លោក សោម ពិសិដ្ឋ

លោក សោម ពិសិដ្ឋ អះអាងថា អាជីវករមួយចំនួនតាំងខ្លួនជាអធិរាជឆ្នេរសមុទ្រកែប

ឧកញ៉ាកោះក្របី — Sun, 02 Oct 2022 07:01:36 +0000

អភិបាលខេត្តកែប បានលើកឡើងអះអាងថា អាជីវករមួយចំនួនតាំងខ្លួនជាអធិរាជប្រចាំតំបន់ឆ្នេរកែប។ លោកថា វាដល់ពេលវេលាដែលអាជីវករត្រូវចូលរួមជាមួយអជ្ញាធរ ដើម្បីដោះស្រាយកុំឲ្យប៉ះពាល់ដលើសិទ្ធិប្រជាជនកម្ពុជាទាំង១៦លាននាក់។

ការថ្លែងបញ្ជាក់អះអាងពីលោក សោម ពិសិដ្ឋ អភិបាលខេត្តកែប តាមរយៈផេកព័ត៌មានខេត្តកែបនាពេលថ្មីៗកន្លងទៅ ក្រោយពីអាជីវកររកសុីជួលកន្លែងតំបន់ឆ្នេរឲ្យភ្ញៀវទេសចរណ៍អង្គុយលេងតាមឆ្នេរសមុទ្រយកថ្លៃលើសលប់ ដែលមានតូបមួយតំលៃខ្ពស់ចន្លោះ ២០$ ទៅ ៣០$ ថ្លៃជាងសណ្ឋាគារ ផ្ទះសំណាក់មួយយប់ទៅទៀត។ ជាពិសេសនារដូវបុណ្យទានម្តងៗ សូម្បីតែចតឡានលើថ្នល់ឈប់រយៈពេលខ្លីក៏យកប៉ាស៊ី ៥០០០រៀលផងដែរ។

ជុំវិញបញ្ហានេះ ហើយដើម្បីដោះស្រាយ លោក សោម ពិសិដ្ឋ បានបញ្ជាក់ថា ផ្នត់គំនិតអាក្រក់ៗនេះត្រូវការប្រើពេលវេលា ដោយចាប់ផ្តើមអប់រំផ្សព្វផ្សាយទៅកាន់អាជីវករជាជំហានដំបូង។ លោកបន្តថា ក្នុងករណីអាជីវករដើរហួសបន្ទាត់ក្រហម អាជ្ញាធរត្រូវតែបន្តអប់រំ ប៉ុន្តែប្រសិនបើនៅតែបន្តសកម្មភាពដដែលនឹងចាត់វិធានការរដ្ឋបាលនិងចាត់ការតាមផ្លូវច្បាប់។

លោក ពិសិដ្ឋ ថ្លែងថា៖ “នៅតាមទីសាធារណៈអត់មានឱ្យអាជីវករណាមួយ ត្រូវបានអាជ្ញាធរអនុញ្ញាតិឱ្យពលរដ្ឋរកស៊ីលើទីសាធារណៈឡើយ។ ទន្ទឹមនឹងនេះលោកក៏ព្រមានដល់អាជ្ញាធរណាដែលហ៊ានអនុញាតិឱ្យរកស៊ី បុគ្គលនោះនឹងទទួលខុសត្រូវចំពោះមុខច្បាប់ និងអាជីវករ”។

អភិបាលខេត្តកែបរូបនេះបញ្ជាក់ថា លោកបានខំខិតប្រឹងប្រែងដើមឈើ កែសោភ័ណហេដ្ឋារចនាសម្ព័ន្ធ និងការរក្សាអនាម័យក្នុងខេត្តមិនមែនធ្វើឡើងឱ្យក្រុម ឬបុគ្គលណាមួយដើម្បីធ្វើជាប្រយោជន៍ផ្ទាល់ខ្លួននោះទេ គឺដើម្បីប្រយោជន៍សាធារណៈប៉ុណ្ណោះ។

ជាមួយគ្នានេះ លោកក៏បានស្នើឱ្យកងកម្លាំងប្រដាប់អាវុធ សមត្ថកិច្ច និងស្ថាប័នតុលាការត្រូវសហការគ្នាដើម្បីរាបរយសណ្ដាប់ធ្នាប់តាមដងផ្លូវ ឬតំបន់ឆ្នេរ។ ការស្នើសុំនេះលោក សោម ពិសិដ្ឋបញ្ចាក់បន្ថែមថា ដោយសារអាជីវករមួយចំនួនតាំងខ្លួនថានៅតាំងពីឆ្នាំ៩០ ហើយខ្លះទៀតថាកាន់កាប់តាំងពីសម័យ៧៩មកម្លេះ៕

The post លោក សោម ពិសិដ្ឋ អះអាងថា អាជីវករមួយចំនួនតាំងខ្លួនជាអធិរាជឆ្នេរសមុទ្រកែប appeared first on .

ការចាក់ដីបំពេញក្នុងគម្រោងអភិវឌ្ឍឆ្នេរកម្សាន្តកម្រិតខ្ពស់ប្រវែង ២៧០០ ម៉ែត្រនៅខេត្តកែប ជិតរួច ១០០%

ឧកញ៉ាមហាសម្បត្តិ — Fri, 29 Apr 2022 02:32:52 +0000

គម្រោងអភិវឌ្ឍឆ្នេរខ្សាច់កម្សាន្តសាធារណៈកម្រិតខ្ពស់ដែលមានប្រវែង ២៧០០ ម៉ែត្រ និងទទឹង ១០០ ម៉ែត្រនៅខែត្តកែប បានកំពុងដំណើរការជាប្រក្រតី ខណៈការស្ថាបនាផ្លូវបេតុង ៥ ខ្សែក្នុងគម្រោងក៏បានបញ្ចប់ ១០០%។

លោក សោម ពិសិដ្ឋ អភិបាលខេត្តកែបបានឲ្យដឹងថា គម្រោងទាំងនោះនឹងផ្តល់ប្រយោជន៍ដល់វិស័យទេសចរណ៍នៅក្នុងខេត្ត។

បើតាមលោកអភិបាលខេត្ត គម្រោងឆ្នេរខ្សាច់កម្សាន្តដែលមានប្រវែង ២,៧០០ម៉ែត្រ កំពុងអនុវត្តជាប្រក្រតី ហើយផ្លូវបេតុងចំនួន៥ខ្សែ ក្នុងនោះ វិថី២ខ្សែ និងអនុវិថី៣ខ្សែ ក៏បានកសាងរួចរាល់១០០%។ ដោយឡែកការចាក់ដីបំពេញក៏ស្ទើរតែហើយ១០០%ដែរ និងកំពុងបន្តរៀបចំហេដ្ឋារចនាសម្ព័ន្ធតាមគម្រោងដែលបានដាក់ចេញ។

កាលពីពេលថ្មីៗនេះ លោក ប៉ែន សុផល អគ្គលេខាធិការនៃគណៈកម្មាធិការជាតិគ្រប់គ្រង និងអភិវឌ្ឍន៍តំបន់ឆ្នេរសមុទ្រកម្ពុជា និងអាជ្ញាធរខេត្តកែប បានដឹកនាំក្រុមការងារបច្ចេកទេសចុះពិនិត្យវឌ្ឍនភាព ស្ដីពីគម្រោងអភិវឌ្ឍរមណីយដ្ឋានឆ្នេរខ្សាច់កម្សាន្តសាធារណៈកម្រិតខ្ពស់ ដែលមានប្រវែង២,៧០០ម៉ែត្រ ទទឹង ១០០ម៉ែត្រ និងទីតាំងមួយចំនួនទៀត ដែលរដ្ឋបាលខេត្តបានស្នើសុំចាក់ពង្រីកឆ្នេរមួយគម្រោងដែលមានផ្ទៃដីជាង ៥ហិចតា និងបន្តចុះពិនិត្យតំបន់អភិវឌ្ឍន៍របស់ក្រុមហ៊ុន ឧកញ៉ា ទ្រី ភាព ចំនួន៣ទីតាំង បន្ថែមទៀត។

រដ្ឋបាលខេត្តកែបបានសម្រុកចាក់ដីលុបឆ្នេរសមុទ្រក្នុងក្រុងកែប ក្នុងគម្រោងអភិវឌ្ឍរមណីដ្ឋានឆ្នេរខ្សាច់កម្សាន្តសាធារណៈកម្រិតខ្ពស់។ ក្នុងគម្រោងការអភិវឌ្ឍរមណីយដ្ឋានឆ្នេរកម្សាន្តថ្មីនេះ នឹងផ្តល់លំហបន្ថែមសម្រាប់ការកម្សាន្តរបស់ភ្ញៀវទេសចរមកលេងខេត្តកែប។

ក្នុងគម្រោងអភិវឌ្ឍឆ្នេរកម្សាន្តប្រណីតនេះនឹងមានការរៀបចំកន្លែងមើលទេសភាពវិថីចូលឆ្នេរសមុទ្រ ការសាងសង់បន្ទប់ទឹកសាធារណៈ ក៏ដូចជារៀបចំសួនច្បារបៃតងសាធារណៈនិងដាំដើមឈើជាដើម៕

The post ការចាក់ដីបំពេញក្នុងគម្រោងអភិវឌ្ឍឆ្នេរកម្សាន្តកម្រិតខ្ពស់ប្រវែង ២៧០០ ម៉ែត្រនៅខេត្តកែប ជិតរួច ១០០% appeared first on .