លោក roman abramovich

មហាសេដ្ឋីរុស្ស៊ី ប្ដឹងធនាគារអ៊ីស្រាអែល ជុំវិញការរារាំងកញ្ចប់ជំនួយសប្បុរសធម៌ ២លានដុល្លារ

ឧកញ៉ាសំពៅ — Fri, 29 Dec 2023 04:57:00 +0000

មហាសេដ្ឋីរុស្ស៊ី លោក Roman Abramovich ដែលមានសញ្ជាតិអ៊ីស្រាអែលផងនោះ បានធ្វើការប្ដឹងផ្ដល់ ចំពោះធនាគារអ៊ីស្រាអែល Mizrahi-Tefahot ជុំវិញការបង្កកលុយប្រហែល ២លានដុល្លារ ដែលលោកមានបំណងផ្ដល់ជំនួយទៅកាន់អង្គការក្រៅរដ្ឋាភិបាល Zaka។ នេះបើតាមការចុះផ្សាយពីសារព័ត៌មានអ៊ីស្រាអែល Calcalist។

កញ្ចប់ជំនួយ ២លានដុល្លារ ដែលអតីតម្ចាស់ក្លឹបបាល់ទាត់ Chelsea គ្រោងផ្ដល់ជូនអង្គការ Zaka គឺដើម្បីជួយសម្រួលដល់បេសកកម្មស្វែងរកមនុស្ស និងជួយជាស្បៀងអាហារ ដល់ប្រជាជនកំពុងរងទុក្ខ ដោយសារសង្គ្រាមរវាងអ៊ីស្រាអែល និងក្រុមសកម្មប្រយុទ្ធហាម៉ាស របស់ប៉ាឡេស្ទីន។

“បញ្ហានៅក្នុងដៃ ដែលកើតចេញពីកាលៈទេសៈហួសពីការគ្រប់គ្រងរបស់យើង គឺជាការបដិសេធមិនសមហេតុផលរបស់ធនាគារ ក្នុងការមិនអនុញ្ញាតឱ្យមានការបរិច្ចាគដែលត្រូវការជាបន្ទាន់ដល់អង្គការ ZAKA ទាំងដើម្បីការពារការដួលរលំរបស់អង្គការ និងដើម្បីជួយអ្នកស្ម័គ្រចិត្តដែលស៊ូទ្រាំនឹងផលវិបាកផ្លូវចិត្តដ៏លំបាកនៃសង្រ្គាមមួយនេះ”។ នេះបើតាមអត្ថន័យនៃពាក្យបណ្ដឹងរបស់មហាសេដ្ឋីរុស្ស៊ី។

គួររំលឹកដែរថា ខែនេះគឺជាខែអាក្រក់បំផុតសម្រាប់លោក Abramovich ពោលកាលពីសប្ដាហ៍មុន តុលាការសហភាពអឺរ៉ុប បានច្រានចោលការសុំដកទណ្ឌកម្មសេដ្ឋកិច្ចលើរូបលោក ខណៈពេលនេះ គ្រាន់តែលោកចង់ធ្វើសប្បុរសធម៌ ក៏ត្រូវមកជួបនឹងភាពស្មុគស្មាញបែបនេះថែមទៀត៕

The post មហាសេដ្ឋីរុស្ស៊ី ប្ដឹងធនាគារអ៊ីស្រាអែល ជុំវិញការរារាំងកញ្ចប់ជំនួយសប្បុរសធម៌ ២លានដុល្លារ appeared first on .

មហាសេដ្ឋីរុស្ស៊ី ចាញ់ការតវ៉ាក្ដីជុំវិញការដាក់ទណ្ឌកម្មសេដ្ឋកិច្ចពី EU

ឧកញ៉ាសំពៅ — Thu, 21 Dec 2023 04:00:00 +0000

មហាសេដ្ឋីរុស្ស៊ី លោក Roman Abramovich បានបរាជ័យក្នុងការតវ៉ាក្ដី ជាមួយការដាក់ទណ្ឌកម្មសេដ្ឋកិច្ចពីសហភាពអឺរ៉ុប ដែលបានដាក់មកលើលោក តាំងពីរុស្ស៊ីបើកការវាយលុកលើប្រទេសអ៊ុយក្រែន។

យោងតាមការចុះផ្សាយពីសារព័ត៌មាន Reuters បានរាយការណ៍ថា តុលាការសហភាពអឺរ៉ុបនៅទីក្រុងប្រ៊ុចសែល បានច្រានចោលសំណើសុំតវ៉ាក្ដីរបស់មហាសេដ្ឋីម្នាក់នេះ និងបានបដិសេធចំពោះការទាមទារសំណង ដោយសង្កត់ធ្ងន់ថា លោក Abramovich មានតំណែងធំ នៅក្នុងក្រុមហ៊ុនដែកថែប Evraz ដែលតែងផ្ដល់ជំនួយដល់រដ្ឋាភិបាលរុស្ស៊ី។

រំលឹកបន្តិចថា មិនខុសពីមហាសេដ្ឋីរុស្ស៊ីដទៃ អតីតម្ចាស់ក្លឹបបាល់ទាត់ Chelsea ម្នាក់នេះ ទទួលរងទណ្ឌកម្មសេដ្ឋកិច្ចធ្ងន់ធ្ងរ ដោយទ្រព្យសម្បត្តិរបស់លោក ត្រូវបានមហាអំណាចលោកខាងលិច និង EU បង្កកទុករាប់សិបពាន់លានដុល្លារ។

ជម្រាបបន្ថែមថា លោក Abramovich គឺជាមហាសេដ្ឋីមានបំផុតមួយរូបនៅប្រទេសរុស្ស៊ី ជាមួយទ្រព្យសម្បត្តិប្រមាណ ៩ពាន់លានដុល្លារ។ នេះបើតាមរបាយការណ៍បង្ហាញពីទស្សនាវដ្ដី Forbes៕

The post មហាសេដ្ឋីរុស្ស៊ី ចាញ់ការតវ៉ាក្ដីជុំវិញការដាក់ទណ្ឌកម្មសេដ្ឋកិច្ចពី EU appeared first on .

ទោះបរាជ័យក្នុងការសិក្សា តែបុគ្គល ៥ រូបនេះជោគជ័យលើវិថីជីវិតក្លាយជាមហាសេដ្ឋី

ឧកញ៉ាសំពៅ — Fri, 11 Aug 2023 09:55:00 +0000

“ចំណេះវិជ្ជាជាស្ពានឆ្ពោះទៅរកភាពជោគជ័យ” នេះគឺជាពាក្យស្លោកដែលយើងគ្រប់គ្នាតែងតែធ្លាប់បានលឺនៅអំឡុងពេលវ័យសិក្សា ហើយវាគឺជាការពិតដែលមិនអាចប្រកែកបានឡើយ។

យ៉ាងណា មិនមែនសុទ្ធតែគ្រប់បុគ្គលជោគជ័យគឺសុទ្ធតែបានបញ្ចប់ថ្នាក់សិក្សាខ្ពង់ខ្ពស់នោះឡើយ ជាក់ស្ដែងក៏មានបុគ្គលមួយចំនួនបានបោះបង់ការសិក្សា ងាកមកស្រវាតាមចាប់ក្ដីស្រមៃតាំងពីវ័យក្មេង ឬក៏កត្តាជីវភាពគ្រួសារបង្ខំឲ្យពួកគេបោះបង់ការសិក្សា ដើម្បីរកចំណូលផ្គត់ផ្គង់ជីវភាព រហូតក្លាយជាមហាសេដ្ឋីសព្វថ្ងៃផងដែរ។

តួយ៉ាង បើយោងតាមការចុះផ្សាយពី SCMP បានឲ្យដឹងថា មានបុគ្គល ៥ រូបដែលបានបោះបង់ការសិក្សាតាំងពីក្មេងៗ ដោយសារកត្តាជីវភាពគ្រួសារ និងត្រូវងាកមករកចំណូល ក៏ដូចជាតាមចាប់ក្ដីស្រមៃរបស់ពួកគេរហូតទទួលបានភាពជោគជ័យក្លាយជាមហាសេដ្ឋីសព្វថ្ងៃ។

ខាងក្រោមគឺជាបញ្ជីឈ្មោះរបស់បុគ្គល ៥ រូបដែលក្រុមហ៊ុនសារព័ត៌មានកាន់កាប់ដោយ Alibaba បានចុះផ្សាយ៖

1/ Li Ka-Shing

មហាសេដ្ឋីមានបំផុតនៅហុងកុងរូបនេះបានរត់ភៀសខ្លួនពីប្រទេសចិននៅពេលលោកមានវ័យត្រឹមតែ ១២ ឆ្នាំ ហើយរំលងបាន ២ ឆ្នាំ ឪពុករបស់លោកបានចែកឋាន ដែលបណ្ដាលឲ្យបុរសរូបនេះត្រូវបោះបង់ការសិក្សាទាំងមិនបានបញ្ចប់ថ្នាក់វិទ្យាល័យ។

នៅវ័យ ១៦ ឆ្នាំស្ដេចត្រាញ់ហុងកុងគ្រាន់តែជាបុគ្គលិកធ្វើការនៅរោងចក្រប្លាស្ទិកមួយកន្លែង តែបច្ចុប្បន្ន Li Ka-Shing បានក្លាយជាមហាសេដ្ឋីមានបំផុតទី ៣៤ នៅលើពិភពលោក និងមានបំផុតនៅហុងកុង ជាមួយទ្រព្យសម្បត្តិប្រមាណ ៣៧,៨ពាន់លានដុល្លារ។

2/ Roman Abramovich

មហាសេដ្ឋីរុស្ស៊ីដែលកំពុងស្ថិតនៅក្នុងស្ថានការណ៍ដ៏យ៉ាប់យ៉ឺន ពោលគឺទទួលរងទណ្ឌកម្មសេដ្ឋកិច្ចពីបណ្ដាប្រទេសជាច្រើន ជាពិសេសគឺអង់គ្លេស បន្ទាប់ពីរុស្ស៊ីបើកការវាយប្រហារទៅលើអ៊ុយក្រែនកន្លងទៅ។

ប្រវត្តិរបស់អ្នកមានម្នាក់នេះគឺ កំព្រាម្ដាយឪពុកតាំងពីអាយុ ៣ ឆ្នាំ និងបានឈប់រៀនត្រឹមថ្នាក់មហាវិទ្យាល័យ ដោយបានចូលបម្រើកងទ័ពរុស្ស៊ី ហើយវាគឺជាឱកាសមាសមួយរបស់ Abramovich ក្នុងការកសាងទ្រព្យសម្បត្តិរបស់លោកពីពេលនោះមក។

អំឡុងពេលនៅបម្រើការក្នុងជួរកងទ័ព Abramovich បានលួចប្រេងយកទៅលក់ឲ្យឈ្មួញកណ្ដាល ហើយក៏ចាប់ផ្ដើមបោះជំហានលើវិស័យអាជីវកម្មផ្សេងៗ រហូតដល់មានមុខមាត់នៅលើវិស័យនយោបាយថែមទៀត។

បច្ចុប្បន្ន Roman Abramovich គឺជាមហាសេដ្ឋីលេខរៀងទី ២២៤ ទូទាំងពិភពលោក ជាមួយទំហំទ្រព្យសម្បត្តិប្រមាណ ៩,២ពាន់លានដុល្លារ។

3/ Jan Koum

ស្ថាបនិក WhatsApp ម្នាក់នេះមានដើមកំណើតជាជនជាតិអ៊ុយក្រែន និងកើតនៅក្នុងគ្រួសារមានជីវភាពក្រីក្រដែលមានឪពុកជាកម្មករសំណង់ ម្ដាយជាស្ត្រីមេផ្ទះ។ នៅពេលលោកមានវ័យត្រឹម ១៦ ឆ្នាំ គ្រួសាររបស់លោកបានភៀសខ្លួនមកទីក្រុង California និងធ្វើការជូតឥដ្ឋដើម្បីចិញ្ចឹមជីវិត។

អាចនិយាយបានថា ជាដុងពីកំណើត Koum បានរៀនសូត្រដោយខ្លួនឯងអំពីការប្រើប្រាស់កុំព្យូទ័របានយ៉ាងស្ទាត់ជំនាញ និងទទួលបានការងារមួយនៅក្រុមហ៊ុន Yahoo ទាំងមិនបានបញ្ចប់ថ្នាក់សិក្សាមហាវិទ្យាល័យ។

បច្ចុប្បន្ន បុរសម្នាក់នេះគឺជាមហាសេដ្ឋីមានបំផុតទី ១២១ លើពិភពលោកជាមួយទំហំទ្រព្យសម្បត្តិប្រមាណ ១៤,៣ពាន់លានដុល្លារ ក្រោយលក់ WhatsApp ទៅឲ្យ Facebook ក្នុងឆ្នាំ ២០១៤ ក្នុងតម្លៃ ២២ ពាន់លានដុល្លារ។

4/ Oprah Winfrey

ជាស្ត្រីតែម្នាក់គត់នៅក្នុងបញ្ជីមួយនេះ និងជាពិធីការនីដ៏មានឥទ្ធិពលបំផុតមួយនៅលើបណ្ដាញប្រព័ន្ធផ្សព្វផ្សាយនៅអាមេរិក។ នៅវ័យត្រឹម ១៤ ឆ្នាំ Winfrey បានលួចរត់ទៅរស់នៅជាមួយឪពុក និងទទួលបានអាហារូបករណ៍នៅសាកលវិទ្យាល័យ Tennessee State University ប៉ុន្តែបានបោះបង់ការសិក្សានៅវ័យ ១៩ ឆ្នាំ ដើម្បីធ្វើការនៅលើបណ្ដាញផ្សព្វផ្សាយ។

ចាប់តាំងពីពេលនោះមក Oprah Winfrey តែងតែលេចមុខនៅក្នុងកម្មវិធីទូរទស្សន៍ធំៗ ដោយសារទេពកោសល្យក្នុងការនិយាយរបស់លោកស្រី ហើយបច្ចុប្បន្នលោកស្រីគឺជាមហាសេដ្ឋីស្ត្រីដ៏មានឥទ្ធិពលបំផុតមួយជាមួយទំហំទ្រព្យសម្បត្តិ ២,៥ពាន់លានដុល្លារ។

5/ Guy Laliberte

លោក Laliberte បានចាកចេញពីស្រុកកំណើត Canada នៅវ័យត្រឹម ១៤ ឆ្នាំ តាមចាប់ក្ដីស្រមៃដ៏អស្ចារ្យរបស់លោកនៅឆ្នាំ ១៩៧៨ ហើយនៅវ័យ ១៩ ឆ្នាំ បុរសម្នាក់នេះបានសម្រេចបោះបង់ការសិក្សា។

ដោយសារចិត្តស្រឡាញ់ការសម្ដែង បុរសម្នាក់នេះបានចំណាយពេលដេកលើបង់តាមទីសាធារណៈនៅប្រទេសផ្សេងៗ ជាមួយក្រុមសម្ដែងសៀកតាមផ្លូវ រហូតដល់ឆ្នាំ ១៩៨៤ លោកបានបង្កើតក្រុមសៀកCirque du Soleil ដែលជាសព្វថ្ងៃជាក្រុមសៀករហ័សកម្មធំបំផុតលើលោក។

ជិត ១០ ឆ្នាំក្រោយបង្កើតក្រុមសៀកដ៏ល្បី ពោលនៅឆ្នាំ ១៩៩៣ Cirque du Soleil អាចរកចំណូលបានយ៉ាងស្រួលពោល ៣០លានដុល្លារជារៀងរាល់ឆ្នាំ ហើយវាបានធ្វើឲ្យ Laliberte ទទួលបានងារជាមហាសេដ្ឋីក្នុងទំហំទ្រព្យសម្បត្តិជាង ១ពាន់លានដុល្លារផងដែរ។

ដោយឡែក ក្រៅពីបុគ្គលទាំង ៥ រូបខាងលើ ក៏នៅមានមហាសេដ្ឋីឯទៀតដែលមិនបានបញ្ចប់ថ្នាក់សិក្សាមហាវិទ្យាល័យ ដូចជា Mark Zuckerberg និង Bill Gates ជាដើម គ្រាន់តែថាអ្នកទាំង ៥ ដែលបានរៀបរាប់ខាងលើ គឺមានជីវភាពលំបាកតាំងពីក្មេងជាងបុគ្គលផ្សេងៗប៉ុណ្ណោះ។

បញ្ជាក់ដែរថា អត្ថបទមួយនេះមិនមែនលើកទឹកចិត្តឲ្យមនុស្សឯទៀតបោះបង់ការសិក្សាឡើយ គ្រាន់តែថា ខ្សែជីវិតរបស់មនុស្សយើងម្នាក់ៗគឺមានភាពខុសគ្នា អ្នកខ្លះជោគជ័យលើការសិក្សា អ្នកខ្លះជោគជ័យលើការធ្វើអាជីវកម្ម ដូច្នេះដរាបណាបើអ្នកនៅតែមានការតស៊ូ និងក្ដីស្រមៃ បូកផ្សំជាមួយនឹងឱកាសផង នោះភាពជោគជ័យច្បាស់ជារត់មករកអ្នកដោយឯកឯងជាមិនខាន៕

ប្រភព: SCMP

The post ទោះបរាជ័យក្នុងការសិក្សា តែបុគ្គល ៥ រូបនេះជោគជ័យលើវិថីជីវិតក្លាយជាមហាសេដ្ឋី appeared first on .

មហាសេដ្ឋីរុស្ស៊ីមិនគោរពសន្យា បដិសេធផ្ដល់ជំនួយដល់ប្រទេសអ៊ុយក្រែន

ឧកញ៉ាសំពៅ — Mon, 19 Jun 2023 10:58:00 +0000

មហាសេដ្ឋីរុស្ស៊ី Roman Abramovich បានបដិសេធមិនព្រមផ្ដល់ប្រាក់ជំនួយទៅកាន់ប្រទេសអ៊ុយក្រែន បន្ទាប់ពីលក់ក្លឹបបាល់ទាត់ Chelsea បានទឹកប្រាក់ប្រហែល ៣ពាន់លានដុល្លារ។

យោងតាមការចុះផ្សាយពីសារព័ត៌មានអង់គ្លេស Daily Mail បានបង្ហាញថា មហាសេដ្ឋីរុស្ស៊ីធ្លាប់បានសន្យាថា នឹងផ្ដល់ប្រាក់មួយចំណែកពីការលក់ក្លឹបនោះ ទៅកាន់ប្រទេសអ៊ុយក្រែន តែមកទល់ពេលនេះ អតីតម្ចាស់ក្លឹបបាល់ទាត់តោខៀវ នៅមិនព្រមបញ្ចេញថវិកាទៅអ៊ុយក្រែនឡើយ។

ទន្ទឹមនឹងនោះ រដ្ឋាភិបាលអង់គ្លេស និងគណៈកម្មការអឺរ៉ុបមិនឱបដៃមើលបញ្ហាមួយនេះឡើយ ពោលទឹកប្រាក់ដែលលក់ក្លឹបបាននោះ គឺត្រូវបានបង្កកនៅគណនីធនាគារមួយរបស់លោក Roman ក្រោមហេតុផលថា លោកក្បត់ពាក្យសន្យា និងល្មើសចំពោះទណ្ឌកម្មសេដ្ឋកិច្ចដែលបានដាក់លើរដ្ឋាភិបាលរុស្ស៊ី។

នេះក៏មានន័យថា មហាសេដ្ឋីរុស្ស៊ីនឹងមិនអាចប្រើប្រាស់ទឺកប្រាក់ទាំងនោះបានឡើយ លុះត្រាតែលោកធានាច្បាស់ៗពីការផ្ដល់ជំនួយដល់អ៊ុយក្រែន ខណៈកន្លងមកមហាសេដ្ឋីម្នាក់នេះក៏ទទួលរងទណ្ឌកម្មសេដ្ឋកិច្ចធ្ងន់ធ្ងរពីអង់គ្លេស ដោយសារសង្គ្រាមរវាងរុស្ស៊ី និងអ៊ុយក្រែនផងដែរ៕

The post មហាសេដ្ឋីរុស្ស៊ីមិនគោរពសន្យា បដិសេធផ្ដល់ជំនួយដល់ប្រទេសអ៊ុយក្រែន appeared first on .

ក្រុមមហាសេដ្ឋីរុស្ស៊ីប្ដឹងសហភាពអឺរ៉ុប ជុំវិញការដាក់ទណ្ឌកម្មសេដ្ឋកិច្ចលើពួកគេ

ឧកញ៉ាសំពៅ — Mon, 18 Jul 2022 07:16:03 +0000

កាលពីពេលថ្មីៗនេះ ក្រុមមហាសេដ្ឋីរុស្ស៊ីបានដាក់ពាក្យបណ្ដឹងទៅកាន់សហភាពអឺរ៉ុប បន្ទាប់ពីទទួលទណ្ឌកម្មសេដ្ឋកិច្ចធ្ងន់ធ្ងរ ជុំវិញបញ្ហារុស្ស៊ីបើកការឈ្លានពានអ៊ុយក្រែន។

គោលបំណងនៃការដាក់ពាក្យបណ្ដឹងនេះផងដែរ គឺដើម្បីស្នើឲ្យលុបចោលនូវទណ្ឌកម្មសេដ្ឋកិច្ចទាំងអស់ដែលពួកគេកំពុងជួបប្រទះ ហើយក៏បានអះអាងដែរថា សិទ្ធរបស់ពួកគេត្រូវបានរំលោភបំពាន និងបដិសេធពីការចោទប្រកាន់ថា មានទំនាក់ទំនងស្អិតល្មួតជាមួយវិមានក្រឹមឡាំង។ នេះបើតាមការចុះផ្សាយពី The Wall Street Journal។

ក្នុងចំណោមដើមចោទទាំងអស់មានដូចជា ស្ដេចត្រាញ់លោហធាតុ Alisher Usmanov, មេធំធនាគារ Alfa Bank និងលោក Roman Abramovich ជាដើម ខណៈអតីតម្ចាស់ក្លឹប Chelsea បានលើកឡើងថា សហភាពអឺរ៉ុបបានរំលោភបំពានសិទ្ធបុគ្គលរបស់លោក ក្នុងនាមជាជនជាតិព័រទុយហ្គាល់។

បន្ថែមពីនោះ មានមហាសេដ្ឋីខ្លះទៀត ក៏មានបំណងចង់ឲ្យសហភាពអឺរ៉ុបសងនូវថ្លៃខូចខាតដែលបង្កដោយការដាក់ទណ្ឌកម្មសេដ្ឋកិច្ចរយៈពេលប៉ុន្មានខែមកនេះ ស្របពេលលឺល្ហៀងៗមកថា EU ក៏កំពុងពិចារណាលើការលុបចោលគំនាបសេដ្ឋកិច្ចលើក្រុមស្ដេចត្រាញ់រុស្ស៊ីផងដែរ។

ទន្ទឹមនឹងនោះ សារព័ត៌មាន Bloomberg បានរាយការណ៍ដែរថា មហាសេដ្ឋីរុស្ស៊ីប្រហែល ៤០ នាក់នឹងត្រូវបានដកចេញពីបញ្ជីខ្មៅ ខណៈ ៣០ នាក់ទៀតនឹងត្រូវជួបតទល់ជាមួយ EU ដោយផ្ទាល់នៅតុលាការ៕

The post ក្រុមមហាសេដ្ឋីរុស្ស៊ីប្ដឹងសហភាពអឺរ៉ុប ជុំវិញការដាក់ទណ្ឌកម្មសេដ្ឋកិច្ចលើពួកគេ appeared first on .

អាមេរិកគ្រោងពិន័យទឹកប្រាក់ ១ លានដុល្លារ និងរឹបអូសយន្តហោះផ្ទាល់ខ្លួនរបស់មហាសេដ្ឋីរុស្ស៊ី

ឧកញ៉ាសំពៅ — Tue, 07 Jun 2022 07:34:45 +0000

កាលពីថ្ងៃច័ន្ទកន្លងទៅ រដ្ឋាភិបាលអាមេរិកបានចេញលិខិតរឹបអូសយន្តហោះផ្ទាល់ខ្លួន ២ គ្រឿងរបស់មហាសេដ្ឋីរុស្ស៊ី Roman Abramovich យកមករក្សាទុក បន្ទាប់ពីរុស្ស៊ីបើកការឈ្លានពានទៅលើអ៊ុយក្រែន។ នេះបើតាមរបាយការណ៍បង្ហាញដោយតុលាការ។

យ៉ាងណា មន្ត្រីក្រសួងយុត្តិធម៌មួយរូបបានចេញមុខអះអាងថា យន្តហោះតម្លៃ ៣៥០ លានដុល្លារ និង ៦០ លានដុល្លាររបស់មហាសេដ្ឋីរុស្ស៊ី បច្ចុប្បន្នមិនបានស្ថិតក្រោមការគ្រប់គ្រងរបស់រដ្ឋាភិបាលឡើយ ហើយក៏មិនទាន់ដឹងពីទីតាំងពិតប្រាកដនៃយន្តហោះទាំង ២ គ្រឿងនេះដូចគ្នា។

មន្ត្រីខាងលើបានប្រាប់ទៅកាន់ Reuters ថា ដីកាចេញរឹបអូសយន្តហោះ ២ គ្រឿងនេះ គឺក្នុងគោលបំណងរារាំងក្រុមហ៊ុនផ្សេងៗ ក្នុងការជួយជម្លៀសយន្តហោះទាំង ២ នេះចេញពីដែនអាកាសអាមេរិក ស្របពេលមហាអំណាចលោកខាងលិចកំពុងគាបសង្កត់ខ្លាំងលើមហាសេដ្ឋីដែលមានទំនាក់ទំនងជិតស្និទ្ធនឹងថ្នាក់ដឹកនាំរុស្ស៊ី។

ដោយសារតែយន្តហោះទាំងនោះផលិតឡើងនៅសហរដ្ឋអាមេរិក ហើយការហោះហើរទាំងអស់ប្រព្រឹត្តឡើង ក្រោយចេញច្បាប់រឹតបន្តឹង ដូច្នេះ Abramovich ត្រូវតែទទួលបានការអនុញ្ញាតពីនាយកដ្ឋានពាណិជ្ជកម្មដើម្បីអាចហោះហើរទៅកាន់រុស្ស៊ី ប៉ុន្តែការស្នើសុំសិទ្ធហោះហើរមិនត្រូវបានធ្វើឡើងទាល់តែសោះ។

សូមជម្រាបដែរថា នាយកដ្ឋានពាណិជ្ជកម្មបានបង្ហើបថា យន្តហោះរបស់ Abramovich បានធ្វើការហោះហើរដោយគ្មានសិទ្ធត្រឹមត្រូវ ៣ លើក ពោលកាលពីថ្ងៃទី ០៤ មីនាហោះពីទីក្រុងឌូបៃទៅទីក្រុងមូស្គូ និងថ្ងៃទី ១២ និង ១៥ មីនាពីទីក្រុងអ៊ីស្តង់ប៊ូលទៅកាន់ទីក្រុងមូស្គូ។

ក្នុងករណីខាងលើ នាយកដ្ឋានពាណិជ្ជកម្មអាចនឹងដាក់ពិន័យទៅលើមហាសេដ្ឋីរុស្ស៊ី ក្នុងទំហំទឹកប្រាក់ប្រហែល ១ លានដុល្លារ សម្រាប់ការហោះហើរដោយល្មើសបម្រាមទាំង ៣ លើកនោះ ឬប្រមាណ ៣២៨ ១២១ ដុល្លារសម្រាប់មួយជើង៕

The post អាមេរិកគ្រោងពិន័យទឹកប្រាក់ ១ លានដុល្លារ និងរឹបអូសយន្តហោះផ្ទាល់ខ្លួនរបស់មហាសេដ្ឋីរុស្ស៊ី appeared first on .

មហាសេដ្ឋីរុស្ស៊ីបង្ហើបចង់លក់ក្លឹប Chelsea ទៅឲ្យមហាសេដ្ឋីស្វីស

ឧកញ៉ាសំពៅ — Wed, 02 Mar 2022 08:05:57 +0000

កាលពីពេលកន្លងទៅ Roman Abramovich គឺបានប្រកាសផ្ដល់សិទ្ធិគ្រប់គ្រង និងមើលការខុសត្រូវដោយផ្ទាល់ចំពោះក្រុមបាល់ទាត់ Chelsea ទៅកាន់មូលនិធិនៃក្រុម បន្ទាប់ពីមានដំណឹងថា រដ្ឋាភិបាលអង់គ្លេសមានបំណងចង់ដកហូតសិទ្ធិកាន់កាប់ទ្រព្យសម្បត្តិរបស់លោក។

ជាមួយគ្នានោះ ក៏ស្រាប់តែលឺល្ហៀងៗមកថា ម្ចាស់ក្លឹបតោខៀវក៏ធ្លាប់បានដាក់សំណើលក់ក្លឹបមួយនេះទៅឲ្យមហាសេដ្ឋីម្នាក់ដែលមានឈ្មោះថា Hansjorg Wyss គឺជាមហាសេដ្ឋីជនជាតិស្វីស។

បើយោងតាមការទម្លាយឲ្យដឹងពីលោក Wyss ទៅកាន់សារព័ត៌មាន Blick បានឲ្យដឹងថា៖ “Abramovich គឺជាមនុស្សម្នាក់ដែលមានទំនាក់ទំនងយ៉ាងស្អិតល្មួតជាមួយនឹងប្រធានាធិបតី Putin ហើយបច្ចុប្បន្នគាត់កំពុងស្ថិតនៅក្នុងវិបត្តិដ៏តឹងតែងមួយ”។

“Abramovich កំពុងចង់លក់នូវរាល់ភូមិគ្រឹះរបស់លោកទាំងអស់នៅអង់គ្លេស និងចង់វៃចេញ Chelsea ឲ្យបានលឿនបំផុត។ ខ្ញុំនិងមនុស្ស ៣ នាក់ផ្សេងទៀតបានទទួលសំណើពីការចង់លក់ក្លឹបបាល់ទាត់មួយនេះពី Abramovich កាលពីថ្ងៃអង្គារ”។

“ខ្ញុំត្រូវការពេល ៤-៥ថ្ងៃដើម្បីធ្វើការសម្រេចចិត្ត ដ្បិត Abramovich គឺបានដាក់តម្លៃខ្ពស់ពេក ស្របពេល Chelsea គឺជំពាក់គាត់ ២ ពាន់លានផោន ហើយពេលនេះក្លឹបគ្មានលុយឡើយ ដូច្នេះបើសិនជាទិញ Chelsea នោះ ក៏ត្រូវសងបំណុលទៅគាត់ដូចគ្នា”។

បញ្ជាក់ដែរថា មហាសេដ្ឋីដែលមានទំហំទឹកប្រាក់ប្រមាណ ៥ ពាន់លានដុល្លារ ក៏បានបង្ហើបដែរថា លោកនឹងមិនទិញ Chelsea ដោយផ្ទាល់ឡើយ ដ្បិតការចំណាយច្រើន ហើយបើសិនជាមានវិនិយោគិន ៦-៧ នាក់ចូលហ៊ុន នោះលទ្ធភាពនៃការក្លាយជាម្ចាស់ក្លឹបថ្មីនឹងអាចកើតមានបាន៕

ប្រភព: GOAL

The post មហាសេដ្ឋីរុស្ស៊ីបង្ហើបចង់លក់ក្លឹប Chelsea ទៅឲ្យមហាសេដ្ឋីស្វីស appeared first on .

មហាសេដ្ឋីរុស្ស៊ីប្រកាសចុះចេញពីតំណែងអ្នកមើលការខុសត្រូវក្លឹប Chelsea ក្រោយអង់គ្លេសចង់រឹបអូសទ្រព្យសម្បត្តិ

ឧកញ៉ាសំពៅ — Sun, 27 Feb 2022 16:52:41 +0000

កាលពីពេលកន្លងទៅមានដំណឹងមកថា សមាជិកសភាមកពីខាងគណបក្សពលករ នៅចក្រភពអង់គ្លេសបានស្នើសុំឲ្យរដ្ឋាភិបាលមានចំណាត់ការជាមួយនឹងមហាសេដ្ឋី និងបុគ្គលមានជំនួញធំៗដែលមានសញ្ជាតិរុស្ស៊ី ជាពិសេសគឺ Roman Abramovich ដែលជាអ្នកជិតស្និទ្ធជាមួយប្រធានាធិបតី Vladimir Putin តែម្ដង។

ចំណាត់ការដែលបានស្នើទៅកាន់រដ្ឋាភិបាលគឺ ដកហូតនូវសិទ្ធិគ្រប់គ្រងអចលនទ្រព្យ និងបង្កកទ្រព្យសម្បត្តិដែលមាននៅចក្រភពអង់គ្លេសរបស់មហាសេដ្ឋីរូបនេះទាំងអស់ រាប់បញ្ចូលទាំងភូមិគ្រឹះតម្លៃជាង ១៥០ លានផោន និងក្លឹបបាល់ទាត់ Chelsea ផង។

រំលងបានតែ ២ ថ្ងៃ បន្ទាប់ពីមានព័ត៌មានខាងលើ ស្រាប់តែលោក Abramovich បានចេញសេចក្ដីប្រកាសមួយថា នឹងផ្ទេរតួនាទីសិទ្ធគ្រប់គ្រងក្រុម និងមើលការខុសត្រូវដោយផ្ទាល់ទៅកាន់មូលនិធិសប្បុរសធម៌របស់ក្លឹបវិញ។ នេះបើតាមការចុះផ្សាយពី ESPN។

ប្រភពខាងលើបន្ថែមទៀតថា មហាសេដ្ឋីរុស្ស៊ីនឹងមិនព្រមលក់ Chelsea ជាដាច់ខាត ហើយការផ្ទេរតំណែងមួយនេះអាចជាការគេចវែសពីទណ្ឌកម្មសេដ្ឋកិច្ចដែលអង់គ្លេសគ្រោងនឹងផ្ដល់ជូនដល់ស្ដេចត្រាញ់រុស្ស៊ីទាំងឡាយផង។

ដោយឡែកប្រភពជិតស្និទ្ធមួយក៏បានបង្ហើបប្រាប់ ESPN ទៀតថា បើទោះជាលាលែងពីតំណែងជាអ្នកមើលការខុសត្រូវនៃក្លឹបមែន តែការសម្រេចចិត្តចុងក្រោយសម្រាប់រឿងសំខាន់ៗក្នុងក្រុមដូចជាការទិញកីឡាករ និងការផ្លាស់ប្ដូរគ្រូបង្វឹកជាដើម គឺ Abramovich នៅតែជាអ្នកកាន់សន្លឹកបៀរចុងក្រោយដដែល៕

ប្រភព: ESPN

The post មហាសេដ្ឋីរុស្ស៊ីប្រកាសចុះចេញពីតំណែងអ្នកមើលការខុសត្រូវក្លឹប Chelsea ក្រោយអង់គ្លេសចង់រឹបអូសទ្រព្យសម្បត្តិ appeared first on .

អង់គ្លេសចង់រឹបអូសទ្រព្យសម្បត្តិម្ចាស់ក្លឹប Chelsea ខណៈពិភពលោកកំពុងផ្ដាច់ទំនាក់ទំនងជាមួយរុស្ស៊ី

ឧកញ៉ាសំពៅ — Fri, 25 Feb 2022 08:06:44 +0000

ស្ថានការណ៍បច្ចុប្បន្នរវាងរុស្ស៊ី និងអ៊ុយក្រែនកំពុងស្ថិតនៅក្នុងភាពមិនច្បាស់លាស់ ស្របពេលវាថែមទាំងធ្វើឲ្យមុខជំនួញរបស់មហាសេដ្ឋីទាំងឡាយ ដែលជាប់ពាក់ព័ន្ធនឹងជនជាតិរុស្ស៊ីទទួលរងការខាតបង់ជាខ្លាំង ក្រោយប្រទេសជាច្រើនបានដាក់ទណ្ឌកម្មលើមហាអំណាចមួយនេះ។

កាលពីពេលថ្មីៗនេះ សមាជិកសភា មកខាងគណបក្សការងារនៅចក្រភពអង់គ្លេស បានតឿនឲ្យរដ្ឋាភិបាលគួរឃាត់ទុកនូវទ្រព្យសម្បត្តិរបស់មហាសេដ្ឋីរុស្ស៊ី Roman Abramovich ដោយបានចោទប្រកាន់ម្ចាស់ក្លឹប Chelsea នេះថា ជាប់ពាក់ព័ន្ធនឹងបញ្ហាពុករលួយ។

លោក Chris Bryant បានប្រាប់ទៅកាន់រដ្ឋាភិបាលថា ម្ចាស់ក្លឹបបាល់ទាត់នៅលីគកំពូល Premier League ម្នាក់នេះ មិនគួរបន្តនៅចក្រភពអង់គ្លេសទៀតឡើយ ស្របពេល Abramovich គឺត្រូវបានគេស្គាល់ថាជា បុគ្គលជិតស្និទ្ធនឹងប្រធានាធិបតី Vladimir Putin ផង។

មិនត្រឹមតែដាស់តឿនឲ្យបណ្ដេញលោក Abramovich ចេញពីចក្រភពអង់គ្លេសឡើយ លោក Bryant ថែមទាំងស្នើឲ្យរដ្ឋាភិបាលគួរដកហូតសិទ្ធិកាន់កាប់អចលនវត្ថុទាំងអស់របស់មហាសេដ្ឋីរុស្ស៊ីនៅអង់គ្លេស និងគួរចាត់វិធានការឲ្យបានកាន់តែឆាប់។

ដោយឡែក ទ្រព្យសម្បត្តិដែលសមាជិកសភាការងារចង់ឲ្យរដ្ឋាភិបាលដកហូតគឺមានទាំងក្លឹបបាល់ទាត់ រួមជាមួយនឹងភូមិគ្រឹះតម្លៃជាង ១៥០ លានផោនទៀត។

បញ្ជាក់ដែរថា បច្ចុប្បន្នអ្នកនាំពាក្យរបស់មហាសេដ្ឋីរុស្ស៊ីសុំមិនធ្វើការបំភ្លឺជុំវិញបញ្ហាមួយនេះ តែបើមើលឲ្យដិតដល់ទៅរដ្ឋាភិបាលអង់គ្លេសហាក់ដាក់គំនាបដល់ម្ចាស់ក្លឹប Chelsea យូរណាស់មកហើយ ពោលមិនព្រមបន្តទិដ្ឋាការឲ្យតាំងពីឆ្នាំ ២០១៨ ដែលជាហេតុតម្រូវឲ្យ Abramovich ត្រូវចេញចូលមហាអំណាចមួយនេះតាមរយៈលិខិតឆ្លងដែនអ៊ីស្រាអែល ដែលអនុញ្ញាតឲ្យចេញចូលអង់គ្លេសដោយមិនចាំបាច់ប្រើទិដ្ឋាការ៕

ប្រភព: BBC

The post អង់គ្លេសចង់រឹបអូសទ្រព្យសម្បត្តិម្ចាស់ក្លឹប Chelsea ខណៈពិភពលោកកំពុងផ្ដាច់ទំនាក់ទំនងជាមួយរុស្ស៊ី appeared first on .

មហាសេដ្ឋីរុស្ស៊ី Abramovich បរិច្ចាគប្រាក់ខ្ទង់លានដុល្លារទៅកាន់សារមន្ទីរមួយនៅអ៊ីស្រាអែល

ឧកញ៉ាសំពៅ — Wed, 23 Feb 2022 08:30:31 +0000

កាលពីពេលថ្មីៗនេះ មានដំណឹងមកថា ម្ចាស់ក្លឹបបាល់ទាត់ Chelsea គឺមហាសេដ្ឋី Roman Abramovich បានធ្វើការបរិច្ចាគទឹកប្រាក់ទំហំរាប់លានដុល្លារទៅកាន់សារមន្ទីរមួយកន្លែងនៅប្រទេសអ៊ីស្រាអែល។

សារមន្ទីរដែលទទួលបានសប្បុរសធម៌ពីមហាសេដ្ឋីរុស្ស៊ីខាងលើគឺមានឈ្មោះថា Yad Vashem Holocaust Memorial Museum ស្របពេលពួកគេអះអាងថា ការបរិច្ចាគមួយនេះគឺជាផ្នែកមួយនៃការសហការរយៈពេលយូរជាមួយអ្នកជំនួញខាងលើ។

ដោយឡែក បើយោងតាមសម្ដីអ្នកនាំពាក្យរបស់សារមន្ទីរដែលមានឈ្មោះថា Simmy Allen បានឲ្យដឹងថា ទំហំទឹកប្រាក់ដែលមហាសេដ្ឋីម្នាក់នេះបានបរិច្ចាគគឺមិនត្រូវបានបញ្ជាក់ច្បាស់លាស់ឡើយ ដោយគ្រាន់តែបង្ហើបថា មានដល់ទៅ ៨ ខ្ទង់នៃរូបិយប័ណ្ណ Shekels ឬតិចបំផុតក៏ ១ លានដុល្លារដែរ។

លើសពីនេះសារមន្ទីរដែលជាទីតំណាងឲ្យជនជាតិជ្វីហ្វដែលត្រូវមេប្រល័យពូជសាសន៍ហ៊ីត្លែរសម្លាប់រង្គាលនៅសង្គ្រាមលោកលើកទី ២ បានទម្លាយឲ្យដឹងថា ថវិកានៃសប្បុរសធម៌មួយនេះនឹងជួយដល់សារមន្ទីរដល់ទៅ ៥ ឆ្នាំ រាប់បញ្ចូលទាំងការសាងសង់មន្ទីរពិសោធន៍ថ្មីមួយផងដែរ។

បញ្ជាក់ដែរថា មហាសេដ្ឋីរុស្ស៊ីម្នាក់នេះអះអាងថា បុព្វបុរសរបស់លោកមានជាប់សែស្រឡាយជាមួយនឹងជនជាតិជ្វីហ្វ ហើយលោកបានស្នើទៅកាន់រដ្ឋាភិបាលព័រទុយហ្គាល់ក្នុងការសុំសញ្ជាតិថ្មី ដើម្បីងាយស្រួលធ្វើជំនួញនៅតំបន់អឺរ៉ុប ដ្បិតនៅចក្រភពអង់គ្លេសលែងអនុញ្ញាតចេញទិដ្ឋាការថ្មីសម្រាប់ម្ចាស់ក្លឹប Chelsea ទៀតហើយ៕

ប្រភព: timesofisrael

The post មហាសេដ្ឋីរុស្ស៊ី Abramovich បរិច្ចាគប្រាក់ខ្ទង់លានដុល្លារទៅកាន់សារមន្ទីរមួយនៅអ៊ីស្រាអែល appeared first on .

លោក roman abramovich

មហាសេដ្ឋីរុស្ស៊ី ប្ដឹងធនាគារអ៊ីស្រាអែល ជុំវិញការរារាំងកញ្ចប់ជំនួយសប្បុរសធម៌ ២លានដុល្លារ

មហាសេដ្ឋីរុស្ស៊ី ចាញ់ការតវ៉ាក្ដីជុំវិញការដាក់ទណ្ឌកម្មសេដ្ឋកិច្ចពី EU

ទោះ​បរាជ័យ​ក្នុង​ការ​សិក្សា តែ​បុគ្គល ៥ រូប​នេះ​ជោគជ័យ​លើ​វិថី​ជីវិត​ក្លាយជា​មហាសេដ្ឋី​

មហាសេដ្ឋីរុស្ស៊ីមិនគោរពសន្យា បដិសេធផ្ដល់ជំនួយដល់ប្រទេសអ៊ុយក្រែន

ក្រុម​មហាសេដ្ឋី​រុស្ស៊ី​ប្ដឹង​សហភាព​អឺរ៉ុប ជុំវិញ​ការ​ដាក់​ទណ្ឌកម្ម​សេដ្ឋកិច្ច​លើ​ពួកគេ

អាមេរិក​គ្រោង​ពិន័យ​ទឹកប្រាក់ ១ លាន​ដុល្លារ និង​រឹបអូស​យន្តហោះ​ផ្ទាល់ខ្លួន​របស់​មហាសេដ្ឋី​រុស្ស៊ី