កម្មវិធី​សន្និបាត​បូកសរុប និង​បើក​ការ​តាំងពិព័រណ៍​ ដែលរៀបចំឡើងដោយសមាគមអ្នកសាងសង់កម្ពុជា និង​ក្រសួងស្ថាប័នជំនាញមួយចំនួន​ ​​បាន​ប្រារព្វ​ឡើង​ក្រោម​អធិបតីភាព​របស់​លោក​ ផារ៉ា មង្គល រដ្ឋលេខាធិការ តំណាង​លោក​ សាយ សំអាល់ ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគររូបនីយកម្ម និងសំណង់ ព្រមទាំង​មានភ្ញៀវជាតិ និងអន្តរជាតិ ជាច្រើនកុះករ។ ក្នុងកម្មវិធីពិព័រណ៍នេះ ធ្វើឡើងរយៈពេល៣ថ្ងៃ ចាប់ពីថ្ងៃទី៦ ដល់ ៨ ខែធ្នូ ឆ្នាំ២០២៣ នៅមជ្ឈមណ្ឌល​ពិព័រណ៍​កោះពេជ្រ ដែលមានភ្ញៀវជាតិ និងអន្តរជាតិ ដែលជាអ្នកវិនិយោគ អ្នកអភិវឌ្ឍន៍ អ្នកស្វែងរកដៃគូ ដើម្បីវិនិយោគ និងអភិវឌ្ឍន៍ ម្ចាស់រោងចក្រផលិតផលសម្ភារៈសំណង់ និងធុរកិច្ចជនលើវិស័យសំណង់​ជាច្រើនរូប បានអញ្ជើញ​ចូលរួម ដាក់តាំងបង្ហាញផលិតផល និងទស្សនាយ៉ាងច្រើន។

សូម​ជម្រាប​ថា បើ​តាម​ការ​លើកឡើង​របស់​​​អ្នកឧកញ៉ា ពុង ឃាវសែ បានឱ្យដឹងថា សមាគមអ្នកសាងសង់កម្ពុជា ​បានរៀបចំ​មហា​សន្និបាត​​ ចំនួន​១៣​លើក​​ហើយ ​​រាប់​ទាំង​ឆ្នាំ២០២៣​នេះ និង​ជាលើកទី១០ នៃការរៀបចំ​ពិព័រណ៍​ឧស្សាហកម្ម​សំណង់​កម្ពុជា-អន្តរជាតិ។ អ្នកឧកញ៉ា បាន​បញ្ជាក់​ថា ពិព័រណ៍​ឧស្សាហកម្ម​សំណង់​កម្ពុជា-អន្តរជាតិ ជាពិព័រណ៍​មានលក្ខណៈលំដាប់អន្តរជាតិ និងធំជាងគេនៅប្រទេសកម្ពុជា ហើយ​សម្រាប់​ឆ្នាំនេះ គឺ​មានក្រុមហ៊ុន​ចូលរួម​ចំនួន ១៣៣ក្រុមហ៊ុន ស្មើនឹង ២៣៩ស្តង់ និងមានផលិតផលជាង ១ពាន់មុខ និង ៥០ប្រភេទនៃ​សេវាកម្ម ហើយផលិត​ផល​ទាំងនោះ មានទាំង​ផលិតផលក្នុង​ស្រុក និង​ផលិតផល​នាំ​ចូលមកពីបណ្តា​ប្រទេស​ជាច្រើន​ផងដែរ៕

The post អ្នកឧកញ៉ា ពុង ឃាវសែ និងអ្នកឧកញ៉ា គិត ម៉េង ចូលរួមពិធីសម្ពោធបើកការតាំងពិព័រណ៍ឧស្សាហកម្មសំណង់កម្ពុជា-អន្តរជាតិ ឆ្នាំ២០២៣ appeared first on .