា ១០០ លានដុល្លារសហរដ្ឋអាមេរិក្នុងមួយខែ ដែលជាប្រភពចំណូលសេដ្ឋកិច្ចមួយយ៉ាងសំខាន់សម្រាប់ប្រទេសកម្ពុជា ជាពិសេសប្រជាកសិករក្នុងស្ថានការណ៍នៃការរីករាលដាលនៃជំងឺឆ្លងកូវីដ-១៩។

ឧកញ៉ា សុង សារ៉ន ប្រធានសហព័ន្ធស្រូវអង្ករកម្ពុជា ក៏បានធ្វើការស្ទាបស្ទង់ពីលទ្ធភាពនៃការកិនកែច្នៃលើបរិមាណ ៧៥ ម៉ឺនតោននេះ ដែលលោកថា យើងមានសមត្ថភាពគ្រប់គ្រាន់លើការកិន-កែច្នៃ និងការស្តុកទុក បើស្ថានភាពនៃជំងឺកូវីដ-១៩ បានធូរស្បើយ ហើយមានទូកុងតែន័រគ្រប់គ្រាន់ និងការដឹកជញ្ជូនតាមផសមុទ្រវិលមករកប្រក្រតីភាពវិញ។

លោកឧកញ៉ាថ្លែងបញ្ជាក់ថា មូលដ្ឋានទីផ្សារ គឺយើងមានហើយ ជាពិសេសប្រទេសចិន ប្រមាណជា ៤០ម៉ឺនតោនក្នុងដៃ ទីផ្សារសហគមន៍អឺរ៉ុបបានបើកទូលាយ ចំណែកទីផ្សារប្រទេសអាស៊ាន ជាពិសេសប្រទេសម៉ាឡេស៊ី ព្រុយណេ និងទីផ្សារផ្សេងៗទៀតដូចជា ប្រទេសអូស្ត្រាលី ហ្កាប៊ុង ជាដើម។

ជាមួយគ្នានេះ លោក សុខ ពុទ្ធិវុធ រដ្ឋលេខាធិការក្រសួងប្រៃសណីយ៍ និងទូរគមនាគមន៍ និងជាសហប្រធានក្រុមការងារ ឈ ផ្នែកស្រូវអង្ករនៃវេទិការរាជរដ្ឋាភិបាលវិស័យឯកជន ក៏បានអំពាវនាវឱ្យបន្តនូវការសហការគ្នាឱ្យបានរឹងមាំបន្ថែមទៀតដើម្បីឱ្យផែនការនាំចេញឆ្នាំ២០២២ នេះសម្រេចចទៅបាននឹងឈានទៅរកការនាំចេញអង្ករកម្ពុជាឱ្យបាន ១លានតោនក្នុងពេលដ៏ខ្លីខាងមុខ៕

The post មន្រ្តីរដ្ឋាភិបាលថា កម្ពុជាកំពុងជួបបញ្ហាប្រឈមលើកសិករមួយចំនួនប្រើប្រាស់ជីគីមីមិនទាន់ត្រឹមត្រូវ appeared first on .